ᑐᓄᐊᓂ Scenes Consulting Dreams: ᒥᓯᐅᓪ ᔭᖕ−ᑯᕈᒃ ᐱᒻᒪᕆᐅᒋᔭᖏᑦ-ᑐᙵᕕᓖᑦ ᓇᖕᒥᓂᖃᕐᓂᕐᒧᑦ ᐸᕐᓇᒍᑎ
"ᑭᓱᒥᑭᐊᖅ ᖁᕕᐊᒋᙱᑕᕐᓂᒃ ᐱᙱᓪᓗᑎᑦ, ᓲᖃᐃᒻᒪ ᑕᑯᑎᑦᑎᓂᐊᕐᒪᑦ ᐃᖅᑲᓇᐃᔮᕐᓂ," ᐅᖃᖅᑐᖅ ᖃᐅᔨᒃᑲᐃᔨ ᒥᓯᐅᓪ ᔭᖕ−ᑯᕈᒃ. ᑐᙵᕕᐅᔪᖅ ᓴᓇᓯᒪᔭᖓᓂᒃ ᓇᒻᒥᓂᖃᕐᓂᕐᒥᒃ ᐊᒻᒪᓗ ᐱᑦᔪᑎᒋᓪᓗᒍ ᐅᐱᒍᓱᒍᓐᓇᖅᑐᖅ ᖃᓄᐃᓕᐅᖃᑦᑕᕐᓂᕐᒥᓂᒃ ᐊᒻᒪᓗ ᑭᓇᐅᒻᒪᖔᖅ ᓇᒻᒥᓂᖃᑦᑎᐅᓪᓗᓂ.
ᓇᖕᒥᓂᕐᒨᖓᔪᖅ, ᐋᓪᒑᓐᑯᐃᓐ, ᐃᑎᓕᐊᓐ ᐊᒻᒪ ᖃᓪᓗᓈᑎᑐᑦ ᓯᕗᓕᕕᓂᓕᒃ ᐊᒻᒪ ᐊᓈᓇᒋᔭᐅᔪᖅ ᐱᖓᓱᓄᑦ. ᐱᕈᖅᓴᔭᐅᓚᐅᖅᑐᖅ ᐋᓪᒑᓐᑯᐃᓐ ᐊᓈᓇᑦᑎᐊᖓᓄᑦ ᐊᖓᔪᖅᑳᒥᓂᒃ ᐱᖃᑎᖃᖅᖢᓂ ᐊᖏᕐᕋᖏᓐᓂ. ᑕᒪᓐᓇ ᓅᓐᓂᐅᔪᖅ ᑐᑭᖃᓚᐅᖅᑐᖅ 12-ᖑᓗᐊᖅᑐᓄᑦ ᓄᑲᖅᖡᑦ ᐃᓕᓐᓂᐊᕐᕕᖏᓐᓄᑦ ᐊᒻᒪᓗ ᐊᒃᓱᕈᖅᖢᓂ ᐱᖃᓐᓇᕆᔭᖅᑖᕋᓱᒃᖢᓂ. ᐊᒃᓱᕈᖅᖢᓂ ᐱᓕᕆᓚᐅᖅᑐᖅ ᐃᓱᓕᑦᑎᓇᓱᒃᖢᓂ ᐃᓕᓐᓂᐊᑦᑎᐊᓚᐅᖕᓂᖓᓄᑦ ᐊᔪᕐᓇᖅᑐᒻᒪᕆᐊᓗᖕᒧᑦ.
ᐃᓚᖓᑦ ᐊᒃᓱᕈᕈᑎᒋᓚᐅᖅᑕᖓᑦ, ᐱᕈᖅᓯᒪᓪᓗᓂ ᐊᑕᐅᓯᐅᙱᑦᑐᒥᑦ ᐃᓕᖅᑯᓯᓕᖕᒥᑦ. "ᐊᒃᓱᕈᕐᓇᑦᑎᐊᖅᑐᖅ ᑭᓇᐅᓂᕐᓂ ᖃᐅᔨᔭᕆᐊᒃᓴᖅ, ᓇᓃᒻᒪᖔᓪᓗ," ᐃᖅᑲᐅᒪᔪᖅ. ᐱᓱᒃᖢᓂ ᒪᕐᕉᖕᓄᑦ ᓄᓇᕐᔪᐊᓄᑦ, ᐊᖏᖅᑕᐅᓚᐅᙱᑦᑐᖅ ᓄᓇᖃᖅᑳᖅᓯᒪᔪᑦ ᓄᑕᖅᑲᓄᑦ ᐃᓕᓐᓂᐊᕐᕕᖕᒥᓂ ᐊᖏᖅᑕᐅᓇᓱᒋᙱᖦᖢᓂᓗ ᓄᓇᖃᖅᑳᖅᓯᒪᙱᑦᑐᓄᑦ ᐃᓕᓐᓂᐊᖅᑎᓄᑦᑕᐅᖅ.
ᐃᓅᖃᑎᒌᓂᑦ ᐊᖕᒪᓗᖅᓯᓯᒪᔪᑦ ᖃᐅᔨᓪᓗᓂ ᐊᖏᕐᓂᕐᒥᒃ ᐱᕈᖅᐸᓪᓕᐊᓂᕐᒥ ᐃᓚᐅᑎᑦᑎᓪᓗᑎᒃ ᓄᑕᖅᑲᓂᒃ ᐊᒥᖅᑳᕈᑎᖃᕐᖢᑎᒃ ᐱᔪᒪᔭᖏᓐᓂ hip-hop, ᑐᒃᑲᕆᐊᓕᖕᓂ, ᐅᖃᓕᒫᕐᓂᕐᒥ, ᒧᒥᕐᓂᕐᒥᒃᓗ. ᐊᐅᓪᓚᑲᑕᒐᓱᒃᑎᓪᓗᒍ ᐊᒻᒪ ᐳᓚᕋᖅᑐᓕᕆᓂᕐᒧᑦ ᐃᓕᓐᓂᐊᖅᑎᓪᓗᒍ ᐱᖃᓐᓇᕆᔭᒥᓂᒃ ᐊᐃᑉᐸᖃᙱᖦᖢᓂ ᐊᖓᔪᖅᑳᒥᓂᒃ ᐊᒃᑐᐊᓂᖃᕈᓐᓇᓚᐅᖅᑐᖅ ᓯᓂᑦᑎᐊᕈᓐᓇᐃᓪᓕᓂᕐᒧᑦ ᐊᒻᒪ ᐃᓕᓐᓂᐊᖅᑕᒥᓄᑦ. ᑭᖑᓂᐊᒍᑦ, ᒪᒃᑯᒃᑐᑦ−ᑯᕈᒃ ᐊᒃᓱᕈᓚᐅᖅᑐᑦ ᐊᖏᖅᑕᐅᓇᓱᒃᖢᓂ ᐃᖅᑲᓇᐃᔭᕐᕕᖕᒥ ᐃᓚᖓᒍᑦ.
ᐃᖅᑲᓇᐃᔭᓚᐅᖅᑐᖅ ᑲᑐᔾᔨᖃᑎᒌᒥᑦ ᐱᕈᖅᓴᓪᓗᓂᓗ ᐊᐅᓚᑦᑎᔨᒻᒪᕆᐅᓂᕐᒧᑦ ᑭᓯᐊᓂ ᐃᓛᓐᓂᒃᑯᑦ ᓈᒻᒪᒍᓱᙱᖦᖢᓂ ᐃᓕᓐᓂᐊᖅᓯᒪᑦᑎᐊᙱᓐᓂᖓᓄᑦ, ᐃᓕᓐᓂᐊᕆᐊᑐᐃᓐᓇᖅᖢᓂ ᐊᐅᓪᓚᕐᓂᕐᒧᑦ ᐳᓚᕋᖅᑐᓕᕆᓂᕐᒧᓪᓗ, ᐊᒃᑐᐊᓂᖃᙱᖦᖢᓂ ᐃᖅᑲᓇᐃᔮᖓᓄᑦ. ᐊᐅᓚᑦᑎᓚᐅᖅᑐᖅ ᑲᑐᔾᔨᖃᑎᒌᒥᒃ ᐊᕐᕌᒍᓄᑦ 15-ᓄᑦ ᑐᙵᕕᖃᖅᖢᓂ ᓱᖏᐅᑎᓂᕐᒥᒃ, ᖃᐅᔨᓴᕐᓂᕐᒥᒃ, ᒪᓕᖕᓂᕐᒥᒃ ᐊᑐᐊᒐᓂᒃ ᐊᒻᒪᓗ ᐊᑐᖅᑕᐅᔾᔪᓯᓂᒃ ᐊᒻᒪᓗ ᐊᐅᓚᑦᑎᑦᑎᐊᕈᓐᓇᕐᓂᕐᒧᑦ ᐊᔪᙱᑕᖃᕐᓂᕐᒥᒃ. ᐊᑲᖅᓴᙱᖦᖢᓂ ᓵᑦᑎᐊᕐᒥᐅᑕᖃᓚᐅᕋᓗᐊᖅᑎᓪᓗᒍ, ᐊᓕᐊᓇᐃᒋᓚᐅᖅᐸᐅᒃ ᐱᓕᕆᐊᕆᓚᐅᖅᑕᒥᓂᒃ ᐋᖅᑭᒃᓯᓪᓗᓂᓗ ᓴᙱᔪᓂᒃ ᐱᖃᓐᓇᕇᒍᓯᕐᓂᒃ ᐃᓅᖃᑎᒌᖕᓂᕐᒥᒡᓗ ᐊᐅᓪᓚᓚᐅᙱᓐᓂᕐᒥᓂᒃ ᓇᖕᒥᓂᖅ ᐅᖃᖃᑎᖃᕐᓂᕐᒧᑦ ᓇᖕᒥᓂᕆᔭᒥᓂᒃ.
ᖃᐅᔨᒃᑲᐃᔨᐅᓪᓗᓂ, ᐱᓕᕆᓲᖑᕗᖅ ᓂᐅᕐᕈᑎᖃᕋᓱᖕᓂᕐᒥᒃ, ᖃᕋᓴᐅᔭᒃᑯᑦ ᑐᓴᐅᒪᔪᓕᕆᔾᔪᑎᓂᒃ, ᐱᓕᕆᐊᑦ ᐊᐅᓚᔪᓐᓇᐅᑎᖏᓐᓂᒃ, ᑖᒃᓯᓕᕆᔾᔪᑎᓄᑦ ᖃᓄᐃᓕᐅᕈᑕᐅᔪᒪᔪᓂᒃ, ᑲᑎᒪᔨᓄᑦ ᐊᐅᓚᑦᑎᔾᔪᓯᕐᓂᒃ, ᓇᓗᓇᐃᒃᑯᑦᑎᖅᓱᐃᓂᕐᒥᒃ, ᐱᓕᕆᐊᒃᓴᓂᒃ ᐱᕙᓪᓕᐊᑎᑦᑎᓂᕐᒥᒃ, ᐊᑐᐊᒐᕐᓂᒃ ᕿᒥᕐᕈᔪᓂᒃ ᐊᒻᒪ ᖃᐅᔨᒪᔭᐅᓂᖓ ᐊᐅᓚᑕᐅᓂᖓᓂᒃ. ᐱᖁᔨᔪᖅ ᐱᔪᒥᒍᓱᒃᑐᓂ ᖃᐅᔨᒪᔨᑕᕐᓂᑦ ᐱᓕᕆᐊᒃᓴᒧᑦ ᐊᐅᓚᑦᑎᓂᕐᒧᑦ ᐃᓕᓐᓂᐊᒐᒃᓴᒥᑦ ᐋᖅᑭᒃᓯᓗᓂᓗ ᓴᙱᔪᓂᒃ ᑎᑎᖅᑲᓂᒃ ᐊᑐᕋᓲᑎᓂᒃ ᑲᒪᒋᔭᖏᓐᓄᑦ ᐃᖅᑲᓇᐃᔮᖏᓐᓂ. ᒪᒃᑯᒃᑐᖅ−ᑯᕈᒃ ᐅᖃᖅᑐᖅ ᑐᓴᐅᒪᖃᑦᑕᐅᑎᓂᖅ ᐱᒻᒪᕆᐅᒋᐊᖓᓂᑦ, ᐊᒻᒪ ᓇᓗᓇᐃᖅᓯᓂᕐᒥᑦ ᓱᓇᓂᑦ ᑲᔪᓯᑎᑦᓯᓂᐊᕐᒪᖔᑦ.
ᓱᓕᑦᑎᐊᕐᓂᕐᒥᑦ ᐊᑐᖅᑐᓂ ᐊᑐᐊᒐᑦᑎᐊᕙᐅᓂᖅᐹᖑᓪᓗᓂ ᐊᒻᒪᓗ ᐅᖃᖅᑐᓂ, ᓴᓇᓯᒪᕗᖅ ᐊᑐᖃᑦᑕᖅᑕᒥᓂᒃ ᐅᖃᐅᓯᒃᑯᑦ ᐊᒻᒪᓗ ᑐᓂᔭᐅᓂᒃᑯᑦ. ᐅᒃᐱᕈᓱᒃᑭᕗᖅᑕᐅᖅ ᐊᑭᓕᒐᒃᓴᖅᑖᖅᑎᑦᑎᓂᕐᒥᒃ ᐊᑑᑎᖃᕐᓂᕆᔭᕐᓂᒃ ᐊᒻᒪ ᐱᓕᕆᓗᑎᑦ ᑲᔪᓯᐊᖏᓐᓇᕈᓐᓇᖅᑐᒥᒃ ᑕᖃᓗᐊᖁᓇᒃ. ᒪᒃᑯᒃᑐᖅ−ᑯᕈᒃ ᐱᓕᕆᖃᑎᖃᑐᐃᓐᓇᖅᐸᒃᐳᖅ ᐱᓕᕆᕝᕕᒋᔭᐅᕙᒃᑐᓂᒃ ᑐᕌᕆᔭᖏᓐᓄᑦ ᐊᑐᖅᑕᐅᕙᒃᑐᓄᓪᓗ ᐊᑕᐅᑦᑎᒃᑰᖃᑎᖃᖅᖢᑎᒃ ᖁᔭᒋᔭᖃᖅᖢᓂᓗ ᐃᓂᒦᖃᑕᐅᔪᓐᓇᕋᒥ ᓂᕈᐊᕆᔭᖃᕈᓐᓇᖅᖢᓂ.
ᖁᕕᐊᓱᒃᑐᖅ ᐅᖃᖃᑎᖃᕆᐊᒃᓴᖅ ᓯᕗᓕᖅᑎᐅᙱᖔᕐᓗᓂ ᑲᓇᑕᒥ ᑲᑐᔾᔨᖃᑎᒌᒥᒃ ᓲᖃᐃᒻᒪ ᐅᐸᒍᑎᔭᕆᐊᖃᙱᒻᒪᑦ ᐊᖏᔪᓄᑦ ᖃᓄᐃᓕᐅᕈᑎᓄᑦ ᐃᖅᑲᓇᐃᔭᕈᓐᓇᕐᖢᓂᓗ ᑭᖑᓂᖔᑦᑎᓐᓂ. ᖁᕕᐊᒋᔭᖃᖅᑐᖅ ᐃᖅᑲᓇᐃᔭᕐᓂᕐᒥᑦ-ᐃᓅᓯᕐᒥᑦ ᓇᓕᒧᒌᑎᑦᓯᓂᕐᒥᑦ ᐊᓈᓇᐅᒋᐊᖃᖅᑐᖅ ᓄᓕᐊᕇᖑᓗᓂᓗ ᐱᔾᔪᑎᒋᑦᓱᒍ ᑲᑎᒪᓂᖏᓐᓄᑦ ᐊᐅᓪᓚᖃᑦᑕᕐᓂᕐᒧᓪᓗ ᐊᑦᓱᕈᓐᓇᓚᐅᖅᑐᖅ ᐊᐃᑉᐸᕇᓐᓂᕐᒥᑦ. ᒫᓐᓇ ᒥᕐᖑᐃᖅᓯᕐᕕᓕᐊᕈᓐᓇᖅᓯᔪᖅ, ᕿᔪᖕᓄᑦ ᐱᓱᒍᓐᓇᖅᓯᓪᓗᓂ ᐅᕝᕙᓘᓐᓃᑦ ᕿᑐᕐᖓᒥᓂᒃ ᐃᒡᒑᒃᓯᒪᓗᓂ ᖃᖓᑐᐃᓐᓇᖅ ᐱᔪᒪᒍᓂ.
ᓯᓚᑖᓂ ᐃᖅᑲᓇᐃᔭᕐᓂᐅᑉ, ᓄᓇᖃᖅᑐᖅ ᐊᖏᔪᒥ ᓄᓇᒥ ᓇᖕᒥᓂᖅ ᒍᕇᑕᓐᒥ. ᓯᕗᓂᒃᓴᑦᑎᓐᓂ, ᐊᑯᓂᒻᒪᕆᒃ ᐅᐊᔭᑯᑖᒃᑰᖃᑦᑕᓛᓕᖅᑐᖅ. ᑎᑎᕋᖃᑦᑕᖅᓯᒪᔪᖅ ᓱᕈᓰᑦ ᐅᖃᓕᒫᒐᖏᓐᓂᒃ ᐊᒻᒪᓗ ᑎᑎᕋᒃᑲᓐᓂᕈᒪᓪᓗᓂ ᐊᒻᒪᓗ ᒪᑐᐃᖅᓯᔪᒪᓪᓗᓂ ᓇᒻᒥᓂᖃᑦᑎᐅᔪᓂᒃ ᐊᑦᔨᒋᖏᑕᖏᓐᓂᒃ ᒫᓐᓇᐅᔪᖅ ᖃᓄᐃᓕᐅᕐᓂᕆᓚᐅᖅᑕᖓᓂᒃ. "ᐅᕙᓐᓂᒃ ᑕᑯᓚᐅᖅᑐᖓ ᑕᒪᑐᒧᖓ ᐊᖏᔪᒧᑦ ᓄᓇᒧᑦ, ᑕᑯᓪᓗᖓ ᓇᐹᖅᑐᓂᒃ, ᐃᒪᕐᒥᓪᓘᓐᓃᑦ ᑎᑎᕋᕐᓂᕐᒧᓪᓗ ᐅᖃᓕᒫᒐᕐᓂᒃ, ᓲᕐᓗ ᓯᑏᕙᓐ ᑭᖕ ᐅᖃᓕᒫᒐᖅ, ᑭᓯᐊᓂ ᑐᖁᔪᖃᙱᖦᖢᓂ," ᐃᒡᓚᖅᖢᓂ.
ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐃᓱᒪᒥᐅᑕᖃᕋᓱᒃᐳᖅ ᑭᓱᓂᒃ ᓴᖅᑭᑎᑦᑎᕙᖕᒪᖔᑕ ᑭᒃᑯᑐᐃᓐᓇᓄᑦ ᑕᑯᔭᐅᔪᓐᓇᖅᐸᒃᑐᓄᑦ ᖃᓄᕐᓗ ᑕᒪᓐᓇ ᐅᑎᕈᓐᓇᕐᒪᖔᑦ ᑮᔭᐅᔪᓐᓇᕐᒪᖔᓪᓗ ᕿᓂᓕᕌᖓᕕᑦ ᐱᓕᕆᐊᒃᓴᒥᒃ. ᐊᔾᔩᑦ ᑲᑎᙵᔪᓄᑦ ᐱᐅᙱᑦᑑᔪᓐᓇᖅᑐᖅ ᐃᖅᑲᓇᐃᔭᖅᑎᑦᑎᔨᓄᑦ ᑲᒪᒋᔭᕐᓄᓪᓗ.
"ᑭᓱᖃᕈᕕᑦ ᐃᓄᖕᓄᑦ ᑐᓴᐅᒪᔾᔪᑎᒃᑯᑦ, ᐊᖓᔪᖅᑳᑎᓪᓗ ᑕᑯᖁᙱᒃᑯᕕᐅᒃ, ᐱᑐᐃᓐᓇᕆᐊᖃᖅᑐᖅ, ᐃᓄᖕᓄᑦ ᑐᓴᐅᒪᔾᔪᑎᒃᑰᕆᐊᖃᙱᑦᑐᖅ. ᐋᓐᓂᓇᙱᑦᑐᖅ ᐊᐱᕆᓗᓂ ᑭᓇᒥᑭᐊᖅ ᐊᖓᔪᒃᖠᐅᓂᕐᓴᒥᒃ... ᓲᖃᐃᒻᒪᓕ ᐱᑐᐃᓐᓇᕆᐊᖃᕐᓂᖅ ᑭᓇᒥᑭᐊᖅ ᐅᑭᐅᖃᕐᓗᓂ ᐅᖂᑕᙳᐊᒥ ᑖᓐᓇᐅᓂᐊᕐᒪᑦ ᐃᖅᑲᓇᐃᔭᓕᖅᑎᑦᑎᓂᐊᖅᑐᖅ ᐃᓕᖕᓂᒃ," ᐅᖃᖅᑐᖅ. "ᐅᔾᔨᖅᓱᑦᑎᐊᖅᐸᒡᓗᑎᑦ tweet-ᑎᑦ, ᑖᒃᑯᐊ ᑕᐅᕗᖓᓕᒫᖅ," ᐃᓱᓕᑉᐳᖅ.
ᓴᙱᔪᒥᑦ ᖃᐅᔨᒪᔭᐅᓂᕐᒥᑦ ᑐᑭᖃᖅᑐᖅ ᐱᖃᕆᐊᖃᖏᑦᑐᖅ ᐱᓕᕆᐊᕆᓗᐊᖏᑦᑕᖓᓂᑦ, ᑕᐃᒪᐃᒻᒪᑦ ᐃᓱᒫᓗᒋᐊᖃᖏᑦᑐᖅ ᑕᑯᑦᓴᐅᑎᑦᓯᓂᐊᕐᒪᖔᑦ ᐃᖅᑲᓇᐃᔮᖓᓂᑦ. ᒥᓯᐅᓪ ᔭᖕ-ᑯᕈᒃ ᓇᒻᒥᓂᖁᑎᓕᐅᖅᓯᒪᔪᖅ ᐅᐱᒍᓱᒍᓐᓇᖅᓱᓂ ᖃᓄᐃᓕᐅᖃᑦᑕᕐᓂᕐᒥᓂᒃ ᐊᒻᒪᓗ ᑭᓇᐅᒻᒪᖔᖅ ᓇᒻᒥᓂᖃᖅᑎᐅᓪᓗᓂ ᓄᓇᕐᔪᐊᕐᒥ, ᑐᓴᖅᑎᑕᐅᓯᒪᓪᓗᓂ ᑭᓇᐅᓂᕐᒥᓂᒃ, ᐋᓪᒑᓐᑯᐃᓐ ᐊᕐᓇᖅ ᓇᓂᓯᒋᐊᖃᓚᐅᖅᑐᖅ ᓄᓇᒥᓂᒃ ᓄᓇᕐᔪᐊᕐᒥ ᓄᓇᖃᕈᒪᔫᔮᖏᓐᓇᒥ. ᐊᒃᓱᕈᖃᑦᑕᓚᐅᖅᓯᒪᔪᖅ ᖀᖅᓱᖅᖢᓂ, ᑭᓯᐊᓂ ᒫᓐᓇ ᖃᐅᔨᒪᓕᖅᑐᖅ ᑭᓇᐅᓂᕐᒥᓂᒃ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
