ᑭᐅᓕ ᓵᑎᐊᐃ ᐱᓕᕆᖃᑎᖃᖃᑦᑕᖅᑐᖅ ᓯᓪᑰᒃ ᐱᖃᓐᓇᕆᔭᖃᕐᕕᒻᒥᑦ, ᐊᒻᒪ ᖁᕕᐊᒋᔭᖃᖅᑐᖅ ᐊᔾᔨᓕᐅᕆᔨᐅᓪᓗᓂ ᐊᒻᒪ ᑎᑎᖅᑐᒐᖅᑎᐅᓪᓗᓂ moccasin-making... ᒥᐊᑎᔅ, ᐱᕈᖅᓴᓂᑯ ᓯᐅᑰᒃᒥ, ᒫᓂᑑᐸᒥ ᖃᑕᙳᑎᖏᓪᓗ ᓴᒡᑮᖕ ᓄᓇᖃᖅᑳᖅᓯᒪᔪᓂᙶᖅᑐᖅ, 1-ᒥ ᐅᑭᐅᖅᑕᖅᑐᒥ ᐊᕕᒃᓯᒪᓂᕐᒥ.

ᑭᐅᓕᐅᑉ ᐱᖃᓐᓇᕆᔭᖓᑕ ᑲᑎᙵᕝᕕᖓᓂ ᐱᒋᐊᓚᐅᖅᓯᒪᔪᖅ ᐅᑭᐅᖃᑐᐃᓐᓇᖅᑎᓪᓗᒍ ᑎᓴᒪᓂᒃ; ᐊᒻᒪᓗ ᐃᓚᖏᑦ ᐅᐸᖃᑦᑕᓚᐅᖅᑐᑦ ᐊᑦᔨᒌᖏᑦᑐᓄᑦ ᐱᓕᕆᐊᖑᔪᓄᑦ ᑕᐃᑲᓂ. "ᐊᓇᐅᓯᑲᑕᓚᐅᖅᑐᒍᑦ ᒧᒥᖅᖢᑕ, ᐅᓐᓄᒃᑯᑦ, ᐃᖃᐃᓕᓴᕐᕕᖕᒥ ᐅᓐᓄᒃᑯᑦ, ᑕᒪᒃᑯᐊᕈᓘᔭᐃᑦ." ᐃᓱᒪᑎᓪᓗᒍ ᐃᖅᑲᓇᐃᔭᕐᕕᑦᑎᐊᕙᐅᓇᓱᒋᓪᓗᒍ, ᒪᒃᑯᒃᑐᒧᑦ ᑭᐅᓕᒧᑦ ᑕᐃᑯᙵᐅᓚᐅᖅᓯᒪᙱᖦᖢᓂ ᐃᓐᓇᐅᓪᓗᓂ. "ᖁᕕᐊᓇᑦᑎᐊᖅᑐᖅ ᐅᑎᕆᐊᒃᓴᖅ. ᐃᓚᖏᑦ ᐃᖅᑲᓇᐃᔭᖃᑎᒃᑲ ᐃᖅᑲᓇᐃᔭᖃᑎᒋᖃᑦᑕᖅᑕᒃᑲ ᐃᖅᑲᓇᐃᔭᓚᐅᖅᓯᒪᔪᑦ 20 ᐊᕐᕌᒍᑦ ᐊᓂᒍᖅᓯᒪᓕᖅᑐᑦ ᓄᑕᕋᐅᑎᓪᓗᖓ."

ᑖᓐᓇ ᐃᓚᒋᔭᐅᓪᓗᐊᑕᖅᑐᖅ ᑖᒃᑯᓄᖓ ᐱᒻᒪᕆᐅᔪᓄᑦ ᓄᓇᖃᖅᑳᖅᓯᒪᔪᓄᑦ ᓄᓇᓕᖕᓂ ᐅᐸᒃᑕᐅᑦᑕᐃᓕᒪᕝᕕᖕᓄᑦ: "ᐃᓚᒋᔭᐅᔪᖅ ᐱᖃᓐᓇᕇᓄᑦ ᐅᐸᒐᕐᒧᑦ ᐱᖃᑎᖃᑐᐃᓐᓇᕐᓗᑎᒃ ᑕᑯᒃᓴᐅᑎᑦᑎᓗᑎᒡᓗ ᖃᓄᑎᒋ ᐊᒃᑐᐊᖃᑎᖃᕐᒪᖔᑕ ᐃᓄᖕᓂᒃ ᐃᓅᓯᓕᒫᒧᑦ."

ᑭᐅᓕᐅᑉ ᐊᖅᑯᑎᒋᔭᖓ ᐊᒃᑐᐊᓂᖃᑦᑎᐊᖅᑐᖅ ᐱᖃᓐᓇᕆᔭᒥᓄᑦ, 100 ᐅᖓᑖᓂ ᑲᓇᑕᓕᒫᒥ. ᒪᒃᑯᒃᖢᓂ ᐊᑭᓕᖅᓱᖅᑕᐅᙱᖦᖢᓂ ᐃᖅᑲᓇᐃᔮᖃᓕᓚᐅᖅᑐᖅ, ᐱᓕᕆᖃᑎᖃᓕᓚᐅᖅᖢᓂᓗ ᒪᒃᑯᒃᑐᓄᑦ ᐱᓕᕆᐊᒃᓴᓂᒃ ᓯᓚᑦᑐᖅᓴᕐᕕᖕᒦᑎᓪᓗᒍ, ᑎᑎᕋᕐᕕᓕᕆᓯᒋᐊᓚᐅᙱᓐᓂᖓᓂ ᐅᓪᓗᒥ ᐱᓯᒪᔭᖏᓐᓂᒃ.

ᑖᓐᓇ Selkirk Friendsship Centre-ᖑᔪᖅ ᐊᐅᓚᑕᐅᕐᔪᐊᖅᐳᖅ ᖃᔅᓯᒐᓚᖕᓂ ᓄᓇᓕᖕᓂ ᓄᓇᓕᐸᐅᔭᕐᒥ. ᑭᐅᓕ ᐅᓂᒃᑳᖅᑐᖅ, "ᐸᐃᕆᕕᓕᕆᓂᕐᒧᑦ ᐱᓕᕆᐊᒃᓴᖃᖅᑐᒍᑦ, ᑲᑎᙵᔪᓂ ᐃᒡᓗᑕᖃᖅᑐᒍᑦ; ᒪᒃᑯᒃᑐᓄᑦ ᐱᓕᕆᐊᒃᓴᕗᑦ ᐃᒡᓗᕐᔪᐊᖓ ᐊᖅᑯᑎᐅᓂᐊᓕᕐᒥᔪᖅ ᐃᓂᒋᔭᐅᕙᒃᖢᓂ ᐃᓕᓐᓂᐊᕌᓂᒃᑳᖓᑕ, ᒪᒃᑯᒃᑐᓄᑦ ᑲᔪᖏᖅᓴᐃᔪᓕᕆᓂᖅ, ᐊᒻᒪ ᐱᒋᐊᙵᐅᑎᖓ, ᐃᓕᓐᓂᐊᕆᐅᖅᓴᓕᓵᖅᑐᑦ ᓄᓇᖃᖅᑳᖅᓯᒪᔪᑦ−ᑐᙵᕕᓖᑦ."

ᑭᐅᓕᐅᑉ ᐱᓕᕆᐊᖏᑦ ᒪᒥᓴᕐᕕᖕᒥ ᐊᓯᔾᔨᖅᐸᓪᓕᐊᖏᓐᓇᐅᔭᖅᑐᑦ. "ᐃᖅᑲᓇᐃᔭᓕᖅᑎᓪᓗᖓ ᑕᐃᑲᓂ, ᐱᕙᓪᓕᐊᑐᐃᓐᓇᓚᐅᖅᑐᒍᑦ. ᑕᐃᒪᐃᒻᒪᑦ ᐱᓕᕆᐊᖃᖅᑐᒻᒪᕆᐅᓚᐅᖅᐳᒍᑦ. ᒪᒃᑯᒃᑐᑦ ᐃᓕᓐᓂᐊᕆᐊᒃᑲᓐᓂᕈᒪᓕᖃᑦᑕᕐᒪᑕ, ᒍᕋᐃᑦ 12-ᒥᒃ, ᓯᓚᑦᑐᓴᕐᕕᒻᒨᕐᓗᑎᒃ, ᑕᒪᒃᑯᐊ ᐃᓕᓐᓂᐊᖅᑕᐅᔪᑦ ᐃᑲᔪᖅᑕᐅᖁᓪᓗᒋᑦ ᐃᖅᑲᓇᐃᔮᖅᑖᕋᓱᐊᖅᑎᓪᓗᒋᑦ ᐊᒻᒪᓗ ᑕᐃᒪᐃᑦᑐᒐᓚᓐᓂᒃ. ᐊᒻᒪᐃᓛᒃ ᑕᐅᑐᒐᖃᓪᓗᐊᑕᓕᕐᓂᕐᒥᒃ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᕐᒥᒃ ᑎᒥᒃᑯᓪᓗ ᖃᓄᐃᙱᑦᑐᓐᓇᕐᓂᕐᒥᒃ."

ᑭᐅᓕ ᐱᔪᒃᓯᑎᑕᐅᖅᑳᓚᐅᖅᑐᖅ ᑕᐃᒪᐃᑦᑐᒥᒃ ᐃᓄᓕᕆᓂᕐᒥᒃ ᐃᓅᓯᓕᕆᓂᕐᒥᒃ ᐃᓕᓐᓂᐊᕐᕕᐊᓗᖕᒥ. "ᐅᕙᓐᓄᑦ ᐊᔪᓕᖅᓯᒪᒐᓚᓚᐅᖅᑐᖓ ᐱᐅᒋᑦᑎᐊᓚᐅᖅᑕᕋᓗ. ᐃᓕᓴᐃᔨᒐ ᐱᐅᒋᑦᑎᐊᓚᐅᖅᑕᕋ ᐊᒻᒪ ᑲᑎᙵᖃᑎᒋᓚᐅᖅᖢᑎᒍᑦ." ᓯᓚᑦᑐᖅᓴᕐᕕᖕᒥ, ᑭᐅᓕ ᖃᐅᔨᓚᐅᖅᑐᖅ ᐊᔾᔨᐅᙱᑦᑐᒥᒃ ᖃᐅᔨᓴᓚᐅᖅᑎᓪᓗᒍ ᐃᓚᖏᓐᓂᒃ ᐃᓕᓐᓂᐊᕐᕕᐊᕈᓯᕐᓂᒃ ᐱᑎᑕᐅᔪᓂᒃ ᐃᓄᐃᑦ ᐃᓕᖅᑯᓯᖏᓐᓂ. ᓂᕈᐊᓚᐅᖅᑐᖅ ᐱᔪᒪᙱᖦᖢᓂ, ᐃᓕᑦᑎᑐᐃᓐᓇᕐᖢᓂ ᑐᑭᒧᐊᒃᑎᑦᑐᓐᓇᕐᓂᕐᒥᓂᒃ ᐃᖅᑲᓇᐃᔮᕆᔪᒪᔭᒥᓄᑦ. "ᖃᐅᔨᒪᓚᐅᙱᑦᑐᖓᓘᓐᓃᑦ ᐃᓚᒋᔭᐅᖕᒪᖔᑦ ᓇᓗᓇᐃᒃᑯᑕᕐᒧᑦ ᐃᖅᑲᓇᐃᔭᖅᑐᓕᕆᔨᒃᑯᓐᓄᑦ. ᑕᐃᒪᓕ ᐊᑎᓕᐅᕆᐊᖅᑐᕋᒪ ᐃᓕᓐᓂᐊᖅᑐᓄᑦ, [ᓯᓚᑦᑐᖅᓴᕐᕕᒻᒥ ᐅᖃᐅᔾᔨᒋᐊᖅᑎᑦ ᐅᖃᓚᐅᖅᓯᒪᔪᑦ], 'ᐃᒪᐃ, ᐃᒻᒪᖃ ᐱᔪᒪᒐᔭᖅᑐᑎᑦ ᑖᒃᑯᓂᖓ, ᐊᒻᒪᓗ ᐱᔭᕇᕈᓐᓇᖅᓯᒐᔭᖅᑐᑎᑦ.'"

ᑲᒪᓇᖏᑦᑐᖅ, ᑕᐃᒪᓕ, ᑭᐅᓕᐅᑉ ᐅᖃᐅᔾᔨᒋᐊᕐᓂᖓ ᒪᒃᑯᑦᑐᓄᑦ ᖃᐅᔨᓴᖁᔨᓗᓂ ᐸᕐᓇᐃᑎᓪᓗᒋᑦ ᓯᕗᓂᔅᓴᖏᓐᓄᑦ. "ᑕᒪᕐᒥᑦᑎᐊᖅ ᓯᓚᑦᑐᖅᓴᕐᕖᑦ ᐃᓕᓐᓂᐊᕐᕖᓪᓗ ᐃᓄᖁᑎᖃᖅᐳᑦ ᒪᓂᒪᔪᓂᒃ ᐅᖃᐅᓯᖃᕐᓂᐊᕐᓗᑎᒃ ᑭᓱᑐᐃᓐᓇᓂᒃ. ᖃᓄᑐᐃᓐᓇᖅ ᓇᓗᒍᕕᑦ, ᐊᐱᕆᑐᐃᓐᓇᕐᓗᑎᑦ."

ᑭᐅᓕ ᑕᐅᑐᓗᐊᓚᐅᖅᑐᖅ ᐱᖃᓐᓇᕆᔭᖏᑦ ᕿᒡᒋᖅᖢᑎᒃ ᓯᓚᑦᑐᖅᓴᕐᕕᖕᒧᑦ ᖁᑦᑎᖕᓂᖅᓴᖅ ᐃᓕᓐᓂᐊᕐᕕᖕᒥᑦ ᖃᐅᔨᓴᙱᖦᖢᑎᒃ ᐅᕝᕙᓘᓐᓃᑦ ᖃᐅᔨᓇᓱᙱᖦᖢᑎᒃ ᑭᓱᓂᒃ ᐱᔪᒪᓇᔭᕐᒪᖔᑕ. "ᐊᕐᕌᒍᒥᒃ ᐊᑕᐅᓯᕐᒥ ᐱᓕᕆᓚᐅᖅᑐᑦ, ᐊᒻᒪ ᐅᖓᓯᒃᑐᒦᖦᖢᑎᒃ ᖃᓂᓗᐊᙱᖦᖢᑎᒃ ᐱᐊᓂᓚᐅᖅᑕᖓᓄᑦ. ᐃᓱᒪᑐᐃᓐᓇᓚᐅᖅᑐᖓᓗ ᑕᒪᓐᓇ ᐱᕕᒃᓴᑲᓪᓚᐅᓂᖓᓂᒃ ᐊᒻᒪ ᐱᓇᔪᖕᓂᖓᓂᒃ ᐊᒻᒪ ᑮᓇᐅᔭᓂᒃ ᐃᓕᔭᕐᓂᒃ ᐃᑲᔫᑎᖃᙱᖦᖢᓂ ᐃᓕᖕᓄᑦ ᓇᒧᙵᐅᕙᓪᓕᐊᓂᕐᒧᓪᓗ."

ᓯᓚᑐᔫᓪᓗᓂ ᑮᓇᐅᔭᓂᒃ ᐊᑐᖏᑉᐹᓪᓕᕐᓂᕐᒧᑦ ᑖᓐᓇ ᐅᖃᐅᔾᔨᒋᐊᕈᑎᐅᔪᖅ ᑭᐅᓕᒧᑦ ᐅᑎᕈᓐᓇᓚᐅᖅᑐᖅ ᐊᒻᒪᓗ ᐃᒻᒥᓂᒃ ᑐᓂᓗᓂ. "ᐃᓱᒪᒋᓪᓗᒋᑦ 16-ᓂᒃ 21-ᒧᑦ, ᑮᓇᐅᔭᑦ ᐊᑐᓚᐅᖅᑕᒃᑲ ᐅᑎᒧᑦ ᑕᐅᑐᒃᖢᒋᑦ, ᓲᕐᓗ, 'ᑮᓇᐅᔭᕐᔪᐊᕌᓗᐃᑦ ᐊᓯᐊᓄᑦ ᐃᓕᔪᓐᓇᓚᐅᖅᑕᒃᑲ ᐊᒻᒪ ᑐᖅᑯᖅᑕᐅᔪᓐᓇᓚᐅᖅᑐᑦ.'"

ᓲᕐᓗ ᐃᓕᓐᓂᐊᖅᑕᐅᔪᑦ ᐃᓕᓐᓂᐊᕐᕕᖕᒥ, ᑭᐅᓕ ᐅᖃᐅᔾᔨᓲᖑᕗᖅ ᕿᓂᖅᑐᓂᒃ ᖃᐅᔨᒪᔨᑕᕐᓂᒃ ᑮᓇᐅᔭᓕᕆᓂᕐᒥᒃ ᐅᖃᓕᒫᕆᐅᖅᓴᓕᕌᖓᑕ. "ᓄᓇᔅᓯᓐᓂ ᑮᓇᐅᔭᒃᑯᕕᖕᒧᑦ ᐅᖄᓚᔪᓐᓇᖅᐳᑎᑦ ᐊᒻᒪ ᑮᓇᐅᔭᓕᕆᓂᕐᒧᑦ ᐅᖃᐅᔾᔪᐃᔨᒧᑦ ᐅᖃᖃᑎᖃᕐᓗᑎᑦ. ᑕᒪᕐᒥᑲᓴᑦᑎᐊᖅ ᐊᑭᓖᑎᑦᑎᖃᑦᑕᔾᔮᙱᑦᑐᑦ [ᒪᒃᑯᒃᑐᑦ]."

ᐊᒻᒪᓗ ᕿᓂᕆᐊᖃᓕᕋᐃᒐᒥᒃ ᐃᖅᑲᓇᐃᔮᒃᓴᒥᒃ, "ᑎᓕᐅᕆᓪᓚᕆᑉᐸᒃᑲ ᐃᓄᓐᓂᒃ ᖃᐅᔨᓴᖁᓪᓗᒋᑦ ᐊᓯᖏᓐᓂᒃ ᐃᖅᑲᓇᐃᔮᓂᒃ ᓯᕗᒧᐊᑦᑎᑕᐅᔪᓂᒃ. ᐃᖅᑲᓇᐃᔮᓄᑦ ᑕᑯᒃᓴᐅᑎᑦᑎᔭᖅᑐᕈᕕᑦ, ᐄ, ᑕᒪᒃᑯᐊᓕᒫᑦ ᐃᖅᑲᓇᐃᔮᒃᓴᐃᑦ, ᑭᓯᐊᓂ ᐅᓄᖅᑐᐊᓘᖕᒪᑕ ᑕᑯᒃᓴᐅᙱᑦᑐᑦ ᑕᑯᕙᙱᑕᑎᑦ."

ᑭᐅᕈᓕ ᒪᒃᑯᒃᑐᓂᒃ, ᐱᓗᐊᖅᑐᒥᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, "ᖃᐅᔨᒪᖁᑦᑎᐊᖅᐸᑎᑦ!" ᖃᐅᔨᓴᖁᓪᓗᓂᒋᑦ ᐊᒻᒪᓗ ᑐᑭᓯᓗᑎᒃ ᑮᓇᐅᔾᔭᒃᓵᖏᓐᓂᒃ ᐱᔪᓐᓇᖅᑕᖏᓐᓂᒃ. "ᖃᐅᔨᒪᔪᖓ ᐊᒥᓱᑦ ᒪᒃᑯᒃᑐᑦ ᐊᑲᕐᕉᑎᖃᓲᖑᓂᖏᓐᓂᒃ ᐃᕐᖐᓐᓇᖅ ᐃᒋᑕᐅᓲᖑᓂᖏᓐᓂᒃ ᐊᑭᑭᓛᒥᒃ ᑮᓇᐅᔾᔭᒃᓴᖅᑕᐅᓲᓂᒃ. ᑭᓯᐊᓂ ᐊᒥᓱᐊᖅᑎᖅ, ᑕᒪᓐᓇ ᐊᑕᐅᓯᕐᒥᒃ ᒪᕐᕉᓂᓪᓘᓐᓃᑦ ᐊᕐᕌᒎᓐᓂᒃ ᖃᐅᔾᔨᑎᖃᕈᕕᑦ, ᑮᓇᐅᔾᔭᔅᓵᖏᑦ ᐊᑭᑦᑐᕆᐊᕌᕐᔪᒍᓐᓇᖅᐳᑦ. ᑲᑉᐱᐊᓱᙱᓪᓗᑎᑦ ᐊᐱᕆᔭᕆᐊᒃᓴᖅ ᐱᔭᕆᐊᖃᕈᕕᑦ... ᖃᐅᔨᓴᐃᓐᓇᐅᔭᕐᓗᒋᑦ ᖃᓄᐃᓕᐅᖅᑕᑎᑦ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.