"ᐅᓪᓗᖅ ᐊᑕᐅᓯᖅ, ᐃᓱᒪᓕᓵᕋᒪ ᐅᓂᒃᑳᕐᓂᐊᕐᓂᓐᓂᒃ," ᐃᖅᑲᐅᒪᔪᖅ ᑭᐊᓐᑐᕋ ᐅᐃᓂ. ᔅᑏᒍᕌᔅᒥᐅᑕᖅ ᓴᔅᑳᑦᓱᐊᓐᒥ ᐱᕈᖅᓴᓚᐅᖅᓯᒪᔪᖅ 18-ᖑᕋᓱᐊᕐᓂᖓᓂ. ᒫᓐᓇ ᓴᔅᑲᑑᓐᒥᐅᑕᐅᓕᖅᑐᖅ, ᓴᔅᑳᑦᓱᐋᓐᒥ, ᐃᑲᕐᕌᒃ ᒪᕐᕉᒃ ᐊᓂᒍᖅᐸᑎᒃ, ᐅᖃᖅᑎᐅᓪᓗᓂ, ᑎᑎᕋᖅᑎᐅᓪᓗᓂ ᐊᒻᒪ ᐃᓕᓐᓂᐊᖅᓯᓐᓈᑦ ᑲᑎᒪᔪᓂᒃ ᑲᒪᔨᐅᓪᓗᓂ.  ᐱᓕᕆᔪᒻᒪᕆᐅᕗᖅ, ᐱᕈᖅᓴᓚᐅᖅᑎᓪᓗᒍ ᑲᙳᓱᑦᑐᒻᒪᕆᐅᓪᓗᓂ ᐃᒻᒥᓂᒃ ᐅᐱᒋᓂᖃᑦᑎᐊᕋᓂ ᐊᒻᒪ ᐆᒻᒪᑎᖃᖅᑐᒻᒪᕆᐅᓪᓗᓂ ᐅᑎᖅᑎᑦᑎᓪᓗᓂ ᐊᒻᒪ ᐃᑲᔪᖅᑐᓂ ᐃᓄᖁᑎᒥᓐᓂᒃ.

12-ᓂᒃ ᐊᕐᕌᒍᖃᓕᓵᖅᑎᓪᓗᒍ, ᐅᐃᓂ ᓂᖓᖃᑦᑕᐅᑎᓕᓚᐅᖅᑐᖅ ᕿᑐᕐᖓᖃᖅᖢᓂᓗ. ᕿᒪᒃᓯᓪᓗᓂ ᐃᓅᖃᑎᒌᖕᓂᕐᒥᒃ 25−ᒥ, ᒪᒥᓴᖅᐸᓪᓕᐊᓂᖓ ᐱᒋᐊᕐᖢᓂ. ᐅᓂᒃᑳᕆᐅᓚᐅᖅᑐᖅ 500-ᓄᑦ ᐱᓕᕆᔨᒻᒪᕆᓐᓄᑦ ᑲᑎᒪᑎᓪᓗᒋᑦ ᓵᔅᑲᑑᓐᒥ. ᐊᐱᕆᔭᐅᒐᒥ ᑭᓱᓂᒃ ᐊᒃᓱᕈᕐᓇᖅᑐᓂᒃ ᓵᑦᑎᐊᕐᒥᐅᑕᖃᓚᐅᕐᒪᖔᑦ ᐅᓪᓗᒥ ᓇᓃᓕᕐᒪᖔᕐᒥᓂᒃ, ᑲᑉᐱᐊᓱᙱᖦᖢᓂ ᓂᕈᐊᓚᐅᖅᐳᖅ ᐅᖃᐅᓯᖃᕈᒪᓪᓗᓂ ᓱᓕᔪᒥᒃ. 

ᐅᓐᓄᖓᓂ ᐅᖃᓪᓚᒋᐊᓚᐅᙱᓐᓂᖓᓂ, ᑲᑉᐱᐊᓱᓚᐅᖅᑐᖅ ᐃᓱᒫᓗᒃᖢᓂᓗ ᕿᐊᔭᕆᐊᒃᓴᖅ ᓵᑦᑎᐊᖓᓂ ᑭᒃᑯᓕᒫᑦ ᐊᓱᐃᓛᒃ ᐅᖃᖃᑎᖃᕐᖢᓂ ᐊᖓᔪᖓᓂᒃ. ᐅᖃᐅᑎᓚᐅᖅᐹᖓ, "ᐊᒃᓱᕈᕐᓇᖅᑐᒦᑎᑦᑕᐃᓕᒍᒃ. ᐃᓱᒪᒋᓗᒋᑦ ᐃᓄᓕᒫᑦ ᐃᑲᔪᕐᓂᐊᖅᑕᑎᑦ." ᑕᐅᑐᒃᑕᒃᑯᑦ ᐊᓯᔾᔨᕐᓂᖅ ᐱᔭᕆᐊᖃᓪᓚᑦᑖᓚᐅᖅᑕᖓ ᐃᖅᑲᐅᒪᓪᓗᓂᓗ ᐅᖃᐅᓯᖏᓐᓂ ᐅᖃᐅᓯᖃᖅᑎᓪᓗᒍ ᐊᑐᕐᓂᑯᖏᓐᓂ. 

ᖃᐅᔨᓚᐅᖅᑎᓪᓗᒋᑦ, ᓄᓇᓖᑦ ᓴᔅᑳᑦᓱᐋᓐᒥ ᐊᒻᒪ ᐋᓐᑎᐅᕆᐅᒥ ᖃᐃᖁᓚᐅᕐᒪᒋᑦ ᑐᓴᖅᑎᑦᑎᖁᓪᓗᓂᒋᑦ ᖃᓄᐃᓕᐅᖃᑦᑕᖅᓯᒪᓂᕐᒥᓂᒃ. "ᐅᕙᓐᓂᒃ ᐅᖃᖅᑎᐅᓚᐅᖅᓯᒪᙱᑦᑐᖓ, ᑭᓯᐊᓂ ᓱᓕᑦᑎᐊᓲᖑᔪᖓ ᓱᓕᓪᓗᖓ ᐊᒻᒪ ᐅᒃᑯᐃᖓᑦᑎᐊᖅᖢᖓ ᐊᒻᒪ ᓱᓕᑦᑎᐊᖅᖢᖓ ᐊᒻᒪ ᐊᒃᑐᖅᑕᐅᓴᕋᐃᖦᖢᖓ. ᐱᓗᐊᖅᑐᒥᑦ, ᓲᖃᐃᒻᒪ ᐱᕈᖅᐸᓪᓕᐊᔭᕆᐊᖃᕋᒪ," ᓈᓴᐃᒃᑲᓐᓂᖅᐳᖅ. 

ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐱᐅᔪᓂᒃ ᐱᑕᖃᖅᑎᓐᓇᒍ ᐊᔾᔪᒥᒋᔭᐅᓗᓂ ᐅᖃᐅᓯᖃᕆᐊᒃᓴᖅ ᓱᓕᙱᑦᑐᓂᒃ, ᐃᓕᓐᓂᐊᖅᑎᑦᑎᖃᑦᑕᓕᖅᑐᖅ ᑐᓴᖅᑎᑦᑎᓪᓗᓂ ᒪᒥᓴᕐᓂᕐᒥᒃ ᐊᒻᒪ ᓇᖕᒥᓂᖅ ᑲᒪᒋᓂᕐᒥᒃ ᐃᓄᖕᓂᒃ ᓇᖕᒥᓂᖅ ᐱᓕᕆᔪᓐᓇᖅᑐᓂᒃ. ᑐᓴᒐᒃᓴᐅᔪᖅ ᖃᐅᔨᔭᖓ ᐊᒥᓱᑦ ᐃᓕᓐᓂᐊᖅᑎᑕᐅᕙᙱᒻᒪᑕ ᐱᕈᖅᐸᓪᓕᐊᓂᕐᒥᒃ ᐊᒻᒪᓗ ᑕᒪᓐᓇ ᐱᔪᒪᓕᕈᑎᒋᓚᐅᖅᐸᐅᒃ ᐃᓕᓐᓂᐊᖅᑎᑦᑎᓂᕐᒧᑦ ᐊᑎᖃᖅᑐᖅ ᐊᖅᑯᑎᒃᓴᖅ ᒪᒥᓴᕐᓂᕐᒧᑦ, ᐅᖃᐅᓯᖃᖅᑐᖅ ᖁᓄᔪᕐᓂᐊᕐᓂᕐᒥᒃ, ᐊᖏᕐᕋᒥ ᐋᓐᓂᖅᑎᕆᓂᕐᒥᒃ, ᐊᐱᖅᑯᑕᐅᒐᔪᓚᐅᖅᑐᖅ ᐱᔭᕆᐊᑐᔪᓂᒃ ᐊᒻᒪᓗ ᓇᓗᓇᐃᒃᑯᑕᐅᔪᓂᒃ ᓇᐅᑦᑎᖅᓱᕐᓂᕐᒧᑦ. ᐅᒃᐱᕈᓱᖕᓂᖅ ᐱᑦᑕᐃᓕᑎᑦᑎᓂᖅ ᐱᓪᓗᐊᑕᐅᔪᖅ, ᐱᔪᒪᔪᖅ ᐱᔪᓐᓇᖅᑎᓪᓗᒋᑦ ᐊᖓᔪᖅᑳᑦ ᐊᒥᖅᑳᖃᑎᖃᕐᓗᑎᒃ ᓄᑕᖅᑲᖏᓐᓂ ᖃᑕᙳᑎᖏᓐᓂ, ᐱᑎᑦᑎᓗᓂ ᐅᔾᔨᕈᓱᖕᓂᕐᒥᒃ ᒥᒃᖠᒋᐊᖅᑎᓪᓗᒍᓗ ᐱᑕᖃᕐᓂᖓ ᐱᑦᑎᐊᙱᓐᓂᕐᓂ ᓄᓇᓕᖏᓐᓂ. ᑎᑎᕋᕐᒥᔪᖅ ᐅᖃᓕᒫᒐᕐᒥᒃ ᐊᒻᒪᓗ ᑭᖑᓪᓕᖓᓂ ᐱᒋᐊᓕᖅᑐᓂ. 

"ᓇᖕᒥᓂᖅ ᐃᓱᒪᒋᔭᒃᑯᑦ, ᐱᐅᓛᖅ ᐱᑎᑦᑎᑦᑕᐃᓕᒪᓂᖅ ᐃᓕᓐᓂᐊᕐᓂᖅ." 

ᓯᕗᓪᓕᖅᐹᖅ ᐅᖃᓕᒫᒐᖓ ᐊᑎᖃᖅᑐᖅ ᐊᓐᓇᐅᒪᓂᖅ ᐋᓐᓂᖅᑎᕆᓂᕐᒥᒃ ᐊᒻᒪᓗ ᑎᑎᕋᕐᓂᖅ ᒪᒥᓴᕐᓂᐅᓚᐅᖅᑐᖅ. ᕿᒥᕐᕈᔪᖅ ᐃᖅᑲᐅᒪᔭᒥᓂᒃ ᓄᑕᕋᐅᓂᕐᒥᓂᒃ, ᐊᑐᕐᓂᑯᖏᑦ ᐱᕈᖅᐸᓪᓕᐊᓪᓗᑎᒃ ᐊᒻᒪ ᓂᕐᓕᖅᖢᑎᒃ ᖃᓄᕐᓗ ᑭᖑᓪᓕᖅᐹᒥ ᐊᐃᑉᐸᖃᓕᓚᐅᕐᒪᖔᑦ. ᑕᐃᑲᙵᑦ, ᐅᖃᐅᓯᖃᖅᑐᖅ ᒪᒥᓴᖅᐸᓪᓕᐊᓂᕐᒥᓂᒃ, ᐃᑲᔫᑎᒃᓴᓂᒃ, ᐃᑲᔫᑎᒃᓴᓂᒃ ᐊᒻᒪ ᖃᓄᐃᓕᐅᕈᓯᖏᓐᓂᒃ ᐃᑲᔪᓚᐅᖅᑕᖏᓐᓂᒃ. 

"ᐃᓕᓐᓂᐊᖅᑎᑕᐅᓯᒪᙱᑦᑐᒍᑦ ᖃᓄᖅ ᒫᓐᓇᒧᑦ ᑎᑭᖦᖢᒍ ᓄᓇᖃᖅᑳᖅᓯᒪᔪᑦ, ᐊᐃᑦᑖᖑᒐᓗᐊᖅ." 

ᑭᖑᓪᓕᕐᒥ ᐅᖃᓕᒫᒐᕐᒥᓂ, ᐅᖃᐅᓯᖃᒃᑲᓐᓂᕐᓂᐊᖅᑐᖅ ᖃᐅᔨᖃᑦᑕᖅᓯᒪᔭᖏᓐᓂᒃ ᐊᖑᑎᓂᒃ ᐊᒻᒪ ᖃᓄᖅ ᐱᐅᓚᐅᕐᒪᖔᑦ ᖃᐅᔨᓗᓂ 30-ᖏᓐᓂ ᐊᑐᖅᓯᒪᔭᒥᓂᒃ ᓄᑕᕋᐅᓂᕐᒥᓂᒃ ᖁᓄᔪᕐᓂᐊᖅᑕᐅᓂᕐᒥᒃ. ᐃᖅᑲᐅᒪᓪᓗᓂ ᖁᐊᖅᓵᖅᓇᖅᑐᒥᑦ ᐊᑐᖅᑕᐅᓯᒪᔪᓂᑦ, ᒪᒥᓴᖅᐸᓪᓕᐊᓕᖅᑐᖅ ᐊᒻᒪ ᐃᒻᒥᓂᒃ ᑐᑭᓯᕚᓪᓕᖅᑐᓂ ᖃᓄᐃᓕᓂᕐᒪᖔᖅ. 

"ᖃᓄᑭᐊᖅ ᖃᐅᔨᒪᓚᐅᙱᓐᓇᒪ ᖃᓄᖅ ᖃᓄᐃᙱᑦᑎᐊᕐᒪᖔᑦ. ᓲᖃᐃᒻᒪᓕ ᐱᔪᒪᓕᓚᐅᖅᑐᖓ ᑖᒃᑯᓂᖓ ᑐᖁᓐᓇᖅᑐᓂᒃ ᐱᖃᓐᓇᕇᒍᓯᕐᓂᒃ."

ᐅᖃᐅᓯᖃᕆᐊᙵᖅᑎᓪᓗᒍ ᐊᑐᖅᓯᒪᔭᒥᓂᒃ ᖁᓄᔪᕐᓂᐊᕐᓂᕐᒧᑦ, ᑲᙳᓲᑎᖃᒻᒪᕆᓚᐅᖅᑐᖅ ᐊᒻᒪᓗ ᐅᖃᐅᓯᖃᓚᐅᖅᓯᒪᓇᓂ ᐊᒥᓱᓄᑦ ᐃᓄᓐᓄᑦ. ᖃᐅᔨᓚᐅᖅᑐᖅ ᐊᓯᖏᑦ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᐅᖃᐅᓯᕆᖃᑦᑕᓚᐅᖅᑕᖏᑦ ᐊᔾᔨᐸᓗᖏᓐᓂᒃ ᐅᓂᒃᑳᖃᓚᐅᖅᑐᑦ. ᐅᓂᒃᑳᒥᓂᒃ ᑐᓴᖅᑎᑦᑎᔪᒪᒐᓗᐊᖅᐳᖅ, ᐊᓯᖏᑦ ᑕᐃᒪᐃᓕᐅᕈᒪᓕᕐᓂᐊᖅᐳᑦ. 

"ᐱᔪᓐᓇᕐᓂᖃᕐᔪᐊᖅᑐᖅ ᐊᒥᖅᑳᕈᑎᖃᕐᓂᕐᒥᒃ ᓇᖕᒥᓂᖅ ᐅᓂᒃᑳᕐᓂᒃ. ᐅᔾᔨᕈᓱᙱᑦᑐᑎᑦ ᐊᒃᑐᐃᓂᕆᓇᔭᖅᑕᕐᓂᒃ ᐊᓯᖕᓄᑦ ᐃᓄᖕᓄᑦ." 

ᒪᒥᓴᖃᑕᐅᓪᓗᓂ, ᐅᐃᓂ ᐃᓅᓯᓕᕆᖃᑕᐅᓚᐅᖅᐳᖅ, ᐃᖃᐃᓕᓴᖃᑦᑕᓕᖅᖢᓂ ᐊᒻᒪ ᐃᓕᖅᑯᓯᕐᒥᓂᒃ ᐱᓕᕆᖃᑕᐅᓕᖅᖢᓂ. ᐃᒻᒥᓂᒃ ᐅᐱᒋᔪᓐᓇᖅᓯᕙᓪᓕᐊᓪᓗᓂ, ᐱᓕᕆᓚᐅᖅᑐᖅ ᐱᐅᔪᓂ ᐃᒻᒥᓂ−ᐱᕈᖅᓴᕐᓂᕐᒥᑦ ᐊᒻᒪ ᕿᒥᕐᕈᕙᓪᓕᐊᓕᓚᐅᖅᑐᖅ ᓱᑲᒃᑲᖓᓗᐊᕐᓂᕐᒧᑦ ᐊᒻᒪ ᖁᐊᖅᓵᖓᓇᖅᑐᒃᑰᖅᓯᒪᔪᓄᑦ ᓴᒃᑯᐃᓂᕐᒧᑦ ᐃᖃᐃᓕᓴᕐᓂᕐᒥᑦ ᑎᓕᐅᕆᓪᓗᓂ ᕚᓕᐹᖅᑎᓄᑦ ᑲᒪᔨᐅᓚᐅᖅᓯᒪᔪᓂᑦ. ᕆᑭ, ᐆᒻᒪᕆᒃᖢᓂ ᒪᒥᓴᕐᓂᖅ, ᐃᑲᔪᓚᐅᕐᒥᔪᖅ ᐊᒻᒪᓗ ᐊᒥᐊᕆᒃᑲᓐᓂᓕᓚᐅᕐᒥᔪᖅ. ᓴᓇᐅᒐᓕᐅᖅᑎᓪᓗᒍ, ᐃᓱᒫᓘᑎᖏᑦ ᐊᐅᒃᐸᓪᓕᐊᖅᑰᔨᓚᐅᖅᑐᑦ. ᒫᓐᓇ ᐅᐸᒍᑎᖃᑦᑕᓕᖅᑐᖅ ᑭᓱᒥᑭᐊᖅ ᑕᐃᔭᐅᔪᒥᒃ ᐊᑐᕐᔪᐊᕐᓂᕐᒥᒃ, ᐊᑐᕋᓱᒃᐸᒃᓗᓂ ᐃᑲᔪᖅᑐᒥᒃ ᑎᒥᒥᒃ ᓴᒃᑯᐃᓗᓂ ᑭᖑᓂᑦᑎᓐᓂ ᐊᒃᓱᕈᕐᓇᖅᑐᒃᑰᕈᑕᐅᓯᒪᔪᓂᒃ.

ᐊᓯᐅᒑᖓᒥ, ᐃᓐᓇᕐᓂᒃ ᐊᓈᓇᒥᓂᒡᓘᓐᓃᑦ ᑲᑎᖃᑎᖃᓲᖅ. ᐅᔾᔨᕈᓱᓚᐅᖅᑐᖅ ᒪᒥᓴᖅᐸᓪᓕᐊᑎᓪᓗᒍ ᐋᐳᒥᒃ ᐊᒃᑐᐃᓯᒪᓂᖓᓂᒃ ᐃᓄᖕᓄᑦ ᖃᓂᒋᔭᖏᓐᓃᑦᑐᓄᑦ ᐊᒻᒪ ᓇᖕᒥᓂᖅ ᒪᒥᓴᖅᐸᓪᓕᐊᔭᖏᓐᓄᑦ. ᐊᓈᓇᖓᑕ ᐊᒃᑐᐊᓂᕆᔭᖓ ᐱᐅᓯᕚᓪᓕᖅᓯᒪᕗᖅ ᐊᒻᒪ ᐃᒃᐱᒋᔭᒥᓂᒃ ᓇᓂᓯᓯᒪᓪᓗᓂ, ᑮᓇᐅᔭᑎᒍᑦ ᐊᒻᒪ ᐸᐃᕆᕝᕕᖕᒧᑦ ᐃᑲᔪᖅᑐᐃᓪᓗᓂ.

ᐃᓱᒪᓪᓗᓂ ᑐᓴᖅᑕᐅᖁᔭᒥᓂᒃ ᒪᒃᑯᖕᓂᖅᓴᒧᑦ ᐅᖃᐅᑎᓇᔭᖅᑕᖓ, ᐃᖅᑲᐅᒪᔪᖅ ᖃᓄᖅ ᓈᓚᓚᐅᙱᒻᒪᖔᑦ ᐃᓕᑦᑎᔭᕆᐊᖃᐃᓐᓇᐅᔭᕐᖢᓂᓗ ᐊᒃᓱᕈᕐᓇᖅᑐᓂᒃ. ᒫᓐᓇ, ᐅᒃᐱᕈᓱᖕᓂᖅᓴᐅᓕᖅᑐᖅ ᐃᓕᕋᓱᒃᑕᒥᓂᒃ ᐃᖕᒥᓂᒃᓗ ᐅᖃᐅᑎᔪᓐᓇᕐᓗᓂ, "ᑎᒥᖕᓄᑦ ᑎᑎᕋᕐᓗᓂ ᓇᓗᒍᕕᑦ. ᖃᐅᔨᒪᐃᓐᓇᐅᔭᖅᑐᑎᑦ ᑭᐅᔾᔪᑎᒥᒃ ᐃᑎᔪᒥᒃ. ᑭᓱᑭᐊᖅ ᓈᒻᒪᖅᑰᔨᙱᑉᐸᑦ, ᓄᖅᑲᕐᓗᑎᑦ ᓈᓚᒡᓗᒍᓗ ᑎᒦᑦ. ᓈᓚᒡᓗᒍ ᐅᖃᑦᑎᐊᙱᑕᐃᑦ ᓲᖃᐃᒻᒪ ᑐᕌᖅᑎᑦᑎᓂᐊᕐᒪᑦ ᐊᖅᑯᑎᑦᑎᐊᕙᖕᒧᑦ."

ᐃᓱᒪᒋᔭᖃᖅᑎᓪᓗᒍ ᓂᕆᐅᒋᔭᒥᓂᒃ ᓯᕗᓂᒃᓴᒧᑦ, ᑕᑯᔪᓐᓇᖅᓯᕙᒌᖅᑕᖏᑦ ᓱᓕᓗᑎᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐊᓂᒍᐃᕙᓪᓕᐊᔪᑦ ᐅᑭᐅᑦ ᖁᓕᑦ ᐊᓂᒍᖅᓯᒪᓕᖅᑐᓂᒃ. "ᒪᒃᑯᒃᑐᖁᑎᕗᑦ ᓱᒃᑲᐃᑦᑐᒥᒃ ᖁᓱᔪᓐᓃᖅᐸᓪᓕᐊᕗᑦ... ᓂᕆᐅᑉᐳᖓ ᐊᒥᓱᒃᑲᓐᓂᐅᖁᓪᓗᒋᑦ ᐊᑐᖅᑕᐅᔪᓐᓇᖅᑐᑦ ᐊᒻᒪ ᐱᕕᔅᓴᐃᑦ ᓴᖅᑭᐊᔪᑦ ᑖᒃᑯᓄᖓ ᐊᒻᒪ... ᓱᕋᒃᐸᓪᓕᐊᔪᓐᓇᓕᖕᒪᑕ ᓂᐱᖏᑦ ᐊᑐᕐᓗᒋᓪᓗ," ᑐᓴᖅᑎᑦᑎᕗᖅ. 

ᓯᕗᓂᒃᓴᖓᓄᑦ, ᓂᕆᐅᒃᐳᖅ ᑭᖑᓪᓕᕐᒥ ᐅᖃᓕᒫᒐᓕᐊᖓ ᑲᔪᓯᑦᑎᐊᕐᓂᐊᕐᓂᖓᓂᒃ ᐊᒻᒪ ᐊᖏᓂᖅᓴᓄᑦ ᐃᓄᖕᓄᑦ ᑎᑭᐅᑎᓗᓂ. ᓯᕗᓪᓕᖅᐹᒥ ᐅᖃᓕᒫᒐᓕᐊᖓ ᓇᒻᒥᓂᖅ ᓴᖅᑭᓚᐅᖅᑐᖅ ᐊᒻᒪᓗ ᐊᒃᓱᕈᓚᐅᖅᑐᖅ ᓂᐅᕐᕈᑎᖃᕋᓱᐊᕐᓂᕐᒥᒃ. ᐃᓄᖕᓂᒃ ᐅᓄᕐᓂᖅᓴᓂᒃ ᑐᓴᒃᑲᓐᓂᕈᒪᔪᖅ ᐊᒻᒪ ᐱᐅᔪᒥᒃ ᐊᒃᑐᐃᓗᓂ ᓄᓇᖃᖅᑳᖅᓯᒪᔪᑦ ᐊᕐᓇᐃᑦ ᒪᒃᑯᒃᑐᓪᓗ. ᐃᓄᐃᑦ ᖃᐅᔨᒪᖁᓪᓗᓂᒋᑦ ᑐᓴᖅᑕᐅᖁᔭᖏᓐᓂᒃ ᐃᓕᓐᓂᐊᖅᓯᓐᓈᑦ ᑲᑎᒪᓯᓐᓈᖅᑎᓪᓗᒋᑦ, "ᐃᓅᓯᑦᑎᐊᕙᖕᒥᒃ ᐃᓅᓯᖃᑦᑎᐊᕆᐊᖃᖅᐳᑎᑦ. ᓇᒡᓕᒋᔭᐅᔭᕆᐊᖃᓪᓚᕆᒃᑐᑎᑦ. ᑭᓯᐊᓂ ᐱᒋᐊᖅᑳᕆᐊᖃᖅᑐᑎᑦ ᐃᓕᖕᓂᒃ ᓇᒡᓕᒍᓱᖅᑳᕐᓗᑎᑦ." 

ᖃᖓᑐᐃᓐᓇᖅ, ᐅᓂᒃᑳᕈᒪᓕᓚᐅᖅᑐᖅ. ᑕᐃᒪᐃᓕᐅᖅᖢᓂ, ᑭᐊᓐᑐᕋ ᐅᐃᓂ ᐱᒋᐊᓚᐅᖅᑐᖅ ᒪᓪᓕᖅᖢᓂ ᐃᒻᒥᓂᒃ ᐊᓯᒥᓄᓪᓗ, ᐋᐳᓂᒃ ᐊᑐᔅᓲᔭᓕᖅᐸᒃᖢᓂ ᐆᒻᒪᑎᒧᑦ ᑎᑭᐅᑎᕙᒃᖢᓂ ᖃᐅᑕᒫᑦ. ᑲᙳᓱᒍᓐᓃᖅᖢᓂ ᑲᙳᓱᒃᖢᓂᓗ, ᖃᐅᒪᑎᑦᑎᕗᖅ ᐱᑦᑕᐃᓕᑎᑦᑎᓂᕐᒧᑦ, ᐃᓕᓐᓂᐊᕐᓂᕐᒧᑦ ᐊᒻᒪ ᓯᕗᓂᒃᓴᑦᑎᐊᕙᖕᒧᑦ ᐃᓄᖁᑎᒥᓄᑦ, ᐱᑦᑎᐊᖅᑕᐅᙱᖦᖢᓂ ᐊᒻᒪ ᐃᒻᒥᓂᒃ ᑲᒪᒋᑦᑎᐊᕈᓐᓇᐃᓪᓕᓪᓗᓂ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.