ᕇᑦ ᑰᑐᕆ ᑮᓇᐅᔭᓕᕆᓂᕐᒧᑦ ᕿᒥᕐᕈᔨᐅᔪᖅ ᕈᐃᐅᓪ ᐹᓐᒃ ᑮᓇᐅᔭᒃᑯᕕᖓᓂ ᑐᕌᓐᑐ, ᐋᓐᑎᐅᕆᐅᒥ, ᐃᖅᑲᓇᐃᔭᖅᐸᒃᖢᓂ ᑮᓇᐅᔭᓕᕆᓂᕐᒧᑦ ᑎᑎᖅᑲᓂᒃ ᑐᓂᓯᕙᒃᖢᓂ ᐅᖃᐅᓯᒃᓴᓂᒃ ᐊᒻᒪ ᑐᓴᖅᑕᐅᑎᑦᑎᔾᔪᑎᓂᒃ ᕈᐃᐅᓪ ᐹᓐᒃ ᓇᖕᒥᓂᖃᖃᑕᐅᔪᓄᑦ. ᐹᕆᒥᙶᖅᑐᖅ, ᕇᑦ ᐃᖅᑲᓇᐃᔭᖅᓯᒪᔪᖅ ᑮᓇᐅᔭᓕᕆᓂᕐᒥᑦ ᐊᕐᕌᒍᓄᑦ ᖃᔅᓯᐊᕐᔪᖕᓄᑦ, ᐱᒋᐊᕐᖢᓂ ᐱᓕᕆᕝᕕᖕᒥ ᐅᖃᐅᔾᔨᒋᐊᖅᑎᐅᓪᓗᓂ, ᐊᒻᒪᐃᓛᒃ ᑮᓇᐅᔭᓕᕆᓂᕐᒧᑦ ᐅᖃᐅᔾᔨᒋᐊᖅᑎᐅᓪᓗᓂ, ᐱᓕᕆᖃᑎᖃᕐᖢᓂ ᐃᓄᖕᓂᒃ ᐱᑎᓪᓗᒋᑦ ᑮᓇᐅᔭᓕᕆᓂᕐᒧᑦ ᐱᔭᕆᐊᓕᖏᑦ ᐱᑎᑦᑎᓗᑎᒃᓗ ᐱᔨᑦᑎᕋᐅᑎᓂᒃ ᐱᖁᑎᓂᒃᓗ ᓲᕐᓗ ᑮᓇᐅᔭᓕᐅᕋᓲᑎᑦ, ᐃᒡᓗᖁᑎᑖᕋᓱᖕᓂᕐᒧᑦ ᓄᓇᖁᑎᑖᕋᓱᖕᓂᕐᒧᑦ ᐊᑭᓕᒃᓴᖓ, ᐊᑭᓕᒃᓴᓂᒍᓐᓇᐅᑎᑦ ᐊᐅᒃᑕᔫᑦ, ᖃᐅᑕᒫᓪᓗ ᑮᓇᐅᔭᒃᑯᕕᓕᕆᓂᖅ.

ᕇᑦ ᑮᓇᐅᔭᓕᕆᓂᕐᒧᑦ ᐱᓕᕆᔪᓐᓇᖅᓯᓚᐅᖅᑐᖅ ᓈᓴᐅᓯᕆᔪᒪᓂᖓᒍᑦ "ᓈᓴᐅᓯᕆᑦᑎᐊᓚᐅᖅᑐᖓ ᒪᒃᑯᒃᑎᓪᓗᖓ, ᐊᒻᒪ ᑕᕐᕆᔭᐅᓯᐊᑦ ᑕᓚᕖᓴᒃᑯᓪᓗ ᐊᔭᐅᖅᑐᖅᑕᐅᓪᓗᖓ ᑮᓇᐅᔭᓕᕆᓂᕐᒧᑦ. ᑕᑯᕋᑖᑦᑎᐊᕋᒪ ᐃᓄᓐᓂᒃ, ᐊᓐᓄᕌᖅᓯᒪᐃᓐᓇᓚᐅᕐᒪᑕ ᓂᐅ ᔪᐊᒃᒥ ᐊᒻᒪᓗ ᑕᐃᒪᐃᑦᑐᒐᓚᓐᓂᒃ. ᖃᐅᔾᔨᑎᖃᓚᐅᙱᓚᖓ ᑮᓇᐅᔭᓕᕆᓂᕐᒥᑦ ᐅᕝᕙᓘᓐᓃᑦ ᑭᓱᑐᐃᓐᓇᕐᒥᑦ ᐱᕈᖅᐸᓪᓕᐊᑎᓪᓗᖓ. ᖃᐅᔨᒪᓗᐊᓚᐅᖏᑦᑐᖓ, ᑕᑯᓚᐅᖅᑕᓐᓂ ᑕᕐᕆᔭᕐᓂ ᐊᒻᒪᓗ ᑕᓚᕖᓴᓂ ᐊᒻᒪᓗ ᑐᓴᕈᒥᓇᖅᑐᐹᓘᔮᖅᑐᓂ ᐊᒻᒪᓗ ᖁᕕᐊᓇᖅᑑᓪᓗᓂ ᐃᓅᓯᖅ. ᐃᒪᓐᓇᐅᓚᐅᖅᑐᖓᓗ, 'ᖃᓄᐃᓕᐅᕈᓐᓇᖅᐳᖓ ᓈᓴᐅᓯᕆᓂᕐᒥᒃ?' ᑕᐃᒪᓐᓇᓗ ᐊᔪᖅᓯᐅᖅᑲᓕᓚᐅᖅᑐᖓ ᐊᔪᖅᓯᐅᖅᑲᓪᓗᖓ, ᑕᐃᒪᓐᓇᓗ ᒫᓐᓇᒧᑦ ᑎᑭᖦᖢᒍ."

ᐊᒻᒪᓗᑦᑕᐅᖅ ᐃᖅᑲᓇᐃᔮᖓᓄᑦ ᕈᐃᐅᓪ ᐹᓐᒃᒥᑦ, ᕇᑦ ᐱᓕᕆᕙᒃᐳᖅ ᓄᓇᖃᖅᑳᖅᓯᒪᔪᓄᑦ ᐃᔾᔪᐊᒐᒃᓴᑦᑎᐊᕙᐅᓪᓗᓂ TakingITGlobal−ᑯᓐᓄᑦ, ᐅᖃᐅᔾᔪᐃᕙᒃᖢᓂ ᐃᑲᔪᖅᑐᐃᕙᒃᖢᓂᓗ ᓄᓇᖃᖅᑳᖅᓯᒪᔪᓂᑦ ᒪᒃᑯᒃᑐᓂᑦ ᐃᓕᓐᓂᐊᒃᑲᓐᓂᕈᒪᔪᓂᑦ ᐃᓱᒪᒋᔭᖃᖅᑐᓂᒡᓘᓐᓃᑦ ᐃᓕᓐᓂᐊᒃᑲᓐᓂᖕᓂᒃᓴᒥᑦ. ᕇᑦ ᓇᖕᒥᓂᖅ ᐱᕚᓪᓕᕈᑎᖃᓚᐅᖅᑐᖅ ᓄᓇᖃᖅᑳᖅᓯᒪᔪᓄᑦ ᐱᓕᒻᒪᒃᓴᓂᕐᒥ ᐱᓕᕆᐊᒃᓴᒥ ᕈᐃᐅᓪ ᐹᓐᒃᒥ, ᐃᑲᔪᕐᖢᓂ ᐃᓕᓐᓂᐊᕐᓂᖓᓂ ᓯᕗᓕᕐᖢᓂᐅᒡᓗ ᒫᓐᓇ ᐃᖅᑲᓇᐃᔮᖓᓄᑦ.

"ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᓯᒋᐊᓚᐅᖅᑐᖓ ᓯᓚᑦᑐᖅᓴᕐᕕᒡᔪᐊᕐᒧᐊᕆᐊᖃᖅᑎᓪᓗᖓ. ᐊᒻᒪᓗ ᓯᓚᑦᑐᓴᕐᕕᕐᔪᐊᕐᒨᕋᒪ, ᕈᐃᐅᓪ ᐹᓐᒃ ᓄᓇᖃᖅᑳᖅᓯᒪᔪᓂᒃ ᐱᕙᓪᓕᐊᑎᑦᑎᓂᖃᓚᐅᖅᑐᖅ. ᐱᓇᔪᓚᐅᖅᑐᖓ ᓯᕗᓪᓕᖅᐹᒥ ᐊᕐᕌᒍᒥ ᓯᓚᑦᑐᖅᓴᕐᕕᖕᒥ, ᐊᒻᒪ ᓂᑭᑦᑖᖅᖢᑎᒃ ᐃᓕᓐᓂᐊᖅᐸᒃᖢᑎᒃ ᑕᒪᐃᓐᓂᒃ ᐱᓕᕆᕝᕕᖕᒥ. ᐱᒋᐊᕐᓗᑎᑦ ᐅᖃᐅᔾᔨᔨᐅᓗᑎᑦ. ᑕᐃᒫᒃ ᐃᓯᒐᒐ ᐱᖅᑲᐅᕙᕋ ᐹᒥ. ᐊᐅᔭᒃᑯᑦ ᐃᖅᑲᓇᐃᔭᖅᓯᓐᓇᖅᖢᑎᒃ ᐃᓕᓐᓂᐊᖅᑐᑦ. ᐊᒻᒪᓗ ᐊᐅᔭᑕᒫᑦ, ᐊᓯᐊᓂᒃ ᐱᓕᕆᐊᖃᓕᓲᖑᓪᓗᓯ. ᑮᓇᐅᔭᒃᑯᕕᖕᓂ ᓴᖅᑭᔮᕐᕕᐅᕈᓘᔭᖃᑦᑕᓚᐅᖅᑐᖓ, ᑕᐃᒪᐃᓐᓂᖓᓄᑦ ᖃᐅᔨᒪᑦᑎᐊᖅᐳᖓ ᐊᔾᔨᒌᙱᑦᑐᓂᒃ ᑮᓇᐅᔭᒃᑯᕕᖕᓂ."

"ᐃᖅᑲᓇᐃᔭᕆᐅᔅᓴᔪᒻᒪᕆᐅᓚᐅᖅᑐᖓ. ᐅᖃᖃᑎᒋᑐᐃᓐᓇᖅᑐᒋᑦ ᐃᓄᐃᑦ, ᐃᒃᓯᕚᖃᑎᒋᓪᓗᒋᑦ ᐊᒥᓱᑦ ᐃᓄᐃᑦ, ᑐᓵᓪᓗᒋᑦ ᐊᒻᒪᓗ ᖃᐅᔨᒪᓂᖏᑎᒍᑦ ᐊᒻᒪᓗ ᓴᙲᓕᖅᑎᓐᓇᓱᐊᖅᑐᒋᑦ, ᑭᓯᐊᓂᓕ (ᐃᓕᓐᓂᐊᕐᓂᕋ) ᐋᖅᑭᒃᓯᒪᓂᖃᓚᐅᕐᒥᔪᖅ ᐃᓕᓐᓂᐊᕆᐊᖃᑦᑕᓚᐅᕋᒪ ᑮᓇᐅᔭᓕᕆᓂᕐᒧᑦ ᓈᓴᐅᓯᕆᓂᕐᒧᑦ. ᑕᒪᓐᓇ ᐱᔭᕆᐊᖃᙱᑦᑐᖅ, ᐅᖃᕋᔭᖅᑐᖓ, ᐃᖅᑲᓇᐃᔭᓯᒋᐊᕐᓗᖓ ᑮᓇᐅᔭᒃᑯᕕᒻᒥ ᐊᒻᒪᓗ ᐱᕈᕐᓗᑎᒃ ᑮᓇᐅᔭᒃᑯᕕᒻᒥ. ᐃᓕᑦᑎᔪᓐᓇᑦᑎᐊᖅᑐᑎᑦ ᐃᓯᑐᐃᓐᓇᕐᓗᑎᑦ, ᑭᓯᐊᓂ ᐃᓕᓐᓂᐊᖅᑕᒃᑲ ᑮᓇᐅᔭᓕᕆᓃᓚᐅᖅᑐᑦ ᓈᓴᐅᓯᕆᓂᕐᒧᓪᓗ."

ᕇᑦ ᑲᑎᖦᖢᒋᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᖅᓯᒪᔪᑦ, ᐃᖅᑲᓇᐃᔭᖅᓯᓐᓇᖅᖢᑎᒃ ᐱᓕᒻᒪᒃᓴᖅᑐᑦ, ᐃᑲᔪᖅᓱᖅᑕᐅᓪᓗᑎᒡᓗ ᕈᐃᐅᓪ ᐹᓐᒃ−ᑯᓐᓂ ᐊᔪᕐᓇᕈᓐᓃᖅᑎᖦᖢᒍ ᑖᔅᓱᒥᖓ ᐃᖅᑲᓇᐃᔮᖅᑖᕈᓐᓇᖅᓯᓪᓗᓂ. ᑭᓯᐊᓂ ᓱᓕ ᐊᒃᓱᕈᕐᓇᖅᑐᒃᑰᖃᑦᑕᓚᐅᖅᐳᖅ. "ᐅᖃᕋᔭᖅᑐᖓ ᒪᕐᕉᖕᓂᒃ ᑐᓗᖅᑕᕈᑎᑕᖃᕐᓂᖓᓂᒃ ᐊᖅᑯᑎᓐᓂ. ᓯᕗᓪᓕᖅ ᐃᖅᑲᓇᐃᔭᕋᓱᐊᓚᐅᖅᑐᖅ ᐃᓕᓐᓂᐊᕆᐊᖅᓯᒪᓪᓗᓂ. ᐊᐅᔭᒃᑯᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᖃᓚᐅᖅᑐᖅ, ᑭᓯᐊᓂ ᐃᖅᑲᓇᐃᔭᓕᕆᓪᓗᖓ ᐃᓕᓐᓂᐊᕆᐊᖅᖢᖓ ᐱᓕᕆᔨᒻᒪᕆᐅᓂᓐᓄᑦ. ᐱᒡᒐᓇᖅᑐᒻᒪᕆᐅᓚᐅᖅᐳᖅ ᐱᓪᓗᒍ ᐱᙳᐊᖃᑕᐅᓚᐅᕋᒪ ᐊᑯᓂᒻᒪᕆᒃ ᓯᓚᑦᑐᓴᕐᕕᕐᔪᐊᕐᒥᑦ, ᐃᓕᓐᓂᐊᕆᐊᖅᐸᑦᑐᖓ ᐅᓪᓗᓕᒫᖅ ᐃᖅᑲᓇᐃᔭᕆᐊᖅᑐᖓ 25-ᓂᒃ ᐅᖓᑖᓄᓪᓘᓐᓃᑦ ᐃᑲᕐᕋᓂᒃ ᐱᓇᓱᐊᕈᓯᕐᒥ. ᑕᒪᓐᓇ ᐊᕝᕕᐊᕈᑎᒻᒪᕆᐅᕙᓚᐅᖅᐳᖅ ᐃᓛᓐᓂᒃᑯᑦ. ᓄᖅᑲᕆᐊᖃᓚᐅᖅᑐᖓ ᐊᓇᐅᓕᒑᖅᑎᓂᑦ ᐊᒻᒪᓗ ᑭᖑᓂᐊᒍᑦ ᑲᑎᒃᑲᓐᓂᓕᓚᐅᖅᑐᖓ ᐃᓱᒪᓕᖅᑎᓪᓗᖓ ᖃᐅᔨᔪᐃᓐᓇᐅᓇᓱᒋᓕᖅᑎᓪᓗᖓ. ᐃᓕᓐᓂᐊᖃᑎᒃᑲ ᒥᓱᖃᑦᑕᓚᐅᕐᖓᑕ ᐊᒻᒪᓗ ᓯᔾᔭᕆᐊᖃᑦᑕᖅᑐᖓ ᐊᑕᐅᓯᐊᖅ, ᐊᑯᓂᐅᓂᖓᓄᑦ ᐊᐅᓚᑦᑎᑦᑎᐊᓂᕐᒧᑦ. ᓯᕿᓐᓂᖅᑐᐃᓐᓇᐅᓚᐅᙱᑦᑐᖅ."

"ᐊᓯᐊᑦᑕᐅᖅ ᑐᓗᖅᑕᕈᑎ (ᐱᔅᓲᔭᓚᐅᖅᑐᖅ) ᐊᑯᓂᐅᓂᕐᓴᖅ ᐊᓂᒍᐃᓇᓱᒃᑎᓪᓗᖓ. ᒪᕐᕈᑲᓐᓃᓐᓂᒃ ᐊᕐᕌᒎᓐᓂᒃ ᐱᔭᕇᕋᓱᓚᐅᖅᑐᖓ ᐸᐃᑉᐹᖁᑎᓐᓂᒃ ᐱᔾᔪᑎᒋᓪᓗᒍ ᐃᖅᑲᓇᐃᔭᕐᓂᓕᒫᓐᓄᑦ ᐊᒻᒪᓗ ᐱᙳᐊᕐᓂᐅᔪᓄᑦ. ᐊᒻᒪᓗ ᖃᓄᑎᒋ ᐱᒡᒐᓇᙱᓂᖅᐸᐅᓚᐅᓐᖏᓚᖅ. ᓯᓚᑦᑐᓴᕐᕕᖕᒧᐊᕋᒪ ᐊᔪᕐᓇᖅᓯᕙᓪᓕᐊᑐᐃᓐᓇᓚᐅᖅᑐᖅ ᐃᓕᓐᓂᐊᕐᕕᐊᓗᖕᒥᑦ. ᖁᐊᖅᓵᓇᒻᒪᕆᓚᐅᖅᑐᖅ ᐅᕙᓐᓄᑦ ᑎᑭᒃᑲᒪ. ᖃᐅᔨᓇᓱᒋᐊᖃᓪᓚᕆᓚᐅᖅᑐᖓ ᖃᓄᖅ ᐱᕕᒃᓴᕋ ᐊᐅᓚᑦᑐᓐᓇᕐᒪᖔᒃᑯ."

ᑕᐅᕗᙵᖅᐸᓪᓕᐊᓪᓗᓂ, ᕇᑦ ᑕᑎᖃᕈᓐᓇᓚᐅᖅᑐᖅ ᐃᑲᔪᖅᑕᐅᓪᓗᓂ ᐱᖃᓐᓇᕆᔭᖏᓐᓄᑦ ᖃᑕᙳᑎᖏᓐᓄᓪᓗ, ᐃᓚᐅᓪᓗᓂ ᐊᓈᓇᖓ ᐊᖏᕐᕋᖓᓂ, ᓇᔭᖓᓗ, ᓯᓚᑦᑐᖅᓴᕐᕕᒃᔪᐊᓕᐊᖅᓯᒪᔪᖅ ᐅᐊᑐᓘᒧᑦ ᐊᕐᕌᒍᓄᑦ ᖃᔅᓯᐊᕐᔪᖕᓄᑦ ᓯᕗᓂᐊᒍ. ᑖᓐᓇ ᐃᑲᔪᖅᓱᐃᓂᖅ ᐱᒻᒪᕆᐅᓚᐅᖅᑐᖅ ᐃᓱᒪᒋᓪᓗᒍ, ᐅᓄᖅᑐᑦ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ, ᕇᑦ ᐊᖏᕐᕋᐅᔾᔨᔭᕆᐊᖃᓚᐅᖅᑐᖅ ᐃᓕᓐᓂᐊᒃᑲᓐᓂᕆᐊᖅᑐᕐᓗᓂ, ᑖᔅᓱᒥᖓ ᐅᖃᐅᔾᔨᒋᐊᕈᑎᒥᒃ ᐱᑎᑦᑎᓪᓗᓂ: "ᐃᒪᓐᓇ ᐅᖃᕋᔭᖅᑐᖓ ᐱᖃᓐᓇᕆᔭᖅᑖᕋᓱᒃᓗᑎᑦ, ᓲᖃᐃᒻᒪ ᐱᔭᕆᐊᖃᑐᐃᓐᓇᕋᕕᑦ ᐊᓂᒍᐃᓗᑎᑦ ᓄᑖᒥᒃ ᐃᓂᒦᒃᑯᕕᑦ. ᐅᖁᒪᐃᒃᓴᓕᑐᐃᓐᓇᕆᐊᖃᕋᕕᑦ. ᐊᖏᕐᕋᖅᓯᒪᑐᐃᓐᓇᕆᐊᖃᖅᑐᑎᑦ, ᓄᓇᓯ ᐱᑕᖃᙱᑎᓪᓗᒍ ᖃᑕᙳᑎᑎᓪᓗ. ᒪᑐᐃᖅᓯᐊᕐᔪᒍᓐᓇᕈᕕᑦ ᐊᑕᐅᓯᕐᒥᒃ ᐱᖃᓐᓇᕆᔭᖅᑖᕐᓗᑎᑦ, ᑕᐃᒪᓐᓇ ᐅᖃᓪᓚᖃᑎᖃᕈᓐᓇᖅᑐᑎᑦ."

"ᒪᑐᐃᖓᑐᐃᓐᓇᕐᓗᑎᑦ ᓄᑖᓄᑦ, ᐱᕙᒌᔭᐅᑎᖃᑐᐃᓐᓇᕆᐊᖃᕋᕕᑦ ᑭᓱᒥᑭᐊᖅ. ᐱᖃᑎᒋᔭᒃᑲ, ᐸᕐᓇᒍᑎᖃᓚᐅᖅᑐᖓ. ᐊᖏᕐᕋᒧᑦ ᓅᓪᓗᓂ, ᐃᓕᓐᓂᐊᕆᐊᕐᓗᓂ, ᐱᙳᐊᕆᐊᖅᑐᕐᓗᓂ, ᐃᖅᑲᓇᐃᔮᖅᑖᕐᓗᓂ, ᐱᓕᕆᔭᐃᓐᓇᕆᓗᒍ. ᑭᓯᐊᓂ ᑭᓱᑐᐃᓐᓇᐃᑦ ᓈᒻᒪᒍᓐᓃᕐᒪᑕ, ᓱᓕᕚ? ᑕᒪᒃᑯᐊ ᐃᖏᕐᕋᑐᐃᓐᓇᖃᑦᑕᕐᒪᑕ ᐊᒻᒪᓗ ᑕᒪᓐᓇ ᐱᔭᕆᐊᑐᔪᓐᓇᖅᑐᓂ. ᒪᑐᐃᙶᑐᐃᓐᓇᕆᑦ. ᖃᐅᔨᒪᓗᑎᑦ ᑭᓱᑐᐃᓐᓇᐃᑦ ᐃᖏᕐᕋᔪᓐᓃᕈᓐᓇᕐᒪᑕ, ᑭᓯᐊᓂ ᐱᐅᓛᒃᑰᖅᑎᑐᐃᓐᓇᕐᓗᒋᑦ, ᓲᖃᐃᒻᒪ ᐊᔪᕐᓇᕐᒪᑦ ᐋᖅᑭᒃᓯᔭᕆᐊᒃᓴᖅ ᐱᕙᒌᔭᐅᑎᒥᒃ ᑭᓱᓕᒫᓄᑦ ᐃᓅᓯᕐᒥ. ᐱᓗᐊᖅᑐᒥᓪᓗ ᓄᓇᓯᓐᓂᑦ ᐊᐅᓪᓚᖅᓯᒪᑎᓪᓗᑎᑦ, ᒪᑐᐃᖓᔪᒪᑐᐃᓐᓇᖅᑐᑎᑦ ᓄᑖᓄᑦ ᐊᒻᒪ ᐊᑦᑎᓂᖅᓴᐅᓗᑎᑦ ᑎᑭᒐᐃᒻᒪᑕ ᐊᒻᒪ ᐊᔭᐅᖅᑕᐅᓇᓱᓪᓗᑎᑦ."

ᕇᑦ ᐱᓕᕆᓂᖓ TakingITGlobal−ᑯᓐᓂᙶᖅᐳᖅ ᐃᑲᔪᕈᒪᑦᑎᐊᖅᖢᓂ ᐊᓯᒥᓂᒃ, ᐱᐅᓪᓗᓂ ᐊᖓᔪᖅᑳᒥᓄᑦ ᐱᑖᕆᕙᒃᑕᖓ. "ᖁᕕᐊᓱᑦᑎᐊᖅᑐᖓ ᐃᓄᖕᓂᒃ ᐃᑲᔪᕋᓱᒃᖢᖓ. ᐊᑭᓕᖅᓱᖅᑕᐅᓇᖓ ᐱᓕᕆᓲᖑᔪᖓ ᓄᓇᑦᑎᓐᓂ. ᐊᑭᓕᖅᓱᖅᑕᐅᓇᖓ ᐃᑲᔪᕋᓱᖃᑦᑕᖅᑐᖓ ᐱᓇᓱᐊᕈᓰᒃ ᒪᕐᕉᒃ ᐊᓂᒍᕋᐃᒻᒪᑎᒃ, ᐊᑦᔨᑐᐃᓐᓇᕆᒐᓗᐊᖅᐸᒍ, ᐃᑲᔪᕋᓱᒃᑲᓗᐊᕋᒪ. ᑕᒪᓐᓇ ᑐᓱᒋᔭᐅᓕᖃᑦᑕᕋᒪ ᐊᖓᔪᖅᑳᓐᓄᑦ. ᐋᓐᓂᐊᓯᐅᖅᑎᐅᔪᑦ. ᑕᐃᒪᓕ ᒫᓐᓇᐅᔪᖅ, ᓇᓗᓇᕋᓗᐊᖅᑎᓪᓗᒍ, ᓱᓕ ᐃᖅᑲᓇᐃᔭᕐᓂᐊᖅᑐᑦ ᖃᐅᑕᒫᑦ ᐊᒻᒪᓗ ᐃᑲᔪᕋᓱᐊᕐᓗᑎᒃ, ᐱᔪᓐᓇᕐᓂᓕᒫᒥᓂᒃ ᐱᓇᓱᐊᕐᓗᑎᒃ. ᐊᒻᒪᓗ ᐱᓚᐅᖅᑐᒃᓴᐅᕗᖓ ᑖᒃᑯᓇᙵᑦ, ᐃᑲᔪᕈᓐᓇᕈᕕᑦ ᐊᒻᒪᓗ ᐃᑲᔪᕈᓐᓇᕈᕕᑦ, ᐅᖃᕋᔭᖅᑐᖓ ᐃᑲᔪᕈᓐᓇᖅᑐᑎᑦ. ᑕᐃᒪᓐᓇᓗ ᐱᓕᕆᕗᖓ."

ᑲᔪᓯᑦᑎᐊᖅᓯᒪᒐᓗᐊᖅᑎᓪᓗᒍ ᑮᓇᐅᔭᓕᕆᓂᕐᒧᑦ, ᕇᑦ ᐃᖅᑲᐅᒪᔪᖅ ᓇᓗᓇᐃᓐᓇᖃᑦᑕᓚᐅᕐᒪᑦ ᑲᔪᓯᑦᑎᐊᕐᓂᐊᕐᓂᖓᓂᒃ. "ᐅᖃᐅᔾᔨᔪᓐᓇᕈᒪ ᒪᒃᑯᖕᓂᖅᓴᖁᑎᓐᓂᒃ ᓇᖕᒥᓂᖅ, (it's) ᐊᓂᒍᕐᓂᐊᕋᕕᐅᒃ. ᐊᒥᓱᐊᖅᑎᖅᑐᖓ ᐃᖅᑲᓇᐃᔭᕆᐊᖅᐸᒃᑲᒪ ᐊᒻᒪᓗ ᖁᕕᐊᓱᒍᓐᓃᕋᔭᖅᑐᖓ. ᐃᒻᒪᖃ ᖃᐅᔨᓴᖅᑕᐅᓐᓂᖏᓐᓇᒪ, ᐊᓪᓛᑦ. ᐃᒻᒪᖃ ᑖᓐᓇ ᓄᑖᖅ ᐃᖅᑲᓇᐃᔮᖅ ᐱᓐᓂᖏᓐᓇᒃᑯ ᐃᖅᑲᓇᐃᔮᖅᑖᕆᓇᓱᑦᑕᕋ ᑕᐃᒫᒐᓚᓪᓘᓐᓃᑦ. ᐊᒻᒪᓗ ᓄᓇᕐᔪᐊᖅ ᐃᓱᒋᖅᑰᔨᓕᖅᑐᓂᐅᒃ, ᓱᓕᕚ? ᑕᐃᒫᑎᑐᑦ ᑕᒻᒪᖅᑐᖃᖃᑦᑕᕐᒪᑦ ᐊᒻᒪᓗ ᖃᓄᐃᓗᐊᕋᓂ. ᑭᓯᐊᓂ ᑭᖑᒧᑦ ᑕᑯᒋᐊᕈᕕᐅᒃ, ᐊᒻᒪᓗ ᑕᒪᓐᓇ ᐅᕙᓐᓄᑦ ᐊᖏᔪᒻᒪᕆᐅᓚᐅᖅᐹ? ᐋᒡᒐᐃ, ᑕᐃᒪᐃᓚᐅᙱᑦᑐᖅ. ᑐᐊᕕᐅᑎᑐᐃᓐᓇᐅᓚᐅᖅᑐᖅ."

"ᐊᓂᒍᕐᓂᐊᖅᑕᐃᑦ ᐃᒃᐱᒋᓗᒍ ᑭᖑᓪᓕᕐᒥ ᐊᓪᓗᕆᐊᕈᑎᒋᓂᐊᕋᕕᐅᒃ ᓇᒧᙵᐅᕙᓪᓕᐊᓂᕆᔭᕐᓂ ᖃᓄᑐᐃᓐᓇᖅ, ᓴᙱᓂᖅᓴᐅᓂᐊᖅᖢᑎᓪᓗ ᑕᐃᒪᐃᔾᔪᑎᖃᕐᓗᑎᑦ."

ᖁᔭᓐᓇᒦᑦᑎᐊᕐᒥᔭᕋ ᑮᑦ ᑳᓕᐊᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.