"ᐊᓕᐊᓇᐃᒍᓱᒃᑐᖓ ᓇᓃᒻᒪᖔᕐᒪ, "ᑯᕆᔅᑏᓐ ᒦᔪᒃ ᐅᖃᖅᖢᓂ.

ᐅᓪᓗᒥᐅᓕᖅᑐᖅ, ᔨᐊᓗᓇᐃᒥᐅᑕᐅᓪᓗᓂ. ᐅᓪᓗᒥ, ᐊᖏᕐᕋᖅᓯᒪᔪᒪᖃᑦᑕᓕᖅᑐᖅ ᒥᖅᓱᒐᔪᒃᖢᓂᓗ.  ᐊᖏᕐᕋᖅᓯᒪᐃᓐᓇᕈᒪᖃᑦᑕᙱᑦᑐᖅ, ᑭᓯᐊᓂ, ᓂᐅᕕᕐᕕᖕᒧᐊᑐᐃᓐᓇᕈᒪᖃᑦᑕᖅᑑᒐᓗᐊᖅ. ᐊᕐᓇᓄᑦ ᕿᒫᕕᒻᒦᒻᒪᑦ ᐊᒻᒪᓗ ᓂᕆᐅᑦᑎᐊᖅᑯ ᓇᒻᒥᓂᖅ ᐃᓂᖃᕐᓂᐊᕐᓂᕐᒥᓂᒃ ᐃᓄᓐᓂᒃ ᒥᖅᓱᖃᑎᖃᕐᓂᐊᕐᒪᑦ.

ᓅᓚᐅᖅᓯᒪᔪᖅ ᖁᓪᓗᖅᑑᒧᑦ ᒪᒃᑯᒃᑎᓪᓗᒍ ᐃᓕᓐᓂᐊᕆᐊᖅᖢᓂ, ᐃᓕᓐᓂᐊᕆᐊᕈᒪᓚᐅᙱᒃᑲᓗᐊᖅᖢᓂ. ᐃᓕᓐᓂᐊᕆᐊᖅᖢᓂ ᐱᒻᒪᕆᐅᓚᐅᖅᑐᖅ ᖃᓪᓗᓈᑐᑦ ᐃᓕᓐᓂᐊᕆᐊᒃᓴᖅ ᑭᓯᐊᓂ ᐊᔪᕐᓇᓚᐅᖅᑐᖅ ᖃᐅᔨᒪᓚᐅᙱᒻᒪᑦ.  ᐊᖓᔪᖅᑳᖏᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, ᑕᒪᓐᓇ ᐃᓱᓕᕋᑖᓚᐅᖅᑐᖅ ᒦᔪᐊᖅ ᐃᓕᓐᓂᐊᕆᐊᕋᐃᒻᒪᑦ. ᐃᓕᓐᓂᐊᕐᕕᖕᒥ, ᒦᔪᒃ ᐃᓕᓐᓂᐊᓚᐅᖅᑐᖅ ᑎᑎᕋᖅᑎᐅᓂᕐᒥᒃ ᓇᓂᓯᓂᕐᒥᒃ ᐃᖅᑲᓇᐃᔮᒃᓴᒥᒃ ᑭᓯᐊᓂ ᐊᒃᓱᕈᕐᓇᖅᑐᒥᒃ ᓇᓂᓯᓚᐅᖅᑐᖅ. ᐅᖄᓚᔪᐃᓐᓇᐅᓚᐅᖅᑐᑦ ᐊᑕᐅᓯᐊᖅᑐᑎᒃ ᐊᒻᒪᓗ ᐊᒃᓱᕈᖅᑐᒻᒪᕆᐅᓕᓚᐅᖅᑐᖅ. ᐃᖅᑲᓇᐃᔮᒥᓂᒃ ᐱᓱᓕᓚᐅᖅᑐᖅ.

ᐃᓅᓯᖅ ᐊᒃᓱᕈᕐᓇᖅᓯᒑᖓᑦ, ᒦᔪᒃ ᑐᔅᓯᐅᔾᔨᕙᒃᐳᖅ ᐃᓱᒪᕙᒃᖢᑎᒡᓗ ᐃᓚᒥᓂᒃ. ᖃᑕᙳᑎᖏᑦ ᑕᒪᕐᒥᒃ ᓴᓂᓕᕇᒃᓯᒪᕗᑦ ᐊᒻᒪ ᐊᖓᔪᒃᖠᖅᐹᖑᓪᓗᓂ. ᐃᕐᖑᑕᖃᑦᑎᐊᖅᑐᖅ ᒫᓐᓇ. ᐊᒃᓱᕈᖃᑦᑕᓚᐅᕐᒪᑦ ᐃᓪᓗᖃᕐᓂᕐᒧᑦ ᐊᒻᒪᓗ ᐃᖅᑲᓇᐃᔭᓕᓚᐅᖅᓯᒪᔪᖅ ᐅᕕᒃᑲᐅᓪᓗᓂ. ᒦᔪᒃ ᐅᓪᓛᕈᕐᒥᑕᓕᐅᓚᐅᖅᑐᖅ ᐊᒥᓱᓄᑦ ᐃᓄᓐᓄᑦ ᐃᓚᒋᔭᐅᓪᓗᓂ ᐃᖅᑲᓇᐃᔮᖓᓄᑦ.

ᒦᔪᒃ ᒪᒃᑯᖕᓂᖅᓴᐃᑦ ᐅᖃᓕᒫᒃᑲᓐᓂᖁᔨᓚᐅᖅᑐᑦ ᐸᐃᑉᐹᖁᑎᓂᒃ. ᐃᓕᓐᓂᐊᕈᑎᒋᔭᖏᑦ ᑕᐃᒪᐃᓕᐅᖅᑎᓪᓗᒋᑦ ᐃᖅᑯᒻᒪᕈᑎᒋᓚᐅᖅᐸᖏᑦ ᐊᒻᒪ ᐃᒻᒥᓂᒃ ᓂᕈᐊᑦᑎᐊᕈᓐᓇᖅᓯᓪᓗᑎᒃ. ᐊᑖᑕᑦᑎᐊᒃᑯᒥᓂᒃ ᐅᒃᐱᕈᓱᓕᖅᑎᑦᑎᓇᓱᓚᐅᖅᑐᖅ ᐊᓈᓇᑦᑎᐊᒃᑯᒥᓂᒃ ᐱᐅᒃᓴᙱᖦᖢᓂ, ᑎᓕᐅᕆᓪᓗᓂ ᐃᑲᔫᑎᖃᕋᔭᕐᓂᖓᓂᒃ ᐃᒥᖃᑦᑕᕈᓐᓃᕈᑎᒃ.

ᐃᖃᓗᖃᖃᑦᑕᕐᓂᖅ ᐅᓪᓛᕈᕐᒥᑕᕐᓇᒧᑦ ᒪᒪᕆᑦᑎᐊᖅᑕᖓ, ᐱᓗᐊᖅᑐᒥᒃ ᐃᖃᓗᐃᑦ. ᑎᒥᖓᑕ ᓈᒻᒪᒋᙱᑕᖏᓐᓂᒃ ᐊᒃᓱᕉᑎᖃᖅᑎᓪᓗᒍ, ᐊᓈᓇᖓᑕ ᐊᓈᓇᑦᑎᐊᖓ ᑎᓕᐅᕆᖃᑦᑕᓚᐅᖅᐳᖅ ᓇᑦᑎᐅᑉ ᐅᖅᓱᖓᓂᒃ ᐆᒃᑐᖁᓪᓗᒍ ᐊᑲᐅᓯᕚᓪᓕᖁᓪᓗᒍ. ᓂᖏᐅᖓ 105-ᓂᒃ ᓄᓇᖃᓚᐅᖅᑐᖅ.

ᐱᕈᖅᓴᓪᓗᓂ, ᐊᑖᑕᖓ ᓇᓐᓄᒐᓱᖃᑦᑕᓚᐅᕐᒪᑦ ᐊᒻᒪᓗ ᐊᐅᓚᖃᑦᑕᓚᐅᖅᑐᑎᒃ, ᐅᖅᓱᐃᕈᑎᑲᓴᑦᑐᑎᒃ ᐃᓛᓐᓂᒃᑯᑦ. ᓈᑦᓰᖑᔭᒥ, ᒦᔪᒃ ᖃᑕᙳᑎᖏᓪᓗ ᑐᑦᓯᐊᓚᐅᖅᑐᑦ. ᓂᖏᐅᖓ ᖃᓪᓗᓈᑎᑐᑦ ᐅᖃᕈᓐᓇᓚᐅᖏᒻᒪᑦ, ᐅᖃᐅᓯᑐᐊᒥᓂᒃ, ᑭᓯᐊᓂ ᑐᑭᓯᓚᐅᖅᑐᖅ ᖃᓪᓗᓈᑎᑐᑦ ᖃᐅᔨᒪᓪᓗᓂ ᖃᓄᖅ ᑐᒃᓯᐊᕐᒪᖔᑕ.

ᖁᕕᐊᓱᓐᓂᖓᓂ ᓇᒦᒻᒪᖔᖅ, ᒦᔪ ᓂᕆᐅᑦᑐᖅ ᖃᓄᐃᓕᐅᕐᓂᐊᕐᓂᕐᒥᓂᒃ. ᐱᓕᕆᓪᓗᓂ ᐊᓐᓄᕋᕐᔪᐊᒥᓂᒃ ᐊᒻᒪᓗ ᓇᓂᓯᓪᓗᓂ ᓇᒻᒥᓂᖅ ᐃᓪᓗᖃᕐᓂᕐᒥᒃ, ᐱᐅᓂᖅᓴᐃᑦ ᐅᓪᓗᐃᑦ ᖃᐃᕙᓪᓕᐊᓕᖅᑐᑦ. ᐃᓱᒪᒋᓪᓗᒋᑦ ᐃᓕᑕᖏᑦ ᖃᑕᙳᑎᖏᓐᓂ ᖃᓄᐃᓕᐅᕈᓘᔭᕐᓂᕆᓚᐅᖅᑕᖏᓪᓗ, ᐃᖅᑲᐅᒪᓂᖃᕐᔪᐊᖅᑐᖅ ᖁᖓᑦᑐᓐᓇᕐᖢᓂ ᖁᔭᓕᓪᓗᓂᓗ ᐱᕕᖃᕐᓂᖓᓂᒃ ᐃᓅᓯᖓ ᐱᐅᓯᒋᐊᖁᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑎᑎᕋᕋᕕᑦ ᑖᔅᓱᒥᖓ.