"ᐱᓇᔪᐃᓐᓇᓲᖑᔪᖓ ᐃᓄᑦᑎᐊᕙᐅᓇᓱᒃᖢᖓ ᐃᑉᐸᒃᓴᖅ. ᐃᓄᑦᑎᐊᕙᐅᔪᒪᐃᓐᓇᓲᖑᒐᒪ. ᐃᑲᔪᐃᓐᓇᕈᒪᐃᓐᓇᓲᖑᔪᖓ ᐊᔪᙱᑦᑕᓕᒫᓐᓂᒃ," ᐊᖑᑎ ᓄᐊᐅᐃᔾᔭᓐ. ᔩᓐ ᒪᕆ ᕆᕗᒥᐅᑕᖅ, ᓄᓇᓕᐅᓪᓗᓂ 50-ᓂᒃ ᕗᐊᑦ ᓯᒻᑉᓴᓐ ᓂᒋᐊᓂ. ᐃᓕᓐᓂᐊᕆᐊᓚᐅᖅᓯᒪᔪᖅ ᑕᐃᑯᖓ ᒍᕋᐃᑦ 8-ᒧᑦ ᑎᑭᖦᖢᒍ ᒪᒃᑯᒃᖢᓂ ᐊᓈᓇᙳᕋᒥ, ᓅᖦᖢᓂ ᕗᐊᑦ ᓯᒻᑉᓴᓐᒧᑦ ᖁᑦᑎᖕᓂᖅᓴᓄᑦ ᐃᓕᓐᓂᐊᕐᕕᖕᒧᑦ.

ᐱᔭᕇᕋᒥ, ᓄᐊᐅᐃᔾᔭᓐ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᕆᐊᓚᐅᖅᑐᖅ ᐊᕈᐊᕋ ᓯᓚᑦᑐᓴᕐᕕᖓᓂ ᔨᐊᓗᓇᐃᒥ. ᐸᓂᖓ ᓄᑕᕋᓕᕆᔨᐅᔪᒪᓕᓚᐅᖅᑐᖅ. ᐱᔪᒪᓂᖃᓚᐅᕐᒥᔪᖅ ᐃᓕᓐᓂᐊᕐᓗᓂ ᐃᓗᐊᖅᓴᐃᔨᐅᓂᕐᒧᑦ ᐱᓪᓗᒍ ᖃᑕᙳᑎᒋᔭᐅᔪᖅ ᐋᓐᓂᐊᕕᖕᒥ ᑲᒪᒋᔭᐅᔭᕆᐊᓕᒃ ᐃᓕᑦᑎᓪᓗᓂᓗ ᐃᑲᔪᕐᓂᕐᒥᒃ ᑲᒪᓂᕐᒥᒃ ᒪᒃᑯᒃᑎᓪᓗᒍ. ᐃᖢᐊᖅᓴᐃᔨᐅᓪᓗᓂ, ᑕᐃᑲᓃᒃᑲᓐᓂᕈᓐᓇᕋᓱᒋᓚᐅᖅᑐᖅ.

ᓯᕗᓪᓕᖅᐹᒥ, ᓄᐊᐅᐃᔾᔭᓐ ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᓚᐅᖅᑐᖅ, ᐊᒻᒪᓗ ᐊᕐᕌᒍᓄᑦ ᑎᓴᒪᓄᑦ ᐱᔭᕇᕈᓯᐊᖅᑖᖅᑐᓂ. ᐱᖓᔪᖓᓂ ᐊᒻᒪ ᑎᓴᒪᖓᓂ ᐊᕐᕌᒍᒥ, ᓯᓚᑦᑐᖅᓴᕐᕕᒡᔪᐊᙳᓚᐅᖅᑐᖅ ᕕᒃᑑᕆᐊᒥ ᐃᓕᓐᓂᐊᖅᑎᐅᓪᓗᓂ ᓯᓚᑦᑐᖅᓴᕐᕕᖕᒥ ᐊᒻᒪ ᐃᓕᑕᕆᔭᐅᔾᔪᑎᑖᖅᖢᓂ ᓯᓚᑦᑐᖅᓴᕐᕕᒡᔪᐊᕐᒥ. ᐱᔭᕇᓚᐅᖅᑎᓪᓗᒍ, ᐃᖅᑲᓇᐃᔭᓚᐅᖅᑐᖅ ᓄᓇᕗᒻᒥ ᐋᓐᓂᐊᕕᖕᒥ, ᔅᑖᓐᑕᓐ, ᐊᓈᓇᑦᑎᐊᖓᑕ ᐅᑭᐅᖓ ᓯᕗᕙᓯᒃᓯᓕᖅᑎᓪᓗᒍ ᐊᓈᓇᖓᑕᓗ ᐃᓱᒪᐃᕈᑎᓯᒪᓂᖓᓄᑦ ᖃᐅᔨᔭᐅᓪᓗᓂ ᐅᑎᕐᓂᖓᓂᒃ ᕗᐊᑦ ᓯᒻᑉᓴᓐᒧᑦ. ᒫᓐᓇ, ᐃᖅᑲᓇᐃᔮᖃᓕᖅᑐᖅ ᐊᐅᓚᑦᑎᔨᐅᓪᓗᓂ ᓄᓇᑦᓯᐊᕐᒥ ᐋᓐᓂᐊᖃᕐᓇᙱᑦᑐᓕᕆᔨᒃᑯᓐᓄᑦ ᐃᓄᓕᕆᔨᒃᑯᓐᓄᓪᓗ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᑦ ᓄᓇᒥᓂᒃ ᕿᒪᐃᓗᑎᒃ ᐃᓕᓐᓂᐊᕋᓱᒃᓗᑎᒃ ᑲᑉᐱᐊᓱᒐᔭᙱᑦᑐᑦ ᖃᐅᔨᓇᓱᒋᐊᒃᓴᖅ, ᓄᑖᓂᒃ ᐆᒃᑐᕐᓗᑎᒃ ᐊᑲᐅᒋᔭᖏᓐᓂᒃ, ᐊᒃᓱᕈᕐᓗᑎᒡᓗ ᐱᓕᕆᕙᒡᓗᑎᒃ, ᑭᓯᐊᓂᑦᑕᐅᖅ ᐃᓅᓯᓕᒫᒥᓂᒃ ᐃᓅᓇᓱᒃᐸᒡᓗᑎᒃ. ᐊᑐᖁᔨᔪᖅ ᐱᓕᕆᔾᔪᑎᓂᒃ ᑐᓴᐅᒪᖃᑎᒌᖏᓐᓇᖁᓪᓗᒋᑦ ᐊᒻᒪ ᑐᓴᐅᒪᖃᑎᒌᖏᓐᓇᖁᓪᓗᒋᑦ.

ᑐᓗᖅᑕᕈᑎᓄᑦ, ᓄᐊᐅᐃᔾᔭᓐ ᐊᒃᓱᕉᑎᖃᓚᐅᖅᑐᖅ ᑭᖑᕚᕇᓄᑦ ᐊᒃᑑᑎᔪᓄᑦ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᓄᑦ, ᐃᒥᖃᑦᑕᕐᓂᕐᒧᑦ, ᐋᓐᓂᖅᓯᕆᓂᕐᒧᑦ ᐊᓯᖏᓐᓄᓪᓗ ᐊᒃᓱᕈᕐᓇᖅᑐᓄᑦ. "ᑭᖑᕚᕗᑦ ᓄᖅᑲᖅᑎᓐᓇᓱᒋᐊᖃᖅᑰᖅᑕᕗᑦ, ᐊᑦᑕᕐᓇᙱᑦᑐᒥᑦ, ᖃᓄᐃᙱᑦᑎᐊᕐᓇᖅᑐᒥᑦ, ᓇᒡᓕᒍᓱᖕᓂᐅᔪᒥᑦ ᕿᑐᕐᖓᑦᑎᓐᓄᑦ," ᐊᑐᐃᓐᓇᐅᑎᑦᑎᕗᖅ, ᑕᑯᒃᓴᐅᑎᑦᑎᓪᓗᓂ ᖃᓄᖅ ᑐᕌᒐᕆᖕᒪᖔᒍ ᐅᐃᖓᓗ ᐊᖏᕐᕋᕆᓂᐊᕐᒪᒍ. ᐊᒃᓱᕈᖃᑦᑕᓚᐅᕐᒥᔪᖅ ᑮᓇᐅᔭᑎᒍᑦ ᐃᓕᓐᓂᐊᕐᕕᖕᒥ ᑭᓯᐊᓂ ᖃᐅᔨᓪᓗᓂ ᐅᓄᖅᑐᓂᒃ ᐃᓕᓐᓂᐊᖅᑎᓄᑦ ᐃᑲᔫᓯᐊᓂᒃ ᐊᒻᒪ ᐃᓕᓐᓂᐊᕈᑎᒃᓴᓂᒃ. ᖃᐅᔨᓚᐅᖅᑐᖅ ᐊᒥᓱᑦ ᐃᓄᐃᑦ ᐃᑲᔪᕈᒪᔪᑦ ᐊᐱᕆᒍᓂ ᐊᒥᓱᓪᓗ ᐃᓄᐃᑦ ᐊᒃᓱᕈᓚᐅᖅᑐᑦ ᐃᑲᔪᖅᑕᐅᔪᒪᙱᒃᑯᑎᑦ.

ᓄᐊᐅᐃᔾᔭᓐ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᐃᒃᑲᔭᖅᑐᖅ, "ᐃᑯᒻᒪᖅᑯᑎᖃᕐᓂᐊᖅᑐᖅ ᓱᓪᓗᓕᐅᑉ ᐃᓱᐊᓂ ᐊᒻᒪ ᐊᒃᓱᕈᕐᓇᕐᓂᖓ ᒫᓐᓇ ᐊᑑᑎᖃᕐᓂᐊᓕᖅᐳᖅ ᐊᒃᓱᕈᕐᓇᖅᑐᓕᒫᑦ ᐃᓱᓕᑉᐸᑕ." ᑐᓴᖅᑕᐅᔭᕆᐊᓕᒃ ᐅᖁᒪᐃᑦᑐᓂᑦ ᐱᓕᕆᐊᒃᓴᖃᖅᑎᓪᓗᒍ ᐱᕈᖅᓴᐃᓪᓗᓂ ᓄᑕᖅᑲᒥᑦ ᑮᓇᐅᔭᖃᑦᑎᐊᙱᖦᖢᓂ. ᐃᓛᓐᓂᒃᑯᑦ ᓄᖅᑲᕈᒪᕙᓚᐅᖅᑐᖅ ᐃᖅᑲᓇᐃᔮᖅᑖᑐᐃᓐᓇᕈᒪᓪᓗᓂ ᐃᓱᒫᓗᒋᐊᖃᙱᖦᖢᓂ ᐃᓕᓐᓂᐊᕐᕕᖕᒥᑦ ᓂᕿᑭᒃᓴᓗᐊᙱᓐᓂᕐᒥᒡᓘᓐᓃᑦ. ᐃᒻᒥᓂᒃ ᐅᖃᐅᑎᔪᒪᓇᔭᖅᑐᖅ, "ᐱᔭᕇᕈᕕᑦ, ᐃᓕᖕᓂᒃ ᐊᔭᐅᖏᓐᓇᕐᓗᑎᑦ, ᐊᒃᓱᕈᓛᖑᒐᓗᐊᕈᕕᑦ, ᐃᖅᑲᐃᓯᕙᒃᓗᑎᓪᓗ ᐊᒥᓱᐃᖅᓱᕐᓗᑎᑦ ᐅᓪᓗᑦᑎᐊᕙᐅᙱᓐᓂᖓᓂᒃ, ᐃᓅᓯᑦᑎᐊᕙᐅᙱᒻᒪᑦ."

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᓄᐊᐅᐃᔾᔭᓐ ᐊᔪᖕᓇᙱᖦᖢᓂ ᐅᓄᖅᑐᓂᒃ ᐃᖅᑲᓇᐃᔭᖅᑎᖃᕐᖢᓂ ᑎᑎᕋᕐᕕᖕᒥᐅᑕᓕᕆᔾᔪᑎᓂᒃᓗ ᐃᑲᔪᖅᑕᐅᓪᓗᓂ ᐊᕉᕋ ᓯᓚᑦᑐᖅᓴᕐᕕᖕᒥ ᐃᑲᔪᖅᑕᐅᔭᕆᐊᖃᖅᐸᑦ ᐊᓂᐊᑎᓪᓗᒍᓘᓐᓃᑦ. ᐃᑲᔪᖅᑐᖅᑕᐅᓯᒪᒻᒥᔪᖅ ᐃᓚᖏᓐᓄᑦ, ᓇᔭᖏᓐᓄᑦ ᐊᖓᔪᖅᑳᖏᓐᓄᓪᓗ ᐊᔭᐅᖅᓯᓚᐅᖅᑐᓄᑦ ᑲᔪᓯᓂᖃᑦᓯᐊᖁᔨᑦᓱᓂ. ᐃᑲᔪᖅᑕᐅᔪᒪᓂᖅ ᐱᔭᕆᐊᖃᕌᖓᑦ, ᐃᑲᔪᖅᑕᐅᔪᒪᓂᖅ ᐊᑐᒐᒃᓴᓪᓗ ᐱᒻᒪᕆᐅᓚᐅᖅᑐᑦ ᑖᔅᓱᒧᖓ.

"ᖃᐅᑕᒫᑦ ᐆᒃᑐᖃᑦᑕᖅᑐᖓ. ᑕᐃᒪᓐᓇ ᑭᓯᐊᓂ ᐱᔪᓐᓇᖅᑐᖓ. ᑭᓇᑐᐃᓐᓇᖅ ᐱᔪᓐᓇᖅᑐᖅ, ᐊᒃᓱᓪᓛᓗᒃ, ᐱᓇᓱᐊᑦᓯᐊᖅᑐᑎᑦ."

ᑲᔪᖏᖅᓴᐃᓂᖅ ᐱᔾᔪᑎᒋᓪᓗᒍ, ᓄᐊᐅᐃᔾᔭᓐ ᓯᕗᒧᑦ ᑕᐅᑐᒃᐳᖅ. ᐱᕈᖅᓴᔭᐅᓪᓗᓂ ᐱᓕᕆᑦᑎᐊᕈᓐᓇᖅᖢᓂ, ᐃᑲᔪᖃᑦᑕᖅᑐᖅ ᖃᓄᐃᑦᑑᓂᖓᒍᑦ, ᑐᕌᕈᑎᒋᓪᓗᓂᐅᒃ ᐃᓗᐊᖅᓴᐃᔨᐅᓂᕐᒧᑦ ᐊᒻᒪ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ. "ᐃᑲᔪᕈᒪᒐᒃᑭᑦ ᐃᓄᖁᑎᕗᑦ ᓄᓇᑦᑎᓐᓂ. ᐱᐅᓯᒋᐊᖅᑎᑦᑎᔪᒪᕗᖓ, ᐃᑲᔪᕋᓱᒡᓗᖓᓘᓐᓃᑦ ᐱᐅᓯᒋᐊᖅᑎᑦᑎᓂᕐᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑲᒪᒋᔭᖃᖅᐸᖕᓂᕐᒥᒃ ᐃᓄᒋᔭᑦᑎᓐᓄᑦ ᐊᕕᒃᓯᒪᓂᑦᑎᓐᓂ ᑕᐃᒪᐃᓐᓂᖓᓄᓪᓗ ᐅᑎᓕᓚᐅᖅᐳᖓ," ᐊᒃᑐᐊᓂᖃᖅᖢᓂ.

ᐱᓇᔪᖕᓂᖅ ᓇᖕᒥᓂᖅ ᐱᐅᓯᒋᐊᖅᑎᑦᑎᓂᕐᒥᒃ, ᐃᓄᑦᑎᐊᕙᐅᓂᕐᒥᒃ ᐃᑲᔪᕈᒪᓂᕐᒧᓪᓗ ᐊᔪᕐᓇᙱᑦᑕᕌᖓᑦ, ᐃᓗᐊᖅᓴᐃᓂᖅ ᓈᒻᒪᓛᖑᕗᖅ ᐊᖑᑎᓄᑦ ᓄᐊᐅᐃᔾᔭᓐᒧᑦ. ᐃᓚᒥᓄᑦ ᑎᓕᐅᖅᑕᐅᓪᓗᓂ, ᓯᓐᓇᑦᑑᒪᒥᓂᒃ ᐱᓇᔪᓚᐅᖅᐳᖅ ᒪᒃᑯᒃᑑᓪᓗᓂ ᐊᓈᓇᐅᓪᓗᓂ ᐊᒻᒪ ᓄᓇᒥᓄᑦ ᐅᑎᖅᖢᓂ. ᐱᐅᓯᒋᐊᖅᑎᑦᑎᔪᒪᓪᓗᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐃᓄᖁᑎᒥᓄᑦ, ᖃᐅᑕᒫᑦ ᐱᓇᔪᒃᐸᒃᐸᒃᖢᓂ ᐊᔪᙱᓐᓂᓕᒫᒥᓂᒃ ᐱᓕᕆᔪᒪᓪᓗᓂ, ᐊᒃᓱᕈᕐᓇᕋᓗᐊᖅᑎᓪᓗᒍᓘᓐᓃᑦ ᐅᓪᓗᖏᓐᓂ, ᐃᖅᑲᐅᒪᓪᓗᓂ ᐅᓪᓗᑦᑎᐊᕙᐅᙱᓐᓂᖓᓂᒃ, ᐃᓅᓯᑦᑎᐊᕙᐅᙱᖦᖢᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.