"ᐊᓯᔾᔨᖅᓯᔪᒪᕗᖓ. ᐱᓕᕆᔪᒪᕗᖓ ᓄᓇᒧᑦ ᐱᕈᖅᐹᓪᓕᕈᑎᒋᓯᒪᔪᒧᑦ ᐱᐅᔪᒥᒡᓗ ᐊᒃᑐᖅᓯᔪᒪᕗᖓ ᓄᓇᒧᑦ ᐱᕈᖅᓴᕝᕕᒋᓚᐅᖅᑕᓐᓄᑦ," ᐅᖃᓚᐅᖅᐳᖅ ᑳᑎ ᓯᓅᐹᓪ ᐊᐳᑎᐊᕐᔪᒃ. ᑲᖏᖅᓱᐊᓗᔾᔪᐊᕐᒥ ᓄᓇᖃᖅᑐᖅ, ᓄᓇᕕᒻᒥ ᑲᓇᓐᓇᖅᐸᓯᒻᒥᓂᖅ, ᑯᐸᐃᒃ ᑕᕐᕋᖓᓂ. ᑕᐃᑲᓂᕐᒥᐅᑕᐅᓯᒪᔪᖅ ᐃᓅᓯᓕᒫᕐᒥᓂ, ᐊᐅᓪᓚᓚᐅᑲᒃᐸᙱᖦᖢᓂ ᐊᒻᒪ ᕿᓚᒥᑯᓗᒃ ᐃᓕᓐᓂᐊᕆᐊᖅᓯᒪᓪᓗᓂ ᒪᓐᑐᕆᐊᒧᑦ. "ᓄᓇ ᐊᒻᒪ ᐊᖏᕐᕋᖅ ᐊᖏᕐᕋᒧᑦ ᐅᑎᖅᑎᖦᖢᒍ, ᑕᒪᓐᓇᓗ ᐱᐅᓛᖑᓪᓗᓂ ᐃᓱᒪᓕᐅᕈᑎᒋᓯᒪᒐᒃᑯ," ᐅᖃᖅᑐᖅ.

ᐃᖅᑲᓇᐃᔮᒥᒍᓪᓕ, ᐊᐳᑎᐊᕐᔪᒃ ᖃᐅᔨᓴᖅᑐᓕᕆᓂᕐᒥᒃ ᖁᕕᐊᒋᔭᖃᐃᓐᓇᐅᔭᖅᐳᖅ ᒪᒃᑯᒃᖢᓂᓗ ᖃᐃᖁᔭᐅᓚᐅᖅᓯᒪᓪᓗᓂ ᐃᓕᓐᓂᐊᖅᑏᑦ ᓯᑯᒦᖦᖢᑎᒃ, ᖃᐅᔨᓴᖅᑐᓕᕆᓂᕐᒧᑦ ᐱᓕᕆᐊᒧᑦ ᖃᐅᔨᓇᓱᒃᐸᒃᑐᖅ ᐅᑭᐅᖅᑕᖅᑐᒥᒃ, ᖃᐅᔨᓴᖅᑎᙳᖅᑎᑦᑎᕚᓪᓕᖅᖢᓂ. "ᕿᒥᕐᕈᐊᕐᓂᖅ ᐊᖏᓗᐊᙱᑦᑐᒥᒃ ᐃᓕᓐᓂᐊᖅᑏᑦ ᓯᑯᒦᑎᓪᓗᒋᑦ ᖁᕕᐊᒋᑦᑎᐊᓚᐅᖅᐸᒃᑲ. ᐃᓅᓯᕐᒥ ᑕᑯᔭᓐᓂᒃ ᐅᖓᑖᓃᒻᒪᑦ," ᐅᓂᒃᑳᖅᑐᖅ. ᐊᑯᑭᑦᑐᓃᙶᖅᑐᓂ ᓄᓇᕗᒻᒨᓚᐅᖅᑐᖅ ᐊᒻᒪᓗ ᓄᓇᓕᓐᓅᖃᑦᑕᖅᑐᓂ ᐊᖅᑯᑖᓂ. ᐅᔾᔨᕐᓇᓛᖑᓚᐅᖅᑐᖅ ᓇᐹᖅᑐᖃᑦᑎᐊᙱᓐᓂᖓᓂᒃ ᓄᓇᖃᕋᒥ ᓇᐹᖅᑐᓕᐅᑉ ᑭᒡᓕᖓᓂ ᐊᒻᒪᓗ ᓇᐹᖅᑐᖃᐅᖅᖢᓂ ᑭᓯᐊᓂ ᑲᓛᖦᖡᑦ ᓄᓈᓐᓂ ᐊᒻᒪᓗ ᓄᓇᕗᑦ ᓇᐹᖅᑐᖃᙱᑦᑎᐊᒻᒪᕆᒃᑐᖅ. ᑭᖑᓂᐊᒍᑦ, ᐃᓚᐅᓕᓚᐅᖅᐳᖅ ᒪᒃᑯᒃᑐᓄᑦ ᖃᐅᔨᓴᖅᓯᓂᕐᒧᑦ ᐊᐅᓪᓛᖅᓯᒪᓂᐅᔪᒥ ᐱᓕᕆᖃᑎᖃᖅᖢᓂ ᓯᓚᑦᑐᖅᓴᕐᕕᒡᔪᐊᒥ ᓚᕚᓪᒥ ᐃᖃᓗᖕᓂ ᖃᐅᔨᓴᖅᓯᓂᕐᒥᒃ ᐊᒃᑐᐊᓂᓕᖕᓂᒃ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ.

ᒫᓐᓇᓕ, ᐊᐳᑎᐊᕐᔪᒃ ᐃᖅᑲᓇᐃᔭᓕᖅᐳᖅ ᑮᓇᐅᔭᓕᐅᕋᓱᐊᖅᑎᐅᙱᑦᑐᒧᑦ ᑕᐃᔭᐅᔪᒧᑦ ᐊᖑᕕᒐᖅ. ᐃᖅᑲᓇᐃᔭᖅᑎᑕᐅᓚᐅᖅᐳᖅ ᖃᐅᔨᓴᖅᑎᒧᑦ ᐃᑲᔪᖅᑎᐅᖁᔭᐅᓪᓗᓂ ᕿᓚᓗᒐᐃᑦ ᒥᒃᓵᓄᑦ ᓯᕗᓪᓕᕐᒥ. ᐊᐅᔭᑕᒫᑦ, ᕿᓚᓗᒐᐃᑦ ᑰᒻᒨᖅᐸᒻᒪᑕ ᓯᑯᒧᑦ ᒪᑐᓯᒪᔪᓄᑦ. ᑖᒃᑯᐊ ᑎᒥᐅᔪᑦ ᖃᐅᔨᓴᖅᐸᑦᑐᑎᒃ. ᐃᖅᑲᓇᐃᔭᖅᑎᑕᐅᓚᐅᕆᕗᖅ ᑳᓐᑐᓛᒃᑕᐅᓪᓗᓂ ᑕᕐᕆᔭᒐᒃᓴᒧᑦ ᓂᔾᔭᐅᓯᔭᕈᓐᓇᑦᑎᐊᕐᓂᖓᓄᑦ. ᐊᖑᕕᒐᖅ ᐃᖅᑲᓇᐃᔭᖅᑎᑖᕆᓚᐅᖅᓯᒪᔭᖓ ᑐᓴᐅᒪᔪᓕᕆᔨᓄᑦ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᐊᒻᒪᓗ ᐅᑎᕈᓐᓇᖅᓯᓪᓗᓂ ᖃᐅᔨᓴᕐᓂᕐᒧᑦ. ᑕᒪᑐᒪᓂ ᐊᕐᕌᒍᒥ ᐅᑎᕈᓐᓇᖅᓯᓚᐅᖅᐳᖅ ᐃᓕᓐᓂᐊᖅᑎᓄᑦ ᓯᑯᒦᑦᑐᓄᑦ ᐃᓕᓴᐃᔨᐅᓪᓗᓂ ᓄᓇᑦᓯᐊᕗᒻᒥᙶᖅᖢᓂ ᓄᓇᕕᖕᒧᑦ ᑭᓯᐊᓂ ᐅᒥᐊᕐᔪᐊᖓ ᐊᐅᓚᐅᑎᖏᑦ ᓈᒻᒪᙱᓕᐅᕈᑎᖃᓚᐅᕐᒪᑕ ᐊᐅᓪᓚᕈᓐᓇᓚᐅᙱᓚᑦ ᑐᓚᒃᑕᕐᕕᖕᒧᑦ.

ᐃᓕᓐᓂᐊᕐᓂᕐᒥᓄᑦ, ᐊᐳᑎᐊᕐᔪᒃ ᓄᓇᕕᒻᒥ ᓯᕗᓂᑦᓴᕗᒻᒧᑦ ᐃᓕᓐᓂᐊᕆᐊᕈᒪᓕᓚᐅᖅᐳᖅ, ᐱᓕᕆᐊᖅ ᑲᑐᔾᔨᖃᑎᖃᖅᑐᓂ ᔮᓐ ᐋᐸᑦ ᓯᓚᑦᑐᓴᕐᕕᖓᓂ ᒪᓐᑐᕆᐊᒥ. ᐃᓕᓐᓂᐊᕈᓐᓇᖅᓯᓚᐅᖅᑐᖅ ᒐᕙᒪᓕᕆᓂᕐᒥᒃ ᐃᓕᖅᑯᓯᕐᒥᓂᒃ, ᖃᓄᖅ ᓄᓇᕕᒻᒥ ᓴᖅᑭᓚᐅᖅᓯᒪᒻᒪᖔᖅ, ᐃᓄᒃᑎᑐᑦ ᐅᖃᐅᓯᕐᒥᒃ, ᕿᓚᐅᔾᔭᕐᓂᕐᒥᒃ ᐊᒻᒪᓗ ᐃᙱᐅᓯᕐᓂᒃ ᐊᒃᑐᐊᔪᓂᒃ ᐅᒃᐱᕐᓂᒃᑯᑦ, ᑲᑕᔾᔭᕐᓂᕐᒥᒃ, ᐃᓄᓕᕆᓂᕐᒥᒃ ᐊᒻᒪᓗ ᖃᓪᓗᓈᑎᑐᑦ. "ᑕᒪᐃᑎᒍᑦ ᖁᕕᐊᓇᓚᐅᖅᐳᖅ, ᐊᒃᓱᕈᕐᓇᕋᓗᐊᖅᑎᓪᓗᒍ, ᑭᓯᐊᓂ ᐊᓂᒍᖅᑎᓚᐅᖅᑕᒃᑲ ᐊᒃᓱᕈᕐᓇᕐᓂᐅᔪᑦ, ᖃᐅᔨᕚᓪᓕᕈᑎᒋᑐᐃᓐᓇᓚᐅᖅᑕᒃᑲ ᐊᒻᒪ ᓴᙱᓂᖅᓴᐅᓕᖅᖢᖓ, ᓱᓕ ᐊᒥᓱᐊᓗᖕᓂ ᐃᓕᑦᑎᔭᕆᐊᖃᕋᓗᐊᖅᑎᓪᓗᖓ," ᐅᖃᓚᐅᖅᐳᖅ.

ᐅᖃᐅᔾᔨᒋᐊᕈᑎᒋᔭᖓ ᐃᓄᖕᓄᑦ ᒪᒃᑯᒃᑐᓄᑦ ᐊᖏᕐᕋᒥᓂ ᐊᐅᓪᓚᖅᑐᓄᑦ ᐱᔪᒪᔭᒥᓂᒃ ᐱᓕᕆᔭᖅᑐᕐᓗᑎᒃ ᐃᒪᓐᓇᐅᕗᖅ, "ᐊᖏᕐᕋᕆᔭᐃᑦ ᕿᒪᒡᓗᒍ, ᐊᖏᕐᕋᒧᑦ ᐅᑎᕈᓐᓇᑦᑎᐊᖅᐳᑎᑦ, ᑭᓯᐊᓂ ᐃᓕᖕᓂᒃ ᐱᕕᒃᓴᖃᖅᑎᓪᓗᑎᑦ ᐊᑐᕐᓂᕐᒥᒃ ᑕᒪᑐᒥᖓ ᓯᓚᑦᑐᖅᓴᕐᕕᖕᒥ ᐃᓅᓯᖃᕐᓂᕐᒥᒃ.... ᓯᓚᑦᑐᖅᓴᕐᕕᖕᒧᐊᖁᔨᑦᑎᐊᖅᐳᖓ ᐊᕐᕌᒍᓕᒫᒥ, ᖃᔅᓯᐊᕐᔪᖕᓂᒡᓘᓐᓃᑦ ᑕᖅᑭᓂᒃ ᓲᖃᐃᒻᒪ ᖃᓪᓗᓈᑦ ᓄᓇᖓᓐᓃᖦᖢᖓ ᐃᓱᒪᓐᓂᒃ ᒪᑐᐃᖅᓯᑦᑎᐊᓚᐅᖅᐳᖅ, ᑕᐅᑐᙳᐊᖅᑕᓐᓂᒃ ᒪᑐᐃᖅᓯᕐᔪᐊᓚᐅᖅᐳᖅ.... ᐃᒪᓐᓇᐅᖁᔨᓇᔭᖅᐳᖓ, ᐃᓗᐊᕆᔭᕐᓂ ᕿᒪᕉᑎᓗᑎᑦ, ᓲᖃᐃᒻᒪ ᑕᑯᓂᐊᕋᕕᑦ ᐃᓅᓯᖅ ᐊᖏᕐᕋᖅᓯᒪᑐᐃᓐᓇᙱᓪᓗᓂ, ᐱᐅᓛᖑᒐᓗᐊᖅᑎᓪᓗᒍ ᓄᓇᕐᔪᐊᒥ."

ᑐᓗᖅᑕᕈᑎᑕᖃᓕᕌᖓᒥ, ᐊᐳᑎᐊᕐᔪᒃ ᐊᒃᓱᕉᑎᖃᓚᐅᖅᐳᖅ ᐱᓕᕆᐊᒃᓴᕆᔭᕆᐊᖃᖅᑕᒥᓂᒃ ᓄᓇᕕᖕᒥ ᓯᕗᓂᓴᕗᒻᒥ ᑕᐅᑐᒃᖢᒍ ᐊᖓᔪᒃᖡᑦ ᐃᓕᓐᓂᐊᕐᕕᖓᓐᓂ. ᑭᖑᓂᐊᒍᑦ ᖃᐅᔨᓕᓚᐅᖅᐳᖅ ᐊᑕᐅᓯᐅᓈᖅᑎᕐᓗᒋᑦ ᐱᓕᕆᔭᕆᐊᖃᕐᓂᕐᒥᓂᒃ. ᐊᕕᒃᑐᐃᓂᖅ ᐅᖃᐅᓯᕐᓂᒃ ᐊᑕᐅᓯᐅᓈᖅᑎᖅᖢᒍ, ᐊᑕᐅᓯᐅᓈᖅᑎᖦᖢᒍ ᐊᐅᓚᑕᒃᓴᐅᓂᖅᓴᐅᕙᓚᐅᖅᐳᖅ. ᐊᑕᐅᓯᑐᐊᑯᓗᖕᒥᒃ ᐱᓕᕆᓪᓗᓂ ᐃᑲᔪᓚᐅᖅᐳᖅ ᐊᓂᒍᐃᔪᓐᓇᕐᓂᕐᒥᒃ ᑭᖑᕙᕆᐊᖅᑎᑦᑎᕙᖕᓂᕐᒥᒃ. ᖃᓄᐃᙱᑦᑎᐊᖅᑐᒥᒃ ᖁᕕᐊᒋᔭᖃᖅᖢᓂ ᓲᕐᓗ ᑐᓴᕐᓈᖅᐸᒃᖢᓂ ᐃᑲᔪᖅᐸᓚᐅᖅᐳᖅ ᕿᓄᐃᓵᕈᓐᓇᕐᓂᕐᒥᒃ ᐊᖏᕐᕋᕆᔭᒥᓂ ᕿᒪᐃᓯᒪᓂᕐᒥᓂ ᐃᒻᒥᓂᒡᓗ ᐱᓱᒃᐸᒃᖢᓂ ᓄᓇᓕᐸᐅᔭᒥ ᑕᕐᕆᔭᕆᐊᖅᐸᒃᖢᓂᓗ ᐱᓕᕆᐊᒃᓴᒥᓂᒃ ᐱᐊᓂᒃᓯᔭᕌᖓᒥ.

ᐊᐳᑎᐊᕐᔪᒃ ᑐᓴᖅᑎᑦᑎᔪᓐᓇᖅᐸᑦ ᒪᒃᑯᖕᓂᖅᓴᒧᑦ ᐃᖕᒥᓂᒃ ᐃᒪᓐᓇᐅᓇᔭᖅᐳᖅ, "ᖁᔭᓕᓗᑎᑦ ᓇᓃᒻᒪᖔᖅᐱᑦ, ᑭᓱᑐᐃᓐᓇᓂᒃ ᐃᓱᒪᒋᑐᐃᓐᓇᙱᓪᓗᑎᑦ, ᑕᒪᒃᑯᐊᓕᒫᑦ ᑕᐃᒪᐃᖏᓐᓇᕈᓐᓇᙱᒻᒪᑕ. ᑲᙳᓱᒍᓐᓃᕆᑦ. ᐅᖃᓪᓚᖃᑎᖃᖅᐸᒡᓗᑎᑦ ᐃᓄᖕᓂᒃ... ᐱᒋᐊᕈᑎᖃᑐᐃᓐᓇᕐᓗᑎᑦ 'ᕼᐊᐃ!'" ᐃᓱᒪᒋᓪᓗᒍ ᐃᓕᓐᓂᐊᖅᑏᑦ ᓯᑯᒥ ᐊᑐᓚᐅᖅᑕᖓ, ᐃᓅᓯᓕᒫᖓᓂ ᐱᕕᒃᓴᐅᓚᐅᖅᐳᖅ ᒪᒃᑯᓗᐊᕐᓂᑯᒧᓪᓗ, ᐃᓕᑦᑎᓚᐅᖅᐳᖅ ᑭᖑᓂᐊᒍᑦ ᐃᒻᒥᓂᒃ ᐃᕿᐊᓱᖕᓂᕐᒥᒃ ᐃᒻᒥᓂᒡᓗ ᐅᒃᐱᕆᔪᓐᓇᕐᓂᕐᒥᒃ ᖃᐅᔨᒪᓪᓗᓂ ᐊᔾᔨᐅᙱᓐᓂᖓᓂᒃ. ᐊᓈᓇᑦᑎᐊᖓᑕ ᐅᖃᐅᑎᕙᓚᐅᖅᓯᒪᔭᖓ, "ᐄ, ᑕᐃᒪᐃᓕᐅᖅᐳᑎᑦ, ᐊᓯᓐᓄᑦ ᑕᐃᒪᐃᓕᐅᖅᑕᐅᙱᖦᖢᓂ. ᐃᔪᕆᔪᒪᒍᑎᒃ ᐃᓕᖕᓂᒃ, ᐃᓕᖕᓄᑦ ᐃᒡᓘᑉ ᐃᓗᐊᓃᙱᒻᒪᑕ, ᐊᒻᒪ ᐃᕝᕕᑦ ᐃᑎᒐᐅᔭᖏᓐᓃᙱᖦᖢᑎᒃ ᓲᖃᐃᒻᒪ ᐱᓕᕆᓪᓚᕆᒃᑲᕕᑦ ᐱᓕᕆᐊᕆᔪᒪᔭᖏᓐᓂᒃ."

ᓇᓕᒧᒌᒃᑎᓐᓇᓱᒃᖢᒍ ᐃᓱᒪᒥᒍᑦ ᖃᓄᐃᙱᑦᑎᐊᕐᓂᖅ ᖃᓄᐃᙱᑦᑎᐊᕐᓂᕐᓗ, ᐊᐳᑎᐊᕐᔪᒃ ᑯᒃᑭᑕᐹᖅᐸᒃᐳᖅ ᐃᙱᖅᐸᒃᖢᓂᓗ ᐃᒃᐱᒋᔭᒥᓂᒃ. ᐊᓃᓲᖑᖕᒥᔪᖅ ᐊᓂᖅᓵᖅᑐᕆᐊᖅᑐᖅᖢᓂ, ᐱᓱᕋᔭᒃᖢᓂ ᐊᒻᒪ ᓄᓇᒦᑲᑕᒃᖢᓂ. ᒥᖅᓱᕐᓂᖅ ᐃᑲᔫᑎᖃᕐᒥᔪᖅ, ᐊᓐᓄᕌᓕᐅᕐᓂᖅ. ᐃᓕᖅᑯᓯᕐᒨᖓᔪᓂᒃ ᖁᕕᐊᒋᔭᖃᖅᑐᖅ. ᐃᓄᑑᓗᓂ, ᐊᓂᖅᓵᖅᑐᕐᓂᒃᑯᑦ ᐃᖃᐃᓕᓴᖅᐸᒃᖢᓂ ᑐᓴᕐᓈᖅᐸᒃᖢᓂᓗ ᐆᒻᒪᕆᒃᓯᕚᓪᓕᕈᑎᒋᕙᐅᒃ.

ᐊᐳᑎᐊᕐᔪᒃ ᐃᒡᓗᒥᐅᑕᐅᕗᖅ, ᐊᕐᓇᐃᑦ ᖃᓄᐃᓕᐅᖏᓐᓇᐅᔭᖅᖢᑎᒃ, ᓂᕿᓕᕆᓪᓗᑎᒃ ᓴᓗᒻᒪᖅᓴᐃᓪᓗᑎᒡᓗ, ᓂᕿᓕᐅᖅᐸᒃᖢᑎᒡᓗ. ᐊᕐᓇᐅᔪᒪᐃᓐᓇᐅᔭᓚᐅᖅᐳᖅ ᐃᒡᓗᒥᐅᖃᑎᒥᓂᒃ ᓲᕐᓗ ᐊᓈᓇᖓᑎᑐᑦ, ᐊᓈᓇᑦᑎᐊᒥᓄᑦ ᐊᔭᒥᓄᓪᓗ. ᐅᐱᒋᔭᖃᕐᒥᔪᖅ ᐃᙱᖅᑎᒥᒃ ᐲᑐᕆᔅ ᑎᐅᒥᒃ ᐃᑲᔪᓚᐅᖅᓯᒪᔭᖓᓂᒃ ᓇᖕᒥᓂᖅ ᐃᙱᐅᓯᓕᐅᖅᑎᓪᓗᒍ ᐊᒻᒪ ᓯᐅᓪᕕᐊ ᑯᓘᑎᐊᐃ ᐃᓚᐅᑎᑉᐸᒃᖢᓂᐅᒃ ᖁᙱᐊᖅᑕᐅᕙᒃᑐᓄᑦ.

ᐊᓃᖅᖢᓂ ᓄᓇᒥ ᐱᔪᒃᓯᑎᑦᑎᕙᒃᐳᖅ, ᑕᑯᓪᓗᓂ ᓯᕗᓕᕆᓚᐅᖅᑕᖏᑦ ᐊᓐᓇᐅᒪᔾᔪᑎᒋᓚᐅᖅᑕᖏᓐᓂᒃ ᐊᒻᒪ ᐃᓅᓯᕆᓚᐅᖅᑕᖏᓐᓂᒃ ᓯᓚ ᐊᓯᔾᔨᖅᐸᓪᓕᐊᑎᓪᓗᒍ, ᐅᖃᓕᖅᐸᒃᖢᓂᓗ, "ᓱᓕ ᑕᒫᓃᑉᐳᖓ" − ᓯᓚ ᓂᒡᓚᓱᒃᑐᐊᓘᒐᓗᐊᖅᑎᓪᓗᒍ, ᖃᓪᓗᓈᓄᑦ ᓄᓇᑖᕆᔭᐅᓂᑯᑦ ᐊᒻᒪ ᖁᐊᖅᓵᖅᓯᒪᓂᐅᕙᒃᑐᑦ, ᑖᓐᓇ ᐊᓯᖏᓪᓗ ᐃᓄᐃᑦ ᓱᓕ ᒪᒥᑉᐸᓪᓕᐊᕗᑦ. "ᐅᕙᓐᓂᒃ ᐱᔪᒃᓯᑎᑦᑎᕐᔪᐊᖅᐳᖅ ᓯᐊᒻᒪᒃᑎᕆᓂᕐᒥᒃ ᐱᐅᔪᒥᒃ, ᓲᖃᐃᒻᒪ ᓱᓕ ᑕᒫᓃᒃᑲᒪ," ᖁᕕᐊᓱᒃᑐᖅ.

ᐊᓯᔾᔨᖅᓯᔪᒪᓪᓗᓂ ᖃᓄᐃᓕᐅᕈᒪᓪᓗᓂᓗ ᓄᓇᒧᑦ ᐱᕈᖅᐹᓪᓕᕈᑎᒋᓯᒪᓪᓗᓂᐅᒃ, ᑳᑎ ᐊᐳᑎᐊᕐᔪᒃ ᐱᓕᕆᖃᑎᖃᖅᐸᒃᐳᖅ ᑮᓇᐅᔭᓕᐅᕋᓱᒃᑎᐅᙱᑦᑐᒥᒃ ᑕᐃᔭᐅᔪᒥᒃ ᐊᖑᕕᒐᖅ. ᐱᔪᒪᓂᖃᕐᓂᖓ ᖃᐅᔨᓴᕐᓂᕐᒥᒃ ᐱᒋᐊᕐᑎᑕᐅᒋᐊᙵᓚᐅᖅᑐᖅ ᐊᑐᖅᓯᒪᔭᒥᓄᑦ ᐃᓕᓐᓂᐊᖅᑎᓂᒃ ᓯᑯᒥ, ᐱᔪᒃᓯᑎᑕᐅᓪᓗᓂ ᖃᐅᔨᓴᕐᓂᕐᒥᒃ ᐊᐅᓪᓛᖅᓯᒪᓂᕐᒥᒃ ᐊᒻᒪᓗ ᑲᔪᓰᓐᓇᖅᖢᓂ ᐱᓕᕆᓂᕆᔭᖓᓂᒃ ᐊᖑᕕᒐᕐᒥ, ᑭᓯᐊᓂ ᐱᔪᒪᓂᖃᐃᓐᓇᐅᔭᖅᑐᖅ ᖃᐅᔨᓴᖅᑐᓕᕆᓂᕐᒥᒃ. ᖃᓄᑐᐃᓐᓇᑦᑎᐊᖅ, ᓄᓇ ᐊᖏᕐᕋᖓᓗ ᐅᑎᖅᑎᑉᐸᓪᓕᐊᖏᓐᓇᐅᔭᖅᑕᖓ ᖃᐅᔨᒪᓪᓗᓂᓗ ᐱᐅᓛᖑᓂᖓᓂᒃ ᓂᕈᐊᕆᔭᒥᓂᒃ ᐅᑎᕈᒪᓗᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.