"ᓇᒧᙵᐅᕙᓪᓕᐊᓂᕗᑦ ᑕᐃᒪᐃᑦᑕᕆᐊᖃᖅᐳᖅ," ᐅᖃᓚᐅᖅᐳᖅ ᒦᒡ ᐅᓪᒻᔅᑕᑦ. ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐅᐃᓂᐸᐃᒡᒥ ᑕᕐᓂᖓᓗ ᐊᑎᖏᑦ ᐅᑯᐊᖑᕗᑦ Sacred Clear Rock ᐊᒻᒪ Soaring White Eagle Woman. ᖃᑕᙳᑎᖏᑦ ᓴᐃᓐᑦ ᐲᑕᐅᑉ ᐊᓪᓚᐃᑦ ᓄᓇᖃᕐᕕᖓᓐᓃᙶᖅᑐᑦ ᐊᒻᒪ ᐊᒃᑐᐊᓂᖃᕆᓪᓗᑎᒃ ᐱᒍᐃᔅ ᓄᓇᖃᖅᑳᖅᓯᒪᔪᓄᑦ. ᐅᔨᐱ ᐊᓪᓚᖓᔪᖅ ᓄᓇᑖᖅᓯᒪᓪᓗᓂ ᐊᒻᒪ ᐃᖅᑭᓕᖕᓂᙶᖅᖢᓂ. ᓄᓇᓕᐸᐅᔭᕐᒥ ᓂᕕᐊᖅᓯᐊᖑᓯᒪᓪᓗᓂ ᐃᓅᓯᓕᒫᕐᒥᓂ, ᓄᓇᑐᐃᓐᓇᕐᒥ ᐊᓕᐊᓇᐃᒋᑦᑎᐊᖅᑕᖓ.

ᐃᖅᑲᓇᐃᔮᒥᒍᓪᓕ, ᐅᓪᒻᔅᑕᑦ ᐃᓄᓕᕆᔨᐅᕗᖅ. ᐃᓄᓕᕆᔨᐅᓂᕐᒧᑦ ᐊᓂᒍᐃᓚᐅᖅᐳᖅ 2022−ᒥ ᑭᓯᐊᓂ ᐃᓄᓕᕆᔨᐅᓯᒪᓕᖅᐳᖅ 15−ᓄᑦ ᐊᕐᕌᒍᓄᑦ. ᐃᓕᓐᓂᐊᕐᓇᐅᔪᓐᓃᕌᖓᑦ ᐱᓕᕆᐊᒃᓴᓂᒃ ᐱᓕᕆᖃᑦᑕᓚᐅᖅᐳᖅ ᐸᐃᕆᕝᕕᖕᓂᒡᓗ ᐱᓕᕆᕙᒃᖢᓂ ᖃᐅᔨᓇᓱᒃᖢᓂ ᖃᓄᐃᓕᐅᕈᒪᖕᒪᖔᕐᒥᓂᒃ ᐃᓅᓯᕐᒥᓂᒃ. ᐱᔪᒃᓯᓕᓚᐅᖅᐳᖅ ᐃᓄᓕᕆᔨᐅᓂᕐᒧᑦ ᐃᒃᓯᕚᖅᖢᓂ ᖁᕕᐊᓱᖃᑎᒌᖕᓂᕐᒥᓂ. ᐃᓕᓐᓂᐊᓚᐅᖅᓯᒪᕗᖅ ᐊᒻᒪ ᖃᔅᓯᐊᕐᔪᖕᓂ ᐃᓕᓐᓂᐊᕈᑎᓂᒃ ᐃᓱᓕᑦᑎᙱᖦᖢᓂ ᐃᓱᒪᓕᕆᔨᐅᓂᕐᒧᑦ ᐃᓕᓐᓂᐊᖅᑕᒥᓂᒃ ᖃᐅᔨᓕᓚᐅᖅᐳᕐᓗ ᑕᐃᒪᐃᒍᒪᙱᖦᖢᓂ.

ᐊᖅᑯᑎᖓ ᐋᖅᑭᒋᐊᒃᑲᓐᓂᕋᓱᒃᖢᒍ, ᐅᓪᒻᔅᑕᑦ ᓄᖅᑲᖓᓚᐅᑲᓚᐅᖅᐳᖅ ᐅᖃᖃᑎᖃᖅᖢᓂᓗ ᐃᓕᓴᐃᔨᕐᔪᐊᒧᑦ ᓯᓚᑦᑐᖅᓴᕐᕕᒡᔪᐊᖓᓂ ᐃᓄᓕᕆᔨᙳᕈᒪᓪᓗᓂ, ᐊᓈᓇᖓᑕ ᐅᖃᐅᓯᕆᖃᑦᑕᖅᓯᒪᔭᖓ ᐊᕐᕌᒍᒐᓴᖕᓄᑦ ᑭᓯᐊᓂ ᐱᔪᒪᙱᖦᖢᓂᐅᒃ. ᐃᓱᒪᒥᒍᑦ, ᐃᓄᓕᕆᔨ ᐱᓕᕆᖃᑎᖃᓚᐅᖅᐳᖅ ᓄᑕᖅᑲᓂᒃ ᑲᒪᒋᔭᖃᖅᐸᖕᓂᕐᒥᒃ ᑭᓯᐊᓂ ᐃᓕᑦᑎᕙᓪᓕᐊᓕᓚᐅᖅᐳᖅ ᑭᓱᓕᒫᓂᒃ ᐱᓕᕆᐊᖃᕈᓐᓇᕐᓂᕐᒥᓂᒃ ᐃᓄᓕᕆᔨᐅᓗᓂ ᐱᓇᔪᒍᒪᓕᖅᖢᓂᓗ. ᑕᐃᒪᙵᓂᑦ, ᐃᖅᑲᓇᐃᔭᖃᑦᑕᖅᓯᒪᕗᖅ ᖃᓄᑐᐃᓐᓇᑲᓴᒃ ᐃᖅᑲᓇᐃᔭᕐᕕᒋᔪᓐᓇᖅᑕᕐᓂ ᐃᓄᓕᕆᔨᐅᓪᓗᓂ, ᐃᓱᒪᓕᕆᔨᐅᓪᓗᓂ, ᐊᔪᖅᓴᓗᐊᖅᐸᖕᓂᕐᒥᒃ, ᐊᖏᕐᕋᖃᙱᑦᑐᓂᒃ ᐃᓚᒥᓂᒃ, ᒪᒃᑯᒃᑐᓂᒃ ᐱᓕᕆᐊᖃᖅᐸᖕᓂᕐᒥᒃ, ᑕᒪᓐᓇᓗ ᐱᓕᕆᐊᕆᓪᓗᐊᑕᖅᐸᒃᖢᓂᐅᒃ.

"ᑭᖑᓂᐊᒍᑦ, ᑭᓱᓕᒫᑦᑎᐊᑦ ᐱᓕᕆᐊᒃᑲ ᐅᑎᐃᓐᓇᐅᔭᖅᐳᑦ ᓄᓇᓕᖕᓄᑦ ᐊᒻᒪ ᖁᕕᐊᓱᒍᑕᐅᔪᓄᑦ ᐊᒻᒪ ᐃᓅᓯᕋ ᐃᓅᓯᕆᓕᖅᖢᒍ ᐊᒻᒪ ᐃᖅᑲᓇᐃᔮᕋ ᖁᕕᐊᓲᑕᐅᓪᓗᓂ. ᐃᖅᑲᓇᐃᔮᕆᖅᑰᔨᙱᑦᑎᐊᖅᑕᕋ ᑕᐃᒪᙵᓕᒫᑲᓴᒃ ᐱᓕᕆᑎᓪᓗᖓ... ᑕᐃᒪᓐᓇᑦᑎᐊᖅ ᓂᕆᐅᓚᐅᖅᐳᖓ ᐃᖅᑲᓇᐃᔮᓐᓂ ᐊᒻᒪ ᐃᓅᓯᓐᓂ," ᐅᖃᓚᐅᖅᐳᖅ.

ᐃᓄᖕᓂ ᐱᔪᒃᓯᑎᑦᑎᓚᐅᖅᑐᓂ, ᐅᓪᒻᔅᑕᑦ ᐃᓱᒪᕙᒃᐳᖅ ᐃᓚᒥᓂᒃ, ᐊᓈᓇᒥᓂᒃ, ᓇᔭᒥᓂᒃ, ᐊᑖᑕᒥᓂᒃ, ᐊᑖᑕᑦᑎᐊᒃᑯᒥᓂᒃ ᐊᒻᒪ ᓄᓇᖅᑲᑎᒥᓂᒃ. ᑲᔪᖏᖅᓴᖅᑕᐅᓚᐅᕆᕗᖅ ᐱᖃᓐᓇᕆᔭᒥᓄᑦ, ᐊᓂᒥᓄᑦ ᓇᔭᒥᓄᓪᓗ ᖁᕕᐊᓱᖃᑎᒌᒃᑎᓪᓗᒋᑦ, ᐱᖃᓐᓇᕆᔭᒥᓄᑦ ᐊᐅᓚᑦᑎᔨᐅᔪᓄᑦ ᐊᒻᒪ ᓇᖕᒥᓂᖃᖅᑎᐅᔪᓄᑦ. "ᓄᓇᓕᖕᓂ ᐃᑲᔪᖅᑎᐅᓪᓗᓂ, ᑕᖃᓇᖅᓯᖃᑦᑕᖅᐳᖅ, ᐃᓛᓐᓂᒃᑯᓪᓗ ᐊᒃᓱᕈᕐᓇᖅᓯᕙᒃᖢᓂ. ᐱᓗᐊᖅᑐᒥ ᒧᒥᖅᑎᐅᓪᓗᓂ, ᒪᒥᓴᖅᑎᐅᓪᓗᓂ ᒧᒥᖅᑎᐅᓪᓗᓂ, ᐃᓱᒪᕗᖓ ᐃᓄᐃᑦ ᐃᓛᓐᓂᒃᑯᑦ ᑐᑭᓯᕙᙱᒻᒪᑕ ᖃᓄᖅ ᐊᒃᓱᕈᕐᓇᖅᑎᒋᖕᒪᖔᑦ, ᐱᓗᐊᖅᑐᒥ ᖃᐃᖁᔭᐅᓪᓗᓂ ᓄᓇᓕᖕᓄᑦ ᕿᒃᓵᒃᑐᓄᑦ ᕿᒃᓵᒃᑐᓄᓪᓘᓐᓃᑦ ᐊᒻᒪ ᐊᒃᓱᕈᕐᓇᖅᑐᒃᑰᖅᑐᓄᑦ, ᐊᒻᒪ ᐊᒃᓱᕈᕐᓇᖅᑐᒃᑰᖅᑐᖃᖅᑎᓪᓗᒍ ᐱᓕᕆᓂᐊᕐᓗᓂ, ᐃᓛᓐᓂᒃᑯᑦ ᐊᒃᓱᕈᕐᓇᖅᑐᒻᒪᕆᐅᔪᓐᓇᖅᐳᖅ, ᑭᓯᐊᓂ ᖁᕕᐊᓇᖅᐳᖅ, ᐃᓅᖃᑎᖃᖅᓯᒪᕗᖓ ᐊᔪᙱᑦᑐᒻᒪᕆᐊᓗᖕᓂᒃ ᐃᓄᖕᓂᒃ ᐅᕙᓐᓂᒃ ᐃᑲᔪᕈᓐᓇᑦᑎᐊᖅᑐᓂᒃ ᑕᒪᑐᒨᓇ," ᐅᓂᒃᑳᕆᓪᓗᓂ.

ᓇᖕᒥᓂᖁᑎᖃᖅᖢᓂ, ᐅᓪᒻᔅᑕᑦ ᐅᐸᒍᓐᓇᑦᑎᐊᖅᐳᖅ ᐱᔭᕆᐊᖃᖅᑕᒥᓄᑦ ᓇᒡᒐᔾᔭᒥ ᐅᓪᓗᑐᐃᓐᓇᕐᒧᑦ 8:30-ᒥᑦ 4:30-ᒧᑦ ᐱᓕᕆᔭᕆᐊᖃᙱᖦᖢᓂ. ᒫᓐᓇᓕ, ᐃᓕᓐᓂᐊᖅᑎᑦᑎᕙᒃᐳᖅ ᐊᒻᒪ ᖁᕕᐊᓲᑎᖃᕆᐊᖅᑐᖅᐸᒃᖢᓂ ᐊᒃᓱᕈᕐᓇᖅᓯᒃᑲᓐᓂᙱᖦᖢᓂᓗ ᖃᓪᓗᓈᓄᑦ ᐃᖅᑲᓇᐃᔮᒧᑦ.

. ᐃᓱᒪᒋᓪᓗᒋᑦ ᐃᓕᓐᓂᐊᖅᑎᑦ ᐊᐅᓪᓚᕆᐊᖃᕐᓂᖏᓐᓂᒃ ᓯᓚᑦᑐᖅᓴᕐᕕᒡᔪᐊᕐᒧᐊᕐᓗᑎᒃ, ᐅᓪᒻᔅᑕᑦ ᐅᖃᐅᓯᖃᓚᐅᖅᐳᖅ ᓇᖕᒥᓂᖅ ᐊᑐᖅᓯᒪᔭᒥᓂᒃ ᓯᓚᑦᑐᖅᓴᕐᕕᒡᔪᐊᕐᒥ. ᐊᒃᓱᕉᑎᖃᓪᓚᕆᓚᐅᖅᐳᖅ ᐃᓅᓪᓗᓂ ᑎᒥᒥᒍᑦ ᐊᔪᕈᑎᖃᖅᖢᓂ ᑭᓯᐊᓂ ᐅᖃᐅᓯᖃᓚᐅᖅᐳᖅ, "ᑲᑉᐱᐊᓇᕐᓂᖅᐹᖅ ᐱᓕᕆᔭᕆᐊᒃᓴᖅ ᐊᑑᑎᖃᓛᖑᒋᕗᖅ... ᑕᒪᒃᑯᐊ ᑲᑉᐱᐊᒋᓂᖅᐹᕆᓲᒃᑲ, ᑕᐃᒪᓕ ᖃᐅᔨᒪᓕᖅᐳᖓ ᑕᐃᒪᐃᑦᑕᕆᐊᖃᕐᓂᓐᓂᒃ." ᓇᖕᒥᓂᖅ ᑕᐅᑐᙳᐊᕈᓐᓇᙱᒃᑲᓗᐊᖅᖢᓂ ᐊᐅᓪᓚᕆᐊᒃᓴᖅ ᓄᓇᓕᒋᔭᒥᓂᒃ ᐃᓕᓐᓂᐊᒃᑲᓐᓂᕆᐊᖅᑐᕐᓗᓂ, ᖁᔭᓕᕗᖅ ᑕᐃᒪᐃᑦᑕᕆᐊᖃᕐᓂᖓᓂᒃ ᓲᖃᐃᒻᒪ ᐱᓕᕆᔨᓪᓚᕆᖕᓂᒃ ᐱᑕᖃᕆᐊᖃᕐᒪᑦ ᓄᓇᓕᖕᓂ. "ᑕᒪᒃᑯᐊ ᒪᒃᑯᒃᑐᑦ ᐃᓐᓇᐃᓪᓗ ᐱᔭᕆᐊᖃᕋᑦᑎᒍᑦ ᑕᒪᒃᑯᓂᖓ ᓇᓗᓇᐃᒃᑯᑕᖅᑖᕈᑎᓂᒃ, ᑕᒪᒃᑯᓂᖓ ᐊᓂᒍᐃᔾᔪᑎᓂᒃ, ᐃᓕᓐᓂᐊᕐᓂᕐᒥᒃ, ᐅᑎᕈᓐᓇᕐᓂᐊᕐᒪᑕ ᓄᓇᓕᖕᓄᑦ ᐊᒻᒪᓗ ᐊᑐᖅᓯᒪᔭᒥᓂᒃ ᓇᒃᓴᕐᓗᑎᒃ ᓄᓇᓕᖕᓄᑦ. ᐊᒻᒪᓗ ᑕᒪᓐᓇ ᐃᑲᔪᕐᓂᐊᖅᑐᖅ ᓄᓇᓕᑦᑎᓐᓂ ᐱᕈᖅᐸᓪᓕᐊᓂᕐᒥᒃ, ᐃᓱᒪᒋᔭᒃᑯᓪᓕ," ᐃᓱᓕᑉᐳᖅ, ᓇᐃᓈᖅᓯᓪᓗᓂ ᐅᖃᐅᔾᔨᒋᐊᕈᑎᒥᓂᒃ ᑕᐃᒪᐃᓕᐅᑐᐃᓐᓇᕐᓗᓂ, ᐊᖏᕐᕋᖅᓯᕋᓗᐊᖅᑎᓪᓗᒍ, ᓴᖅᑭᑎᑦᑎᓗᓂ ᐊᓯᔾᔨᕐᓂᐅᔪᒥᒃ.

ᐃᓱᒪᒋᓪᓗᒍ ᓯᕗᓪᓕᖅᐹᖓᓂ ᓯᓚᑦᑐᖅᓴᕐᕕᒡᔪᐊᕐᒥ ᐊᑐᓚᐅᖅᓯᒪᔭᖓ ᐱᖓᓱᐃᓐᓇᕐᓂᒃ ᐃᓕᓐᓂᐊᕈᑎᓂᒃ ᐃᓱᓕᑦᑎᙱᖦᖢᓂ, ᑕᐅᑐᙱᖦᖢᓂᐅᒃ ᑲᑕᖕᓂᐅᓂᖓᓂᒃ ᐅᕝᕙᓘᓐᓃᑦ ᐱᕕᒃᓴᒥᒃ ᓱᕙᓕᑭᐊᖑᓂᖓᓂᒃ. ᐅᓪᒻᔅᑕᑦ ᐃᓕᑦᑎᕐᔪᐊᓚᐅᖅᐳᖅ, ᑲᑎᖃᑎᖃᖅᖢᓂ ᐱᖃᓐᓇᕆᔭᒥᓂᒃ, ᑭᖑᓂᐊᒍᓪᓗ ᑲᑎᖃᑎᖃᓕᖅᖢᓂ ᐃᓕᓴᐃᔨᒥᒃ ᐊᖅᑯᑎᒋᓕᓚᐅᖅᑕᒥᓂᒃ ᐃᓄᓕᕆᔨᐅᓂᕐᒧᑦ.

ᑐᓗᖅᑕᕈᑎᖃᓕᕌᖓᒥ, ᐅᓪᒻᔅᑕᑦ ᐃᓕᑦᑎᓚᐅᖅᐳᖅ ᐃᒻᒥᓂᒃ ᑭᒡᒐᖅᑐᐃᔪᓐᓇᕐᓂᕐᒥᒃ ᓄᓇᖃᖅᑳᖅᓯᒪᓪᓗᓂ ᐊᕐᓇᐅᓪᓗᓂ ᑎᒥᒥᒍᑦ ᐊᔪᕈᑎᓕᖕᓂᒃ, ᐊᓈᓇᒥᓄᑦ ᐃᓕᓚᐅᖅᑕᖓ. ᐊᓈᓇᖓᑕ ᑭᒡᒐᖅᑐᐃᖏᓐᓇᓚᐅᖅᐳᖅ ᓄᑕᕋᐅᓂᓕᒫᖓᓂ ᐊᒻᒪ ᐃᓐᓇᕈᖅᐸᓪᓕᐊᓂᖓᓂ ᐊᒻᒪ ᐃᑲᔪᓚᐅᖅᖢᓂᐅᒃ ᐅᓪᓗᒥᒧᑦ ᑎᑭᖦᖢᒍ. ᐊᒃᓱᕉᑎᒋᓚᐅᖅᓯᒪᔭᖓ ᓯᓚᑦᑐᖅᓴᕐᕕᒡᔪᐊᕐᒥ, ᐃᓕᓐᓂᐊᕆᐊᖅᖢᓂ ᖃᓪᓗᓈᓄᑦ ᐃᓕᓐᓂᐊᕐᕕᖕᒧᑦ ᓴᓇᔭᐅᓯᒪᙱᑦᑐᒧᑦ, ᐊᒻᒪ ᐊᒃᓱᕈᕆᐊᖃᓚᐅᖅᐳᖅ ᐱᔪᓐᓇᐅᑎᖓᓂ ᐃᓕᓐᓂᐊᕐᓂᕐᒧᑦ. "ᐃᓛᓐᓂᒃᑯᑦ ᐅᖃᐅᔾᔭᐅᖃᑦᑕᖅᐳᒍᑦ ᐱᓗᐊᕐᓂᑦᑎᓐᓂ. ᐃᓛᓐᓂᒃᑯᑦ ᐅᖃᐅᔾᔭᐅᓂᐊᖅᐳᒍᑦ ᐃᓕᕋᓇᕐᓂᑦᑎᓐᓂ," ᐃᖅᑲᐅᒪᕗᖅ, ᐃᖅᑲᐅᒪᓪᓗᓂ ᖃᓄᐃᓕᐅᖅᐸᓚᐅᕐᓂᖏᓐᓂ ᑕᐃᒃᑯᐊ ᓱᖏᐅᙵᓂᖃᙱᑦᑐᑦ ᓄᓇᖃᖅᑳᖅᓯᒪᔪᑦ ᐊᕐᓇᓂ ᐃᒻᒥᓂᒃ ᓴᐳᑎᓯᒪᓇᓱᒃᖢᑎᒃ. ᐱᔪᓐᓇᕐᓂᓕᒫᒥᓂ ᐱᓕᕆᓚᐅᖅᐳᖅ ᐊᑐᖅᓯᒪᔭᖏᑦ ᑕᐃᒪᐃᖁᓇᒋᑦ ᐊᓯᒥᓄᑦ ᐊᒻᒪ ᐃᓕᑦᑎᓚᐅᖅᐳᖅ ᐱᓕᕆᖃᑎᖃᕐᓂᕐᒥᒃ ᐃᓄᖁᑎᒥᓂᒃ, ᓄᓇᓕᖏᓐᓂᒃ ᐊᒻᒪ ᐃᓄᖕᓂ ᖃᓪᓗᓈᓄᑦ ᐱᓕᕆᕝᕕᖕᓂ. ᐃᓕᑦᑎᓚᐅᕆᕗᖅ ᐊᒃᓱᕈᕐᓂᕐᒥᒃ ᐱᔪᒪᔭᒥᓄᑦ, ᐃᓄᖁᑎᒥᓄᑦ ᐊᒻᒪ ᓄᓇᖅᑲᑎᒥᓄᑦ.

ᑭᖑᒧᑦ ᑕᑯᓪᓗᓂ, ᐅᓪᒻᔅᑕᑦ ᐅᖃᐅᔾᔪᖅᑕᐅᔪᒪᓚᐅᖅᐳᖅ ᒪᒃᑯᖕᓂᖅᓴᐅᑎᓪᓗᒍ, "ᐃᓕᖕᓂᒃ ᓴᐱᓕᖅᑕᐃᓕᒋᑦ, ᓲᖃᐃᒻᒪ ᐱᐅᓛᖅ ᓱᓕ ᑎᑭᓐᓂᐊᕐᒪᑦ." ᐊᒃᓱᕉᑎᖃᕐᔪᐊᓚᐅᖅᐳᖅ ᖃᑯᖅᑕᓂᒃ ᐱᖃᑎᖃᕆᐊᒃᓴᖅ ᖃᑉᓗᓈᓂᒃ ᓄᑕᖅᑲᓂᒃ ᐊᒻᒪ ᓄᓇᖃᖅᑳᖅᓯᒪᖅᑰᔨᙱᖦᖢᓂ ᓄᓇᖃᖅᑳᖅᑐᓂᒃ ᓄᑕᖅᑲᓂᒃ ᐱᖃᑎᖃᕆᐊᒃᓴᖅ. ᐱᕈᖅᓴᙱᖦᖢᓂ ᐃᓕᖅᑯᓯᕐᒥᓂᒃ ᐊᒻᒪ ᐅᑎᑐᐃᓐᓇᖅᖢᓂ ᐃᓕᖅᑯᓯᑐᖃᕐᒥᓄᑦ ᒪᒃᑯᒃᑑᑎᓪᓗᒍ, ᐃᓕᑦᑎᔭᕆᐊᖃᓚᐅᖅᐳᖅ ᐃᒻᒥᓂᒃ ᐃᓱᒪᒋᙱᖦᖢᓂ ᐅᖃᖅᖢᓂᓗ, "ᐃᓛᓐᓂᒃᑯᑦ ᐊᒃᓱᕈᕐᓇᖅᑐᒃᑰᕆᐊᖃᖅᐸᒃᐳᒍᑦ ᐃᓅᓯᖅ ᐱᐅᑦᑎᐊᓕᖁᓪᓗᒍ." ᐊᒃᓱᕈᕐᓇᖅᑐᒃᑰᖅᓯᒪᕗᖅ ᐊᒻᒪ ᐊᒃᓱᕈᖅᖢᓂ ᐆᒪᐃᓐᓇᕋᓱᒃᖢᓂ, ᐃᑲᔪᖅᑕᐅᕙᒃᖢᓂ ᐊᔪᕆᖅᓱᐃᔨᑦᑎᐊᕙᖕᓄᑦ. ᑕᒪᒃᑯᐊ ᐊᑐᖅᓯᒪᔭᖏᑦ ᐃᑲᔪᖅᐸᒃᐳᑦ ᐊᒃᑐᐊᓂᖃᑦᑎᐊᕐᓂᕐᒥᒃ ᒪᒃᑯᒃᑐᓄᑦ ᓲᖃᐃᒻᒪ ᐊᑐᖅᓯᒪᒐᒥ ᐅᖃᐅᓯᕆᔭᖏᓐᓂᒃ.

ᓴᓇᕐᕈᑎᓄᓪᓕ ᐃᑲᔪᕈᑎᐅᔪᓐᓇᖅᑐᓄᑦ ᖃᓄᐃᙱᑦᑎᐊᕐᓂᕐᒧᑦ ᐊᒻᒪ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᕐᒧᑦ, ᐅᓪᒻᔅᑕᑦ ᓇᓗᓇᐃᖅᓯᕗᖅ ᐃᓕᖅᑯᓯᖓ ᐊᖏᔪᐊᓘᓂᖓᓂᒃ. ᓯᕗᓪᓕᖅᐹᑦᑎᐊᒥ ᐅᕕᓂᙳᐊᖅᑎᐅᓪᓗᓂ, ᒧᒥᖅᑎᐅᓪᓗᓂ, ᕿᓚᐅᔾᔭᖅᑎᐅᓪᓗᓂ, ᒥᖅᓱᖅᑎᐅᓪᓗᓂ ᐅᕝᕙᓘᓐᓃᑦ ᓴᐸᖓᓕᕆᕙᒃᖢᓂ. ᓯᕿᓐᓂᖅᑐᒥ ᒧᒥᖅᑎᐅᓪᓗᓂ ᐃᖏᕐᕋᓂᐅᓯᒪᒋᕗᖅ ᓴᙱᓂᖅᑖᕈᑎᒋᓯᒪᓪᓗᓂᐅᒃ ᒪᒥᓴᕈᑎᒋᕙᒃᖢᓂᐅᒃ.

ᐃᓱᒪᓕᕆᔨᙳᖅᐸᓪᓕᐊᓕᓚᐅᖅᐳᖅ ᖃᐅᔨᓕᕋᒥ ᑐᕌᑦᑎᐊᙱᓐᓂᕐᒥᓂᒃ. ᒦᒡ ᐆᓪᒻᔅᑕᑦ ᖁᔭᓈᖅᓯᒐᒥ ᐃᓱᒪᒋᓯᒪᔭᒥᓂᒃ ᐃᓄᓕᕆᔨᐅᓂᕐᒥᒃ, ᓇᓂᓯᓚᐅᖅᐳᖅ ᐃᖅᑲᓇᐃᔮᕆᔪᒪᔭᒥᓂᒃ ᖁᕕᐊᒋᔭᒥᓂᒃ. ᐊᓂᒍᖅᑎᑦᑎᓚᐅᖅᖢᓂ ᐊᔪᕐᓇᖅᑐᖅᓯᐅᕈᑕᐅᕙᒃᑐᓂᒃ ᓄᓇᖃᖅᑳᖅᓯᒪᓪᓗᓂ ᐊᕐᓇᐅᓪᓗᓂ ᑎᒥᒥᒍᑦ ᐊᔪᕈᑎᓕᖕᓂᒃ ᐊᒃᓱᕉᑎᖃᖅᖢᓂ ᐃᓕᓐᓂᐊᕈᒪᓂᕐᒥᓂᒃ, ᐊᓂᒍᐃᔾᔪᑎᑖᓚᐅᖅᐳᖅ ᒪᑐᐃᖅᓯᓪᓗᓂᓗ ᓯᕗᓂᒃᓴᒧᑦ ᖁᕕᐊᓱᒍᑎᒋᓇᔭᖅᑕᖓᓂᒃ ᐊᓯᔾᔨᖅᓯᔾᔪᑕᐅᔪᓐᓇᖅᑐᒥᒡᓗ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.