"ᓇᖕᒥᓂᖅ ᓂᕈᐊᖅᐳᖓ ᐊᖅᑯᑎᒋᓂᐊᖅᑕᓐᓂᒃ ᓲᖃᐃᒻᒪ ᐃᓱᒪᑐᔫᒐᒪ. ᑕᒪᓐᓇ ᓴᓇᑐᓂᖅ, ᐃᓱᒪᔪᖓ, ᐱᔪᓐᓇᑎᐊᖅᑐᖅ, ᐃᓅᖃᑎᒋᓯᒪᔭᕋ, ᑭᓯᐊᓂᓕ ᐱᕙᓪᓕᐊᑎᑕᐅᓯᒪᔪᖅ ᐱᐅᔪᑎᒍᑦ ᖃᐅᔨᖃᑦᑕᖅᓯᒪᔭᒃᑯᑦ, ᐃᓄᐃᑦ ᐅᕙᓐᓂᒃ ᓴᖅᑮᒍᓐᓇᓚᐅᖅᑐᑦ ᐊᒻᒪᓗ ᑲᔪᖏᖅᓴᐃᓂᖃᑦᑐᓂ ᑲᔪᓯᑦᑎᐊᖏᓐᓂᑯᖏᓐᓄᑦ," ᐳᕆᓐᑕ ᑐᐊᒐᓐ. 

ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᕗᐊᑦ ᓯᒥᑦᒥ, ᓄᓇᑦᓯᐊᕐᒥ, ᐊᖓᔪᖅᑳᖏᑦ ᑲᑎᖦᖢᑎᒃ. ᐊᑖᑕᖓ ᐅᐃᕖᑎᑐᑦ ᑲᓇᐃᑎᔨᐅᓚᐅᖅᐳᖅ ᐃᖅᑲᖅᑐᐃᔨᕋᓛᒃᑯᑦ ᐋᑕᐹᔅᑲ ᑎᐅᓪᑕᒥ ᐊᓈᓇᒥᓂᒃ ᑲᑎᓯᓚᐅᖅᑐᖅ, ᐊᓪᓚᓄᑦ ᓂᕕᐊᖅ ᐅᐊᖕᓇᖓᓂ ᓴᔅᑳᑦᓱᐊᓐᒥ. ᓄᓇᒥᓂᒃ ᕿᒪᐃᓚᐅᖅᑐᖅ ᐅᑭᐅᖃᖅᖢᓂ 20-ᓂᒃ 30 ᐅᖓᑖᓂᑦ ᐅᑎᓚᐅᕋᓂ ᓇᓂᓯᔭᖅᑐᖅᖢᓂ ᑲᒻᐸᓂᒥᓂᒃ, ᐊᕈᐊᕋ ᐅᖅᑰᓴᕐᓂᕐᒧᑦ, 6-ᓂᒃ ᐊᕐᕌᒎᓵᖅᑐᓂᒃ. 

Aurora Heat ᐃᓄᖕᓄᑦ ᓇᖕᒥᓂᕆᔭᐅᕗᖅ ᐆᒪᔪᓂᙶᖅᑐᓂᒃ, ᓄᖑᕋᐃᓗᐊᙱᑦᑐᓂᒃ ᐊᒥᕐᓂᒃ ᐃᒋᑕᒃᓴᐅᓪᓗᑎᒃ ᐊᒡᒐᒧᑦ ᐊᒻᒪ ᐃᓯᒐᒧᑦ ᐅᖅᑰᓴᕈᑕᐅᓪᓗᑎᒃ. "ᑲᔪᓯᑦᑎᐊᖅᓯᒪᔪᖅ. ᐊᓯᖏᓐᓂᒃ ᐱᑕᖃᙱᓚᖅ, ᐊᑐᖅᑕᐅᒃᑲᓐᓂᕈᓐᓇᖅᑐᓂᒃ ᐱᖁᑎᓂᒃ ᓂᐅᕐᕈᑎᖃᕐᕕᐅᕙᒃᑐᒥ ᑕᐃᒪᐃᓐᓂᖓᓄᓪᓗ ᖁᕕᐊᒋᕙᕗᑦ ᓄᑖᖑᓗᓂ−ᓂᐅᕕᐊᕆᔭᐅᓗᓂ ᐱᖁᑎᒋᔭᐅᓗᓂ ᑕᒪᕐᒥᑦᑎᐊᕐᓗ ᑎᒍᐊᖅᓵᓕᕙᒃᑐᑦ ᐱᖃᑦᑕᖅᑐᑦ ᐱᖁᑎᑦᑎᓐᓂᒃ," ᑕᐃᒪᓐᓇ ᐅᖃᖅᖢᓂ. 

ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᐅᓪᓗᓂ ᕗᐊᑦ ᓯᒥᑦᒥ, ᑲᔪᓯᑦᑎᐊᓚᐅᖏᑦᑐᖅ, ᐃᖅᑲᐅᒪᔪᓐᓇᕐᓂᕐᒥᓂᒃ ᑐᓂᓯᓪᓗᓂ, ᐅᐸᑦᑎᐊᖃᑦᑕᕋᓗᐊᖅᑎᓪᓗᒍ. ᐃᓕᓐᓂᐊᕐᕕᒃ ᓯᕗᓪᓕᐅᔾᔭᐅᓯᒪᓚᐅᙱᑦᑐᖅ ᖃᑕᙳᑎᖏᓐᓂ, ᑭᓯᐊᓂ ᐊᔾᔨᒋᔪᓐᓃᖅᑕᖓ ᒫᓐᓇ. "ᖃᐅᔨᒃᑲᓐᓂᓚᐅᖅᑐᖓ ᑭᖑᓂᐊᒍᑦ ᐱᒻᒪᕆᐅᓚᐅᖅᑐᖅ. ᑕᐃᒪᐃᓕᐅᒃᑲᓐᓂᕐᓂᕈᒪ, ᑎᓕᐅᕋᔭᖅᐸᒃᑲ ᑭᒃᑯᓕᒫᑦ ᐃᓕᓐᓂᐊᕆᐊᖃᑦᑕᖁᓪᓗᒋᑦ ᑕᒪᓐᓇᓗ ᐱᓕᕆᐊᕆᑦᑎᐊᕐᓗᒍ," ᐊᒃᑐᐊᓂᖃᖅᑎᖦᖢᒍ.

Dragon−ᑯᑦ ᐃᑲᔪᕆᐊᖅᑐᓚᐅᖅᐳᑦ ᐊᓯᒥᖕᓂᒃ ᑕᑯᓪᓗᑎᒃ ᐊᔾᔨᒋᙱᑕᖓᓂᒃᑕᐅᖅ, ᐃᓗᐊᖅᓴᐃᓂᕐᒧᑦ ᑲᒪᒋᔭᖃᖅᐸᖕᓂᕐᒧᑦ ᐱᓕᕆᔨᙳᕌᓪᓚᓚᐅᖅᖢᓂ. ᐅᑭᐅᖅᑕᖅᑐᓕᐊᖃᑦᑕᓚᐅᖅᐳᖅ ᐊᕐᕌᒍᓄᑦ 8-ᓄᑦ ᐃᔨᓕᕆᔭᐅᓪᓗᓂ, ᐊᔪᖅᑕᐅᙱᖦᖢᓂ ᐃᓅᓯᖓ ᐊᓯᔾᔨᕋᓱᖕᓂᖓᓂ. ᐃᖅᑲᓇᐃᔮᖓ ᖁᕕᐊᒋᓚᐅᖅᐸᐅᒃ, ᑭᓯᐊᓂ ᐊᓈᓇᐅᓂᕐᒥᓄᑦ ᓈᒻᒪᓚᐅᙱᑦᑐᖅ. 

ᐊᖏᕐᕋᒥᓂᒃ ᐃᓕᓐᓂᐊᓚᐅᖅᑐᖅ ᕿᑐᕐᖓᒥᓂᒃ 5-ᖓᓂ ᖁᕝᕙᓯᓐᓂᖃᓕᕋᓱᐊᕐᓂᖓᓂ, ᓯᓚᑦᑐᓴᕐᕕᔾᔪᐊᒥ ᐃᓕᓐᓂᐊᖅᑐᓂ ᐃᓕᓐᓂᐊᑲᓐᓂᖁᓪᓗᒋᑦ. Dragon−ᑯᑦ ᐃᓕᓐᓂᐊᕈᒪᓚᐅᖅᐳᑦ ᐃᓚᓕᐅᔾᔨᔪᒪᓪᓗᑎᒃ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓂᒃ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ. ᕿᑐᕐᖓᖏᑦ ᐃᓕᓐᓂᐊᕆᐊᕌᖓᒥᒃ, ᐊᑭᓕᖅᓱᖅᑕᐅᙱᖦᖢᓂ ᐱᓕᕆᓚᐅᖅᑐᖅ, ᐃᓕᓐᓂᐊᕈᑎᒃᓴᓂᒃ ᑎᑎᕋᖅᑎᙳᖅᖢᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕈᑎᖏᓐᓄᑦ. ᑕᒪᓐᓇ ᓴᖅᑭᐸᓪᓕᐊᑐᐃᓐᓇᓚᐅᖅᓯᒪᔪᖅ ᐊᒻᒪᓗ ᓴᓇᓚᐅᖅᓯᒪᓪᓗᓂ ᓄᑖᓂᒃ ᐊᒻᒪᓗ ᓴᓇᑐᓂᕐᒥᒃ ᓄᓇᒥ ᐱᓕᕆᐊᖑᓂᐊᖅᑐᓂᒃ ᔨᐊᓗᓇᐃᒥ ᓱᕈᓯᖏᑦ ᐱᔭᕇᕋᓱᐊᕐᓂᖏᓐᓂ. 

ᑭᖑᓪᓕᕐᒥ ᐅᐸᒐᓱᒃᑕᖓ ᐃᖅᑲᓇᐃᔮᖃᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐳᓚᕋᖅᑐᓕᕆᓂᕐᒧᑦ, ᐱᓕᒻᒪᒃᓴᓂᕐᒥ . ᓯᓚᑦᑐᖅᓴᕐᕕᔾᔪᐊᖑᔪᖓ ᐅᐊᓐᓇᖓᓂ ᕚᓐᑰᕙᒥ ᐅᑎᓚᐅᖏᓂᓐᓂ ᐅᑭᐅᖅᑕᖅᑐᒧᑦ. ᐃᖅᑲᓇᐃᔮᖓ ᓱᒃᑲᓕᔪᒻᒪᕆᐅᓚᐅᖅᑐᖅ̱̱. ᑎᑎᕋᓚᐅᖅᑐᖅ ᐅᐸᓗᖓᐃᔭᐅᑎᓄᑦ ᐸᖕᓇᐅᑎᒥᑦ ᓄᓇᖃᖅᑳᖅᓯᒪᔪᓄᑦ ᐳᓚᕋᖅᑐᓕᕆᓂᖕᒧᑦ ᓄᓇᑦᑎᐊᒧᑦ ᓴᖅᑭᑦᑎᓪᓗᓂᓗ ᑐᙵᓇᕐᓂᕐᒧᑦ ᐱᓕᕆᐊᒃᓴᓂᑦ. 

ᑕᐃᒪᓕ, ᐊᑖᑕᖓ ᐃᓅᔪᓐᓃᓚᐅᕐᒪᑦ ᐊᒻᒪᓗ ᑲᔪᓯᓪᓗᓂ ᕿᒪᑦᑕᒥᓂᕐᒥᓂᒃ ᐱᓕᕆᖃᑎᖃᖅᑐᓂ ᒥᖅᑯᓕᓐᓂᒃ. ᐋᖅᑭᒃᓯᓪᓗᓂ ᐋᖅᑭᒍᑎᒃᓴᒥᒃ ᐃᑲᔪᕐᓗᒍ ᐃᕐᓂᖓ ᐅᖅᑰᑎᓪᓗᒍ ᐊᐳᒻᒧᑦ, ᖃᐅᔨᓕᕐᖢᓂᓗ ᐱᑐᐃᓐᓇᕆᐊᖃᕐᓂᖓᓂᒃ ᐱᖁᑎᐅᓂᖓᓂᒃ. ᖃᐅᔨᒪᓚᐅᖅᑐᖅ ᐱᔪᒪᔪᖃᒻᒪᕆᖕᓂᐊᖕᒪᑦ 21,000−ᓂᑦ ᐊᐃᓯᐊᓂᑦ ᐳᓚᕋᖅᑎᓂᑦ ᔭᓗᓇᐃᕝᒧᑦ ᐊᕐᕌᒍᑕᒫᑦ ᑕᑯᔭᖅᑐᕐᓗᑎᒃ ᐊᖅᓴᕐᓃᑦ. ᓴᓇᓚᐅᖅᑐᖅ ᐱᖁᑎᒥᒃ ᐃᓱᒪᒥᐅᑕᕆᓪᓗᓂᒋᑦ, ᐊᖏᒡᓕᒋᐊᖅᑎᖦᖢᓂᒋᑦ ᖃᕆᑕᐅᔭᒃᑯᑦ ᐃᓄᖕᓄᑦ ᖃᓂᒋᔭᖏᓐᓄᑦ. 

ᐃᓱᒪᒋᓪᓗᒋᑦ ᐊᑐᖅᓯᒪᔭᖏᑦ, ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓂᑦ ᒪᒃᑯᒃᑐᓂᑦ ᐃᑲᔪᕋᔭᕐᑐᖅ. "ᐃᑲᔪᖅᑎᐅᓂᖅ, ᐃᓅᓯᕐᓂᑐᐊᖅ ᐱᔾᔪᑎᖃᑐᐃᓐᓇᙱᖦᖢᓂ, ᐃᒃᐱᒋᔭᑎᓪᓗ ᐃᑲᔫᑎᖃᑦᑎᐊᕐᓇᖅᖢᓂ, ᐃᓕᖕᓄᓪᓗ ᐊᒃᑐᐊᓂᖃᑦᑎᐊᕆᓪᓗᓂ," ᓇᓗᓇᐃᖅᓯᓪᓗᓂ. ᐃᓕᓐᓂᐊᕆᐊᖏᓐᓇᖃᑦᑕᓚᐅᙱᑦᑐᖅ, ᖁᕕᐊᒋᔭᖃᓚᐅᖅᑐᖅ ᐱᙳᐊᖅᑎᓂᑦ, ᐃᓕᓐᓂᐊᖅᑏᑦ ᑲᑎᒪᔨᖏᓐᓂᑦ, ᐊᐃᕙᔨᓂᑦ ᐊᒻᒪ ᐊᑭᓕᖅᓱᖅᑕᐅᒐᓂ ᐃᑲᔪᖃᑦᑕᖅᑐᓂ.  

ᐅᑎᖅᑎᓪᓗᒍ ᐆᒻᒪᑎᖓᓃᒻᒪᑦ ᖃᓄᐃᓕᐅᖃᑦᑕᕐᓂᕐᒥᓂᒃ. "ᓇᖕᒥᓂᖁᑎᒐ ᐃᓄᖕᓄᑦ ᓇᖕᒥᓂᕆᔭᐅᕗᖅ, ᐃᒪᓐᓇ ᑐᑭᖃᖅᖢᓂ, ᐃᓱᒪᒋᔭᖃᖅᐳᖓ ᖃᓄᐃᓕᐅᕐᒪᖔᕐᒪ ᐊᓯᔾᔨᖅᓯᔪᒪᓪᓗᖓ ᓄᓇᕐᔪᐊᕐᒥᒃ ᐊᓯᔾᔨᖅᓯᔪᒪᓂᕐᒧᓪᓗ ᓄᓇᕐᔪᐊᕐᒥᒃ ᖃᓄᖅ ᐃᓄᐃᑦ ᑕᐅᑐᒃᐸᖕᒪᖔᑕ. ᓄᓇᕐᔪᐊᕐᒥᐅᑦ ᑕᐅᑐᙳᐊᖅᑕᐅᓂᖏᑦ ᓄᓇᖃᖅᑳᖅᓯᒪᔪᑦ ᐃᓄᖕᓄᑦ 7-ᓂᒃ ᑭᖑᕚᕇᓂᒃ ᓯᕗᒻᒧᑦ ᐃᖏᕐᕋᕗᑦ. ᐱᖁᑎᒐ ᐱᔭᕆᐊᑭᑦᑐᑯᓘᒻᒪᑦ ᐊᖑᓇᓱᑉᐸᑦᑕᕗᑦ ᓂᖀᑦ, ᑲᒪᒋᕙᑉᐸᕗᑦ, ᐅᖅᑰᔪᓅᖅᑎᑉᐸᑦᑕᕗᑦ, ᐊᒻᒪᓗ ᓂᐅᕕᐊᖑᓕᖅᐸᑦᑐᑎᒃ ᐃᓄᓐᓄᑦ ᐊᒻᒪᓗ ᐊᑐᖅᑕᐅᓕᖅᐸᑦᑐᑎᒃ," Dragon ᐅᖃᖅᑐᓂ. 

ᓂᐅᕕᖅᐸᒃᑐᑦ ᓱᓕ ᐅᖅᑰᔪᖁᑎᒥᓂᒃ ᐊᑐᖃᑦᑕᖅᐳᑦ ᐊᕐᕌᒍᑦ 7 ᐊᓂᒍᖅᑐᓂᒃ, ᑖᓐᓇ ᓇᖕᒥᓂᕆᔭᖓ ᐃᖏᕐᕋᔾᔪᑕᐅᕙᒃᖢᓂ ᐊᒻᒪ ᐅᑎᖅᖢᓂ. "ᐱᒻᒪᕆᐅᖕᒪᑦ, ᓵᙵᑎᓪᓗᑕ ᓲᕐᓗ ᓯᓚᐅᑉ ᐊᒃᓱᕈᕐᓇᕐᓂᖓᓂᒃ, ᐱᓇᓱᐊᕐᓗᑕ ᑕᒪᒃᑯᓂᖓ ᓇᖕᒥᓂᓕᖕᓂᒃ ᐲᔭᐃᕙᙱᑦᑐᓂᒃ, ᓈᒻᒪᒃᖢᑎᒃ ᐃᓱᒪᒋᔭᑦᑎᓐᓄᑦ ᑲᔪᓰᓐᓇᕈᓐᓇᕐᓂᕐᒧᑦ ᑲᒪᒋᔭᖃᑦᑎᐊᕐᓂᕐᒧᓪᓗ ᑭᖑᕚᒃᓴᑦᑎᓐᓄᑦ," ᑲᔪᓯᓗᓂ. 

ᐅᑭᐅᖃᖅᑎᓪᓗᒍ 60-ᓂᒃ, ᓄᖅᑲᕈᒫᕐᓂᐊᖅᓯᒪᖏᑦᑐᖅ. "ᑲᔪᓯᓂᐊᖅᐳᖓ ᐊᕈᐊᕋ ᐅᖅᑰᓴᕐᓂᕐᒧᑦ, ᓲᖃᐃᒻᒪ ᐱᔪᒃᓯᑎᑦᑎᓪᓚᕆᖕᒪᑦ ᐅᕙᓐᓂᒃ. ᖁᕕᐊᒋᑦᑎᐊᖅᑕᒃᑲ ᐃᓄᐃᑦ ᐅᕙᓐᓄᑦ ᐃᖅᑲᓇᐃᔭᖅᑐᑦ, ᐱᓕᕆᑦᑎᐊᕐᓂᖃᕋᑦᑕ ᐊᑭᓕᖅᓱᖅᑕᐅᑦᑎᐊᖅᖢᑕ. ᐊᒻᒪᓗ ᐅᖃᑦᑎᐊᕐᒥᔪᖓ ᑕᒪᒃᑯᐊ ᐃᓱᒪᓕᐅᕈᑎᐅᔪᑦ ᐊᒃᓱᐊᓗᒃ ᐃᑲᔪᕐᓂᖃᕐᒪᑕ ᐊᒻᒪᓗ ᑕᒪᓐᓇ ᖁᕕᐊᒋᑦᑎᐊᖅᑐᒍ," ᖁᕕᐊᓱᖃᑎᖃᕐᒪᑦ. Dragon−ᑯᑦ ᐊᐅᓚᑦᑎᔨᑖᓚᐅᖅᐳᑦ ᐱᕕᒃᓴᖃᖅᑎᖦᖢᓂᒋᑦ ᐃᓚᒥᓂᒡᓗ ᐱᖃᑎᖃᕈᓐᓇᖅᓯᑎᖦᖢᓂᒋᑦ, ᒫᓐᓇ ᐃᕐᖑᑕᖅᑖᕆᓕᖅᖢᓂᐅᒃ. 

"ᑮᓇᐅᔭᑐᐃᓐᓇᐅᙱᑦᑐᖅ. ᖃᓄᖅ ᐱᕕᖃᕐᓂᓐᓂᒃ ᐊᑐᓲᖑᖕᒪᖔᕐᒪ, ᐱᖃᑎᒋᖃᑦᑕᖅᑕᕋ, ᐊᒻᒪ ᐊᔾᔨᒌᙱᓐᓂᕋ ᓄᓇᕐᔪᐊᕐᒥ," ᐳᕆᓐᑕ ᑐᐊᒐᓐ ᐃᓱᓕᑉᐳᖅ. ᓇᒻᒥᓂᖅ ᐊᖅᑯᑎᔅᓴᒥᓂᒃ ᓂᕈᐊᖃᑦᑕᖅᑐᖅ, ᐅᐱᓐᓇᕋᓂ ᐃᓱᒪᑐᔫᒻᒪᑦ ᐊᒻᒪᓗ ᓴᖅᑭᓚᐅᖅᑕᖓ ᒪᑭᒪᒍᓐᓇᖅᑐᓂ ᐃᓅᓯᓕᕆᓂᕐᒧᑦ ᑮᓇᐅᔭᓕᐅᕈᑕᐅᒍᓐᓇᖅᑐᓂ ᓄᖅᑲᖓᑎᑦᑎᖏᓪᓗᓂ ᑭᖑᕚᕆᓂᐊᖅᑕᑎᓐᓂᒃ. ᑲᔪᓯᑎᓪᓗᒍ ᐊᑖᑕᖓ ᓄᓇᓕᖕᓂ ᐱᕈᖅᓴᕝᕕᒋᓚᐅᖅᑕᖓᓂ, ᐃᖅᑲᓇᐃᔮᖃᓕᓵᕐᒪᑦ ᐊᒡᒐᒥᓂᒃ ᐆᒻᒪᑎᒥᓂᒡᓗ ᐅᖅᑰᑎᑦᑎᔪᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.