"ᐊᓕᐊᓇᐃᒍᓱᑦᑎᐊᖅᐳᖓ ᖃᓄᖅ ᐱᕈᖅᓯᒪᓂᓐᓂᒃ ᐊᓈᓇᑦᑎᐊᒃᑯᒃᑲᓗ ᐊᓈᓇᒃᑲᓗ, ᐃᓕᑦᑎᔾᔪᑎᒋᓚᐅᖅᑖᖓ ᖃᐅᔨᒪᔭᓕᒫᓐᓂᒃ ᓄᓇᒥ", ᓅᓪ−ᓖᒡ ᑳᒃᓂ. ᐱᕈᖅᓴᓚᐅᖅᑐᖅ ᑕᒪᐃᓐᓂᒃ ᑐᒃᑑᔮᖅᑐᕐᒥ ᐊᒻᒪ ᐃᓅᕕᖕᒥ ᓄᓇᑦᓯᐊᒥ, ᐅᑭᐅᖅᑕᖅᑑᑉ ᑭᒡᓕᙳᐊᖓᑕ ᖁᓛᓂ, ᐅᑭᐅᖅᑕᖅᑑᑉ ᑕᕆᐅᖓᑕ ᓯᒡᔭᖓᓂ, ᐊᖑᓇᓱᒋᐊᖅᖢᓂ ᐊᒻᒪ ᐃᖃᓪᓕᐊᖅᖢᓂ ᐃᓅᓯᓕᒫᒥᓂᒃ ᐊᓈᓇᑦᑎᐊᒃᑯᒥᓂᒃ ᐊᓈᓇᒥᓂᒡᓗ ᐱᖃᑎᖃᖅᖢᓂ. ᐃᖅᑲᓇᐃᔭᖅᑐᖅ ᑎᓯᓐᑕᒧᑦ, ᓄᓇᒥᑦ-ᑐᙵᕕᖃᕐᓂᕐᒧᑦ ᐱᓕᕆᐊᓄᑦ ᑲᑐᔾᔨᖃᑎᒌᓄᑦ. 

"ᐊᑖᑕᑦᑎᐊᕋ ᐃᓕᓐᓂᐊᖅᑎᓚᐅᖅᓯᒪᔮᖓ ᐊᐅᓪᓚᑲᑕᖕᓂᕐᒥᒃ, ᓄᓇᑐᐃᓐᓇᕐᒥᐅᙱᑦᑐᖅ ᐊᐅᔭᒃᑯᑦ ᐊᒻᒪ ᐅᑭᐅᒃᑯᑦ, ᑭᓯᐊᓂ ᐅᔾᔨᕈᓱᒍᓐᓇᖅᖢᖓ ᐊᔾᔨᒌᙱᑦᑐᓂᒃ, ᑕᒪᓐᓇ ᐊᔾᔨᒌᙱᑦᑐᓄᑦ ᓯᓚᒧᐊᕈᓐᓇᖅᖢᓂ ᐊᒻᒪ ᐊᔾᔨᒌᙱᑦᑐᓄᑦ ᓄᓇᓄᑦ, ᓱᖏᐅᑎᓵᓕᔪᓐᓇᖅᖢᖓ ᖃᓄᖅ ᐃᖏᕐᕋᑦᑎᐊᕈᓐᓇᕐᒪᖔᑦ ᐊᒻᒪ ᐊᔾᔨᒌᙱᑦᑐᓂᒃ ᓄᓇᓂᒃ, ᐱᐅᑦᑎᐊᓵᕐᒪᑦ, "ᐃᖅᑲᐅᒪᔪᖅ. ᖃᑕᙳᑎᖏᑦ ᐃᓕᓐᓂᐊᖅᑎᑕᐅᓪᓗᑎᒃ ᖃᓄᖅ ᐃᖃᓗᒐᓱᖕᓂᕐᒥᒃ, ᐊᖑᓇᓱᖕᓂᕐᒥᒃ ᐊᒻᒪ ᐱᕙᒌᔭᕐᓂᕐᒥᒃ ᐊᒻᒪ ᐊᓐᓄᕋᔾᔨᐅᕐᓂᕐᒥᒃ.  ᐃᑦᑐᒃᑯᖏᑦ ᐊᑖᑕᑦᓯᐊᒃᑯᖏᑦ ᐲᕐᓯᓚᐅᖅᑐᑦ ᐊᒻᒪᓗ ᒫᓐᓇ ᑕᐃᒪᐃᓕᐅᓕᕆᓪᓗᓂ. "ᖁᕕᐊᓱᑦᑎᐊᖅᑐᖓ ᑕᐃᒪᓐᓇ ᐊᖕᒪᓗᖅᓯᔪᓐᓇᕋᒪ," ᑲᔪᓯᓪᓗᓂ.

ᐃᓕᓐᓂᐊᕈᑎᒋᔭᖏᑦ ᑎᐊᓯᓐᑕᒥ ᐃᓅᓇᓱᑐᐃᓐᓇᕐᓂᐅᖏᒻᒪᑕ ᓯᓚᒥ. ᐊᒥᖅᑳᖃᑎᖃᖅᐸᒃᑭᕗᑦᑕᐅᖅ ᐃᓕᓐᓂᐊᖅᑎᓂᒃ ᐱᓕᕆᖃᑎᒌᒃᐸᖕᓂᕐᓂᒃ, ᐋᖅᑭᒃᓯᒪᓕᖅᑎᑦᑎᓂᕐᒧᑦ ᑕᒫᓂᕐᕆᔪᓐᓃᖅᐸᓪᓕᐊᔪᓄᓪᓗ, ᐃᓕᓴᕆᔭᐅᓯᒪᔪᑎᒍᑦ ᐱᓕᕆᐊᒃᓴᑎᒍᑦ UBC−ᑯᓐᓂ. ᑎᓯᓐᑕ ᐃᓕᓐᓂᐊᖅᑎᑦᑎᔪᖅ ᐃᓚᐅᖃᑕᐅᔪᓂᒃ ᑭᖑᓂᑦᑎᓐᓂᑦ ᐊᔪᙱᓐᓂᖏᓐᓂᒡᓗ ᒫᓐᓇᐅᔪᒧᑦ, ᓯᕗᓂᒃᓴᒧᑦ ᓯᓚᒥᓗ. 

ᑳᒃᓂ ᐃᓕᓐᓂᐊᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥ, ᐊᒻᒪᓗ ᓯᓚᒥ ᐃᓕᓐᓂᐊᑲᓐᓂᖅᑐᓂ ᐊᑭᓕᖅᓱᖅᑕᐅᓪᓗᓂ ᒐᕙᒪᒃᑯᓐᓄᑦ ᑕᓐᑐᕋ ᓄᐊᑦ ᐳᓚᕋᑦᑐᓕᕆᔨᒃᑯᑎᒍᑦ. ᐃᓕᓐᓂᐊᓚᐅᖅᓯᒪᔪᖅ ᐃᐅᕆᔫᓇᒥ ᐊᒻᒪ ᓂᐅ ᒪᒃᓯᑰᒥ ᐃᓕᓐᓂᐊᖅᑕᒥᓂᒃ ᐱᔭᕇᖅᓯᓚᐅᙱᑎᓪᓗᒍ ᐊᖏᕐᕋᒥᓄᑦ. ᑳᒃᓂ ᓯᓚᑦᑐᖅᓴᕐᕕᓕᐊᓚᐅᖅᑐᖅ ᓯᓚᒥᑦ ᐃᓕᓐᓂᐊᒐᒃᓴᒥᑦ ᐅᐊᖕᓇᖓᓂᑦ ᐅᐃᔅᑲᓐᓯᓐ ᐃᓕᑦᑎᓪᓗᓂᓗ ᑲᑎᙵᐅᖅᑐᑦ ᖃᓄᐃᓕᐅᖕᓂᖏᓐᓂᑦ ᐊᑲᐅᙱᓕᐅᕈᑎᓂᒡᓗ ᐋᖅᑭᒃᓯᓂᖕᒥᑦ ᑲᑎᙵᐅᕈᓐᓇᕐᓂᐊᕐᒪᑦ ᓄᓇᒥᑦ. 

ᐃᓕᓐᓂᐊᕌᓂᒃᑎᓪᓗᒋᑦ, ᑳᒃᓂ ᐃᖅᑲᓇᐃᔭᕐᖢᓂ ᓅᓪᔅᒧᑦ, ᐃᓕᓴᐃᓪᓗᓂ ᑭᖑᑉᐱᐊᕐᓂᕐᒥᒃ, ᒪᔪᕐᓂᕐᒥᒃ, ᐊᒻᒪ ᖃᐅᓪᓗᖅᑕᒥᒃ ᐃᒫᓂ ᖃᔭᕆᐊᒃᑰᕆᐅᖅᓴᓂᕐᒥᒃ. ᐃᖅᑲᓇᐃᔭᓚᐅᖅᓯᒪᔪᖅ ᐅᐊᐃᒥᖕ, ᐅᑕ, ᔫᑳᓐ ᓄᓇᖓᓂ, ᐊᒻᒪ ᔅᑯᐊᒥᔅ, ᐳᕆᑎᔅ ᑲᓚᒻᐱᐊᒥ ᐊᕐᕌᒍᓄᑦ 6-ᓄᑦ, ᓄᓇᑐᐃᓐᓇᕐᒥ ᐃᓕᓴᐃᓪᓗᓂ ᐅᓪᓘᑉ ᓇᑉᐸᐃᓐᓇᖓᓂ. ᓄᑖᙳᕆᐊᖅᑎᑦᑎᖃᑦᑕᕐᒥᔪᖅ ᐊᑦᑕᕐᓇᖅᑕᐃᓕᒪᓂᕐᒧᑦ ᒪᓕᒋᐊᓕᖏᓐᓂᒃ, ᐊᑐᐊᒐᖏᓐᓂᒃ ᐊᒻᒪ ᐱᓕᕆᔾᔪᓯᖏᓐᓂᒃ. ᑭᖑᓂᐊᒍᑦ, ᑳᒃᓂ ᐅᑎᕐᖢᓂ ᐊᖏᕐᕋᒧᑦ ᐱᓕᕆᖃᑎᖃᕐᖢᓂᓗ ᑕᓐᑐᕋ ᐅᐊᖕᓇᖓᓂ ᕿᒥᕐᕈᓂᕐᒥ ᐊᕐᕌᒍᓕᒫᖅ ᐱᖓᓱᓄᑦ ᐊᕐᕌᒍᓄᑦ. 

ᑕᒪᓐᓇ ᓇᒧᙵᕈᓘᔭᖅᓯᒪᔪᖅ ᓇᒧᙵᕈᓘᔭᖅᑎᓪᓗᒍ, ᑕᒪᓐᓇ ᐳᓚᕋᖅᑐᓕᕆᓂᖅ ᓄᖅᑲᓚᐅᖅᐳᖅ ᐱᖃᓐᓇᕆᔭᖓᓗ ᓇᒃᓯᐅᔾᔨᓪᓗᓂ ᐊᑕᓂᕆᔭᐅᔪᒥᒃ Dechinta−ᒥᑦ. ᑳᒃᓂ ᐱᓇᔪᓚᐅᖅᐳᖅ ᐃᖅᑲᓇᐃᔭᖅᑎᑕᐅᓪᓗᓂᓗ ᑲᔪᓯᑎᑦᑎᖁᔭᐅᓪᓗᓂ ᐱᓕᕆᐊᒃᓴᕆᔭᐅᔪᒥᒃ 6−ᓄᑦ ᓄᓇᓕᖕᓄᑦ ᐃᓄᕕᐊᓗᐃᑦ ᓄᓇᖓᓂ.  ᐊᑦᑕᕐᓇᖅᑕᐃᓕᒪᓂᕐᒧᑦ ᐊᐅᓚᑦᑎᔨᐅᓪᓗᓂ, ᐱᓕᕆᓂᑯᒥᓂᒃ ᐱᓕᕆᖃᑦᑕᖅᐳᖅ ᐱᓕᕆᐊᖑᔭᕆᐊᓕᖕᓂᒃ ᐊᒻᒪ ᓂᕆᔭᒃᓴᓂᒃ ᐱᕙᒌᔭᕐᓂᕐᒥᒃ, ᐊᒻᒪᓗ ᐃᓕᑕᖏᓐᓂᒃ ᐃᓕᓐᓂᐊᕐᕕᖕᒥ ᐊᒻᒪ ᖃᑕᙳᑎᖏᓐᓂᒃ ᑭᒃᑯᓕᒫᑦ ᐊᓃᑦᑎᐊᖁᓪᓗᒋᑦ. 

ᐃᖅᑲᓇᐃᔮᖓ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᖃᖅᐳᖅ ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ. ᔨᐊᓗᓇᐃᒥ, ᐃᑲᔪᖅᑐᐃᓂᖅᓴᐅᔪᖅ, ᐃᖅᑲᓇᐃᔭᖅᑎᓪᓗᒍ ᓄᓇᒥᓂ, ᓯᕗᓕᖅᑎᐅᓂᖅᓴᐅᕙᑦᑐᖅ ᓴᖅᑮᓪᓗᓂ ᐊᒻᒪᓗ ᐊᐅᓚᑦᑎᓪᓗᓂ ᐱᓕᕆᐊᒃᓴᓂᒃ. ᑳᒃᓂ ᖁᕕᐊᒋᔭᖃᖅᑐᖅ ᑕᐅᑐᒃᖢᒋᑦ ᐃᓕᓐᓂᐊᖅᑏᑦ ᐃᓕᑦᑎᓂᕐᒥᒃ ᐊᔾᔨᒌᖏᑦᑐᓂᒃ ᐊᔪᙱᓐᓂᕐᓂ ᐃᓚᒋᔭᐅᓪᓗᓂᓗ ᑐᓂᓯᓂᕐᒥᒃ ᖃᐅᔨᒪᓂᕐᓂ, ᑕᑯᓪᓗᒋᑦ ᐃᓕᑦᑎᓗᑎᒃ ᖃᓄᖅ ᓴᓗᒻᒪᖅᓴᐃᓂᕐᒥᒃ ᐃᖃᓗᖕᓂᒃ, ᐸᓂᖅᑐᒥᒃ ᐃᖃᓗᖕᒥᒃ, ᖃᐅᔨᓗᑎᒃ ᓇᐅᒃᑯᑦ ᑭᔾᔭᖅᑐᐃᓂᕐᒥᒃ ᓅᓪᓗᑎᒃᓗ ᑲᒪᔨᐅᓂᕐᒥᒃ ᐱᓕᕆᓗᑎᒃ ᐃᑲᔪᖅᑕᐅᙱᖦᖢᑎᒃ ᐃᓗᐊᖅᓯᕙᓪᓕᐊᑎᓪᓗᒋᑦ. 

ᓂᕆᐅᒍᒪᕗᖅ ᐱᓕᕆᓂᕆᓛᖅᑕᖓ ᓯᕗᓂᑦᑎᓐᓂ ᓴᖅᑮᓗᓂ ᐃᒪᒃᑯᑦ ᐅᒥᐊᓂᒃ ᓲᕐᓗ ᐅᒥᐊᖅᐸᐃᑦ ᓯᕗᓕᕕᓂᕗᑦ ᐊᑐᖃᑦᑕᕋᔭᖅᑕᖏᑦ ᓯᔾᔭᒥ ᓇᑦᑎᕋᓱᐊᕐᓗᑎᒃ ᐊᒻᒪᓗ ᕿᓚᓗᒐᕐᓂᒃ. ᑳᒃᓂ ᐅᒥᐊᕐᔪᐊᒃᑰᕈᒪᕗᖅ ᓄᓇᓕᖕᓄᐊᕈᒪᓪᓗᓂᓗ, ᖃᐅᔨᓴᕆᐊᖅᑐᕐᓗᓂ ᓯᕗᓕᕕᓂᖏᑕ ᑐᒥᖏᓐᓂᒃ ᓇᒧᙵᐅᓚᐅᕐᒪᖔᑕᓗ, ᖃᓄᖅ ᓄᒃᑕᓚᐅᕐᒪᖔᑕ. ᐊᐅᔭᓕᒫᖅ ᐃᓕᓐᓂᐊᖅᑎᖃᕐᓗᑕ, ᐊᐃᒃᓯᑲᑕᒡᓗᑎᓪᓗ ᐊᐅᓪᓚᕐᕕᒋᓚᐅᖅᑕᒥᓂᒃ ᐊᐅᔭᐅᓛᖅᑐᒥᒃ ᐊᓕᐊᓇᐃᒋᓇᔭᖅᑕᖓ.  

ᑳᒃᓂᐅᑉ ᐅᖃᐅᔾᔪᐃᓂᖓ ᒪᒃᑯᒃᑐᓄᑦ ᐊᔾᔨᑐᐃᓐᓇᕆᕙᐅᒃ ᐅᖃᐅᔾᔭᐅᓂᕆᓚᐅᖅᑕᖓ ᐊᑖᑕᑦᑎᐊᖓᑕ ᐱᕈᖅᓴᕝᕕᒋᑎᓪᓗᓂᐅᒃ. ᐅᖃᐅᑎᖃᑦᑕᓚᐅᖅᑕᖓ "ᐃᖅᑲᓇᐃᔮᖃᕐᓗᑎᑦ ᖁᕕᐊᓱᖕᓂᐊᕋᕕᑦ, ᓲᖃᐃᒻᒪ ᖃᐅᔨᒍᕕᑦ ᐊᑑᑎᖃᔾᔮᙱᓐᓂᖓᓂᒃ, ᓲᕐᓗ ᖁᕕᐊᒋᑦᑎᐊᕐᓗᒍ, ᐱᓕᕆᐊᕆᔪᒪᓪᓚᕆᒃᑕᐃᑦ." ᑳᒃᓂ ᖃᐅᔨᓚᐅᖅᑐᖅ ᓇᖕᒥᓂᖅ ᒫᓐᓇ ᐱᓕᕆᐊᕆᔭᖓᓂ ᐃᓕᓴᐃᔭᖅᑐᖅᖢᓂ ᓯᓚᒥ ᐃᓕᓐᓂᐊᕐᓂᕐᒥᒃ, ᐃᓕᖅᑯᓯᑐᖃᕐᒥᓂᒃ ᐱᕈᖅᑎᑦᑎᒃᑲᓐᓂᖅᖢᓂ ᖃᐅᑕᒫᑦ ᐱᓕᕆᐊᕆᕙᒃᑕᖏᓐᓄᑦ ᓯᓚᒦᖦᖢᓂᓗ. 

ᑕᐃᒪᐃᒻᒪᑦ ᐅᖃᐅᔾᔨᒋᐊᖅᐳᖅ ᒪᒃᑯᑦᑐᐃᑦ ᖃᐅᔨᒋᐊᖁᓪᓗᒋᑦ ᑭᓱᓂᒃ ᐱᓕᕆᐊᖃᕋᓱᐊᕐᒪᖔᑕ ᐊᒻᒪ ᐱᓇᓱᐊᕐᓗᑎᒃ, ᐊᐅᓪᓚᖅᓯᒪᒐᓗᐊᖅᐸᑕ, ᐱᓕᕆᐊᖃᕐᓗᑎᒃ ᐅᐊᔭᒨᖅᑐᓂᒃ, ᐅᕝᕙᓘᓐᓃᑦ ᓴᓇᔨᕈᕆᐅᔅᓴᓂᕐᒧᑦ. ᓇᓗᓇᐃᖅᓯᒻᒥᔪᖅ ᐊᑯᓂᐅᓂᖅᓴᐅᒍᓐᓇᕆᐊᖓ ᐃᓚᖏᓐᓄᑦ ᐃᓄᓐᓄᑦ ᓇᓂᓯᒐᓱᐊᕐᓗᓂ ᖁᕕᐊᒋᔭᒥᓐᓂᒃ, ᑭᓯᐊᓂ ᐊᑑᑎᖃᓪᓚᕆᑦᑐᖅ ᑕᐃᒪᐃᒐᐃᒻᒪᑕ.  "ᑖᓐᓇ ᓇᓂᒍᕕᐅᒃ, ᐅᖃᐅᓯᕆᑐᐃᓐᓇᕐᓗᒍ. ᑖᓐᓇ ᐃᖅᑲᓇᐃᔮᖅ ᖁᕕᐊᒋᑐᐃᓐᓇᕐᓗᒍ," ᐅᖃᐅᔾᔨᔪᖅ. 

ᓅᓪ−ᓖᒡ ᑳᒃᓂ ᖁᕕᐊᒋᔭᖃᑦᑎᐊᓚᐅᖅᑐᖅ ᐊᐅᓪᓚᖅᓯᒪᓪᓗᓂ ᐃᖅᑲᓇᐃᔮᒥᓄᑦ, ᐊᖕᒪᓗᖅᓯᓪᓗᓂ ᐱᕈᖅᓴᓚᐅᖅᑎᓪᓗᒍ ᖃᑕᙳᑎᖏᓐᓄᑦ ᓯᓚᒥ ᐃᓕᓐᓂᐊᖅᑎᑦᑎᖃᑦᑕᓚᐅᖅᑐᓄᑦ ᑕᐃᒪᐃᖃᑦᑕᕋᒥ. ᑕᑯᒃᓴᐅᑎᑦᑎᔪᖅ ᑭᖑᕚᕇᓂᒃ ᐃᓕᓐᓂᐊᖅᑎᓂᒃ ᖃᓄᖅ ᑲᔪᓯᓂᖃᑦᑎᐊᕈᓐᓇᕐᓂᕐᒥᒃ ᓇᓂᑐᐃᓐᓇᖅ, ᐊᓃᑦᑎᐊᖅᑎᓪᓗᒋᑦ ᐃᓅᖃᑎᖃᕐᓂᒃᑯᓪᓗ ᐊᓯᒥᖕᓂᒃ. ᐃᓚᒥᓂᒃ ᓯᓚᑐᔫᓪᓗᓂ ᐊᒻᒪᓗ ᐃᓕᖅᑯᓯᖓᑕ ᓴᓐᖏᓂᖓᓂᒃ, ᖃᐅᔨᒪᓂᕐᒥᓂᒃ ᑲᑕᐃᕙᓪᓕᐊᒻᒪᑦ ᐊᒻᒪᓗ ᐱᔪᒪᔭᒥᓂᒃ ᒪᓕᑦᑐᓂ ᓄᓇᑐᐃᓐᓇᕐᒥ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.