ᑐᓗᒐᖅ ᐱᐅᑎ ᐱᕈᖅᐸᓪᓕᐊᑎᓪᓗᒍ, ᖃᐅᔨᒪᓚᐅᖅᑐᖅ ᐊᖁᑎᐅᑉ ᓚᐃᓴᑖᕈᒪᓂᖓᓂᒃ − ᖃᐅᔨᒪᙱᖦᖢᓂ ᐃᖅᑲᓇᐃᔮᖅᑖᕐᓂᐊᕐᓂᖓᓂᒃ.

ᐱᐅᑎ ᓴᒫᑕᕙᒥᐅᑕᒃᓴᔭᐅᔪᖅ ᒫᓂᑑᐸᐅᑉ ᐅᐊᖕᓇᖓᓂ, ᑭᓯᐊᓂ ᐅᑭᐅᖅᑕᖅᑐᒥ ᓄᓇᖃᖅᓯᒪᖕᒥᔪᖅ ᓲᕐᓗ ᒥᑦᑎᒪᑕᓕᖕᒥ, ᐊᐅᓱᐃᑦᑐᒥ, ᐊᒻᒪ ᐃᖃᓗᒃᑑᑦᑎᐊᒥ.

"ᐱᕈᖅᐸᓪᓕᐊᓂᖅ ᐃᓄᑑᓪᓗᓂ ᓴᒫᑕᕙᒥ ᐊᖅᑯᑎᑐᐊᑦᑎᐊᖑᓪᓗᓂ ᐃᓯᕐᓗᓂ ᐊᓂᓗᓂᓗ ᖃᖓᑕᓲᒃᑯᑦ," ᐅᖃᖅᑐᖅ ᐱᐅᑎ.

"ᑕᐃᒪᓕ ᑕᑯᓚᐅᖅᑕᕋ ᓱᕈᓯᐅᑎᓪᓗᖓ ᐊᒻᒪᓗ ᑐᐊᕕᓐᓇᖅᑐᒃᑯᑦ ᓱᕈᓯᕋ ᐱᓚᐅᖅᓯᒪᒻᒥᔭᕋ. ᐃᓱᒪᑐᐃᓐᓇᕋᑖᕋᒪ ᓂᓪᓚᓱᒋᓪᓗᒍ, ᖃᖓᑕᓲᑦ ᐅᕙᓐᓄᑦ ᓂᓪᓚᑦᑐᐹᓘᓚᐅᖅᑐᑦ."

ᐱᐅᑎ ᐃᖅᑲᐅᒪᔪᖅ 7-ᖑᓚᐅᖅᓯᒪᒻᒪᓂᑦ ᐃᑯᒻᒪᖅᑯᑎᑦ ᖃᒥᑕᐅᓚᐅᕐᒪᑕ ᓄᓇᓕᖓᓐᓄᑦ ᐊᒻᒪ ᐅᖄᓚᒋᐊᖃᖅᑐᑎᒃ ᑐᐊᕕᕐᓇᖅᑐᒃᑯᑦ ᐊᐅᓪᓚᐅᔾᔭᐅᒋᐊᖓ.

"ᓄᓇᓕᖕᒥᐅᑦ ᑲᑎᓚᐅᖅᐳᑦ ᓯᑭᑑᒥᓂᒃ ᑐᑭᓕᕇᓕᖅᑎᖦᖢᒋᑦ ᒥᕝᕕᐅᑉ ᖃᓂᒋᔮᒍᑦ ᖃᖓᑕᓲᖅ ᒥᒍᓐᓇᕐᓂᐊᕐᒪᑦ. ᐃᓱᒪᑐᐃᓐᓇᕐᐸᒃᖢᖓᓗ ᐱᔪᒃᓯᑎᑦᑎᓂᖓᓂᒃ ᓄᓇᓕᖕᒥᐅᑦ ᑲᑎᓪᓗᑎᒃ," ᐅᖃᖅᑐᖅ ᐱᐅᑎ.

ᑭᓯᐊᓂ ᓲᖃᐃᒻᒪ ᐱᐅᑎ ᐊᖁᑎᐅᖏᓐᓇᖅᓯᒪᙱᒻᒪᑦ. ᐊᕐᕌᒍᓄᑦ ᐱᖓᓱᓄᑦ ᖃᖓᑕᓲᓕᕆᓂᕐᒧᑦ ᐃᓕᓐᓂᐊᓚᐅᖅᑐᖅ ᐋᓐᑎᐅᕆᔫᑉ ᓂᒋᐊᓂ ᑐᕌᒐᖃᖅᖢᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᖏᓐᓂᒃ.

ᐱᐅᑎ ᐅᖃᖅᖢᓂ ᐱᐅᓛᖑᖃᑕᐅᓚᐅᖅᑐᖅ ᐱᓕᕆᐊᖓᑕ ᒥᒃᓵᓄᑦ ᐅᖓᓯᓗᐊᓚᐅᙱᑦᑐᖅ ᐊᒻᒪ ᑭᒃᑯᓕᒫᑦ "ᑕᕝᕙᓂᑦᑕᐃᓐᓇᖅ ᐅᒥᐊᕐᒦᖦᖢᑎᒃ."

ᐅᖃᖅᑐᓂ ᖃᓄᕈᓘᔮᓗᒃ ᐊᖁᒍᓐᓇᐅᑎᑖᕈᓐᓇᕋᑦᑕ ᐊᒻᒪᓗ ᐃᓄᐃᑦ ᖃᐅᔨᔭᕆᐊᖃᖅᑐᑎᒃ ᖃᓄᐃᓕᐅᕈᒪᒻᒪᖔᕐᒥᒃ.

ᑭᓯᐊᓂᓕ, ᐊᖁᑎᕈᖅᑐᓂ ᐅᓪᓗᒥ ᐊᐳᖅᑕᕈᑎᖃᓚᐅᓐᖏᒻᒪᑦ.

ᖃᖓᑕᓚᐅᖅᑎᓪᓗᒋᑦ, ᐲᑎ ᐅᖃᕐᖢᓂ ᑭᓇᑐᐃᓐᓇᖅ ᐱᔭᕇᖅᐸᑦ ᐃᖅᑲᓇᐃᔭᓕᓲᑦ ᖃᖓᑕᓲᓕᕆᔨᒃᑯᓐᓄᑦ ᐱᒋᐊᓕᕐᖢᑎᒃᓗ ᓄᓇᒥ ᐱᓕᕆᓪᓗᑎᒃ ᓲᕐᓗ ᑭᐅᔨ ᐅᕝᕙᓘᓐᓃᑦ ᐊᑐᖅᑎᒧᑦ ᑭᒡᒐᖅᑐᐃᔨᒥᒃ ᐃᒃᐱᒋᓗᒍ ᑎᒥᐅᔪᖅ.

"ᑕᐃᒪᓕ ᑕᐃᒪᐃᒐᔪᒃᑐᖅ. ᐊᒻᒪᓗ ᐱᔭᕇᕋᒪ ᐊᒥᓱᓂᒃ ᐊᖁᑎᓂᒃ, ᐅᑕᖅᑭᖃᑦᑕᓚᐅᕋᒪ ᐊᕐᕌᒍᓄᑦ ᑕᓪᓕᒪᓄᑦ, ᒪᒥᐊᓇᖅ, ᑎᓴᒪᑦ ᐊᕐᕌᒍᐃᑦ ᖃᖓᑕᓲᖅᑖᓚᐅᖅᑎᓐᓇᖓ. ᐊᑯᓂᐊᓗᒃ ᑕᐃᑯᙵᕋᓱᓚᐅᖅᑐᖅ," ᐅᖃᖅᑐᕕᓂᖅ ᐱᐅᑎ.

ᐅᖃᖅᑐᓂ ᐃᓛᓐᓂᒃᑯᑦ ᖁᕕᐊᓇᖃᑦᑕᖏᓐᓂᕋᖅᑐᓂᐅᒃ ᐊᒻᒪᓗ ᑭᖑᓂᐊᒍᑦ ᐱᔪᓐᓇᕐᓂᖃᓕᕋᒥ, ᐅᖃᖅᑐᓂ ᐊᒃᓱᐊᓗᒃ ᖁᕕᐊᓇᕐᒪᑦ ᐃᓱᐊᓂ.

ᐊᒻᒪᓗ ᖃᓄᑐᐃᓐᓇᖅ ᐅᖃᐅᔾᔨᔪᓐᓇᕈᓂ ᒪᒃᑯᖕᓂᖅᓴᒥᓂᒃ, ᐃᒪᓐᓇᐅᓇᔭᖅᐳᖅ ᓲᖃᐃᒻᒪ ᓄᓇᖃᖅᑳᖅᓯᒪᔫᓂᖓᓄᑦ ᐊᕐᓇᐅᓂᖓᓄᓪᓗ ᑐᑭᖃᙱᓚᖅ ᐃᓱᒪᒋᔭᒃᓴᖅᑕᖃᓚᐅᖅᓯᒪᔾᔮᙱᓐᓂᖓᓂᒃ.

"ᖃᓄᑐᐃᓐᓇᖅ, ᐊᒡᕕᐊᕈᑕᐅᑐᐃᓐᓇᓚᐅᖅᑐᖅ. ᓲᕐᓗᓕ, ᐅᕙᓐᓂᒃ ᖃᐅᔨᑎᑦᑎᔭᕆᐊᖃᓚᐅᖅᑐᖓ ᐊᒃᓱᕈᕐᓂᖅᓴᐅᓗᖓᓗ, ᑭᖑᓪᓕᖅ ᐃᓄᒃ, ᐱᐅᙱᖦᖢᓂ," ᐅᖃᖅᑐᕕᓂᖅ ᐱᐅᑎ.

"ᐅᖃᐅᔾᔭᐅᕗᑎᑦ ᓄᓇᖃᖅᑳᖅᓯᒪᒐᕕᑦ... [ᑕᐃᒪᐃᓐᓂᐊᖅᑐᖅ] ᖃᓄᐃᑦᑐᖃᔾᔮᖏᑦᑐᖅ ᓇᓂᓯᓗᓂ ᐃᖅᑲᓇᐃᔮᒃᓴᒥᒃ ᐅᕝᕙᓘᓐᓃᑦ ᑕᐃᒪᐃᑦᑐᒐᓚᒻᒥᒃ, ᑭᓯᐊᓂ ᓱᓕᙱᑦᑎᐊᖅᑐᖅ."

ᐱᐅᑎ ᐱᔭᕇᖅᓯᓯᒪᔪᖅ ᐊᒥᓱᓂᑦ ᑐᕌᒐᖏᓐᓂᑦ, ᐅᖃᖅᓱᓂᓗ ᐊᑦᓱᕈᖅᓱᑎᒃ ᐃᖅᑲᓇᐃᔭᖃᑦᑕᖅᑐᑦ ᐃᓅᓯᖏᓐᓂᑦ ᓲᕐᓗ ᐊᓈᓇᑦᓯᐊᒃᑯᖏᑦ ᐊᒻᒪᓗ ᑕᑯᑦᓱᒍ ᐃᖅᑲᓇᐃᔮᖏᓐᓂᑦ ᐃᑲᔪᖅᓯᒪᔪᖅ, ᐊᖓᔪᖅᑳᖏᓪᓗ.

"ᐊᓕᐊᓇᐃᒍᓱᑦᑎᐊᖅᐳᖓ ᐊᔾᔪᒥᓇᑦᑎᐊᖅᑐᒥᒃ ᐃᓅᓯᓐᓂ ᐊᔾᔪᒥᓇᑦᑎᐊᕋᒪ."

ᖁᔭᓐᓇᒦᑦᑎᐊᕐᒥᔭᕋ ᔮᔅᒥᓐ ᑲᐸᑕᐃ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ.