ᐱᓕᒻᒪᒃᓴᖅᓯᒪᔪᖅ ᐃᒐᔨᐅᓂᕐᒧᑦ, ᑲᓃᓇ ᑎᐅᕆ ᓂᕿᓕᕆᓂᕐᒧᑦ ᐱᓕᕆᓚᐅᖅᓯᒪᙱᑦᑐᖅ ᐊᕐᕌᒍᒐᓴᖕᓄᑦ. ᓇᖕᒥᓂᖅ ᖃᑕᙳᑎᒥᓂᒡᓗ ᓂᕿᓕᐅᕈᒪᓂᖅᓴᐅᖃᑦᑕᖅᐳᖅ ᐃᓚᒥᓂᒡᓗ ᐅᕝᕙᓘᓐᓃᑦ ᐃᓕᓐᓂᐊᖅᑎᓂᒃ ᐅᕝᕙᓘᓐᓃᑦ ᑲᑐᔾᔨᖃᑎᒌᓂᒃ ᐃᓕᓐᓂᐊᕐᕕᐊᕈᓯᖓᓂ. ᑭᓱᒥᓪᓕ ᖃᐅᒪᑎᑦᑎᓛᖑᕙᒃᐸ ᖃᓄᖅ ᐃᓚᐅᑎᑦᑎᕙᖕᒪᖔᑦ ᐃᓕᖅᑯᓯᑐᖃᕐᒥᓂᒃ. ᑎᐅᕆ ᐅᑎᖅᑎᑦᑎᔪᖅ ᓂᕿᓄᑦ ᐊᑐᕋᓲᑎᓂᒃ ᐱᖅᑯᓯᖏᓐᓂᒃᓗ ᐃᓕᓴᐃᔾᔪᑎᖏᓐᓂ ᐱᓪᓗᒍ ᐊᒃᑑᑎᔪᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᓄᓇᑐᖃᕆᙱᑕᕐᓄᓪᓗ.

ᑕᒪᓐᓇ ᐊᒃᓱᕈᕐᓇᖃᑦᑕᕐᒪᑦ. "ᓴᓂᕐᕙᒃᑕᐅᓯᒪᔪᓂᒃ ᐃᓂᖃᙱᑦᑐᖓ. ᐊᒃᑐᐊᓂᖃᑦᑎᐊᙱᓐᓇᒪ ᐃᓄᖕᓄᑦ ᓄᓇᑦᑎᓐᓂᙶᖅᑐᓂᒃ ᓱᓕ ᖃᐅᔨᒪᓂᖃᖅᑐᓄᑦ," ᐅᖃᐅᓯᕆᓵᖅᑕᖓ. ᑎᐅᕆ ᐃᓕᑦᑎᓯᒪᔪᖅ ᐃᖅᑲᖅᑐᖅᑕᐅᓂᒃᑯᑦ ᑕᒻᒪᕐᓂᒃᑯᓪᓗ, ᐃᓄᖕᓄᑦ ᐊᓯᖏᓐᓂ ᓄᓇᓕᖕᓂ ᑕᐅᑐᒃᖢᑎᒃᓗ ᐊᑐᕋᓱᒃᐸᒃᑕᖏᓐᓂ.

ᑲᓃᓇ ᑎᐅᕆ ᓄᓇᖃᖅᑐᖅ ᓯᐅᒃᔅ ᕕᐅᑦᒥ ᐃᓚᒋᔭᐅᓪᓗᓂᓗ ᓛᑯ ᓯᐅᓪ ᓄᓇᖃᖅᑳᖅᓯᒪᔪᓄᑦ. ᐃᖅᑲᓇᐃᔭᖃᑎᖃᖅᑐᖅ ᑲᓲᑎᓂᖅ ᐅᑭᐅᖅᑕᖅᑐᒥ ᐊᒻᒪ TakingITGlobal−ᑯᓐᓂ ᐃᓗᓕᖏᓐᓂᒃ ᐱᑎᑦᑎᔨᐅᓪᓗᓂ, ᐊᒥᖅᑳᖃᑎᖃᖅᐸᒃᖢᓂ ᒪᒃᑯᒃᑐᓂᒃ ᑲᓇᑕᓕᒫᒥ ᓂᕿᓕᕆᓂᕐᒥᒃ, ᓂᕿᓕᕆᓂᕐᒥᒃ, ᓄᓇᖃᖅᑳᖅᓯᒪᔪᑦ ᓂᕿᖏᑕ ᑲᓇᑕᒥᐅᑕᐅᓂᖏᓐᓂᒃ ᐊᒻᒪ ᓄᓇᖃᖅᑳᖅᓯᒪᔪᑦ ᓂᕿᖏᓐᓂᒃ ᐅᑎᖅᑎᑦᑎᓂᕐᒥᒃ. ᐅᖃᐅᓯᖃᕐᒥᔪᖅ ᐊᒥᕐᓂᒃ ᕿᑐᒻᒪᒃᓴᐃᓂᕐᒥᒃ, ᓴᓇᐅᒐᕐᒥᒃ ᐊᑐᒐᔪᒃᑕᒥᓂᒃ.

ᐃᓕᓴᐃᔨᙳᕋᓱᒃᑎᓪᓗᒍ ᐃᓕᖅᑯᓯᓕᕆᓂᕐᒥᑦ ᐊᑯᓂᐅᓚᐅᖅᑐᖅ ᐊᓄᕌᖅᖢᓂᓗ. ᐃᓕᓐᓂᐊᕐᕕᐊᓗᒻᒦᑎᓪᓗᒍ, ᑎᐅᕆ ᑕᕐᕆᔭᖅᑎᐅᔪᒪᓚᐅᖅᑐᖅ.  ᐱᓇᔪᓚᐅᖅᑐᖅ ᐃᓇᖐᓯᒪᔪᓄᑦ ᐱᓕᕆᐊᒃᓴᓄᑦ ᑭᓯᐊᓂ ᑕᒻᒪᖅᓯᒪᔪᖅᓯᐅᓚᐅᙱᑦᑐᖅ ᐱᕙᒌᔭᖅᓯᒪᙱᖦᖢᓂ, ᐃᓕᕋᓱᒃᓯᒪᓪᓗᓂ ᑲᑉᐱᐊᓱᒃᖢᓂᓗ. ᑭᓯᐊᓂ ᖃᐅᔨᒪᓚᐅᖅᑐᖅ ᓇᓃᑦᑐᒪᖕᒪᖔᑦ.

"ᑐᕌᓐᑐᒦᒍᒪᓚᐅᖅᑐᖓ ᓲᖃᐃᒻᒪ ᐱᕈᖅᐸᓪᓕᐊᓪᓗᖓ ᑕᒫᓂ ᓄᓇᓕᕋᓛᖑᓂᖅᓴᒥ, ᐃᓱᒪᓚᐅᖅᑐᖓ 'ᑖᓐᓇ ᑕᐃᒪᐃᖁᙱᖦᖢᒍ. ᓄᓇᓕᐸᐅᔭᕐᒦᒍᒪᔪᖓ.' ᖃᐅᔨᒪᙱᑦᑐᖓ ᐊᖏᓗᐊᕋᓱᒋᖕᒪᖔᒃᑯ ᑖᔅᓱᒧᖓ ᓄᓇᓕᖕᓄᑦ, ᑭᓯᐊᓂ ᓄᓇᓕᕋᓛᕐᒥᐅᑕᐅᔪᒪᓚᐅᙱᑦᑐᖓ," ᐃᖅᑲᐅᒪᔪᖅ. ᐃᓪᓗᖓᑕ ᖃᓂᒋᔮᓂᒥᐅᑕᐅᔪᒪᓚᐅᕐᒥᔪᖅ.

ᑎᐅᕆ ᐱᓇᔪᓚᐅᖅᐳᖅ ᐊᕐᕌᒍᒧᑦ ᐊᑕᐅᓯᕐᒧᑦ ᐃᓕᓐᓂᐊᒐᒃᓴᒧᑦ ᑕᐃᒎᓯᓕᒃ ᐱᙳᐊᖅᑎᐅᓂᖅ, ᓄᖅᑲᑐᐃᓐᓇᖅᖢᓂᓗ ᑕᖅᑭᑦ ᖃᔅᓯᐊᕐᔪᐃᑦ ᐊᓂᒍᖅᑎᓪᓗᒋᑦ. ᐊᔾᔨᒌᙱᑦᑐᓂᒃ ᐃᖅᑲᓇᐃᔮᖃᓚᐅᖅᑐᖅ: ᐊᓐᓄᕌᓂᒃ ᓂᐅᕕᕐᕕᕋᓛᕐᒥ, ᐅᐊᔭᓕᕆᔨᐅᑉ ᑎᑎᕋᕐᕕᖓᓂ, ᐊᒡᓚᒡᕕᓕᕆᔨᓄᑦ ᐃᑲᔪᖅᑎᐅᓪᓗᓂ ᐃᑭᐊᖅᑭᕕᒃᑯᑦ ᐱᕙᓪᓕᐊᑎᑦᑎᔨᒃᑯᓐᓂ ᐊᒻᒪᐃᓛᒃ ᓇᓗᓇᐃᒃᑯᑕᐅᓪᓗᓂ. ᓅᓚᐅᖅᓯᒪᔪᖅ ᓚᓐᑕᓐᒧᑦ ᐃᓪᓗᖓᓗ ᓅᓚᐅᖅᓯᒪᔪᖅ, ᐃᖅᑲᓇᐃᔭᓚᐅᖅᑐᖅ ᖃᕋᓴᐅᔭᒃᑯᑦ ᑭᓯᐊᓂ ᐊᖏᕐᕋᖅᓯᓚᐅᖅᑐᖅ.

ᐊᖏᕐᕋᒧᑦ ᓅᓚᐅᖅᑐᖅ, ᐊᐅᓪᓚᕈᒪᓪᓗᓂ ᐊᓯᐊᓄᑦ ᑭᓯᐊᓂ ᓇᒡᓕᒍᓱᓕᓚᐅᖅᑐᖅ, ᐃᒡᓗᑖᖅᖢᓂ, ᑲᑎᑎᑕᐅᓪᓗᓂ ᓄᑕᕋᓛᖅᑖᖅᖢᓂᓗ. ᑎᐅᕆ ᐅᑎᕈᒪᓚᐅᙱᑦᑐᖅ ᑭᐳᒧᑦ ᐃᖅᑲᓇᐃᔮᒧᑦ ᐊᓈᓇᐅᓕᓵᖅᖢᓂ ᐊᓱᐃᓛᒃ ᐊᓯᖏᓐᓂᒃ ᐱᕕᒃᓴᓂᑦ ᕿᓂᓕᕐᖢᓂ. ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᓚᐅᖅᑐᖅ ᐅᖓᓯᒃᑐᒃᑯᑦ ᓇᓂᓯᓪᓗᓂᓗ ᓂᕿᓕᐅᕐᓂᕐᒧᑦ ᐊᔪᙱᓐᓂᕐᓂ ᐃᓕᓐᓂᐊᒐᒃᓴᒥ ᕗᐊᑦ ᕗᕌᓐᓯᔅᒥ.

ᑎᐅᕆ ᐃᓕᑦᑎᔪᒪᓚᐅᖅᑐᖅ ᖃᓄᖅ ᓂᕿᓕᐅᕆᐊᒃᓴᖅ. ᐃᕐᓂᖓ ᓱᓕ ᓄᑕᕋᐅᓚᐅᖅᐳᖅ ᑭᓯᐊᓂ ᐱᓕᕆᓚᐅᖅᐳᑦ ᐊᓂᒍᐃᔪᓐᓇᕐᓂᐊᕐᒪᑦ ᐅᐱᒋᔭᐅᔪᓂᒃ. ᑎᐅᕆ ᐊᖏᕐᕋᒥᓄᑦ ᓅᖦᖢᓂ ᐃᓚᒥᓄᑦ ᐊᒻᒪ ᓂᕆᔭᒃᓴᓂᒃ ᐱᔨᑦᑎᕋᖃᑦᑕᓕᖅᖢᓂ. ᑕᐃᒪᓕ, ᕿᒪᐃᓪᓗᓂ ᓂᕿᓕᐅᖅᑐᓂ ᐊᒻᒪᓗ ᐅᐃᒥᓂᒃ. ᓅᖦᖢᓂ ᐃᒪᖃᕈᓐᓃᓚᐅᖅᑐᖅ ᑲᔪᓯᔪᓐᓇᐃᓪᓕᓪᓗᓂ ᓇᖕᒥᓂᕐᒥᓂᒃ. ᐊᕐᕌᒍᒥᒃ ᐊᑕᐅᓯᕐᒥᒃ ᐃᓕᓐᓂᐊᖅᑎᑦᑎᓚᐅᖅᐳᖅ ᓂᖅᖠᐅᕆᐅᖅᓴᓂᕐᒥᒃ ᐃᓐᓇᕐᓄᑦ ᐃᓕᓐᓂᐊᖅᑎᓄᑦ ᑭᓯᐊᓂ ᑲᔪᓯᔪᒪᔪᓐᓃᖅᖢᓂ.

ᑕᐃᒪᓕ, ᑎᐅᕆ ᐊᖓᔪᖅᑳᒥᓂᒃ ᓅᓚᐅᖅᓯᒪᔪᖅ ᑕᓯᕐᒥ ᐊᓕᐊᓇᐃᒋᔭᖃᕐᓂᐊᕐᒪᑦ ᐊᒻᒪ ᓯᓚᒦᓐᓂᖅᓴᐅᖃᑦᑕᖁᓪᓗᒍ. ᓯᕗᓪᓕᖅᐹᒥ ᐊᒥᕐᓂᒃ ᕿᑐᒻᒪᒃᓴᐃᓂᕐᒧᑦ ᐃᓕᓐᓂᐊᓚᐅᖅᑐᖅ ᐊᒻᒪᓗ ᓄᖅᑲᓚᐅᖅᓯᒪᓇᓂ. ᑎᐅᕆ ᐅᔾᔨᕈᓱᓚᐅᖅᑐᖅ ᖃᓄᖅ ᐃᓄᐃᑦ ᓂᕐᔪᑎᑦ ᐊᒥᖏᓐᓂᒃ ᕿᒪᐃᖃᑦᑕᕋᔭᕐᒪᖔᑕ ᕙᓯᒥ ᐊᒻᒪ ᖃᔅᓯᓂᒃ ᑐᒃᑐᕙᖕᓂᒃ ᐊᑐᖃᑦᑕᙱᒻᒪᖔᑕ. ᐃᓕᑦᑎᓪᓗᓂ ᖃᓄᖅ ᓂᕿᓕᐅᕆᐊᒃᓴᖅ ᑐᒃᑐᕙᐅᑉ ᓂᕿᖓᓂᒃ ᐃᕐᓂᕐᒥᓂᒃ ᓴᓂᕌᒍᑦ ᖃᐅᔨᓴᕐᓗᓂᒋᑦ ᓴᓇᓯᒪᔭᖏᑦ.

ᐊᒥᕐᓂᒃ ᓴᓇᔭᖅᑐᖃᑦᑕᕐᒪᑦ ᐃᓚᒥᓂᒃ ᐱᖃᓐᓇᕆᔭᒥᓂᒡᓗ ᑭᓯᐊᓂ ᖃᐅᔨᓪᓗᓂ ᐃᓄᐃᑦ ᐊᖑᓇᓱᖃᑦᑕᖅᑐᑦ ᐊᒥᓕᕆᕙᙱᒻᒪᑕ ᓂᕐᔪᑎᓂᑦ ᐅᔾᔨᖅᓱᑦᑎᐊᖅᖢᑎᒃ. ᐃᓕᑦᑎᕙᓪᓕᐊᓂᖅᑕᖃᖅᑐᖅ ᐅᑎᖅᑎᑦᑎᓂᕐᒥᒃ ᓴᓇᙳᐊᖅᑕᐅᓚᐅᖅᓯᒪᙱᑦᑐᒥᒃ ᓄᓇᓕᖕᒥ ᐊᒻᒪᓗ ᐃᖕᒥᓄᑦ ᓅᖦᖢᓂ ᒥᖒᑎᒧᑦ ᐊᒥᕐᓄᑦ.

ᐃᓕᓐᓂᐊᓚᐅᑲᖕᓇᒃᑯᑦ, ᑲᑎᖃᑎᖃᕐᖢᓂ ᐃᓄᖕᓂᒃ ᖃᕋᓴᐅᔭᒃᑯᑦ, ᐊᒥᓕᕆᓪᓗᓂ, ᑕᕐᕆᔭᕐᖢᓂ Youtube−ᒥ, ᐃᓕᑦᑎᕐᔪᐊᕐᖢᓂ ᐱᓕᕆᐊᖃᕐᓂᕐᒥᒃ ᐊᒥᕐᓂᒃ. ᓇᖕᒥᓂᖅ ᐃᓄᖕᓄᑦ ᑐᓴᐅᒪᔾᔪᑎᖏᑦ ᐱᕈᖅᓯᒪᔪᑦ ᐃᓄᖕᓄᑦ ᐃᓕᑦᑎᔪᒪᔪᓄᑦ ᐊᓱᐃᓛᒃ ᓇᓂᓯᓪᓗᓂ ᑭᒡᓕᖏᓐᓂ ᑭᓱᓂᒃ ᐃᓕᓴᐃᔪᒪᖕᒪᖔᑦ.

ᑎᐅᕆ ᐊᖏᕐᕋᖅ ᐃᓕᓐᓂᐊᕕᒃᑯᑦ ᐃᕐᓂᖓ ᐊᔾᔨᒌᖏᑦᑐᓂᒃ ᐱᔭᕆᐊᖃᕐᒪᑦ, ᐊᓃᕈᓐᓇᖅᑎᑦᑎᓪᓗᓂ, ᐱᕕᖃᖅᑎᑦᑎᓪᓗᓂ ᐊᒥᕐᓂᒃ ᐊᑕᐅᑦᑎᒃᑯᑦ ᓂᕿᓕᐅᕐᓗᓂᓗ ᓂᕐᔪᑎᓂᑦ ᐊᔪᖅᓯᓯᒪᔪᓂᒃ ᓇᓂᔭᖏᓐᓂᒡᓘᓐᓃᑦ. ᐃᓕᓐᓂᐊᕐᒥᔪᑦ ᖃᓄᖅ ᑲᑎᖅᓱᐃᓂᕐᒥᒃ ᓂᕿᓂᒃ ᐊᕐᕌᒍᑉ ᐃᓗᐊᓂ, ᒪᑦᑎᑦᑕᐅᑎᓂᒃ ᐊᒻᒪᓗ ᐅᐊᔭᓂᒃ ᐊᒻᒪᓗ ᐊᒥᕐᓂᒃ.

ᐅᖃᐅᔾᔨᓂᖓ ᑭᓇᑐᐃᓐᓇᑦᑎᐊᒧᑦ ᐃᓱᒪᔪᒧᑦ ᐊᐅᓪᓚᕈᒪᓗᓂ ᓄᓇᒥᓂᒃ ᐃᓕᑦᑎᔪᒪᓗᓂ ᑲᓇᑕᐅᑉ ᓯᓚᑖᓄᑦ ᐊᐅᓪᓚᕐᓂᕐᒧᓪᓘᓐᓃᑦ ᐅᓇᐅᕗᖅ: ᐅᐸᒃᓗᒍ. ᓇᓗᓇᐃᖅᓯᖅᑲᐅᒻᒪᑦ ᑕᒪᓐᓇ ᐱᐅᓗᐊᔾᔮᕙᓪᓚᐃᖏᒻᒪᑦ. ᑎᐅᕆ ᓅᓚᐅᖅᓯᒪᙱᑦᑐᖅ ᓇᒧᑐᐃᓐᓇᖅ ᐃᓪᓗᖃᕋᓂ, ᐱᔭᕇᓚᐅᕋᓗᐊᖅᑎᓪᓗᒍ 7-ᓂᒃ ᐱᓇᓱᐊᕈᓯᕐᓂᒃ ᐃᖅᑲᓇᐃᔭᕐᓂᕐᒥᒃ ᕼᐊᕙᐃᒥ.

ᕿᑭᖅᑕᕐᔪᐊᒥ, ᑐᙵᓱᒃᑎᑦᑎᔨᖏᑦ ᐱᓇᓱᐊᕈᓯᑕᒫᑦ ᓂᕆᔭᒃᓴᓂᒃ ᓂᐅᕕᐊᒃᓴᖃᖃᑦᑕᓚᐅᖅᐳᑦ ᐱᕙᒌᔭᖃᑦᑕᓚᐅᖅᑕᖏᓐᓂᒃ ᐊᒻᒪ ᓴᓇᕙᒃᑕᒥᓂᒃ, ᐅᓪᓗᓄᑦ ᐱᖓᓱᓄᑦ ᓄᖅᑲᖓᑐᐃᓐᓇᖅᖢᑎᒃ. ᓂᕆᑦᑎᐊᖅᓯᒪᔪᑦ ᓂᑲᓇᖅᑐᓄᑦ, ᓇᒡᓕᒍᓱᒃᑐᓄᑦ ᐃᓄᖕᓄᑦ, ᑎᐅᕆ ᐃᓕᑦᑎᓪᓗᓂ ᐃᒐᓂᕐᒥᒃ ᐊᕿᕐᕈᔪᐊᕐᒥᒃ. ᑎᐅᕆ ᕿᒥᕐᕈᖁᔨᕗᖅ ᐃᖅᑲᓇᐃᔮᒥ ᑭᐳᖃᑎᖃᕐᓂᕐᒥᒃ ᓄᒃᑕᕐᓂᐅᓗᓂ, ᑭᓯᐊᓂ ᖃᐅᔨᒪᓪᓗᓂ ᐊᑦᑕᕐᓇᕈᓐᓇᕐᓂᖓᓂᒃ ᐅᖓᓯᒋᒐᓗᐊᕐᓗᓂᐅᒃ ᐊᒻᒪ ᐋᓪᓚᐅᔪᑦ ᑲᑎᒪᕙᒡᓗᑎᒃ. ᐳᓚᕋᕐᓃᑦ ᓲᕐᓗ ᑖᒃᑯᑎᑐᓇᖅ ᐋᖅᑭᒃᓯᒪᓪᓗᑎᒃ ᑎᐅᕆ ᑭᓇᐅᖕᒪᖔᑦ ᖃᓄᕐᓗ ᐊᒃᑐᐊᓂᖃᕐᒪᖔᑦ ᐃᓄᖕᓄᑦ ᓄᓇᕐᔪᐊᒥ.

ᐃᓕᖅᑯᓯᑐᖃᕐᓄᑦ ᐃᓕᓴᐃᔨᙳᕋᓱᒃᑎᓪᓗᒍ, ᑎᐅᕆ ᐃᓕᑦᑎᓚᐅᖅᐳᖅ ᖃᓄᖅ ᐃᒻᒥᓂᒃ ᐅᒃᐱᕆᔪᓐᓇᕐᓂᕐᒥᓂᒃ ᖃᐅᔨᒪᔪᓐᓇᖅᓯᓪᓗᓂ ᖃᖓ ᐱᓱᒍᓐᓇᕐᓂᕐᒥᒃ ᑭᓱᑐᐃᓐᓇᒥᒃ ᒪᓕᒍᓐᓃᖅᑐᒥᒃ. "ᑭᓇᑐᐃᓐᓇᖅ ᑕᐃᒪᐃᓕᐅᖁᔨᖕᒪᑦ ᐊᒻᒪ ᓲᖃᐃᒻᒪ ᐱᑦᑎᐊᕋᕕᑦ ᑐᑭᖃᙱᑦᑐᖅ ᑕᐃᒪᐃᓕᐅᕆᐊᖃᕐᓂᕐᓂᒃ," ᓇᓗᓇᐃᖅᓯᓪᓗᓂ. ᐊᒥᓕᕆᓪᓗᓂ, ᐃᓅᓯᖓᓂ ᐱᐅᓛᖑᕗᖅ ᐊᒻᒪ ᑲᔪᓯᑦᑎᐊᖅᖢᓂ.

ᐅᑎᖅᑎᑦᑎᓂᖅ ᓂᕿᓄᑦ ᐊᑐᕋᓲᑎᓂᒃ ᐃᓕᖅᑯᓯᑐᖃᖏᓐᓂᒃᓗ ᐃᓕᓴᐃᔾᔪᑎᖃᓚᐅᙱᑦᑐᖅ ᐱᓪᓗᒍ ᐊᒃᑑᑎᔪᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ ᐊᒻᒪ ᖃᓪᓗᓈᑦ ᓄᓇᑐᖃᕆᙱᑕᖏᓐᓄᑦ ᓴᙱᓂᖃᖅᑎᑦᑎᓪᓗᓂ. ᑲᑎᖃᑎᖃᕐᓂᖅ ᒪᒃᑯᒃᑐᓂᑦ ᑲᓇᑕᓕᒫᒥ, ᐱᓕᕆᐊᖃᕈᓐᓇᖅᑐᖅ ᓄᓇᖃᖅᑳᖅᓯᒪᔪᑦ ᖃᐅᔨᒪᓂᖏᓐᓂ ᓅᑎᑦᑎᓂᕐᓂ ᐊᑐᖅᑎᑦᑎᓗᓂᓗ ᐊᑐᕋᓲᑎᓄᑦ ᐊᑐᖃᑦᑕᖅᑐᓄᑦ ᑕᐃᒪᙵᑦ ᐃᖅᑲᐅᒪᓇᖅᑐᒥᒃ. ᑲᓃᓇ ᑎᐅᕆ ᐱᕕᖃᓚᐅᖅᑐᖅ ᐃᒻᒥᓂᒃ ᑕᓯᓯᔪᓐᓇᕐᖢᓂ ᐅᐱᒋᔭᒥᓄᑦ, ᓲᕐᓗ ᐊᒥᖏᑦ ᐱᓕᕆᖃᑦᑕᖅᑕᖏᑦ ᑲᒪᑦᑎᐊᕐᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑎᑎᕋᓚᐅᕐᒪᑦ ᑖᔅᓱᒥᖓ.