ᐱᕈᖅᓴᓪᓗᓂ ᐃᓚᒌᓂᑦ ᐊᐅᖅᑭᑦᑎᔨᓂᑦ, ᕋᐃᒪᓐ ᐹᓪ ᐃᓕᑦᑎᔪᒻᒪᕆᐅᓚᐅᖅᑐᖅ ᓴᙱᓂᕐᒥᑦ ᓴᕕᕋᔭᖕᒥᑦ ᓇᒡᓕᒍᓱᖕᓂᕐᒥᓪᓗ. ᐊᖏᕐᕋᒧᑦ ᐊᐅᓪᓚᕆᐊᖃᓚᐅᖅᑐᖅ ᓇᒻᒥᓂᖅ ᓇᓂᓯᔭᖅᑐᖅᑐᓂ, ᑭᓯᐊᓂ ᐊᑑᑎᖃᓚᐅᖅᑐᖅ. "ᓄᓇᓕᓕᒫᑲᓴᖕᓂ, ᓄᓇᔅᓯᓐᓂ ᐊᐅᓪᓚᕆᐊᖃᕋᕕᑦ ᐃᖅᑲᓇᐃᔮᖅᑖᒃᑲᓐᓂᕋᓱᒡᓗᑎᑦ. ᐃᓚᖏᓐᓄᑦ ᐃᓄᖕᓄᑦ ᐊᔪᕐᓇᒐᓚᒃᑐᖅ, ᑭᓯᐊᓂ ᐊᑭᓖᓪᓗᓂ ᐃᓱᐊᓂ," ᕋᐃᒪᓐ ᐹᓪ ᓴᖅᑭᔮᖅᑎᑦᑎᔪᖅ ᐱᓕᒻᒪᒃᓴᓚᐅᖅᓯᒪᓂᕐᒥᓂᒃ ᓄᓇᒥᓂᒃ. 

ᓯᓚᑦᑐᖅᓴᕐᕕᖕᒦᓚᐅᖅᑐᖅ ᑳᓪᒍᕆᒥ ᓇᓂᓯᓪᓗᓂᓗ ᖃᓄᖅ ᐊᑐᕈᓐᓇᕐᒪᖔᑦ ᐅᖓᓯᒃᑎᒋᓗᓂ ᑐᓴᐅᒪᑏᓐᓇᕋᓱᒃᖢᒋᑦ ᑭᒃᑯᓕᒫᑦ ᐊᖏᕐᕋᖏᓐᓂ. ᑖᔅᓱᒧᖓ, ᐊᖏᕐᕋᖓ ᐅᑭᐅᖅᑕᖅᑐᒦᓚᐅᖅᑐᖅ. ᐹᓪ ᐱᕈᖅᓴᓚᐅᖅᓯᒪᔪᖅ ᑐᓚᐃᑕᒥ ᔭᓗᓇᐃᒥᓗ, ᓄᓇᑦᓯᐊᕐᒥ ᐊᐅᖅᑭᑦᑎᖃᑦᑕᖅᓯᒪᓪᓗᓂᓗ ᐊᕐᕌᒍᓄᑦ 17-ᓄᑦ. ᐊᐅᐸᖅᑐᒥᒃ ᓇᓗᓇᐃᒃᑯᑎᖃᖅᑐᖅ ᑭᓯᐊᓂ ᓯᕗᓪᓕᖅᐹᕆᓚᐅᙱᑕᖓ ᐃᖅᑲᓇᐃᔮᕆᔪᒪᔭᒥᓂᒃ. ᓯᕗᓪᓕᖅᐹᒥ ᐃᖅᑲᓇᐃᔭᓚᐅᖅᑐᖅ ᕿᔪᓕᕆᓂᕐᒥᑦ ᔭᓗᓇᐃᒥ ᐊᒻᒪᓗ ᑕᕝᕗᖓᓚᐅᖅᑐᖅ ᐱᔾᔪᑎᒋᓪᓗᒍ ᐊᒃᑲᖓ ᐃᓕᓐᓂᐊᖅᑎᑦᑎᓚᐅᖅᑐᖅ ᕿᔪᓕᕆᓂᕐᒥᑦ. ᖁᕕᐊᒋᓂᐊᕋᓱᒋᓚᐅᕐᒪᒍ ᑭᓯᐊᓂ ᐊᑐᐃᓐᓇᓚᐅᖏᓐᓇᒥ ᐊᓯᐊᓂᒃ ᐆᑦᑐᓚᐅᖅᑐᖅ. ᑭᖑᓪᓕᕐᒥ, ᓯᕗᓪᓕᖅᐹᒥ ᐊᕐᕌᒍᒥ ᖃᖓᑕᓲᓂᒃ ᓴᓇᔨᐅᓂᕐᒧᑦ ᐃᓕᓐᓂᐊᓚᐅᖅᑐᖅ ᐸᕙᓗ ᖃᖓᑕᓲᖓᓂ ᔨᐊᓗᓇᐃᒥ. 

ᐃᓕᓐᓂᐊᖅᑎᓪᓗᒍ, ᐊᐅᖅᑭᑦᑎᖃᑦᑕᓚᐅᕐᒪᑦ ᖃᖓᑕᓲᑉ ᐊᓄᕆᓂᖓᓂᒃ ᐊᒻᒪᓗ ᖁᕕᐊᒋᓪᓗᓂᐅᒃ. ᐊᒻᒪᓗ ᐃᓚᖏᓐᓃᙶᖅᓯᒪᒻᒥᔪᖅ ᐊᐅᖅᑭᑦᑎᔨᓂᑦ, ᐊᑖᑕᖓ ᐊᒻᒪᓗ ᐱᖓᓱᑦ ᐊᒃᑲᖏᑦ. ᐃᓕᓐᓂᐊᖅᑐᓂ ᐃᖅᑲᓇᐃᔭᖅᑐᓂ ᐅᑭᐅᖅᑕᖅᑐᒥ ᐊᒻᒪᓗ ᓇᓂᓯᓪᓗᓂ ᐱᓕᕆᖃᑎᖃᕐᓂᕐᒥᒃ ᐅᔭᕋᓐᓂᒃ ᑎᓯᓂᖅᐹᓂᒃ ᐅᔭᕋᓐᓂᐊᕐᕕᒻᒥ. "ᑕᐃᑲᙵᑦ ᐲᒐᓚᓚᐅᖅᑐᖅ, ᖁᕕᐊᒋᓯᒪᓪᓗᒍᓗ, ᐊᓕᐊᓇᐃᒋᑦᑎᐊᖅᑕᕋ ᓱᓕ," ᖁᖓᖦᖢᓂ. 

ᐊᐅᓪᓚᖅᓯᒪᓪᓗᓂ ᐃᓕᓐᓂᐊᕆᐊᖅᓯᒪᓪᓗᓂ ᐱᐅᓗᐊᓚᐅᙱᑦᑐᖅ, ᐱᓇᓱᐊᕈᓯᑦ 8-ᑐᐃᓐᓇᐅᓚᐅᖅᑐᑦ ᓇᓗᓇᐃᖅᓯᓪᓗᓂᓗ, "ᐱᕕᖃᒃᑲᓐᓂᓕᖅᐳᑎᑦ ᐃᓕᓐᓂᐊᒃᑲᓐᓂᕆᐊᒃᓴᖅ, ᓲᖃᐃᒻᒪ ᐃᓄᑑᒐᕕᑦ ᑕᑉᐹᓂ. ᐱᖃᓐᓇᕆᔭᖅᑖᖃᑦᑕᕋᕕᑦ, ᓲᖃᐃᒻᒪ. ᕿᓚᒥᐊᓗᒃ ᐃᖏᕐᕋᕗᖅ, ᓲᖃᐃᒻᒪ ᐱᓕᕆᔪᒻᒪᕆᐅᒐᕕᑦ ᐊᒻᒪ ᐃᓕᓐᓂᐊᕐᕕᖕᒥ ᐊᒻᒪ ᐃᓕᓐᓂᐊᖅᖢᑎᑦ." 

ᓄᓕᐊᖓ ᑕᐃᑲᓃᓚᐅᓐᖏᒻᒪᑦ ᐃᓕᓐᓂᐊᕆᐊᖅᓯᒪᑎᓪᓗᒍ, ᑭᓯᐊᓂ ᑐᓄᑦᑎᐊᖓᓃᖏᓐᓇᕐᒪᑦ. "ᓄᓕᐊᕋ ᐅᕙᓐᓄᑦ ᑐᓱᒋᔭᐅᕐᔪᐊᓚᐅᖅᑐᖅ, ᐲᐊᕐᔪᓚᐅᖅᑕᕋ, ᑭᓯᐊᓂ ᐅᕙᓐᓄᑦ ᐅᑎᖅᑎᖦᖢᓂᖓ. ᑕᐃᒪᓕ ᑕᒪᓐᓇ ᐲᑲᓐᓂᓕᓚᐅᖅᑕᕋ, ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᑎᓪᓗᖓ. ᑕᐃᒪᓐᖓᓂᓪᓕ, ᐃᖅᑲᓇᐃᔭᖅᓯᒪᓕᖅᑐᖓ ᐃᖅᑲᓇᐃᔭᖅᑐᖓ, ᐊᒻᒪᓗ ᐱᐅᓯᕙᓪᓕᐊᑐᐃᓐᓇᖅᑐᓂ ᐊᒻᒪᓗ ᐱᐅᓯᕙᓪᓕᐊᓪᓗᓂ. ᑕᐃᒪᐃᒻᒪᑦ ᐱᐅᓯᕙᓪᓕᐊᑐᐃᓐᓇᖅᐳᖅ, ᖃᐅᔨᕙᓪᓕᐊᑐᐃᓐᓇᖅᑎᓪᓗᑎᑦ ᐃᖅᑲᓇᐃᔮᕐᓂᑦ," ᐅᖃᐅᓯᖃᖅᐳᖅ. 

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓄᓇᒥᓂᒃ ᕿᒪᐃᖁᓪᓗᒋᑦ, "ᐃᑲᔪᖅᑕᐅᓗᑎᒃ ᑮᓇᐅᔭᓂᒃ ᑎᑕᒃᑎᔅᓯᓐᓄᑦ. ᑕᒪᒃᑯᐊ ᑎᑕᒃᑎᐅᔪᑦ ᐃᑲᔪᖅᐸᒻᒪᑕ ᐊᒻᒪᓗ ᐊᑭᓖᕙᒃᑐᑎᒃ ᐃᕝᕕᑦ ᑮᓇᐅᔭᖏᓐᓄᑦ ᐊᒻᒪᓗ ᐃᖏᕐᕋᔾᔪᑎᖏᓐᓄᑦ, ᑕᖅᑭᑕᒫᑦ ᐊᑭᓕᕆᐊᖃᖅᑐᓂᒃ ᑐᓂᓯᕙᒃᑐᑦ ᐃᓕᓐᓂᐊᕐᕕᒻᒦᓐᓂᓐᓂ, ᑕᒪᓐᓇ ᐊᒃᓱᐊᓗᒃ ᐃᑲᔪᖅᐸᒻᒪᑦ ᐅᕕᒃᑲᐅᔪᓄᑦ ᐃᓕᓐᓂᐊᖅᑎᐅᔪᓄᑦ. ᐃᓕᖕᓂᒃ ᑕᑯᔪᒪᖕᒪᑕ ᑲᔪᓯᑦᑎᐊᖅᑐᓂᒃ, ᖃᓄᑐᐃᓐᓇᖅ ᐱᓕᕆᔪᓐᓇᕐᓂᐊᕐᒪᑕ ᐃᓕᖕᓂᒃ ᐃᑲᔪᕈᓐᓇᕐᓗᑎᒃ." ᐃᓕᓐᓂᐊᖃᑎᖃᓚᐅᖅᑐᖅ ᐃᓕᓐᓂᐊᖅᑎᓂᒃ ᐃᑲᔪᖅᑕᐅᓚᐅᙱᑦᑐᓂᒃ, ᑕᐃᑲᓃᓚᐅᖅᑐᑦ ᓄᖅᑲᖅᑎᑕᐅᓯᒪᒐᒥᒃ ᐊᒻᒪᓗ ᑕᑯᔪᓐᓇᖅᑐᓂ ᐊᔾᔨᒌᙱᓐᓂᖏᓐᓂᒃ ᐃᑲᔪᖅᑕᐅᓂᐅᔪᓂᒃ. 

ᐅᖃᐅᓯᖃᖅᑎᓪᓗᒍ ᓇᒻᒥᓂᖅ ᐊᒃᓱᕈᕈᑎᒥᓂᒃ ᐃᖅᑲᐅᒪᔪᖅ, "ᐊᕝᕕᐊᕈᑎᑐᐊᑦᑎᐊᕋ ᕿᒪᒃᓯᓯᒪᓚᐅᖅᑐᖓ ᐃᓚᓐᓂᒃ. ᐱᓕᕆᐊᕆᔭᒃᑯᑦ, ᐊᐅᓪᓚᖅᓯᒪᐃᓐᓇᖃᑦᑕᓚᐅᖅᑐᖓ, ᐱᓇᓱᐊᕈᓰᒃ ᒪᕐᕉᒃ ᓄᖅᑲᖓᓪᓗᖓ, ᐱᓇᓱᐊᕈᓰᓐᓂᒃ ᒪᕐᕉᓐᓂᒃ, ᐅᕝᕙᓘᓐᓃᑦ 21-ᓂᒃ, ᐱᓇᓱᐊᕈᓯᖅ ᐊᑕᐅᓯᖅ ᓄᖅᑲᖓᓪᓗᖓ. ᐃᖅᑲᓇᐃᔮᕐᓂ, ᑕᒪᓐᓇ ᐊᑐᕆᐊᖃᖅᑕᐃᑦ ᐃᓚᑎᓪᓗ ᐊᑐᓕᕐᓗᑎᒃ."

ᐊᔪᕐᓇᕋᓗᐊᖅᑎᓪᓗᒍ ᐊᐅᓪᓚᖅᓯᒪᔭᕆᐊᒃᓴᖅ, ᐹᓪ ᐱᐅᔪᒥᒃ ᐃᓕᖅᑯᓯᖃᕐᒪᑦ, ᓇᓗᓇᐃᖅᓯᓪᓗᓂ, "ᐊᑭᓖᓲᖅ ᐊᖏᕐᕋᖅᓯᒪᑎᓪᓗᑎᑦ, ᖃᐅᔨᒪᔪᓯ, ᓈᓴᐃᖏᓐᓇᖅᐸᒃᐳᒍᑦ, ᐃᑲᕐᕋᑕᒫᑦ. ᑕᒪᓐᓇ ᐃᓚᒋᕚ ᑕᐅᕐᓰᓂᕐᒧᑦ, ᐃᓛᒃ. ᐃᖅᑲᓇᐃᔮᖅᑖᕈᓐᓇᖅᑐᑎᑦ ᓄᓇᓕᓐᓂ, ᐅᐱᓐᓇᕋᓂ, ᑭᓯᐊᓂ ᐊᒥᓱᑦ ᐃᓄᐃᑦ ᑮᓇᐅᔭᓕᐅᕈᒪᒻᒪᑕ ᐊᒻᒪᓗ ᑖᒃᑯᐊ ᑮᓇᐅᔭᐃᑦ, ᐃᓛᒃ, ᓄᓇᓕᕋᓛᓂ ᐃᖅᑲᓇᐃᔭᖅᑐᑎᒃ."

ᒪᒃᑯᖕᓂᖅᓴᖅ ᐅᖃᐅᑎᔪᓐᓇᕈᓂᐅᒃ ᑭᓱᑐᐃᓐᓇᑦᑎᐊᒥᒃ, "ᑕᐅᑐᒐᖃᓪᓗᐊᑕᕐᓗᓂ, ᑎᔅᓯᓈᕿᐃᓐᓇᕐᓗᑎᑦ. ᐊᓯᐅᔨᑦᑕᐃᓕᒋᑦ ᖃᓄᐃᓕᐅᕈᒪᖕᒪᖔᖅᐱᑦ ᓯᕗᓂᒃᓴᑦᑎᓐᓂ. ᑕᐅᑐᓪᓗᐊᑕᑐᐃᓐᓇᕐᓗᖓ, ᐊᒥᓲᕗᑦ ᐱᓇᓱᖕᓃᑦ ᐊᒻᒪᓗ ᓇᓗᓇᙱᑦᑐᖅ, [ᐊᑑᑎᖃᖏᑦᑐᖅ] ᐊᑑᑎᖃᙱᑦᑐᖅ. ᐃᓕᓐᓂᐊᕆᐊᕈᕕᑦ, ᓄᓇᒋᔭᐃᑦ ᐊᐅᓪᓚᓕᕋᕕᑦ ᑭᓱᒥᑭᐊᖅ, ᐱᔭᕇᕈᒪᓪᓗᑎᓪᓗ. ᑕᒪᒃᑯᐊ ᑕᕝᕙ ᐲᖅᐸᓪᓕᐊᓂᐊᖅᑕᑎᑦ ᐊᒻᒪᓗ ᑕᒪᓐᓇ ᑕᐅᑐᒐᕆᓪᓗᐊᑕᕐᓗᒍ. ᐃᓅᓯᓕᒫᒧᑦ ᐃᖅᑲᓇᐃᔮᖑᖕᒪᑦ ᐃᓕᖕᓄᑦ ᐊᒥᓱᓂᒡᓗ ᐃᓄᖕᓂᒃ ᓈᓴᐃᔪᖃᐅᖅᖢᓂ, ᐊᒥᓱᑦ ᐃᓄᐃᑦ ᐃᑲᔪᖅᖢᑎᒃ ᐃᓕᖕᓂᒃ ᐱᓕᕆᕙᓪᓕᐊᑎᓪᓗᑎᑦ ᑕᒻᒪᕈᒪᙱᖦᖢᑎᓪᓗ. ᖃᓄᐃᓕᐅᕐᓗᑎᑦ ᐊᓂᒍᖅᑎᓐᓇᓱᒃᓗᒍ." 

ᐃᖅᑲᓇᐃᔮᖃᕐᓂᖅ ᖃᓄᐃᙱᑦᑎᐊᖅᑐᓂᒃ ᑮᓇᐅᔭᓕᐅᑦᑎᐊᕐᓇᖅᑐᓂᒃ ᑐᑭᖃᕐᒥᔪᖅ ᐹᓪ ᐃᖕᒥᓂᒃ ᖃᓄᐃᙱᑦᑎᐊᖏᓐᓇᕆᐊᖃᖅᑐᖅ. "ᐋᖅᑭᒃᓱᐃᓯᒪᐃᓐᓇᕆᐊᖃᖅᑐᑎᑦ ᓂᐱᐅᓯᖅᓱᐃᔨᐅᓗᑎᑦ; ᐅᖁᒪᐃᑦᑐᓕᕆᖃᑦᑕᖅᑐᖓ. ᑕᖃᐃᖅᓯᕆᐊᖃᖅᑐᑎᑦ, ᖃᓄᐃᙱᑦᑎᐊᕆᐊᖃᖅᑐᑎᑦ. ᓂᐱᐅᓯᖅᓱᐃᓂᖅ, ᐅᖃᖅᑐᑦ, ᐃᖅᑲᓇᐃᔮᑦᑎᐊᕙᐅᙱᖦᖢᓂ ᑭᓯᐊᓂ ᐃᖅᑲᓇᐃᔮᕐᓂ ᐱᓕᕆᒍᕕᑦ ᐊᑦᑕᕐᓇᙱᑦᑐᒃᑯᑦ ᖃᓄᐃᔾᔮᙱᑦᑐᑎᑦ," ᓇᓗᓇᐃᖅᐳᖅ. 

"ᖁᐊᖅᓵᕐᓇᖅᑕᐃᓕᒪᓂᖅ ᓯᕗᓪᓕᖅᐸᐅᕗᖅ. ᐊᔾᔨᒌᓐᖏᑦᑑᑎᐅᒻᒪᑕ ᐊᐅᖅᑭᑦᑎᔾᔪᑏᑦ, ᑭᓯᐊᓂᓕ ᐅᕙᖓ ᓄᓇᖓᓐᓂ, ᐃᖅᑲᓇᐃᔭᖃᑎᖃᖅᐸᑦᑐᖓ ᐅᖁᒪᐃᑦᑐᓂᒃ ᐅᔭᕋᓐᓂᐊᕐᕕᓐᓂᒃ ᐅᑭᐅᖅᑕᖅᑐᒥ, 1,000 ᐸᐅᓐᔅᓂᒃ ᐅᖁᒪᐃᓐᓂᓕᓐᓂᒃ ᑲᒪᒋᔭᓯᓐᓂᒃ, ᐊᒻᒪᓗ ᖃᐅᔨᒪᒍᒪᓪᓗᓯ ᖃᓄᐃᓕᐅᕐᓂᓕᒫᓐᓂᒃ. ᐊᑦᑕᕐᓇᖅᑐᒦᑦᑕᐃᓕᒋᑦ. ᐃᓕᖕᓂᒃ ᐱᓕᕆᙱᑦᑐᑎᑦ. ᐱᓕᕆᖃᑎᖃᕐᒥᒐᕕᑦ ᐊᓯᖏᓐᓂᒃ ᐃᓄᓐᓂᒃ, ᓱᓕᓪᓗᓂ?" ᑲᔪᓯᔪᖅ. 

ᐊᑦᑕᕐᓇᖅᑕᐃᓕᒪᓂᕐᒧᑦ ᖃᐅᔨᒪᓇᓱᐊᕐᓂᖓ ᐱᔪᒃᓯᑎᑕᐅᕗᖅ ᐃᖅᑲᓇᐃᔭᖃᑎᒥᓄᑦ ᑭᓯᐊᓂ ᐹᓪ ᐊᑖᑕᒥᓄᑦ ᐱᔪᒃᓯᑎᑕᐅᕗᖅ ᐃᑲᔪᓚᐅᖅᑐᖅ ᖃᓄᖅ ᓇᓂᓯᓪᓗᓂ. "ᐊᑖᑕᒐ ᐅᕙᓐᓂᒃ ᐃᑲᔪᓚᐅᖅᑐᖅ ᐊᐅᖅᑭᑦᑎᓂᕐᒧᑦ. ᐊᐅᖅᑭᑦᑎᔨᐅᓚᐅᖅᑐᖅ. ᓱᕈᓯᐅᓚᐅᖅᓯᒪᒐᒪᓂᑦ, ᐊᐅᓪᓚᑲᑕᐃᓐᓇᖅᐸᓚᐅᖅᑐᖅ, ᐊᐅᓪᓚᖅᑐᓂ ᐃᖅᑲᓇᐃᔭᕆᐊᖅᑐᓂ ᐊᒻᒪᓗ ᐊᖏᕐᕋᖅᑐᓂ. ᓴᓂᑦᑎᐊᖓᓂ ᓄᓇᖃᓚᐅᖅᑐᒍᑦ ᐊᑖᑕᒐ ᐊᐅᖅᑭᑦᑎᕕᒻᒥ ᐃᖅᑲᓇᐃᔭᖅᑐᓂ ᐊᒻᒪᓗ ᐱᕈᖃᑎᒋᓯᒪᓪᓗᒍ ᐊᖏᕐᕋᐸᓪᓕᐊᑎᓪᓗᒍ, ᓲᕐᓗ ᓴᕕᕋᔭᐅᔮᖅᑐᓂ ᐊᒻᒪᓗ ᐊᐅᖅᑭᑦᑎᓪᓗᓂ, ᐃᑉᐸᑦᑐᓂ. ᐱᕈᖃᑎᒋᕋᑖᑦᑎᐊᕋᒃᑯ ᐊᒻᒪᓗ ᓇᓪᓕᒋᓪᓗᒍ. ᐱᔪᒃᓯᑎᑦᑎᕗᖓ ᐅᓪᓗᒥ ᓇᓃᓕᕐᒪᖔᕐᒪ," ᐅᖃᖅᖢᓂ. ᒫᓐᓇ, ᐃᕐᓂᖓ ᖃᐅᔨᒪᔪᖅ ᖃᓄᐃᑦᑑᒻᒪᖔᖅ ᐱᕈᖅᓴᔭᐅᓗᓂ ᐊᐅᖅᑭᑦᑎᔨᒧᑦ.

ᐱᔭᕇᕈᑎᒋᓗᒍ, ᕋᐃᒪᓐ ᐹᓪ ᑐᓴᖅᑎᑦᑎᕗᖅ ᓂᕆᐅᖕᓂᕐᒥ ᖃᑦᑎᕆᔨᑦ ᐅᖃᖃᑎᒌᒃᑎᓪᓗᒋᑦ, ᐃᒪᓐᓇᐅᔪᖅ, "ᑕᐅᑐᒐᖃᓪᓗᐊᑕᕐᓗᑎᑦ, ᐃᑲᔪᖅᑕᐅᔭᕆᐊᖃᖅᑕᕐᓂᒃ ᐃᑲᔪᖅᑕᐅᓗᑎᑦ. ᐊᒥᓲᕗᑦ ᐃᓄᐃᑦ ᑐᓄᓐᓂ. ᖃᑕᙳᑎᑎᑦ ᓈᓴᐅᑎ 1-ᒦᑉᐳᖅ ᓄᓇᖅᑲᑎᐃᓪᓗ ᑐᓄᑦᑎᐊᖓᓃᖦᖢᓂ." ᐊᖏᕐᕋᒧᑦ ᐊᐅᓪᓚᕆᐊᖃᓚᐅᖅᑐᖅ ᐃᖅᑲᓇᐃᔮᒥᓂᒃ ᓇᓂᓯᔭᖅᑐᖅᖢᓂ, ᑭᓯᐊᓂ ᖀᒥᒍᓱᖕᓂᖅ ᐊᑑᑎᖃᖅᓯᒪᔪᖅ. ᐊᑖᑕᖓᑕ ᐊᒃᑲᖓᓗ, ᓄᓕᐊᒥᓄᑦ ᑎᓕᐅᖅᑕᐅᓪᓗᓂ, ᓇᓃᑦᑐᒪᖕᒪᖔᑦ ᖃᐅᔨᓚᐅᖅᐳᖅ. ᐅᔾᔨᖅᓱᐃᓐᓇᕐᖢᓂ ᐊᑦᑕᕐᓇᖅᑐᒦᑦᑕᐃᓕᓗᓂᓗ, ᐱᓕᕆᖃᑎᖃᖅᑐᖅ ᓴᙱᓂᕐᒥᒃ ᓴᕕᕋᔭᖕᓂ ᓇᒡᓕᒍᓱᖕᓂᕐᒥᓗ ᐱᑎᑕᖏᓐᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.