ᓯᐅᓪᓯ ᑭᐊᓕ ᐅᖃᖅᐳᖅ ᐊᓯᖕᓂᒃ ᑲᒪᒋᑦᑎᐊᕈᒪᓗᒍ ᐃᒻᒥᓂᒃ ᑲᒪᒋᑦᑎᐊᕆᐊᖃᖅᐳᖅ ᓲᖃᐃᒻᒪ ᐊᔪᕐᓇᕐᒪᑦ ᐊᐅᓚᑦᑎᔭᕆᐊᒃᓴᖅ ᑭᓱᑐᐃᓐᓇᓂᒃ ᐊᑐᓪᓗᐊᑕᖅᐸᒃᑕᑎᑦ ᐊᖑᒻᒪᑎᙱᑦᑕᕌᖓᑕ. 

ᓯᐅᓪᓯ ᑭᐊᓕ ᐃᓄᓕᕆᔨᐅᔪᖅ ᐊᒻᒪᓗ ᓴᙱᑏᓐᓇᕋᓱᒃᖢᒋᑦ ᐊᓯᒥᖕᓂᒃ ᑲᒪᑦᑎᐊᕈᓐᓇᖁᓪᓗᒍ. 

"ᐱᒻᒪᕆᐅᕗᖅ ᐅᕙᓐᓄᑦ. ᐊᐅᓚᑦᓯᐊᕆᐊᖃᕋᒃᑯ ᐊᑲᐅᓂᖅᐹᒃᑯᑦ. ᑕᐃᒪᓕ ᖃᐅᔨᒪᑦᑎᐊᕋᓱᐊᖅᑐᖓ ᑕᒪᓐᓇ ᓯᕗᓪᓕᐅᑦᔭᐅᖁᔭᕋ ᐊᒻᒪᓗ ᓂᕿᑦᑎᐊᕙᓐᓂᒃ ᓂᕆᖃᑦᑕᕐᓗᖓ ᐊᒻᒪᓗ ᖃᐅᔨᒪᑦᑎᐊᕋᓱᐊᑐᐃᓐᓇᕐᓗᖓ ᑎᒥᒐ ᑲᒪᒋᑦᑎᐊᕋᓗᐊᕐᒪᖔᒃᑯ ᓯᓂᑦᑎᐊᕐᓗᖓ," ᐅᖃᖅᑐᖅ ᑭᐊᓕ, ᓯᑑᒥᑦᑐᖅ: ᓄᓇᖃᖅᑳᖅᑐᖅ. 

"ᐊᒃᓱᕈᕐᓇᖅᐳᖅ ᐊᐅᓚᑦᑎᔭᕆᐊᒃᓴᖅ ᑭᓱᓕᒫᓂᒃ ᐊᑐᖅᑕᐅᓪᓗᐊᑕᖅᐸᒃᑐᑦ ᐊᖑᒻᒪᑎᔭᐅᙱᑦᑕᕌᖓᑕ."

ᑖᓐᓇ ᓄᕙᒡᔪᐊᕐᓇᖅ-19−ᒥᒃ ᐃᓚᓯᓯᒪᕗᖅ ᐊᖏᔪᒻᒪᕆᖕᒥᒃ ᐊᒃᓱᕈᕐᓇᖅᑐᒥᒃ ᐃᖅᑲᓇᐃᔮᖓᓂᒃ. ᑭᐊᓕ ᐊᐅᓚᑦᑎᔨᐅᔪᖅ Hulitan−ᒧᑦ ᑲᒪᒋᔭᖃᖅᖢᓂᓗ ᓄᑕᖅᑲᑦ ᐊᑦᑕᕐᓇᖅᑐᒦᖁᓇᒋᑦ, ᓄᑕᖅᑲᓄᑦ ᖃᓄᐃᙱᑦᑎᐊᖅᑐᓕᕆᔨᐅᖃᑕᐅᔪᓐᓇᖅᖢᓂ. ᐃᑲᔪᖃᑦᑕᕐᒪᑕ ᐃᓚᒌᖑᔪᓂᒃ ᐱᐅᓯᕚᓕᑎᑦᑎᓪᓗᑎᒃ ᐊᖓᔪᖅᑳᑦᑎᐊᕙᐅᓂᕐᒥᓂᒃ ᐊᒻᒪᓗ ᕿᑐᕐᖓᒥᓂᒃ ᐅᑎᖅᑎᑦᑎᓪᓗᑎᒃ. 

ᑭᓯᐊᓂ ᐃᓚᖏᑦ ᐃᓚᒌᓄᑦ ᐃᒡᓗᐃᑦ ᑲᒪᒋᔭᖃᖅᑐᑦ ᖁᐊᖅᓵᖅᓯᒪᔪᓂᒃ ᐊᒻᒪ ᐊᔪᖅᓴᕐᓂᕐᒥᒃ ᐊᒻᒪ ᓄᕙᒡᔪᐊᕐᓇᖅ-19 ᐊᑲᐅᙱᓪᓕᐅᕈᑕᐅᒃᑲᓐᓂᑐᐃᓐᓇᖅᐳᖅ.

"ᐊᒃᑐᐃᓂᖃᓪᓚᕆᒃᑭᕗᖅᑕᐅᖅ ᐃᓚᒌᓄᑦ ᕿᑐᕐᙵᖏᑦ ᐱᓯᒪᔭᐅᔪᑦ, ᓲᖃᐃᒻᒪ ᐳᓛᕆᐊᕈᓐᓇᕈᓐᓃᕐᓂᖏᓐᓄᑦ ᕿᑐᕐᙵᒥᓂᒃ. ᑕᒪᓐᓇ ᐊᒃᓱᕈᕐᓇᖅᑐᒻᒪᕆᐅᕗᖅ, ᐃᓱᒪᒥᒎᖅᑐᖅ, ᐃᓚᖏᓐᓄᑦ ᐊᖓᔪᖅᑳᓄᑦ ᓄᑕᖅᑲᓄᓪᓗ ᐱᓕᕆᖃᑎᒋᔭᑦᑎᓐᓄᑦ," ᑭᐊᓕ ᐅᖃᖅᖢᓂ. 

ᐃᓚᖏᑦ ᑲᒪᒋᔭᖏᑦ ᐊᒃᓱᕈᖃᑦᑕᖅᑐᑦ ᐅᖃᓘᑎᓂᒃ ᐃᕐᖐᓐᓈᕈᑎᓂᒡᓘᓐᓃᑦ ᐱᓯᒪᓇᓱᒃᖢᑎᒃ, ᐃᓚᓯᑐᐃᓐᓇᕐᖢᓂ ᑕᖃᓂᕐᒧᑦ. ᑭᐊᓕ ᐊᒻᒪ ᐱᓕᕆᖃᑎᖏᑦ ᐃᓚᓯᓪᓗᑎᒃ ᒪᕐᕉᖕᓂᒃ ᓄᑖᓂᒃ ᐃᖅᑲᓇᐃᔮᒃᓵᖕᓂᒃ ᐃᑲᔪᑐᐃᓐᓇᕐᓗᒋᑦ ᑕᐃᒃᑯᐊ ᖃᑕᙳᑎᒌᑦ ᓂᕿᒃᓴᖃᖅᑎᓪᓗᒋᑦ. 

ᑭᐊᓕ ᓯᕗᓪᓕᖅᐸᐅᓪᓗᓂ ᐱᓕᕆᐊᖃᖅᑳᖃᑦᑕᖅᑎᓪᓗᒍ ᐊᐅᓚᑦᑎᓚᐅᖅᐳᖅ ᑎᓴᒪᓂᒃ ᐱᓕᕆᐊᖑᔪᓂᒃ ᑎᑎᖅᑲᖁᑎᒋᔭᐅᔪᓂᒃ ᐊᐅᓚᑦᑎᔨᐅᓪᓗᓂᓗ ᐊᐅᓚᑦᑎᕙᒃᑭᓪᓗᓂ 28−ᐸᓗᖕᓂᒃ ᑎᑎᖅᑲᖁᑎᒋᔭᐅᔪᓂᒃ. ᐊᒻᒪᓗ ᑲᒪᒋᓂᐊᕐᓗᒍ ᓂᐊᖁᖓ ᑕᑯᖃᑦᑕᖅᑐᖅ ᐃᓅᓕᓴᐃᔨᒥᒃ. 

"ᐃᓅᓯᓕᕆᔨᖃᖅᑐᖓ ᑲᑎᖃᑎᒋᒐᔪᒃᑕᓐᓂᒃ, ᐊᒻᒪᓗ, ᐃᒪᓐᓇᐅᖅᑰᔨᔪᖓ, ᑲᔪᓯᓐᓇᒐᓚᒃᑐᖅ ᐅᕙᓐᓄᑦ ᑕᕝᕙᓂ ᐃᖅᑲᓇᐃᔮᒥ. ᐱᒻᒪᕆᐅᕗᖅ ᑭᓇᒥᑭᐊᖅ ᑲᓲᑎᖃᑎᖃᕐᓗᓂ ᓯᓚᑖᓃᑐᐃᓐᓇᕆᐊᓕᖕᒥᒃ ᖃᑕᙳᑎᕕᑦ ᐱᖃᓐᓇᕆᔭᕕᑦᓗ ᐊᖕᒪᓗᖅᓯᓯᒪᔪᒥᒃ ᐃᖅᑲᓇᐃᔭᖃᑎᖕᓂᓪᓗ," ᐅᖃᖅᑐᖅ ᑭᐊᓕ. 

ᐱᒻᒪᕆᐅᕗᖅ ᐃᒃᐱᒋᔭᒃᑯᑦ, ᐅᒃᐱᕐᓂᒃᑯᑦ, ᑎᒥᒃᑯᑦ ᐃᓱᒪᒃᑯᓪᓗ ᖃᓄᐃᙱᑦᑎᐊᕐᓗᓂ ᓲᖃᐃᒻᒪ ᐃᓄᖕᓂᒃ ᑲᒪᒋᔭᖃᕆᐊᒃᓴᖅ ᖁᕕᐊᒋᔭᖃᕐᒪᑦ. ᑭᐊᓕ ᐃᒻᒥᓂᒃ ᑕᐅᑐᖃᑦᑕᖅᑐᖅ ᓇᓪᓕᒍᓱᑦᑎᐊᕐᓂᕐᒥᓂᒃ ᐊᒻᒪᓗ ᐃᑲᔪᐃᓐᓇᖃᑦᑕᖅᑐᓂ ᐃᓄᓐᓂᒃ. 

ᐊᒻᒪ ᑭᖑᓂᑦᑎᓐᓂ ᐊᒃᓱᕈᕐᓇᖅᑐᖅᓯᐅᖃᑦᑕᓚᐅᕐᓂᖓᓄᑦ ᐃᓕᑦᑎᓚᐅᖅᐳᖅ ᐊᓯᒥᓂᒃ ᐃᑲᔪᖅᑐᐃᔪᓐᓇᕐᓂᕐᒥᒃ. 

"ᐃᓕᑦᑎᒃᑲᓐᓂᓚᐅᖅᑐᖓ ᖃᓄᖅ ᐃᒃᐱᖕᓇᕐᒪᖔᑦ ᐃᑲᔪᖅᑕᐅᔭᕆᐊᖃᕐᓂᕐᒥᒃ ᑭᓱᓪᓗ ᐃᑲᔫᑎᖃᕐᒪᖔᑕ ᑕᐃᒃᑯᓄᖓ ᐃᑲᔪᖅᓱᐃᔪᓄᑦ, ᐃᓕᑦᑎᕐᔪᐊᓚᐅᖅᑐᖓᓗ ᑭᓱᓂᒃ ᐱᔭᕆᐊᖃᕐᒪᖔᕐᒪ ᑭᓱᓂᒡᓗ ᖁᔭᓕᓇᔭᕐᒪᖔᕐᒪ," ᐅᖃᖅᑐᖅ ᑭᐊᓕ. 

ᐊᒻᒪᓗ ᑭᐊᓕ ᐊᔾᔨᒌᖏᓐᓇᖅᐸᓚᐅᙱᑦᑐᖅ. ᒪᒃᑯᒃᓯᑎᓪᓗᒍ ᐊᒃᓱᐊᓗᒃ ᐱᑦᑎᐊᓚᐅᖅᑐᖅ ᐊᒻᒪᓗ ᐃᓕᓐᓂᐊᑎᐊᖅᑐᓂ ᑕᒪᓐᓇ ᐱᔾᔪᑎᒋᓪᓗᒍ. ᑖᓐᓇ ᐊᖏᓂᖓ ᐃᖏᕐᕋᔾᔪᑎᐅᑉ ᐃᑲᔪᕐᖢᓂ ᐊᖏᖅᑕᐅᓂᕐᒧᑦ ᓯᓚᑦᑐᖅᓴᕐᕕᒃᔪᐊᒧᑦ ᕕᒃᑑᕆᐊᒥ ᑭᓯᐊᓂ ᐃᓚᓯᓪᓗᓂ ᑕᖃᓂᕐᒥᒃ ᓯᕘᕋᓂᕐᒥᒃᓗ. 

ᐅᖃᐅᔾᔪᐃᓂᖓ ᒪᒃᑯᖕᓂᖅᓴᓄᑦ ᓇᖕᒥᓂᖅ ᑲᒪᒋᑦᑎᐊᕐᓗᓂ ᐃᖕᒥᓂᒃ ᐃᒃᐱᖕᓂᐊᓂᒃᑯᑦ, ᑎᒥᒃᑯᑦ ᐅᒃᐱᕐᓂᒃᑯᓪᓗ ᐊᒻᒪᓗᑦᑕᐅᖅ ᑭᐊᓕ ᐱᐅᓛᖑᔪᖅ ᐃᓕᑦᑎᓗᓂ ᐊᑐᕐᓂᑯᖏᓐᓂ. 

"ᐊᒃᓱᕈᕐᓇᖅᑐᒃᑰᕆᐊᖃᕋᕕᑦ ᐃᓕᓴᖅᓯᓇᓱᒡᓗᑎᑦ ᑭᓱᑦ ᐃᓕᖕᓄᑦ ᐱᒻᒪᕆᐅᖕᒪᖔᑕ," ᑭᐊᓕ ᐅᖃᖅᑐᖅ 

ᖁᔭᓐᓇᒦᒃ ᐋᔅᑳᕐ ᐸᐃᑯᕐ III ᑎᑎᕋᕋᕕᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ.