ᐆᒻᒪᑎᒥᓂᒃ ᒪᓕᒃᖢᓂ ᒪᒃᑯᒃᑐᙳᖅᐸᓪᓕᐊᓕᖅᖢᓂᓗ. ᓂᑰᓪ ᐳᕋᐅᓐ ᑕᕐᓂᖓᑕ ᐊᑎᖓ ᖁᖅᓱᖅᑕᖅ ᑎᖕᒥᐊᑦ ᐊᕐᓇᖅ ᐃᓅᓚᐅᖅᓯᒪᔪᖅ ᑖᒻᓴᓐ, ᒫᓂᑑᐸᒥ. ᐱᕈᖅᓴᓚᐅᖅᓯᒪᔪᖅ ᐅᐊᐳᑕᓐ, ᒫᓂᑑᐸᒥ, ᐊᒻᒪᓗ ᓅᓚᐅᖅᓯᒪᓪᓗᓂ ᐹᔅᒧᑦ ᒪᒃᑯᒃᑑᓪᓗᓂ. ᐳᕌᓐᑕᓐ ᓯᓚᑦᑐᖅᓴᕐᕕᒡᔪᐊᕐᒧᐊᓚᐅᖅᓯᒪᕗᖅ ᐅᐃᓂᐸᐃᒡᒧᑦ ᓅᓚᐅᖅᑳᕋᓂ ᑕᐃᑲᓃᖏᓐᓇᖅᖢᓂᓗ. ᒫᓂᑑᕙᓕᒫᒥ ᓄᓇᖃᖅᓯᒪᔪᖅ. 

ᑭᐱᙳᐃᔭᓕᕌᖓᒥ, ᐱᕈᖅᓰᓂᕐᒥᒃ ᖁᕕᐊᒋᔭᖃᖅᐳᖅ. ᐃᖅᑲᓇᐃᔮᑎᒍᓪᓕ, ᓇᖕᒥᓂᖅ ᓇᖕᒥᓂᖁᑎᖃᖅᐳᖅ. ᐃᓕᓐᓂᐊᓚᐅᖅᐳᖅ ᓄᓇᖃᖅᑳᖅᑐᑦ ᐱᖃᓐᓇᕇᑦ ᑲᑐᔾᔨᖃᑎᒌᖏᓐᓂ ᐊᒻᒪ ᐃᓕᑦᑎᓪᓗᓂ ᖃᕋᓴᐅᔭᒃᑯᑦ ᐊᔪᕈᓐᓃᖅᑕᐅᕙᒃᑐᓂᒃ ᓇᖕᒥᓂᖅᓱᕈᓐᓇᖅᓯᔪᒪᓪᓗᓂ ᓇᖕᒥᓂᖅᑖᕈᓐᓇᓕᖅᖢᓂᓗ. 

ᓯᕗᓪᓕᖅᐹᒥ ᐃᖅᑲᓇᐃᔮᕆᓚᐅᖅᓯᒪᔭᖓ 15-ᓂᒃ ᐅᑭᐅᖃᑐᐃᓐᓇᖅᖢᓂ ᐊᐅᓚᑦᑎᔨᐅᓪᓗᓂ ᐊᐅᔭᒃᑯᑦ ᐊᐅᓪᓛᖅᓯᒪᑎᑦᑎᓂᕐᒥᒃ ᒪᒃᑯᒃᑐᓄᑦ. ᖁᕕᐊᒋᑦᑎᐊᓚᐅᖅᑕᖓ ᐃᖅᑲᓇᐃᔮᖅ. ᑕᐃᑲᙵᑦ, ᐃᖅᑲᓇᐃᔭᓕᓚᐅᖅᐳᖅ The Pas Action Centre-ᒥ, ᐅᐸᒡᕕᐅᕙᒃᑐᖅ ᓄᑕᖅᑲᓄᑦ ᒪᒃᑯᒃᑐᓄᓪᓗ ᑮᓇᐅᔭᓕᐅᓗᐊᙱᑦᑐᓃᙶᖅᓯᒪᔪᓄᑦ. ᑕᐃᑲᓂ ᐃᖅᑲᓇᐃᔭᓚᐅᖅᐳᖅ ᒪᕐᕉᖕᓄᑦ ᐊᕐᕌᒎᖕᓄᑦ ᑭᓯᐊᓂ ᓅᑉᐸᓪᓕᐊᓕᕋᒥ, ᐃᖅᑲᓇᐃᔮᖏᑦ ᐊᒃᓱᕈᕐᓇᖅᓯᕙᓪᓕᐊᑐᐃᓐᓇᓚᐅᖅᐳᑦ ᐊᖏᓂᖅᓴᓂᒃ ᐊᒃᓱᕈᕐᓇᖅᑐᓂᒃ. ᐳᕋᐅᓐ ᒪᒃᑯᒃᑐᓂᒃ ᐱᓕᕆᖃᑎᖃᐃᓐᓇᐅᔭᖅᑐᖅ. ᐃᓚᖓᑦ ᐊᓕᐊᓇᐃᒋᓂᖅᐹᕆᓚᐅᖅᑕᖓ ᐃᖅᑲᓇᐃᔮᕆᓪᓗᒍ ᒪᒃᑯᒃᑐᓄᑦ ᐃᓕᓴᐃᔨᐅᓪᓗᓂ ᓴᙱᒃᑎᒋᐊᖅᑎᑦᑎᓂᕐᒥᒃ ᖃᑕᙳᑎᒌᓂᒃ ᐱᓕᕆᐊᒃᓴᒥ. ᑖᓐᓇ ᐃᖅᑲᓇᐃᔮᖅ ᐃᓕᑦᑎᓚᐅᖅᐳᖅ ᐱᒻᒪᕆᐅᔪᓂᒃ ᓲᕐᓗ, "ᒪᒃᑯᒃᑐᓂᒃ ᐃᓕᓐᓂᐊᖅᑎᑦᑎᔪᒪᔪᖓ. ᑲᔪᖏᖅᓴᐃᔨᐅᔪᒪᔪᖓ." 

ᐳᕋᐅᓐ ᐅᔾᔨᕈᓱᓕᓚᐅᕆᕗᖅ ᐃᓕᓴᐃᔪᒪᓂᕐᒥᓂᒃ ᒪᒃᑯᒃᑐᓄᑦ ᑐᑭᓯᔭᐅᔪᓐᓇᖅᑐᒥᒃ ᓲᖃᐃᒻᒪ ᐊᒥᓱᑦ ᐊᔪᕈᓐᓃᖅᓴᒐᒃᓴᐃᑦ ᐋᖅᑭᒃᑕᐅᓯᒪᓚᐅᙱᒻᒪᑕ ᓄᑕᖅᑲᑦ ᐃᓕᑦᑎᕝᕕᒋᔪᓐᓇᖅᑕᖏᓐᓂᒃ ᑐᙵᕕᖃᖅᑎᑕᐅᓗᑎᒃ ᐃᓕᑦᑎᕙᓪᓕᐊᓂᕐᒧᑦ ᐊᑐᖅᐸᒃᑕᖏᓐᓂᒃ. ᑭᖑᓂᐊᒍᑦ, ᓱᕈᓰᑦ ᐊᓂᕙᓚᐅᖅᐳᑦ ᐃᖅᑲᐅᒪᙱᖦᖢᑎᒃ ᐃᓕᓐᓂᐊᖅᑕᒥᓂᒃ. ᑕᐃᒪᐃᑦᑐᒥᒃ ᑕᑯᔪᒪᓚᐅᖅᐳᖅ ᐊᓯᔾᔨᕐᓂᐅᔪᒥᒃ. 

ᑕᐃᑲᙵᑦ, ᐳᕋᐅᓐ ᑲᒪᔨᙳᓚᐅᖅᐳᖅ ᐊᒻᒪ ᑮᓇᐅᔭᖃᖅᑎᑦᑎᔨᓄᑦ ᐊᐅᓚᑦᑎᔨᙳᖅᖢᓂ ᒪᒃᑯᒃᑐᓄᑦ ᐃᙱᖅᑎᓄᑦ. ᓇᒧᙵᐅᑲᑕᓚᐅᖅᑑᒃ ᑲᓇᑕᓕᒫᒧᑦ, ᐊᖏᔪᐊᓗᖕᒥ ᕚᓯᒦᖦᖢᑎᒃ ᑐᔪᕐᒥᐊᖃᖅᐸᒃᖢᑎᒡᓗ, 172 ᐅᖓᑖᓂ ᑕᖅᑭᓂᒃ 6-ᓂᒃ. ᐅᖃᖅᑎᙳᓚᐅᖅᐳᖅ, ᖃᐅᔨᑎᑦᑎᓪᓗᓂ ᐃᙱᖅᑎᓂᒃ ᐊᒻᒪ ᐅᖃᓪᓚᒍᓐᓇᑦᑎᐊᓕᖅᖢᓂ ᐃᓄᒋᐊᓄᑦ. ᐊᒃᓱᕈᕐᓇᓚᐅᖅᑐᖅ ᓯᕗᓪᓕᕐᒥ ᑭᓯᐊᓂ ᓱᖏᐅᑎᓕᓚᐅᖅᐳᖅ. 

ᐋᓐᓂᐊᕕᒡᔪᐊᕐᓇᖅ ᐱᒋᐊᖅᑎᓪᓗᒍ, ᐳᕋᐅᓐ ᖁᕝᕙᓯᖕᓂᖅᓴᒥ ᐱᓕᕆᓚᐅᖅᐳᖅ ᐊᒻᒪ ᐃᑲᔪᖅᑎᐅᓪᓗᓂ ᓄᑕᖅᑲᓄᑦ ᖃᑕᙳᑎᒌᓄᓪᓗ ᐱᔨᑦᑎᕋᖅᑎᓄᑦ. ᐃᓄᓕᕆᔨᐅᑲᓴᓚᐅᖅᐳᖅ ᑐᕌᒐᖃᖅᖢᓂᓗ ᐊᖓᔪᖅᑳᕆᔭᐅᔪᓂᒃ ᕿᑐᕐᖓᒥᓂᒃ ᐅᑎᖅᑎᑦᑎᓇᓱᒃᖢᓂ, ᐃᑲᔪᖅᐸᒃᖢᓂᒋᑦ ᐃᒡᓗᒃᓴᖅᓯᐅᖅᑎᓪᓗᒋᑦ, ᐃᖅᑲᓇᐃᔮᒃᓴᖅᓯᐅᖅᑎᓪᓗᒋᑦ, ᑭᓱᑐᐃᓐᓇᑦᑎᐊᓂᒃ ᐱᔭᕆᐊᖃᖅᑕᖏᓐᓂᒃ. ᑕᖃᓗᐊᓕᓚᐅᖅᐳᖅ, ᐱᓕᕆᒃᑲᓐᓂᕈᒪᓕᖅᖢᓂᓗ ᓲᖃᐃᒻᒪ ᐊᓯᔾᔩᖅᑰᔨᓚᐅᙱᓐᓂᕐᒥᓂᒃ. ᐃᒡᓗᖓᑕ ᐃᓗᐊᓃᖅᑰᔨᓕᓚᐅᕆᕗᖅ. 

ᐳᕋᐅᓐ ᐱᕈᖅᓰᕙᓪᓕᐊᓕᓚᐅᖅᐳᖅ ᐱᕈᖅᓯᐊᓂᒃ ᐃᒡᓗᖓᑕ ᐃᓗᐊᓂ ᐊᒻᒪ ᖃᐅᔨᓴᖅᐸᒃᖢᓂ. ᐊᓪᓛᑦ ᐱᕈᖅᓰᓚᐅᖅᓯᒪᕗᖅ ᑯᐊᓐᒥᒃ. ᓇᖕᒥᓂᖅᑖᕈᒪᓚᐅᖅᐳᖅ ᑲᑎᑎᑦᑎᔪᓐᓇᖅᑐᒥᒃ ᖁᕕᐊᒋᔭᒥᓂᒃ. ᐊᒥᓱᐊᖅᑎᖅᖢᓂ ᐃᓱᒪᖃᖃᑦᑕᓚᐅᖅᑐᖅ ᑭᓯᐊᓂ ᐃᓄᐃᑦ ᐅᖃᖃᑦᑕᓚᐅᖅᑐᑦ ᐱᔭᕐᓂᙱᓗᐊᕐᓂᖓᓂᒃ. ᐃᓱᒪᖃᓚᐅᖅᐳᖅ ᓇᖕᒥᓂᕆᔭᐅᔪᒥᒃ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᓲᕐᓗ YMCA−ᒥᒃ. ᓱᓕ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᓕᐅᖅᐸᓪᓕᐊᕗᖅ, ᐃᓄᖕᓄᑦ ᑐᓴᐅᒪᔪᓕᕆᔾᔪᑎᓂᒃ ᐊᒻᒪ ᑭᓱᑐᐃᓐᓇᓂᒃ ᐱᔭᕆᐊᖃᖅᑕᖏᓐᓂᒃ ᓴᖅᑭᑎᑦᑐᒪᓪᓗᓂᒋᑦ. 

ᐃᓕᓐᓂᐊᖅᑕᒥᓄᑦ, ᐳᕋᐅᓐ ᐃᓕᓐᓂᐊᕐᕕᐊᓗᖕᒥ ᐊᖓᔪᖅᑳᖓ ᐃᑲᔪᓚᐅᖅᐸᖓ ᑎᑎᕋᖃᑎᖃᖅᖢᓂ ᓯᓚᑦᑐᖅᓴᕐᕕᒡᔪᐊᕐᒥ ᐊᒻᒪ ᐃᓕᓐᓂᐊᖅᑎᓄᑦ ᐊᑐᖅᑐᐊᕈᒪᔾᔪᑎᓂᒃ. ᐃᓱᒪᓚᐅᕐᑐᖅ ᐃᓕᓐᓂᐊᕆᐊᖃᕋᓱᒋᓪᓗᓂᐅᒃ ᐱᕐᕈᓗᐊᕿᔪᓄᑦ ᐊᒻᒪ ᑐᐊᕕᕐᓇᖅᑐᓕᕆᓂᕐᒧᑦ ᐃᓕᓐᓂᐊᕈᑎᓂᒃ, ᐱᓕᕆᐊᒃᓴᐅᔪᖅ ᐃᑲᔪᕐᓂᕐᒧᑦ ᒪᑯᓂᖓ ᓄᓇᒥ ᐃᑭᕐᔪᐊᖅᑐᓂᒃ ᐊᒻᒪ ᓴᔪᒃᐱᓪᓚᒃᑐᓂᒃ. ᐊᑕᐅᓯᕐᒥᒃ ᐊᕐᕌᒍᒥᒃ ᐃᓕᓐᓂᐊᖃᑕᐅᓚᐅᖅᑐᖅ ᑭᓯᐊᓂ ᐱᐅᒋᓗᐊᓚᐅᙱᑕᖓ ᒪᒃᑯᒃᑐᓂᒃ ᐱᓕᕆᖃᑎᖃᖅᖢᓂ. 

ᖃᔅᓯᐊᕐᔪᐃᑦ ᐊᕐᕌᒍᐃᑦ ᐊᓂᒍᖅᑎᓪᓗᒋᑦ, ᐳᕋᐅᓐ ᐃᓄᐃᑦ ᐱᔪᓐᓇᐅᑎᖏᓐᓄᑦ ᐃᓕᓐᓂᐊᓕᓚᐅᖅᓯᒪᕗᖅ ᐸᓖᓯᙳᖅᖢᓂ ᒪᓕᒐᓕᕆᔨᙳᕈᒪᓪᓗᓂᓘᓐᓃᑦ, ᐃᖅᑲᓇᐃᔭᕈᒪᓪᓗᓂ ᓄᓇᕐᔪᐊᒥ ᑲᑐᔾᔨᖃᑎᒌᓄᑦ. ᐊᕐᕌᒍ ᐊᓂᒍᖅᑎᓪᓗᒍ, ᐅᐱᒋᔭᐅᓂᕐᒧᑦ ᖁᕝᕙᓯᖕᓂᖅᑖᓚᐅᖅᐳᖅ ᐱᓕᕆᐊᖑᔪᒥ, ᐊᓈᓇᙳᖅᖢᓂᓗ. ᐱᔭᕇᓚᐅᙱᓚᖅ ᐃᓕᓐᓂᐊᖅᑕᒥᓂᒃ, ᑭᓯᐊᓂᓕ ᐊᑭᖃᙱᑦᑐᒥᒃ ᐱᓕᒻᒪᒃᓴᖅᑎᑕᐅᓚᐅᖅᐳᖅ ᐊᔾᔨᒌᙱᑦᑐᓂᑦ ᐱᓕᕆᕝᕕᖕᓂᑦ. ᑭᖑᓂᐊᒍᑦ, ᓇᖕᒥᓂᖅ ᓇᖕᒥᓂᖅᑖᕈᒪᓕᓚᐅᖅᐳᖅ ᐃᓕᓐᓂᐊᖅᐸᒃᖢᓂᓗ ᖃᕆᑕᐅᔭᒃᑯᑦ MasterClass−ᑯᑎᒍᑦ. "ᐅᖃᕋᔭᖅᐳᖓᓕ ᐃᓕᑦᑎᕙᓪᓕᐊᔪᒪᓗᐊᙳᐊᕋᒪ ᐊᒻᒪ ᐅᐃᕆᓯᒪᒐᓚᒃᖢᖓ. ᓄᖅᑲᓚᐅᖅᓯᒪᙱᑦᑐᖓ. ᐃᓕᑕᕆᔭᐅᔾᔪᑎᑖᖅᓯᒪᙱᑦᑐᖓ, ᑭᓯᐊᓂ ᐱᓕᒻᒪᒃᓴᖅᓯᒪᕐᔪᐊᖅᐳᖓ," ᐅᓂᒃᑳᖅᐳᖅ. 

ᐊᖏᓛᖅ ᐊᕝᕕᐊᕈᑕᐅᕙᒃᑐᖅ ᐃᓱᒪᓕᐅᕆᓂᖅ ᖃᓄᖅ ᐊᑎᖃᕐᓂᐊᕐᒪᖔᑦ ᓇᖕᒥᓂᕆᔭᖓ ᐊᒻᒪ ᐋᖅᑭᒃᓱᐃᓂᖅ ᓇᖕᒥᓂᖃᕐᓂᕐᒧᑦ ᐸᕐᓇᐅᑎᒥᒃ. ᐳᕋᐅᓐ ᖃᐅᔨᓚᐅᖅᐳᖅ ᐅᓄᖅᑐᑦ ᓇᖕᒥᓂᖃᕐᓂᕐᒧᑦ ᐸᕐᓇᐅᑎᑦ ᐱᖁᑎᓄᑦ ᑐᙵᕕᓕᖕᓂᒃ ᓇᖕᒥᓂᖃᕐᓂᕐᒧᑦ ᐸᕐᓇᐅᑎᓂᒃ ᐊᔪᕐᓇᙱᓐᓂᖅᓴᐅᓂᖏᓐᓂᒃ ᑭᓯᐊᓂ ᐱᔭᕆᑐᓂᖅᓴᐅᕗᖅ ᐱᔨᑦᑎᕋᕐᓂᕐᒧᑦ ᑐᙵᕕᖃᕐᓂᖓᓄᑦ. ᐃᓕᓐᓂᐊᖃᑦᑕᖅᓯᒪᕗᖅ ᐃᑲᔪᖅᑕᐅᔪᒪᕙᒃᖢᓂᓗ ᑭᓯᐊᓂ ᐱᔭᕆᑐᔫᓪᓗᓂ ᐱᓕᕆᓂᐅᕗᖅ. 

ᐅᖃᐅᔾᔨᒋᐊᕈᑎᒋᔭᖓ ᒪᒃᑯᒃᑐᓄᑦ ᓇᖕᒥᓂᖅᑖᕈᒪᔪᓄᑦ ᐃᒪᓐᓇᐅᕗᖅ, "ᐆᒻᒪᑎᓯ ᒪᓕᒡᓗᒍ, ᓲᖃᐃᒻᒪ ᓈᓚᓚᐅᕈᒪ ᑭᒃᑯᓕᒫᓂᒃ ᐊᕙᑎᓐᓃᑦᑐᓂᒃ, ᒫᓐᓇ ᓄᒫᓱᒃᑐᒻᒪᕆᐅᓇᔭᖅᐳᖓ." ᖃᑕᙳᑎᖏᑦ ᐋᓐᓂᐊᓯᐅᖅᑎᐅᖁᔭᐅᓚᐅᖅᐳᖅ ᐃᓄᓕᕆᔨᐅᓗᓂᓘᓐᓃᑦ, 9-ᒥ 5-ᒧᑦ ᐃᖅᑲᓇᐃᔮᖃᕐᓗᓂ ᑕᐃᒪᐃᒍᒪᓚᐅᙱᓚᖅ. ᐅᖃᐅᔾᔪᖅᑕᐅᓂᐅᔪᖅ ᐳᕋᐅᓐ ᑐᓴᕋᔪᒃᐸᒃᑕᖓ ᐊᓯᖏᓐᓂ ᓇᖕᒥᓂᖃᖅᑎᐅᔪᓂᑦᑕᐅᖅ. 

ᑲᒪᒋᓂᐊᕐᓗᒍ ᐃᓱᒪᒥᒍᑦ ᖃᓄᐃᖏᑦᑎᐊᕐᓂᖅ, ᐳᕋᐅᓐ ᐱᕕᒃᓴᖃᕐᓂᖅᓴᐅᓕᖅᐳᖅ ᑕᐃᒪᙵᓂᑦ. ᐱᓱᔪᑐᐃᓐᓇᖅᐸᓚᐅᖅᐳᖅ, ᓯᓚᒦᑲᑕᒃᐸᒃᖢᓂ. ᑕᒪᓐᓇ ᐅᖃᐃᓐᓇᐅᔭᖅᐸᒃᐳᖅ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ. ᖃᖓᑦᑎᐊᓵᖅ, ᐊᓂᖅᓵᖅᑐᕆᐅᖅᓴᖃᑦᑕᓕᓚᐅᖅᐳᖅ, ᓱᓕᓂᕋᐃᕙᒃᖢᓂ, ᐸᑦᑕᒃᑐᖅᐸᒃᖢᓂ, ᑐᓴᕐᓈᖅᐸᒃᖢᓂ ᐊᒻᒪ ᐱᕈᖅᓰᕙᒃᖢᓂ. 

ᐊᕐᕌᒍᑦ ᑕᓪᓕᒪᑦ ᑕᐅᑐᒃᖢᒍ, ᐳᕋᐅᓐ ᓂᕆᐅᒃᐳᖅ ᓇᖕᒥᓂᕆᔭᖓ ᐃᖏᕐᕋᑦᑎᐊᓕᕐᓂᖓᓂᒃ ᐊᒻᒪ ᐃᖅᑲᓇᐃᔭᖅᑎᖃᑦᑎᐊᖅᖢᓂ. ᓂᕆᐅᒃᐳᖅ ᓴᖅᑭᑎᑦᑎᔪᒪᓪᓗᓂ ᓄᓇᓕᖕᓂ ᐃᑭᐊᖅᑭᕕᒃᑯᑦ, ᐃᒻᒪᖄ ᖃᕋᓴᐅᔭᒃᑰᕈᑎᒥᒃ ᐱᑕᖃᕐᓗᓂ ᒪᒃᑯᒃᑐᑦ ᐃᑲᔪᖅᑕᐅᔪᓐᓇᕐᓗᑎᒃ ᐃᑲᔪᖅᑕᐅᔭᕆᐊᖃᕈᑎᒃ ᐊᑐᕐᓗᑎᒃ ᖃᓄᐃᓕᐅᕐᓂᕐᒧᑦ ᒪᒥᓴᕐᓂᕐᒥᒃ. ᑲᑎᖃᑎᖃᕈᒪᖕᒥᔪᖅ ᓄᓇᖃᖅᑳᖅᓯᒪᔪᓂᒃ ᓄᓇᕐᔪᐊᓕᒫᒥ ᐃᓱᒪᒋᔭᖏᓐᓂᒃ ᑐᓴᖅᑎᑦᑎᔪᓐᓇᖁᓪᓗᒋᑦ. ᐱᕈᖅᓰᕕᓕᐅᕈᒪᖕᒥᔪᖅ, ᐃᑲᔪᖅᑕᐅᓗᓂ ᒪᒃᑯᒃᑐᓄᑦ ᐊᒻᒪᓗ ᐱᕈᖅᓰᓗᓂ ᓂᕿᓂᒃ.  "ᑕᒪᓐᓇ ᑲᒪᓇᒻᒪᕆᒃᑐᖅ, ᑭᓯᐊᓂᓗ, ᐱᔪᒃᓯᑎᑦᑎᔪᒪᑐᐃᓐᓇᖅᐳᖓ ᓴᙱᓂᖅᑖᖅᑎᑦᑎᔪᒪᓪᓗᖓᓗ ᐊᒥᓱᓂᒃ ᒪᒃᑯᒃᑐᓂᒃ ᖃᓄᑐᐃᓐᓇᑦᑎᐊᖅ," ᐅᖃᓚᐅᖅᐳᖅ ᖁᕕᐊᓱᒃᖢᓂ. 

ᑭᖑᓪᓕᖅᐹᖅ ᐅᖃᐅᓯᒃᓴᖓ ᐅᖃᐅᔾᔭᐅᓵᓕᖁᓇᔭᖅᑕᖓ, "ᓱᓕᔪᒥᒃ, ᓱᓕᑦᑎᐊᖅᑐᒥᒃ ᐃᓅᓯᕐᒥ ᐊᓂᒍᐃᑦᑎᐊᕈᒪᒍᕕᑦ, ᓇᓂᓯᔭᕆᐊᖃᖅᐳᑎᑦ ᖃᓄᖅ ᐃᓕᖕᓂᒃ ᓇᒡᓕᒋᔪᓐᓇᕐᒪᖔᖅᐱᑦ ᓇᐅᒃᑯᓕᒫᖅ, ᓇᓂᓯᔭᕆᐊᖃᖅᐳᑎᑦ ᐃᓕᖕᓂᒃ ᓯᕗᓪᓕᖅᐸᐅᑦᑎᐅᑎᔪᓐᓇᕐᓂᕐᒥᒃ. ᐃᓄᖕᓂ ᖃᓂᒋᔭᕐᓂ ᐱᑕᖃᕐᓂᐊᖅᐳᖅ, ᐱᖃᓐᓇᕆᔭᕐᓂᒃ ᐃᓚᖕᓂᓪᓗ, ᐃᓕᖕᓂᒃ ᖁᕕᐊᓱᔾᔮᙱᑦᑐᓂᒃ... ᑲᔪᓯᑦᑎᐊᕈᒪᒍᕕᑦ, ᐃᒻᒥᓂᒃ ᓇᒡᓕᒋᔭᕆᐊᖃᖅᐳᑎᑦ, ᐊᒻᒪᓗ ᐃᒻᒥᓂᒃ ᐅᒃᐱᕆᔭᕆᐊᖃᖅᑐᑎᑦ ᐊᒻᒪᓗ ᐃᓚᖏᓐᓄᑦ ᐃᓄᖕᓄᑦ ᑕᕝᕙᐅᕗᑏᕆᐊᖃᕈᕕᑦ, ᖃᓄᐃᓕᐅᕆᐊᖃᖅᑕᕐᓂᒃ ᐱᓕᕆᔭᕆᐊᖃᖅᐳᑎᑦ, ᑲᔪᓯᑦᑎᐊᕈᒪᒍᕕᑦ ᖁᕕᐊᓱᒡᓗᑎᓪᓗ? ᑕᐃᒪᐃᓕᐅᕆᐊᖃᖅᐳᑎᑦ." 

ᐊᒥᓱᓂ ᐊᔾᔨᒌᖏᑦᑐᓂ ᐃᖅᑲᓇᐃᔮᖃᓚᐅᖅᐳᖅ ᐃᖅᑲᓇᐃᔮᖓᓂ ᑭᓯᐊᓂ ᐃᓱᐊᓂ, ᓂᑰᓪ ᐳᕋᐅᓐ ᒪᓕᓚᐅᖅᐳᖅ ᐆᒻᒪᑎᒥᓂ ᐊᒻᒪ ᑐᕌᖅᑎᑦᑎᓪᓗᓂ ᒪᒃᑯᒃᑐᓄᑦ ᐊᒻᒪ ᐱᕈᖅᓯᐊᓄᑦ. ᐆᒃᑐᓚᐅᖅᐳᖅ ᐱᓕᕆᐊᒃᓴᓂ ᐊᓯᒥᓄᑦ ᐃᓄᖕᓄᑦ ᐊᔪᙱᑦᑎᐊᕋᔭᕋᓱᒋᓪᓗᓂᐅᒃ ᑭᓯᐊᓂ ᐱᓕᕆᔭᕆᐊᖃᓚᐅᖅᐳᖅ ᖁᕕᐊᓱᒍᑎᒋᔭᒥᓂᒃ. ᒪᒃᑯᒃᑐᓂᒃ ᐱᓕᕆᖃᑎᖃᖅᖢᓂ ᐱᕈᖅᓯᐊᓂᒡᓗ ᐱᕈᖅᓰᕙᒃᖢᓂ ᐊᓕᐊᓇᐃᒋᓂᖅᐹᕆᓚᐅᖅᐸᐅᒃ. 9-5-ᒨᕈᓐᓇᓚᐅᖅᑑᒐᓗᐊᖅ ᑭᓯᐊᓂᓕ ᐆᒪᖅᑰᔨᓕᓚᐅᖅᐳᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.