"ᓄᖅᑲᓚᐅᖅᓯᒪᙱᑦᑐᖓ ᐅᓪᓗᒃᑯᑦ... ᐃᓱᒪᐃᓐᓇᐅᔭᖅᑐᖓ ᐊᖏᓂᖅᓴᒥᒃ," ᐅᖃᖅᑐᖅ ᐃᐅᕆᑲ ᕕᐅᓪᓴᓐ, ᓴᓇᐅᒐᓕᕆᓂᖅ ᐊᒻᒪ ᑭᐱᙳᐃᔭᐃᔨᒻᒪᕆᒃ ᐅᐃᓂᐹᒡᒥ, ᒫᓂᑑᐸᒥ ᓄᓇᖃᖅᑐᖅ. ᐊᐅᓚᑦᑎᖃᑕᐅᓵᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᑎᑭᑐᒃ ᑕᕐᕆᔮᒃᓴᓂᒃ ᑲᓇᑕᒥ ᑕᕐᕆᔭᕐᕕᖕᒥ ᐊᒻᒪ ᐅᓪᓗᒃᑯᑦ ᐃᖅᑲᓇᐃᔮᖓ ᐱᓕᕆᓪᓗᓂ ᓄᓇᓕᖕᓂ ᐊᒻᒪ ᐊᑐᖅᑐᐊᖅᑐᓕᕆᔨᐅᓪᓗᓂ ᐱᖓᖕᓇᖅᐸᓯᐊᓂ ᐃᓕᖅᑯᓯᓕᕆᕝᕕᖕᒥ. ᑖᓐᓇ ᓄᑖᖑᖅᑎᑕᐅᓯᒪᔪᖅ ᑎᑎᖅᑐᒐᕐᓂᕐᒧᑦ ᑐᑭᒧᐊᖅᑎᑦᑎᔨᐅᓪᓗᓂ ᐊᒻᒪᓗ ᑲᑎᒪᔨᐅᓪᓗᓂ ᐅᐃᓂᐸᐃᒥ ᓴᓇᐅᒐᓕᕆᓂᕐᒧᑦ ᑲᑎᒪᔨᖏᓐᓄᑦ ᐊᒻᒪᓗ ᐃᓕᓐᓂᐊᖅᑎᑕᐅᓪᓗᓂ WRENCH-ᑯᑎᒍᑦ. 

ᑖᓐᓇ TikTok−ᒧᑦ ᐱᕕᒃᓴᖅ ᓴᖅᑭᓚᐅᖅᐳᖅ ᐊᕗᖓᑲᓪᓚᒃ ᐱᓕᕆᔨᓪᓚᕆᐅᓂᕐᒧᑦ ᐱᓕᕆᖃᑎᖃᖅᐸᖕᓂᕐᒥᒃ ᐃᓄᖕᒥᒃ ᐃᖅᑲᓇᐃᔭᖅᑐᒥᒃ ᐅᕙᓂ, Screen Institute−ᒥ ᖃᔅᓯᑲᓪᓚᖕᓂᒃ ᐱᓕᕆᖃᑎᒌᒃᑐᖃᕌᓪᓚᓚᐅᖅᖢᓂ ᐃᓚᒋᔭᐅᓪᓗᓂ 24−ᓄᑦ ᐃᑲᕐᕋᓄᑦ ᑕᕐᕆᔭᒐᒃᓴᒥᒃ ᓵᓚᖃᕋᓱᖕᓂᕐᒥᒃ ᑖᓐᓇ ᕕᐅᓪᓴᓐ ᐱᓕᕆᐊᖃᖅᖢᓂ ᐱᙳᐊᖅᑎᐅᓪᓗᓂ. ᕿᓚᒻᒥᐅᔪᒃᑯᑦ ᑳᓐᑐᓛᒃ ᐊᑐᐃᓐᓇᐅᓕᖅᑎᓪᓗᒍ, ᐊᑯᓂᐊᓗᒃ ᐱᓕᕆᖃᑎᒋᔭᖓ ᐱᖁᔨᓪᓗᓂ. ᑖᓐᓇ ᐃᓚᒋᔭᐅᑐᐃᓐᓇᖅᐳᖅ ᐊᒥᓱᓄᑦ ᐱᕕᒃᓴᓄᑦ ᑎᑭᐅᑎᖃᑦᑕᖅᓯᒪᔪᓄᑦ ᑕᐃᒪᐃᔾᔪᑎᖃᖅᖢᓂ ᐊᑕᓂᕆᔭᐅᔪᓂᒃ ᐊᒃᓱᕈᖅᖢᓂᓗ ᐱᓕᕆᕙᖕᓂᖓᓄᑦ ᐃᓂᒋᔭᒥᓂ. 

ᐃᓱᒪᓕᓚᐅᖅᑐᖅ ᐃᖅᑲᓇᐃᔮᖃᖕᓂᖕᒥᑦ ᓴᓇᐅᒐᓕᕆᓂᖕᒥᑦ ᐃᓚᐅᓚᐅᖅᖢᓂ ᓄᓇᖃᖅᑳᖅᓯᒪᔪᓂᑦ ᑲᔪᖏᖅᓴᐃᔪᓕᕆᓂᖕᒥᑦ ᐱᓕᒻᒪᒃᓴᓂᖕᒥᓪᓗ MTYP−ᒥᑦ, ᐃᓇᖐᓯᒪᕙᒃᖢᓂ ᐃᓕᓐᓂᐊᕌᓂᒃᑳᖓᒥᒃ ᐃᓚᐅᕙᒃᖢᓂᓗ ᓴᓇᐅᒐᓕᕆᓂᖕᓂᑦ. ᐅᖃᐃᓐᓇᖅᐸᓚᐅᖅᑐᖅ ᐱᕕᒃᓴᖃᕐᓂᕐᒧᑦ ᐊᒻᒪᓗ ᐱᓂᖅᓴᐅᖃᑦᑕᕐᓂᕋᖅᖢᓂ. ᑎᑕᒃᑎᒥᒃ, ᕿᓂᓚᐅᖅᑐᖅ ᖃᓄᖅ ᐃᓚᐅᒃᑲᓐᓂᕈᓐᓇᕐᒪᖔᕐᒥ ᓴᓇᙳᐊᕐᓂᕐᒧᑦ ᐊᒻᒪᓗ ᓇᓂᓯᓪᓗᓂ ᖃᓄᖅ ᑕᒪᓐᓇ ᑲᔪᓯᔪᓐᓇᕐᒪᖔᑦ. 

ᖁᕕᐊᒋᓂᖅᐹᖓ ᐃᖅᑲᓇᐃᔮᖓᓂᑦ ᐃᓚᒋᔭᐅᓕᖅᓱᓂ ᓄᓇᓕᓐᓄᑦ, ᐃᓛᓐᓂᒃᑯᑦ ᐃᖅᑲᓇᐃᔮᖅ ᐃᓄᑑᑎᑕᐅᒍᓐᓇᖅᓱᓂ. ᐱᕕᒃᓴᖃᐃᓐᓇᐅᔭᕐᓂᖅ ᐃᓕᑦᑎᔭᕆᐊᖃᕐᓂᕐᓗ ᓄᑖᓂᒃ ᐱᔪᒥᓇᖅᑐᓂᒃᓗ ᐱᒻᒪᕆᐅᔪᖅ ᓲᖃᐃᒻᒪ ᐃᕿᐊᙳᖅᓴᕋᐃᓐᓇᕐᒪᑦ. ᖁᕕᐊᒋᔭᖃᖅᑐᖅ ᐱᒋᐊᕐᓂᕐᒥᑦ ᐆᒻᒪᕆᓕᖅᓱᓂᓗ ᓴᓇᓂᕐᒥᑦ ᓄᑖᒥᑦ. 

ᐅᖃᐅᔾᔪᐃᓂᖓ ᐃᓄᖕᓄᑦ ᐊᒃᓱᕈᖅᑐᓄᑦ ᐅᐸᒃᑕᐅᑦᑕᐃᓕᒪᓂᕐᒥᒃ ᓇᓂᓯᔪᒪᓂᐅᕗᖅ ᐃᓄᖕᓂᒃ ᐅᖃᖃᑎᒋᔪᓐᓇᖅᑕᒥᓂᒃ ᕿᓂᕐᓗᑎᒡᓗ ᐃᓄᖕᓂᒃ ᐊᑕᓂᕆᔭᐅᔪᓂᒃ ᐃᖅᑲᓇᐃᔭᙱᑕᖏᑕ ᓯᓚᑖᒍᑦ. ᖃᖓᙳᖅᐸᓪᓕᐊᓂᖓᓄᑦ, ᐃᓕᑦᑎᓯᒪᔪᖅ ᖁᕕᐊᒋᔭᖃᕐᓂᕐᒥᒃ ᓇᖕᒥᓂᕐᒥᓂᒃ ᓇᖕᒥᓂᕐᒥᓂᒃ ᓴᐃᓕᔪᓐᓇᕐᓂᐊᕐᒪᑦ ᐃᖕᒥᓄᑦ ᑭᓯᐊᓂ ᖃᐅᔨᒪᔪᖅ ᐱᔭᕆᐊᖃᕐᓂᕐᒥᓂᒃ ᐃᓄᖕᓂᒃ. ᑕᒪᒃᑯᐊ ᐊᐳᖅᑕᕈᑏᑦ ᐊᓂᒍᖅᑎᒐᓱᐊᖅᑐᒋᑦ ᐃᓅᓯᕐᒧᑦ, ᓇᓂᓯᒐᓱᐊᖅᑐᖅ ᐃᑲᔪᖅᑐᐃᒍᑎᒥᒃ ᐊᒻᒪᓗ ᐃᓄᓐᓂᒃ ᓂᑲᒋᔪᓐᓇᖅᑕᒥᓂᒃ. ᑕᐅᑐᒃᖢᓂ TikTok ᒪᒥᓴᐃᓂᕐᒧᑦ ᑕᕐᕆᔮᒃᓴᓂᒃ ᐃᑲᔪᕐᖢᓂ ᐃᓕᑦᑎᒃᑲᓐᓂᕐᓂᕐᒥᒃ ᐊᔪᙱᓐᓂᕐᓂ ᐱᔪᒪᓕᖅᑎᑦᑎᓂᕐᓂᒃᓗ ᑕᕐᕆᔮᒃᓴᓂᑦ ᐱᔪᒪᐃᓐᓇᖁᓪᓗᒋᑦ ᓴᙱᓂᖃᕐᓗᑎᒃᓗ. ᐊᐅᐸᖅᑐᖅ ᐃᓂᑦᑎᐊᕙᐅᒋᕗᖅ ᓇᓂᓯᕙᒃᖢᓂ ᐃᑲᔪᖅᑐᐃᓂᕐᒥᒃ ᐅᖃᐅᔾᔪᐃᓂᕐᒥᒡᓗ ᐱᔭᕆᐊᖃᓕᕌᖓᑦ. ᐊᓯᓕᒫᖏᑦ ᐊᔪᓕᕌᖓᑕ, ᕿᓂᕈᓐᓇᕐᒥᔪᖅ ᑭᐅᔾᔪᑎᓂᒃ ᐃᓱᒫᓘᑎᒋᔭᖏᓐᓂᒃ ᖃᕋᓴᐅᔭᒃᑯᑦ. 

ᐃᖅᑲᓇᐃᔭᕐᕕᒋᒐᔪᒃᑕᖓᑕ ᐅᓪᓗᖓ ᕕᐅᓪᓴᓐᒧᑦ ᐃᓚᐅᑎᑦᑎᔪᖅ ᐃᖅᑲᓇᐃᔭᕐᓂᕐᒥᒃ ᐱᖓᖕᓇᖅᐸᓯᐊᓂ ᐃᓕᖅᑯᓯᓕᕆᕝᕕᖕᒥ, ᓇᓂᑭᐊᖅ ᓇᓂᓯᓪᓗᓂ ᐃᑲᔪᖅᓱᐃᓂᕐᒥᒃ. ᐊᒥᓱᑦ ᐃᖅᑲᓇᐃᔭᖃᑎᖏᑦ ᐊᓯᖏᓐᓂᑦᑕᐅᖅ ᐱᖃᖅᑐᑦ ᐱᓕᕆᖃᑎᒋᑐᐃᓐᓇᕆᐊᖃᖅᑕᒥᓂᒃ ᐊᒻᒪᓗ ᐃᖅᑲᓇᐃᔭᖅᑐᓂ ᑕᕐᕆᔭᕐᕕᒻᒥ ᐊᒻᒪᓗ ᒥᑭᔪᓂᒃ ᑳᑦᑐᓛᖃᑦᑐᓂ. ᑲᑕᒃᓯᒪᑎᓪᓗᒍ, ᐱᓕᕆᔪᓐᓇᖅᑐᖅ ᓇᖕᒥᓂᕐᒧᑦ ᐱᓕᕆᐊᒃᓴᓂᑦ ᐱᔭᕇᖅᓯᒍᓂ ᐱᔭᕆᐊᖃᖅᑕᓕᒫᖏᓐᓂ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᓄᓇᖃᖅᑳᖅᓯᒪᔪᓄᑦ ᐃᓱᒪᒋᔭᖃᖅᑐᓄᑦ ᐃᖅᑲᓇᐃᔮᖃᕐᓂᕐᒥᒃ ᐃᓱᒪᑐᓂᒃᑯᑦ ᖁᙱᐊᖅᑎᑦᑎᓂᕐᒥᒃ ᐊᒥᓲᔪᓐᓇᕐᓂᓕᒫᖏᓐᓂᒃ ᐃᓕᓐᓂᐊᕐᕕᐊᕈᓯᕐᓂᒃ ᐃᓕᓐᓂᐊᓚᐅᑲᖕᓂᕐᓂᒡᓗ ᐊᔪᕐᓇᙱᓐᓂᓕᒫᖓᓂ, ᐅᐸᒍᑎᓗᓂ ᑭᒃᑯᑐᐃᓐᓇᕐᓄᑦ ᑕᑯᒃᓴᐅᑎᑦᑎᓂᕐᓂ, ᑕᐅᑐᖕᓂᕐᓂ, ᖁᕕᐊᓲᑎᖃᕐᓂᕐᓂ ᓴᖅᑭᔮᖅᑎᑦᑎᓂᕐᓂᓘᓐᓃᑦ ᐃᓕᑦᑎᓗᑎᒃᓗ ᖃᓄᖅ ᐃᖏᕐᕋᔪᑦ ᐊᐅᓚᑕᐅᖕᒪᖔᑕ. ᐅᖃᖅᖢᓂ ᑭᒃᑯᑦ ᐃᖅᑲᓇᐃᔭᕐᒪᖔᑕ ᐃᓂᖏᓐᓂ, ᐃᖅᑲᓇᐃᔭᖃᑦᑕᖅᓯᒪᔭᖏᑦ ᑎᑎᕋᖅᓯᒪᔪᑦ ᐊᒻᒪ ᐃᓕᓐᓂᐊᖅᓯᒪᓂᑯᖏᑦ ᖃᐅᔨᓴᖅᑕᐅᓪᓗᑎᒃ. ᐃᓱᓕᕝᕕᒃᓴᐅᑎᖏᑦ ᒪᓕᒃᖢᒋᑦ, ᐱᕕᒃᓴᐃᑦ ᐊᒻᒪ ᐃᑭᐊᖅᑭᕕᒃᑯᑦ ᐃᓗᓕᖏᑦ ᓴᖅᑭᑉᐸᓪᓕᐊᖏᓐᓇᐅᔭᖅᑎᓪᓗᒋᑦ, ᓄᑖᓂᒃ ᖃᐅᔨᓇᒐᒃᓴᖅᑕᖃᐃᓐᓇᐅᔭᖅᐳᖅ. 

"ᖃᓄᑐᐃᓐᓇᖅ ᓯᓚᑐᓂᖅ ᐅᕝᕙᓘᓐᓃᑦ ᖃᐅᔨᒪᓂᖅ ᐱᔪᓐᓇᖅᑕᕐᓂᒃ ᑭᓇᑐᐃᓐᓇᒥᒃ. ᓈᓚᒡᓗᑎᑦ, ᓈᓚᖃᑦᑕᕐᓗᑎᓪᓗ ᖃᐅᔨᒍᕕᑦ ᐊᒥᓱᑦ ᐃᓄᐃᑦ ᐊᒥᓱᓪᓘᓐᓃᑦ ᑲᑐᔾᔨᖃᑎᒌᑦ ᐅᕝᕙᓘᓐᓃᑦ ᐃᖕᒥᖕᓂᒃ ᐅᖃᒃᑲᓐᓂᖃᑦᑕᕐᓂᖏᓐᓂᒃ," ᐅᖃᐅᔾᔨᔪᖅ, ᐃᓚᓕᐅᔾᔨᖁᔨᓪᓗᓂ ᐅᖃᐅᓯᐅᔪᓂᒃ ᓴᖅᑭᑉᐸᓪᓕᐊᖏᓐᓇᖅᑐᓂᒃ. 

ᓇᖕᒥᓂᖅ ᐃᓕᓐᓂᐊᖅᓯᒪᓂᖓᓄᑦ, ᕕᐅᓪᓴᓐ ᖁᕕᐊᒋᔭᖃᓚᐅᙱᑦᑐᖅ ᖁᑦᑎᖕᓂᖅᓴᒥᒃ ᐃᓕᓐᓂᐊᕐᕕᖕᒥ ᐊᒃᓱᕈᕐᖢᓂᓗ ᐊᓂᒍᐃᓇᓱᒃᓗᓂ ᖃᓪᓗᓈᑎᑐᑦ. ᐱᓕᕆᔪᒻᒪᕆᐅᓚᐅᖅᐳᖅ ᐃᓕᓐᓂᐊᑲᐃᓐᓇᖅᑐᓂ ᐊᒻᒪ ᖁᑦᑎᓐᓂᓕᓐᓄᑦ 11 ᐊᒻᒪ 12-ᓂᒃ ᑮᓇᐅᔭᓕᐅᕆᐊᖃᓚᐅᖅᐳᖅ. ᐃᖅᑲᓇᐃᔭᖃᑦᑕᓚᐅᖅᐳᖅ ᐃᓛᓐᓂᒃᑯᑦ ᐊᒻᒪ ᖃᐅᔨᓴᖅᑐᓕᕆᔪᓐᓇᐃᓕᓪᓗᓂ. ᐱᔭᕇᖅᑎᓪᓗᒍ, ᖁᕝᕙᕆᐊᕈᑎᑖᕈᓐᓇᑦᑎᐊᓚᐅᖅᑐᖅ ᐃᓕᓐᓂᐊᕌᓂᖕᓂᕐᒧᑦ ᑭᓯᐊᓂ ᐊᒃᓱᕈᕐᓇᖅᑐᒃᑰᕈᑎᒋᖃᑦᑕᓚᐅᖅᑕᖓ ᑐᑭᖃᕐᖢᓂ ᐱᓇᓱᙱᖦᖢᓂ ᖁᑦᑎᖕᓂᖅᓴᒥᒃ ᐃᓕᓐᓂᐊᕐᓂᕐᒥᒃ, ᓂᕈᐊᖔᕐᖢᓂ ᐃᓕᑦᑎᖔᕐᖢᓂ ᐃᖅᑲᓇᐃᔮᒥᒃ ᑲᔪᖏᖅᓴᐃᔪᓕᕆᓂᕐᓂ ᐃᓕᓐᓂᐊᕐᓂᕐᓗ, ᐊᐱᖅᓱᕐᓂᒃᑯᑦ ᐊᐱᖅᓱᕐᓂᒃᑯᓪᓗ. 

ᐃᓱᒪᒋᓪᓗᒍ ᓂᕆᐅᒋᔭᖏᑦ ᓯᕗᓂᒃᓴᒧᑦ, ᕕᐅᓪᓴᓐ ᑐᓂᓯᓪᓗᓂ ᐊᐃᑦᑑᑎᒥᒃ ᐃᖕᒥᓄᑦ ᐱᓇᔪᒍᓐᓇᕐᓂᐊᕐᒪᑦ ᐊᓯᐊᒍᖔᖅ ᐃᓕᑦᑎᓂᕐᒧᑦ ᐊᑐᕐᓂᑯᒥᒃ ᐃᓕᓐᓂᐊᖅᑎᑦᑎᓂᒃᑯᑦ ᐃᓕᓐᓂᐊᓚᐅᑲᖕᓇᒃᑯᓪᓗ ᓅᑦᑐᓐᓇᕐᓂᐊᕐᒪᑦ ᓴᓇᙳᐊᕐᓂᕐᒧᑦ ᑐᑭᒧᐊᒃᑎᑦᑎᔨᐅᓂᕐᒧᑦ ᐃᖅᑲᓇᐃᔮᒧᑦ. ᐊᖅᑯᑕᐅᔪᒪᖕᒪᑦ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᓐᓂᒃ ᐊᒻᒪ ᓴᓇᐅᒐᕐᓂᒃ ᐊᒻᒪ ᐃᓕᖅᑯᓯᓕᕆᔨᖏᓐᓂᒃ ᓄᓇᓕᐸᐅᔭᕐᒥᓂ ᓲᖃᐃᒻᒪ ᖃᐅᔨᒪᖕᒪᑦ ᑲᑎᙵᖃᑎᒌᙱᕐᔪᐊᕐᓂᖏᓐᓂᒃ ᑖᒃᑯᐊᒃ ᒪᕐᕉᒃ. ᐊᑑᑎᓕᖕᒥᑦ ᐅᖃᓪᓚᒍᓐᓇᖅᑐᖅ ᐅᖃᐅᓯᖕᓂᑦ ᑕᒪᐃᓐᓂᒃ ᓴᓇᐅᒐᓂᑦ ᓄᓇᖃᖅᑳᖅᓯᒪᔪᓪᓗ ᐃᓕᖅᑯᓯᖏᓐᓂᑦ. ᐱᓕᕆᐊᖏᑎᒍᑦ, ᓂᕆᐅᒋᔭᖃᖅᑐᖅ ᐅᖃᐅᓯᖃᕐᓂᕐᒥᑦ ᐊᑭᓕᖅᑕᐅᓂᕐᒧᑦ ᐊᔾᔨᒌᑎᑦᓯᓂᕐᒥᓪᓗ ᐃᓚᒋᔭᐅᑎᑦᓯᓂᕐᒥᑦ ᐃᓄᑐᖃᕐᓂᑦ, ᐃᓕᖅᑯᓯᕐᒥᑦ ᖃᐅᔨᒪᖃᑎᒌᓐᓂᕐᒥᑦ ᐱᓕᕆᑦᓯᐊᕐᓂᒃᑯᑦ ᐱᐅᓯᕚᓪᓕᑎᑦᓯᓂᕐᒥᓪᓗ ᑕᒻᒪᖅᓯᒪᖏᑦᑐᓂᑦ ᑲᑐᔾᔭᐅᔪᓂᑦ. ᐊᖏᔪᐊᓗᒻᒥᒃ ᑮᓇᐅᔭᓂᒃ ᐱᖏᑉᐸᑦ, ᐱᓇᓱᐊᓕᕐᓂᐊᖅᑐᖅ ᒥᑭᓂᖅᓴᓂᒃ ᐱᔪᓐᓇᕈᓂ ᐊᒻᒪᓗ ᐱᓇᓱᐊᖏᓐᓇᕐᓗᓂ ᑮᓇᐅᔭᓂᒃ ᐃᑲᔪᖅᑕᐅᖁᓪᓗᒍ ᐃᓕᓐᓂᐊᖅᑕᖓ. ᐅᖓᑖᓄᑦ ᐱᓕᕆᔨᒻᒪᕆᐅᓂᕐᒧᑦ ᐱᓇᓱᐊᕐᓂᖓᓄᑦ, ᐱᓱᕋᔭᒍᒪᔪᖅ ᖃᖅᑲᓂᑦ, ᓴᓇᙳᐊᑲᓐᓂᕐᓂᕐᒥᑦ ᑲᒪᒋᔭᖃᕐᓂᕐᒥᓪᓗ ᐊᒥᓱᓂᑦ ᓯᓐᓇᑦᑑᒪᖏᓐᓂᑦ ᓱᒃᑲᐃᑦᑐᒥᑦ. 

ᐃᓱᒪᒋᓪᓗᒍ ᖃᓄᖅ ᐱᔪᒃᓯᑎᑦᑎᕙᖕᒪᖔᑦ ᖃᖅᑲᓂᒃ ᒪᓕᒡᓗᓂᓗ ᐱᓕᕆᔨᓪᓚᕆᐅᓂᕐᒧᑦ ᐃᓱᒪᒋᓯᒪᔭᒥᓂᒃ, ᐅᐃᓪᓴᓐ ᐅᖃᐅᓯᖃᖅᖢᓂ ᓂᙵᐅᒪᓂᕆᓚᐅᖅᑕᒥᓂᒃ ᐃᓗᐊᒍᑦ, ᑕᒪᓐᓇᓗ ᐱᐅᓪᓗᓂ ᐊᖅᑯᓵᕈᓐᓇᖅᓯᒪᓪᓗᓂᐅᒃ. ᑭᓇᑭᐊᖅ ᓈᒻᒪᒐᓱᒋᙱᖦᖢᓂᐅᒃ, ᓇᓂᓯᓪᓗᓂ ᐊᑐᒐᒃᓴᑦᑎᐊᕙᖕᒥᒃ. ᐃᓄᐃᑦ ᑲᔪᓯᖁᙱᖦᖢᓂᒋᑦ, ᐊᔭᐅᖅᑐᐃᕙᓚᐅᖅᑐᖅ ᑲᔪᓯᑦᑎᐊᖁᔨᓪᓗᓂᓗ. ᓂᙵᐅᒪᓂᖓ ᐃᓗᒥᒎᖅᖢᓂ ᐊᔭᐅᕐᖢᓂᐅᒃ ᐊᒻᒪᓗ ᑕᑯᔭᒥᓂᒃ ᐱᐅᙱᑦᑐᒥᒃ ᐃᒃᐱᒍᓱᓕᕐᖢᓂ ᐱᐅᔪᒧᑦ. "ᓂᙵᐅᒪᓂᖅ ᑕᐅᑐᒃᑕᐅᔭᕆᐊᖃᙱᑦᑐᖅ ᐱᐅᙱᑦᑐᒃᑯᑦ ᐃᓅᑉ ᐃᓕᖅᑯᓯᖓᓄᑦ. ᐃᒪᓐᓇ ᑐᑭᖃᑐᐃᓐᓇᖅᐳᖅ, ᑕᑯᕙᒃᐳᑦ ᐊᖏᔪᑲᓪᓚᖕᒥᒃ ᐱᐅᙱᑦᑐᒥᒃ, ᑖᒃᑯᐊᓗ ᐊᐅᓚᑦᑎᓪᓚᕆᒋᐊᖃᕐᓂᐊᖅᖢᑎᒃ ᐃᑭᑦᑐᖁᑎᒥᓂᒃ ᓴᖅᑭᑎᑦᑎᔪᒪᒍᑎᒃ ᐱᐅᑦᑎᐊᖅᑐᒥᒃ ᓄᓇᕐᔪᐊᕐᒧᑦ," ᑕᐃᒪᓐᓇ ᐃᓱᓕᑉᐳᖅ. 

ᓯᓐᓇᑦᑑᒪᓂᖅ ᓄᖅᑲᓚᐅᖅᓯᒪᙱᖦᖢᓂᓗ ᐊᖏᓂᖅᓴᒧᑦ, ᐃᐅᕆᑲ ᕕᐅᓪᓴᓐ ᓇᓂᓯᓯᒪᔪᖅ ᐃᖅᑲᓇᐃᔮᒃᓴᒥᒃ ᓴᓇᙳᐊᕐᓂᕐᒥᒃ ᐃᓅᓯᕐᒧᑦ. ᑕᐅᑐᙳᐊᖅᑐᖅ ᓴᓇᙳᐊᕐᓂᕐᒥᑦ ᓄᓇᕐᔪᐊᕐᒥ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᑦ ᖃᐅᔨᒪᔭᖏᓪᓗ ᑲᒪᒋᔭᐅᔪᓐᓇᕐᓗᑎᒃ ᑲᒪᑦᑎᐊᕐᓗᑎᒃ ᓱᓕᑦᑎᐊᕐᓗᑎᒃᓗ ᐱᕈᖅᐸᓪᓕᐊᓗᓂᓗ ᐊᖅᑯᑎᓂᒃ ᓯᕗᓕᕐᓗᒍ ᓴᓇᕝᕕᒃ ᐃᓕᑦᑎᕙᓪᓕᐊᑎᓪᓗᒍ ᐱᕈᖅᐸᓪᓕᐊᑎᓪᓗᒍᓗ. ᓂᙵᒃᓴᕋᐃᓪᓗᓂ ᐊᒻᒪ ᓂᑲᒍᓱᒃᓴᕋᐃᓐᓇᖅᖢᓂ, ᑕᓕᖏᑦ ᐊᒻᒪ ᐆᒻᒪᑎᖏᑦ ᐅᒃᑯᐃᖓᕗᑦ ᓴᓇᙳᐊᑦᑎᐊᕈᓐᓇᖅᓯᓗᑎᒃ ᖃᐅᒃᐸᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

‍