"ᐸᓖᓯᙳᓚᐅᖅᑐᖓ, ᑭᓯᐊᓂ ᐱᕈᖅᓴᓪᓚᕆᓚᐅᖅᑐᖓ ᑭᓇᐅᔪᒪᓂᓐᓂᒃ," ᓕᓚᓂ ᑭᐊᓂ ᐃᖅᑲᐅᒪᔪᖅ. ᓛᒃ ᓯᓪ ᓄᓇᖃᖅᑳᖅᓯᒪᔪᓂᑦ ᓄᓇᖃᖅᑐᖅ ᑭᓄᐊᕋᒥ, ᐃᑲᕐᕌᒃ ᒪᕐᕉᒃ ᐅᐃᓂᐹᒡᒥ, ᐱᓕᕆᖃᑎᖃᖅᖢᓂ ᐸᓖᓯᓂᑦ ᐱᖓᓱᓂᑦ, 23−ᓂᑦ ᓄᓇᓕᖕᓂᑦ 20,000−ᓂᒡᓗ ᐃᓄᖃᖅᖢᓂ. 

ᐱᒋᐊᓚᐅᖅᓯᒪᔪᖅ ᐊᓂᓯᓇᐱᒃ ᐸᓖᓯᒃᑯᓐᓂ 2003-ᒥ, ᑕᐃᑲᓂᓗ ᐃᖅᑲᓇᐃᔭᓚᐅᖅᓯᒪᓪᓗᓂ ᖃᖓᑕᓪᓗᓂ ᓄᓇᓕᖕᓂ ᐊᐱᕆᔭᐅᓚᐅᕋᓂ ᐱᓇᔪᖁᔭᐅᓪᓗᓂ ᒫᓐᓇ ᑲᑐᔾᔨᖃᑎᒌᒥᓄᑦ. ᐸᓖᓯᐅᓚᐅᖅᑎᓪᓗᒍ ᐊᕐᕌᒍᓄᑦ 7-ᓄᑦ, ᓅᓚᐅᖅᓯᒪᔪᖅ ᐱᕋᔭᑉᐸᑦᑐᓄᑦ ᐃᖅᑲᓇᐃᔭᖅᑐᓂ ᐊᕐᕌᒍᓄᑦ ᖁᓕᓄᑦ, ᑕᓯᐅᖅᑎᐅᓪᓗᓂ, ᐃᑲᔪᖅᑐᓂ ᐊᒻᒪᓗ ᖃᐅᔨᓴᖅᑐᓂ ᐸᓖᓯᓂᒃ ᒪᓕᑦᑐᑎᒃ ᐊᑐᐊᒐᕐᓂᒃ, ᐱᓗᐊᖅᑐᒥᒃ ᐊᖏᕐᕋᒥ ᐋᓐᓂᖅᑎᕆᓂᕐᒧᑦ ᐊᒻᒪᓗ ᖁᓄᔪᓐᓂᐊᖅᑕᐅᓂᕐᒧᑦ. 

ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐃᓕᓐᓂᐊᓚᐅᖅᑎᓪᓗᒋᑦ, ᑭᐊᓂ ᑐᕆᓐᑦ ᓯᓚᑦᑐᖅᓴᕐᕕᒡᔪᐊᖓᓄᐊᓚᐅᖅᐳᖅ ᐊᒻᒪ ᐱᑦᑎᐊᖃᑦᑕᐅᑎᔪᓐᓃᖅᖢᓂ. ᐊᐃᑉᐸᖓᑕ ᓄᓇᖓᓃᖦᖢᓂ, ᐃᓚᒥᓂᒃ ᐱᓱᒃᖢᓂ ᐊᖏᕐᕋᓕᓚᐅᖅᖢᓂᓗ.  ᐱᖓᓱᓂᑦ ᐃᖅᑲᓇᐃᔮᖃᓚᐅᖅᑐᖅ, ᐅᖃᖃᑎᖃᕆᐊᖅᑐᖅᑐᓂ ᐊᒻᒪ ᐃᓱᒪᕙᓪᓕᐊᓪᓗᓂ ᖃᓄᐃᓕᐅᕐᓂᐊᕐᒪᖔᖅ ᐃᓅᓯᖓᓂ. 

"ᐃᓱᒪᒋᔭᕋ ᑕᐃᒪᓐᓇ ᐃᓅᓯᖅ ᐊᑐᖃᑦᑕᖅᑐᖅ. ᑐᓂᔭᐅᖏᓐᓇᖅᑐᑎᑦ ᐱᕕᒃᓴᐅᔪᓂᑦ ᑕᐃᒪᙵᓕᒫᖅ, ᐱᑐᐃᓐᓇᕆᐊᖃᓕᕐᓗᑎᓪᓗ ᓴᖅᑭᑦᑕᕌᖓᑕ."

ᐃᓅᓯᓕᕆᔨᐅᑉ ᑎᓕᐅᕆᓪᓗᓂ ᑭᐊᓂᒥᒃ ᐃᓱᒪᒋᔭᖃᖁᓪᓗᒍ ᐃᖅᑲᓇᐃᔮᖃᕐᓂᕐᒥᒃ ᐸᓖᓯᐅᓂᕐᒧᑦ. "ᑕᐅᑐᒐᖃᑦᑎᐊᓚᐅᙱᑦᑐᖓ ᐸᓖᓯᓂᑦ ᐅᕕᓂᖃᑎᒋᙱᑕᓕᒫᒃᑲ ᐱᔾᔪᑎᒋᓪᓗᒋᑦ," ᐃᖅᑲᐅᒪᔪᖅ. ᑭᖑᓂᐊᒍᑦ, ᐸᓖᓯᒃᑲᓐᓂᕐᒥᒃ ᑎᓕᐅᕆᔪᖃᓕᓚᐅᕆᕗᖅ ᐱᓇᔪᖁᔭᐅᓪᓗᓂ ᑕᐃᒪᐃᓚᐅᖅᐳᕐᓗ. ᐱᓇᓱᐊᕈᓰᒃ ᒪᕐᕉᒃ ᐊᓂᒍᖅᑎᓪᓗᒋᑦ, ᐸᓖᓯᐅᓂᕐᒧᑦ ᐃᖅᑲᓇᐃᔮᕆᓛᕈᒪᔭᖓ ᐱᒋᐊᓚᐅᖅᑐᖅ. ᓅᓚᐅᖅᑐᖅ ᑭᓄᐊᕋᒧᑦ, ᑲᑎᑎᑕᐅᓪᓗᓂ, ᒪᕐᕉᓐᓂᒃ ᐸᓂᖃᓚᐅᖅᑐᖅ ᐊᒻᒪᓗ ᑭᖑᓂᐊᒍᑦ ᐊᕕᑦᑐᓂ. 

"ᐃᓱᒪᒃᑯᑦ ᖃᓄᐃᖏᑦᑎᐊᕐᓂᖅ ᐸᓖᓯᓕᕆᔾᔪᓯᖅ ᐊᒃᓱᕈᕐᓇᖅᑑᕗᖅ, ᐱᓗᐊᖅᑐᒥ ᐅᕙᓐᓄᑦ. ᐊᒃᓱᕈᕐᓇᕐᔪᐊᖅᑐᖅ ᐃᓅᓪᓗᓂ ᐊᕐᓇᐅᓪᓗᓂ ᓄᓇᖃᖅᑳᖅᓯᒪᔪᓂ ᐸᓖᓯᐅᓂᕐᒥ," ᓇᓗᓇᐃᖅᓯᓪᓗᓂ. ᐃᓅᓯᓕᕆᖃᑕᐅᖃᑦᑕᖅᑐᖅ ᐊᒻᒪ ᐊᓯᒥᓂᒃ ᑲᔪᖏᖅᓴᐃᓪᓗᓂ. ᐱᔪᒃᓯᐃᓐᓇᕋᓱᒃᓗᓂ, ᐅᐸᒍᑎᓪᓗᓂ ᓄᓇᓕᖕᒥ ᐊᓇᕐᓄᑦ ᐊᒻᒪ ᐊᓐᓄᕋᔾᔨᐅᕐᖢᓂ ᒧᒥᕐᓂᕐᒥᒃ.

ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᒋᔭᖃᖅᖢᓂ ᐱᕕᒃᓴᒥᒃ ᓲᕐᓗ ᐸᓖᓯᓕᕆᕙᖕᓂᖅ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᓂᐅᕙᒃᐳᖅ ᓄᓇᒥᓂ ᐊᔪᕈᓐᓃᖅᓴᖅᐸᒃᖢᑎᒡᓗ ᐃᑭᐊᖅᑭᕕᒃᑯᑦ. ᑖᓐᓇ ᑎᒥᐅᔪᖅ ᖁᓕᓂᒃ ᐊᐅᔭᒃᑯᑦ ᐃᓕᓐᓂᐊᖅᑎᖃᒻᒪᑦ ᐊᒻᒪᓗ ᐃᓚᓕᐅᔾᔨᓇᓱᐊᓪᓚᕆᑦᑐᑎᒃ ᐃᓅᓱᒃᑐᓂᒃ ᖃᓄᐃᓕᐅᖃᑦᑕᕐᒪᖔᑕ. ᖃᐅᔨᒪᔪᖅ ᑭᒃᑯᓕᒫᓄᑦ ᑐᕌᖓᙱᒻᒪᑦ, ᓇᖕᒥᓂᖅ ᖁᕕᐊᒋᒐᓗᐊᖅᖢᓂᐅᒃ. 

"ᖁᕕᐊᒋᑦᑎᐊᕈᕕᐅᒃ ᐃᓗᖕᓂ, ᓇᓂᓯᓂᐊᖅᑐᑎᑦ ᐊᑐᒐᒃᓴᒥᒃ, ᓇᓂᓯᓂᐊᖅᑐᑎᑦ ᐊᖅᑯᑎᖕᓂᒃ. ᑭᓯᐊᓂ ᐃᓄᖕᓄᑦ ᐃᒪᐃᑦᑐᓄᑦ, 'ᓇᓗᔪᖓ', ᐃᒻᒪᖄᓕ ᐱᔭᕆᐊᖃᙱᑦᑐᑎᑦ, ᓲᖃᐃᒻᒪ ᐊᔪᕐᓇᖅᑐᐊᓘᖕᒪᑦ, ᐊᒃᓱᕈᕐᓇᖅᑐᖅ ᐃᖅᑲᓇᐃᔮᖅ ᐊᒻᒪ ᖁᔭᓐᓇᒦᖅᑕᐅᓗᐊᕐᓇᙱᖦᖢᓂ," ᐅᖃᐅᔾᔨᓪᓗᓂ.

ᑭᐊᓂ ᖃᐅᔨᒪᖁᔨᔪᖅ ᐸᓖᓯᙳᕈᒪᔪᓂᒃ ᖃᓄᖅ ᐱᒻᒪᕆᐅᑎᒋᖕᒪᖔᑦ ᐃᓕᓐᓂᐊᕐᓂᖅ ᐃᖅᑲᓇᐃᔭᖅᑎᑖᕆᔭᐅᕙᓪᓕᐊᑎᓪᓗᒍ. "ᐃᓕᑕᕆᔭᐅᔾᔪᑎᑖᕆᐊᖃᖅᑐᑎᑦ, ᐃᓕᓐᓂᐊᕆᐊᖃᖅᑐᑎᑦ, ᐃᓕᓐᓂᐊᖅᓯᒪᔭᕆᐊᖃᖅᑐᑎᑦ ᒫᓐᓇ ᐃᓱᒪᒋᔭᐅᔪᓐᓇᖅᓯᔪᖅ. BA's-ᓚᓗᑎᑦ, ᐃᓕᑕᕆᔭᐅᔾᔪᑎᑖᕐᓗᑎᑦ ᐊᒻᒪᓗ ᑕᐃᒪᐃᓕᐅᕈᒪᓪᓚᕆᒃᑯᕕᑦ, ᐸᓖᓯᙳᕐᓗᑎᑦ. ᓲᖃᐃᒻᒪ ᐊᓯᔾᔩᖃᑕᐅᓂᐊᕋᕕᑦ," ᑎᓕᐅᕆᔪᖅ. 

ᐸᓖᓯᐅᓂᕐᒧᑦ ᐃᓕᓐᓂᐊᕐᓂᖅ ᐊᑯᓂᐊᓘᓕᖅᑐᖅ ᑭᐊᓂ ᐃᓚᐅᓕᓚᐅᖅᓯᒪᒻᒪᓂᑦ ᐊᒻᒪᓗ 12-ᓂᒃ ᐱᓇᓱᐊᕈᓯᕐᓂᒃ ᐃᓕᓐᓂᐊᓚᐅᖅᑐᓂ. ᑖᒃᑯᐊ ᐅᓪᓗᐃᑦ ᐃᖅᑲᓇᐃᔭᖅᑎᑖᕆᔭᐅᖃᑦᑕᖅᑐᑦ ᓄᓇᓕᓐᓂᑦ ᐸᓖᓯᓄᑦ ᐱᔨᑦᓯᕋᕐᓂᖏᓐᓄᑦ ᐊᐅᓪᓚᖅᑎᑕᐅᑦᓱᑎᓪᓗ ᐊᕇᓕᐊᒧᑦ OPP-ᒧᑦ ᐱᓕᕆᐊᒧᑦ, ᐋᓐᑎᐅᕆᐅᒥ ᐸᓖᓯᒃᑯᑦ ᓯᓚᑦᑐᓴᕐᕕᖓᓄᑦ ᐱᓇᓱᐊᕈᓯᕐᓄᑦ 12-ᓄᑦ ᐊᒻᒪᓗ 6-ᑲᓐᓂᕐᓂᑦ ᐱᓇᓱᐊᕈᓯᕐᓂᑦ ᐊᕇᓕᐊᒥᑦ, ᑲᑎᑦᓱᑎᒃ ᑕᖅᑭᓄᑦ ᑕᓪᓕᒪᓄᑦ. ᐱᐅᓯᖏᑦ ᐸᓖᓯᓕᕆᔾᔪᓯᐅᑉ ᒥᒃᓵᓄᑦ ᐊᓯᔾᔨᖅᓯᒪᒋᕗᑦ.

"ᐃᓄᑦᑎᐊᕙᒻᒪᕆᐊᓘᒐᑦᑕ ᐃᑲᔪᖅᑕᐅᔭᕆᐊᖃᖅᖢᑕᓗ. ᑕᒪᓐᓇ ᑐᑭᒧᐊᑦᑎᑕᐅᔭᕆᐊᖃᕐᒪᑦ. ᐱᓕᕆᖃᑎᒌᒋᐊᖃᖅᐳᒍᑦ, ᐱᓕᕆᖃᑎᖃᕐᓗᑕ ᓄᓇᓕᖕᓂ ᓲᖃᐃᒻᒪ ᐱᒻᒪᕆᐅᖃᑕᐅᒐᑦᑕ ᐃᑲᔪᕐᓗᑎᒍᑦ ᓄᓇᓖᑦ ᑕᐃᒪᐃᓕᐅᖅᐸᒃᖢᑕᓗ," ᑕᐃᒪᓐᓇ ᐅᖃᖅᖢᓂ.

"ᐸᓖᓯᓕᕆᓂᖅ ᓇᐃᑦᑐᑯᓘᖕᒪᑦ, ᐃᖅᑲᓇᐃᔭᕐᓇᐅᙱᑦᑐᒃᑯᑦ ᐃᖅᑲᓇᐃᔭᖅᑐᒍᑦ, ᑕᖃᔪᐃᓐᓇᐅᓕᕋᑦᑕ. ᐱᔭᕆᐊᖃᖅᑐᒍᑦ [ᐃᓄᖕᓂᒃ] ᐊᒻᒪᓗ ᐱᖃᙱᖦᖢᑎᒍᑦ. ᓄᓇᖃᖅᑳᖅᓯᒪᔪᓂᒃ ᐱᓕᕆᔨᑖᒃᑲᓐᓂᕆᐊᖃᖅᑐᒍᑦ."

ᐅᖃᐅᓯᖃᖅᑐᖅ ᓯᓐᓇᑦᑑᒪᒋᓯᒪᒻᒪᕆᑦᑕᒥᓂᒃ: ᐃᓄᑑᖏᓐᓂᖅᓴᐅᓗᓂ ᓴᓇᕕᒻᒥ, "ᑕᑯᒃᑲᓐᓂᕈᒪᔪᖓ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ ᐸᓖᓯᓕᕆᔾᔪᓯᕐᓂᒃ, ᐸᓖᓯᕗᑦ ᐸᓖᓯᓕᕆᓂᐅᔪᖅ ᐃᓄᓐᓄᑦ ᐃᓄᓐᓄᑦ," ᒥᑕᐅᑎᖓ. ᐃᖅᑲᓇᐃᔭᖅᑎᑖᕐᓂᖅ ᑲᓇᑕᒥ ᐊᑲᐅᙱᓕᐅᕈᑎᐅᒻᒪᑦ ᐸᓖᓯᓕᕆᔾᔪᓯᕐᓄᑦ ᑭᓯᐊᓂ ᑐᓴᕈᒥᓇᖅᐳᖅ ᓴᖅᑮᒻᒪᑦ ᓯᕗᓂᔅᓴᖅᑎᓐᓂᑦ ᐃᖅᑲᓇᐃᔭᓕᖅᑎᑦᑎᓛᖅᑐᓂ. ᓄᑲᖅᑎᖅᐹᖓ ᐸᓂᖓ ᐸᓖᓯᓕᕆᔪᒪᕗᖅ, ᐊᖏᔪᑦᑎᖅᐹᖓ ᑕᑯᓪᓗᓂ ᖃᓄᑎᒋ ᐊᒃᓱᕈᖅᑎᒋᒻᒪᖔᖅ ᐊᓈᓇᖓᑕ ᐊᑖᓄᑦ ᑕᐃᒪᐃᒻᒪᑦ ᐊᔾᔨᒋᙱᑕᖓᓂᒃ ᐱᔪᒪᕗᖅ.  

ᑕᐃᒪᓕ, ᐸᓖᓯᓕᕆᔾᔪᓯᕐᒥᒃ ᑕᑯᓪᓗᓂ ᐅᖄᓚᓪᓗᓂ. "ᐅᖃᓘᑎᐅᒃᐸᑦ, ᐱᐅᙱᑦᑑᒐᓗᐊᒥᒃ ᐱᓇᔭᖅᑐᑎᑦ, ᐱᓗᐊᖅᑎᑦᑎᓇᔭᖅᑐᑎᑦ ᓲᖃᐃᒻᒪ ᑕᐃᒪᓐᓇ ᐱᓕᕆᓲᖑᒐᔅᓯ ᖃᐅᑕᒫᑦ. ᐱᓕᕆᐊᖃᕋᔅᓯ ᐃᓄᐃᑦ ᐱᐅᙱᓂᖅᐹᖏᓐᓂᑦ ᐃᓅᓯᖏᓐᓂᑦ, ᐱᐅᙱᓂᖅᐹᑦ ᓴᖅᑭᐊᓚᐅᖅᑐᑦ ᐊᒻᒪ ᑕᒪᓐᓇ ᓇᓪᓕᒋᔭᐅᒋᐊᖃᖅᑐᓂ. ᐃᑲᔪᖅᑕᐅᔪᒪᔭᕆᐊᖃᖅᑐᑎᑦ," ᓇᓗᓇᐃᖅᐳᖅ. 

ᐊᑐᖃᑦᑕᕐᓂᑯᖏᑦ ᐅᕕᓂᖃᑎᒋᙱᑕᒥᓂᒃ ᐱᐅᒃᓴᙱᖦᖢᓂ, ᖃᐅᔨᓪᓗᓂ ᖁᕕᐊᓱᖕᓂᕐᒥ ᐃᖅᑲᓇᐃᔮᖓᓂ ᓯᕗᓕᖅᑕᐅᓪᓗᓂ ᑐᙵᕕᖏᓐᓂ ᐸᓖᓯᓕᕆᔾᔪᓯᑦ ᐃᓄᖕᓄᑦ. ᓕᓚᓂ ᑭᐊᓂ ᐸᓖᓯᐅᖃᑕᐅᓕᓚᐅᖅᑐᖅ ᐱᕈᖅᓴᓚᐅᖅᓯᒪᓪᓗᓂᓗ ᑭᓇᐅᔪᒪᓂᕐᒥᓂᒃ, ᓂᕆᐅᒃᑭᓪᓗᓂᓗ ᐊᓯᖏᓐᓂᒃ ᓄᓇᖃᖅᑳᖅᓯᒪᔪᓂᒃ ᐊᕐᓇᓂᒃ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᑦᓵᑦ ᐊᖏᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᑦ.