"ᖁᕕᐊᒋᔭᕋ ᐃᓱᒪᒋᓪᓗᒍ ᐱᓕᕆᐊᕋ ᐅᓂᒃᑳᖅᑐᐊᖅᑐᑎᑐᑦ, ᐊᒻᒪ ᐃᓛᓐᓂᒃᑯᑦ ᐅᓂᒃᑳᖅᑐᐊᕐᓂᖅ ᑐᙵᕕᖃᐃᓐᓇᐅᔭᖅᐸᙱᓚᖅ ᓂᐱᒃᑯᑦ ᓂᔾᔭᐅᓯᔭᕐᓂᒃᑯᓪᓘᓐᓃᑦ. ᐃᓛᓐᓂᒃᑯᑦ ᑎᒥᒃᑯᑦ ᑎᒥᖃᕆᐊᖃᖅᐸᒃᐳᖅ, ᐃᓛᓐᓂᒃᑯᓪᓗ ᐅᖃᐅᓯᖅᑕᖃᕆᐊᖃᖅᐸᒃᖢᓂ. ᐱᓕᕆᖃᑎᖃᖃᑦᑕᓕᓚᐅᖅᐳᖓ ᒧᒥᖅᑎᓂᒃ ᐊᒻᒪ ᖁᙱᐊᖅᑕᐅᕙᒃᑐᓂᒃ ᐊᒻᒪ ᑕᑯᒃᓴᐅᔪᓂᒃ ᓴᓇᙳᐊᖅᑎᓂᒃ, ᑕᐃᒪᓕ ᐃᓱᒪᕗᖓ ᑕᐃᔭᐅᔾᔪᓯᖃᓕᖅᖢᖓ ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᑎᐅᓂᕐᒥᒃ, ᑭᓯᐊᓂ ᐅᑎᐃᓐᓇᐅᔭᖅᐳᖓ ᓂᐱᒧᑦ ᐊᒻᒪ ᐃᓱᒪᓪᓗᖓ ᖃᓄᖅ ᓈᓚᒍᓐᓇᕐᒪᖔᑦᑕ ᑭᓱᑐᐃᓐᓇᓂᒃ ᐊᒻᒪ ᐃᓚᐅᕝᕕᒋᕙᒃᖢᑎᒍᑦ ᑭᓱᑐᐃᓐᓇᓂᒃ ᓂᐱᒃᑯᑦ ᑕᐅᑐᒃᑕᒃᑯᑦ," ᐅᓕᕕᐊ ᓱᐊᑦᑦ ᐅᖃᓚᐅᖅᐳᖅ. ᑐᕌᓐᑐᒥᐅᑕᖅ ᑭᓯᐊᓂ ᐱᕈᖅᓴᓂᑰᓪᓗᓂ ᓄᐊᑦ ᐸᐃ, ᐋᓐᑎᐅᕆᐅᒥ, ᐃᓚᒋᔭᐅᓪᓗᓂ ᓂᐱᓯᖕ ᓄᓇᖃᖅᑳᖅᓯᒪᔪᓄᑦ ᐊᑖᑕᒥᒍᑦ ᐊᒻᒪ ᐊᐃᕆᓚᓐᒥᐅᑕᐅᓪᓗᓂ ᐊᓈᓇᒥᒍᑦ. ᐋᓐᑎᐅᕆᐅ ᐅᐊᖕᓇᖓᓂ ᓄᓇᖃᓚᐅᖅᖢᓂ ᖃᑕᙳᑎᖏᓪᓗ, ᑐᕌᓐᑐᒧᑦ ᓅᓚᐅᖅᐳᖅ ᐃᓕᓐᓂᐊᕆᐊᖅᑐᖅᖢᓂ ᓂᔾᔭᐅᓯᔭᕐᓂᕐᒥᒃ ᐊᒻᒪ ᓴᓇᙳᐊᖅᑎᐅᓂᕐᒧᑦ ᐱᓕᕆᔨᒻᒪᕆᐅᓂᕐᒧᑦ.

ᓱᐊᑦ ᐃᓕᓐᓂᐊᓚᐅᖅᑐᖅ ᓂᔾᔭᐅᓯᔭᕐᓂᕐᒥᒃ ᑐᕌᓐᑐ ᓯᓚᑦᑐᖅᓴᕐᕕᒡᔪᐊᖓᓂ. ᓵᒃᔅᓲᑎᐅᓲᖅ, ᐃᙱᓲᖑᓪᓗᓂ ᐊᒻᒪ ᐅᐊᔭᒨᖅᑐᓂᒃ ᐊᑐᖅᐸᒃᖢᓂ. ᐃᓕᓐᓂᐊᓚᐅᖅᐳᖅ ᓂᔾᔭᐅᓯᔭᖅᑎᓂᒃ ᑭᓯᐊᓂ ᐊᓯᐊᓄᐊᒃᑲᓐᓂᓕᓚᐅᖅᐳᖅ ᑲᑎᖃᑎᖃᓚᐅᖅᖢᓂ ᑎᑕᒃᑎᓂᒃ ᐊᔾᔨᒌᙱᑦᑐᓂᒃ ᐊᒻᒪ ᐱᓕᕆᔾᔪᑕᐅᕙᒃᑐᓂᒃ. ᓯᓚᑦᑐᖅᓴᕐᕕᒡᔪᐊᕐᒥ ᐱᐊᓂᒃᑲᒥ, ᐊᒡᓚᕝᕕᖕᒥ ᐱᓕᕆᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᖁᙱᐊᖅᑕᐅᕙᒃᑐᓄᑦ ᑲᑐᔾᔨᖃᑎᒌᓄᑦ. ᑲᑎᙵᖃᑎᖃᖅᓯᒪᕗᖅ ᓴᓇᙳᐊᖅᑕᐅᕙᒃᑐᓂᒃ ᓄᓇᓕᐸᐅᔭᕐᒥ.

ᐊᕐᕌᒍᒐᓴᐅᓕᖅᑐᓂᑦ, ᓱᐊᑦ ᓴᓇᙳᐊᕐᓂᕐᒧᑦ ᐊᐅᓚᑦᑎᔨᐅᖃᑦᑕᖅᓯᒪᕗᖅ, ᓴᖅᑭᑎᑦᑎᕙᓪᓕᐊᓂᕐᒧᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᓚᐅᖅᐳᖅ ᐊᕐᕌᒍᒧᑦ ᐊᒻᒪ ᓇᖕᒥᓂᖅ ᓴᓇᙳᐊᖅᐸᒃᖢᓂ ᖁᙱᐊᖅᑕᐅᕙᒃᖢᓂ. ᓂᐱᓕᐅᕆᖃᑦᑕᖅᓯᒪᕗᖅ ᖁᙱᐊᖅᑕᐅᕝᕕᖕᒧᑦ, ᑕᑯᒃᓴᐅᑎᑦᑎᖃᑦᑕᖅᓯᒪᓪᓗᓂ ᑕᕐᕆᔭᒐᒃᓴᓂᒃ ᓴᓇᙳᐊᖅᑕᐅᕙᒃᑐᓂᒃ, ᓂᐱᓕᐅᕆᕙᓪᓕᐊᓪᓗᓂᓗ, ᓄᓇᓕᖕᓂ ᓈᓚᐅᑎᖃᕐᕕᖕᒥ ᐃᖅᑲᓇᐃᔭᖃᑦᑕᖅᓯᒪᓪᓗᓂ, ᓵᒃᑳᓂᒃ ᐱᙳᐊᖅᐸᒃᖢᓂ ᐊᒻᒪ ᐃᙱᐅᓯᓕᐅᖅᐸᒃᖢᓂ. ᐱᓕᕆᖃᑦᑕᖅᓯᒪᕗᖅ ᐃᓯᕐᕕᒋᔭᐅᔪᓂ ᐱᙳᐊᕐᕕᐅᕙᒃᑐᓂ, ᑐᙵᓱᒃᑎᑦᑎᔨᐅᓪᓗᓂ, ᓇᑎᕐᒥ ᐊᐅᓚᑦᑎᔨᐅᓪᓗᓂ, ᓇᓚᐅᑦᑖᒐᒃᓴᓂᒃ ᓂᐅᕕᐊᒃᓴᖃᖅᐸᒃᖢᓂ, ᐃᒥᐊᓗᓕᕆᔨᐅᓪᓗᓂ, ᐹᒃᑯᐊᓕᐅᖅᐸᒃᖢᓂ ᐊᒻᒪ ᑭᓱᑐᐃᓐᓇᑦᑎᐊᓂᒃ ᐱᔪᒥᓇᖅᑐᓂᒃ ᐱᓕᕆᖃᑦᑕᖅᓯᒪᓪᓗᓂ.

ᐃᓱᒪᒋᓪᓗᒍ ᖃᓄᖅ ᐊᓯᔾᔨᖅᑕᖅᐸᖕᓂᖓᓂᒃ ᐃᖅᑲᓇᐃᔮᒥᑦ ᐃᖅᑲᓇᐃᔮᒧᑦ, ᐅᖃᓚᐅᖅᐳᖅ, "ᐊᒥᓱᐊᓗᖕᓂᒃ ᐊᐱᖅᑯᑎᒃᓴᖃᓚᐅᖅᐳᖓ ᑭᓱᑦ ᐱᒻᒪᕆᐅᖕᒪᖔᑕ ᐅᕙᓐᓄᑦ, ᑕᒪᓐᓇᓗ ᖃᐅᔨᓇᓱᓚᐅᖅᐸᕋ. ᑭᐅᔾᔪᑎᒃᓴᖃᑦᑎᐊᓚᐅᙱᓐᓇᒪ ᐊᑯᓂᐊᓗᒃ, ᑕᐃᒪᐃᓐᓂᖓᓄᓪᓗ ᖁᕕᐊᓇᓚᐅᖅᐳᖅ ᑲᑎᖃᑎᖃᕆᐊᒃᓴᖅ ᐊᒥᓱᓂᒃ ᐃᓄᖕᓂᒃ. ᐃᓄᐃᑦ ᐃᓅᖃᑎᖃᑦᑎᐊᕈᓐᓇᕐᒪᑕ. ᐃᓱᒪᔪᖓ ᐃᓕᑦᑎᕚᓪᓕᕐᔪᐊᓚᐅᖅᐳᖓ ᐊᔾᔨᒌᙱᑦᑐᓂᒃ ᐃᓄᖕᓂ ᐃᓅᖃᑎᖃᖅᐸᒃᖢᖓ." ᓂᐅᕕᖅᐸᒃᑐᓂᒃ ᐱᔨᑦᑎᕋᖅᑎᐅᓂᖅ ᐃᓕᑦᑎᕚᓪᓕᕐᔪᐊᓚᐅᖅᐳᖅ ᑐᑭᓯᓇᑦᑎᐊᖅᑐᒥᒃ ᑐᓴᐅᒪᖃᑎᒌᖕᓂᕐᒥᒃ ᐊᒻᒪ ᐃᒻᒥᓂᒃ.

ᓱᐊᑦ ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓱᒪᔪᓄᑦ ᐊᐅᓪᓚᕈᒪᔪᓄᑦ ᓄᓇᓕᖏᓐᓂ ᑐᙵᕕᖃᖅᐳᖅ ᓇᖕᒥᓂᖅ ᐊᑐᖅᓯᒪᔭᒥᓂᒃ. ᐊᑑᑎᖃᓛᖑᓚᐅᖅᑐᖅ ᐅᖃᖃᑎᖃᖅᖢᓂ ᐊᒥᓱᓄᑦ ᐃᓄᖕᓄᑦ ᑐᓴᕐᕕᒋᓪᓗᒋᓪᓗ ᐃᓱᒪᒋᔭᖏᑦ ᑐᓴᕐᓗᒋᓪᓗ ᓯᓚᑦᑐᖅᓴᕐᕕᒡᔪᐊᕐᒥ ᐊᑐᖅᓯᒪᔭᖏᓐᓂᒃ, ᑐᓴᕐᕕᒋᓪᓗᓂᒋᑦ ᑭᓱᑦ ᐱᔪᒪᓂᖃᕐᒪᖔᑕ, ᑭᓱᑦ ᖁᕕᐊᒋᓚᐅᕐᒪᖔᒋᑦ, ᑭᓱᓪᓗ ᐊᔪᕐᓇᖅᑐᖅᓯᐅᕈᑎᒋᓚᐅᕐᒪᖔᒋᑦ. ᖃᐅᔨᒪᓚᐅᖅᑐᖅ ᓂᔾᔭᐅᓯᔭᕐᓂᕐᒧᑦ ᐃᓕᓐᓂᐊᕈᒪᓂᕐᒥᓂᒃ ᑲᑎᖅᓱᐃᓪᓗᓂᓗ ᐅᓄᖅᑐᓂᒃ ᓇᓗᓇᐃᔭᐅᑎᓂᒃ ᓇᓂ ᐱᓇᔪᒍᓐᓇᕐᒪᖔᑦ. ᐃᓄᐃᑦ ᐅᖃᐅᔾᔨᒋᐊᕈᓐᓇᕋᓗᐊᖅᑎᓪᓗᒋᑦ, ᓱᐊᑦ ᐃᒪᓐᓇᐅᖁᔨᕗᖅ, ᓇᖕᒥᓂᖅ ᐃᓱᒪᓕᐅᕆᓗᑎᑦ ᑭᓱ ᐃᓕᖕᓄᑦ ᐱᐅᓛᖑᖕᒪᖔᑦ ᑭᓱᓗ ᐊᓕᐊᓇᐃᒋᔭᖃᕐᒪᖔᑦ.

ᐊᓂᒍᖅᑎᑦᑎᓇᓱᒃᖢᓂ ᑐᓗᖅᑕᕈᑎᓂᒃ, ᓱᐊᑦ ᖃᐅᔨᓚᐅᖅᐳᖅ ᐃᑲᔫᑎᖃᕐᓂᖓᓂᒃ ᐃᑲᔪᖅᓱᐃᔪᓂᒃ ᐃᓄᖕᓂ ᐅᖃᓪᓚᖃᑎᖃᕈᓐᓇᖅᖢᓂ. ᐱᓕᒻᒪᒃᓴᐃᔨᖃᖅᐳᖅ ᐊᑯᓂᐊᓗᒃ ᐅᖃᐅᓯᕆᔪᓐᓇᖅᑕᒥᓂᒃ. ᒪᒥᓴᕐᓂᐅᑉ ᓯᓚᑖᒍᑦ, ᐊᓯᖏᓐᓂᒃ ᐃᓄᖕᓂ ᑲᑎᖃᑎᖃᕈᓐᓇᖅᖢᓂ ᐊᔪᖅᓯᒑᖓᒥ, ᐅᒃᐱᕆᔭᒥᓂᒃ ᐊᒻᒪ ᐃᑲᔪᖅᑐᐃᔪᓂᒃ ᐃᑲᔫᑎᖃᖅᓯᒪᕗᖅ. "ᐃᓱᒪᔪᖓ ᖃᓄᐃᙱᑦᑎᐊᕐᓂᖓᓂᒃ ᐃᓄᖕᓂᒃ ᐅᒃᐱᕆᔭᖃᕐᓗᓂ ᐊᒻᒪ ᐃᓕᖕᓂᒃ ᐃᑲᔪᖅᑐᐃᓗᓂ," ᐅᖃᖅᑐᖅ. ᖃᐅᔨᓯᒪᖕᒥᔪᖅ ᑲᒪᒋᔭᖃᕐᓂᖅ ᑭᓱᑐᐃᓐᓇᓂᒃ ᐊᑕᐅᓯᐅᓈᖅᑎᖦᖢᒍ ᐃᑲᔫᑎᖃᕐᓂᖓᓂᒃ ᐊᒃᓱᕈᓗᐊᖅᑕᐃᓕᒪᓂᕐᒧᑦ. ᐃᓱᒪᒃᓴᖅᓯᐅᕈᑎᖃᕐᓂᖅ ᐊᒃᓱᕈᕐᓇᖅᑐᓂᒃ ᐊᒻᒪ ᐊᓂᒍᖅᑎᓯᒪᔭᕐᓂᒃ ᐊᑑᑎᖃᕈᓐᓇᖅᐳᖅ ᐊᔪᕈᓐᓃᖅᓴᐅᑎᑦᑎᐊᕙᐅᓪᓗᓂ.

"ᐃᓱᒪᔪᖓᓕ ᖃᕋᓴᕗᑦ ᖃᓄᐃᓕᐅᓲᖑᖕᒪᑕ ᑐᓴᕐᓈᒐᒃᓴᓂᒃ ᐊᔾᔨᒋᙱᑕᖓᓂᒃ ᐊᓯᓕᒫᖏᓐᓂᒃ ᓄᓇᕐᔪᐊᑦᑎᓐᓂ."

ᖃᓄᐃᙱᑦᑎᐊᖏᓐᓇᖁᓗᒍ, ᓱᐊᑦ ᐃᓚᐅᖁᔨᕗᖅ ᑲᔪᖏᖅᓴᐃᔪᓕᕆᓂᕐᒧᑦ ᐱᓕᕆᐊᒃᓴᓂᑦ. ᐃᒪᓐᓇᐅᖁᔨᕗᖅ, ᒪᓕᒡᓗᑎᒃ ᑲᑐᔾᔨᖃᑎᒌᓂᒃ ᐊᒃᑐᐊᓂᓕᖕᓂᒃ ᐱᓕᕆᐊᒃᑯᒥᒋᔭᕐᓄᑦ ᓇᓂᓯᓂᕐᒧᑦ ᐱᕕᒃᓴᓂᒃ, ᐃᑲᔫᑎᒃᓴᓂᒃ ᐊᒻᒪ ᑮᓇᐅᔭᖃᖅᑎᑕᐅᓂᕐᒧᑦ ᐱᕕᒃᓴᓂᒃ.

ᒫᓐᓇᓕ ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᑎᐅᓕᖅᖢᓂ ᐱᙳᐊᖅᑎᐅᓪᓗᓂ ᑎᑕᒃᑎᓂᒃ, ᒧᒥᕐᓂᕐᒥᒃ, ᑕᑯᒃᓴᐅᔪᓂᒃ ᓴᓇᙳᐊᕐᓂᕐᒥᒃ, ᐊᒻᒪ ᓂᐱᓂᒃ, ᐅᓕᕕᐊ ᓱᐊᑦ ᐋᓐᑎᐅᕆᐅ ᐅᐊᖕᓇᖅᐸᓯᐊᓂ ᑐᕌᓐᑐᒧᑦ ᐊᐅᓪᓚᓚᐅᖅᐳᖅ ᑕᐅᑐᙳᐊᖅᑕᒥᓂᒃ ᐃᓕᓐᓂᐊᕆᐊᖅᑐᖅᖢᓂ ᓂᔾᔭᐅᓯᔭᕐᓂᕐᒥᒃ. ᓴᓇᙳᐊᖅᑐᓕᕆᓂᕐᒥᒃ ᐱᓕᕆᓚᐅᖅᖢᓂ ᐊᔾᔨᒌᙱᕈᓘᔭᖅᑐᓂᒃ ᐱᓕᕆᐊᒃᓴᓂᒃ, ᐃᓕᑦᑎᓯᒪᕗᖅ ᐃᓄᖕᓂᒃ, ᑐᓴᐅᒪᖃᑎᒌᖕᓂᕐᒥᒃ, ᓴᖅᑭᑎᑦᑎᓂᕐᒥᒃ ᐊᒻᒪ ᐃᒻᒥᓂᒃ. ᐱᕈᖅᐸᓪᓕᐊᓪᓗᓂ ᐊᔪᕆᖅᓱᖅᑕᐅᓂᒃᑯᑦ, ᑲᑎᙵᓂᒃᑯᑦ ᐊᒻᒪ ᐆᒃᑐᕋᕐᓂᒃᑯᑦ, ᐃᓕᑦᑎᕙᓪᓕᐊᖏᓐᓇᐅᔭᖅᑐᖅ ᐊᐱᖅᓱᖅᐸᒃᖢᓂᓗ ᑭᐅᕙᒃᖢᓂᓗ ᓄᑖᓂᒃ ᐊᐱᖅᑯᑎᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.