"ᖃᐅᔨᒪᓚᐅᖅᑐᖓ ᕿᔪᓕᕆᔨᐅᔾᔮᙱᓐᓇᒪ. ᖃᐅᔨᒪᓚᐅᖅᑐᖓ ᑲᖐᓱᑐᐃᓐᓇᔾᔮᖏᓐᓂᓐᓂᒃ ᐊᒻᒪᓗ ᑯᑭᒻᒥᒃ. ᓲᖃᐃᒻᒪ ᐃᓕᑦᑎᓚᐅᕋᒪ ᐋᖅᑭᒃᓯᒪᓂᒃᓴᖓᓂᒃ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᑲᔪᓯᓪᓗᖓᓗ ᓯᓚᑦᑐᖅᓴᕐᕕᖕᒧᑦ, ᑕᐃᒪᓐᓇ ᐃᑲᔪᕐᖢᓂ ᐃᖅᑲᓇᐃᔮᓐᓄᑦ," ᑳᓚ ᓯᓯᐅᓪ ᓈᓴᐃᒃᑲᓐᓂᕐᖢᓂ. ᑖᓐᓇ ᓛᒃ ᓯᑑᓪ ᓄᓇᖃᖅᑳᖅᓯᒪᔪᓂᑦ ᐃᓚᒋᔭᐅᔪᖅ ᑕᓐᑐ ᐸᐃᒥᐅᑕᐅᓪᓗᓂ ᐃᖅᑲᓇᐃᔭᖅᐸᒃᖢᓂᓗ Matawa First Nations Management−ᑯᓐᓄᑦ ᓄᓇᓕᖕᓂ ᓇᑉᐸᖅᑎᖅᑕᐅᓯᒪᔪᓄᑦ ᐱᓕᕆᐊᒃᓴᓄᑦ ᐊᐅᓚᑦᑎᔨᒋᔭᐅᓪᓗᓂ. ᐊᐅᓚᑦᑎᖃᑦᑕᖅᐳᖅ ᐃᒡᓗᕐᔪᐊᓂᒃ, ᑮᓇᐅᔭᖃᖅᑎᑦᑎᓂᕐᒥᒃ, ᖃᐅᔨᒃᑲᐃᔨᓂᒃ, ᐱᓕᕆᐊᒃᓴᓄᑦ ᐱᓕᕆᖃᑎᒌᓂᒃ ᐊᒻᒪ ᐋᖅᑭᒃᓯᒪᓂᒃᓴᖏᓐᓂᒃ ᐱᒋᐊᕐᓂᖓᓂ ᐱᐊᓂᒃᓯᓂᕐᒧᑦ. ᐊᓂᒍᐃᓚᐅᖅᑐᖅ ᐱᔭᕇᕈᓯᐊᖅᓯᒪᓪᓗᓂ ᐃᒡᓗᒃᓴᓂᒃ ᑎᑎᕋᐅᔭᖅᑎᐅᓂᕐᒧᑦ ᐊᒻᒪ ᐊᕐᕌᒍᓄᑦ 22-ᓄᑦ ᐱᓕᕆᖃᑦᑕᖅᓯᒪᓪᓗᓂ. 

ᐱᓕᕆᐊᖓᑕ ᐃᓚᒋᓪᓗᓂᐅᒃ, ᐃᒡᓗᓕᕆᓂᕐᒧᑦ ᖃᐅᔨᓴᖃᑦᑕᖅᓯᒪᔪᖅ, ᑐᒃᓯᕋᐅᑎᓂᒃ ᑎᑎᕋᖅᐸᒃᖢᓂ, ᐱᓕᕆᖃᑎᒌᓂᒃ ᐊᐅᓚᑦᑎᓪᓗᓂ ᐊᒻᒪ ᑳᑦᑐᓛᓂᒃ ᐊᐅᓚᑦᑎᓪᓗᓂ. ᖃᐅᔨᓴᖅᑎᐅᓯᒪᔪᖅ ᐊᒻᒪᓗ ᐱᓕᕆᓪᓗᓂ ᐅᖃᐅᔾᔨᒋᐊᖅᑎᐅᓪᓗᓂ ᓄᓇᓖᑦ ᐊᑐᖅᐸᒃᑕᖏᑦ ᐊᐅᓚᔪᓐᓇᖁᓪᓗᒋᑦ ᑖᒃᑯᓄᖓ ᑲᑎᒪᔨᓄᑦ, ᑐᑭᒧᐊᒃᑎᖦᖢᓂᒋᑦ ᐱᕙᓪᓕᐊᓂᒃᑯᑦ ᐱᓕᕆᐊᒃᓴᖏᑦ ᓴᓇᔭᐅᖁᓪᓗᒋᑦ. 

ᐊᑖᑕᖓ ᐊᖏᕐᕋᐅᔾᔨᕙᓚᐅᖅᓯᒪᔪᖅ ᐅᖃᓕᒫᒐᕐᓂᑦ ᐊᒻᒪᓗ ᐃᓪᓗᓕᐅᖅᑐᓂ ᐸᕐᓇᒍᑎᓂᑦ, ᓇᒻᒥᓂᖅ ᐃᓪᓗᓕᐅᕈᒪᓪᓗᓂ. ᓯᓯᐅᓪ ᓯᖓᐃᓕᓚᐅᖅᑐᖅ ᒪᒃᑯᒃᖢᓂ ᖃᐅᔨᓪᓗᓂᓗ ᐃᓕᓐᓂᐊᕆᐊᒃᑲᓐᓂᕆᐊᖃᓕᕐᓂᕐᒥᓂᒃ ᕿᑐᕐᖓᒥᓂᒃ ᐱᕈᖅᓴᐃᔭᖅᑐᖅᖢᓂ. ᖃᐅᔨᒪᓪᓗᓂ ᓱᓕ ᑖᔅᓱᒥᖓ ᑕᐅᑐᙳᐊᖅᑕᒥᓂᒃ ᐃᒡᓗᓕᐅᕐᓂᕐᒥᒃ, ᐱᔪᒪᓕᓚᐅᖅᑐᖅ ᑎᑎᕋᐅᔭᕐᓂᕐᒧᑦ ᐱᓕᕆᔾᔪᑎᓄᑦ ᐱᓕᕆᐊᒃᓴᒥ. 

ᐊᓂᒍᐃᓂᕐᒧᑦ ᐅᓪᓗᖅ ᐊᔪᕐᓇᓚᐅᖅᑐᖅ. "ᐱᓕᕆᐊᖃᕐᔪᐊᓚᐅᖅᑐᖅ ᐱᓇᔪᒃᖢᓂᓗ ᐊᒃᓱᕈᕐᓇᕐᖢᓂᓗ, ᐃᓱᒪᖓ ᑕᐃᑲᓃᓚᐅᕋᓗᐊᖅᑎᓪᓗᒍ ᐱᔭᕇᕋᓱᒃᓗᓂ. ᐅᖃᐅᔾᔭᐅᓚᐅᕋᑦᑕ ᑕᐃᑲᓂ ᐃᓕᓐᓂᐊᕕᒻᒥ ᐱᖓᓱᐃᓐᓇᐅᓪᓗᑕ ᐱᔭᕇᕐᓂᐊᓚᐅᕋᑦᑕ. ᐃᓚᒋᔭᐅᓚᐅᕋᒪ ᑖᒃᑯᓄᖓ ᐱᖓᓱᓄᑦ ᑕᐃᑲᙵᓂᑦ ᐊᕐᕌᒍᒥ. ᐱᓕᕆᓪᓚᕆᒍᒪᖃᑦᑕᓚᐅᖅᐳᖅ ᐊᑯᓂᑲᓪᓚᒡᓗ," ᐃᖅᑲᐅᒪᕗᖅ. ᐃᓚᖓᑦ ᐊᔪᙱᓐᓂᐅᔪᖅ ᐃᓕᓚᐅᖅᑕᖓ ᑎᑎᕋᕆᐊᕐᖓᕐᓂᖅ, ᐊᔪᙱᓐᓂᕆᔭᖓ ᐅᓪᓗᒥᒧᑦ ᑎᑭᖦᖢᒍ.

ᓯᓯᐅᓪ ᐊᐳᖅᑕᕈᑎᖃᖃᑦᑕᓚᐅᖅᐳᖅ ᐃᖅᑲᓇᐃᔭᓕᓵᖅᑎᓪᓗᒍ ᓲᖃᐃᒻᒪ ᐃᓄᐃᑦ ᐊᑐᖅᑕᐅᓂᖅᓴᐅᕙᓚᐅᕐᒪᑕ ᐊᕐᓇᓄᑦ ᑎᑎᕋᕐᕕᖕᒦᓐᓂᖅᓴᐅᓪᓗᑎᒃ ᐊᒻᒪ ᐱᓕᕆᓚᐅᖅᓯᒪᓪᓗᓂ ᐱᓕᕆᕝᕕᖕᒥ. ᐃᓄᐃᑦ ᑕᑯᕙᓚᐅᙱᒻᒥᔪᑦ ᐊᒥᓱᓂᑦ ᓄᓇᖃᖅᑳᖅᓯᒪᔪᓂᑦ ᐊᕐᓇᓂᑦ ᐱᓕᕆᐊᖏᓐᓂᑦ. ᐅᑭᐅᖅᑕᖅᑐᒨᓚᐅᖅᑐᖅ 20-ᓂᒃ ᐅᑭᐅᓕᒃ ᐊᕐᓇᖅ ᐃᖅᑲᓇᐃᔭᖅᑐᓂ ᖃᐅᔨᓴᖅᑎᐅᓪᓗᓂ ᐊᖏᔪᒧᑦ ᐃᓪᓗᓕᐅᕐᕕᐅᔪᒧᑦ ᐊᒻᒪᓗ ᖃᕿᐊᖅᓯᔪᒻᒪᕆᐅᓪᓗᓂ ᐊᖏᕐᕋᖅᓯᒪᖏᓐᓂᖓᓄᑦ ᐃᕐᓂᖓ. 

ᐃᕐᓂᖓ ᐱᖃᑎᒋᓪᓗᒍ ᖁᕕᐊᓱᒃᑎᑦᑎᓇᔭᓚᐅᖅᑐᖅ, ᑭᓯᐊᓂ ᖃᐅᔨᒪᓚᐅᖅᑐᖅ ᑮᓇᐅᔭᓕᐅᕆᐊᖃᕐᓂᕐᒥᓂᒃ ᖃᑕᙳᑎᖏᓐᓄᑦ ᐃᑲᔪᕐᓗᒋᑦ ᐊᒻᒪᓗ ᑕᒪᓐᓇ ᐱᓕᕆᐊᖅ ᐃᑲᔪᓚᐅᖅᑐᖅ ᓂᐅᕕᖅᑎᓪᓗᒍ ᓯᕗᓪᓕᖅᐹᒥ ᐃᒡᓗᒥᓂᒃ. ᖃᐅᔨᒪᔪᖅ ᐱᑦᑕᐃᓕᖃᑦᑕᕋᒥ ᓲᖃᐃᒻᒪ ᐊᕐᓇᒥᒃ ᐱᓕᕆᒐᔪᓚᐅᙱᑦᑐᖅ. Iit ᓄᑖᖑᓚᐅᖅᑐᖅ ᐅᕙᑦᑎᓐᓄᓕᒫᖅ ᐊᒻᒪᓗ ᐊᕝᕕᐊᕈᑎᖄᕐᔪᓚᐅᖅᑐᖅ ᑕᐃᒪᓐᓇ," ᐅᖃᖅᖢᓂ. ᑕᐅᑐᓚᐅᖅᖢᒍ ᓲᕐᓗ, ᐅᔪᕈᖓ ᕿᑯᕐᒥ ᐱᓕᕆᓲᖅ ᐃᕐᓂᖓᓗ ᕿᔪᓕᕆᔨᐅᔪᒪᓕᖅᖢᓂ.

ᐅᓪᓗᒥᐅᓕᖅᑐᖅ ᐱᓕᕆᖃᑎᖃᖅᐸᓕᖅᑐᖅ ᐃᓄᓐᓂᒃ ᐃᑲᔪᖅᑐᐃᔪᓂᒃ ᐊᒻᒪᓗ ᕿᑐᕐᖓᖏᑦ ᐊᖏᔪᑦᑎᐅᒋᓪᓗᑎᒃ. ᓯᓯᐅᓪ ᐱᕕᖃᕐᓂᖅᓴᐅᔪᖅ ᐃᖕᒥᓄᑦ, ᐊᕿᔭᖅᑎᐅᓪᓗᓂ ᐃᓕᑦᑎᕙᓪᓕᐊᓪᓗᓂᓗ ᒥᖅᓱᕐᓂᕐᒥᒃ ᓇᖕᒥᓂᖅ ᐊᓐᓄᕋᔾᔨᐅᕈᓐᓇᖅᓯᓂᐊᕐᒪᑦ. ᓄᑖᖑᓪᓗᓂ ᐊᔪᙱᓐᓂᐅᔪᖅ ᑖᔅᓱᒧᖓ ᐊᒻᒪᓗ ᐱᕕᖃᖅᑎᖦᖢᓂᐅᒃ ᐃᓕᑦᑎᓂᕐᒧᑦ. "ᓯᕗᒧᐊᖅᐸᓪᓕᐊᔪᖓ, ᐊᒃᓱᕈᓗᐊᙱᑦᑐᖓ ᐃᓱᒪᑐᐃᓐᓇᕐᓗᖓᓗ ᐅᖃᐅᓯᕆᑐᐃᓐᓇᕐᓗᒍᓗ," ᓇᓗᓇᐃᖅᓯᓪᓗᓂ. 

ᓯᓯᐅᓪ ᐊᓐᓄᕌᖅᓯᒪᐃᓐᓇᖅᓯᒪᔪᖅ ᒧᒥᖅᑎᐅᓪᓗᓂ 12-ᓂᒃ ᐅᑭᐅᖃᓕᕋᒥ ᒧᒥᖅᑎᑕᐅᓪᓗᓂᓗ ᓂᔾᔭᐅᓯᔭᖅᑐᓂᒃ ᑕᐃᔭᐅᔪᒥᒃ ᔨᐊᓐᑦ. ᐋᖅᑭᒃᓱᒐᓕᐅᓲᖑᖕᒥᔪᖅ, ᑕᖅᓯᖅᓱᐃᕙᒃᑭᓪᓗᓂ, ᐃᖃᐃᓕᓴᖅᐸᒃᖢᓂ ᐊᒻᒪ ᐃᓚᒥᓂᒃ ᖁᕕᐊᒋᔭᖃᖅᐸᒃᖢᓂ. ᐊᓃᕆᐊᒃᓴᖅ ᐊᓕᐊᓇᐃᒋᑦᑎᐊᖅᑕᖓ, ᐊᒻᒪᓗ ᑐᖅᖢᕋᖅᖢᓂ, ᐊᐅᓪᓛᖅᓯᒪᓪᓗᓂ ᐊᒻᒪ ᐊᑭᓯᑲᑕᒃᖢᓂ. ᐃᒻᒥᓂᒃ ᑎᑎᕋᑦᑎᐊᓚᐅᖅᓯᒪᙱᒃᑲᓗᐊᖅᖢᓂ, ᒫᓐᓇ ᑎᑎᕋᓕᕆᕗᖅ ᐅᓂᒃᑳᒥᓂᒃ ᓴᓂᕌᒍᑦ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᓪᓗᓂ ᐊᖏᕐᕋᒥᓂᒃ ᕿᒪᐃᔪᒪᓂᕐᒥᒃ ᐱᕕᒃᓴᖃᓕᕈᒪᓗᓂ ᐃᖅᑲᓇᐃᔭᕐᓂᕐᒥᒃ ᐃᓕᓐᓂᐊᕐᕕᖕᒥᒡᓘᓐᓃᑦ ᐱᔪᒃᓯᓂᖃᖅᐳᖅ. "ᖁᕕᐊᒋᒍᒃ, ᐊᒃᐸᖅᑎᓪᓗᒍ. ᖁᔭᒋᕙᔅᓯ ᒫᓐᓇ ᐊᒻᒪ ᖁᔭᓕᓗᓯ ᐱᕕᖃᖅᑎᑕᐅᒐᔅᓯ. ᖁᕕᐊᓇᖅᑐᖅ ᓴᓇᑐᓗᓂ. ᖁᕕᐊᒋᓗᒍ ᐃᓅᓯᖅ ᖁᕕᐊᓱᒃᓗᓂ ᓇᖕᒥᓂᖅ ᐃᓱᒪᑦᑎᐊᕐᓂᕐᓂ, ᖃᐅᔨᓗᑎᓪᓗ ᖃᓄᐃᓕᐅᕈᓐᓇᕐᒪᖔᖅᐱᑦ," ᐅᖃᖅᑐᖅ. ᖃᓄᑐᐃᓐᓇᖅ ᐅᖃᕈᓐᓇᕈᓂ ᒪᒃᑯᖕᓂᖅᓴᒧᑦ ᓇᖕᒥᓂᖅ ᐃᒪᐃᓐᓇᔭᖅᑐᖅ, ""ᐱᓕᕆᓗᑎᑦ ᐱᓕᕆᐊᕆᔭᕐᓂᒃ. ᖁᕕᐊᒋᑐᐃᓐᓇᕐᓗᒍ ᐃᓅᓯᖅ. ᐃᓱᒪᐃᑦ ᐃᓱᒪᒋᑐᐃᓐᓇᕐᓗᒍ ᐊᒻᒪᓗ ᐃᓕᖕᓂᒃ ᐃᖏᕐᕋᑎᓪᓗᑎᑦ. ᑲᔪᓯᑐᐃᓐᓇᕆᑦ. ᐊᓕᐊᓇᐃᒍᓲᑎᖃᕆᑦ."  

ᐱᕈᖅᓴᓪᓗᓂ, ᐊᖓᔪᖅᑳᒥᓄᑦ ᐊᒃᑐᖅᑕᐅᓚᐅᖅᑐᖅ, ᓇᔭᒥᓄᑦ ᐊᒻᒪ ᐃᑦᑐᒃᑯᖏᓐᓄᑦ. ᐊᑖᑕᑦᓯᐊᖓ ᐃᓪᓗᓕᐅᖅᑎᐅᓚᐅᕐᒥᔪᖅᑕᐅᖅ. ᐃᓕᓐᓂᐊᖅᑎᖦᖢᓂᐅᒡᓗ ᐱᓇᔪᖕᓂᕐᒥᒃ ᓇᖕᒥᓂᖅ ᐊᒻᒪᓗ ᐃᓕᑦᑎᓪᓗᓂ, "ᐃᓱᒪᐃᑦ ᐃᓕᒃᑯᕕᐅᒃ, ᐃᓕᖦᖤᕋᕕᑦ ᐊᒻᒪᓗ ᐃᓕᖕᓂᒃ ᓴᓇᑎᑐᐃᓐᓇᓕᖅᖢᒍ... ᖁᕕᐊᒋᓕᕈᕕᐅᒃ. ᑕᐃᒪᐃᓕᐅᖏᓐᓇᓲᖑᔪᖓ ᐅᕙᓐᓄᑦ, ᐊᔪᕐᓇᙱᑦᑐᑯᓘᓪᓗᓂ ᑕᖅᓯᖅᓱᒐᒃᓴᐅᓪᓗᓂ, ᐋᖅᑭᒃᓱᒐᓕᐅᖅᖢᑎᒡᓘᓐᓃᑦ, ᐊᑭᖃᙱᖦᖢᓂ." 

ᑖᓐᓇ ᐃᓕᓚᐅᖅᑐᖅ ᐃᓚᒥᓂᒃ ᐊᒻᒪᓗ ᐱᔭᕇᖅᓯᓪᓗᓂ ᐃᓕᓐᓂᐊᕐᕕᐊᓗᒻᒥᒃ ᐊᒃᓱᕈᐊᓪᓚᓚᐅᖅᖢᓂ. ᐊᑯᓂᐅᓂᕐᓴᖅ ᐊᓂᒍᐃᓇᓱᓚᐅᖅᑐᖅ ᓂᕆᑦᑎᐊᙱᓐᓂᑯᒧᑦ ᓯᓂᑦᑎᐊᙱᓐᓂᖓᓄᓪᓘᓐᓃᑦ. "ᑕᐃᒫᒃ ᐱᓕᕆᓪᓚᕆᒍᒪᓂᖅᐳᑦ ᐃᓱᒪᖓᓗ ᑕᐃᑲᓃᓚᐅᕐᓂᕋᖅᖢᓂᐅᒃ, ᑕᐃᒪᓐᓇᐅᓚᐅᖅᐳᖅ," ᐃᖅᑲᐅᒪᕗᖅ.

"ᓯᓚᒥ ᑕᑯᒍᕕᑦ ᑕᑯᒍᕕᑦ ᐊᓯᖕᓂᒃ ᐱᓕᕆᔪᓂᒃ, ᐃᖅᑲᐃᓯᔾᔪᑎᒋᕙᐃᑦ ᐱᔪᒃᓯᑎᑦᑎᓪᓗᓂᓗ ᐆᒻᒪᕆᖕᓂᕐᒥᒡᓗ ᐃᓕᖕᓂᒃ ᐱᓕᕆᔪᓐᓇᕐᓂᕐᒥᒃ."

ᑳᓚ ᑦᓯᓯᐅᓪ ᓴᓇᓚᐅᖅᑐᖅ ᑖᔅᓱᒥᖓ ᐃᖅᑲᓇᐃᔮᒥᒃ ᐱᑎᑦᑎᔪᒪᓪᓗᓂ ᐃᕐᓂᖓ ᐊᒻᒪ ᒫᓐᓇ ᕿᑐᕐᖓᖏᑦ ᐱᔪᒃᓯᑎᑦᑎᓕᖅᑐᑦ, ᐃᓅᓗᑎᒃ ᑐᕌᕆᔭᖏᓐᓂ. ᐊᖏᔪᑦᑎᖅᐹᖅ ᐃᕐᓂᖓ ᐱᔭᕇᓚᐅᖅᐳᖅ ᓯᓚᑦᑐᓴᕐᕕᕐᔪᐊᕐᒥᑦ ᐊᒻᒪ ᕿᔪᓕᕆᓂᕐᒧᑦ, 17-ᓂᒃ ᐅᑭᐅᓕᒃ ᐸᓂᖓ ᓇᒻᒥᓂᖅ ᓄᓇᓯᐅᑎᑖᓚᐅᖅᐳᖅ ᐊᒻᒪ 12-ᓂᒃ ᐅᑭᐅᓕᒃ ᕼᐋᑭᓕᐅᑎᓚᐅᖅᐳᖅ ᓵᔅᑳᑦᓱᐋᓐᒥ. ᓯᓯᐅᓪ ᒪᕐᕉᖕᓂᒃ ᕿᑐᕐᖓᖃᕐᒥᔪᖅ, ᐊᑕᐅᓯᖅ ᐋᓐᓂᐊᕕᓕᐊᕐᓗᓂ ᐃᓕᓐᓂᐊᕆᐊᖅᑐᖅ ᐊᒻᒪ ᐊᑕᐅᓯᖅ ᒧᒥᖅᑎᐅᓪᓗᓂ ᐊᒻᒪ ᑲᔪᖏᖅᓴᐃᔨᐅᓪᓗᓂ. 

ᖃᐅᔨᒪᓚᐅᖅᑐᖅ ᑲᖐᓱᑐᐃᓐᓇᔾᔮᖏᓐᓂᕐᒥᓂᒃ ᐅᕝᕙᓘᓐᓃᑦ ᑯᑭᓕᕆᔨᒥᒃ ᐊᒻᒪᓗ ᕿᔪᓕᕆᔨᐅᔾᔮᒐᓂ, ᑭᓯᐊᓂᓕ ᐃᓕᓚᐅᖅᑐᖅ ᖃᓄᖅ ᓴᓇᒻᒪᐅᓯᖓ ᐊᐅᓚᓂᖃᕐᒪᖔᖅ ᐊᒻᒪᓗ ᐊᑐᖅᑐᓂ ᖃᐅᔨᒪᓂᕐᒥᓂᒃ ᐃᖅᑲᓇᐃᔮᖅᑖᕐᓂᐊᕐᓗᓂ ᐊᒻᒪᓗ ᐃᓅᓯᖅ ᐊᑯᓂᐅᒐᔭᕐᓗᓂ. ᑳᓚ ᓯᓯᐅᓪ ᐃᒡᓗᓕᐅᕈᒪᓚᐅᖅᑐᖅ, ᑭᓯᐊᓂ ᐃᓅᓯᖅᑖᓕᓚᐅᖅᑐᖅ, ᑐᙵᕕᓕᐅᖅᖢᓂᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐊᕐᓇᓄᑦ ᓴᓇᔭᐅᔪᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.