"ᓴᙱᔪᒻᒪᕆᐊᓘᔪᒍᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑲᑎᒃᑳᖓᑦᑕ,"ᔫᕗᓪ ᐱᐅᕐ−ᕉᓯᐅᑉ ᐅᖃᐅᓯᒃᓴᖏᑦ. ᑖᑯᑕ ᐊᕐᓇᐅᔪᖅ ᐅᐃᓂᐸᒡᒥ ᓄᓇᖃᐃᓐᓇᐅᔭᖅᑐᖅ, ᒪᓂᑐᑉᐸᒥ ᑭᓯᐊᓂ ᓯᐅᒃᔅ ᕚᓕ ᑕᑰᑕ ᑲᓇᑕᒥ ᐊᖏᕐᕋᕆᓂᕋᖅᐸᐅᒃ. ᐊᐅᔭᒃᑯᒥᓃᑉᐸᑦᑐᖅ ᐃᕐᖑᑕᒥᓂᒃ ᐱᖃᑎᖃᖅᑐᓂ ᐊᒻᒪᓗ ᐊᓯᖏᓐᓂᒃ ᐃᓚᒥᓂᒃ, ᐊᒻᒪᓗ ᐊᑦᔨᐅᖏᑦᑐᒥᒃ ᐃᓂᖃᑦᑐᓂ ᐃᓄᓐᓂᒃ ᑲᔪᖏᕐᓴᐃᕙᑦᑐᓂᒃ.

ᐊᑖᑕᑦᓯᐊᖓ ᑮᓇᐅᔭᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓚᐅᖅᐳᖅ ᐊᒻᒪ ᐊᓈᓇᑦᑎᐊᖓ ᐃᖅᑲᓇᐃᔭᖅᑐᓂ ᐋᓐᓂᐊᖅᑐᓕᕆᓂᕐᒥᑦ. ᖁᕕᐊᒋᔭᓕᒃ ᐃᓚᐅᑎᓪᓗᒍ ᐊᓈᓇᑦᑎᐊᖓ ᐊᔪᙱᓐᓂᓕᒫᖓᒍᑦ, ᖁᕕᐊᒋᓪᓗᒍ ᖃᓄᑎᒋ ᓴᙱᑎᒋᓂᖓᓂᒃ ᐊᒥᖅᑳᖃᑎᒋᓗᒍ ᐃᓂᖃᕐᓂᖓ. ᑲᔪᖏᖅᓴᐃᓂᖏᑦ ᐃᑲᔪᓚᐅᖅᑐᑦ ᓇᓂᓯᓂᕐᒥᑦ ᐃᓂᒥᑦ ᐱᒻᒪᕆᐅᔪᒥᑦ ᐱᓕᕆᐊᒥᑦ, ᓯᕗᓕᖅᑎᓄᑦ ᑐᑭᒧᐊᑦᑎᑦᓯᔨ ᑮᓇᐅᔭᓕᐅᕋᓱᐊᖏᑦᑐᓄᑦ ᑲᑐᔾᔨᖃᑎᒌᓄᑦ ᑕᐃᔭᐅᔪᖅ LITE, ᑐᑭᖃᖅᑐᖅ ᓄᓇᓕᓐᓂᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᐃᖅᑲᓇᐃᔭᕐᓂᕐᒧᑦ. 

ᑲᑐᔾᔨᖃᑎᒌᖑᔪᖅ ᑮᓇᐅᔭᓂᒃ ᐱᕈᖅᓴᐃᓇᓱᖃᑦᑕᖅᐳᖅ ᓴᖅᑭᑦᑎᓇᓱᒃᖢᓂ ᑮᓇᐅᔭᓂᒃ ᐱᕕᒃᓴᐅᔪᓐᓇᖅᑐᓂᒃ ᑲᑐᔾᔨᖃᑎᒌᓄᑦ ᐅᐃᓂᐹᒡᒥ ᑮᓇᐅᔾᔭᒃᓴᙱᓐᓂᖅᓴᓂᒃ ᐊᒻᒪ ᐱᕋᔭᒃᐸᒃᑐᑦ ᐅᓄᙱᓐᓂᖅᓴᐅᓪᓗᑎᒃ, ᐊᒥᓱᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐊᒻᒪ ᑎᑭᑉᐸᓪᓕᐊᔪᑦ ᑲᓇᑕᒥ ᓄᓇᖃᖅᖢᑎᒃ. ᑐᑭᒧᐊᖅᑎᑦᑎᔨᐅᓪᓗᓂ, ᐱᓕᕆᖃᑎᒌᒃᐸᓪᓕᐊᕙᒃᐳᖅ ᓇᓂᓯᕙᒃᖢᑎᒡᓗ ᖃᓄᖅ ᑮᓇᐅᔭᓂᒃ ᐱᕈᖅᑎᑦᑎᔪᖃᕈᓐᓇᕐᒪᖔᑦ ᓴᖅᑭᑎᑦᑎᓂᐊᕐᓗᓂ ᐃᖅᑲᓇᐃᔭᕐᓂᕐᒧᑦ ᐊᑐᖅᑕᐅᓕᖅᐸᒃᑐᓂᒃ ᐃᓂᑖᖅᑎᑦᑐᒪᓪᓗᒋᑦ ᐃᓄᐃᑦ ᐊᓂᒍᖅᑎᑦᑐᒪᓪᓗᒋᑦ ᐊᔭᖅᑭᑦᑕᕈᑕᐅᓕᖅᐸᒃᑐᑦ ᓵᑦᑎᐊᕐᒥᐅᑕᕆᓕᖅᑕᖏᓐᓄᑦ. 

ᑎᑭᑉᐸᓪᓕᐊᔪᑦ ᐅᖃᓘᓯᖃᙱᖦᖢᑎᒃ ᓅᓚᐅᖅᑎᓪᓗᒋᑦ ᐊᓯᐊᓂᑦ ᓄᓇᕐᔪᐊᒥᑦ, ᐃᓄᑑᔪᑦ ᐊᖓᔪᖅᑳᑦ ᐅᑎᕐᐸᓪᓕᐊᔪᑦ ᐃᖅᑲᓇᐃᔭᕆᐊᒃᓴᖅ ᑲᒪᓚᐅᖅᑎᓪᓗᒋᑦ ᕿᑐᙵᒥᓂᒃ ᐅᓪᓗᓕᒫᖅ, ᐃᒡᓗᒥᐅᑕᖃᙱᑦᑐᓪᓘᓐᓃᑦ ᑐᕌᕈᑎᖃᙱᑦᑐᑦ, ᑐᓗᖅᑕᕈᑎᖃᖅᑐᐃᓐᓇᐅᓲᑦ LITE−ᑯᑦ ᑐᕌᕋᓱᒃᑕᖏᓐᓂᑦ. "ᑕᒪᕐᒥᑦᑎᐊᖅ ᐱᖃᑦᑕᖅᑕᕗᑦ ᐊᒥᓱᑎᒍᑦ, ᓇᖏᖅᑐᖅ ᑭᓇᒧᒃᑭᐊᖅ ᓇᓂᓯᓗᓂ ᑐᑭᖃᑦᑎᐊᖅᑐᒥᒃ ᐃᖅᑲᓇᐃᔭᕐᓂᕐᒥᒃ," ᐅᖃᖅᑐᖅ. 

"ᐊᖓᔪᒃᖡᑦ ᐃᓕᓐᓂᐊᕐᕕᖓᓃᑎᓪᓗᖓ, ᐅᕙᓐᓄᑦ ᐃᑰᑕᖅᑕᐅᑲᓴᑦᑎᐊᓚᐅᖅᐳᖅ ᓯᓚᑦᑐᖅᓴᕐᕕᒡᔪᐊᖑᓂᖓᓂᒃ ᐅᕝᕙᓘᓐᓃᑦ ᐸᓯᐅᓂᖓᓂᒃ."

ᐱᕈᖅᓴᔭᐅᑎᓪᓗᒍ ᐅᒃᐱᕈᓱᒃᖢᓂ ᐃᓕᓐᓂᐊᖅᓯᒪᙱᓗᐊᕐᓂᖅ ᑐᓗᖅᑕᕈᑕᐅᓇᔭᕐᓂᖓᓂᒃ ᓇᖕᒥᓂᖅ ᐃᖅᑲᓇᐃᔮᖓᓄᑦ, ᐱᐅᕐ−ᕉᓯ ᐊᔪᕐᓇᖅᑐᒃᑰᓚᐅᕐᒪᑦ ᐱᓕᕆᖃᑎᖃᕆᐊᒃᓴᖅ ᐃᓕᓐᓂᐊᓪᓚᑦᑖᕐᓂᕐᒥᒃ. ᐊᕐᕌᒍᒥᒃ ᓄᖅᑲᖓᓚᐅᖅᑐᖅ ᐱᔭᕇᓚᐅᖅᑎᓪᓗᒍ ᐃᓕᓐᓂᐊᕐᕕᐊᓗᒻᒥᒃ ᐃᖅᑲᓇᐃᔭᕆᐊᖅᑐᓂ, ᐆᑦᑐᓕᖅᑐᓂ ᐃᓕᓐᓂᐊᕐᕕᔾᔪᐊᒥᒃ ᒪᕐᕈᐊᑎᖅᑐᓂ. ᐅᑭᐅᒃᑲᓐᓃᒃ ᒪᕐᕈᑲᓐᓃᓐᓂᒃ ᓄᖅᑲᖓᓕᓚᐅᖅᑐᖅ ᖃᐅᔨᒐᒥᐅᒃ. ᐱᓕᕆᐊᖅ Red River ᓯᓚᑦᑐᖅᓴᕐᕕᖕᒥ ᐃᓱᒪᒥᓂᒃ ᐊᓯᔾᔩᓚᐅᖅᐳᖅ, ᓄᓇᓕᖕᓂ ᐱᕙᓪᓕᐊᔪᓕᕆᔨ ᐊᒻᒪ ᓄᓇᓕᖕᓂ ᐱᕙᓪᓕᐊᔪᓕᕆᔨᒃᑯᑦ. ᐃᓐᓇᐅᓗᐊᖅᑰᔨᓚᐅᖅᑐᖅ ᐃᓕᓐᓂᐊᕆᐊᒃᑲᓐᓂᕆᐊᒃᓴᖅ ᑭᓯᐊᓂ ᑭᖑᓂᐊᒍᑦ, ᐅᐸᒃᖢᓂᐅᒃ ᓈᒻᒪᑦᑎᐊᖅᖢᓂᓗ. 

"ᑭᒃᑯᓕᒫᑦ ᐊᕐᕌᒍᓄᑦ ᑎᓴᒪᓄᑦ ᐃᓕᓐᓂᐊᕈᓐᓇᙱᒻᒪᑕ ᖃᓄᐃᙱᖦᖢᓂᓗ."

ᐅᒃᐱᕆᔭᖏᑦ ᐃᓕᓐᓂᐊᖅᑐᓕᕆᓂᐅᑉ ᒥᒃᓵᓄᑦ ᐊᓯᔾᔨᖅᓯᒪᓕᕐᒪᑕ ᐊᒻᒪᓗ ᒫᓐᓇ ᖃᐅᔨᒪᓕᖅᑐᓂ ᖃᓄᖅ ᑲᔪᓯᑦᑎᐊᕈᓐᓇᕐᒪᖔᑦᑕ ᐃᓕᓐᓂᐊᕐᕕᐅᑉ ᓯᓚᑖᓂ. "ᑕᐃᒪᓕ ᑕᐃᒪᐃᑦᑐᒧᑦ ᓈᒻᒪᒋᙱᒃᑯᕕᐅᒃ, ᑕᒪᓐᓇ ᑐᑭᖃᙱᓚᖅ ᐊᓯᐊᓄᑦ ᓈᒻᒪᔾᔮᙱᓐᓂᖓᓂᒃ. ᓇᓂᓯᓂᐅᕗᖅ ᓱᓇᐃᑦ ᐃᓕᖕᓄᑦ ᐊᑑᑎᖃᕐᒪᖔᑦ, ᓱᓇᐅᖕᒪᖔᓪᓗ ᑐᓐᓂᖅᑯᓯᐊᕆᔭᐃᑦ," ᓇᓗᓇᐃᖅᑕᖓ. ᑖᔅᓱᒧᖓ, ᐱᐅᓛᖅ ᓂᕈᐊᕆᓯᒪᔭᖓ ᕋᑦ ᕆᕗ ᓯᓚᑦᑐᖅᓴᕐᕕᐅᑉ ᐊᕐᕌᒎᖕᓄᑦ ᒪᕐᕉᖕᓄᑦ ᐃᓕᓐᓂᐊᒐᒃᓴᖓ.

ᐃᓕᓚᐅᖅᑕᖓ ᓇᓃᑦᑐᒪᖕᒪᖔᕐᒥᓂᒃ, ᐱᓕᕆᓪᓗᓂ ᑕᒪᑐᒥᖓ. ᐱᓇᔪᐃᓐᓇᕐᖢᓂ ᑕᐃᒎᓯᖃᕐᖢᓂ ᑐᑭᒧᐊᒃᑎᑦᑎᔨᒻᒪᕆᐅᑉ, ᑭᓯᐊᓂᑦᑕᐅᖅ ᐃᓕᑦᑎᔭᕆᐊᖃᕐᖢᓂ ᓲᕐᓗ ᑮᓇᐅᔾᔭᒃᓵᓕᕆᓂᖅ, ᐃᓕᐅᖅᑲᐃᓂᖅ ᑐᓐᓂᖅᑯᓯᐊᓂᑦ, ᐊᒻᒪᓗᑦᑕᐅᖅ ᐱᓕᕆᐊᒃᓴᓂᑦ ᐱᓕᕆᖃᑎᒌᖕᓂᕐᒧᓪᓗ ᐱᕙᓪᓕᐊᓂᕐᓂ. ᐃᓄᓕᕆᔪᒪᓚᐅᕋᓗᐊᖅᖢᓂ ᓲᕐᓗ ᐊᑦᑕᖓᑎᑐᑦ, ᑭᓯᐊᓂ ᖃᐅᔨᓚᐅᖅᑐᖅ ᐃᓕᓐᓂᐊᕐᓂᖓᑕ ᐊᖅᑯᑖ ᓈᒻᒪᙱᓐᓂᖓᓂᒃ ᑖᔅᓱᒧᖓ ᐊᒻᒪ ᓇᒡᓕᒍᓱᑦᑎᐊᕐᓂᖓᓄᑦ ᐊᖅᑯᑎᑦᑎᐊᕙᐅᙱᖦᖢᓂ ᐃᒃᐱᖕᓂᐊᓂᒃᑯᑦ. ᒫᓐᓇ ᐱᔪᓐᓇᕐᓂᕆᔭᖓᓂ, ᐃᑲᔪᕈᓐᓇᖅᑐᖅ ᐃᓄᖕᓂᒃ ᐃᑲᔪᕈᓐᓇᕐᓗᓂᓗ ᐊᑐᕐᓂᑯᓄᑦ ᐊᑯᓂᐅᔪᒃᑯᑦ ᐱᕚᓪᓕᕈᑎᓄᑦ, ᑐᓂᔾᔪᑎᑖᕆᒐᔪᒃᑕᖏᓐᓂ. 

ᐊᑭᓕᖅᓱᖅᑕᐅᙱᖦᖢᓂ ᐱᓕᕆᖃᑦᑕᕐᓂᖅ ᐃᑲᔪᓚᐅᖅᑐᖅ ᑲᓲᒪᖃᑎᖃᕐᓂᕐᒥᒃ ᓄᓇᓕᖕᒥ ᓇᓂᓯᓪᓗᓂᓗ ᐃᓂᒃᓴᒥᒃ ᓂᕆᑎᓪᓗᒍ, ᑐᓂᐅᖅᑲᐃᓂᖅ ᓂᕿᒥᒃ ᓄᓇᕐᔪᐊᒥ ᖃᓂᒪᓐᓇᐅᑎᓪᓗᒍ, ᐃᑭᐊᕐᒥᓕᖅᓱᐃᓂᖅ ᐊᒻᒪ ᐱᕈᖅᐸᓪᓕᐊᑎᑦᑎᓂᖅ ᐃᑲᔪᕐᓂᕐᒥᒃ ᐊᒡᔭᖅᑕᐅᔪᓄᑦ. ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐱᓕᕆᔪᒪᔪᒧᑦ "Just go." ᑕᐃᒪᐃᓕᐅᓚᐅᖅᑐᖅ ᐊᑐᖅᑎᑦᑎᓪᓗᓂ ᐊᒡᒐᒥᓂᒃ, ᑭᖑᓂᐊᒍᑦ ᐃᓅᓪᓗᓂ ᑲᔪᖏᖅᓴᐃᔨᙳᕐᖢᓂ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ ᐅᐃᓂᐹᒡᒧᑦ ᐃᓕᓐᓂᐊᕆᐊᖅᑐᓄᑦ. 

ᑕᐃᑲᓃᓚᐅᖅᑐᖅ ᒪᒃᑯᒃᑐᑦ ᐃᓄᑑᔭᕆᐊᖃᙱᖦᖢᑎᒃ, ᐃᓚᖓᓗ ᐊᖏᓛᖑᓪᓗᓂ ᐃᓕᑕᖓ ᓇᖕᒥᓂᖅ ᐱᓕᕆᓇᓱᙱᖦᖢᓂ. "ᑲᑉᐱᐊᓱᙱᓪᓗᑎᑦ ᐃᑲᔪᖅᑕᐅᔪᒪᔭᕆᐊᒃᓴᖅ. ᐱᑕᖃᐃᓐᓇᐅᔭᕐᓂᐊᖅᑐᖅ ᐃᓄᖕᓂᒃ ᐃᑲᔪᕈᒪᔪᓂᒃ ᓇᓂᓯᔭᕆᐊᖃᑐᐃᓐᓇᕐᖢᑎᓪᓗ ᓴᙱᓂᖃᕐᓗᑎᒃᓗ ᐃᑲᔪᖅᑕᐅᔪᒪᓗᑎᒃ," ᐅᖃᐅᔾᔨᒋᐊᓲᖅ, ᓂᕆᐅᒃᓗᓂ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐃᓕᑦᑎᔪᓐᓇᕐᓗᑎᒃ ᐃᓕᑦᑎᓂᕐᓂ ᐃᓅᓯᕐᓂ ᐃᓕᑦᑎᓯᒪᔪᖅ. 

ᐊᒃᓱᕈᕐᓇᖅᑐᒃᑰᖅᑎᓪᓗᒍ, ᐊᓈᓇᑦᑎᐊᒃᑯᒥᓂᒃ ᐱᖃᓐᓇᕆᔭᒥᓂᒡᓗ ᓴᙲᓕᖃᑦᑕᖅᐳᖅ. ᐃᓅᓯᓕᕆᓂᖅ, ᒪᒥᓴᕐᓂᖅ ᐊᒻᒪ ᐃᓕᖅᑯᓯᓕᕆᓂᖅ ᐃᑲᔪᖅᓯᒪᖕᒥᔪᖅ ᐊᒃᓱᕈᕐᓇᖅᑐᒃᑯᑦ. "ᖃᐅᔨᕙᓪᓕᐊᓕᖅᑐᖓ ᑐᑭᓯᕙᓪᓕᐊᓪᓗᖓᓗ ᐃᓕᖅᑯᓯᑦᑎᓐᓂᒃ ᐃᓕᓴᐃᔾᔪᑎᑦᑎᓐᓂᒡᓗ, ᖃᐅᔨᒪᔪᒪᑐᐃᓐᓇᖅᖢᖓ ᑕᐃᑲᓃᓐᓂᖓᓂᒃ, ᐊᑐᐃᓐᓇᓕᖅᖢᒍᓗ ᐱᔭᕆᐊᖃᓕᕌᖓᒃᑯ," ᑐᓴᖅᑎᑦᑎᕗᖅ. ᐃᓕᖅᑯᓯᒥᒃ ᖁᕕᐊᒋᔭᖃᕐᓂᖓ ᐃᓚᒋᔭᐅᕗᖅ ᖃᓄᐃᒻᒪᑦ ᐃᓕᑦᑎᕙᓪᓕᐊᖕᒪᖔᑦ ᑭᓱᓂᒃ ᐊᔪᙱᑦᑕᒥᓂᒃ ᐱᓕᕆᐊᒃᓴᖃᖅᑎᓪᓗᒍ ᑐᑭᒧᐊᒃᑎᑦᑎᔨᐅᓗᓂ, ᓯᕗᓕᖅᑎᐅᔪᒪᒐᓗᐊᖅᖢᓂ ᓄᓇᖃᖅᑳᖅᓯᒪᔪᓂᒃ−ᐊᐅᓚᑕᐅᓗᓂ ᑲᑐᔾᔨᖃᑎᒌᒡᕕᖕᒥ ᐅᓪᓗᕐᒥ ᐊᑕᐅᓯᕐᒥ.

ᐱᐅᕐ−ᕉᓯ ᐅᖃᐅᓯᖃᖅᐳᖅ ᓂᕆᐅᒋᔭᖃᕐᓂᕐᒥᒃ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ: 

"ᐱᓇᓱᐊᕆᑦ; ᐃᓄᖕᓂᒃ ᐃᑲᔪᖅᑐᐃᔪᖃᐃᓐᓇᐅᔭᕐᓂᐊᖅᑐᖅ... ᐊᑯᓂᐊᓘᓚᐅᕐᒪᑦ ᓇᒦᓕᕐᒪᖔᕐᒪ. ᐆᒻᒪᑎᐃᑦ ᐃᓕᑐᐊᕈᕕᐅᒃ, ᐃᑲᔪᖅᑕᐅᔪᒪᓗᑎᓪᓗ ᐃᑲᔪᖅᑕᐅᔪᒪᓗᑎᑦ... ᐃᓄᑑᓗᑎᑦ ᐱᔪᓐᓇᙱᑦᑐᑎᑦ, ᓄᓇᓕᖃᕆᐊᖃᖅᑐᑎᑦ ᐃᑲᔪᖃᑦᑕᐅᑎᓗᑎᓪᓗ, ᐃᑲᔪᖃᑦᑕᐅᑎᓗᓯᓗ ᐅᐱᒋᖃᑦᑕᐅᑎᓗᓯᓗ ᑭᓇᐅᓂᕐᓂᒃ ᓇᑭᙶᕐᓂᔅᓯᓐᓂᒡᓗ. ᐃᓕᓴᐃᔨᓯ ᑲᑎᖃᑎᒋᔪᓐᓇᕈᕕᒋᑦ, ᐃᓐᓇᕐᓂᒃ ᑲᑎᖃᑎᖃᕐᓗᑎᑦ, ᓄᓇᖅᑲᑎᔅᓯᓐᓂ ᑲᑎᖃᑎᖃᕐᓗᑎᑦ, ᐳᐃᒍᖅᑰᕋᑦᑕ ᖃᓄᖅ ᓴᙱᑎᒋᓂᖏᓐᓂᒃ ᓄᓇᓕᕗᑦ ᐊᑕᐅᑦᑎᒃᑯᑦ... ᒪᒃᑯᒃᑐᑦ ᐃᓱᒪᒋᓪᓗᒋᑦ ᐊᒻᒪ ᓯᕗᓂᒃᓴᖅ ᐃᓱᒪᒋᓕᕌᖓᒃᑯ, ᑕᑯᖃᑦᑕᕋᒪ ᐅᑎᖅᑎᑕᐅᓂᖏᓐᓂᒃ." 

ᑮᓇᐅᔾᔭᒐᓱᐊᖅᑎᐅᙱᖦᖢᓂ ᓯᕗᓕᖅᑎᐅᓪᓗᓂ, ᓄᓇᓕᖕᓂ ᐱᔪᓐᓇᕐᓂᖅᑖᖅᑎᑦᑎᕗᖅ, ᐃᓕᑕᕆᐅᒪᓪᓗᒍ ᓄᓇᖃᖅᑳᖅᓯᒪᔪᑦ ᐱᔪᓐᓇᕐᓂᕆᔭᖏᑦ ᑲᑎᒃᑳᖓᑕ. ᔨᐅᕗᓪ ᐱᐅᕐ-ᕉᓯ ᐊᐅᔭᖃᖃᑦᑕᖅᑐᖅ ᐊᔾᔨᐅᖏᑦᑐᒥᑦ ᐃᓄᒻᒥᑦ ᑲᔪᖏᖅᓴᐃᔪᒥᑦ, ᐊᒻᒪ ᑲᔪᖏᖅᓴᐃᓇᓱᐊᖅᑐᓂ ᐊᓯᒥᓂᑦ ᓇᒦᒻᒪᖔᖅ. ᓯᐅᒃᔅ ᕚᓕ ᑕᑰᑕ ᓄᓇᖃᖅᑳᖅᓯᒪᔪᖅ ᐊᖏᕐᕋᕆᓂᕋᖅᐸᐅᒃ, ᑭᓯᐊᓂ ᕕᓂᐸᐃᒡᒥ ᐃᓅᓯᓕᐅᖅᓯᒪᔪᖅ, ᑕᐃᑲᓂᓗ ᐊᒃᓱᕈᖅᖢᓂ ᐱᓕᕆᓪᓗᓂ ᐃᓅᓯᖅ ᐱᐅᓯᕚᓪᓕᖅᑎᓐᓇᓱᒃᖢᒍ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.