ᐊᑕᐅᓯᖅ ᑕᐃᒪᐃᖏᓐᓇᐅᔭᖅᑐᖅ ᐃᓅᔭᖅ ᓕᐊᔅᓕ ᕗᕋᑦᓚᓐᒧᑦ ᓄᓇᖅᔪᐊᖑᓚᐅᕐᒪᑦ ᓴᓇᐅᒐᐃᑦ. ᕗᕋᑦᓚᓐ ᑲᖏᖅᖠᓂᕐᒥᐅᑕᐅᓯᒪᓕᖅᑐᖅ, ᓄᓇᕗᒻᒥ, ᐊᕐᕌᒍᑦ 20 ᐅᖓᑖᓄᑦ ᓅᖃᑦᑕᖅᓯᒪᓪᓗᓂᓗ ᒪᒃᑯᖕᓂᖅᓴᐅᑎᓪᓗᒍ, ᕗᐊᑦ ᓯᒥᑦ−ᒥ ᓄᓇᖃᖅᖢᓂ, ᕿᑭᖅᑕᕐᔪᐊᕐᒥ, ᐃᒃᐱᐊᕐᔪᖕᒥ, ᐊᒻᒪ ᒥᑦᑎᒪᑕᓕᖕᒥ.

ᕗᕋᑦᓚᓐ ᓇᒻᒥᓂᖃᖅᑎᐅᕗᖅ ᓇᒻᒥᓂᖁᑎᖃᖅᑐᓂᓗ ᑕᐃᔭᐅᔪᒥᒃ ᓇᒥᑭᐊᖅ, ᓂᐅᕐᕈᑎᖃᖅᐸᑦᑐᓂ ᐃᓄᓐᓂᒃ, ᓄᓇᕗᒻᒥᐅᓂᒃ, ᐊᒻᒪᓗ ᓄᓇᖃᖅᑳᖅᓯᒪᔪᓂᒃ ᓴᓇᐅᒐᕐᓂᒃ.

"ᓇᖕᒥᓂᕋ ᓂᐅᕐᕈᑎᖃᖅᑎᓪᓗᖓ ᐱᐅᓴᐅᑎᓂᒃ, ᓴᓇᐅᒐᕐᓂᒃ, ᓴᓇᐅᒐᕐᓂᒃ, ᐊᓐᓄᕌᓂᒃ, ᐱᖁᑎᒃᑯᕕᖕᓂᒃ, ᐱᐅᓴᐅᑎᓂᒃ, ᐃᓄᖕᓂᙶᖅᑐᓂᒃ, ᓄᓇᕗᒻᒥᐅᓂᒃ, ᐊᒻᒪ ᓄᓇᖃᖅᑳᖅᓯᒪᔪᓂᒃ ᓂᐅᕕᐊᒃᓴᖃᖅᐸᒃᑐᓂᒃ," ᕗᕋᑦᓚᓐ ᐅᖃᖅᑐᖅ.

ᑭᓯᐊᓂ ᑖᓐᓇ ᑲᒻᐸᓂ ᐱᒋᐊᕋᒥᐅᒃ, ᕗᕋᑦᓚᓐ ᖃᐅᔨᒪᓚᐅᖅᑐᖅ ᒥᑭᑦᑐᒥᒃ ᐱᒋᐊᕆᐊᖃᕐᓂᕐᒥᓂᒃ. ᒫᓐᓇᐅᔪᖅ, ᓂᐅᕐᕈᑎᖃᖅᐸᑦᑐᖅ ᓂᐅᕕᕐᕕᕋᓛᓂᒃ ᐊᒻᒪᓗ ᓂᕈᐊᖅᐸᑦᑐᓂ ᐊᑦᔨᒌᖏᑦᑐᓂᒃ ᐃᓂᐅᔪᓂᒃ.

ᓄᕙᒡᔪᐊᕐᓇᖅ-19−ᒧᑦ, ᐅᖃᖅᐳᖅ ᓴᖅᑭᑎᑦᑎᖃᑦᑕᕐᓂᕋᖅᖢᓂ ᑭᒃᑯᑐᐃᓐᓇᓄᑦ ᑕᑯᔭᐅᔪᓐᓇᖅᐸᒃᑐᓄᑦ, ᓄᓇᓕᖕᓂᓗ ᑲᔪᓯᑎᑦᑎᖃᑦᑕᕐᓂᐊᖅᖢᓂ, ᐊᐅᓪᓚᖅᑎᑕᐅᖃᑦᑕᖅᓯᒪᓪᓗᓂᓗ ᐊᓯᖏᓐᓄᑦ ᐃᓂᓄᑦ.

ᑭᓯᐊᓂ ᑐᕌᒐᕆᓪᓗᐊᑕᖅᑕᖓ ᓄᑦᑕᖅᑐᒥᒃ ᑲᓕᒐᕐᒥᒃ ᓴᓇᔭᖅᑐᕈᓐᓇᕐᓂᐊᕐᒪᑦ ᓇᒥᑐᐃᓐᓇᖅ ᓄᓇᓕᓐᓂ.

"ᐊᓯᖏᓐᓂᒃ ᓄᓇᓂᒃ ᓄᖅᑲᖓᔪᓐᓇᖅᑐᖓ. ᐃᒻᒪᖃ ᑲᑎᑎᓪᓗᒋᑦ ᐱᙳᐊᕐᓂᐅᔪᒧᑦ ᐅᕝᕙᓘᓐᓃᑦ ᓲᕐᓗ, ᐊᓇᐅᓕᒑᖅᑐᖃᓕᖅᐸᑦ, ᐊᓇᐅᓕᒑᕐᕕᓕᐅᕈᓐᓇᖅᑐᖓ, ᐅᕝᕙᓘᓐᓃᑦ ᕼᐋᑭᖅᑐᖃᓕᖅᐸᑦ, ᒥᕐᖑᐃᕐᓯᕕᓕᐅᕈᓐᓇᖅᑐᖓ, ᐅᕝᕙᓘᓐᓃᑦ ᑕᑉᐸᐅᙵᕈᓐᓇᕋᓗᐊᕈᒪ ᐊᒻᒪᓗ ᓄᓇᒧᕈᓐᓇᓂᖅᓴᐅᓗᖓ, ᖁᕕᐊᓱᒍᑎᒋᐊᕐᔪᓪᓗᒍ ᐊᒻᒪᓗ ᐊᔾᔨᐅᖏᑦᑑᓗᓂ, " ᕗᕋᑦᓚᓐ ᐅᖃᖅᑐᖅ.

ᕗᕋᑦᓚᓐ ᐃᓱᒪᒋᔭᖃᕐᔪᐊᖅᐳᖅ ᓇᖕᒥᓂᕐᒥᓂᒃ, ᐅᖃᖅᖢᓂᓗ ᑭᓱᓂᒃ ᐱᒋᐊᖅᑎᑦᑎᔪᒪᖕᒪᖔᑦ ᐊᓈᓇᐅᓪᓗᓂ ᑎᓴᒪᓂᒃ ᕿᑐᕐᖓᖃᖅᖢᓂ.

ᐅᖃᖅᑐᓂ ᐱᔭᕇᕋᒥ ᐃᓕᓐᓂᐊᕐᕕᐊᓗᒻᒥ ᑐᖁᓚᐅᖅᓯᒪᙱᑎᐊᖅᑐᓂ ᐃᖅᑲᓇᐃᔮᕆᔪᒪᔭᒥᓄᑦ ᐊᒻᒪᓗ ᖁᕕᐊᒋᔭᖃᒻᒪᕆᓚᐅᖅᑐᖅ ᐃᖅᑲᓇᐃᔭᕆᐊᒃᓴᖅ ᐊᒥᓱᓂᒃ ᐊᑦᔨᒌᖏᑦᑐᓂᒃ ᓱᕈᓯᖃᑦᑐᓂ.

ᕗᕋᑦᓚᓐ ᐅᖃᖅᐳᖅ ᐃᖅᑲᓇᐃᔭᖃᑦᑕᖅᓯᒪᓪᓗᓂ ᐊᔾᔨᒌᙱᑦᑐᓂᑦ, ᐃᓚᓕᐅᑎᓪᓗᒋᑦ ᓂᕈᐊᖅᑐᓕᕆᓂᖅ ᐊᒻᒪ ᐃᓕᓐᓂᐊᖅᑐᓕᕆᓂᖅ, ᓄᓇᕗᑦ ᒐᕙᒪᒃᑯᑦ, ᐊᒻᒪ ᓇᒻᒥᓂᖁᑎᖃᖅᑐᑦ.

"ᐃᓚᖓ ᒪᓕᑦᑎᐊᖏᓐᓇᐅᔭᖅᑐᖅ ᖁᕕᐊᒋᖃᑦᑕᖅᑕᕋ ᓴᓇᐅᒐᓕᕆᓂᖅ ᐃᓕᖅᑯᓯᒃᑯᓪᓗ ᓴᓇᕈᓘᔭᕐᓂᕐᓗ," ᐅᖃᖅᑐᖅ ᕗᕋᑦᓚᓐ.

"ᖁᕕᐊᒋᔭᖃᖅᑐᖓ ᐱᓕᕆᖃᑎᖃᕆᐊᔅᓴᖅ ᐊᒥᓱᓂᑦ ᐊᔾᔨᒌᖏᑦᑐᓂᑦ ᓴᓇᙳᐊᖅᑕᐅᔪᓂᑦ ᐊᒻᒪ ᓴᓇᑐᓂᕐᒥᑦ. ᑕᒪᓐᓇ ᒪᓕᒃᓴᐃᓐᓇᖅᐸᓚᐅᖅᑐᖅ ᐱᓕᕆᐊᕆᖃᑦᑕᖅᓯᒪᔭᓐᓂᒃ ᐅᑭᐅᒐᓴᐅᓕᖅᑐᓂᒃ ᓱᕈᓯᐅᑎᓪᓗᖓ."

ᕗᕋᑦᓚᓐ ᐅᖃᖅᐳᖅ ᑲᙳᓱᐃᓐᓇᖃᑦᑕᕐᓂᕋᖅᖢᓂ ᓴᓇᙳᐊᖅᑎᙳᕆᐊᒃᓴᖅ ᐊᒻᒪ ᐱᓪᓚᑦᑖᖑᖅᑰᔨᙱᖦᖢᓂ ᐃᓚᒥᓄᑦ ᐱᑎᑦᑎᔪᓐᓇᖅᑰᔨᓪᓗᓂ ᐊᒻᒪ ᓴᓇᙳᐊᕈᓐᓇᖅᖢᓂ ᐊᑕᐅᑦᑎᒃᑯᑦ. ᑭᓯᐊᓂ ᐅᖃᖅᑐᖅ ᓴᓇᙳᐊᖅᑏᑦ ᓄᓇᓖᑦ ᐃᑲᔪᖅᓯᔪᐹᓘᒋᐊᖏᑦ ᑐᙵᓇᑦᓯᐊᕆᐊᖏᑦ, ᐊᒻᒪᓗ ᐱᒻᒪᕆᐅᒋᐊᖓ ᐃᓚᒋᔭᐅᒋᐊᖅ.

"ᑖᓐᓇ ᐃᓱᒪᒋᔭᒃᓴᖅ ᐃᒻᒪᖄᓕ ᖁᕕᐊᒋᔭᓐᓂᒃ ᐱᓕᕆᔪᓐᓇᕋᒪ. ᑎᑎᕋᐅᔭᕈᓐᓇᖅᑐᖓ, ᑎᑎᕋᐅᔭᕈᓐᓇᖅᑐᖓ, ᑕᑯᒥᓴᐅᑎᓕᐅᕈᓐᓇᖅᑐᖓ ᐊᓯᖏᓐᓂᒡᓗ, ᑭᓯᐊᓂ ᐱᓕᕆᖃᑎᖃᕈᓐᓇᕐᒥᔪᖓ ᐊᓯᖏᓐᓂᒃ ᓂᒡᓚᓱᒃᑐᒻᒪᕆᐊᓗᖕᓂᒃ ᐱᔪᒃᓯᑎᑦᑎᔪᓂᒃᓗ ᐃᓄᖕᓂᒃ," ᐅᖃᖅᑐᖅ ᕗᕋᑦᓚᓐ.

ᕗᕋᑦᓚᓐ ᐃᓕᓐᓂᐊᓯᒋᐊᓚᐅᖅᓯᒪᕗᖅ ᐊᓂᒍᐃᑎᓪᓗᒍ ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᑲᖏᖅᖠᓂᕐᒥ ᐊᒻᒪ ᐋᑐᕚᓕᐊᖅᖢᓂ ᓄᓇᕗᑦ ᓯᕗᓂᒃᓴᕗᒻᒧᑦ ᐃᓕᓐᓂᐊᕆᐊᖅᖢᓂ, ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖃᑕᐅᓪᓗᓂ ᐃᓄᖕᓄᑦ ᐃᓕᓐᓂᐊᖅᑎᓄᑦ ᓄᓇᕗᒻᒥ ᐃᓕᓐᓂᐊᒃᑲᓐᓂᕋᓱᒃᖢᓂ ᐃᓄᐃᑦ ᐱᐅᓯᕆᕙᓚᐅᖅᑕᖏᓐᓂᒃ ᐊᒻᒪ ᓄᓇᑖᕐᓂᕐᒧᑦ ᐊᖏᖃᑎᒌᒍᑎᒥᒃ ᐊᒻᒪ ᐃᓕᖅᑯᓯᖓᓐᓂᒃ.

ᑕᐃᒪᐃᓚᐅᖅᑐᖅ ᐊᕐᕌᒍᒧᑦ, ᓄᖅᑲᖓᑲᐃᓐᓇᖅᑐᓂ, ᐊᒻᒪᓗ ᐃᓚᐅᖃᑕᐅᔪᒪᓕᓚᐅᖅᑐᖅ ᐅᐊᓕᓂᕐᒥᑦ ᐊᔾᔨᓕᐅᕆᓂᕐᒧᑦ, ᓇᒻᒥᓂᕆᔭᐅᔪᖅ ᐊᔾᔨᓕᐅᕆᓂᕐᒧᑦ ᐃᓕᓐᓂᐊᖅᕕᒃ ᕕᒃᑑᕆᐊᒥ, B.C. ᐱᑕᖃᕈᓐᓃᖅᑐᖅ.

ᕗᕋᑦᓚᓐ ᑲᖏᖅᖠᓂᕐᒧᑦ ᐅᑎᓚᐅᖅᐳᖅ, ᐅᖃᖅᖢᓂᓗ ᕼᐋᒻᒪᓚᒃᑯᑦ ᐊᒻᒪ ᒐᕙᒪᒃᑯᑦ ᐱᓕᕆᖃᑕᐅᑦᑎᐊᕐᓂᕋᖅᖢᑎᒃ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᐊᑐᐃᓐᓇᐅᑎᑦᑎᓪᓗᑎᒃ, ᖃᖓᑦᑎᐊᓵᕐᓗ ᐃᓚᒋᔭᐅᓚᐅᖅᖢᓂ ᓇᓗᓇᐃᖅᓯᔩᑦ, ᐅᒥᐊᕐᔪᐊᒃᑯᑦ ᑲᔾᔭᐅᓴᒃᑎᑦᑎᕙᒃᑐᑦ ᐃᓄᖕᓄᑦ.

"ᖃᔅᓯᐊᕐᔪᐃᑦ ᐅᒥᐊᕐᔪᐊᒃᑯᑦ ᑲᒻᐸᓃᑦ ᐅᑭᐅᖅᑕᖅᑐᒃᑰᖃᑦᑕᖅᑐᑦ ᐱᒻᒪᕆᐅᓪᓗᓂᓗ ᐃᓄᐃᑦ ᑕᐃᑲᓃᑦᑕᕆᐊᖃᕐᓂᖏᑦ. ᐱᒻᒪᕆᐅᑎᑦᑎᓪᓚᕆᖅᑰᖅᑐᖅ ᐃᑭᒪᔪᑦ ᐊᑐᖅᓯᒪᔭᖏᓐᓂᒃ," ᕗᕋᑦᓚᓐ ᐅᖃᖅᑐᖅ.

ᐱᓕᕆᑲᑕᐃᓐᓇᕋᓗᐊᖅᖢᓂ, ᕗᕋᑦᓚᓐ ᐊᐳᖅᑕᕈᑎᖃᖃᑦᑕᖅᓯᒪᕗᖅ ᓇᖕᒥᓂᖅ ᐃᓚᒋᔭᐅᓪᓗᓂ ᐊᒃᓱᕈᕐᓇᕐᓂᖓ ᐊᓂᒍᐃᑦᑎᐊᕆᐊᒃᓴᖅ ᐊᓂᒍᐃᓵᖅᑎᓪᓗᒍ.

ᐅᖃᖅᑐᓂ ᓄᓇᕗᑦ ᓯᕗᓂᒃᓴᕗᒻᒦᒻᒪᑦ ᐃᑲᔪᖅᓱᖅᑕᐅᑦᑎᐊᓚᐅᕐᒪᑦ ᐊᒻᒪ ᐃᓕᓐᓂᐊᖃᑎᖃᖅᑐᓂ ᓇᑭᑐᐃᓐᓈᖅᑐᓂᒃ ᓄᓇᕗᒻᒥ. ᑭᓯᐊᓂ ᓅᒻᒪᑦ ᕕᒃᑑᕆᐊᒧᑦ ᐃᑉᐱᒍᓱᓚᐅᖅᑐᖅ ᐱᖅᑯᓯᕐᒧᑦ ᖁᐊᖅᓵᕐᓂᕐᒥᑦ ᓯᕗᓪᓕᖅᐹᒥᑦ.

ᕗᕋᑦᓚᓐ ᐅᖃᖅᖢᓂ ᑕᐃᑲᓃᖦᖢᓂ ᐃᓄᑑᓗᐊᖅᑰᔨᓪᓗᓂ ᐊᖏᕐᕋᕈᓐᓇᖅᑰᔨᙱᖦᖢᓂ ᐅᕝᕙᓘᓐᓃᑦ ᐊᐃᑦᑖᕈᓱᒃᑲᔭᖅᖢᓂ. ᐅᖃᖅᑐᓂ ᓇᓂᓯᔪᒥᓂᐅᓂᕋᖅᑐᓂ ᐱᐅᔪᓂ ᐃᓄᓐᓂ ᐃᑲᔪᕐᓂᐊᖅᑐᓂ ᐊᓂᒍᐃᓇᓱᐊᖅᑐᓂ ᐊᒻᒪ ᓴᖅᑭᑎᑦᑎᓪᓗᓂ ᐃᓚᒌᖑᔪᓂᑦ.

ᐱᖃᓐᓇᕆᔭᒥᓂᒃ ᐱᖃᑎᖃᖅᐸᓚᐅᖅᑐᖅ ᖃᑕᙳᑎᖃᓚᐅᖅᑐᓂᒃ ᐅᖃᖅᖢᓂᓗ ᐱᖃᑎᒋᖃᑦᑕᕐᓂᖅᓴᐅᖃᑦᑕᕐᓂᕋᖅᖢᓂᒋᑦ ᐃᒃᐱᒋᔭᒥᓂᒃ.

ᐊᒻᒪᓗ ᖃᓄᑐᐃᓐᓇᖅ ᐅᖃᐅᔾᔨᒍᓐᓇᕈᓂ ᐃᓕᓐᓂᐊᖅᑎᓂᒃ ᐃᓱᒪᔪᓂᒃ ᕿᒪᐃᒍᒪᔪᓂᒃ ᓄᓇᒥᓐᓂᒃ ᓯᕗᓪᓕᖅᐹᒥ, ᑮᓇᐅᔭᓂᒃ ᐊᑐᓐᖏᓂᖅᓴᐅᒐᔭᕋᕕᑦ ᐅᐸᓚᐅᖏᓂᓐᓂ ᐊᒻᒪᓗ ᐊᒃᓱᕈᖅᑎᑕᐅᖏᓪᓗᑎᒃ ᖃᓄᐃᓕᐅᖁᔭᐅᓗᑎᒃ ᑭᓇᑐᐃᓐᓇᕐᒧᑦ.

"ᐅᖃᐅᔾᔨᒋᐊᖅᑕᐅᔪᒻᒪᕆᐅᓂᐊᓕᕐᒪᑕ ᓲᕐᓗ, "ᐊ, ᖃᓄᐃᒻᒪᑦ ᑮᓇᐅᔭᓕᕆᖃᑦᑕᖏᓚᑎᑦ? ᐃᖅᑲᓇᐃᔮᑦᑕᖃᐃᓐᓇᐅᔭᖅᑐᖅ ᑕᕝᕙᓂ. ᖃᓄᐃᒻᒪᑦ ᐋᓐᓂᐊᓯᐅᖅᑎᐅᙱᓚᑎᑦ?" ᐊᒻᒪᓗ ᑕᒪᒃᑯᐊ ᐱᐅᔪᐊᓘᓪᓗᑎᒃ. ᐊᒥᓱᓂᒃ ᐃᖅᑲᓇᐃᔮᒃᓴᖅᑕᖃᖅᑐᖅ ᑕᖅᑳᓂ, ᑭᓯᐊᓂ, ᓇᓂᓯᓗᑎᑦ ᖁᕕᐊᒋᔭᕐᓂᒃ," ᐅᖃᖅᑐᖅ ᕗᕋᑦᓚᓐ.

"ᐃᓱᒪᓕᐅᕈᓐᓇᖅᐳᒍᑦ ᓇᖕᒥᓂᖅ ᑲᔪᓯᑦᑎᐊᕐᓂᕆᔭᑦᑎᓐᓂᒃ ᐃᓕᑦᑎᕚᓪᓕᕐᓗᓯᓗ ᐃᓕᖕᓂᒃ. ᑭᓱᒥᒃ ᐱᐅᓴᖅᐱᑦ? ᑭᓱᒥᒃ ᖁᕕᐊᓱᖃᑎᖃᖅᐱᑦ? ᑭᓱᒥᒃ ᖁᕕᐊᒋᔭᖃᖅᐱᑦ? ᐊᒻᒪᓗ ᐃᓕᑦᑎᕚᓪᓕᕐᓇᕐᓂᖅᓴᐅᓪᓗᓂ. ᖁᕕᐊᓱᒃᑯᕕᓪᓗ, ᐊᔪᕐᓇᙱᓐᓂᖅᓴᐅᔪᖅ ᐃᓕᑦᑎᔭᕆᐊᒃᓴᖅ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.