ᒪᑐᐃᖅᓯᔪᒪᓚᐅᖅᐳᖅ ᑐᓐᓂᓕᐅᕐᕕᖕᒥᒃ, ᒫᓐᓇᓕ ᐊᓯᔾᔨᖅᐸᓪᓕᐊᔪᖅ ᐱᐅᓂᖅᓴᒧᑦ ᐱᓕᕆᐊᕆᔭᖓ ᐊᑐᖅᑕᐅᖏᓐᓇᕐᓂᐊᓕᖁᓪᓗᒍ ᐱᓕᕆᐊᒥᓄᑦ ᐃᑲᔪᕋᓱᒃᐸᒃᑐᓄᑦ. ᑭᓪᓗᓛᖅ ᐊᕐᓇ'ᓈᖅ ᐃᓅᕗᖅ ᖃᒪᓂ'ᑐᐊᕐᒥᐅᑕᒃᓴᔭᖅ, ᓄᓇᕗᒻᒥ, ᑭᓯᐊᓂ ᐱᕈᖅᓴᓂᑰᓪᓗᓂ ᒫᓐᓇᓗ ᓄᓇᖃᓕᖅᖢᓂ ᔭᓗᓇᐃᕝ, ᓄᓇᑦᑎᐊᒥ. ᑭᖑᓪᓕᖅᐹᕆᓕᖅᑕᖓ ᐃᓕᓐᓂᐊᕐᕕᐊᓗᖕᒥ ᐋᓐᑎᐅᕆᐅᒦᓚᐅᖅᐳᖅ. ᐅᑭᐅᓂᒃ 8-ᓂᒃ ᐅᑭᐅᖅᑕᖅᑐᒦᓕᖅᐳᖅ.

ᐅᓪᓗᒃᑯᑦ ᐃᖅᑲᓇᐃᔮᒥᓂᒃ ᐃᓚᒋᔭᐅᓪᓗᓂ ᐅᓄᙱᑦᑐᑯᓗᖕᓄᑦ ᐃᓄᖕᓂ ᐸᐃᑉᐹᖅᑖᖅᓯᒪᔪᖅ ᑮᓇᐅᔭᓕᕆᔨᒻᒪᕆᐅᓪᓗᓂ ᑲᓇᑕᒥ, ᐊᕐᓇ'ᓈᖅ ᐊᐅᓚᑦᑎᔨᒻᒪᕆᐅᕗᖅ ᐅᑯᓄᖓ, MakeWay Foundation−ᑯᓐᓄᑦ ᔭᓗᓇᐃᒥ, ᑮᓇᐅᔭᓕᐅᕋᓱᒃᑎᐅᙱᖦᖢᑎᒃ ᑲᑐᔾᔨᖃᑎᒌᑦ ᐋᖅᑭᒃᓱᐃᕙᓪᓕᐊᓪᓗᑎᒃ ᐱᓕᕆᖃᑎᒌᖕᓂᕐᓂᒃ ᐃᑲᔪᕈᒪᓪᓗᒋᑦ ᓄᓇᓖᑦ ᓯᓚᓗ ᑲᔪᓯᓂᖃᑦᑎᐊᖁᓪᓗᒋᑦ ᐊᑕᐅᑦᑎᒃᑯᑦ. ᐱᓕᕆᖃᑎᖃᖅᐸᒃᖢᓂ ᐃᑲᔪᖅᑐᐃᕙᒃᖢᓂᓗ ᓄᓇᓕᖕᓂ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ ᓄᓇᕘᒥ, ᑭᒡᒐᖅᑐᐃᕙᒃᑭᕗᖅ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᒃᓴᖏᓐᓂᒃ, ᐊᑐᐊᒐᕐᓂᒃ, ᐅᖃᐅᓯᕐᒥᒃ ᓴᖅᑭᑎᑦᑎᒃᑲᓐᓂᕐᓂᕐᒥᒃ ᑭᓇᐅᓂᕐᒥᓂᒡᓗ. ᐱᓕᕆᖃᑎᖃᖅᐸᒃᖢᓂ ᒐᕙᒪᓂᒃ ᐊᒻᒪ ᒐᕙᒪᐅᙱᑦᑐᓂᒃ ᑲᑐᔾᔨᖃᑎᒌᓂᒃ, ᓇᓕᒧᒌᒃᑎᑦᑎᕙᒃᐳᖅ ᓄᓇᒥ ᐊᔪᕈᓐᓃᖅᑕᐅᕙᒃᑐᓂᒃ ᑐᑭᓯᐅᒪᑦᑎᐊᖅᖢᓂᓗ ᒪᓕᒐᓕᕆᓂᕐᒥᒃ. ᐱᓕᕆᐊᖏᑦ ᐊᔾᔨᒌᙱᑦᑑᑎᐅᕗᑦ ᐃᑲᔪᖅᐸᒃᖢᓂᓗ ᐃᑲᔪᕋᓱᒃᐸᒃᑐᓂᒃ ᐅᑭᐅᖅᑕᖅᑐᒥᑦᑕᐅᖅ.

ᐃᓚᒋᔭᐅᓪᓗᓂ ᐃᓕᓐᓂᐊᖅᑕᒥᓄᑦ, ᐊᕐᓇ'ᓈᖅ ᐱᒋᐊᓚᐅᖅᓯᒪᕗᖅ ᑲᑐᔾᔨᓪᓗᑎᒃ ᐃᓕᓐᓂᐊᖅᑕᒥᓂᒃ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ ᐊᒻᒪ ᐃᓕᖅᑯᓯᓕᕆᓂᕐᒥᒃ ᑐᕆᓐᑦ ᓯᓚᑦᑐᖅᓴᕐᕕᒡᔪᐊᕐᒥ ᑭᓯᐊᓂ ᐃᓕᖅᑯᓯᓕᕆᓂᕐᒥᒃ ᓄᖅᑲᓚᐅᖅᐳᖅ. ᐊᔪᙱᓐᓂᖃᕐᓂᕐᒧᑦ ᖃᐅᔨᓴᖅᑕᐅᕌᓪᓚᓚᐅᖅᖢᓂ ᑮᓇᐅᔭᓕᕆᔨᙳᕈᒪᓕᖅᖢᓂ, ᐃᓕᓐᓂᐊᒃᑲᓐᓂᓕᓚᐅᖅᐳᖅ Masters−ᒥᒃ ᐊᐅᓚᑦᑎᕝᕕᖃᖅᐸᖕᓂᕐᒥᒃ ᐱᓕᕆᔨᓪᓚᕆᐅᓂᕐᒧᓪᓗ ᑮᓇᐅᔭᓕᕆᕙᖕᓂᕐᒥᒃ ᓯᓚᑦᑐᖅᓴᕐᕕᒡᔪᐊᒥ ᑐᕌᓐᑐᒥ ᓯᕗᓪᓕᖅᐸᐅᓪᓗᓂ ᓄᓇᖃᖅᑳᖅᑐᓄᑦ ᐱᓇᔪᒃᑐᓄᑦ. ᐃᓕᓐᓂᐊᒐᒃᓴᖅ ᐃᓕᓐᓂᐊᒐᒃᓴᓕᒫᓂᒃ CA−ᒧᑦ ᓇᓗᓇᐃᒃᑯᑕᖅᑖᕐᓂᕐᒧᑦ ᑲᑎᙵᑎᑕᐅᓪᓗᑎᒃ 27−ᓄᑦ ᑕᖅᑭᓄᑦ.  ᐱᓚᐅᖅᐳᖅ CPA−ᒧᑦ CA−ᒧᑦ ᓇᓗᓇᐃᒃᑯᑕᖅᑖᖅᓯᒪᓪᓗᓂ ᐅᑯᑎᒎᓇᖅ, Institute of Chartered Accountancy Ontario−ᒥ.

ᖁᑦᑎᖕᓂᖅᐹᒥ ᐃᓕᓐᓂᐊᖅᑕᖓ ᐃᓅᓯᕐᒧᑦ ᐊᓯᔾᔨᕈᑕᐅᓚᐅᖅᐳᖅ ᐊᒃᓱᕈᕐᓇᖅᖢᓂᓗ. ᐊᕐᓇ'ᓈᖅ ᑕᖃᐃᖅᓯᕐᕕᖃᖅᐸᓚᐅᙱᓚᖅ ᑕᐃᒪᐃᓪᓗᐊᖃᑎᖏᑎᑑᙱᖦᖢᓂᓗ, ᐊᖓᔪᖅᑳᖃᓚᐅᙱᓚᖅ ᐱᓕᕆᔨᒻᒪᕆᐅᔪᓐᓇᖅᑐᓂᒃ. ᐊᒃᓱᕈᕐᓇᕋᓗᐊᖅᑎᓪᓗᒍ, ᐱᔪᒃᓯᙱᖦᖢᓂ ᐊᓂᒍᐃᔪᓐᓇᓚᐅᖅᐳᖅ. ᓯᕗᓂᒃᓴᑦᑎᓐᓂ, ᐃᓄᒃᑎᑐᑦ ᐃᓕᓐᓂᐊᖃᑕᐅᔪᒪᓇᔭᖅᑐᖅ ᑭᓯᐊᓂ ᒫᓐᓇ ᑕᐅᑐᒐᖃᓪᓗᐊᑕᖅᐳᖅ ᐃᕐᓂᖓᑕ ᐃᓕᓐᓂᐊᕐᓂᖓᓂᒃ.

ᐊᕐᓇ'ᓈᖅ ᐱᕈᖅᓴᓪᓗᓂ ᐃᑲᔪᖅᑕᐅᔪᓐᓇᕐᓂᕋᖅᑕᐅᓪᓗᓂ ᓯᓚᑦᑐᖅᓴᕐᕕᖕᒧᑦ ᐃᓕᓐᓂᐊᕈᒪᓪᓗᓂᓗ ᐊᐅᓚᑦᑎᔪᓐᓇᕐᓂᕐᒥᒃ ᑐᓐᓂᓕᖅᓱᐃᕝᕕᖕᒥ ᐊᒻᒪ ᐳᑐᓕᖅᓱᐃᕝᕕᖕᒥ. ᑭᖑᓂᐊᒍᑦ ᖃᐅᔨᓕᓚᐅᖅᐳᖅ ᓴᓇᙳᐊᕈᓐᓇᙱᓐᓂᕐᒥᓂᒃ ᑮᓇᐅᔭᓕᕆᔨᐅᓪᓗᓂᓗ ᑭᓯᐊᓂ ᓇᓂᓯᒐᒥ ᐃᖅᑲᓇᐃᔮᕆᔪᒪᔭᒥᓂᒃ. "ᑮᓇᐅᔭᓕᕆᓂᕐᒥᒃ ᐃᓕᓐᓂᐊᓚᐅᖅᓯᒪᙱᑦᑐᖓ ᐊᕐᕌᒍᓂ 8-ᓂ, ᑭᓯᐊᓂ ᓱᓕ ᐊᑐᖅᐸᒃᖢᒋᑦ ᐊᔪᕈᓐᓃᖅᓯᒪᔭᒃᑲ ... ᖃᐅᑕᒫᑦ, ᐊᑐᕐᓂᖃᕐᔪᐊᖅᐳᑦ," ᐅᖃᓚᐅᖅᐳᖅ.

ᓯᓚᑖᒍᑦ ᐃᓕᓐᓂᐊᕐᓂᖓᑕ, ᐊᕐᓇ'ᓈᖅ ᐃᓚᒋᔭᐅᓚᐅᖅᑐᖅ ᔭᐃᓐ ᒑᓚᔅᒨ ᐅᑭᐅᖅᑕᖅᑐᒥ ᐃᓕᓐᓂᐊᖃᑕᐅᓂᕐᒧᑦ, ᐱᕕᖃᕈᓐᓇᓚᐅᖅᑐᖅ ᐃᓚᐅᖃᑕᐅᓂᕐᒥᒃ ᒪᕐᕉᓐᓂᒃ ᐊᕐᕌᒎᓐᓂᒃ ᐃᓕᓐᓂᐊᕐᓂᕐᒥᒃ ᑲᑎᑎᑦᑎᓪᓗᓂ ᐅᑭᐅᖅᑕᖅᑐᒥᐅᓂᒃ ᑎᓴᒪᐃᕋᖅᑐᓂ ᐃᓕᓐᓂᐊᖅᑐᑎᒃ ᐊᑐᐊᒐᕐᓂᒃ ᐊᒻᒪᓗ ᑎᑎᕋᖃᑎᒌᑦᑐᑎᒃ. ᐃᕐᓂᖓ ᐃᓅᓚᐅᖅᑳᖅᑎᓐᓇᒍ ᑮᓇᐅᔭᓕᕆᔨᐅᓚᐅᖅᓯᒪᕗᖅ ᑐᑭᒧᐊᖅᑎᑦᑎᔨᐅᓪᓗᓂᓗ ᐊᔾᔨᒌᙱᑦᑐᓄᑦ ᑲᑐᔾᔨᖃᑎᒌᓄᑦ ᑭᓯᐊᓂ ᐃᓚᒥᓄᑦ ᓵᙵᔭᖃᐃᓐᓇᖅᐳᖅ ᐊᕐᕌᒍᒐᓴᐅᓕᖅᑐᓂᒃ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᒃᑲᓐᓂᕋᓱᒃᖢᓂ. ᓵᓚᖃᓚᐅᕆᕗᖅ Indspire-ᒥ ᑐᓐᓂᖅᑯᓯᐊᒥᒃ ᒪᒃᑯᒃᑐᓄᑦ ᑐᓂᔭᐅᕙᒃᑐᓄᑦ.

ᐃᓕᓐᓂᐊᕐᕕᐊᕈᓯᐅᑉ ᓯᓚᑖᓂ, ᐊᕐᓇ'ᓈᖅ ᐃᓕᑦᑎᓯᒪᕗᖅ ᐱᕈᖅᓴᓛᖑᓪᓗᓂᓗ ᓄᓇᑐᐃᓐᓇᕐᒥ ᑎᓴᒪᓕᒃᑯᑦ ᐊᑖᑕᒥᓂᒃ ᐱᖃᑎᖃᖅᖢᓂ, ᐃᓕᑦᑎᓪᓗᓂ ᕿᓯᓕᕆᓂᕐᒥᒃ ᐊᖑᓇᓱᖕᓂᕐᒥᒡᓗ ᑐᒃᑐᓂᒃ ᓇᒧᙵᐅᕙᓪᓕᐊᓂᕐᒥᒡᓗ. ᐃᓕᑦᑎᓯᒪᒋᕗᖅ ᒥᖅᓱᕐᕕᖓᓂ, ᐊᓐᓄᕌᓕᐅᖅᐸᒃᖢᓂ ᐃᒻᒥᓂᒃ, ᑕᒻᒪᖅᐸᒃᖢᓂ ᐃᓕᑦᑎᕙᓪᓕᐊᕙᒃᖢᓂᓗ. ᐃᓕᑦᑎᑦᑎᐊᕐᓂᖅᓴᐅᓲᖑᕗᖅ ᐊᒡᒐᖏᑦ ᐱᔭᒃᓴᖃᖅᑎᓪᓗᒋᑦ, ᐱᓕᕆᓂᒃᑯᑦ, ᓈᓚᖕᓂᒃᑯᑦ ᐊᒻᒪ ᐱᓕᕆᖃᑎᖃᕐᓂᒃᑯᑦ ᐅᖃᓕᒫᙱᖔᖅᖢᓂ ᐃᓕᓐᓂᐊᕈᑎᓂᒃ.

ᐅᖃᐅᔾᔨᒋᐊᕈᑎᒋᔭᖓ ᑕᐃᒃᑯᓄᖓ ᓂᕆᐅᓇᙱᑦᑐᒃᑯᑦ ᐊᓯᔾᔨᕐᓂᐅᔪᓄᑦ ᐃᓅᓯᖏᓐᓂ ᓇᒧᙵᐅᕙᓪᓕᐊᓂᖏᓐᓂ ᐃᓕᓐᓂᐊᕐᓂᖏᓐᓂ ᐊᒻᒪ ᐅᕝᕙᓘᓐᓃᑦ ᐃᖅᑲᓇᐃᔮᖏᓐᓂ ᐃᒪᓐᓇᐅᕗᖅ, "ᐃᓱᒪᕗᖓ ᐊᓯᔾᔨᕐᓂᐅᔪᑦ ᐃᓕᑦᑎᕙᓪᓕᐊᓂᕐᒧᑦ ᐱᕕᒃᓴᑦᑎᐊᕙᐅᓂᖏᓐᓂᒃ... ᐃᓅᓯᖅ ᐃᖏᕐᕋᓂᐅᕗᖅ, ᓂᕆᐅᓇᙱᑦᑐᒃᑯᑦ ᐊᓯᔾᔨᕐᓂᐅᔪᑦ ᐱᕈᖅᐸᓪᓕᐊᔾᔪᑕᐅᔪᓐᓇᖅᐳᑦ. ᑐᕌᖅᑎᑦᑎᔪᓐᓇᖅᐳᖅ ᐃᓕᑦᑎᕙᓪᓕᐊᓂᕐᒥᒃ ᐱᔪᒪᙱᑕᕐᓂᒃ. ᐊᑐᕐᓂᖃᖅᑐᒥ ᐃᓕᑦᑎᓂᐅᔪᒥ ᐃᓛᓐᓂᒃᑯᑦ... ᐱᐅᖕᒪᑦ ᐃᓕᑦᑎᕙᓪᓕᐊᖏᓐᓇᖅᖢᓂ ᐊᒻᒪ ᐱᕈᖅᐸᓪᓕᐊᓪᓗᓂ ᐊᒻᒪ ᐊᓯᔾᔨᖅᐸᓪᓕᐊᓂᖅ ᑕᐃᒪᐃᓕᓲᖑᕗᖅ."

ᓄᓇᖃᖅᑳᖅᑐᑦ ᐃᓕᓐᓂᐊᖅᑎᑦ ᐃᓱᒪᔪᑦ ᐊᐅᓪᓚᕈᒪᓗᑎᒃ ᓄᓇᒋᔭᒥᓂᒃ ᐃᓕᓐᓂᐊᒃᑲᓐᓂᕐᓗᑎᒃ, ᐅᖃᐅᔾᔨᒋᐊᕈᑎᒋᔭᖓ ᐃᒪᓐᓇ, "ᑲᑉᐱᐊᓇᒐᓚᒃᑐᒃᓴᐅᔫᒐᓗᐊᖅ ᐃᓕᕋᓇᖅᖢᓂᓗ, ᑭᓯᐊᓂ ᐱᐅᙱᓛᖑᓇᔭᖅᑐᖅ, ᐱᐅᙱᓛᖑᓇᔭᖅᖢᓂᓗ ᐊᓂᑐᐃᓐᓇᕐᓗᓂ ᐊᖏᕐᕋᐅᓗᓂᓗ, ᑭᓯᐊᓂ ᐱᐅᓛᖑᓇᔭᖅᑐᖅ ᖃᐅᔨᒋᐊᕐᓗᒍ, ᐱᕈᖅᐸᓪᓕᐊᓗᓂ, ᐃᓕᑦᑎᐊᕐᔪᒡᓗᓂᓗ, ᐊᒻᒪ ᐊᖏᕐᕋᕐᓗᓂ ᐋᒃᑲᓘᓐᓃᑦ." ᑕᑯᕙᒃᐳᖅ ᐱᒻᒪᕆᐅᓂᖓᓂᒃ ᕿᒪᐃᓗᓂ ᓄᓇᓕᒋᔭᒥᓂᒃ, ᑕᒪᓐᓇ ᐊᔪᕐᓇᐃᓐᓇᐅᔭᕋᓗᐊᖅᑎᓪᓗᒍ ᑭᒃᑯᓕᒫᓄᑦ, ᐊᑕᐅᑦᑎᒃᑯᓪᓗ, ᓴᖅᑭᑉᐸᓪᓕᐊᓕᖅᑎᓪᓗᒍ ᖃᕆᑕᐅᔭᒃᑯᑦ ᐃᓕᑦᑎᕙᓪᓕᐊᓂᖅ, ᑕᐃᒪᐃᖏᓐᓇᕆᐊᖃᖅᐸᙱᒻᒥᔪᖅ.

ᐃᓱᒪᒋᓪᓗᒋᑦ ᐃᓚᐃᓐᓈᕆᓂᕐᒧᑦ ᐊᑐᐊᒐᐃᑦ ᐊᒻᒪ ᐱᓕᕆᔾᔪᓯᑦ ᐊᕝᕕᐊᕈᑕᐅᓲᑦ ᐅᑭᐅᖅᑕᖅᑐᒥ ᐃᓕᓐᓂᐊᖅᑎᓄᑦ ᐱᓇᓱᒃᑎᓪᓗᒋᑦ ᐃᑲᔫᑎᒃᓴᓂᒃ ᐅᖃᓕᒫᒐᒃᓴᐅᑦᑎᐊᙱᑦᑐᓂᒃ, ᐊᕐᓇ'ᓈᖅ ᐃᓕᓐᓂᐊᖅᑎᓂᒃ ᓴᐱᓕᖅᑕᐃᓕᖁᔨᕗᖅ.  "ᐃᒪᓐᓇᐅᖁᔨᓇᔭᖅᐳᖓᓕ ᑲᔪᓯᑎᑦᑎᐊᕋᓱᒡᓗᒍ ᐊᒻᒪ ᑐᑭᓯᓇᓱᒡᓗᓂ ᖃᓄᖅ ᐅᖃᕐᒪᖔᑕ, ᓲᖃᐃᒻᒪ ᐅᓇᑕᕈᑎᖃᕋᔭᕋᕕᑦ ᐱᓕᕆᔾᔪᓯᕐᓂᒃ ᐋᖅᑭᒃᑕᐅᓯᒪᙱᑦᑐᓂᒃ ᐅᕙᑦᑎᓐᓄᑦ ᑲᔪᓯᑦᑎᐊᕈᑎᒃᓴᓂᒃ," ᐅᖃᖅᑐᖅ, ᐅᖃᐅᓯᖃᖅᖢᓂ ᖃᓄᖅ ᐱᔭᒃᓴᖃᓗᐊᖅᐸᓚᐅᕐᓂᕐᒥᓂᒃ ᐊᑐᐊᒐᕐᓂᒃ ᐊᒻᒪ ᒪᓕᒐᕐᓂᒃ ᐊᒻᒪ ᒫᓐᓇ ᑐᑭᓕᐅᕆᒐᔪᓕᖅᖢᓂᒋᑦ.

ᐊᕐᓇ'ᓈᖅ ᒪᒃᑯᖕᓂᖅᓴᒥᒃ ᐃᒻᒥᓂᒃ ᐅᖃᐅᔾᔨᔪᓐᓇᖅᐸᑦ ᐃᒪᓐᓇᐅᓇᔭᖅᐳᖅ, "ᐊᒃᓱᕈᖅᖢᓂ ᐱᓕᕆᓂᖅ ᐊᑑᑎᖃᖅᐳᖅ." ᑭᖑᒧᑦ ᑕᑯᓪᓗᓂ ᐃᓱᒪᔪᖅ ᐱᔭᕇᕈᓐᓇᔾᔮᕋᓱᒋᙱᖦᖢᓂᐅᒃ Master's Degree-ᒥᒃ ᐅᕝᕙᓘᓐᓃᑦ ᐸᐃᑉᐹᖅᑖᖅᓯᒪᔪᖅ ᑮᓇᐅᔭᓕᕆᔨᒻᒪᕆᐅᓂᕐᒧᑦ ᑎᓕᔭᐅᓯᒪᓂᕐᒥᓂᒃ ᐊᒃᓱᕈᕐᓇᓗᐊᕐᓂᖓᓄᑦ ᑭᓯᐊᓂ ᒫᓐᓇ ᐃᓱᒪᖅᓱᕐᓂᖅᓴᐅᓕᖅᐳᖅ ᐊᐅᓚᑦᑎᔪᓐᓇᕐᓂᖅᓴᐅᓕᖅᖢᓂᓗ ᖃᓄᐃᓕᐅᖅᑕᒥᓂᒃ ᐃᓅᓯᕐᒥᓂ ᖁᕕᐊᓱᒃᖢᓂᓗ.

ᓇᓕᒧᒌᒃᑎᓐᓇᓱᒡᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖅ ᖃᓄᐃᙱᑦᑎᐊᕐᓂᕐᓗ, ᐊᕐᓇ'ᓈᖅ ᐃᒪᓐᓇᐅᖁᔨᕗᖅ, "ᐃᓕᖕᓂᒃ ᐱᑦᑎᐊᑐᐃᓐᓇᕐᓗᑎᑦ. ᑭᓱᑐᐃᓐᓇᐃᑦ ᐊᒃᓱᕈᕐᓇᖅᐳᑦ. capitalist ᐱᑦᑎᐊᖅᑕᐅᙱᓐᓂᖓ ᐊᒃᓱᕈᕐᓇᖅᐳᖅ." ᑳᐱᓕᐅᖅᐸᒌᖅᐸᒃᖢᓂ ᐅᓪᓛᒃᑯᑦ ᐃᒻᒥᓄᑦ. "ᖃᐅᔨᓇᓱᑐᐃᓐᓇᕐᓂᖅ ᒥᑭᑦᑐᑯᓗᖕᓂᒃ ᑕᑯᑎᑦᑎᔪᓂᒃ ᐃᓕᖕᓂᒃ ᑐᙵᓇᕐᓂᕐᓂᒃ ᐃᑲᔪᖅᐸᒃᐳᖅ ᐱᐅᓂᖅᓴᒃᑯᑦ ᐊᐅᓚᑦᑎᕝᕕᖃᕐᓂᕐᒥᒃ ᐊᒃᓱᕈᕐᓇᖅᑐᓂᒃ ᐱᕙᒌᔭᕐᓂᕐᒥᒡᓗ ᑭᓱᑐᐃᓐᓇᓄᑦ," ᐅᖃᕆᓪᓗᓂ.

ᐱᔪᒃᓯᓕᒑᖓᒥ, ᐃᕐᓂᖓ ᑲᔪᖏᖅᓴᐃᓲᖑᕗᖅ. "ᑕᑯᕙᒃᑕᖓ ᐊᖏᕐᕋᑦᑎᓐᓂ, ᖃᓄᖅ ᐅᕙᓐᓂᒃ ᐃᓕᖅᑯᓯᖃᖅᐸᖕᒪᖔᑦ, ᑕᒪᒃᑯᐊᓕᒫᑦ ᐃᑲᔪᕐᓂᐊᖅᑐᑦ ᑭᓇᐅᓂᕐᒥᓄᑦ ᐃᓐᓇᐅᓕᕐᓗᓂ, ᐊᒻᒪ ᖁᕕᐊᓱᖁᕙᕋ, ᐱᒃᑯᒥᒍᓱᒡᓗᓂ, ᐃᓐᓇᐅᓗᓂ... ᐊᒻᒪ ᐃᒻᒪᖄ ᑕᐃᒪᐃᓐᓂᖓᓄᑦ ᐃᖅᑲᓇᐃᔭᐃᓐᓇᕈᓐᓇᖅᐳᖓ ᐃᑲᔪᕋᓱᒃᐸᒃᑐᓂ ᓲᖃᐃᒻᒪ ᓄᓇᕐᔪᐊᒦᖁᒐᒃᑯ ᑐᓗᖅᑕᕈᑎᑕᖃᓗᐊᙱᓪᓗᓂ, ᓂᕆᐅᒃᐳᖓ, ᐱᕈᖅᐸᓪᓕᐊᑎᓪᓗᒍ," ᖁᕕᐊᓱᒃᑐᖅ. ᐊᖏᔪᐊᓗᖕᓂᒃ ᐸᕐᓇᐅᑎᖃᖅᐳᖅ ᓴᓇᔪᒪᓪᓗᓂᒋᒃ ᑕᒪᕐᒥᒃ ᐊᐳᑎᒧᑦ ᐊᓐᓄᕌᓂᒃ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᐊᕐᓇ'ᓈᖅ ᑭᖑᓪᓕᖅᐹᒥᒃ ᐅᖃᐅᓯᕆᓚᐅᖅᑕᒥᓂᒃ ᐅᖃᐅᓯᖃᖅᐳᖅ ᓯᓚᑐᓂᕐᒥᓂᒃ, "ᐃᓕᖕᓂᒃ ᐱᑦᑎᐊᖏᓐᓇᐅᔭᖅᐸᒡᓗᑎᑦ, ᐊᒻᒪ ᐅᕙᓐᓂᒃ ᐊᒃᓱᕈᓗᐊᕌᓗᓚᐅᙱᒃᑲᓗᐊᖅᐳᖓ ᖃᐅᔨᓇᓱᒡᓗᖓ ᑭᓱᒥᒃ ᐱᔪᒪᖕᒪᖔᕐᒪ ᒪᒃᑯᒃᑑᑎᓪᓗᖓ, ᐊᒻᒪ ᒪᒃᑯᒃᑑᓪᓗᖓ ᖁᕕᐊᒋᑐᐃᓐᓇᓪᓗᐊᓚᐅᖅᑕᕋ."

ᑕᐃᑦᓱᒪᓂ ᑭᓪᓗᓛᖅ ᐊᕐᓇ'ᓈᖅ ᐃᓱᒪᓚᐅᖅᓯᒪᕗᖅ ᒪᑐᐃᖅᓯᔪᒪᓪᓗᓂ ᑐᓐᓂᓕᐅᕐᕕᖕᒥᒃ, ᒫᓐᓇᓕ ᑕᐅᑐᙳᐊᖅᐸᓕᖅᐳᖅ ᐊᓯᔾᔨᖅᐸᓪᓕᐊᖏᓐᓇᕐᓂᐊᓕᖅᑐᒥᒃ ᐱᐅᓂᖅᓴᒧᑦ ᐱᓕᕆᓂᖓᒍᑦ ᐃᑲᔪᕋᓱᒃᐸᒃᑐᓄᑦ. ᐊᔪᙱᓐᓂᖃᕐᓂᕐᒧᑦ ᖃᐅᔨᓴᖅᑕᐅᓂᖅ ᑐᕌᖅᑎᑦᑎᓚᐅᖅᐳᖅ ᑮᓇᐅᔭᓕᕆᔨᐅᓂᕐᒧᑦ ᑭᓯᐊᓂ ᐃᓕᑦᑎᕙᓪᓕᐊᓪᓗᓂ ᓇᒧᙵᐅᔪᓐᓇᕐᓂᕐᒥᒃ ᑎᓴᒪᓕᒃᑯᑦ ᐊᑖᑕᒥᓄᑦ ᐱᒻᒪᕆᐊᓘᓛᖑᖃᑕᐅᓯᒪᕗᖅ ᐊᔪᕆᖅᓲᔾᔨᓂᐅᔪᒥ ᐱᓯᒪᔭᖓᓂ. ᖃᐅᔨᒪᓪᓗᓂ ᑕᒪᐃᓐᓂᒃ ᓄᓇᒥᒃ ᒪᓕᒐᕐᓂᒡᓗ, ᐱᓕᕆᕗᖅ ᓄᓇᕐᔪᐊᖅ ᓄᓇᑦᑎᐊᕙᐅᓂᖅᓴᐅᖁᓪᓗᒍ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.