"ᐅᑭᐅᖅᑕᖅᑐᒧᐊᕋᒪ, ᓴᖅᑭᑕᐅᑎᓪᓗᒍ ᐃᓕᖅᑯᓯᕋ ᐊᒻᒪ ᐃᓯᕐᕕᒋᓪᓗᒍ ᓄᓇᑦᑎᐊᕚᓗᒃ ᐃᑭᑎᑕᕗᑦ ᐃᓗᓐᓂ ᐱᑕᖃᙱᑦᑐᒥᒃ," ᑲᐃᓕᒃ ᑭᓱᐊᓐ ᑕᐃᓗ ᐃᖅᑲᐅᒪᔪᖅ. ᑕᐃᓗ ᐃᓅᕕᖕᒥᙶᖅᑐᖅ, ᓄᓇᑦᓯᐊᕐᒥᐅᑕᖅ ᒫᓐᓇᓗ ᓄᓇᖃᓕᖅᑐᖅ 16 ᑭᓚᒦᑕᓂᒃ ᐅᖓᓯᖕᓂᓕᖕᒥ ᓄᓇᓕᐅᑉ ᐅᐊᖕᓇᖓᓂ ᑭᓯᐊᓂ ᐱᕈᖅᓴᓚᐅᖅᓯᒪᔪᖅ ᖃᓪᓗᓈᓂ ᓄᓇᓕᑭᑦᑐᒥ ᐃᒡᓗᕋᓛᕐᒥ ᑕᐃᔭᐅᓪᓗᓂ Hᐊᐃᓕ ᓴᓪᓕᖅ. 

ᐱᕈᖅᓴᓂᖅ ᐳᓚᕋᖅᑐᓕᕆᓂᕐᒥᑦ ᓄᓇᓕᖕᓂᑦ ᐱᔪᒪᓂᖃᓕᓚᐅᖅᑐᖅ. ᕿᓂᕆᐊᖅᐸᓚᐅᖅᑐᖅ, ᖃᔭᕆᐊᖅᑐᓂ, ᒥᑭᒋᐊᕐᓂᐊᖅᑐᓂ ᐊᒻᒪ ᐱᓕᕆᖃᑎᖃᖅᑐᓂ ᕿᒻᒥᓂᑦ. ᐱᕈᖅᓴᔭᐅᓪᓗᑎᒃ ᓯᓚᒥ ᐊᖓᔪᖅᑳᓄᑦ, ᐊᖑᓇᓱᒋᐊᖅᐸᓚᐅᖅᑐᑦ ᐊᕐᕌᒍᑕᒫᑦ, ᐱᙳᐊᖅᐸᓚᐅᖅᑐᑦ ᐊᒻᒪᓗ ᓄᓇᑐᐃᓐᓇᕐᒦᑉᐸᑦᑐᑎᒃ. ᐃᖅᑲᓇᐃᔭᓚᐅᖅᓯᒪᔪᖅ ᐊᑖᑕᖓᑕ ᐊᒃᓴᓗᐊᖃᕐᕕᖓᓂ ᐊᒻᒪᓗ ᐊᒃᑐᐊᓂᖃᓗᐊᕋᓂ ᐃᓕᖅᑯᓯᑦᑎᓐᓄᑦ ᑭᓯᐊᓂ ᐅᑭᐅᖅᑕᖅᑐᒧᑦ ᓅᒻᒪᑕ. 

ᑕᐃᓗ ᐃᓕᓐᓂᐊᖅᑎᑦᑎᐊᕙᐅᓚᐅᙱᑦᑐᖅ ᑭᓯᐊᓂ ᐊᓕᐊᓇᐃᒍᓱᖕᓂᖅᓴᐅᓚᐅᖅᑐᖅ ᐃᓕᓐᓂᐊᖅᖢᓂ ᓅᓚᐅᖅᑎᓪᓗᒍ. ᐃᓕᓴᐃᔨᓂ ᓇᓂᓯᓚᐅᖅᑐᖅ ᐱᙳᐊᕈᒪᓂᖅᓴᐅᔪᓂᑦ ᐊᒻᒪ ᓱᕈᓯᑦ ᐱᙳᐊᕈᒪᓚᐅᖅᑐᑦ ᐱᙳᐊᕈᒪᑐᐃᓐᓇᓚᐅᖅᑐᑦ. ᓯᓚᑦᑐᓴᕐᕕᕐᔪᐊᕐᒨᖅᓯᒪᑎᓪᓗᒍ ᐃᓐᓇᐅᓪᓗᓂ, ᐱᔭᕇᓚᐅᖅᓯᒪᙱᑦᑐᖅ ᐃᓕᓐᓂᐊᕐᕕᐊᓗᒻᒥᒃ. "ᐊᐅᓚᑐᐃᓐᓇᓕᓚᐅᖅᑐᖓ ᐊᓐᓇᐅᒪᓇᓱᒃᖢᖓᓗ," ᓈᓴᐃᒃᑲᓐᓂᖅᖢᓂ. 

"ᐃᓕᖅᑯᓯᓐᓄᑦ ᐃᓚᐅᓪᓗᖓ 16−ᖑᓕᖅᖢᖓ, ᐊᖅᑯᑎᒋᓂᐊᖅᑕᕋ... ᐃᑲᔪᕐᖢᓂᖓ ᐊᓂᒍᐃᓂᕐᒥᒃ ᐅᓄᖅᑐᓂᒃ ᐊᒃᓱᕈᕐᓇᖅᑐᒃᑰᕈᑎᒋᔭᓐᓂᒃ" 

ᑲᑎᖃᑎᖃᕐᓂᖅ ᐃᓕᖅᑯᓯᕐᒥᑦ ᐊᓯᔾᔩᔪᖅ ᐃᓅᓯᖓᓂᑦ. "ᐊᒃᓱᕈᕐᓇᖅᑐᒻᒪᕆᐅᓚᐅᖅᑐᖅ ᐅᕙᓐᓄᑦ ᐅᑎᕆᐊᒃᓴᖅ ᐃᓕᖅᑯᓯᓐᓄᑦ ᐊᒻᒪᓗ ᓄᑕᕋᐅᑎᓪᓗᖓ ᖃᓄᐃᓕᐅᕈᒪᓚᐅᖅᑐᖓ ᐃᓗᐊᓂ ᐱᓪᓚᑲᐅᔭᕐᓂᕐᒧᑦ ᐃᓄᖕᓂᒃ ᐃᓕᖅᑯᓯᓕᖕᓄᑦ, ᐅᕝᕙᓘᓐᓃᑦ ᐃᖅᑲᓇᐃᔮᓐᓄᑦ ᖃᓄᐃᓕᐅᕆᐊᒃᓴᖅ ᓄᓇᒥ," ᑲᔪᓯᓪᓗᓂ.  

ᖃᐅᔨᓴᖅᑐᓕᕆᓂᕐᒥᒃ ᐱᓇᔪᓚᐅᖅᑐᖅ ᑭᓯᐊᓂ ᐊᓕᐊᓇᐃᒋᙱᖦᖢᒍ ᑎᑎᕋᕐᕕᖕᒦᑎᓪᓗᒍ. ᓇᓂᓯᑦᑕᓯᓐᓇᓕᓚᐅᖅᑐᖅ ᐳᓚᕋᑦᑐᓕᕆᓂᕐᒥᒃ. "ᓄᓇᒧᐊᕈᓐᓇᓚᐅᙱᓐᓇᒪ ᑕᐃᒪᓐᓇᑎᒋ. ᐃᖅᑲᓇᐃᔭᕆᐊᖃᒻᒪᕆᒃᑲᕕᑦ ᐃᓅᓇᓱᓪᓗᓂ ᐅᑭᐅᖅᑕᖅᑐᒥ, ᐃᓅᓇᓱᓐᓂᐅᑉ ᐊᑭᖓ ᐊᑭᑐᔪᒻᒪᕆᐅᒻᒪᑦ. ᐃᖅᑲᓇᐃᔮᒃᓴᒥᒃ ᓴᖅᑭᑦᑎᒍᕕᑦ ᐊᐅᓪᓛᖅᓯᒪᓗᑎᑦ, ᐃᖅᑲᓇᐃᔮᕆᒍᕕᐅᒃ, ᐃᓕᓐᓂᐊᕐᓗᑎᑦ ᐃᓕᖅᑯᓯᕐᓂᒃ, ᐃᓕᖅᑯᓯᕐᓂᒃ ᐃᓕᓐᓂᐊᖅᑎᑦᑎᓗᑎᑦ, ᐃᓕᖅᑯᓯᕐᓂᒃ ᑐᓴᖅᑎᑦᑎᓗᑎᑦ ᐃᖅᑲᓇᐃᔮᕕᑦ ᐃᓚᒋᓗᓂᐅᒃ, ᑕᐃᒪᓕ ᐱᓯᒪᐃᓐᓇᕈᓐᓇᕐᓂᖅᓴᐅᓇᔭᖅᐳᑎᑦ ᐃᓕᖅᑯᓯᕐᓂᒃ ᐊᒻᒪ ᐃᓕᓐᓂᐊᕐᓂᕐᒥᒃ," ᓇᓗᓇᐃᖅᓯᓪᓗᓂ.

ᐃᒻᒥᓂᒃ ᐱᓕᕆᓚᐅᖅᑐᖅ ᑭᓯᐊᓂ ᖃᐅᔨᒪᓚᐅᖅᑐᖅ ᐃᑲᔫᑎᖃᕐᓂᐊᕐᓂᖓᓂᒃ ᐊᓯᒥᓄᑦ. "ᖃᐅᔨᒪᓚᐅᕐᒥᔪᖓ ᓄᓇᖃᖅᑳᖅᓯᒪᙱᑦᑐᑦ ᐃᓄᐃᑦ ᐊᑐᐃᓐᓇᖃᓚᐅᙱᒻᒪᑕ ᑕᒪᑐᒥᖓ ᑲᒪᓇᖅᑐᒥᒃ ᐃᓅᓯᖃᕐᓂᕐᒥᒃ ᑖᔅᓱᒥᖓᓗ ᐃᓕᖅᑯᓯᕆᔭᐅᔪᒥᒃ, ᑕᐃᒪᐃᓐᓂᖓᓄᓪᓗ ᑖᒃᑯᐊ ᐊᒥᖅᑳᕈᑎᒋᔪᒪᓚᐅᖅᐸᒃᑲ, ᑭᓯᐊᓂᑦᑕᐅᖅ ᓴᖅᑭᑎᑦᑎᓪᓗᖓ ᐊᑐᖅᑕᐅᔪᓐᓴᖅᑐᒥᒃ ᓄᓇᖃᖅᑳᖅᑐᓄᑦ ᐃᓄᖕᓄᑦ ᐊᑐᕈᓐᓇᖁᓪᓗᒋᑦ ᐃᓕᖅᑯᓯᑐᖃᕐᓄᑦ ᑐᙵᕕᓕᖕᓂᒃ ᐃᖅᑲᓇᐃᔮᕆᔭᐅᔪᓂᒃ," ᑕᐃᓗ ᐊᒃᑐᐊᓂᖃᖅᐳᖅ. ᐃᑲᔪᕈᒪᓚᐅᖅᑐᖅ ᓄᓇᖃᖅᑳᖅᓯᒪᔪᓂᒃ ᐊᑭᓕᖅᑕᐅᓗᑎᒃ ᖃᐅᔨᒪᓂᖏᓐᓄᑦ. 

"ᐃᓕᖅᑯᓯᕋ ᐅᓪᓘᑉ ᐃᓚᐃᓐᓇᖓᓄᑦ ᖁᕕᐊᓱᖁᓚᐅᙱᑕᕋ. ᖃᐅᑕᒫᑦ ᐃᓅᓯᓐᓄᑦ ᐱᓕᒻᒪᒃᓴᖃᑦᑕᖁᓚᐅᖅᑕᕋ ᑕᒪᓐᓇᓗ ᐃᖏᕐᕋᓂᕆᓯᒪᓕᖅᖢᒍ." 

ᑕᐃᓗ ᓯᓐᓇᑦᑑᒪᓕᐅᓚᐅᖅᑐᖅ ᓱᓕᓪᓗᓂ. ᐸᓂᖓ ᐳᓚᕋᖃᑦᑕᖅᓯᒪᓕᖅᑐᖅ 6-ᓂᒃ ᑕᖅᑭᖃᓕᕐᒪᑦ ᐊᒻᒪᓗ ᒫᓐᓇ ᑕᑯᓐᓇᓕᖅᑐᓂ 13-ᓂᒃ 13-ᓂᒃ, ᓈᓚᑦᑐᓂ ᐅᖃᐅᓯᕆᔭᒥᓂᒃ ᐊᒻᒪᓗ ᐃᓕᓴᐃᓪᓗᓂ, ᑕᑯᑎᑦᓯᓪᓗᓂ ᐃᓕᓐᓂᐊᖅᑎᓂᒃ ᖃᓄᖅ ᓂᕿᒥᒃ ᒥᑭᓪᓕᑎᕆᒍᓐᓇᕐᒪᖔᕐᒥᒃ ᐊᒻᒪᓗ ᓂᕿᓕᐅᕐᓂᕐᒥᒃ ᑐᑦᑐᓂᒃ. 

ᐱᑎᑦᑎᔪᓐᓇᕐᓂᖅ ᖃᐅᔾᔨᑎᑖᕐᓂᕐᒥᒃ ᐃᓕᓐᓂᐊᖅᑎᓄᑦ, ᐱᑎᓪᓗᒋᑦ ᐊᐅᔭᒃᑯᑦ ᐃᖅᑲᓇᐃᔭᕐᓂᕐᒥᒃ ᐊᑭᓕᖅᑕᐅᓗᑎᒃ ᐃᓕᑦᑎᓗᑎᒃ ᐃᓕᖅᑯᓯᖏᓐᓂ ᑖᓐᓇ ᑕᐃᓗ ᐃᒃᐱᒍᓱᒃᓗᓂ ᖁᓱᔪᓐᓃᕐᓗᑎᒃ ᖃᓄᐃᓕᐅᕆᐊᒃᓴᖅ ᐱᐅᓂᖅᓴᒥᒃ ᐱᓕᕆᔪᒪᒃᐸᑕ. ᐅᐱᒍᓱᒃᑐᖅ ᐳᓚᕋᖃᑦᑕᕐᓂᕐᒥᓂᒃ ᐊᒻᒪ ᖃᐅᔨᖃᑦᑕᖅᓯᒪᔭᖏᓐᓂᒃ ᓴᓇᓯᒪᔭᖏᓐᓂᒃ, ᐊᒻᒪᓗ ᐃᓅᓯᕐᒧᑦ ᐊᒃᑐᐃᓂᕆᔭᖓᑦ ᓇᖕᒥᓂᕆᔭᐅᔪᒧᑦ, ᑮᓇᐅᔭᓕᐅᕐᓂᖓ ᐃᓕᓐᓂᐊᖅᑎᓂᒃ ᐃᖅᑲᓇᐃᔭᖅᑎᑖᒃᑲᓐᓂᕈᓐᓇᕐᒪᑦ ᐊᒻᒪ ᓄᓇᓕᖕᓄᑦ ᐅᑎᖅᑎᑦᑎᒃᑲᓐᓂᕈᓐᓇᖅᓯᓗᓂ. 

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐱᕕᒃᓴᐅᔪᓐᓇᖅᑐᓂᒃ ᐱᖁᔨᓪᓗᑎᒃ; ᑕᐃᒪᐃᓚᐅᖅᑐᖅ ᐊᒻᒪᓗ ᒫᓐᓇ ᐊᑭᓕᖅᑕᐅᓪᓗᓂ ᖁᕕᐊᓱᒃᑲᔭᖅᑐᓂ ᐱᓕᕆᓪᓗᓂ ᐊᑭᖃᕋᓂ. ᓂᕆᐅᒃᑭᕗᖅᑕᐅᖅ ᑲᒪᒋᔭᖃᕐᓂᐊᕐᓂᖏᓐᓂᒃ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒥᒃ. ᐊᐃᑦᑖᕈᓱᒃᑐᖅ ᐅᖃᖃᑎᖃᑲᑕᒍᓐᓃᕋᒥ ᐃᓐᓇᕐᓂᒃ ᑐᙵᑦᑎᐊᓕᒃᑲᓐᓂᖁᓪᓗᒍ. ᐊᒥᓱᓂᒃ ᐃᓄᖕᓂᒃ ᐅᖃᓪᓚᒃᑎᑦᑎᔪᖃᖃᑦᑕᙱᖦᖢᓂ ᐱᒋᐊᕐᓂᖓᓂ, ᐃᓱᒪᓚᐅᖅᐳᖅ ᐃᓄᑑᓪᓗᓂ ᓇᖕᒥᓂᖅ ᐱᓕᕆᓂᕆᓚᐅᖅᑕᖓᓂ. 

"ᐃᓱᒪᒋᔭᕋ ᐅᖃᓪᓚᖕᓂᐅᑉ ᓴᙱᓂᖓ ᐱᒻᒪᕆᐅᓇᓱᒋᓪᓗᒍ, ᐅᖃᐅᓯᕆᑐᐃᓐᓇᕐᓗᒋᑦ ᐃᓱᒪᒋᔭᑎᑦ ᓂᕆᐅᒋᔭᑎᓪᓗ ᐱᔪᒪᔭᑎᓪᓗ ᒪᑐᐃᙶᕐᓗᑎᓪᓗ ᑕᒻᒪᕐᓂᕐᓂᒃ ᒪᑐᐃᙶᕐᓗᑎᓪᓗ ᐊᓯᕕᑦ ᐅᖃᐅᔾᔪᐃᔾᔪᑎᖏᓐᓄᑦ," ᐅᖃᖅᑐᖅ. ᑕᐃᒪᓕ ᑕᒻᒪᕋᓱᐊᖅᐸᓕᖅᐳᖅ ᐃᓕᑕᒥᓂᒃ ᐊᒻᒪᓗ ᐊᑐᖅᑐᒋᑦ ᓇᒻᒥᓂᖅᑖᕋᓱᐊᖅᑐᓂᒃ ᐊᒻᒪᓗ ᐅᕕᒃᑲᐅᔪᓂᒃ ᐃᓕᒋᐊᖃᕐᓂᐊᖏᒻᒪᑕ ᐊᒃᓱᕈᕐᓂᕐᒥᒃ. 

"ᐱᔾᔪᑎᖓ ᓴᖅᑭᑎᑦᑎᔪᒪᓂᐅᕗᖅ ᐊᔪᖅᓴᙱᓐᓂᕆᔭᐅᔪᒥᒃ ᑭᒃᑯᓕᒫᓄᑦ, ᑕᒪᓐᓇ ᑐᓴᖅᑕᐅᔪᒃᓴᖅ ᐅᖃᐅᓯᕆᔾᔮᙱᑕᕋ, ᐃᑲᔪᕋᓱᖕᓂᐊᖅᐳᖓ." 

ᓯᕗᒧᑦ ᑕᑯᒋᐊᕐᓗᓂ, ᓴᐃᓕᔪᒪᑐᐃᓐᓇᖅᐳᖅ, ᓄᓇᑐᐃᓐᓇᕐᒥᐅᑕᐅᓗᓂ ᐊᒻᒪ ᓄᓇᓕᕋᓛᑦ ᐱᕈᑦᑎᐊᖁᓗᒋᑦ. ᓯᕿᓂᕐᒥᑦ ᐆᒻᒪᖅᑯᑎᖃᕐᓂᕐᒧᑦ ᐃᖏᕐᕋᖃᑦᑕᕐᒪᑕ ᐊᒻᒪᓗ ᓇᒻᒥᓂᖅ ᓂᕿᑖᖅᐸᓪᓕᐊᓪᓗᑎᒃ, ᓴᓂᖃᕋᑎᒃ. ᐊᓯᒥᓂᒃ ᐃᑲᔪᕈᒪᔪᖅ ᑕᐃᒪᐃᓕᐅᖃᑕᐅᓗᓂ. "ᐸᓂᒐ ᐱᕈᖁᒐᒃᑯ, ᖃᐅᔨᒪᓗᒍ ᖃᓄᖅ ᕿᑐᒻᒪᒃᓴᐃᔪᓐᓇᕐᒪᖔᑦ, ᖃᐅᔨᒪᓗᓂ ᖃᓄᖅ ᓇᖕᒥᓂᖅ ᐃᓅᓕᓴᐅᑎᓕᐅᕆᐊᒃᓴᖅ, ᓇᖕᒥᓂᖅ ᓂᕿᖓᓂᒃ, ᐃᒡᓗᖓᓂᒃ, ᑕᒪᒃᑯᓂᖓᕈᓘᔭᕐᓗ. ᐳᓚᕋᖅᑐᓕᕆᓂᖅ ᐱᐅᔪᐊᓘᖕᒪᑦ ᖃᓄᖅ ᐱᖕᒪᖔᑦᑕ," ᒥᑕᐅᑎᖓ. 

"ᓇᖕᒥᓂᖃᕐᓂᕐᒥᑦ, ᐃᓕᓐᓂᐊᖅᑐᑎᑦ ᓂᐅᕐᕈᑎᖃᕐᓂᕐᒥᑦ ᓴᙱᓂᕐᓂᑦ ᐃᖅᑲᓇᐃᔭᖅᑎᑖᕐᓗᑎᓪᓗ ᓴᙲᓐᓂᕆᔭᓐᓂᑦ. ᓄᓇᖃᖅᑳᖅᓯᒪᔫᔪᖓ ᐱᔪᓐᓇᕐᓂᖃᖅᑐᖓ ᐃᓅᒍᓐᓇᓂᕐᒥᒃ ᓄᓇᒥ, ᐊᒻᒪᓗ ᒪᑐᐃᖓᑦᓯᐊᖅᑐᖓ ᐅᖃᐅᓯᕆᒍᓐᓇᕐᓗᒍ ᑕᒪᓐᓇ ᐊᑐᖅᓯᒪᔭᕋ. ᑕᒪᓐᓇ ᓴᙱᓂᕋ. ᓂᐅᕐᕈᑎᖃᑐᐃᓐᓇᕋᒪ ᐃᓅᓯᓐᓂᒃ ᐊᒻᒪᓗ ᐃᓚᒪ ᐃᓅᓯᖓᓂᒃ ᐊᒻᒪᓗ ᐊᓯᖏᑦ ᑲᒪᒋᔭᐅᒍᓐᓇᖅᑐᑎᒃ ᐊᓯᖏᓐᓄᑦ ᐃᓄᓐᓄᑦ," ᑕᐃᓗ ᑲᓐᑐᕇᔅ. 

ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᔨᐅᓪᓗᓂ, ᐅᐸᒐᓱᒃᑕᖓ ᑕᐃᓗᒧᑦ ᓂᕆᐅᒋᔭᐅᔪᖅ. "ᐱᕕᒃᓴᑦᑎᐊᕙᒻᒪᕆᐊᓗᖕᒦᑉᐳᒍᑦ ᐊᓯᔾᔩᔪᓐᓇᖅᖢᑕ ᓇᖕᒥᓂᖃᖅᑎᑦ ᐱᓕᕆᔾᔪᓯᖏᓐᓂᒃ, ᖃᓄᕐᓗ ᑲᒪᒋᖃᑦᑕᐅᑎᕙᖕᒪᖔᑦᑕ ᖃᓄᕐᓗ ᐊᐅᓪᓚᖃᑦᑕᕐᒪᖔᑦᑕ. ᑕᑯᒍᓐᓇᖅᑐᖓ ᓂᕆᐅᓐᓂᐅᔪᒥᑦ ᑖᑦᓱᒧᖓ ᐱᐅᓪᓚᕆᑦᑐᒧᑦ ᐊᓯᔾᔨᕐᓂᕐᒧᑦ. ᑕᐃᒪᑐᖅ ᓯᕗᒻᒧᐊᒃᐸᓪᓕᐊᖏᓐᓇᕐᓂᐊᖅᐳᖅ ᑭᒃᑯᓕᒫᓪᓗ ᐃᓅᔪᓐᓇᖅᓯᓗᑎᒃ ᐃᓅᓯᕆᔪᒪᔭᒥᓂᒃ," ᓂᐱᖃᕐᓗᓂ ᓯᓐᓇᑦᑑᒪᕗᖅ. 

ᑲᐃᓕᒃ ᑭᓱᐊᓐ ᑕᐃᓗ ᐅᑭᐅᖅᑕᖅᑐᒧᐊᕐᒪᑦ, ᐃᓕᖅᑯᓯᑐᖃᕐᒥᓂᒃ ᐊᒻᒪ ᓄᓇᑦᑎᐊᕚᓗᖕᒧᑦ ᐃᓯᕈᓐᓇᖅᓯᓪᓗᓂ ᐃᑭᑎᑕᐅᓚᐅᖅᑐᖅ ᐃᓗᐊᓂ ᐱᑕᖃᙱᑦᑐᒥᒃ. ᒫᓐᓇ ᐱᓕᕆᐊᕆᔭᒥᓂ, ᐊᓯᒥᓂᒡᓗ ᐃᑲᔪᕈᓐᓇᖅᓯᕗᖅ ᓇᓂᓯᓇᓱᒃᑎᓪᓗᒍ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.