"ᐅᖃᐅᓯᕋ ᐊᓯᐅᑐᐃᓐᓇᖁᓚᐅᙱᑕᕋ," ᐅᖃᖅᐳᖅ ᓈᑕᓕ ᓛᒐᓐ, ᓵᓪᑕᐅᒃᔅ ᐅᖃᐅᓯᓕᕆᓂᕐᒧᑦ ᐃᓕᓴᐃᔨ. ᔭᐃᓇᒥᐅᑕᖅ, ᓴᔅᑳᑦᓱᐊᓐᒥ ᓄᓇᖃᖅᑐᖅ ᑭᓯᐊᓂ ᐱᕈᖅᓴᓚᐅᖅᑐᖅ ᐃᖃᓪᓕᐊᕐᓂᕐᒧᑦ ᑕᓯᕐᒥ. ᐃᓚᒋᔭᐅᔪᖅ ᑰᑎ ᓄᓇᖃᖅᑳᖅᓯᒪᔪᓄᑦ ᐊᒻᒪᓗ ᒪᒃᑯᓛᖑᓪᓗᓂ 13-ᓂᒃ ᐃᕐᖑᑕᓂᒃ ᐱᕈᖅᓴᓚᐅᖅᓯᒪᔪᓂᒃ ᐊᓈᓇᑦᑎᐊᒥᓄᑦ.  ᐅᖃᕈᓐᓇᑦᓯᐊᖅᑐᖅ ᓵᓪᑕᐅ ᐅᖃᖅᑎ, ᐊᓈᓇᑦᓯᐊᖓ ᐅᖃᕈᓐᓇᓚᐅᖏᑦᑐᖅ, ᑎᑎᕋᕈᓐᓇᕋᓂ ᐅᖃᓕᒫᕋᓂᓘᓐᓃᑦ ᖃᓪᓗᓈᑎᑐᑦ, ᓂᕈᐊᖔᖅᓱᓂ ᐅᖃᐅᓯᕐᒥᓂᒃ ᑐᓂᓯᖔᕈᒪᑦᓱᓂ ᕿᑐᕐᖓᓕᒫᓄᑦ ᐱᕈᖅᓴᔭᖏᓐᓄᑦ.

"ᐊᓕᐊᓇᐃᒍᓱᑦᑎᐊᓚᐅᖅᐳᖓ ᐃᓕᓐᓂᐊᖅᑎᑕᐅᔪᓐᓇᓚᐅᕋᒪ ᐱᖅᑯᓯᓐᓂᒃ ᐊᒻᒪ ᐅᖃᐅᓯᓐᓂᒃ ᐊᒻᒪ ᖃᐅᔨᒪᓪᓗᖓ ᓇᑭᙶᕐᒪᖔᕐᒪ, ᓇᑭᙶᕐᒪᖔᑕ ᓇᑭᙶᕐᒪᖔᑕ," ᑕᑯᒃᓴᐅᑎᑦᑎᔪᖅ. ᓂᖏᐅᖓ ᐊᖏᕐᕋᖃᖅᑎᐅᓚᐅᖅᑐᖅ ᓄᓇᒥ ᐊᒻᒪᓗ ᑕᐃᒪᓐᓇ ᐃᕐᖑᑕᒥᓄᑦ ᐃᓅᔪᓐᓃᓚᐅᖅᑐᖅ. ᓛᒐᓐ ᖃᓪᓗᓈᑎᑐᑦ ᐅᖃᓪᓚᓚᐅᖅᑐᖅ ᖃᑕᙳᑎᒥᓄᑦ ᑭᓯᐊᓂ ᐅᖃᓪᓚᒃᖢᓂ ᓵᓪᑑᒥᒃ ᐊᓈᓇᑦᑎᐊᖓᓗ ᐅᖃᓪᓚᒍᓐᓇᖅᓯᑎᑦᑎᑲᐅᖅᑐᓚᐅᖅᑐᖅ. 23-ᓂᒃ ᐅᑭᐅᖃᖅᑎᓪᓗᒍ, ᐊᓈᓇᑦᑎᐊᖓ ᐃᓅᔪᓐᓃᓚᐅᖅᐳᖅ ᕿᒃᓵᒃᖢᓂᓗ, ᐅᖃᐅᓯᖃᖅᖢᓂ ᐅᖃᐅᓯᖅᑕᒥᓂᒃ ᓯᓂᒋᐊᖅᑐᖅᓯᒪᓂᕐᒥᓂᒃ.   

ᔭᒐᐃᔭᐅᓂᖓ ᐃᓚᒌᑦ ᒥᑕᕐᕕᒥᓂᖓ ᓯᖁᓪᓗᐃᓚᐅᕐᒪᑦ, ᐊᓈᓇᑦᑎᐊᕆᑐᐃᓐᓇᓚᐅᖏᑕᖓ ᑭᓯᐊᓂ ᐃᓕᓴᐃᔨᖓ. ᐅᖃᕈᓐᓇᕋᓗᐊᖅᖢᓂ ᐅᖃᐅᓯᕐᒥᓂᒃ ᐃᓚᒥᓄᑦ, ᐊᓈᓇᑦᑎᐊᒥᓂᒃ ᐊᓯᐅᔨᓪᓗᓂ ᒪᑐᔭᐅᑎᑦᑎᓚᐅᖅᐳᖅ. "ᐱᔪᓐᓇᖅᑰᔨᔪᓐᓃᖅᑐᖓ," ᓛᒐᓐ ᐃᖅᑲᐅᒪᔪᖅ. "ᐅᖃᐅᓯᕋ ᐃᓱᒪᓐᓂ ᐃᒃᓯᕚᑐᐃᓐᓇᓚᐅᖅᑐᖅ, ᐆᒻᒪᑎᒪ ᑐᓄᐊᒍᑦ, ᐃᓕᓴᕐᓇᐅᑎᒪ ᑐᓄᐊᒍᑦ ᐊᑯᓂᐊᓗᒃ. ᑕᒪᓐᓇ ᓯᓂᓐᓂᐅᓚᐅᖅᑐᖅ. ᑕᒪᓐᓇ ᐃᓕᖅᑯᓯᐅᖃᑦᑕᖅᓯᒪᖕᒪᑦ ᐅᖃᐅᓯᕋ ᑐᐹᕐᓗᒍ, ᐃᓕᓴᕐᓇᐅᑎᒐ ᑐᐹᕐᓗᒍ, ᐊᒻᒪᓗ ᒫᓐᓇ ᐊᑐᖅᑕᕋᓄᐊᕐᓗᖓ. ᐊᔾᔨᐅᙱᑦᑐᒃᑯᑦ ᐃᖏᕐᕋᓂᐅᓵᖅᐳᖅ, ᓇᓗᓇᙱᑦᑐᖅ," ᑲᔪᓰᓐᓇᖅᐳᖅ. 

ᐊᕐᕌᒍᑦ ᖃᔅᓯᐊᕐᔪᐃᑦ ᐊᓂᒍᖅᑐᑦ, ᓛᒐᓐ ᐅᐸᒃᑕᐅᓚᐅᖅᓯᒪᔪᖅ ᐃᓕᓴᐃᔨᒻᒪᕆᖕᒧᑦ ᓄᓇᖃᖅᑳᖅᓯᒪᔪᑦ ᓯᓚᑦᑐᖅᓴᕐᕕᒡᔪᐊᖓᓂ ᑲᓇᑕᒥ ᐱᓕᕆᐊᒃᓴᒧᑦ ᐱᔭᕆᐊᖃᖅᑐᒥᒃ ᓵᓪᑕᒃᔅ ᐅᖃᐅᓯᓕᕆᓂᕐᒧᑦ ᐅᖃᖅᑎᒥᒃ. ᓯᕗᓪᓕᕐᒥ ᓂᑲᒍᓱᙱᖦᖢᓂ, ᐊᖏᖃᑎᖃᕐᖢᓂ ᑎᓕᐅᕆᓂᕐᒥᒃ ᐅᐃᒥᓂᒃ. ᑎᑎᕋᕈᒪᓕᕐᖢᓂᐅᒃ ᐅᖃᐅᓯᖅᑕᖓ ᐃᑲᔪᕈᒪᓪᓗᓂᓗ ᐊᓯᒥ ᐃᓕᑦᑎᓂᕐᒥᒃ. ᐃᓕᓴᐃᔨᒻᒪᕆᒃ ᐃᖕᒥᓂᒃᓘᓐᓃᑦ ᑲᑕᒃᑎᙱᖦᖢᓂᐅᒃ, ᓇᓂᓯᓪᓗᓂ ᑲᔪᓯᑎᖦᖢᒍᓗ ᐱᔪᒪᓂᕆᔭᖓ ᑲᔪᓯᑎᓪᓗᒍ ᐅᖃᓪᓚᖕᓂᖅ ᐅᖃᐅᓯᖅᑕᖓᓂᒃ. "ᐃᓄᐃᑦ ᐅᕙᓐᓂ ᐃᓕᑦᑎᕙᓪᓕᐊᕗᑦ, ᑭᓯᐊᓂ ᖃᐅᔨᒪᙱᖦᖢᑎᒃ ᐅᕙᓐᓂᒃ ᐃᑲᔪᕐᓂᖏᓐᓂᒃ ᐊᖏᔪᐊᓗᖕᒥᒃ. ᑕᒪᓐᓇ ᐱᐅᙱᒻᒪᑦ," ᐊᓕᐊᓇᖅᐳᖅ.

ᒫᓐᓇ ᐃᓕᓴᐃᓕᖅᑐᖅ ᐱᒋᐊᓕᓵᖅᑐᒥᒃ ᓵᓪᑕᐅᒃᔅ ᖃᕆᑕᐅᔭᒃᑯᑦ zoom ᐅᖓᑖᓄᑦ, ᐃᓕᓐᓂᐊᖅᑏᑦ ᖃᐅᔨᒋᐊᕐᕕᖃᖅᐳᒃ ᐅᓂᒃᑲᐅᓯᕐᓂᒃ ᖃᓄᐃᒻᒪᑦ ᐃᓕᑦᑎᔪᒪᖕᒪᖔᑕ ᐅᖃᐅᓯᕐᒥᒃ. ᐊᓪᓛᑦ 78-ᓂᒃ ᐅᑭᐅᓕᒃ 60-ᓂᒃ ᐃᓅᓂᑯ ᐃᓕᒍᒪᓚᐅᖅᑐᖅ ᓇᒻᒥᓂᖅ ᐃᓕᓐᓂᐊᑎᑦᓯᒍᓐᓇᕐᓂᐊᕐᒪᑦ ᐃᓚᒥᓂᒃ ᐊᒻᒪᓗ ᐃᑲᔪᕐᓗᓂᒋᑦ ᑭᓇᐅᓂᕐᒥᓂᒃ ᑲᓲᑎᑎᓪᓗᒋᑦ. ᐊᒥᓱᑦ ᐃᓕᓐᓂᐊᖅᑏᑦ ᐊᔾᔨᒐᓚᖏᓐᓂᑦ ᐅᓂᒃᑳᖃᖅᓯᒪᔪᑦ ᑲᑎᑎᑦᓯᓂᕐᒧᑦ ᐅᖃᐅᓯᕐᒥᑦ ᐃᓕᖅᑯᓯᕐᒥᓪᓗ ᑭᖑᓂᖓᒍᑦ ᐃᓅᓯᖓᓂᑦ ᐅᖃᐅᓯᓕᕆᓂᕐᒧᑦ. 

"ᐅᖃᐅᓯᕐᓂᒃ ᐃᓕᑦᑎᕙᓪᓕᐊᓕᕈᕕᑦ, ᑐᑭᓯᐊᓕᕈᕕᐅᒃ ᐊᖏᕈᕕᓪᓘᓐᓃᑦ, ᐊᒃᑐᐊᓂᖃᓕᕐᓂᐊᖅᑐᖅ ᓯᕗᓕᕕᓂᕐᓄᑦ. ᑕᐃᒫᒃ ᐅᖃᓪᓚᓚᐅᖅᑐᑦ, ᑕᐃᒫᒃ ᐃᓅᓚᐅᖅᑐᑦ. ᐅᕙᑦᑎᓐᓄᑦ ᐊᒃᑐᐊᔾᔪᑎᒋᕙᑉᐸᕗᑦ. ᑭᓇᑐᐃᓐᓇᑦᑎᐊᒥᒃ ᑕᒪᑐᒥᖓ ᐊᒃᑐᐊᓂᖃᓕᖅᑎᑦᑎᔪᖃᕈᓐᓇᙱᓚᖅ ᑭᓯᐊᓂ ᐅᖃᐅᓯᒃᑯᓘᓐᓃᑦ," ᑖᓐᓇ ᐊᒥᖅᑳᖃᑎᖃᖅᐸᒃᐳᖅ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂᑦ ᐃᓕᓐᓂᐊᕐᓂᕐᒧᑦ ᑐᙵᕕᖃᖅᑐᖅ ᓇᒻᒥᓂᖅ ᐊᑦᓱᕈᓐᓇᖅᑐᓂᑦ ᓅᓚᐅᖅᑎᓪᓗᒍ ᓄᓇᓕᐸᐅᔭᕐᒧᑦ ᓴᓂᕐᕙᑦᑕᐅᓯᒪᔪᒥᑦ. ᖃᖓᒃᑯᒃᑭᐊᖅ ᐊᓈᓇᖓ ᐃᓅᖃᑎᒋᔪᒪᓪᓗᓂᐅᒃ ᐊᖏᕐᕋᖓᓃᖦᖢᓂᓗ ᓄᓇᒥᙶᕐᖢᓂ ᓄᑖᑦᑎᐊᒧᑦ ᐱᓪᓚᕆᒃᑐᒧᑦ. ᐱᕈᖅᓴᕋᐃᒋᐊᖃᓚᐅᖅᑐᖅ ᕿᓚᒥᐊᓗᒃ. ᓛᒐᓐ ᐊᒃᓱᕈᓚᐅᖅᑐᖅ ᐊᖏᕐᕋᒥᓂᒃ ᐋᓐᓂᐊᕐᓂᕐᒧᑦ, ᑲᑉᐱᐊᓱᖕᓂᕐᒧᑦ ᐃᓕᕋᓵᕆᓂᕐᒧᓪᓗ ᐊᕙᑎᒋᓕᓵᖅᑕᖏᓐᓄᑦ. ᐊᑕᐅᑦᑎᒃᑯᑦᑕᐅᖅ, ᐊᑐᐃᓐᓇᖃᕐᓂᖅᓴᐅᓚᐅᖅᑐᖅ ᐃᑲᔫᑎᒃᓴᓂᒃ ᐊᒻᒪ ᓄᑖᓂᒃ ᐃᑲᔪᖅᑐᐃᔾᔪᑎᓂᒃ. 

"ᐱᐅᓛᖑᖅᑰᓚᐅᖅᑐᖅ ᐱᓕᕆᐊᕆᓯᒪᓪᓗᒍ. ᑕᒪᓐᓇ ᐅᕙᓐᓄᑦ ᐃᑲᔪᕐᓂᖃᓚᐅᖅᑐᖅ ᐱᕈᖅᓴᑎᓪᓗᖓ, ᐅᕙᓐᓄᑦ ᐃᑲᔪᓚᐅᖅᑐᖅ ᐃᓕᑦᑎᕚᓪᓕᖅᖢᖓ, ᐅᕙᓐᓂᒃ ᐃᑲᔪᓚᐅᖅᑐᖅ ᐃᒻᒥᒃᑰᕈᓐᓇᕐᓂᕐᒥᒃ. ᑕᑯᓚᐅᖅᑐᖓ ᐊᔾᔨᒋᙱᑕᖓᓂᒃ, ᐃᓐᓇᐅᓂᖅᓴᑎᒍᑦ, ᑲᒪᒋᔭᖃᕆᐊᖃᕐᖢᖓ ᐃᓕᓐᓂᐊᕐᓂᓐᓂᒃ, ᑲᒪᒋᔭᖃᕆᐊᖃᓚᐅᖅᑐᖓ ᓂᕈᐊᕆᔭᓐᓂᒃ, ᖃᓄᐃᑦᑑᓂᖏᓪᓗ ᐃᓄᐃᑦ ᖃᓂᒋᔭᒃᑲ," ᓛᒐᓐ ᐃᖅᑲᐅᒪᔪᖅ. 

ᑕᒪᒃᑯᐊᓕᒫᑦ ᐃᑲᔫᑎᐅᔪᑦ ᐃᑲᔪᓚᐅᖅᑐᑦ ᐃᓕᓐᓂᐊᕐᕕᕐᔪᐊᕐᒥᑦ, ᓯᓚᑦᑐᓴᕐᕕᕐᔪᐊᕐᒥᑦ ᐊᒻᒪᓗ ᐃᓅᓱᒃᑑᓪᓗᑎᑦ ᐊᓈᓇᕈᖅᑐᑎᒃ. "ᑭᓇᑐᐃᓐᓇᖅ ᓂᕈᐊᕈᒪᒃᐸᑦ ᐊᖏᕐᕋᒧᑦ ᕿᒪᒍᒪᓗᒍ, ᐊᑲᐅᒋᔭᖓ ᕿᒪᒡᓗᒍ, ᑕᐃᒪᐃᑦᑎᐊᒻᒪᕆᒍᓐᓇᖅᑐᑎᑦ. ᐊᒃᓱᕈᕐᓇᖅᑐᖃᕐᓂᐊᖅᑐᖅ ᑕᐅᕗᙵᖅᐸᓪᓕᐊᓗᑎᒃ. ᐃᓄᑑᓗᑎᑦ, ᑕᒪᒃᑯᐊᓕᒫᑦ ᐱᓂᐊᖅᑐᑦ, ᑭᓯᐊᓂ ᐱᓕᕆᖃᑦᑕᖅᑕᑎᑦ ᖃᐅᑕᒫᑦ ᐃᑲᔫᑎᖃᓪᓚᕆᒃᖢᓂᓗ," ᓛᒐᓐ ᑎᓕᐅᕆᔪᖅ. 

"ᐱᔪᒪᓂᕆᔭᐃᑦ, ᐱᔪᒃᓯᓂᕆᔭᐃᑦ, ᖃᓄᖅ ᑕᑯᓂᐊᕐᒪᖔᖅᐱᑦ ᑭᓱᓂᒃ ᐃᑲᔫᑎᖃᓪᓚᕆᖕᓂᐊᕐᒪᖔᑦ ᐃᓕᖕᓄᑦ ᐊᕗᖓᑲᓪᓚᒃ." 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ ᖃᓄᐃᙱᑦᑎᐊᕐᓂᖓᓗ, ᓛᒐᓐ ᐃᓕᑦᑎᓯᒪᔪᖅ ᓵᖦᖢᓂ ᐱᖅᑯᓯᑐᖃᖏᓐᓄᑦ ᓲᕐᓗ ᑐᒃᓯᐊᕐᓂᖅ ᐃᓕᓴᐃᓂᕐᓗ ᐃᓐᓇᑐᖃᖏᓐᓂ. ᓈᓚᖃᑦᑕᕐᒥᔪᖅ ᑎᒥᖓᓂᒃ ᐅᒃᐱᕈᓱᒃᖢᓂᓗ ᓯᓚᑐᓂᕐᒥᓂᒃ ᑭᓱᓂᒃ ᐱᔭᕆᐊᖃᕐᒪᖔᑦ, ᑕᖃᐃᖅᓯᕋᓗᐊᕈᓂ, ᓯᓂᒃᑲᓗᐊᕈᓂ, ᐃᒃᐱᖕᓂᐊᓂᒃᑯᓪᓘᓐᓃᑦ ᕿᐊᓗᓂ. ᐃᒻᒥᓂᒃ ᐃᓕᑦᑎᓯᒪᔪᖅ, ᖁᔭᓕᓂᕐᒥᒃ ᐊᔪᕈᓐᓃᖅᓴᕐᓂᕐᒥᒃ, ᐃᓄᑦᑎᐊᕙᐅᓂᕐᒥᒃ ᐊᒻᒪ ᐱᑦᑎᐊᕐᓂᕐᒥᒃ ᐊᒻᒪ ᐱᒃᑯᒥᒍᓱᖕᓂᕐᒥᒃ.  ᐃᓱᒪᖓ ᖃᐅᔨᓴᖅᑕᐅᑏᓐᓇᕋᓱᒃᓗᒍ ᐃᓕᓐᓂᐊᖅᑕᖓ ᐱᓕᕆᐊᕆᔭᕆᐊᒃᓴᖅ ᐃᓚᒋᓪᓗᓂᐅᒃᓗ ᐱᕙᓪᓕᐊᓂᖓᑕ ᐃᓚᐅᑎᑦᑎᔪᖅ ᐃᑲᔪᖅᑕᐅᔪᒪᓗᓂ ᐱᔭᕆᐊᖃᓕᕌᖓᑦ ᐃᑲᔪᖅᑕᐅᔪᒪᓗᓂᓗ ᐊᓯᒥᓄᑦ. 

ᑲᔪᖏᖅᓴᐃᓂᕐᒧᑦ, ᓛᒐᓐ ᐃᓱᒪᖃᑦᑕᖅᑐᖅ ᑭᓇᐅᓂᕐᒥᓂᒃ. ᐅᖃᕐᖢᓂ, "ᓵᓪᑕᐅᖑᔪᖓ ᐊᕐᓇᐅᔪᖓ. ᖃᐅᔨᒪᔪᖓ ᓴᙱᒐᒪ. ᖃᐅᔨᒪᔪᖓ ᓴᐱᓕᖅᓴᕋᐃᙱᓐᓇᒪ. ᖃᐅᔨᒪᔪᖓ ᐃᓅᔪᕐᔫᒐᒪ. ᑕᒪᒃᑯᐊᓕᒫᑦ ᐅᖃᐅᓯᕆᔪᓐᓇᕈᒃᑭᑦ ᐃᓅᓯᓕᒫᓐᓂ, ᖃᐅᔨᒪᔪᖓ ᐱᕕᖃᑦᑎᐊᕋᒪ ᑭᖑᓪᓕᕐᒥ ᐊᒃᓱᕈᕈᑎᒋᔪᓐᓇᖅᑕᓐᓂᒃ, ᐊᕝᕕᐊᕈᑎᓕᐅᓛᕆᑦ. ᑲᑉᐱᐊᓱᒍᓐᓃᖅᑐᖓ. ᐃᓕᕋᓱᒍᓐᓃᖅᑐᖓ ᓄᑖᓂᒃ ᐅᖃᐅᓯᖃᕆᐊᒃᓴᖅ. ᐱᕈᖅᐸᓪᓕᐊᓂᕆᔭᒪ ᐃᓚᒋᕚ."

"ᓵᓪᑕᐅᖑᔪᖓ ᐊᕐᓇᐅᔪᖓ. ᖃᐅᔨᒪᔪᖓ ᓴᙱᒐᒪ. ᖃᐅᔨᒪᔪᖓ ᓴᐱᓕᖅᓴᕋᐃᙱᓐᓇᒪ. ᖃᐅᔨᒪᔪᖓ ᐊᓂᒍᐃᓯᒪᓂᓐᓂᒃ."

ᐊᔪᓕᕋᓗᐊᖅᖢᓂ, ᓛᒐᓐ ᖃᐅᔨᒪᔪᖅ ᓴᐱᓕᖅᑕᐃᓕᔪᓐᓇᕐᓂᕐᒥᓂᒃ ᐊᒻᒪ ᐱᕕᒃᓴᐅᔪᓐᓇᖅᑐᓂᒃ ᐱᐅᓯᒋᐊᕈᑎᒃᓴᓂᒃ. ᐃᓛᓐᓂᒃᑯᑦ ᐊᒃᓱᕈᓗᐊᕐᖢᓂ ᐃᖕᒥᓂᒃ−ᐱᔪᓐᓇᙱᖦᖢᓂ, ᐅᒃᐱᕈᓱᒃᑐᖅ ᑐᓂᔭᐅᑐᐃᓐᓇᕐᓂᖓᓂᒃ ᐃᓱᒪᑦᑎᐊᖅᑕᖓᓂᒃ ᑲᒪᔪᓐᓇᕐᓂᕐᒥᓂᒃ. ᑕᑯᖃᑦᑕᖅᑐᖅ ᖃᓄᑐᐃᓐᓇᖅ ᐃᓕᑦᑎᔾᔪᑎᓂᒃ ᓴᐃᒻᒪᖅᑎᑦᑎᔾᔪᑎᓂᒃᓗ ᓇᓂᓯᓪᓗᓂᓗ ᐱᔪᒪᓕᕈᑎᓂᒃ ᖃᐅᑕᒫᑦ ᐃᓅᓯᖓᓂ. 

ᐅᖃᐅᓯᕐᒥᓂᒃ ᑐᓂᔭᐅᑐᐃᓐᓇᓚᐅᓐᖏᒻᒪᑦ ᐊᓯᐅᑐᐃᓐᓇᖁᔭᐅᓪᓗᓂ ᑕᐃᒪᐃᒻᒪᑦ ᓈᑕᓕ ᓛᒐᓐ ᐅᖃᐅᓯᖃᖅᐳᖅ ᓵᓪᑕᐅᒃ ᐅᖃᐅᓯᕐᒥᒃ ᐃᓕᓐᓂᐊᖅᑎᓄᑦ zoom-ᒧᑦ. ᑲᑎᑎᑦᓯᓂᖅ ᐃᓄᓐᓂᒃ ᐱᖅᑯᓯᕐᒥᓂᒃ ᓯᕗᓕᒥᓂᓪᓗ ᐅᖃᐅᓯᕐᒥᒃ ᐃᓕᓐᓂᐊᑎᑦᓯᓂᒃᑯᑦ, ᓯᕗᒧᐊᑦᑎᑦᓯᔪᖅ ᑐᓂᕐᕈᓯᐊᕐᒥᒃ ᑐᓂᔭᐅᓚᐅᖅᑐᖅ ᐊᓈᓇᑦᓯᐊᖓᓄᑦ. ᕿᒃᓵᒃᑎᓪᓗᒍ ᐅᖃᐅᓯᖅᑕᖓ ᓯᓂᒃᑎᓚᐅᑲᒃᖢᓂᐅᒃ, ᐃᖅᑯᒻᒪᖃᑦᑕᖅᑐᖅ ᐱᕕᖃᕐᓂᖓᓂᒃ ᐊᔪᕈᓐᓃᖅᓴᕐᓗᓂ ᐃᓕᓴᐃᔾᔪᑎᒋᔭᒥᓂᒃ ᖃᐅᑕᒫᑦ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.