ᐆᒻᒪᑎᐅᑉ ᐆᒻᒪᑎᖓ ᓯᓐᓇᑦᑑᒪᐅᑉ: ᐅᓂᒃᑳᖅᑐᐊᖅ ᓘᒃᑖᖅ ᑖᓇ ᒪᐃ ᑭᒪᓕᐊᕐᔪᒃ ᐆᒻᒪᑎᒧᑦ 

ᓘᑦᑖᖅ ᑖᓇ ᒪᐃ ᑭᒪᓕᐊᕐᔪᒃ ᖃᐅᔨᒪᓚᐅᖅᑐᖅ ᐱᓚᑦᑐᐃᔨᐅᒍᒪᓂᕐᒥᓂᒃ 6-ᓂᒃ ᐅᑭᐅᖃᓕᕋᒥ, ᑭᓯᐊᓂ ᐃᓱᒪᓚᐅᖅᑐᖅ ᐅᔪᕈᔫᒐᔭᕆᐊᖓ. ᐱᔪᒃᓯᑎᑕᐅᓕᓚᐅᖅᑐᖅ ᐃᖅᑲᓇᐃᔮᖓᓄᑦ ᐅᖃᖃᑎᖃᓚᐅᖅᑎᓪᓗᒍ ᐊᑖᑕᒥᓂᒃ ᐱᔾᔪᑎᖓᓂᒃ ᐃᑦᑐᖓᑕ ᐃᓅᔪᓐᓃᕈᑎᒋᔭᖓᓂᒃ: ᓘ ᔨᕆᒡ ᐋᓐᓂᐊᖓ. ᐱᓚᑦᑐᐃᔪᒪᓚᐅᖅᑐᖅ ALS-ᒥᑦ, ᑐᑭᓯᐅᒪᙱᖦᖢᓂ ᑕᐃᒪᓐᓇ ᐊᑐᙱᒻᒪᑦ. ᑕᒪᓐᓇ ᐱᔪᒃᓯᑎᑦᑎᓂᖅ ᐃᑲᔪᓚᐅᖅᐳᖅ ᑲᔪᓯᓂᖃᑦᑎᐊᖅᖢᓂ ᐃᓕᓐᓂᐊᕐᕕᖕᒥ, ᑕᐃᒪᐃᓐᓂᖓᓄᓪᓗ ᐊᔪᙱᓐᓂᖃᓕᕋᔭᖅᐳᖅ ᓘᒃᑖᙳᕈᓐᓇᕐᓂᕐᒥᒃ. ᐅᖃᑐᐃᓐᓇᕆᐊᖃᕋᕕᑦ ᐱᔪᒪᔭᖏᑦ ᐱᒋᐊᓚᐅᖅᑐᑦ ᓂᐊᖁᒃᑯᑦ ᒥᖦᖢᑎᒃᓗ ᐆᒻᒪᑎᒃᑯᑦ. 

"ᖁᕕᐊᓇᒐᓚᒃᑐᖅ ᐊᒃᓱᕈᕐᓇᒐᓛᒃᖢᓂᓗ, ᑭᓯᐊᓂ ᐱᐅᒋᔭᕋ. ᐃᒪᓐᓇ ᐱᓕᕆᓇᓱᖅᑰᔨᔪᖓ." 

ᖃᑕᙳᑎᖏᑦ ᐃᒡᓗᓕᒑᕐᔪᖕᒥᙶᖅᑐᑦ ᓄᓇᕗᒻᒥᙶᖅᑐᑦ ᑭᓯᐊᓂ ᓅᖦᖢᑎᒃ ᖃᓪᓗᓈᓄᑦ ᕿᓂᕐᖢᑎᒃ ᐱᕕᒃᓴᐅᔪᓂᑦ, ᓲᕐᓗ ᐃᓕᓐᓂᐊᕐᓂᖅ ᑐᕌᖅᑎᑦᑎᓇᔭᖅᑐᖅ ᓘᒃᑖᖅ ᑭᒪᓕᐊᕐᔪᒃ ᐃᖅᑲᓇᐃᔮᑦᑎᐊᕙᖕᒧᑦ: ᐊᔾᔨᐅᙱᑦᑐᒥᒃ ᐆᒻᒪᑎᒃᑯᑦ ᐱᓚᒃᑕᐅᓂᖅ. ᓘᒃᑖᖅ ᑭᒪᓕᐊᕐᔪᒃ ᐅᓪᓗᕐᓂᒃ ᐊᑐᖅᐸᒃᖢᓂ ᐆᒻᒪᑎᒃᑯᑦ ᐱᓚᒃᑐᐃᓂᕐᒥᒃ, ᑕᖃᕐᔪᐊᓂᒃ ᖄᖐᓪᓗᓂ, ᐃᓇᖐᓪᓗᓂ ᐅᕝᕙᓘᓐᓃᑦ ᐋᖅᑭᒃᓱᐃᓪᓗᓂ ᐆᒻᒪᑎᐅᑉ ᓯᒥᒃᑕᐅᑎᖏᓐᓂᒃ, ᐆᒻᒪᑎᐅᑉ ᓯᓕᒎᑎᖏᓐᓂᒃ ᐱᓕᕆᓪᓗᓂ, ᐊᒻᒪ ᐱᓕᕆᓪᓗᓂ ᑕᐃᔭᐅᔪᒥᒃ ᐊᐅᓚᐅᑎᓂᒃ ᐃᑲᔪᖅᑐᐃᓪᓗᓂ. ᐊᖅᑯᑎᐅᔪᖅ ᑕᐅᕗᙵᕋᓱᐊᖅᑐᓂ ᓴᐱᓕᖅᓴᕋᐃᖏᓐᓂᖓᓂ. 

"ᖃᐅᔨᒪᔪᖓ ᐊᐳᖅᑕᕈᑎᖃᖃᑦᑕᕋᑦᑕ, ᑭᓯᐊᓂ ᐅᕙᓐᓄᑦ ᐊᔪᕐᓇᐸᓗᖕᒪᑦ ᐃᓱᒪᔭᕆᐊᒃᓴᖅ ᑐᓗᖅᑕᕈᑎᓂᒃ ᓲᖃᐃᒻᒪ ᐃᓱᒪᑐᐃᓐᓇᕋᒪ ᑕᒪᓐᓇ ᐃᓅᓯᐅᑉ ᐃᓚᒋᖕᒪᒍ ᐊᒻᒪ ᐊᒃᓱᕈᕐᓇᖅᑐᖃᕐᓂᐊᖅᖢᑎᑦ ᐊᒻᒪ ᐊᐳᖅᑕᕈᑎᖃᕐᓂᐊᖅᖢᑎᑦ, ᐅᕝᕙᓘᓐᓃᑦ ᐱᓕᕆᐊᒃᓴᖃᕐᓂᐊᖅᖢᑎᑦ ᐱᓕᕆᐊᕆᔭᕆᐊᖃᖅᑕᔅᓯᓐᓂ ᐊᒻᒪ ᐱᓕᕆᐊᕆᔭᕆᐊᖃᑐᐃᓐᓇᖅᑕᔅᓯᓐᓂ."

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᕌᓂᒃᑎᓪᓗᒋᑦ, ᓘᒃᑖᖅ ᑭᒪᓕᐊᕐᔪᒃ ᑮᓇᐅᔭᖃᑦᑎᐊᓚᐅᖅᐳᖅ ᐱᓇᔪᖕᓂᐊᕐᓗᓂ ᐱᖓᓱᓄᑦ ᓯᓚᑦᑐᖅᓴᕐᕕᒡᔪᐊᓄᑦ ᖁᕕᐊᓱᓚᐅᖅᖢᓂᓗ ᐃᓯᕆᐊᒃᓴᖅ, ᓂᕈᐊᓪᓚᕆᒃᖢᓂ ᑯᐃᓐ ᓯᓚᑦᑐᖅᓴᕐᕕᒡᔪᐊᖓᓂᒃ. ᓂᕈᐊᓚᐅᖅᑐᖅ ᓄᓇᑎᒍᑦ ᐱᔾᔪᑎᖃᕐᖢᓂ ᐊᒻᒪᓗ ᐃᓕᓐᓂᐊᕐᕕᖏᑦᑕ ᐃᓕᖅᑯᓯᖏᓐᓄᑦ, ᓂᕈᐊᖅᖢᓂ ᐃᓅᓯᖕᒧᑦ ᖃᐅᔨᓴᖕᓂᖕᒥᑦ ᐱᓇᔪᓚᐅᖅᑳᕋᓂ ᐋᓐᓂᐊᓯᐅᑎᓄᑦ ᐃᓕᓐᓂᐊᕐᕕᖕᓄᑦ.  ᓘᑦᑖᖅ ᑭᒪᓕᐊᕐᔪᒃ ᐊᖏᖅᑕᐅᓚᐅᖅᑐᖅ ᐃᓚᐃᓐᓇᖏᓐᓄᑦ ᑭᓯᐊᓂ ᓂᕈᐊᖅᑕᐅᓯᒪᔪᖅ ᓯᓚᑦᑐᓴᕐᕕᔾᔪᐊᖓᓄᑦ ᑳᓪᒍᕆ. 

ᑳᓪᒍᕆᒦᑎᓪᓗᒍ, ᑕᑯᓚᐅᖅᑐᖅ ᐆᒻᒪᑎᒃᑯᑦ ᐱᓚᑦᑐᐃᔨᓂᑦ ᐱᔪᒪᓕᖅᑎᑕᐅᔪᓂᑦ ᐊᔾᔨᐅᖏᑦᑐᒥᑦ. ᐱᓇᓱᐊᕈᒪᓕᓚᐅᖅᑐᖅ ᐆᒻᒪᑎᒧᑦ ᓄᓇᖃᕐᓂᕐᒥᑦ ᐊᖏᖅᑕᐅᓪᓗᓂᓗ ᐋᑐᕚᒧᑦ, ᐊᖓᔪᖅᑳᖏᑦ. ᑲᔪᓯᙱᖦᖢᓂ ᐃᓅᖃᑎᒥᓄᑦ ᑕᐃᑲᓂ, ᐊᖏᓛᒧᑦ ᐊᒻᒪ ᐱᓕᕆᒃᑲᐅᓛᖑᓪᓗᓂ ᐆᒻᒪᑎᓕᕆᕝᕕᖕᒧᑦ ᐊᒥᐊᓕᒐᐃᑦ ᐅᐊᖕᓇᖓᓂ, C leveland, Ohio ᐱᓕᒻᒪᒃᓴᕆᐊᖅᑐᖅᖢᓂ. ᑖᓐᓇ ᐃᒡᓗᕐᔪᐊᖅ ᐊᔪᕈᓐᓃᖅᓴᖅᓯᒪᔭᖓ ᐊᑦᑎᖅᑕᐅᓚᐅᖅᐳᖅ ᐆᒻᒪᑎᒃᑯᑦ ᐱᓚᒃᑐᐃᕝᕕᖕᒥᑦ 26−ᓄᑦ ᐊᕐᕌᒍᓄᑦ ᑭᖑᓕᕇᓂ. 

"ᑖᓐᓇ ᐃᖅᑲᓇᐃᔮᖅ ᐊᔭᐅᖅᑐᕐᓂᐊᖅᑕᐃᑦ ᑭᓪᓕᖃᖅᑎᑦᓯᓂᕐᒧᑦ: ᑎᒥᒃᑯᑦ, ᐃᓱᒪᒃᑯᑦ, ᐃᑉᐱᓐᓂᐊᓂᒃᑯᓪᓗ." 

ᓘᑦᑖᖅ ᑭᒪᓕᐊᕐᔪᒃ ᐊᔅᓱᕈᖅᑐᓂ ᐱᓕᕆᓚᐅᖅᑐᖅ ᓯᓐᓇᑦᑑᒪᒥᓂᒃ ᐱᓇᓱᐊᖅᑐᓂ, ᐅᓐᓄᐊᓕᒫᖅ, ᐅᖃᓕᒫᒐᖃᕐᕕᒻᒦᑦᑐᓂ 1-ᒨᕋᓱᐊᕐᓂᖓᓂ ᐅᕝᕙᓘᓐᓃᑦ ᒪᕐᕉᒃ ᐅᓪᓛᒃᑯᑦ, ᐊᑭᓕᖅᓱᖅᑕᐅᒐᑎᒃ ᐱᓕᕆᓪᓗᓂ ᐊᒻᒪ ᐊᓯᒃᑲᓐᓂᖏᓐᓂᒃ. ᑕᐸᐃᕐᓇᓗᐊᙱᑦᑐᖅ, ᐃᓕᓐᓂᐊᖃᑦᑕᓚᐅᖅᐳᖅ (ᓄᓇᒋᔭᖓᑕ ᐊᓯᐊᒍᑦ) ᓄᓇᓕᐸᐅᔭᕐᓂ ᖃᐅᔨᒪᙱᖦᖢᓂ, ᖃᑕᙳᑎᖏᓐᓂᒃ ᐅᖓᓯᒋᒐᓗᐊᖅᖢᓂᐅᒃ. ᐊᒥᓱᓄᑦ ᖃᓂᒻᒪᓐᓇᐅᔪᖅ ᐱᔾᔪᑎᒋᓪᓗᒍ, ᐃᓚᒥᓂᒃ ᓂᑲᒍᓱᒃᑲᓐᓂᓕᓚᐅᕐᒥᔪᖅ ᐃᖅᑲᓇᐃᔭᖅᑎᓪᓗᒍ ᐃᓕᓐᓂᐊᖅᑎᓪᓗᒍ ᒥᐊᓕᒐᐃᑦ ᓄᓇᖓᓐᓂ. 

"ᐃᒃᐱᒋᑦᑎᐊᖅᑕᕋ ᑎᑭᐅᑎᔪᒪᓪᓚᕆᒃᑯᕕᑦ ᑐᕌᒐᕆᔭᕐᓄᑦ ᖃᓄᑐᐃᓐᓇᖅ, ᑐᓴᕐᓈᕐᓂᐅᒃᐸᑦ, ᓴᓇᐅᒐᐅᒃᐸᑦ, ᖃᐅᔨᓴᖅᑐᓕᕆᓂᐅᒃᐸᑦ, ᐱᓕᕆᔾᔪᑎᐅᒐᓗᐊᖅᐸᑦ, ᐊᐅᓚᐅᓯᕆᔨᐅᒐᓗᐊᕈᕕᑦ, ᐃᓕᓐᓂᐊᕐᓂᖅ, ᖃᓄᑐᐃᓐᓇᖅ, ᐱᓕᕆᔪᓐᓇᕐᓂᐊᖅᐳᑎᑦ ᑕᒪᒃᑯᓇᙵᑦ ᐊᒃᓱᕈᕐᓇᖅᑐᓂᒃ." 

ᐱᖃᓐᓇᕆᔭᖏᑦ ᖃᑕᙳᑎᖏᓪᓗ ᕿᒪᒃᑕᖏᑦ ᐃᑲᔪᖅᓱᐃᔾᔪᑎᖏᓐᓂ ᐊᖅᑯᑎᑯᑖᒃᑯᑦ ᐱᔪᒪᔭᖓᓄᑦ ᐃᖅᑲᓇᐃᔮᖓᓄᑦ. ᐃᒻᒥᓂᒃ ᐅᐱᒋᖃᑦᑕᖅᑐᖅ ᐃᓄᑦᑎᐊᕙᐅᔪᓂᒃ ᑲᔪᓯᑦᑎᐊᖁᔨᔪᓂᒃ, ᐊᐱᖅᓱᖅᐸᙱᖦᖢᓂ ᐊᔪᙱᓐᓂᕐᒥᓂᒃ ᐊᒻᒪᓗ ᓵᓚᖃᕋᓱᙱᖦᖢᓂ ᑲᔪᓯᑦᑎᐊᕐᓂᖓᓄᑦ. 

ᐅᖓᓯᒋᒐᓗᐊᖅᖢᓂᐅᒃ ᐊᒻᒪ ᐃᓄᐃᑦ ᑲᒪᒋᔭᖏᑦ, ᓘᒃᑖᖅ ᑭᒪᓕᐊᕐᔪᒃ ᖃᕋᓴᐅᔭᙳᖅᐸᓪᓕᐊᓕᖅᐳᖅ ᐱᑕᖃᙱᓐᓂᐅᔪᖅ ᐋᖅᑭᖁᓪᓗᒍ. ᐱᕕᖃᖅᑎᖦᖢᒍ, ᖃᐅᔨᓇᓱᒃᑐᖅ ᖁᕕᐊᒋᔭᒥᓂᒃ. ᑕᖅᑭᑦ 14 ᐊᓂᒍᖅᑎᓪᓗᒋᑦ ᐅᖃᓕᒫᓚᐅᖅᑎᓪᓗᒍ ᐆᒻᒪᑎᒃᑯᑦ ᐱᓚᒃᑐᐃᓂᕐᒧᑦ ᐅᖃᓕᒫᒐᕐᓂᒃ, ᖃᐅᔨᒪᔾᔪᑎᓂᒃ ᐊᒻᒪ ᐸᐃᑉᐹᓂᒃ, ᐊᓕᐊᓇᐃᒍᓱᒃᑐᖅ ᐅᖃᓕᒫᕆᐊᒃᓴᖅ. ᖁᕕᐊᒋᔭᖃᕐᒥᔪᖅ ᔫᒐᒥᑦ ᐱᓕᕆᐊᖃᕐᖢᓂᓗ ᐃᑲᔪᕐᖢᓂ ᐊᐅᓚᓪᓗᒍ ᑕᖃᓇᖅᑐᖅ ᐅᓪᓗᑯᑖᒃ ᐊᓂᒍᖅᑎᓪᓗᒍ. ᐊᒃᓱᕈᖅᖢᓂ ᐱᓕᕆᔪᖅ, ᑭᓯᐊᓂ ᖃᐅᔨᔪᖅ.

"ᐊᓯᐊᓄᐊᕈᒪᓪᓚᕆᒃᑯᕕᑦ, ᐃᓕᖕᓄᑦ ᓈᒻᒪᖅᑰᔨᖕᒪᑦ, ᑲᔪᓯᑎᑐᐃᓐᓇᕐᓗᒍ. ᖁᓱᒃᑎᑦᑎᑦᑕᐃᓕᒋᑦ ᐅᕝᕙᓘᓐᓃᑦ ᐊᓯᖏᑦ ᐃᓄᐃᑦ ᐅᖃᖃᑦᑕᙱᓪᓗᑎᒃ, "ᐊᔪᖅᑐᑎᑦ" ᐅᕝᕙᓘᓐᓃᑦ, "ᐅᓗᕆᐊᓇᖅᐳᖅ" ᐅᕝᕙᓘᓐᓃᑦ, "ᐊᒃᓱᕈᕐᓇᓗᐊᕐᒪᑦ." ᐊᑑᑎᖃᙱᑦᑐᖅ. ᑕᐃᒃᑯᐊ ᑕᐃᒪᐃᓕᐅᖅᐸᙱᒻᒪᑕ. ᐃᕝᕕᑦ."

ᑭᖑᒧᑦ ᑕᑯᒋᐊᖅᑎᓪᓗᒍ, ᐅᖃᐅᓯᖅᑕᖃᖅᑐᖅ ᑎᓕᐅᕆᓂᕐᒥᒃ ᒪᒃᑯᒃᑐᓂᒃ ᐊᖏᕐᕋᐅᔾᔨᔪᒪᔪᓂᒃ ᑐᕌᒐᕆᔭᒥᓂᒃ. "ᐅᓗᕆᐊᓇᖅᐳᖅ ᐃᓄᑑᔭᕆᐊᒃᓴᖅ. ᑲᑉᐱᐊᓇᕐᒪᑦ ᓄᓇᓕᐸᐅᔭᕐᒨᕆᐊᖓ ᖃᐅᔨᒪᙱᑕᓯ. ᐅᑭᐅᖅᑕᖅᑐᒦᙶᖅᑐᓂ, ᐊᔾᔨᒌᙱᓐᓂᖃᖅᑐᒻᒪᕆᐅᒻᒪᑦ ᐃᓕᖅᑯᓯᑐᖃᐃᑦ ᐊᒻᒪ ᐃᓕᖅᑯᓯᑐᖃᐃᑦ ᐊᒻᒪ ᑕᒪᓐᓇ ᐊᖏᔪᒻᒪᕆᐅᔪᓐᓇᖅᑐᓂ. ᑭᓯᐊᓂ ᐃᒃᐱᒋᒍᕕᐅᒃ ᐆᒻᒪᑎᖕᓂ ᐊᒻᒪ ᓂᐱᖕᓂ X, Y, ᐅᕝᕙᓘᓐᓃᑦ Z ... ᐊᒻᒪᓗ ᑕᐃᒪᐃᓐᓂᐊᕈᑦᑕ, ᑕᕝᕗᖓ ᐅᐸᒋᐊᖃᖅᑐᑎᑦ ᐅᖓᓯᑦᑐᒧᑦ ᐱᓇᓱᓪᓗᑎᑦ ᐱᔪᓐᓇᕐᓂᐅᔪᓂᒃ ᐅᕝᕙᓘᓐᓃᑦ ᐃᓕᓐᓂᐊᕐᓗᑎᑦ ᐅᕝᕙᓘᓐᓃᑦ ᖃᐅᔨᔭᕆᐅᕐᓗᑎᑦ, ᐃᓕᕋᓇᕐᓗᓂ," ᐅᖃᖅᑐᖅ.

ᑕᐃᒪᐃᖁᓪᓗᒍ, ᓘᒃᑖᖅ ᑭᒪᓕᐊᕐᔪᒃ ᐅᖃᖅᐳᖅ ᐃᑲᔪᖅᑐᐃᖃᑦᑕᖁᔨᓪᓗᓂ, ᐱᓇᔪᖃᑦᑕᖁᔨᓪᓗᓂ ᑮᓇᐅᔭᑎᒍᑦ ᐃᑲᔪᖅᑕᐅᓂᕐᒥᒃ ᐃᑲᔪᖅᑕᐅᔪᒪᕙᒡᓗᓂᓗ ᐃᓄᑑᖅᑰᔨᓕᕌᖓᕕᑦ ᐅᕝᕙᓘᓐᓃᑦ ᐃᑲᔪᖅᑕᐅᔪᒪᔪᓐᓃᕌᖓᕕᑦ ᐊᒃᓱᕈᓗᐊᓕᕈᕕᓪᓘᓐᓃᑦ. ᓯᓐᓇᒃᑑᒪᓂᖅ ᑲᔪᓯᔪᓐᓇᖅᑐᖅ, ᑭᓯᐊᓂ ᐃᑲᔪᖅᓱᐃᓂᖅ ᐃᑲᔫᑎᖃᕈᓐᓇᖅᑐᖅ. "ᓇᓕᐊᑐᐃᓐᓇᑦᑎᐊᖅ ᑕᕝᕙᓂ ᓄᓇᕐᔪᐊᕐᒥ ᐃᓕᖕᓄᑦ ᑐᓂᔭᐅᔾᔮᙱᑦᑐᖅ. ᐅᕙᓐᓄᑦ ᑐᓂᔭᐅᔪᖃᓚᐅᓐᖏᑦᑐᖅ. ᐱᓕᕆᓚᐅᖅᑐᖓ ᕙᑕᒥᒃ ᑭᓱᓕᒫᓄᑦ ᐱᓕᕆᐊᕆᓯᒪᔭᓐᓄᑦ ᒫᓐᓇᒧᑦ," ᑎᓕᐅᕆᔪᖅ, "ᑕᐃᒪᓕ, ᐱᓕᕆᐊᕆᓗᒍ, ᐱᓕᕆᐊᕆᓗᒍ. ᖃᓄᐃᓕᐅᒃᑲᓐᓂᕈᓐᓇᖅᑐᒍᑦ ᑕᒪᓐᓇ ᑲᔪᓯᑎᓪᓗᒍ."

ᐊᐱᕆᔭᐅᒐᒥ ᖃᓄᖅ ᐅᖃᕋᔭᕐᒪᖔᕐᒥ ᒪᒃᑯᖕᓂᖅᓴᓄᑦ, ᐅᖃᖅᖢᓂ, "ᐃᓕᖕᓂᒃ ᐅᐱᒋᓗᑎᑦ ᐊᒻᒪ ᐃᒻᒥᓂᒃ ᖁᓱᙱᓐᓂᖅᓴᐅᓗᑎᑦ ᓲᖃᐃᒻᒪ ᐱᓚᐅᕋᕕᐅᒃ; ᐱᔭᕆᐊᖃᖅᑐᑎᑦ." ᑎᓕᐅᕆᑦᑎᐊᓚᐅᖅᑐᖅ ᐱᐅᔪᒥᒡᓗ ᐱᒋᐊᓪᓚᒃᑲᓐᓂᖅᖢᓂ ᐃᓚᒥᓂᒃ ᑭᓯᐊᓂᑦᑕᐅᖅ ᐊᒃᓱᕈᕐᓇᖅᑐᖅᓯᐅᕐᓇᖅᖢᓂ ᐊᒻᒪ ᓯᕘᕋᓐᓇᖅᖢᓂ. 

ᐱᔭᕇᖅᓯᓯᒪᑎᓪᓗᒍ ᐱᐅᔪᒻᒪᕆᓐᓂᒃ, ᓘᑦᑖᖅ ᑭᒪᓕᐊᕐᔪᒃ ᓱᓕ ᑎᑦᑎᓇᖅᐳᖅ, ᐃᖅᑲᐅᒪᓪᓗᒍ, "ᐅᕙᖓᑑᕗᖓ, ᐅᕙᖓᑑᕗᖓ ᐱᓕᕆᓪᓗᖓ, ᓇᒻᒥᓂᖅ ᓯᓐᓇᑦᑐᒻᒪᕆᒻᒥᑦ ᓯᓐᓇᑦᑑᒪᒐ ᒪᓕᓪᓗᒍ. ᑕᐃᒪᐃᒻᒪᑦ ᑕᒪᓐᓇ ᐱᐅᔫᒍᓐᓇᕐᒪᑦ ᑭᓇᑐᐃᓐᓇᕐᒧᑦ ᑲᒪᓇᖅᑐᒻᒪᕆᐅᓪᓗᓂ ᐊᒻᒪ ᐊᖏᒡᒐᓇᖅᑐᒻᒪᕆᐅᓪᓗᓂ ᐅᕝᕙᓘᓐᓃᑦ ᐅᕙᓐᓄᑦ ᐱᐅᓪᓗᓂ." 

ᖁᕕᐊᒋᔭᖃᖅᖢᓂ ᓂᑲᒍᓱᒃᖢᓂ, ᓘᒃᑖᖅ ᑭᒪᓕᐊᕐᔪᒃ ᐊᖅᑯᑎᓕᐅᖅᐳᖅ ᓯᕗᒻᒧᐊᒃᐸᓪᓕᐊᓪᓗᓂ ᐃᒻᒥᓂᒃ ᖃᓄᐃᙱᑦᑎᐊᖁᓪᓗᒍᓗ ᕿᓄᐃᓵᕈᓐᓇᑦᑎᐊᕐᓂᖓᓄᑦ. ᓇᒧᙵᐅᕙᓪᓕᐊᓂᕆᔭᖓᑦ ᓈᒻᒪᒋᔭᐅᔪᒧᑦ ᐃᖅᑲᓇᐃᔮᒧᑦ ᐱᓇᔭᖅᐳᖅ ᑲᓇᑕᓕᒫᒥ, ᑭᒡᓕᓕᒫᒥ ᖄᖏᖅᖢᓂᓗ ᓇᖕᒥᓂᖅ ᓂᕆᐅᒋᔭᒥᓂᒃ ᐊᒃᑐᖅᓯᓇᔭᕐᓂᕐᒥᒃ ᓄᓇᕐᔪᐊᕐᒥᐅᓄᑦ. ᐆᒻᒪᑎᒃᑯᑦ ᐅᓇᑕᕐᓂᖅ ᐆᒻᒪᑎᒥᒃ ᐱᓚᒃᑐᐃᔨᒥᒃ ᐅᑭᐅᖅᑕᖅᑐᒥ ᑲᔪᖏᖅᓴᐃᔾᔪᑕᐅᕗᖅ ᒪᒃᑯᒃᑐᓄᑐᐊᖑᙱᑦᑐᖅ ᑭᓯᐊᓂ ᑭᓇᑐᐃᓐᓇᕐᒧᑦ ᓯᓐᓇᑦᑑᒪᔪᓄᑦ ᐆᒻᒪᑎᒥᒍᑦ, ᐅᖃᐅᓯᑦᑎᐊᕙᖃᕐᖢᓂ ᑎᓕᐅᕆᓂᕐᒥᒃ ᑭᓇᒧᒃᑭᐊᖅ ᖃᐅᔨᒪᓂᖃᑦᑎᐊᖅᑐᒧᑦ ᐆᒻᒪᑎᒥᒃ ᐊᑐᕐᓂᑰᓪᓗᓂᓗ ᓯᓐᓇᑦᑑᒪᒋᔭᒥᖕᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.