"ᓴᖅᑭᔮᖅᑐᖅ ᐹᓂᒃ ᒪᒃᐱᖅᓯᕗᖅ. ᐃᓱᒪᖅᓱᖅᐳᖓ ᐱᓱᒡᕕᒋᔪᒪᓗᒍ," ᐅᖃᖅᑐᖅ ᐃᓗᐊᖅᓴᐃᔨ ᔭᓯᑲ ᒎᕙᐃ. ᐱᐹᑦ ᓄᓇᖃᖅᑳᖅᓯᒪᔪᓂᒥᐅᑕᒃᓴᔭᐅᔪᖅ ᕆᔭᐃᓇᒥ, ᓴᔅᑳᑦᓱᐋᓐᒥ ᓄᓇᖃᓕᖅᑐᖅ ᐊᑦᑎᖕᓂᕐᓴᒥ ᓄᓇᒥ. ᐱᓕᕆᖃᑎᖃᖅᐸᒃᐳᖅ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐋᓐᓂᐊᕆᔭᐅᓕᖅᐸᒃᑐᓄᑦ ᐱᓕᕆᖃᑎᒌᒃᐸᒃᑐᓄᑦ, ᐱᔭᕇᖅᓯᕙᒃᖢᓂ ᐊᐃᑦᑐᕐᓘᑕᐅᔪᓐᓇᖅᑐᓄᑦ ᐋᓐᓂᐊᕆᔭᐅᓕᖅᐸᒃᑐᓄᑦ ᖃᐅᔨᓴᖅᓯᓂᕐᒥᒃ ᑕᒪᓐᓇ ᐃᓚᒋᔭᐅᑎᑕᐅᓪᓗᓂ ᑭᒃᑯᑐᐃᓐᓇᓄᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. ᖃᑕᙳᑎᖏᑦ ᓅᑎᖦᖢᓂᒋᑦ ᐳᕆᑎᔅ ᑲᓚᒻᐱᐊᒧᑦ ᐊᕐᕌᒍᑦ ᖁᓕᑦ ᐊᓂᒍᖅᓯᒪᓕᖅᑐᑦ ᕿᓂᕐᖢᓂ ᐊᓯᔾᔨᖅᑐᒥᒃ ᑲᔾᔮᕐᓇᖅᑐᒥᒃ, ᕿᒪᒃᖢᓂᐅᒃ ᓄᓇᓕᕐᔪᐊᖓ ᐃᒃᓯᕋᕐᔪᐊᓂ, ᓂᕆᐅᒃᖢᑎᒃ ᐊᖏᒃᓕᒋᐊᕐᓗᒍ ᓴᓂᒧᑦ ᓇᓂᓯᓗᓂᓗ ᐃᓕᖅᑯᓯᖃᖃᑎᒌᙱᑦᑐᓂᒃ ᐊᑐᕐᓂᑯᖏᓐᓂ.  

ᐱᕈᖅᐸᓪᓕᐊᓪᓗᓂ, ᐋᓐᓂᐊᓯᐅᖅᑎᕈᕈᒪᐃᓐᓇᖅᐸᓚᐅᖅᑐᖅ, ᑭᓯᐊᓂ ᐊᑯᓂᐅᓚᐅᖅᑐᖅ ᓇᒻᒥᓂᖅ ᐊᖅᑯᑎᑖᕋᓱᐊᖅᑐᓂ. ᐊᕐᕌᒎᖕᓄᑦ ᒪᕐᕉᖕᓄᑦ ᓄᒃᑕᓚᐅᖅᑐᖅ ᐳᓚᕋᖅᑐᓕᕆᓂᕐᒧᓪᓗ ᐱᓕᕆᐊᖑᓪᓗᓂ ᐅᕙᓂ, Medicine Hat ᓯᓚᑦᑐᖅᓴᕐᕕᖕᒥ ᖁᑦᑎᖕᓂᖅᓴᒥ ᐃᓕᓐᓂᐊᕌᓪᓚᓚᐅᖅᑎᓪᓗᒍ. ᖃᐅᔨᓚᐅᖅᑐᖅ ᖁᕕᐊᒋᙱᑕᒥᓂᒃ ᐊᒻᒪᓗ ᐃᓂᒃᓴᓕᐅᖅᑎᓪᓗᒍ ᐃᓄᖕᓂᒃ ᐊᐅᓪᓚᕐᓂᐊᖅᑐᓂᒃ, ᓇᖕᒥᓂᖅ ᐊᐅᓪᓚᕈᒪᓕᓚᐅᖅᑐᖅ. ᐃᖅᑲᓇᐃᔮᖃᕐᓂᖅ ᐳᓚᕋᖅᑐᓕᕆᓂᕐᒥᑦ ᑕᒻᒪᖅᖢᓂ ᐅᐸᒐᓱᒃᑕᒥᓄᑦ, ᑭᓯᐊᓂ ᖃᐅᔨᓚᐅᖅᑐᖅ.

ᓅᓚᐅᖅᓯᒪᔪᖅ ᐃᒡᓗᐊᓗᖕᒥ ᑲᒪᔨᐅᓪᓗᓂ ᐊᑯᓂᐅᔪᒃᑯᑦ ᑲᒪᒋᔭᐅᕝᕕᖕᒥ ᐊᒻᒪ ᐱᔪᒪᓂᖃᕐᓂᖅᓴᐅᓕᖅᖢᓂ ᐋᓐᓂᐊᕕᖕᒥ ᐱᓕᕆᔨᒻᒪᕆᐅᓂᕐᒥᒃ. ᐱᔭᕇᖅᓯᔭᖅᑐᓚᐅᖅᑐᖅ ᑎᑎᕋᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᒥᒃ ᖁᕝᕙᓯᒃᑐᒥᒃ ᓈᓴᐅᑎᖃᖅᖢᓂ. ᐃᒡᓗᕈᓯᖃᖃᑎᒋᔭᖓ ᐃᓗᐊᖅᓴᐃᔨᐅᓚᐅᖅᐳᖅ ᑎᓕᐅᖅᑕᐅᓪᓗᓂ ᐃᓕᓐᓂᐊᖏᓐᓇᖁᔭᐅᓪᓗᓂ ᐊᒃᑲᖓᓗ ᐊᖏᖅᖢᓂ. ᐅᖃᐅᓯᖏᑦ ᐱᔪᒃᓯᑎᑦᑎᓚᐅᖅᑐᑦ ᐊᖅᑯᑎᒋᔪᒪᔭᒥᓂᒃ ᓯᓐᓇᑦᑑᒪᒋᓚᐅᖅᑕᒥᓂᒃ ᒪᒃᑯᖕᓂᖅᓴᐅᓕᕋᒥ ᐃᖢᐊᖅᓴᐃᔨᙳᕈᒪᓕᕋᒥ.

ᓯᓐᓇᑦᑑᒪᑎᓪᓗᒍ ᐋᓐᓂᐊᓯᐅᖅᑎᕈᕈᒪᓪᓗᓂ, ᐊᐅᓚᔪᒻᒪᕆᐅᓚᐅᕐᒪᑦ. ᔪᕇᕙᔅ 60−ᖏᓐᓂ ᐃᓅᓂᑯ ᐱᕈᖅᓴᓚᐅᖅᓯᒪᔪᖅ ᓄᓇᒥᓂᒃ 20-ᖑᕋᓱᖕᓂᖓᓂ. ᑕᐃᑲᓂ ᐳᓚᕋᖅᑐᓕᕆᓂᕐᒥᑦ ᐱᓕᕆᐊᖃᖅᑎᓪᓗᒍ, ᓕᑦᐳᕆᔾᒥᐅᑕᐅᓪᓗᓂ, ᐊᒃᑲᖓ ᖃᐅᔨᒋᐊᓚᐅᖅᑐᖅ ᓄᓇᒥᓄᑦ ᐅᑎᖅᖢᓂ. ᐃᒡᓗᒧᑦ ᑎᑎᕋᖅᑎᐅᓂᕐᒧᑦ ᐃᓕᑕᕆᔭᐅᔾᔪᑎᑖᓚᐅᖅᑎᓪᓗᒍ ᓇᓂᓯᓪᓗᓂ ᐃᖅᑲᓇᐃᔭᕐᓂᕐᒥᒃ ᐅᐊᐃᑦᕼᐅᐊᔅᒥ, ᐊᓱᐃᓛᒃ ᓅᖦᖢᓂ ᕆᔭᐃᓇᒧᑦ ᐃᓗᐊᖅᓴᐃᔨᐅᓂᕐᒧᑦ ᐃᓕᓐᓂᐊᕌᓂᒍᓯᐊᖅᑖᕐᖢᓂ. 

ᐅᖃᐅᔾᔨᒋᐊᕐᓂᖓ ᐊᐅᓪᓚᓚᐅᖅᓯᒪᙱᑦᑐᒧᑦ ᐊᒻᒪᓗ ᐊᐅᓪᓚᕐᓂᐅᓴᓕᖅᑐᓂ ᓇᒧᒃᑭᐊᖅ ᓯᕗᓪᓕᖅᐹᒥ ᐅᐸᓕᑕᐃᓐᓇᕐᓗᓂ. "ᐅᓄᖅᑐᓂᒃ ᓇᓗᓈᕿᔾᔪᑎᖃᓚᐅᖅᑐᖓ ᖁᒃᓴᓱᒃᖢᖓᓗ ᑲᑉᐱᐊᓱᒃᖢᖓᓗ. ᐃᓛᓐᓂᒃᑯᑦ ᐊᒃᓱᕈᖃᑦᑕᓚᐅᖅᑐᖓ, ᑭᓯᐊᓂᓕ ᒫᓐᓇ ᑭᖑᒧᑦ ᑕᑯᒋᐊᓕᖅᑯᖓ, ᖁᕕᐊᑉᐳᖓ ᑕᐃᒪᐃᔅᓯᒪᒐᒪ. ᑲᒪᓇᑦᑎᐊᓚᐅᖅᑐᖅ," ᖁᖓᖦᖢᓂ. ᐃᓄᖕᓂᒃ ᑲᑎᖃᑎᖃᓚᐅᖅᑐᖅ ᐃᑲᔪᓚᐅᖅᑐᓂᒃ, ᓲᕐᓗ ᐊᓯᐊᓂᒃ ᑎᑎᕋᖅᑎᒥᒃ ᐅᐊᐃᑦᕼᐅᐊᔅᒥ ᐃᓚᖃᓚᐅᖅᑐᖅ ᖃᑕᙳᑎᖏᓐᓂᒃ ᓂᕆᖃᑎᒌᒃᖢᑎᒃ ᐊᒻᒪ ᐊᐅᓪᓚᖃᑕᐅᕙᒃᖢᓂ. ᐊᓯᖏᑦ ᐃᖅᑲᓇᐃᔭᖃᑎᖏᑦ ᖃᐃᖁᔨᕙᓚᐅᖅᑐᑦ ᓱᓇᑐᐃᓐᓇᕐᓂᒃ ᐊᒻᒪᓗ ᐃᑲᔪᖅᓱᓂᒋᑦ ᐱᔪᒪᔭᖏᓐᓂᒃ. 

ᐃᒃᐱᒍᓱᒃᑎᓪᓗᒍ ᐃᓄᖕᓂᒃ ᐊᖅᑯᑎᒃᑰᖅᑎᑕᐅᓯᒪᓂᕐᒥᓂᒃ ᐃᑲᔪᕋᓱᒃᓗᒍ, ᕿᓕᖅᓯᓇᐅᔭᕐᓗᒃᑐᖅ ᐊᖅᑯᑎᒃᑯᑦ. ᐱᕈᖅᓴᓪᓗᓂ Caucasian ᐊᖏᕐᕋᖓᓂ ᓅᖦᖢᓂᓗ ᕆᔭᐃᓇᒧᑦ ᐃᓕᓐᓂᐊᕆᐊᖅᖢᓂ ᐊᒃᑲᒥᓂᒡᓗ ᐱᖃᑎᖃᖅᖢᓂ, ᑏᑐᖅᑕᐅᓚᐅᖅᑐᖅ ᐊᓯᖏᓐᓄᑦ ᐃᓄᖕᓄᑦ ᐊᑐᓚᐅᖅᓯᒪᙱᑕᒥᓂᒃ ᓄᓇᖃᖅᑳᖅᓯᒪᔪᑦ ᐃᓅᓯᖏᓐᓂᒃ. ᐃᓕᓐᓂᐊᓚᐅᖅᑐᖅ ᐃᖅᑭᓖᑦ ᓯᓚᑦᑐᓴᕐᕕᔾᔪᐊᖓᓂ ᐊᒻᒪᓗ ᐊᑐᖅᓯᒪᓪᓗᓂ ᐃᓕᖅᑯᓯᑎᒍᑦ ᖁᐊᖅᓵᓇᖅᑐᒥᒃ ᐊᒻᒪᓗ ᑭᓇᐅᓂᕐᒧᑦ ᐊᒃᓱᕈᓐᓇᑐᒃᑰᖅᑐᓂ. ᐊᓈᓇᖓ ᐊᒃᓱᕉᑎᖃᕐᖢᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᒃᓱᕈᕐᓇᖅᑐᒃᑰᖅᑐᓄᑦ ᐅᐃᕆᓯᒪᔭᖃᕐᓂᕐᒧᓪᓗ ᐊᒻᒪ ᔪᕇᕙᔅ ᓇᖕᒥᓂᖅ ᐃᓱᒪᒥᒍᑦ ᐊᔪᕈᑎᖃᕐᖢᓂ ᐊᒃᓱᕈᕐᓇᖅᑐᒃᑰᕐᖢᓂ ᓂᑲᓪᓗᖓᓂᕐᒧᑦ.

ᐃᓅᓯᓕᕆᔭᐅᓂᖅ ᐊᖅᑯᑎᐅᓚᐅᖅᐳᖅ ᒪᒥᓴᕈᒪᓪᓗᓂ, ᑭᓯᐊᓂ ᐋᖓᔮᕐᓇᖅᑐᖅᑐᖃᑦᑕᓕᓚᐅᖅᑐᖅ, ᐃᒥᖃᑦᑕᓕᖅᖢᓂ ᐊᒻᒪ ᐊᒃᑲᖓᑕ ᓄᓕᐊᖅᑖᖓ ᐅᓂᒃᑳᖅᖢᓂ ᑭᖑᕚᕇᓄᑦ ᖁᐊᖅᓵᖅᓯᒪᓂᕐᒧᑦ ᐊᒻᒪ ᐅᐃᕆᓯᒪᓂᕐᒧᑦ. ᐊᐃᑉᐸᖓᓂ ᐊᕐᕌᒍᒥ ᐋᓐᓂᐊᓯᐅᖅᑎᐅᓂᕐᒥᓂ, ᔪᕙᐃ ᓄᖅᑲᓚᐅᖅᑐᖅ, ᑲᒪᔪᓐᓇᐃᓕᓪᓗᓂ ᐊᒻᒪᓗ ᐅᑎᖅᑐᓂ ᓚᑦᐳᕆᔾᒧᑦ. ᖁᐊᖅᓵᖅᓇᕐᓂᖅᓴᒥᑦ ᐊᑐᓚᐅᖅᑎᓪᓗᒍ, ᐅᔭᕋᖓ ᐊᑖᓅᓚᐅᖅᑐᖅ ᐊᒻᒪ ᐃᓚᒥᓄᑦ ᐅᑎᖅᑐᓂ ᕆᐊᓇᒧᑦ ᑲᒪᒋᔭᐅᔭᖅᑐᖅᑐᓂ. ᒪᒥᓴᖅᑕᐅᓚᐅᖅᑎᓪᓗᒍ, ᐃᓕᓐᓂᐊᕐᕕᖕᒧᑦ ᐅᑎᕐᖢᓂ ᑲᔪᓯᓪᓗᓂᓗ ᐊᖅᑯᑎᖓᓄᑦ ᐃᓗᐊᖅᓴᐃᔨᐅᓂᕐᒧᑦ. 

"ᑕᒪᓐᓇ ᐊᑐᖃᑦᑕᖅᓯᒪᔭᕋ ᓇᒡᓕᒍᓱᖕᓂᖅ ᐱᓕᕆᖃᑎᖃᕐᓂᐊᕐᓗᓂ ᐊᓯᓐᓂᒃ ᐊᒃᓱᕈᕐᓇᖅᑐᒃᑰᖅᑐᓂᒃ ᐊᔾᔨᒌᓂᒃ."

ᐃᓕᓐᓂᐊᕐᕕᖕᒧᑦ ᐅᑎᖅᖢᓂ ᐊᒃᓱᕈᕐᓇᓚᐅᖅᐳᖅ ᓯᖓᐃᓕᓚᐅᕐᒪᑦ ᐃᕐᓂᓱᓕᓚᐅᖅᖢᓂᓗ ᑭᖑᓪᓕᖅᐹᒥ ᖃᐅᔨᓴᖅᑕᐅᑎᓪᓗᒍ. ᑭᖑᓂᖃᓈᖅᓯᓚᐅᖅᑐᖅ ᖃᐅᔨᓴᖅᑕᐅᖏᖦᖢᓂ, c-section-ᖃᖔᓚᐅᖅᑐᖅ. ᐱᓇᓱᐊᕈᓯᖅ ᐊᓂᒍᖅᑎᓪᓗᒍ, ᐃᕐᓂᖅᑖᓵᒥᓂᒃ ᐃᓕᓐᓂᐊᕐᕕᖕᒧᐊᕈᔾᔨᓚᐅᖅᐳᖅ ᑎᑎᕋᖅᖢᓂᓗ ᑭᖑᓪᓕᖅᐹᒥ ᖃᐅᔨᓴᖅᑕᐅᔾᔪᑎᒥᓂᒃ. ᐃᓱᒪᓪᓗᓂ ᖃᓄᖅ ᐊᔪᕐᓇᖅᑎᒋᓂᖓᓂᒃ ᓇᓗᓇᐃᒃᑯᑕᖅᑖᖅᓯᒪᓂᕐᒥᒃ ᐃᓗᐊᖅᓴᐃᓂᕐᒥ, ᓇᓗᓪᓗᓂ ᖃᓄᖅ ᑕᒪᓐᓇ ᐱᓕᕆᐊᕆᔭᐃᓐᓇᕆᓚᐅᕐᒪᖔᑦ, ᑭᓯᐊᓂ ᒎᕙᐃ ᐃᒻᒥᓂᒃ ᐅᐱᒋᕗᖅ ᖁᔭᓕᓪᓗᓂᓗ. 

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᐃᑲᔪᖅᑕᐅᒃᑲᓐᓂᕈᒪᓗᓂ, ᐃᑲᔪᖅᑕᐅᓗᓂ ᐱᔾᔪᑎᖏᓐᓄᑦ ᐊᒻᒪᓗ ᐊᑭᓐᓇᒧᐊᕐᓗᓂ ᐊᓯᒥᓄᑦ ᑲᑎᙵᖃᑎᖃᕈᓐᓃᕐᓗᓂ. ᐅᐃᕆᓯᒪᔪᓄᑦ ᒪᒥᓴᕐᕕᖕᒧᐊᕐᓂᖅ ᐃᑲᔪᓚᐅᖅᑐᖅ ᐊᑭᓐᓇᕐᒧᑦ ᐱᑎᖦᖢᒍ ᐊᒃᑐᖅᑕᐅᓴᕋᐃᖦᖢᓂ ᓱᓕᑦᑎᐊᕐᖢᓂᓗ. ᒫᓐᓇᓕ ᒪᕐᕉᖕᓂᒃ ᒪᒃᑯᒃᑑᖕᓂᒃ ᐃᕐᓂᖃᓕᖅᐳᖅ ᐃᓗᐊᖅᓴᐃᔨᐅᓪᓗᓂᓗ. 

ᓯᕗᓂᒃᓴᒥ, ᐊᑐᕈᒪᓇᔭᖅᑕᖓ ᐃᓗᐊᖅᓴᐃᓂᕐᒧᑦ ᓇᓗᓇᐃᒃᑯᑕᖅᑖᖅᓯᒪᓂᕐᒧᑦ ᐃᑲᔪᕈᒪᓪᓗᓂ ᓄᓇᖃᖅᑳᖅᑐᓂᒃ ᐃᓄᖕᓂᒃ, ᐱᓕᕆᖃᑎᖃᕐᓗᓂ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ ᐅᕝᕙᓘᓐᓃᑦ ᓄᓇᖃᖅᑳᖅᑐᑦ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐱᔪᓐᓇᐅᑎᓕᖕᓂᒃ. "ᐆᒻᒪᑎᒐ ᑕᕐᓂᖓᓗ," ᖁᖓᑉᐳᖅ. ᐱᖃᓐᓇᕆᔭᖃᕐᕕᓕᐊᕐᖢᓂ ᓄᓇᖃᖅᑳᖅᓯᒪᔪᓄᓪᓗ ᐱᖃᓐᓇᕆᔭᖅᑖᕐᖢᓂ ᑕᐃᑲᓂ ᑭᓯᐊᓂ ᐅᑎᖅᑎᑦᑎᒃᑲᓐᓂᕈᒪᔪᖅ. ᐃᓕᓐᓂᐊᓚᐅᖅᑎᓪᓗᒍ ᑭᖑᕚᕇᓄᑦ ᐊᒃᑑᑎᔪᓂᑦ ᐃᓚᖏᓐᓄᑦ ᐊᒃᓱᕈᕐᓇᖅᑐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ ᓵᖓᔭᖏᓐᓂ, ᐃᓚᐅᖃᑕᐅᔪᒪᔪᖅ ᐋᖅᑭᒍᑎᒃᓴᓄᑦ ᑐᑭᖃᑦᑎᐊᖅᑐᒃᑯᑦ. 

ᐱᔭᕇᕈᑎᒋᓗᒍ, ᔭᓯᑲ ᒎᕙᐃ ᑎᓕᐅᕆᔪᒪᕗᖅ ᓄᓇᖃᖅᑳᖅᑐᓂᒃ ᒪᒃᑯᒃᑐᓂᒃ ᐃᓱᒪᒃᓴᖅᓯᐅᕈᑎᖃᕐᓗᑎᒃ ᐃᓕᓐᓂᐊᕆᐊᕈᒪᓂᕐᒥᒃ, ᑕᒪᑐᒧᖓ. ᖃᐅᔨᓚᐅᖅᑐᖅ ᑖᓐᓇ ᑯᕇᑐ ᒪᑐᐃᖅᓯᓲᖑᓂᖓᓂᒃ ᐹᓂᒃ ᐊᒻᒪᓗ ᐃᓱᒪᖅᓱᖅᑐᓂ ᐱᓱᒍᓐᓇᖅᑐᓂ. ᐅᖃᖅᖢᓂ, "ᒪᑐᐃᖓᑐᐃᓐᓇᕐᓂᐊᖅᑐᖅ ᐊᖅᑯᑎᑦᑎᐊᕙᐅᒍᕕᑦ. ᑎᓕᐅᑦᑎᐊᖅᐸᒋᑦ ᓯᓐᓇᑦᑑᒪᒋᔭᑎᑦ ᐲᔭᕐᓗᒋᑦ." ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᖅᑎᓪᓗᒍ, ᓇᒻᒥᓂᖅ ᒪᒥᓴᓚᐅᖅᑐᖅ. ᒫᓐᓇ ᓯᓐᓇᑦᑑᒪᒥᓂᒃ ᑐᓂᓯᔪᒪᓕᖅᐳᖅ ᓄᓇᓕᖕᓄᑦ ᐃᑲᔪᕐᓗᓂᓗ ᐅᓄᕐᓂᖅᓴᓂᒃ ᐃᓄᖕᓂᒃ ᒪᒥᓴᖅᑐᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.