"ᐃᓱᒪᔪᖓ ᐱᒻᒪᕆᐅᓂᖓᓂᒃ ᑲᑎᙵᖃᑎᖃᕐᓂᖅ ᒪᒃᑯᒃᑐᖁᑎᑦᑎᓐᓂᒃ. ᖃᐅᔨᒪᓗᒋᑦ, ᐱᓕᕆᖃᑎᒋᓗᒋᑦ... ᐃᓕᓴᐃᔨᒋᒐᑦᑎᒍᑦ, ᓯᕗᓕᖅᑎᒋᒐᑦᑎᒍᑦ," ᐅᖃᖅᑐᖅ ᓵᓖᓐ ᐹᓇᑦᕉᔅ. Deh Gáh Got'îê ᓄᓇᖃᖅᑳᖅᓯᒪᔪᖅ ᕗᐊᑦ ᐳᕋᓐᑎᓐᓯᒥ ᐃᓅᕝᕕᒋᓚᐅᖅᑕᖓᓂ ᐱᕈᖅᓴᓚᐅᖅᓯᒪᓪᓗᓂᓗ. ᒪᒥᓴᖅᐸᓪᓕᐊᖏᓐᓇᕈᒪᓪᓗᓂ ᒥᖅᓱᖃᑦᑕᖅᐳᖅ ᐊᒻᒪ ᐃᓕᖅᑯᓯᑐᖃᖅᑎᒍᑦ ᒥᖅᓱᖅᐸᒃᖢᓂ. ᐃᓕᑦᑎᓚᐅᕆᕗᖅ ᐊᓈᓇᑦᑎᐊᕆᓚᐅᖅᑕᒥᓂᒃ. ᐱᓕᕆᔨᒻᒪᕆᐅᓂᕐᒥᒍᑦ, ᐃᖅᑲᓇᐃᔭᖅᑐᖅ ᑎᒐᔅ ᐃᓕᓐᓂᐊᕐᕕᖓᓂ ᐃᑲᔪᖅᑎᐅᓪᓗᓂ, ᐃᖅᑲᓇᐃᔮᖅ ᓈᒻᒪᑦᑎᐊᖅᑐᖅ ᒪᒃᑯᒃᑐᓂᒃ ᑲᑎᖃᑎᖃᕈᒪᑦᑎᐊᕐᓂᖓᓄᑦ. 

ᐹᓇᑦᕋᔅ ᐃᒪᐃᓕᐅᓲᖑᒻᒥᔪᖅ ᓄᓇᒨᖃᑎᖃᖅᑐᓂ ᓄᑲᖅᖠᕐᓂ ᐃᓕᓐᓂᐊᕐᕕᐊᓗᒻᒥ ᐃᓕᓐᓂᐊᖅᑎᓂᑦ ᐊᒻᒪᓗ ᑕᑯᑎᑦᑐᒋᑦ ᒥᖅᓱᕆᐅᖅᓴᓂᕐᒥᑦ ᐊᒻᒪᓗ ᐅᓂᒃᑳᕐᕕᒋᓗᒋᑦ ᐃᓐᓇᑐᖃᕐᓄᑦ ᐃᓕᓯᒪᔭᖏᓐᓂᑦ ᒥᖅᓱᕐᓂᕐᒥᑦ, ᑲᔪᖏᖅᓴᐃᓪᓗᓂ ᒥᖅᓱᕐᓂᕐᒥᑦᑕᐅᖅ. ᐃᓚᖏᑦ ᓂᕕᐊᖅᓯᐊᑦ ᐃᓕᓐᓂᐊᖅᑎᓯᒪᔭᖏᑦ ᑎᒍᓯᓯᒪᖕᒪᑕ ᓯᐅᒻᒥᐅᑕᓕᐅᖅᐸᒃᖢᑎᒡᓗ ᐊᓯᖏᓐᓂᒡᓗ ᐅᐱᒋᓕᖅᖢᓂᐅᒃ ᑕᒪᓐᓇ ᑐᓂᔾᔪᑎᒋᔪᓐᓇᕐᒪᒍ. 

ᐃᓕᓐᓂᐊᕐᕕᖕᒥ, ᐹᓇᑦᕉᔅ ᐱᙳᐊᖅᑐᓕᕆᖃᑕᐅᕙᒃᐳᖅ, ᐃᓕᓐᓂᐊᖅᑎᑦᑎᕙᒃᖢᓂ ᐹᑦᒥᓐᑕᓐᒥᒃ. ᐸᓂᖓ ᐊᒻᒪᓗ ᐊᓂᖓ ᐹᑦᒥᓐᑕᓐᒧᑦ ᐃᓚᐅᖃᑦᑕᓚᐅᖅᓯᒪᔫᒃ ᒍᕋᐃᑦ 6-ᒥᓂᑦ ᐊᒻᒪᓗ ᓱᕈᓯᕐᓂᒃ ᐃᓚᐅᑎᑦᓯᖃᑦᑕᓕᖅᓱᓂ. ᓄᑕᖅᑲᓂᒃ ᐃᓚᐅᑎᑦᑎᓂᖅ ᐱᙳᐊᖅᑐᓕᕆᓂᕐᒥᒃ, ᐃᓕᓐᓂᐊᕐᕕᖕᒥ ᐊᒻᒪ ᒥᖅᓱᕐᓂᕐᒥᒃ ᐅᐱᒋᑦᑎᐊᖅᑕᖓ ᐃᔾᔪᐊᒐᒃᓴᑦᑎᐊᕙᐅᓂᖓᓂᒃ ᒪᒃᑯᒃᑐᓄᑦ ᐊᒻᒪ ᑲᑎᙵᖃᑕᐅᔪᓐᓇᖅᖢᓂ. 

ᓇᖕᒥᓂᖅ ᒥᖅᓱᓕᕌᖓᒥ ᒥᖅᓱᖅᐸᒃᖢᓂᓗ, ᐱᒋᐊᓚᐅᖅᓯᒪᕗᖅ ᓴᐸᖓᓕᖅᓯᒪᔪᒥᒃ ᐅᔭᒥᖕᒥᒃ ᐱᖃᓐᓇᕆᔭᒥᓄᑦ ᓴᖅᑭᑎᖦᖢᓂᐅᒃ ᖃᕆᑕᐅᔭᒃᑯᑦ, ᑎᑭᓴᖅᑕᐅᕙᓪᓕᐊᓕᓚᐅᖅᐳᖅ ᐊᓯᒥᓄᑦ. ᐅᔭᒥᑐᐃᓐᓇᕐᓂᒃ ᐱᔪᒪᓚᐅᙱᓚᑦ, ᐊᑦᑐᖏᖅᓯᔪᒪᓚᐅᕆᕗᑦᑕᐅᖅ. ᓴᓇᙳᐊᒐᐃᑦ ᐊᔪᕐᓇᕐᓂᖅᓴᐅᕗᑦ ᐊᑭᑐᓂᖏᓐᓄᑦ ᐱᖁᑎᑦ ᐊᒻᒪ ᕿᑐᒻᒪᒃᓴᐃᔪᒪᐃᓐᓇᐅᔭᖅᐸᒃᖢᓂ ᑐᒃᑐᕙᐅᑉ ᐊᒥᖏᓐᓂᒃ ᐊᓈᓇᑦᑎᐊᖓᑕ ᐱᕙᓚᐅᖅᑕᖓᑎᑐᑦ. 

ᓱᒃᑲᐃᒡᓕᒋᐊᖅᑎᑦᑎᓚᐅᖅᐳᖅ ᒥᖅᓱᖅᑕᒥᓂᒃ ᐊᓈᓇᑦᑎᐊᖓ ᐃᓅᔪᓐᓃᓚᐅᖅᑎᓪᓗᒍ ᐊᒻᒪ ᐅᑎᕋᒥ ᐊᕐᕌᒍᑦ ᑕᓪᓕᒪᑦ ᐊᓂᒍᖅᑎᓪᓗᒋᑦ, ᖃᐅᔨᓚᐅᖅᐳᖅ ᐃᑲᔫᑎᖃᕐᓂᖓᓂᒃ ᒪᒥᓴᕐᓂᕐᒧᑦ ᐊᒻᒪ ᕿᒃᓵᖕᓂᕐᒧᑦ ᐊᒻᒪ ᐅᐱᒍᓱᓕᖅᖢᓂ ᓴᓇᙳᐊᖃᑦᑕᕐᓂᕐᒥᓂᒃ ᐊᓈᓇᑦᑎᐊᖓᑕ ᐊᒃᑐᖅᑕᐅᓯᒪᓂᖓᓄᑦ. ᐊᓈᓇᑦᑎᐊᖓᑕ ᐱᖃᓐᓇᕆᔭᖏᑦ ᐃᑲᔪᓚᐅᖅᐸᖏᑦ ᓴᐸᖓᓕᕆᓂᕐᒥᒃ, ᐃᒡᓚᑲᑕᖕᓂᖏᓪᓗ ᐅᓂᒃᑳᖅᑐᐊᖏᓪᓗ ᐱᔪᒃᓯᑎᑦᑎᒃᑲᓐᓂᓕᓚᐅᖅᐳᖅ ᒥᖅᓱᒃᑲᓐᓂᕐᓂᕐᒥᒃ ᐊᒻᒪᓗ ᐊᓈᓇᑦᑎᐊᒥᓂᒃ ᓇᒡᓕᒍᓱᒃᑲᓐᓂᓕᖅᖢᓂ. 

ᐊᓈᓇᖓᓗ ᐅᖃᐅᔾᔨᒋᐊᕈᑎᖃᖅᑑᒃ ᓄᓇᖃᖅᑳᖅᑐᓄᑦ ᐃᓕᓐᓂᐊᖅᑎᓄᑦ ᐃᓕᓐᓂᐊᕆᐊᕆᐊᖃᖅᐸᒃᑐᓄᑦ, ᐊᔭᐅᖅᑐᕐᓗᒋᑦ ᐊᔭᐅᖅᑐᖅᐸᒡᓗᒋᓪᓗ, ᐊᐱᕆᕙᒡᓗᒋᑦ ᑭᓱᓂᒃ ᑐᕌᒐᖃᕐᒪᖔᑕ ᐊᒻᒪ ᑲᔪᖏᖅᓴᕐᓗᒋᑦ ᓲᖃᐃᒻᒪ ᐃᓕᓐᓂᐊᕆᐊᕆᐊᖃᓚᐅᕐᓂᖓᓄᑦ ᐸᓂᖓᓗ ᐃᓕᓐᓂᐊᕆᐊᖅᓯᒪᙱᖦᖢᓂ. "ᐊᔪᕐᓇᕈᔪᒃᑐᖅ ᐊᖏᕐᕋᒥ ᕿᒪᐃᓇᓱᒃᖢᓂ ᐅᖓᓯᓗᐊᕐᓂᖓᓄᑦ. ᐅᓂᒃᑳᕐᕕᒋᓗᒋᑦ ᐅᓂᒃᑳᕗᑦ, ᓂᕆᐅᒃᐳᒍᑦ ᐊᔭᐅᕆᓂᐊᕋᓱᒋᓪᓗᑎᒍᑦ ᐃᓕᓐᓂᐊᒃᑲᓐᓂᖁᓪᓗᒋᑦ. ᐅᖃᐅᑎᕙᑦᑕᕗᑦ ᐱᒻᒪᕆᐅᒻᒪᑦ ᐃᓕᓐᓂᐊᑲᓐᓂᕆᐊᖃᕐᓂᖅ. ᑭᖑᓂᐊᒍᑦ, ᐃᓕᖕᓂᒃ ᐱᒃᑯᒍᓱᖕᓂᖅᓴᐅᓂᐊᖅᐳᑎᑦ. ᐱᒃᑯᒍᓱᖕᓂᐊᕆᕗᑎᑦ ᑕᐃᒃᑯᓂᖓ ᐃᓄᖕᓂ ᐊᔭᐅᕆᕙᒃᑐᓂ ᐃᓕᖕᓂᒃ ᐃᓕᓐᓂᐊᒃᑲᓐᓂᖁᔨᓪᓗᑎᒃ," ᐅᓂᒃᑳᕆᓪᓗᓂ. 

ᐸᓂᖓ ᐊᕐᕌᒍᒐᓴᖕᓄᑦ ᕚᓐᑰᕗᕐ ᕿᑭᖅᑕᖓᓂ ᓯᓚᑦᑐᖅᓴᕐᕕᒡᔪᐊᕐᒧᐊᕋᓱᓚᐅᖅᐳᖅ ᓇᓇᐃᒨᒥ ᐊᒻᒪ ᖁᔭᓕᑦᑎᐊᖅᐳᖅ ᐊᓈᓇᖓ, ᐃᓕᓴᐃᔨᐅᓚᐅᖅᑐᖅ 42-ᓄᑦ ᐊᕐᕌᒍᓄᑦ, ᑲᔪᖏᖅᓴᐃᔪᓐᓇᓚᐅᕐᒪᑦ ᑖᔅᓱᒥᖓ. ᐃᓕᓐᓂᐊᖅᑕᖏᑦ ᐃᖏᕐᕋᑦᑎᐊᖅᑐᑦ ᐊᒻᒪ ᖁᕕᐊᒋᔭᖃᖅᖢᓂ ᐃᓕᓐᓂᐊᕐᓂᕐᒥᒃ, ᓄᒫᓱᒃᑲᓗᐊᖅᖢᓂ ᐊᖏᕐᕋᖅᓯᒪᙱᖦᖢᓂ, ᐅᖄᓚᕕᐅᑐᐃᓐᓇᕋᓗᐊᖅᖢᓂ. ᖃᐅᑕᒫᑲᓴᒃ ᐅᖃᓪᓚᒃᐸᒃᑐᑦ. 

ᐹᓇᑦᕉᔅ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᐃᒪᓐᓇᐅᓇᔭᖅᐳᖅ, ᐱᔭᕇᖅᓯᓗᓂ ᒪᕐᕉᖕᓂᒃ ᐊᔪᕈᓐᓃᖅᓴᒐᒃᓴᓂᒃ ᐱᔭᕆᐊᖃᖅᑕᒥᓂᒃ ᐃᓱᓕᑦᑎᓂᐊᕐᓗᓂ ᐊᕐᕌᒎᖕᓄᑦ ᒪᕐᕉᖕᓄᑦ ᐱᓕᕆᐊᖑᔪᒥᒃ ᐱᙳᐊᖅᑐᓕᕆᓂᕐᒥᒃ ᐃᓕᓐᓂᐊᓚᐅᖅᑕᒥᓂᒃ ᑳᓪᒍᕆᒥ. ᐃᓕᓐᓂᐊᒃᑲᓐᓂᕈᒪᒐᓗᐊᕐᒥᔪᖅ. ᐊᑕᐅᑦᑎᒃᑯᓪᓗ, ᐃᖅᑲᓇᐃᔮᖅᑖᕋᒥ, ᐱᔪᒃᓯᓕᓚᐅᖅᐳᖅ ᐃᑲᔪᕈᒪᓪᓗᓂ ᓄᑲᖅᖠᕐᓂᒃ ᓄᑕᖅᑲᓂᒃ ᐊᒃᓱᕈᖅᑐᓂᒃ ᐊᒻᒪ ᖁᕕᐊᓱᒃᖢᓂ ᐱᓕᕆᐊᒃᓴᖅᑖᕋᒥ, ᑭᓯᐊᓂ ᓱᓕ ᐃᓕᓐᓂᐊᕐᕕᖕᒧᑦ ᐅᑎᕈᒪᒐᓗᐊᖅᐳᖅ. "ᑭᓯᐊᓂ, ᖃᐅᔨᒪᔪᑎᑦ, ᐃᓅᓯᖅ ᓂᕈᐊᕈᓐᓇᕐᓂᑐᐃᓐᓇᐅᖕᒪᑦ," ᐅᖃᖅᑐᖅ, ᐃᓱᒪᑦᑎᐊᖅᖢᓂ, ᖃᐅᔨᒪᓪᓗᓂ ᐅᑎᖅᑎᑦᑎᔪᓐᓇᕐᓂᕐᒥᓂᒃ ᓄᓇᓕᖓᓄᑦ ᑭᓯᐊᓂᑦᑕᐅᖅ ᖃᐅᔨᒪᓪᓗᓂ ᑭᓱᑐᐃᓐᓇᐃᑦ ᐊᔾᔨᒋᙱᑐᐃᓐᓇᕆᐊᖃᓚᐅᖅᑕᖏᑦ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᓐᓂᕈᓂ. 

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᓂᒃ ᖃᓄᐃᙱᑦᑎᐊᕈᓐᓇᕐᓂᕐᒥᓂᒡᓗ, ᐹᓇᑦᕉᔅ ᓂᕿᑦᑎᐊᕙᖕᓂᒃ ᓂᕆᖃᑦᑕᖅᐳᖅ, ᓂᕆᕙᒃᖢᓂ ᐃᓄᐃᑦ ᓂᕿᖏᓐᓂᒃ ᐊᒥᖅᑳᖃᑎᖃᓕᕌᖓᒥᒃ, ᐃᓚᒋᔭᐅᓪᓗᑎᒃ ᑐᒃᑐᕙᐃᑦ ᓂᕿᖏᑦ, ᐸᓂᖅᑎᓯᒪᔪᑦ ᐃᖃᓗᐃᑦ ᐊᒻᒪ ᐸᓂᖅᑎᓯᒪᔪᑦ. ᐃᖃᐃᓕᓴᖅᐸᒃᑭᕗᖅ, ᓄᓇᒧᑦ ᐊᐅᓪᓚᖅᐸᒃᖢᓂ, ᐱᓱᔪᒃᐸᒃᖢᓂ, ᕿᔪᒃᑖᖅᐸᒃᖢᓂ, ᐅᓪᓚᒃᐸᒃᖢᓂ ᐱᓱᒃᐸᒃᖢᓂᓗ ᓄᓇᑐᐃᓐᓇᕐᒥ. ᐅᒥᐊᖅᑐᖅᖢᓂ ᐃᑯᐊᓚᑎᑦᑎᕙᒃᖢᓂᓗ ᐅᖃᓪᓚᖃᑎᖃᖅᐸᒃᖢᓂᓗ ᐃᑯᐊᓚᔪᒥᒃ, ᐅᖃᐅᓯᖃᖅᐸᒃᖢᓂ ᐃᓱᒫᓘᑎᒋᔭᒥᓂᒃ ᓯᕗᓕᕆᓚᐅᖅᑕᒥᓄᑦ ᐊᑲᐅᓯᕚᓪᓕᖅᑎᑦᑎᕙᒃᑭᕗᖅ. ᐱᕈᖅᓴᓪᓗᓂ ᐃᓕᓐᓂᐊᖅᑎᑕᐅᓚᐅᖅᑐᖅ ᐃᓅᔭᕆᐊᖃᕐᓂᕐᒥᓂᒃ ᐅᐊᓕᓂᕐᒥᐅᑦ ᐊᒻᒪ ᐃᖅᑭᓖᑦ ᐃᓅᓯᖏᓐᓂᒃ, ᒪᕐᕉᖕᓂᒃ ᓄᓇᕐᔪᐊᓂᒃ, ᐅᖃᐅᓯᐅᓚᐅᖅᑐᖅ ᐊᑖᑕᑦᑎᐊᒃᑯᒥᓄᑦ ᐊᓈᓇᒥᒍᑦ. 

ᐱᔪᒃᓯᑎᑦᑎᓂᒃᑯᓪᓕ, ᐹᓇᑦᕉ ᑕᐅᑐᒃᐸᒃᐳᖅ ᐃᑦᑐᒃᑯᒥᓄᑦ, ᐱᓗᐊᖅᑐᒥ ᐊᓈᓇᑦᑎᐊᒥᓄᑦ, ᓲᖃᐃᒻᒪ ᐃᒃᓯᕚᖃᑎᒋᕙᒃᖢᓂᐅᒃ ᐱᓕᕆᑎᓪᓗᒍ ᑐᒃᑐᕙᐅᑉ ᒥᖅᑯᖏᓐᓂᒃ ᐅᓂᒃᑳᖅᑐᐊᖅᐸᒃᖢᓂᓗ. ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕐᕕᖃᙱᓐᓂᖏᓐᓄᑦ ᓄᓇᓕᖕᓂ, ᐊᓈᓇᑦᑎᐊᒥᓂᒃ ᐱᖃᑎᖃᕈᓐᓇᓚᐅᙱᓚᖅ ᐅᖃᐅᓯᕐᒥᓂᒡᓗ ᐃᓕᑦᑎᕙᓪᓕᐊᓪᓗᓂ. ᐱᒃᑯᒥᒍᓱᓚᐅᕆᕗᖅ ᐅᓂᒃᑳᖅᑐᐊᓂᒃ ᐊᑖᑕᑦᑎᐊᒃᑯᒥᓄᑦ ᐅᓂᒃᑳᖅᑐᐊᓂᒃ ᐃᓚᒥᓄᑦ ᓲᕐᓗ ᐊᖓᒃᑯᒥᓄᑦ ᐊᖓᒃᑯᖏᓐᓄᓪᓗ. ᐊᓈᓇᖓᑕ ᑲᔪᖏᖅᓴᐃᕙᒃᑭᕗᖅ ᐃᓕᓴᐃᔨᐅᓂᕐᒥᒃ ᐅᖃᐅᓯᕐᒥᓂᒃ ᐅᖃᓪᓚᒍᓐᓇᖅᑐᒥᒃ. ᖃᑕᙳᑎᖏᓐᓄᑦ ᐊᔭᐅᕆᓚᐅᖅᐳᖅ ᐅᓪᓗᒥᐅᓕᖅᑐᒥ ᐃᓅᓕᕈᒪᓪᓗᓂ, ᐅᒃᐱᕈᓱᒃᑐᖅ.

ᐱᔪᒪᓂᖃᑦᑎᐊᖅᖢᓂ ᑲᑎᖃᑎᖃᕈᒪᓂᕐᒥᒃ, ᖃᐅᔨᒪᓂᕐᒥᒃ ᐊᒻᒪ ᐱᓕᕆᖃᑎᖃᕐᓂᕐᒥᒃ ᒪᒃᑯᒃᑐᓂᒃ, ᓵᓖᓐ ᐹᓇᑦᕉᔅ ᖁᕕᐊᒋᔭᖃᖅᐳᖅ ᐃᖅᑲᓇᐃᔮᒥᓂᒃ ᐃᑲᔪᖅᑎᐅᓪᓗᓂ ᑎᒐᔅ ᐃᓕᓐᓂᐊᕐᕕᖓᓂ. ᐃᓕᓐᓂᐊᖅᑎᑦᑎᕙᒃᖢᓂ ᐹᑦᒥᓐᑕᓐᒥᒃ ᒥᖅᓱᖃᑎᖃᖅᐸᒃᖢᓂᓗ, ᐅᖓᑖᓅᕋᓱᒃᐸᒃᐳᖅ ᐊᒥᖅᑳᖃᑎᖃᖅᐸᒃᖢᓂ ᐊᔪᙱᓐᓂᕆᔭᒥᓂᒃ ᐱᑎᑦᑎᕙᒃᖢᓂᓗ ᐃᓕᓐᓂᐊᖅᑎᓂᒃ ᐱᓕᕆᐊᒃᓴᓂᒃ ᖃᓄᐃᙱᑦᑎᐊᕐᓇᖅᑐᓂᒃ ᐱᔭᒃᓴᖃᖅᑎᖦᖢᓂᒋᑦ. ᑲᔪᖏᖅᓴᖅᑕᐅᓪᓗᓂ ᐃᓚᒥᓄᑦ ᐃᓄᙳᕈᒪᓪᓗᓂ, ᐱᕈᖅᓯᒪᕗᖅ ᑐᓂᓯᔪᓐᓇᖅᖢᓂ ᓄᓇᖅᑲᑎᒥᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.