"ᓇᖕᒥᓂᖃᕋᓱᒋᓚᐅᖅᓯᒪᙱᑦᑐᖓ ᓯᕗᓪᓕᕐᒥ. ᖃᐅᔨᒪᓚᐅᖏᑦᑐᖓᓘᓐᓃᑦ ᖃᓄᖅ ᑐᑭᖃᕐᒪᖔᖅ," ᑲᐃᓯ ᑎᔮᓕᔅ ᐃᒡᓚᓚᐅᖅᑐᖅ. ᐸᕐᓇᐅᑎᖃᓚᐅᙱᑦᑐᖅ ᖃᓄᐃᓕᐅᕈᒪᒻᒪᖔᕐᒥ ᐅᕝᕙᓘᓐᓃᑦ ᑭᓇᐅᔪᒪᒻᒪᖔᕐᒥ ᐃᓐᓇᐅᓂᖅᓴᐅᑎᓪᓗᒍ, ᑭᓯᐊᓂ ᓇᓂᓯᓯᒪᔪᖅ ᐊᖅᑯᑎᒥᒃ. 4-ᒥ 6-ᖑᓚᐅᖅᓯᒪᔪᑦ ᐅᑭᐅᖅᑕᖅᑐᒥ ᐊᕕᒃᑐᖅᓯᒪᔪᑦ ᓂᒋᐊᓂᑦ ᓴᔅᑳᑦᓱᐊᓐᒥᑦ, ᒫᓐᓇ ᓄᓇᖃᓕᖅᑐᖅ ᕚᓐᑰᕙᒥᑦ, ᑲᐃᓯ ᑎᔮᕐᓚᐃᔅ ᐊᓐᓄᕌᓂᑦ ᐊᑎᖃᖅᑐᖅ ᐊᓐᓄᕋᔾᔨᐅᖅᑏᑦ (ᓄᓇᖃᖅᑳᖅᓯᒪᔪᑦ 30604 Apparel) ᐱᖃᑎᖓᓗ, ᑖᑯᑕ ᓇᓄᖅ, 2016-ᒥᑦ. 

"ᒪᑐᐃᖓᑐᐃᓐᓇᖅᑐᖓ ᖃᓄᐃᑦᑐᑐᐃᓐᓇᕐᒧᑦ ᐱᕕᒃᓴᓄᑦ ᑕᖅᑳᓂ. ᒪᑐᐃᙶᖅᑐᖓ ᐊᒻᒪ ᑐᙵᓇᖅᖢᖓ ᖃᓄᑐᐃᓐᓇᖅ ᐊᔪᕐᓇᙱᑐᐃᓐᓇᕆᐊᓕᖕᓄᑦ ᒫᓐᓇ."

ᐊᐃᑉᐸᕐᒥᓄᑦ ᓇᖕᒥᓂᖃᖏᓐᓇᐅᔭᖅᑐᖅ, ᑎᔮᕐᓚᐃᔅ ᖁᕕᐊᒋᔭᖃᖅᐳᖅ ᐊᓯᔾᔨᒐᒃᓴᐅᓪᓗᓂ ᓇᖕᒥᓂᖅᑖᕐᓂᕐᒧᑦ ᐱᕕᖃᖅᑎᑦᑎᓪᓗᓂ. "ᐊᑭᖃᖅᑰᔨᔪᖓ.  ᑕᓗᕈᒃᑯᑎᔪᓐᓇᙱᑦᑐᖓ," ᐅᖃᖅᖢᓂ. ᒧᒥᖃᑦᑕᕐᒥᔪᖅ ᐊᑭᓯᕐᒥᒃ ᐊᒻᒪᓗ ᐅᖃᓪᓚᒃᐸᒃᑭᓪᓗᓂ ᖃᓄᐃᓕᐅᖅᑐᖃᖅᑎᓪᓗᒍ ᐃᒻᒥᓂᒃ ᑮᓇᐅᔭᓕᐅᕋᓱᒃᑎᓪᓗᒍ. 

ᐱᒋᐊᓚᐅᕋᓂ ᓇᒻᒥᓂᖁᑎᒥᓂᒃ, ᑎᔮᓕᔅ ᓵᔅᑳᑦᓱᐊᓐ ᓯᓚᑦᑐᓴᕐᕕᕐᔪᐊᖓᓅᓚᐅᖅᑐᖅ. ᑕᐅᕗᙵᑐᐃᓐᓇᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥᑦ ᐸᕐᓇᐅᑎᖃᑦᑎᐊᕋᓂ, ᐊᔭᐅᖅᑐᓂᒋᑦ ᐊᓈᓇᖏᑦ ᐊᒻᒪ ᑯᑯᖏᑦ. ᐊᕐᕌᒍᒧᑦ, ᐃᓕᓐᓂᐊᑐᐃᓐᓇᖅᐸᓚᐅᖅᑐᖅ ᑭᓯᐊᓂ ᐱᒻᒪᕆᐅᒋᙱᖦᖢᓂᐅᒃ. ᓅᓚᐅᖅᓯᒪᔪᖅ ᕚᓐᑰᕗᒧᑦ ᐊᒻᒪᓗ ᐃᓚᐅᓕᓚᐅᖅᓯᒪᓪᓗᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᕕᖓᓄᑦ ᓄᓇᖃᖅᑳᖅᓯᒪᔪᑦ ᒪᓕᒐᓕᕆᓂᕐᒧᑦ ᐃᓕᓐᓂᐊᒐᒃᓴᖓᓂ. ᓇᓂᓯᓪᓗᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᖏᓐᓂ ᐱᔪᒥᓇᕐᓂᖅᓴᐅᓪᓗᓂ, ᐊᒃᑐᐊᓂᖃᑦᑎᐊᕐᖢᓂ ᐊᑑᑎᖃᑦᑎᐊᕐᖢᓂᓗ. 

"ᒪᒥᓴᖅᐸᓪᓕᐊᔪᖓ. ᐃᓱᒪᒐ, ᑎᒥᒐ ᐊᒻᒪ ᑕᕐᓂᖓ ᐊᓯᔾᔨᕋᓱᒃᓯᒪᕙᕋ ᐃᓕᖅᑯᓯᑐᖃᓐᓄᑦ, ᐊᒻᒪ ᐃᓕᖅᑯᓯᑦᑎᓐᓄᑦ ᐃᓕᖅᑯᓯᑦᑎᓐᓄᑦ. ᑭᓯᐊᓂ ᓱᓕ ᓯᕘᕋᐃᓐᓇᖃᑦᑕᖅᐳᖓ ᐊᒻᒪ ᐃᒻᒥᓂᒃ−ᐱᔪᓐᓇᙱᖦᖢᖓ ᐊᒃᓱᕈᐃᓐᓇᖅᖢᖓ." 

ᐊᒃᓱᕈᖅᑎᓪᓗᒍ ᐃᒻᒥᓂᒃ−ᐱᔪᓐᓇᙱᖦᖢᓂ ᐊᐱᖅᑯᑎᓂᒡᓗ ᓲᕐᓗ "ᓈᒻᒪᒃᐳᖓ ᑕᐃᒪᐃᓕᐅᕆᐊᒃᓴᖅ? ᐊᔪᙱᓚᖓ?" ᑎᔮᓕᔅ ᐃᓕᑦᑎᕙᓪᓕᐊᕗᖅ ᖃᓄᖅ ᐅᖃᐅᓯᖃᒃᑲᓐᓂᕈᓐᓇᕐᓂᕐᒥᒃ ᐃᒃᐱᒋᔭᒥᓂᒃ, ᑎᑎᕋᖅᓯᕙᓪᓕᐊᕙᒡᓗᓂ ᑖᒃᑯᓂᖓ ᐱᕕᒃᓴᖃᖅᐸᒃᖢᑎᒡᓗ ᐅᖃᓪᓚᖃᑎᖃᕐᓂᕐᒥᒃ ᐅᖃᖃᑎᖃᕐᓂᕐᒥᒡᓗ ᐃᓚᒥᓂᒃ. ᐅᖃᐅᔾᔨᔪᓐᓇᕈᓂ ᒪᒃᑯᖕᓂᖅᓴᓂᒃ ᓇᖕᒥᓂᖅ ᓈᓚᒋᐊᖃᕋᔭᖅᑐᖅ ᐊᖓᔪᖅᑳᒥᓂᒃ ᐃᓚᒥᓂᒡᓗ ᐱᖃᑎᖃᕐᓂᖅᓴᐅᓗᓂ. ᐅᖃᐅᓯᖃᓚᐅᖅᑐᖅ ᑯᑯᕐᒥᒃ ᓄᓇᕐᔪᐊᕐᒥ ᐊᒻᒪᓗ ᐅᖃᖅᑐᓂ, "ᖃᐅᔨᒪᒍᒪᕗᖓ ᖃᓄᑎᒋ ᐱᒻᒪᕆᐅᑎᒋᒻᒪᖔᖅ ᑲᑎᖃᑦᑕᓂᑦᑎᓐᓂᒃ. ᐅᖃᕈᓐᓇᑦᓯᐊᖅᓱᓂ ᐅᖃᐅᓯᕐᒥᒃ, ᑕᐃᒪᐃᒻᒪᑦ ᓇᒻᒥᓂᖅ ᐅᖃᐅᓯᕋ ᐃᓕᒍᓐᓇᕋᔭᓚᐅᖅᑕᕋ ᐊᒻᒪᓗ ᑐᓵᑦᓱᒍ ᐅᓂᒃᑳᖏᑦ. ᐃᓐᓇᕆᔭᑎᑦ ᐅᐸᒃᓯᒪᓂᖅᓴᐅᕙᒡᓗᒋᑦ ᓲᖃᐃᒻᒪ ᖃᐅᔨᒪᓚᐅᖅᓯᒪᙱᓐᓇᕕᑦ ᖃᓄᐃᑦᑐᖃᕐᓂᐊᕐᒪᖔᑦ. ᐃᓅᓯᖅ ᐊᓯᔾᔨᕈᓐᓇᖅᑐᖅ."

"ᓄᓇᔅᓯᓐᓄᑦ ᐅᑎᕐᓗᑎᑦ ᐊᒻᒪ ᐊᓯᐊᒍᑦ ᐱᕕᒃᓴᓕᐅᕐᓗᑎᑦ ᓄᓇᖅᑲᑎᔅᓯᓐᓄᑦ ᑕᐃᑲᓂ. ᐱᔾᔪᑎᒋᔭᐃᑦ ᐊᐅᓪᓚᓚᐅᖅᑕᐃᑦ ᓄᓇᓕᔅᓯᓐᓄᑦ ᐱᕕᖃᒃᑲᓐᓂᕈᒪᓂᕐᒧᑦ. ᓄᓇᔅᓯᓐᓄᑦ ᐅᑎᖅᑎᓐᓇᓱᒡᓗᒍ ᐃᓄᐃᑦ ᐊᐅᓪᓚᑲᑕᓗᐊᖁᙱᖦᖢᒋᑦ."

ᐊᓐᓄᕌᓄᑦ ᑐᑭᓕᐊᕐᓂᖅ ᐊᒻᒪ ᐅᑎᕐᓂᖅ ᐃᓕᓐᓂᐊᕐᕕᖕᒧᑦ, ᑎᔮᕐᓚᐃᔅ ᖃᓄᐃᓕᐅᕈᓘᔭᖃᑦᑕᖅᓯᒪᖕᒪᑦ ᐊᖏᕐᕋᒥᓂᒃ ᓅᓚᐅᖅᓯᒪᑎᓪᓗᒋᑦ. ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᓪᓗᓂ ᕿᒪᐃᓂᕐᒥᒃ ᓄᓇᓕᖕᒥᓂᒃ ᐊᔪᕐᓇᙱᑦᑐᑯᓘᕗᖅ: ᐃᖅᑲᐅᒪᐃᓐᓇᐅᔭᕐᓗᑎᑦ ᓇᑭᙶᕐᒪᖔᖅᐱᑦ. ᐅᖃᖅᖢᓂ ᑐᑦᑎᐊᖃᑦᑕᖁᔨᓪᓗᓂ ᓇᓃᒻᒪᖔᖅᐱᑦ ᖁᕕᐊᓲᑎᖃᕐᓂᒃᑯᑦ ᖃᑕᙳᑎᖕᓂᓪᓗ ᑐᓴᐅᒪᑎᑦᑎᕙᒡᓗᓂ. "ᐱᖅᑯᓯᑐᖃᕐᓂᒃ ᐊᔪᕈᓐᓃᖅᓴᐃᓐᓇᕐᓗᑎᑦ ᑭᓇᐅᓂᕐᓂᒡᓗ ᐱᓕᕆᓗᑎᑦ. ᐊᓯᔾᔨᕋᓱᓚᐅᖅᓯᒪᙱᓪᓗᒍ ᑭᓇᐅᖕᒪᖔᖅᐱᑦ ᐊᕙᑎᖕᓄᑦ. ᓱᓕᐃᓐᓇᐅᔭᕐᓗᑎᑦ ᐃᓕᖕᓄᑦ," ᐱᖁᔨᔪᖅ. 

ᑎᔮᕐᓚᐃᔅ ᐊᒃᓱᕈᕐᓇᖅᑐᒃᑰᓕᓲᖅ ᖁᔭᓕᓂᒃᑯᑦ ᑐᒃᓯᐊᕐᓂᒃᑯᓪᓗ ᑐᑭᓯᓇᖅᓯᑎᑦᑎᓂᒃᑯᑦ. ᑕᐃᒪᙵᑦ ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᖅ ᐱᒋᐊᓚᐅᖅᑎᓪᓗᒍ ᑲᒪᒋᖃᑦᑕᖅᓯᒪᕙᐅᒃ ᓯᕘᕋᓂᖓ ᖃᐅᔨᓇᓱᒃᖢᓂ ᖃᓄᖅ ᐊᖏᓂᖅᓴᒥᒃ ᐃᓕᑦᑎᔪᓐᓇᕐᒪᖔᑦ Creator−ᒧᑦ. "ᑕᒪᓐᓇ ᐅᕙᓐᓄᑦ ᖃᓄᐃᓕᐅᖅᐸ? ᖃᓄᖅ ᐱᕈᖅᐸᓪᓕᐊᕗᖓ ᑕᒪᑐᒥᖓ?" ᐃᒻᒥᓂᒃ ᐊᐱᕆᓪᓗᓂ. "ᐃᑲᔪᖅᓯᒪᔪᖅ ᐅᕙᓐᓂᒃ ᖃᓂᒡᓕᕚᓪᓕᖅᑎᓪᓗᖓ ᖃᑕᙳᑎᓐᓄᑦ, ᓯᕗᒻᒧᑦ ᐊᒻᒪ ᓇᖕᒥᓂᖅ−ᐃᓱᒪᒃᓴᖅᓯᐅᕈᑎᖃᕐᓂᕐᒧᑦ. ᐃᓕᑦᑎᕝᕕᒋᔪᓐᓇᖅᑕᕐᓂᒃ ᐱᑕᖃᐃᓐᓇᐅᔭᖅᑐᖅ ᐊᔾᔨᒌᖏᑦᑐᓂᒃ ᐊᑐᖅᑐᓂᑦ," ᑲᔪᓯᓪᓗᓂ. 

ᓇᖕᒥᓂᖃᕈᒪᓚᐅᙱᒃᑲᓗᐊᖅᖢᓂ ᖃᐅᔨᒪᓗᐊᓚᐅᙱᖦᖢᓂᓗ ᖃᓄᖅ, ᓯᓚᑐᓂᖓ ᐱᕚᓪᓕᖅᓯᒪᓂᕆᔭᖓ ᐊᔾᔪᒥᓇᖅᑑᕗᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ. ᐃᓕᓐᓂᐊᖅᖢᓂ ᐊᔪᕈᓐᓃᖅᓴᖅᖢᓂᓗ ᐃᓕᖅᑯᓯᑐᖃᕐᒥᓂᒃ ᐋᖅᑭᒃᓱᐃᕙᓪᓕᐊᓂᕐᒥᓂ ᐃᓅᓯᖓᓂᒃ ᐊᐃᑉᐸᕐᒥᓂᒃ, ᑎᔮᕐᓚᐃᔅ ᑐᙵᕕᖃᖅᐳᖅ ᑭᓇᐅᓂᕐᒥᓂᒃ ᑭᓱᓂᒡᓗ ᐱᔾᔪᑎᖃᕐᒪᖔᑦ. 4-ᒥᑦ 6-ᒧᑦ ᐅᑭᐅᖅᑕᖅᑐᒥᑦ ᐊᕕᒃᑐᖅᓯᒪᔪᑦ ᒫᓐᓇ ᖃᐅᔨᒪᔭᐅᓕᖅᑐᖅ ᕚᓐᑰᕙ, ᐳᕆᑎᔅ ᑲᓚᒻᐱᐊ, ᐃᓕᓐᓂᐊᖅᑐᖅ ᐱᖅᑯᓯᖏᓐᓂᑦ ᒪᓕᒃᖢᓂᓗ Creator's ᐊᖅᑯᑎᖓᓂ ᓇᒧᑐᐃᓐᓇᖅ ᑐᕌᕐᕕᒋᔭᒥᓄᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑎᑎᕋᓚᐅᕐᒪᑦ ᑖᔅᓱᒥᖓ.