ᔭᐃᕗᑦ ᒃᓵᒃ Métis-ᒥ ᓇᖕᒥᓂᖃᖅᑎᐅᔪᖅ La Rivière-ᒥᙶᖅᑐᖅ ᓂᒋᖅᐸᓯᐊᓂ ᒫᓂᑑᐸᒥ. ᐱᒋᐊᖅᑎᑦᑎᔨᐅᖃᑕᐅᕗᖅ ᐊᒻᒪ ᖃᕆᓴᐅᔭᓕᕆᔨᒃᑯᑦ (ᐃᑭᐊᖅᑭᕕᒃᑯᑦ) ᑐᑭᒧᐊᒃᑎᑦᑎᔨᐅᓪᓗᓂᑦ ᐊᓐᑐᕙᐃᒥᑦ ᐅᐃᓂᐹᒡᒥᑦ.

ᐊᑕᐅᓯᐊᕋᓗᐊᖅᖢᓂ ᑐᕌᒐᖃᖅᓯᒪᒐᓗᐊᖅᖢᓂ ᐱᓕᕆᐊᖃᕐᓂᕐᒥᒃ Zookeeper−ᖑᓗᓂ, ᔭᐃᑦ ᐃᓱᒪᒋᔭᖃᖃᑦᑕᖅᓯᒪᕗᖅ ᐱᓕᕆᔾᔪᑕᐅᕙᒃᑐᓂᒃ ᖃᕆᑕᐅᔭᒃᑯᓪᓗ ᐱᓕᕆᔾᔪᑕᐅᕙᒃᑐᓄᑦ ᐋᖅᑭᒃᓱᐃᕙᓪᓕᐊᓂᕐᒥᒃ ᑕᐃᒪᙵᓂᑦ ᒪᒃᑯᒃᑑᓚᐅᖅᑎᓪᓗᒍ. ᑭᓯᐊᓂᓕ, ᖃᕋᓴᐅᔭᒃᑯᑦ ᑐᔪᐃᔾᔪᑎᑕᖃᓚᐅᙱᒻᒪᑦ ᓄᓇᓕᕋᓛᖑᓂᖅᓴᓂᑦ ᐱᕈᕐᕕᒋᓚᐅᖅᑕᖓᓂᑦ. "ᐊᓈᓇᒪ ᐃᒡᓗᖓᓄᐊᕆᐊᖃᓚᐅᖅᑐᖓ ᖃᕆᑕᐅᔭᒧᐊᕋᓱᒃᖢᖓ ᓲᖃᐃᒻᒪ ᓄᓇᓕᐅᑉ ᓯᓚᑖᓂ ᓄᓇᖃᓚᐅᕐᒪᑦ...ᑭᓯᐊᓂ ᓅᑎᓪᓗᖓ ᐅᐃᓂᐹᒡᒧᑦ, ᒪᑐᐃᖅᓯᓪᓚᕆᓚᐅᖅᑐᖅ ᐹᓂᒃ ᐅᕙᓐᓄᑦ."

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ, ᔭᐃᑦ ᖃᕆᑕᐅᔭᓕᕆᔨᒃᑯᑦ ᐱᓕᕆᐊᒃᑯᒥᒋᔭᖏᑦ ᐊᒻᒪ ᓇᖕᒥᓂᖃᖅᑎᐅᔪᒪᓂᖓ ᓯᕗᓪᓕᖅᐹᒥ ᐃᓕᓴᐃᔨᙳᕆᐅᖅᓴᓚᐅᖅᐳᖅ. ᔭᐃᕗᑦ ᐃᓕᓴᖅᓯᓚᐅᖅᐳᖅ ᐊᑲᐅᙱᓕᐅᕈᑎᒥᒃ ᖃᓄᖅ ᐃᓕᓴᐃᔨᖃᖅᐸᖕᒪᖔᑕ ᐃᓕᓐᓂᐊᕐᕕᖕᒥᓂ ᐊᐅᓚᑕᐅᓂᖏᓐᓂᒃ, ᐃᓱᒪᓪᓗᓂᓗ ᐱᐅᓯᒋᐊᖅᑎᑦᑎᔪᓐᓇᕋᓱᒋᓪᓗᓂ ᐊᑐᖅᑕᐅᕙᒃᑑᑉ ᐃᒻᒥᓂᒃ ᐊᐅᓚᑎᓪᓗᒍ. "ᐅᕙᖓ ᑐᓂᓯᓚᐅᖅᑐᖓ ᑐᑦᓯᕋᐅᑎᒥᑦ ᐃᓕᓐᓂᐊᑎᑦᓯᔩᑦ ᐊᖓᔪᖅᑳᖓᓐᓄᑦ ᐃᓕᓐᓂᐊᕐᕕᐅᑉ. ᐃᓕᓴᐃᔨᑦ ᐊᖓᔪᖅᑳᖓᑦ ᐅᖃᕐᖢᓂ, 'ᐄ, ᑖᓐᓇ ᐱᐅᔪᐊᓘᔪᖅ, ᐊᑭᓕᕈᒪᓪᓗᑎᒍᓪᓗ,' ᐃᒪᓐᓇᐅᓚᐅᖅᑐᖓᓗ, 'ᐊᖑᑦ, ᒫᓐᓇ ᒪᑭᒋᐊᕆᐊᖃᒻᒪᕆᓕᖅᑐᖓ ᐱᓕᕆᐊᕆᓗᒍᓗ!'"

ᔭᐃᑦ ᑕᖅᑭᓄᑦ ᐱᖓᓱᓄᑦ ᐋᖅᑭᒃᓱᐃᓚᐅᖅᑐᖅ ᐃᑭᐊᖅᑭᑎᑦᑎᕕᖕᒥᑦ ᐃᓕᑦᑎᕙᓪᓕᐊᓪᓗᓂᓗ ᓄᓇᒥᑦ. "ᖃᓄᕈᓘᔭᓕᓚᐅᖅᑐᖓ, 'ᖃᓄᕐᓕ ᑕᐃᒪᐃᓕᐅᕈᓐᓇᖅᐳᖓ? ᑭᓲᖕᒪᑦ PHP? ᑭᓲᕙ ᐃᑭᐊᖅᑭᕕᖕᒧᑦ ᐱᓕᕆᔾᔪᑕᐅᓂᐊᖅᑐᖅ? ᖃᓄᕐᓕ ᑕᒪᓐᓇ ᓴᓇᔪᓐᓇᖅᐸᕋ ᖁᐊᖅᓵᕐᓇᙱᑦᑐᒃᑯᑦ?' ᑕᐃᑲᙵᓪᓗ ᑕᒻᒪᑲᑕᕈᓘᔭᖃᑦᑕᓚᐅᖅᑐᖓ, ᐃᓕᑦᑎᓚᐅᖅᖢᖓᓗ ᑕᒻᒪᖅᑕᐅᔪᓂᑦ."

ᔭᐃᕗᑦ ᑕᒪᑐᒥᖓ ᐱᓕᕆᐊᖃᓚᐅᙱᑦᑐᖅ ᑮᓇᐅᔭᒧᑦ, ᑭᓯᐊᓂ ᖁᕕᐊᒋᑐᐃᓐᓇᓚᐅᕐᒪᒍ ᐊᒃᓱᕈᕐᓇᖅᑐᖅ. ᑭᓯᐊᓂᓕ, ᐊᓕᐊᓇᐃᒍᓱᑦᑎᐊᓚᐅᖅᑐᖅ ᐊᑭᓕᖅᑕᐅᔭᕆᐊᒃᓴᖅ ᑳᓐᑐᕌᒃᑎᒧᑦ ᐃᓕᓐᓂᐊᕐᕕᖕᒥᑦ. "ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᖅᑎᐅᑎᓪᓗᑎᑦ, $2,000−ᓂᒃ ᐱᑎᑕᐅᓂᐊᖅᐳᑎᑦ ᑮᓇᐅᔭᒃᑯᕕᖕᓄᑦ, ᑖᓐᓇ ᓵᓚᒃᓴᕐᔪᐊᖅᐳᖅ!" ᖁᕕᐊᓇᓚᐅᖅᑐᖅ ᔭᐃᑦ ᐊᑭᓕᖅᑕᐅᖃᑦᑕᓚᐅᕐᒪᑦ, ᐊᒻᒪᓗ ᐃᓄᐃᑦ ᖁᔭᓕᓪᓗᑎᒃ ᐊᒻᒪᓗ ᐊᑐᖅᑐᑎᒃ ᓴᓇᔭᒥᓂᒃ. "ᐅᒃᐱᕈᓱᓗᐊᓚᐅᙱᑦᑐᖓ ᑭᓱᒥᑭᐊᖅ ᐊᑐᓚᐅᖅᑕᓐᓂᒃ ᖃᔅᓯᐅᓂᖓᒍᑦ ᐃᓄᖕᓂᓪᓗ ᐅᖃᐅᓯᖃᖅᑎᓪᓗᒋᑦ; ᓂᒡᓕᓇᑦᑎᐊᖅᑐᖅ! ᐃᓱᒪᖕᓇᙱᑦᑐᖅ, ᐃᓛᒃ."

ᑎᓕᐅᖅᑕᐅᓵᓕᓪᓗᓂ, ᔭᐃᑦ ᑲᔪᓯᓚᐅᖅᐳᖅ ᓇᖕᒥᓂᖅ ᐃᓕᓴᐃᓪᓗᓂ ᐊᒻᒪ ᑲᔪᖏᖅᓴᐃᔨᒃᓴᖅᓯᐅᖅᖢᓂ ᐅᖃᐅᔾᔪᐃᒋᐊᖅᖢᓂ ᐊᒻᒪ ᑐᑭᒧᐊᒃᑎᖦᖢᒍ. "ᑕᒪᕐᒥᑲᓴᒃ, ᖃᕆᑕᐅᔭᓕᕆᓂᕐᒧᑦ−ᐊᒃᑐᐊᓂᓖᑦ ᐊᔪᙱᓐᓂᕆᔭᒃᑲ ᐃᓕᑦᑎᔾᔪᑕᐅᓯᒪᔪᐃᓐᓇᐅᕗᑦ ᐃᑭᐊᖅᑭᕕᒃᑯᑦ ᐅᕝᕙᓘᓐᓃᑦ ᑲᔪᖏᖅᓴᐃᔨᑎᒍᑦ ᓇᖕᒥᓂᖅ ᐱᓕᕆᔨᓄᑦ ᑐᓴᐅᒪᖃᑦᑕᐅᑎᖃᑎᒌᒍᑎᓂᒃ."

ᔭᐃᕗᑦ ᓯᓚᑦᑐᖅᓴᕐᕕᒡᔪᐊᓕᐊᓚᐅᖅᑐᖅ, ᐃᓚᐅᖃᑕᐅᓕᖅᖢᓂ ᓯᓚᑦᑐᖅᓴᕐᕕᒡᔪᐊᒥᑦ ᒫᓂᑑᐸᒥᑦ ᓄᓇᖃᖅᑳᖅᓯᒪᔪᑦ ᓂᐅᕕᖅᑎᑦᑎᕙᖕᓂᖏᓐᓄᑦ ᐃᓕᓐᓂᐊᕐᑎᓄᑦ, ᖃᐅᔨᓇᓱᓕᑕᐃᓐᓇᖅᖢᓂᓗ ᓄᓇᖃᖅᑳᖅᓯᒪᔪᑦ ᐱᐅᓯᑐᖃᖏᓐᓂᑦ ᐃᓕᖅᑯᓯᖏᓐᓂᒡᓗ. "ᐱᕈᖅᓴᓗᐊᓚᐅᙱᑦᑐᖓ ᐊᓪᓚᖓᔪᖓ ᐃᓱᒪᒋᓪᓗᒍ. [ᓯᓚᑦᑐᖅᓴᕐᕕᒡᔪᐊᒥ] ᖃᐅᔨᓕᓚᐅᖅᑐᖓ ᑭᓇ ᓄᓇᖃᖅᑳᖅᓯᒪᖕᒪᖔᕐᒪ, ᓇᑭᙶᖕᒪᖔᕐᒪᓗ ᐃᓕᖅᑯᓯᕋ ᓇᑭᙶᕐᒪᖔᑕᓗ ᐱᒻᒪᕆᐅᒋᔭᒃᑲ."

ᔭᐃᑦ ᓂᕈᐊᓚᐅᖅᑐᖅ ᑕᐅᑐᓪᓗᐊᑕᕈᒪᓪᓗᓂ ᐱᓯᓂᓯᒥᒃ ᐃᓕᓐᓂᐊᒃᑲᓐᓂᕐᓂᕐᒧᑦ ᐃᓕᓐᓂᐊᕐᓂᕐᒥ. "ᐊᖏᓛᕆᓚᐅᖅᑕᕋ ᓴᙲᓐᓂᕆᓚᐅᖅᑕᕋ ᐊᕿᑦᑐᒥᒃ ᐊᔪᙱᓐᓂᖃᕐᓂᖅ, ᐊᓱᐃᓛᒃ ᐊᔪᙱᓐᓂᐅᔪᑦ ᓲᕐᓗ ᐃᓱᒪᑦᑎᐊᕈᓐᓇᕐᓂᖅ, ᐃᓄᐃᑦ ᐊᔪᙱᓐᓂᖏᑦ, ᐅᖃᖃᑎᖃᕐᓂᖅ ᐃᓄᖕᓂᒃ, ᐋᔩᖃᑎᒌᖕᓂᕐᒥᒃ, ᑕᒪᒃᑯᐊ ᐱᓪᓗᐊᑕᐃᑦ ᐊᔪᙱᓐᓂᐅᔪᑦ ᑐᙵᕕᐅᔪᑦ ᖃᓄᖅ ᐱᓯᓂᓯᐅᑉ ᐊᐅᓚᓂᖓᓂᒃ."

ᔭᐃᑦᒧᑦ, ᑖᒃᑯᐊ ᐱᒻᒪᕆᐅᓪᓗᑎᒃ ᐊᔪᙱᓐᓂᖏᑦ ᐱᑕᖃᓚᐅᙱᑦᑐᑦ. ᖃᐅᔨᒪᓚᐅᖅᑐᖅ ᐱᔪᓐᓇᓚᐅᕐᓂᕐᒥᓂᒃ ᖃᕋᓴᐅᔭᓕᕆᓂᕐᒧᑦ ᑐᑭᓯᒋᐊᕈᑎᓂᒃ ᐱᔭᕆᐊᖃᖅᑕᒥᓂᒃ ᖃᕋᓴᐅᔭᒃᑯᑦ, ᐅᖃᓕᒫᒐᒃᑯᑦ, ᐊᒻᒪᓗ ᓲᖃᐃᒻᒪ, ᑲᔪᖏᖅᓴᐃᔨᖏᑎᒍᑦ. ᐱᑎᑦᑎᓂᖅ ᐃᓱᒪᒃᓴᖅᓯᐅᕈᓐᓇᑦᑎᐊᖅᑐᓂᒃ ᐱᓕᕆᔾᔪᑎᓄᓪᓘᓐᓃᑦ ᐱᔪᒃᓯᑎᑦᑎᓂᕐᒥᒃ, ᑎᓕᐅᕆᑐᐃᓐᓇᕐᓂᒃᑯᓪᓘᓐᓃᑦ ᐃᑲᔪᖅᑐᐃᑐᐃᓐᓇᕐᓂᕐᒥᒡᓗ, ᔭᐃᑦ ᑲᔪᖏᖅᓴᐃᔨᖏᑦ ᐊᖏᔪᒻᒪᕆᖕᒥᒃ ᐊᒃᑐᖅᓯᓯᒪᕗᑦ ᑲᔪᓯᓂᖃᑦᑎᐊᕐᓂᖓᓄᑦ. ᑲᔪᖏᖅᓴᐃᔨᑦ ᓲᕐᓗ ᓇᖕᒥᓂᖃᕐᕕᒋᔭᖓ, ᔭᐃᒥᓯ ᐅᐊᕋᓐ. "ᓇᖕᒥᓂᖁᑎᒐ ᐃᓄᑑᑎᙱᑕᕋ. [ᔭᐃᒥᔅ]-ᒧᑦ ᐅᓪᓚᖃᑎᒋᕙᕋ. ᖁᓕᓂᒃ ᐅᑭᐅᖃᖅᑐᖅ ᐅᕙᓐᓂᒃ, ᐊᒻᒪᓗ... ᐃᓚᖓᑦ ᐃᓱᒪᑐᓂᖅᐹᖅ ᑕᑯᖃᑦᑕᖅᓯᒪᔭᕋ ᐃᓅᓯᓐᓂ. ᐊᒃᓱᐊᓗᒃ ᑐᓱᒋᔭᐅᑦᑎᐊᕋᒪ ᑖᔅᓱᒧᖓ ᐊᒻᒪᓗ ᐱᓕᕆᔪᒪᑦᑎᐊᕐᓂᖓᓄᑦ ᐱᓕᕆᓂᕐᒧᑦ."

ᐊᓯᐊᑦᑕᐅᖅ ᐱᒻᒪᕆᐅᔪᖅ ᑲᔪᖏᖅᓴᐃᔨ ᔭᐃᑦ ᐊᓈᓇᒋᓯᒪᒻᒥᔭᖓ. "ᐊᓈᓇᒪ ICU−ᒧᑦ ᐃᓗᐊᖅᓴᐃᔨᒋᔭᐅᕗᖅ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᖃᐅᔨᓴᖅᑐᓕᕆᕝᕕᖕᒥ, ᑕᐃᒪᐃᓐᓂᖓᓄᓪᓗ ᑖᓐᓇ ᐃᓂᖃᖅᐳᖅ ᓯᕗᓂᐊᓃᑦᑐᓂ [covid19]. ᐱᔪᒃᓯᑎᑦᑎᑦᑎᐊᖅᑐᖅ." ᔭᐃᕗᑦ ᐃᑲᔪᖅᑐᐃᓚᐅᖅᓯᒪᙱᑦᑐᖅ ᑲᔪᖏᖅᓴᐃᔨᖏᓐᓂᑦ: "ᑕᒪᕐᒥᑦᑎᐊᖅ ᑲᔪᖏᖅᓴᐃᔨᒃᑲ ᐱᐅᔪᐊᓘᕗᑦ, ᐃᓄᑦᑎᐊᕙᐅᓪᓗᑎᒃ, ᐊᐱᕆᔪᓐᓇᓚᐅᕐᓇᖓᓗ ᐱᐅᓂᖅᓴᓂᑦ ᑲᔪᖏᖅᓴᐃᔨᓂᑦ. ᐃᓅᓯᓐᓂ ᐊᒃᓱᐊᓗᒃ ᖁᕕᐊᓇᖅᑐᖅ ᐃᓕᓐᓂᐊᖅᑎᑕᐅᑦᑎᐊᖅᓯᒪᓪᓗᖓ."

ᑕᐃᒪᐃᒻᒪᑦ, ᑲᒪᓇᙱᑦᑐᖅ ᔭᐃᑦ ᐃᒻᒥᓂᒃ ᑲᔪᖏᖅᓴᐃᔨᐅᖕᒪᑦ ᑭᓇᑐᐃᓐᓇᒧᑦ ᖃᕆᑕᐅᔭᓕᕆᔪᒪᔪᒧᑦ ("Just reach on kozan.dev"). ᐊᒻᒪᓗ, ᐊᑐᓕᖁᔨᔪᖅ ᒪᒃᑯᑦᑐᓂᑦ ᕿᓂᖁᔨᓂᕐᒥᑦ ᑲᔪᖏᖅᓴᐃᔨᓂᑦ ᐱᔪᒪᔪᓂᑦ: "ᐃᓱᒪᒋᓗᒋᑦ ᑭᓇᒥᑭᐊᖅ ᐱᐅᒋᔭᓐᓂᑦ ᐊᐱᕆᓗᒋᓪᓗ. ᐋᓐᓂᓇᓚᐅᖅᓯᒪᙱᑦᑐᖅ ᐊᐱᕆᓗᓂ ᐃᓄᖕᓂᒃ ᑲᔪᖏᖅᓴᐃᔨᐅᖁᓗᒋᑦ."

ᖁᔭᓐᓇᒦᑦᑎᐊᕐᒥᔭᕋ ᔭᓯᑲ ᑎ ᕼᐊᒻᕗᕆᔅ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.