"ᐅᑭᐅᖅᑕᖅᑐᖅ ᐊᖏᕐᕋᕆᒐᒃᑯ, ᐃᓅᓂᑰᓪᓗᖓ ᐱᕈᖅᓴᓯᒪᓪᓗᖓᓗ. ᑲᔪᖏᖅᓴᐃᑦᑎᐊᕐᓇᖅᐳᖅ ᐱᕈᖅᓴᔭᐅᓪᓗᓂ ᑕᒫᓂ," ᓵᓇᓐ ᓵᓴᓐ ᖁᕕᐊᓱᒃᑐᖅ. ᐃᓅᓚᐅᖅᓯᒪᔪᖅ ᔭᓗᓇᐃᕝ, ᓄᓇᑦᓯᐊᕐᒥ ᐊᒻᒪᓗ ᐱᕈᖅᓴᓚᐅᖅᓯᒪᓪᓗᓂ ᕗᐊᑦ ᓯᒻᓴᓐᒥ ᐃᓅᓯᓕᒫᖓᓂ. ᐃᑦᑐᒃᑯᖏᒃ ᐊᑖᑕᑦᑎᐊᒃᑯᖏᒃ ᐃᖅᑭᓖᑦ ᐃᓕᖅᑯᓯᖏᓐᓂᒃ, ᐱᖅᑯᓯᖏᓐᓂᒃ ᐊᒻᒪ ᐱᒻᒪᕆᐅᒋᔭᖏᓐᓂᒃ ᐊᑐᐃᓐᓇᖃᖅᑎᑦᑎᓇᓱᖃᑦᑕᓚᐅᖅᐳᑦ ᒪᒃᑯᒃᑑᑎᓪᓗᒍ. ᐊᓈᓇᖓᑕ ᐊᑖᑕᖓᑕ ᓄᓇᓕᕐᔪᐊᖏᑦ ᐊᑯᓐᓂᖓᓂ, ᐱᒋᐊᕐᕕᒋᓯᒪᔭᖓ ᐅᑭᐅᖅᑕᖅᑐᓕᒫᒧᑦ.

ᐱᕈᖅᓴᓪᓗᓂ, ᑳᓴᓐ ᓄᓇᒦᖃᑦᑕᓚᐅᖅᑐᖅ. ᐊᖓᔪᖅᑳᖏᒃ ᐊᐅᓪᓛᖅᓯᒪᑎᑦᑎᓇᓱᖃᑦᑕᓚᐅᖅᐳᑦ ᐃᑦᑐᒃᑯᒥᓄᑦ ᐊᑖᑕᑦᑎᐊᒃᑯᒥᓄᑦ ᐃᒡᓗᒃᑐᑦ ᖃᑕᙳᑎᒌᓄᑦ. ᐃᓕᓐᓂᐊᖅᑎᑕᐅᖃᑦᑕᓚᐅᖅᑐᖅ ᑕᒪᒃᑮᓐᓂᒃ ᐃᓚᒌᓂᒃ ᐅᖃᐅᓯᕐᒥᓂᒃ ᐅᖃᕈᓐᓇᑦᑎᐊᖅᑐᑎᒃ ᐊᒻᒪᓗ ᐅᖃᓪᓚᐃᓐᓇᖃᑦᑕᖅᑐᑎᒃ. ᑐᑭᓯᐅᒪᓂᖃᑦᑎᐊᓚᐅᖅᑐᖅ ᐃᓕᖅᑯᓯᕆᔭᐅᔪᓂᒃ ᐊᒻᒪ ᐃᓕᓴᐃᔾᔪᑕᐅᕙᒃᑐᓂᒃ ᐱᕈᖅᓴᓪᓗᓂ. ᐊᖓᔪᖅᑳᖏᒃ ᐃᒥᐊᓗᖃᑦᑕᖁᔨᙱᖦᖢᑎᒃ ᐋᖓᔮᕐᓇᖅᑐᓂᒡᓗ ᓄᓇᓕᖕᒥ ᐊᐅᓪᓚᕈᔾᔭᐅᕙᒃᖢᓂᓗ ᐊᕐᕌᒍ ᐊᓂᒍᕌᖓᑦ. ᐊᔭᐅᕆᓚᐅᖅᐳᑦ ᕿᑐᕐᖓᒥᓂᑦ ᐅᑎᖁᔨᓪᓗᑎᒃ ᐃᓕᖅᑯᓯᕐᒥᓄᑦ ᓄᓇᒧᓪᓗ ᑲᑎᙵᐃᓐᓇᖁᓪᓗᒋᑦ ᐊᖏᕐᕋᖏᓐᓄᑦ ᐊᓯᖏᓐᓂ ᐱᐅᙱᑦᑐᓂᑦ ᓂᕈᐊᙱᖔᕐᓗᑎᒃ.

ᐃᓕᓐᓂᐊᖅᑕᒥᓂᒃ ᐊᓂᒍᐃᓚᐅᖅᐳᖅ ᐊᒻᒪ ᐅᑭᐅᓂᒃ ᑎᓴᒪᓂᒃ ᐊᒃᓱᕈᕐᓇᖅᑐᓂᒃ ᐃᓱᒪᓕᐅᕈᑎᖃᓚᐅᖅᐳᖅ. ᐱᓇᔪᓕᓚᐅᖅᐳᖅ ᑲᓇᑕᒥ ᓄᓇᕐᔪᐊᓕᒫᒥ ᒪᒃᑯᒃᑐᓄᑦ ᐊᖏᖅᑕᐅᓪᓗᓂᓗ ᑕᖅᑭᓄᑦ 6-ᓄᑦ ᐱᓕᕆᐊᒃᓴᖏᓐᓄᑦ. ᑳᓴᓐ ᑲᓇᑕᒥ ᓄᓇᕐᔪᐊᓕᒫᒥ ᐱᓕᕆᓕᓚᐅᖅᐳᖅ ᐊᒻᒪ ᑕᖅᑭᓂᒃ ᐱᖓᓱᓂᒃ ᑕᓐᔭᓂᐊᒦᓚᐅᖅᐳᖅ, ᐋᕗᕆᑲᒥ ᐊᒻᒪ ᑕᖅᑭᓂᒃ ᐱᖓᓱᓂᒃ ᐲᑕᐳᕉ, ᐋᓐᑎᐅᕆᐅᒥ. ᑕᒪᓐᓇ ᐊᑐᓚᐅᖅᑕᖓ ᐊᓯᔾᔨᖅᓯᓚᐅᖅᐳᖅ ᐃᓱᒪᒋᔭᒥᓂᒃ ᖁᔭᓕᓂᖃᓕᖅᖢᓂ ᐊᕙᑎᒋᔭᒥᓄᑦ, ᓄᓇᒋᔭᒥᓄᑦ, ᐅᑭᐅᖅᑕᖅᑐᒧᑦ ᑭᓱᓕᒫᓄᓪᓗ ᑭᖑᓂᑦᑎᓐᓂ ᐊᑐᖅᐸᓚᐅᖅᑕᖏᓐᓄᑦ. ᒪᑐᐃᕈᑎᒋᓚᐅᖅᐸᐅᒃ ᐃᓕᓐᓂᐊᕈᓐᓇᓕᖅᖢᓂ ᐊᕙᑎᓕᕆᓂᕐᒥᒃ ᐊᒻᒪ ᐃᖅᑲᓇᐃᔭᖅᖢᓂ ᒥᕐᙳᐃᖅᓯᕐᕕᓕᕆᔨᒃᑯᓐᓄᑦ ᑲᓇᑕᒥ ᐃᑦᑕᕐᓂᓴᕐᓂᒃ ᐅᓂᒃᑳᖅᑎᐅᓪᓗᓂ.

ᖁᕕᐊᒋᑦᑎᐊᓚᐅᖅᑕᖓ ᐱᓕᕆᓂᕆᓚᐅᖅᑕᖓ ᐃᖅᑲᓇᐃᔭᓕᖅᖢᓂᓗ ᓴᓇᕝᕕᖕᒥ ᐳᓚᕋᖅᑐᓕᕆᓂᕐᒧᑦ ᐱᕈᖅᓰᕕᖕᓄᑦ ᐃᑲᔪᖅᑎᐅᓪᓗᓂ. ᑲᓵᓐ ᐊᐅᓪᓚᖃᑦᑕᓚᐅᖅᐳᖅ ᓄᓇᓕᕋᓛᖑᓂᖅᓴᓄᑦ ᐱᕈᖅᓰᕕᖕᒥ ᐱᕈᖅᓰᓂᕐᒧᑦ ᐱᓕᕆᐊᒃᓴᒥ ᓄᑕᖅᑲᓄᑦ. ᐱᕕᒃᓴᖃᖅᑎᑕᐅᓂᖓ ᐱᔪᒃᓯᓕᓚᐅᖅᐳᖅ ᐱᔭᕇᖅᓯᔪᒪᓪᓗᓂ ᓯᕗᓪᓕᖅᐹᖓᓂ ᐊᕐᕌᒍᖓᓂ ᐃᓕᓐᓂᐊᖅᑕᒥᓂᒃ ᐱᒋᐊᖅᖢᓂᓗ ᐊᐃᑉᐸᖓᓂ ᐊᕐᕌᒍᖓᓂ ᑭᓯᐊᓂ ᐱᔭᕇᓚᐅᙱᓚᖅ ᐱᔾᔪᑎᖃᖅᖢᓂ ᓇᖕᒥᓂᖅ ᐃᓅᓯᕆᔭᒥᓂ.

ᐊᕐᕌᒍ ᐊᓂᒍᖅᑎᓪᓗᒍ, ᓵᓴᓐ ᓯᖓᐃᓕᓚᐅᖅᐳᖅ ᐸᓂᖕᒥᓂᒃ ᐊᒻᒪ ᒪᕐᕉᒃ ᐊᕐᕌᒎᒃ ᐊᓂᒍᖅᓯᒪᓕᖅᑎᓪᓗᒋᑦ, ᐊᖏᕐᕋᖅᓯᒪᐃᓐᓇᖅᖢᓂ ᐊᓈᓇᐅᓪᓗᓂ, ᐃᓱᒪᓕᓚᐅᖅᐳᖅ ᖃᓄᐃᓕᐅᕆᐊᖃᕐᒪᖔᕐᒥᓂᒃ. ᐃᓕᓐᓂᐊᕐᕕᖕᒧᑦ ᐅᑎᕋᒥ ᐊᒻᒪ ᑕᖅᑭᑦ ᐱᖓᓱᑦ ᐱᔭᕇᓚᐅᙱᑎᓪᓗᒍ ᐃᓕᓐᓂᐊᖅᑕᒥᓂᒃ ᖃᐅᔨᓕᓚᐅᖅᐳᖅ ᐊᓂᖓ ᐃᓅᔪᓐᓃᓚᐅᕐᓂᖓᓂᒃ. ᓵᙵᔭᖃᖅᖢᓂ ᐋᖓᔮᕐᓇᖅᑐᓄᑦ, ᐃᒥᐊᓗᖕᒧᑦ ᒪᒥᓴᕐᓂᕐᒧᓪᓘᓐᓃᑦ, ᒪᒥᓴᕈᒪᓕᓚᐅᖅᐳᖅ ᐃᓱᓕᑦᑎᓪᓗᓂᓗ ᐱᓕᕆᐊᒥᓂᒃ, ᐃᖅᑲᐅᒪᓪᓗᓂᐅᒃ.

ᑲᓵᓐ ᖃᐅᔨᓴᖅᐸᓪᓕᐊᓂᕐᒧᑦ ᐊᐅᓚᑦᑎᔨᙳᓚᐅᖅᐳᖅ ᓄᓇᓕᖓᓄᑦ, ᐊᑎᓕᐅᖅᖢᓂ ᑳᓐᑐᓛᒋᔭᐅᔪᒥᒃ. ᑕᖅᑭᑦ ᐊᓂᒍᖅᑎᓪᓗᒋᑦ, ᖃᐅᔨᓕᓚᐅᖅᐳᖅ ᓯᖓᐃᓕᕐᓂᕐᒥᓂᒃ ᐃᕐᓂᖅᑖᖅᖢᓂᓗ ᐅᐱᕐᙶᖑᒃᑲᓐᓂᖅᑎᓪᓗᒍ. ᐱᓇᓱᐊᕈᓰᑦ ᐊᓂᒍᖅᑎᓪᓗᒋᑦ ᐃᖅᑲᓇᐃᔮᒥᓄᑦ ᐅᑎᓚᐅᖅᑎᓪᓗᒍ, ᖃᐅᔨᓕᓚᐅᖅᐳᖅ ᐸᓂᖓ ᐋᓐᓂᖅᓯᖅᑕᐅᓚᐅᕐᓂᖓᓂᒃ ᐃᓕᓴᐃᔨᒧᑦ. ᓄᖅᑲᓕᓚᐅᖅᐳᖅ ᕿᑐᕐᙵᒥᓂᒃ ᐃᓚᒥᓂᒡᓗ ᑲᒪᒋᔭᖃᕈᒪᓪᓗᓂ. ᑲᔪᖏᖅᓴᖅᑕᐅᓚᐅᖅᐳᖅ ᐃᓕᓴᐃᔨᐅᓂᕐᒧᑦ ᐱᓕᒻᒪᒃᓴᕐᓂᕐᒧᑦ ᓄᓇᖃᖅᑳᖅᑐᑦ ᐱᙳᐊᖅᑐᓕᕆᔨᖏᓐᓄᑦ, Bush Kids ᐊᒻᒪ ᓂᕿᓄᑦ ᐊᑦᑕᓇᔾᔭᐃᖅᓯᒪᓂᕐᒧᑦ ᐱᓕᒻᒪᒃᓴᕐᓂᕐᒧᑦ. "ᑕᒪᒃᑯᐊᓕᒫᑦ ᐅᕙᓐᓂᒃ ᐱᔪᒃᓯᑎᑦᑎᓯᒪᕗᑦ, ᐃᓕᓐᓂᐊᕐᓂᓕᒫᓐᓂ, ᑭᓯᐊᓂ ᑲᑎᙵᓂᖃᖅᑐᐃᓐᓇᐅᕗᑦ ᐊᒻᒪ ᐊᒃᑐᐊᓂᖃᖅᖢᑎᒃ ᐅᕙᓐᓄᑦ ᑭᓇᐅᓂᓐᓂᒃ ᐊᒻᒪ ᐅᓪᓗᒥ ᓇᓃᓕᕐᒪᖔᕐᒪ," ᐅᖃᖅᑐᖅ.

ᕿᑐᙵᖏᑦ ᐱᔪᒃᓯᑎᑦᑎᓪᓗᐊᑕᖅᐸᒃᐳᑦ ᐃᖅᑲᓇᐃᔮᒥᓄᑦ. "ᑭᓱᓕᒫᑦᑎᐊᑦ ᐱᓕᕆᐊᕆᓯᒪᔭᒃᑲ, ᐅᕙᓐᓂᒃ ᐱᕈᖅᑎᑦᑎᓯᒪᕗᖅ ᑭᓇᐅᓂᓐᓂᒃ ᐅᓪᓗᒥ, ᑭᓯᐊᓂᓗᑦᑕᐅᖅ ᐅᕙᓐᓂᒃ ᑲᔪᖏᖅᓴᐃᓪᓗᓂ ᐃᓚᐅᔪᒪᓂᕐᒥᒃ ᒪᒃᑯᒃᑐᖁᑎᑦᑎᓐᓄᑦ, ᑕᒪᒃᑯᐊ ᑲᑎᙵᓂᐅᔪᑦ ᑲᑎᙵᑎᑦᑐᒪᓪᓗᒋᑦ ᐊᒻᒪᓗ ᑲᑎᙵᑎᑦᑐᒪᓪᓗᒋᑦ ᖃᐅᔨᒪᓂᐅᔪᑦ ᖃᓪᓗᓈᑦ ᐊᒻᒪᓗ ᐃᓕᖅᑯᓯᑐᖃᒃᑯᑦ ᖃᐅᔨᒪᓂᐅᔪᑦ ᐊᑕᐅᑦᑎᒃᑯᑦ, ᐱᑕᖃᙱᓐᓂᐅᔪᑦ ᐃᓗᓪᓕᖅᓱᕐᓗᒋᑦ ᐃᓐᓇᖁᑎᕗᑦ ᐊᒻᒪᓗ ᒪᒃᑯᒃᑐᖁᑎᕗᑦ, ᑕᒪᔾᔭ ᑐᕌᒐᕆᔭᕋ, ᑕᐃᒪᐃᓐᓂᖓᓄᓪᓗ, ᕿᑐᕐᖓᒃᑲ ᖃᐅᑕᒫᑦ ᑕᑯᔭᕌᖓᒃᑭᑦ, ᑲᔪᖏᖅᓴᐅᑎᒋᕙᒃᑕᒃᑲ ᖃᐅᑕᒫᑦ ᒪᑭᑉᐸᒃᖢᖓ ᖃᐅᔨᒪᑦᑎᐊᕈᒪᓂᕐᒧᑦ ᐃᓕᓐᓂᐊᖅᓯᒪᑦᑎᐊᕋᓗᐊᕐᒪᖔᑕ, ᐊᑐᖅᐸᒃᑕᖏᓐᓂᒃ ᐋᖅᑭᒃᓯᒪᔪᓂᒃ, ᐊᒻᒪᓗ ᐃᓕᑦᑎᕙᓪᓕᐊᔪᒪᓪᓗᑎᒃ ᐃᓕᖅᑯᓯᕐᒥᓂᒃ ᐊᑐᖅᓯᒪᔭᖏᓐᓂᒃ," ᑲᓵᓐ ᐅᖃᓚᐅᖅᐳᖅ.

ᐅᖃᐅᔾᔨᒋᐊᕈᑎᒋᔭᖓ ᑭᓇᑐᐃᓐᓇᕐᒧᑦ ᐃᓱᒪᔪᒧᑦ ᑖᔅᓱᒥᖓᔅᓴᐃᓐᓇᖅ ᐊᖅᑯᑎᖃᕈᒪᓂᕐᒧᑦ ᐃᒪᓐᓇᐅᕗᖅ, "ᐃᓕᖅᑯᓯᕆᔭᐃᑦ ᓵᖏᓐᓇᐅᔭᕐᓗᒍ. ᓄᓇᒧᑦ ᓵᖏᓐᓇᐅᔭᖅᐸᒡᓗᑎᑦ ᐱᔭᕆᐊᖃᓕᕌᖓᕕᑦ. ᐱᕈᖅᓴᔭᐅᖏᓐᓇᐅᔭᓚᐅᖅᐳᖓ ᑭᓱᑐᐃᓐᓇᐃᑦ ᐊᔪᕐᓇᖅᓯᒑᖓᑕ, ᓴᖑᑎᙱᖔᕐᓗᒍ ᖃᓄᖅ ᓄᓇᑐᖃᕆᙱᑕᒥᓄᑦ ᐃᓕᑦᑎᓯᒪᖕᒪᖔᑦᑕ... ᐱᐅᓂᖅᐹᖅ ᐅᖃᐅᔾᔨᒋᐊᕈᑎᒋᔪᓐᓇᖅᑕᕋ ᑲᒪᒋᓗᒍ, ᒪᒥᓴᕐᓗᒍ, ᓄᓇᒧᑦ ᐅᑎᕐᓗᑕ. ᖃᖓᑐᐃᓐᓇᒃᑯᑦ ᐃᓕᖕᓂᒃ ᐊᒃᑐᐊᓂᖃᖅᑰᔨᔪᓐᓃᕈᕕᑦ, ᓇᓂᓯᖏᓐᓇᐅᔭᖅᐸᒡᓗᑎᑦ ᑕᒪᒃᑯᓂᖓ ᑲᔪᖏᖅᓴᐃᔨᓂᒃ ᐱᔪᒃᓯᑎᑦᑎᕙᒃᑐᓂᒡᓘᓐᓃᑦ, ᐊᒃᑐᐊᓂᓕᖕᓂᒃ ᑕᒪᓐᓇᓗ ᐃᓕᖕᓂᒃ ᐅᑎᖅᑎᑦᑎᓇᔭᖅᖢᓂ ᐊᖅᑯᑎᒋᔭᕐᓄᑦ ᐃᓕᖕᓄᑦ."

ᑲᓵᓐ ᐅᖃᐅᔾᔨᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᓐᓇᐅᓇᔭᖅᐳᖅ, "ᐃᓅᓯᖅ ᐊᑐᕐᓗᒍ. ᑎᒥᖕᓂᑦ ᐲᕐᓗᒍ. ᐃᓅᓯᓪᓚᑦᑖᖅ.... ᑕᒪᕐᒥᑦᑎᐊᖅ ᐱᓕᕆᐊᕆᓗᒋᑦ, ᐊᔪᙱᒃᑯᕕᑦ. ᐊᑐᑐᐃᓐᓇᕐᓗᒍ. ᐃᓕᖕᓂᒃ ᓄᖅᑲᖓᑎᑦᑕᐃᓕᒋᑦ. ᑲᑉᐱᐊᓱᙱᓪᓗᑎᑦ. ᐃᓅᓯᖃᕐᓂᐊᕋᕕᑦ ᑭᓯᐊᓂ, ᖃᐅᔨᓗᑎᑦ ᐃᓅᓯᕐᒥᒃ, ᐊᒻᒪᓗ ᑐᑭᓯᓗᒍ ᓄᓇᕐᔪᐊᖅ ᐊᒻᒪᓗ ᖃᓄᖅ ᐊᐅᓚᓂᖃᓲᖑᒻᒪᖔᖅ ᐊᓂᒍᕕᑦ ᕗᐊᑦ ᓯᒻᑉᓴᓐᒥᒃ ᐊᒻᒪᓗ ᓱᓕᔪᒥᒃ, ᑕᑯᓪᓚᕆᓕᕐᓗᑎᑦ ᑭᓱᑕᖃᕐᒪᖔᖅ ᑕᖅᑳᓂ. … ᐃᓅᑐᐃᓐᓇᕐᓗᑎᑦ ᐊᐅᓪᓚᖃᑦᑕᕐᓗᑎᓪᓗ ᐃᓅᓯᕐᒥᒃ ᐊᑐᕐᓗᑎᑦ, ᐃᖅᑲᓇᐃᔭᕐᓗᑎᑦ, ᑮᓇᐅᔭᓂᒃ ᐊᑐᓗᐊᙱᓐᓂᖅᓴᐅᓗᑎᑦ, ᐃᓕᖕᓂᒃ ᓄᖅᑲᖓᑎᑦᑕᐃᓕᒋᑦ. ᑕᒪᓐᓇ ᐱᐅᓛᖑᕗᖅ ᐅᖃᐅᔾᔨᒋᐊᕈᑎᒋᔪᓐᓇᖅᑕᕋ ᓇᓕᐊᖕᓄᑐᐃᓐᓇᖅ ᖁᑦᑎᖕᓂᖅᓴᒥ ᐃᓕᓐᓂᐊᖅᑎᒧᑦ."

ᐃᓱᒪᒥᒍᑦ ᖃᓄᐃᙱᑦᑎᐊᕈᒪᓪᓗᓂ ᖃᓄᐃᙱᑦᑎᐊᕈᒪᓪᓗᓂᓗ, ᑲᓵᓐ ᓄᓇᒧᑦ ᐊᐅᓪᓚᖃᑦᑕᖅᐳᖅ, ᐱᓱᔪᒃᐸᒃᖢᓂ, ᕿᒻᒥᓂᒃ ᐊᐅᓪᓚᕈᔾᔨᕙᒃᖢᓂ, ᐅᖃᓕᒫᖅᐸᒃᖢᓂ ᓴᓗᒻᒪᖅᓴᐃᕐᔪᐊᖅᐸᒃᖢᓂᓗ. ᑲᑎᙵᖃᑎᖃᐃᓐᓇᕐᓂᖅ ᐃᓕᖅᑯᓯᕐᒥᓄᑦ ᐊᖓᔪᖅᑳᒥᑎᒍᑦ ᐃᑲᔪᕐᒥᔪᖅᑕᐅᖅ. ᖃᐅᑕᒫᑦ 30 ᒥᓂᑦᓯᓂᒃ ᐃᒻᒥᓄᑦ ᐱᓕᕆᕙᒃᐳᖅ, ᐃᑲᕐᕋᐅᑉ ᓇᑉᐸᖓᓂ ᐅᖃᓕᒫᖅᐸᒃᖢᓂ, ᐱᓱᒃᐸᒃᖢᓂ, ᐅᕝᕙᓘᓐᓃᑦ ᐱᓕᕆᕙᒃᖢᓂ.

ᐱᔪᒪᓂᖃᓕᕌᖓᒥ, ᑳᓴᓐ ᓄᑕᖅᑲᓂᒃ ᑕᐅᑐᒃᐸᒃᐳᖅ. ᑲᔪᖏᖅᓴᐃᕙᒃᐳᑦ ᐱᓕᕆᑦᑎᐊᒃᑲᓐᓂᕐᓂᕐᒥᒃ, ᐱᐅᓂᖅᓴᓂᒃ ᓂᕈᐊᕈᓐᓇᕐᓂᕐᒥᒃ, ᐃᓚᐅᓂᖅᓴᐅᕙᖕᓂᕐᒥᒃ, ᐃᓕᓴᐃᒃᑲᓐᓂᕐᓂᕐᒥᒃ ᒪᒃᑯᒃᑐᓄᑦ ᐱᓕᕆᐊᒃᓴᓂᒃ ᑲᑎᙵᓂᖅᓴᐅᑎᖦᖢᒋᓪᓗ. ᑕᑯᓪᓗᓂ ᐱᔪᒪᓂᖃᑦᑎᐊᖅᑐᓂ ᐃᓚᐅᖃᑕᐅᔪᓂ ᐱᙳᐊᕐᓂᐅᔪᒥ ᐱᔪᒃᓯᑎᑦᑎᒃᑲᓐᓂᖅᐳᖅ. "ᑕᑯᓪᓗᒋᑦ ᑕᐃᒪᐃᑦᑐᑦ, ᐊᒻᒪ ᑲᔪᖏᖅᓴᐃᔪᓐᓇᕈᒪ ᐅᕝᕙᓘᓐᓃᑦ ᐊᔭᐅᖅᑐᕈᓐᓇᕈᒃᑭᑦ, ᑕᒪᓐᓇ ᑐᕌᒐᑦᑎᐊᕙᐅᕗᖅ ᖃᐅᔨᒪᓪᓗᖓᓗ ᐃᓅᓯᕋ ᓈᒻᒪᒃᓯᑎᑦᑎᐊᓚᐅᕋᒃᑯ," ᐅᖃᖅᑐᖅ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᑲᓵᓐ ᖁᔭᓕᓚᐅᖅᐳᖅ ᓯᕗᓕᕆᓚᐅᖅᑕᒥᓂᒃ ᐅᖃᖅᖢᓂᓗ, "ᐅᓪᓗᑦᑎᐊᕚᓗᒃ ᐃᖅᑯᒻᒪᖅᖢᓂ ᐅᔾᔨᕈᓱᓕᖅᖢᖓᓗ ᐃᓅᓯᖃᒃᑲᓐᓂᓕᕐᓂᕐᓂᒃ. ᑕᒪᓐᓇ ᐃᓅᓯᖅ ᐱᐅᔪᒻᒪᕆᐅᕗᖅ, ᖃᐅᑕᒫᑦ ᐃᖅᑯᒻᒪᖃᑦᑕᖅᖢᓂ ᐅᔾᔨᕈᓱᒃᖢᓂᓗ ᐃᑉᐸᒃᓴᖅ ᐃᑉᐸᒃᓴᐅᓚᐅᕐᓂᖓᓂᒃ, ᑭᓯᐊᓂ ᖃᐅᒃᐸᑦ ᐃᓱᒪᒋᔭᐃᑦ ᐊᓯᔾᔨᕈᓐᓇᖅᑕᐃᑦ ᓯᕗᒻᒧᐊᒍᓐᓇᖅᐳᑎᓪᓗ, ᓴᖅᑭᑦᑎᔪᓐᓇᖅᐳᑎᓪᓗ ᐱᐅᓂᖅᓴᓂᒃ ᐱᕕᒃᓴᓂᒃ, ᐃᓕᖕᓄᑐᐊᖑᙱᑦᑐᖅ, ᑭᓯᐊᓂ ᓄᓇᖅᑲᑎᒌᓄᑦ. ᑕᐃᒪᓐᓇᑐᐊᖅ ᐱᔪᓐᓇᖅᐳᖓ, ᐊᒻᒪ ᑕᐃᒪᓐᓇᑐᐊᖅ ᖁᕕᐊᒋᓇᔭᖅᑕᕋ, ᐊᒻᒪ ᑕᒪᓐᓇ ᑕᐅᑐᙳᐊᖅᑕᐅᔪᖅ."

ᐱᔪᒃᓯᑎᑕᐅᓪᓗᓂ ᐱᕈᖅᓴᔭᐅᓂᑰᓪᓗᓂ ᐅᑭᐅᖅᑕᖅᑐᒥ, ᓵᓇᓐ ᓴᐃᓴᓐ ᓄᓇᓕᖕᓄᑦ ᐅᑎᖅᑎᑦᑎᕙᒃᐳᖅ ᐱᓕᕆᖃᑎᖃᖅᐸᒃᖢᓂ ᐅᑭᐅᖅᑕᖅᑐᒥ ᒪᒃᑯᒃᑐᓂᒃ. ᐊᓂᖃᕈᓐᓃᓚᐅᖅᑎᓪᓗᒍ ᐸᓂᖓᓗ ᐋᓐᓂᖅᓯᖅᑕᐅᓚᐅᖅᑎᓪᓗᒍ, ᐊᓯᐊᒍᖔᖅ ᓂᕈᐊᕈᓐᓇᓚᐅᖅᐳᖅ, ᑭᓯᐊᓂ ᒪᒥᓴᕈᒪᓕᓚᐅᖅᐳᖅ ᓄᑖᓂᒡᓗ ᓇᓂᓯᔪᒪᓪᓗᓂ ᐃᓚᒋᔭᐅᔪᒪᓪᓗᓂ ᓄᓇᓕᒋᔭᒥᓄᑦ. ᓴᖅᑭᑎᑦᑎᕙᒃᖢᓂ ᓄᑖᓂᒃ ᐱᕕᒃᓴᓂᒃ ᐊᒥᖅᑳᖃᑎᖃᖅᐸᒃᖢᓂᓗ ᓄᑖᓂᒃ ᐊᔪᕈᓐᓃᖅᑕᐅᕙᒃᑐᓂᒃ, ᐃᑲᔪᖅᐸᒃᐳᖅ ᒪᒃᑯᒃᑐᓂᒃ ᓲᕐᓗ ᕿᑐᕐᙵᒥᓂᒃ ᑲᔪᓯᓂᖃᑦᑎᐊᖁᓪᓗᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.