"ᓴᖅᑭᔮᖅᑎᒃᑲᓐᓂᕐᓗᒍ ᐃᖅᑭᓖᑦ ᐃᓕᖅᑯᓯᖓ ᐱᒻᒪᕆᐅᓛᖑᕗᖅ ᐅᕙᓐᓄᑦ, ᓲᖃᐃᒻᒪ ᑲᑎᙵᔭᕆᐊᖃᕋᑦᑕ ᐃᓕᖅᑯᓯᑐᖃᑦᑎᓐᓄᑦ," ᐅᖃᓚᐅᖅᐳᖅ ᐳᕆᑦᓂ ᓈᑦᓕ. ᐱᕈᖅᓴᓚᐅᖅᓯᒪᔪᖅ ᕗᐊᑦ ᐳᕋᓐᑎᓐᓯᒥ, ᐊᖓᔪᖅᑳᖏᒃ ᓄᓇᒋᓪᓗᓂᒋᑦ. ᖃᑕᙳᑎᖏᑦ ᐊᑯᓂᐊᓗᒃ ᓄᓇᒦᖃᑦᑕᓚᐅᖅᐳᑦ ᒫᓐᓇᓗ ᓈᑦᓕ ᐃᖅᑲᓇᐃᔭᓕᖅᖢᓂ ᓄᓇᒥ ᐊᐅᓚᑦᑎᔨᐅᓪᓗᓂ Dehcho ᓄᓇᖃᖅᑳᖅᓯᒪᔪᓄᑦ. ᓄᓇᕐᔪᐊᒥ ᑲᑎᒪᔨᐅᖃᑕᐅᓯᒪᓕᖅᑐᖅ ᐊᕐᕌᒍᓄᑦ ᐱᖓᓱᓄᑦ, ᒪᒃᑯᒃᑐᓄᑦ ᐱᓕᕆᐊᒃᓴᖃᖅᑎᑦᑎᕙᒃᖢᓂ, ᐅᔾᔨᕆᔭᐅᓕᖅᑎᑦᑎᕙᒃᖢᓂ ᖃᐅᔨᒪᓂᕆᔭᐅᔪᓂᒃ ᓅᑎᑦᑎᓂᕐᒥᒃ, ᐅᖃᐅᓯᕐᒥᒃ ᐆᒻᒪᖅᑎᑦᑎᒃᑲᓐᓂᕐᓂᕐᒥᒃ, ᑲᔪᖏᖅᓴᐃᔨᐅᓂᕐᒥᒃ ᑲᒪᔨᐅᓂᕐᒥᒡᓗ. ᐱᓕᕆᖃᑦᑕᕆᕗᖅ ᑲᑎᙵᑎᑦᑎᓇᓱᒃᖢᓂ ᐃᓐᓇᕐᓂᒃ ᒪᒃᑯᒃᑐᓂᒡᓗ, ᐱᓕᕆᕙᒃᖢᓂ ᐱᓕᕆᐊᒃᓴᓂᒃ ᑐᙵᕕᓕᖕᓂᒃ ᐊᓪᓚᐃᑦ ᐱᒻᒪᕆᐅᒋᔭᖏᓐᓂᒃ ᑐᙵᕕᖏᓐᓂᒡᓗ ᐱᓕᕆᖃᑎᖃᖅᐸᒃᖢᓂᓗ ᓯᓚᑖᓃᑦᑐᓂᒃ ᑲᑐᔾᔨᖃᑎᒌᓂᒃ ᑲᔪᓯᑎᑦᑎᔪᒪᓪᓗᓂᒋᑦ. Dehcho ᓄᓇᓕᖕᓂ ᐅᖃᐅᔾᔪᐃᔨᒋᔭᐅᕗᖅ ᐅᑯᓄᖓ, NWT on the Land Partnership-ᑯᓐᓄᑦ. 

ᒪᕐᕉᖕᓂᒃ ᐊᖏᔫᖕᓂᒃ ᐱᓕᕆᐊᒃᓴᖅᑕᖃᖅᐳᖅ ᓈᑦᓕ ᑲᒪᒋᔭᒃᓴᖃᖅᖢᓂ, Dehcho ᒪᒃᑯᒃᑐᑦ ᓇᔪᒐᖃᕐᕕᖏᓐᓂᒃ ᐊᒻᒪ ᐃᓄᐃᑦ ᖃᐅᔨᒪᔭᑐᖃᖏᓐᓂᒃ ᑕᖕᒫᖅᓯᒪᕝᕕᒃ ᐊᒻᒪ ᓄᓇᐃᓐᓇᕐᒥ ᐊᐅᓪᓛᖅᓯᒪᓂᖅ. ᒪᒃᑯᒃᑐᓄᑦ ᐆᒪᔪᓕᕆᓂᕐᒧᑦ ᐃᓕᓐᓂᐊᕐᓂᖅ ᑲᑐᔾᔨᖃᑎᖃᖅᐳᖅ ᐅᐃᓪᕗᕆᑦ ᓘᕆᐊᐃ ᓯᓚᑦᑐᖅᓴᕐᕕᒡᔪᐊᖓᓂ ᐊᒻᒪ ᓄᓇᖃᖅᑳᖅᓯᒪᔪᑦ ᐃᒪᕐᒥᐅᑕᓕᕆᔨᖏᓐᓂᒃ, ᒫᓐᓇᓕᓴᕐᓂᒃ ᖃᐅᔨᓴᖅᑐᓕᕆᓂᕐᒥᒃ ᐱᓕᕆᑎᑦᑎᕙᒃᖢᑎᒃ ᐃᖅᑭᓖᑦ ᐃᓕᖅᑯᓯᖏᓐᓂᒃ ᐱᓕᕆᑎᑦᑎᕙᒃᖢᑎᒃ ᒪᒃᑯᒃᑐᓄᑦ. ᑕᒪᓐᓇ ᐊᐅᓪᓛᖅᓯᒪᓂᖅ ᐱᓕᕆᐊᖑᕙᒃᐳᖅ ᐊᔾᔨᒌᙱᑦᑐᓂ ᐃᓂᓂ ᐊᕐᕌᒍᑕᒫᑦ ᓄᓇᓕᖕᒥᐅᓪᓗ ᐃᖅᑲᓇᐃᔭᖅᑎᑦᑎᕙᒃᖢᑎᒃ ᓄᓇᓕᖕᒥᐅᓂᒃ ᐃᖅᑲᓇᐃᔭᕐᓂᐊᖅᑐᓂᒃ ᑕᖕᒫᖅᓯᒪᕝᕕᒋᔭᐅᔪᒥ. ᑭᖑᓪᓕᖅᐹᖅ ᐊᕐᕌᒍ ᐱᓕᕆᐊᖑᓚᐅᖅᐳᖅ ᓇᕼᐋᓂ ᑲᓇᑕᒥ ᒥᕐᙳᐃᖅᓯᕐᕕᖕᒥ, ᐱᓕᕆᖃᑎᖃᖅᖢᑎᒃ ᒥᕐᙳᐃᖅᓯᕐᕕᓕᕆᔨᒃᑯᓐᓂ ᑲᓇᑕᒥ. ᑖᓐᓇ ᐱᓕᕆᐊᖑᔪᖅ ᐱᓇᓱᐊᕈᓯᓕᒫᒧᑦ ᐃᖏᕐᕋᑎᑕᐅᕙᒃᐳᖅ ᐱᕕᒃᓴᖃᖅᑎᑦᑎᕙᒃᖢᓂᓗ ᐱᖃᓐᓇᕇᓐᓇᕈᓐᓇᕐᓂᕐᒥᒃ ᐃᓄᖕᓂᒡᓗ ᓇᑭᙶᕈᓘᔭᖅᑐᓂᒃ ᐃᓕᑦᑎᖃᑦᑕᐅᑎᔪᓐᓇᕐᓂᕐᒥᒃ.

ᐱᓕᕆᓂᖅ ᐊᕕᒃᑐᖅᓯᒪᓂᐅᔪᒥ ᒪᑐᐃᖅᑎᑦᑎᓯᒪᕗᖅ ᓈᑦᓕᒧᑦ ᐊᒻᒪ ᓴᖅᑭᑎᑦᑎᓪᓗᓂ ᐱᕕᒃᓴᓂᒃ ᓲᕐᓗ ᖃᖓᑕᔪᓐᓇᕐᓂᕐᒥᒃ ᓇᕼᐋᓂ ᑲᓇᑕᒥ ᒥᕐᙳᐃᖅᓯᕐᕕᖕᒧᑦ. ᐊᑲᕐᕆᔮᕐᓇᙱᑦᑐᒦᖦᖢᓂ, ᑲᙳᓱᓗᐊᕈᓐᓃᖅᖢᓂ ᖃᐅᔨᓪᓗᓂᓗ ᑕᐅᑐᒃᑕᖓ ᓄᓇᕐᔪᐊᒥ ᐊᓯᔾᔨᖅᓯᒪᓕᕐᓂᖓᓂᒃ. ᖃᐅᔨᓯᒪᓕᖅᐳᖅ ᑲᑉᐱᐊᓱᖕᓂᕆᔭᖓ ᐊᑦᑎᒃᓯᕚᓪᓕᖅᓯᒪᓕᕐᓂᖓᓂᒃ ᖁᕕᐊᒋᔭᖃᖅᖢᓂᓗ ᐱᕕᒃᓴᕆᔭᒥᓂᒃ. ᓅᑉᐸᓪᓕᐊᓂᖅ ᐊᐅᓚᑦᑎᓂᕐᒥᒃ ᐱᓕᕆᐊᒃᓴᓂᒃ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᑎᒍᑦ ᑐᙵᓱᒃᑎᑕᐅᓯᒪᕗᖅ ᐊᓯᔾᔨᕐᓂᐅᔪᖅ ᐃᓕᑦᑎᕙᓪᓕᐊᓂᕐᒧᑦ ᐱᕈᖅᐸᓪᓕᐊᓂᕐᒧᓪᓗ ᐱᕕᒃᓴᐅᔪᓐᓇᖅᑐᓂᒃ. ᐃᓛᓐᓂᒃᑯᑦ ᐱᔭᒃᓴᖃᓗᐊᖅᐸᒃᐳᖅ ᐃᖅᑲᓇᐃᔮᒥᓄᑦ ᐱᓕᕆᔭᕆᐊᖃᓕᕋᒥ. 

"ᐅᓪᓗᒥᐅᓕᖅᑐᖅ ᐃᓅᓯᖃᓕᖅᑎᓪᓗᑕ, ᑭᓱᓕᒫᑦ ᐱᔭᒃᓴᖃᓗᐊᓕᕐᓂᖏᓐᓄᑦ ᒫᓐᓇ, ᐳᐃᒍᖅᐸᓪᓕᐊᓕᖅᐳᒍᑦ ᐃᓕᖅᑯᓯᑐᖃᑦᑎᓐᓂᒃ, ᑲᑎᙵᓂᑦᑎᓐᓂᒃ ᐃᓕᖅᑯᓯᑐᖃᑦᑎᓐᓄᑦ." 

ᓈᑦᓕ ᐱᓕᕆᐊᕆᕙᒃᑕᖓ ᓄᓇᓕᖕᓂ ᐅᖃᐅᔾᔪᐃᔨᐅᓪᓗᓂ ᒪᓂᓴᐅᑎᖃᖅᐸᒃᖢᓂ ᓄᓇᒥ ᑮᓇᐅᔭᖁᑎᒋᔭᐅᔪᓂᒃ ᑲᔪᓯᑎᑦᑎᓂᐊᕐᓗᓂ ᓄᓇᒥ ᑐᙵᕕᓕᖕᓂᒃ ᐱᓕᕆᐊᒃᓴᓂᒃ ᐃᓕᖅᑯᓯᑐᖃᕐᓄᓪᓗ ᐱᓕᕆᐊᒃᓴᓂᒃ, ᐃᑲᔪᓕᕐᒥᓗᒋᓪᓗ ᓄᓇᓖᑦ ᑲᑐᔾᔨᖃᑎᒌᓪᓗ ᐱᓇᔪᒃᑎᓪᓗᒋᑦ, ᐃᖅᑲᐃᑎᑉᐸᒡᓗᒋᑦ ᐃᑲᔪᕐᓗᒋᓪᓗ ᑎᑎᕋᖅᓯᓂᕐᒥᒃ ᐱᓇᔫᑎᒋᔭᐅᔪᓂᒃ ᑲᔪᓯᑎᑦᑎᔪᓐᓇᕐᓂᐊᕐᒪᑕ ᐱᓕᕆᐊᒃᓴᓂᒃ ᓄᓇᓕᖏᓐᓂ. ᐃᓕᑦᑎᕚᓪᓕᖅᐸᒃᑭᕗᖅ ᐃᓐᓇᕐᓂᑦ ᐊᒥᖅᑳᖃᑎᖃᖅᑎᓪᓗᒋᑦ ᓯᓚᑐᓂᕐᒥᓂᒃ, ᐃᓅᖃᑎᖃᖅᐸᖕᓂᕐᒥᒃ ᐅᒃᐱᕆᔭᖃᖅᐸᖕᓂᕐᒥᒡᓗ.

"ᓄᓇ ᐃᓕᓐᓂᐊᕐᕕᒋᒐᑦᑎᒍᑦ. ᐃᓐᓇᐃᑦ ᐊᒻᒪ ᖃᐅᔨᒪᓂᓖᑦ ᐃᓕᓴᐃᔨᒋᒐᑦᑎᒍᑦ." 

ᐃᓕᓯᒪᔭᖓ ᐃᖅᑲᓇᐃᔮᒥᒍᑦ ᐃᒃᐱᒍᓱᑦᑎᐊᕐᓂᕐᒥᒃ, ᕿᓄᐃᓵᕈᓐᓇᕐᓂᕐᒥᒃ ᐊᒻᒪ ᐱᕚᓪᓕᕈᑎᒋᓯᒪᑦᑎᐊᖅᑕᖓ. ᖁᕕᐊᒋᔭᖃᖅᑐᖅ ᐊᒥᖅᑳᖃᑎᖃᕐᓂᕐᒥᒃ ᐃᓕᑕᒥᓂᒃ ᐊᐱᖅᓱᖅᑕᐅᑎᓪᓗᒍ ᓂᕆᐅᒃᖢᓂ ᒪᒃᑯᒃᑐᑦ ᐃᓕᑦᑎᔪᒪᓂᐊᕐᓂᖏᓐᓂᒃ ᐃᓕᖅᑯᓯᖏᓐᓂᒃ. ᓈᑦᓕ ᐅᖃᐅᓯᕐᒥᒃ ᐃᓕᑦᑎᕙᓪᓕᐊᕗᖅ ᓇᖕᒥᓂᖅ 32-ᓂᒃ ᐅᑭᐅᖃᖅᖢᓂ, ᖃᐅᑕᒫᑦ ᐊᔪᕈᓐᓃᖅᓴᖅᐸᒃᖢᓂ ᐊᒻᒪ ᑲᑎᙵᑎᖦᖢᓂᐅᒃ ᐃᓕᖅᑯᓯᖓᓗ ᖃᐅᑕᒫᑦ ᐃᓅᓯᕆᔭᒥᓄᑦ. ᐊᔪᕈᓐᓃᖅᓴᖃᑦᑕᕐᓗᓂ, ᐊᔪᕐᓇᙱᓐᓂᖅᓴᐅᓕᖅᐸᒃᐳᖅ.  

ᐅᖃᐅᔾᔨᒋᐊᕈᑎᒋᔭᖓ ᐃᓕᓐᓂᐊᖅᑎᓄᑦ ᐊᐅᓪᓚᕆᐊᖃᖅᐸᒃᑐᓄᑦ ᓄᓇᒋᔭᒥᓂᑦ ᐃᓕᓐᓂᐊᕆᐊᕐᓗᑎᒃ ᐃᖅᑲᓇᐃᔮᕆᔪᒪᔭᒥᓄᓪᓘᓐᓃᑦ ᐋᖅᑭᒃᓱᐃᕙᓪᓕᐊᓗᑎᒃ ᖃᓄᐃᙱᑦᑎᐊᖅᑐᓂᒃ ᓱᓕᑦᑎᐊᖅᑐᓂᒡᓗ ᐃᓅᖃᑎᖃᖅᐸᖕᓂᕐᒥᒃ ᐊᔪᕈᓐᓃᖅᓴᖅᑎᑦᑎᔨᓂᒃ ᓲᕐᓗ ᐃᓕᓴᐃᔨᓂᒃ ᐃᓐᓇᕐᓂᒡᓘᓐᓃᑦ. "ᖃᓄᐃᙱᑦᑐᖅ ᐅᖃᕆᐊᒃᓴᖅ ᐃᑲᔪᖅᑕᐅᔭᕆᐊᖃᕐᓂᕐᓂᒃ. ᓇᓂᓯᖏᓐᓇᐅᔭᕐᓂᐊᖅᐳᑎᑦ ᑭᓇᒥᑭᐊᖅ ᐃᓕᑦᑎᕝᕕᒋᔪᓐᓇᖅᑕᕐᓂᒃ ᒪᑐᐃᙶᑦᑎᐊᖅᑐᒥᒃ ᐊᒻᒪ ᐃᓕᖕᓂᒃ ᐊᑲᕐᕆᔮᕈᓐᓃᕐᓗᑎᑦ," ᑎᓕᐅᕆᕗᖅ. ᐃᓕᓐᓂᐊᕆᐊᖅᓯᒪᓪᓗᓂ Grand Prairie-ᒥ ᐊᒻᒪ ᐃᖅᑲᓇᐃᔭᓕᖅᖢᓂ ᐱᓕᕆᕙᓪᓕᐊᓂᕐᒧᑦ ᐱᓕᕆᕝᕕᖕᒥ, ᓈᑦᓕ ᓇᓂᓯᓚᐅᖅᐳᖅ ᐊᔪᕆᖅᓱᖅᑕᐅᓂᕐᒥᒃ ᐊᒻᒪ ᐃᑲᔪᖅᓱᐃᓂᕐᒥᒃ ᐊᒻᒪ ᖁᕕᐊᒋᔭᖃᖅᖢᓂ ᐃᖃᐃᓕᓴᕐᕕᓕᐊᕆᐊᒃᓴᖅ. "ᐃᓂᒋᔭᓕᒫᓐᓂ ᐃᓂᒋᔭᓐᓂ, ᓇᓂᓯᖏᓐᓇᐅᔭᖅᐳᖓ ᖃᓄᖅ ᐅᕙᓐᓂᒃ ᑲᔪᓯᓂᖃᑦᑎᐊᕈᓐᓇᕐᒪᖔᕐᒪ," ᖁᕕᐊᓱᒃᑐᖅ. 

"ᐃᓅᓯᖅ ᐃᓛᓐᓂᒃᑯᑦ ᐃᔪᕐᓇᕈᓐᓇᖅᐳᖅ, ᐊᒻᒪ ᓇᒧᙵᐅᑐᐃᓐᓇᕋᔭᖅᐳᑎᑦ ᐃᓱᒪᓚᐅᖅᓯᒪᙱᑕᕐᓄᑦ. ᑕᐃᒪᓕ ᐱᐅᓂᖅᐹᒥᒃ ᐊᑐᕋᓱᑐᐃᓐᓇᖅᐸᒃᐳᑎᑦ, ᐊᓱᐃᓪᓛᒃ ᐱᓕᕆᑦᑎᐊᓕᕐᓗᑎᑦ. ᑕᐃᒪᓐᓇ ᐱᔪᒪᓂᖃᐃᓐᓇᐅᔭᖅᐳᖓ. ᐃᓱᒪᒐ ᑭᓱᒧᒃᑭᐊᖅ ᐃᓱᒪᓕᑐᐊᕈᒪ, ᑲᔪᓯᑐᐃᓐᓇᕆᐊᖃᖅᐳᖓ," ᓈᑦᓕ ᐅᖃᓚᐅᖅᐳᖅ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᑲᑉᐱᐊᓱᙱᓪᓗᑎᑦ ᐃᒡᕕᐅᒋᐊᒃᓴᖅ. ᑲᑉᐱᐊᓱᙱᓪᓗᑎᑦ ᐃᓚᓕᐅᑎᙱᑦᑕᕆᐊᒃᓴᖅ, ᓲᖃᐃᒻᒪ ᑭᓇ ᐃᓂᖃᕈᒪᕙ ᓇᓂᑐᐃᓐᓇᖅ? ᐊᓱᐃᓛᒃ ᐊᑲᕐᕆᔮᕈᓐᓃᕐᓗᑎᑦ." ᐊᓯᒥᓄᑦ ᐱᓕᕆᕙᙱᖦᖢᓂ, ᓇᒧᙵᐅᕈᓘᔭᖅᐸᒃᖢᓂ ᐃᓄᒋᐊᒃᑐᓄᑦ, ᐃᓅᓯᕐᒥᓂᒃ ᐱᕈᖅᑎᑦᑎᓚᐅᖅᐳᖅ, ᑐᑭᖃᑦᑎᐊᖅᑐᓂᒃ ᐃᓅᖃᑎᖃᖅᐸᒃᖢᓂ, ᖃᐅᔨᕚᓪᓕᖅᐸᒃᖢᓂ ᓇᒡᓕᒍᓱᒃᖢᓂᓗ ᐃᑲᔪᖅᑐᐃᕙᒃᖢᓂ. 

ᐱᔪᒪᓂᖃᓕᕌᖓᒥ, ᓈᑦᓕ ᑕᐅᑐᒃᐸᒃᐳᖅ ᐃᓚᒥᓄᑦ ᓇᑭᙶᕐᓂᕐᒥᓄᓪᓗ, ᕼᐅᐊᓐ ᑰᑉ ᖃᓂᒋᔮᓂ. ᐃᓱᒪᓕᕌᖓᒥ ᑭᓱᒥᒃᑭᐊᖅ ᐃᖅᑲᓇᐃᔮᒧᑦ ᐊᒻᒪ ᖃᓄᖅ ᐱᐅᓯᒋᐊᖅᑎᑦᑎᔪᓐᓇᕐᒪᖔᑦ ᓴᐳᔾᔨᓯᒪᔪᓐᓇᕐᒪᖔᓪᓗ ᓄᓇᒥᒃ, ᐃᓱᒪᕙᒃᐳᖅ ᐊᖏᕐᕋᒥᓂᒃ ᐊᒻᒪ ᐃᓕᖅᑯᓯᑐᖃᒃᑯᑦ ᐱᒻᒪᕆᐅᒋᔭᐅᔪᓂᒃ ᐃᓕᓐᓂᐊᖅᑎᑕᐅᓚᐅᕐᓂᕐᒥᓂᒃ. 

ᖁᕝᕙᖅᓴᐃᓂᖅ ᐊᓪᓚᐃᑦ ᐃᓕᖅᑯᓯᖏᓐᓂᒃ ᐱᒻᒪᕆᐅᓛᖑᓪᓗᓂ ᑖᔅᓱᒧᖓ, ᐃᖅᑲᓇᐃᔭᕐᓂᖅ ᓄᓇᒥ ᐊᐅᓚᑦᑎᔨᐅᓪᓗᓂ Dehcho ᓄᓇᖃᖅᑳᖅᓯᒪᔪᓄᑦ ᓈᒻᒪᑦᑎᐊᖅᑐᖅ ᐳᕆᑦᓂ ᓈᑦᓕᒧᑦ. ᐃᓕᑦᑎᕙᓪᓕᐊᓪᓗᓂ ᑲᑎᖃᑎᖃᖅᐸᒃᖢᓂᓗ ᐃᓐᓇᕐᓂᒃ ᐃᓕᓐᓂᐊᕐᕕᐊᕈᓯᕐᓂ ᓄᓇᒥ, ᖃᐅᑕᒫᑦ ᐃᖅᑲᓇᐃᔭᕆᐊᖅᐸᒃᐳᖅ ᐊᓯᔾᔨᖅᓯᔪᓐᓇᖅᐸᒃᖢᓂᓗ ᐱᕈᖅᐸᓪᓕᐊᓂᕐᒥᓂ ᐃᓅᓂᕐᒥᓂ. ᐊᑲᕐᕆᔮᕐᓇᙱᑦᑐᒦᖦᖢᓂ ᓄᓇᒨᖅᖢᓂᓗ, ᐱᕕᒃᓴᖃᑦᑎᐊᖅᐳᖅ ᐃᓕᑦᑎᕙᓪᓕᐊᓂᕐᒥᒃ ᐃᓕᖅᑯᓯᕐᒥᓂᒃ ᐃᑲᔪᖅᐸᒃᖢᓂᓗ ᐊᓯᒥᓂᒃ ᑕᐃᒪᐃᓕᐅᖃᑕᐅᔪᓐᓇᕐᓂᕐᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.