"ᐃᓱᒪᕗᖓ ᐃᓕᑦᑎᕙᓪᓕᐊᖏᓐᓇᕐᓂᐊᕋᓱᒋᓪᓗᖓ ᐃᓅᓯᓕᒫᓐᓂ, ᑕᒪᓐᓇᓗ ᖁᕕᐊᒋᑦᑎᐊᖅᐸᒃᖢᒍ," ᐅᖃᓚᐅᖅᐳᖅ ᓴᐃᓚ ᓴᓕᕘᒃ. ᐱᕈᖅᓴᓚᐅᖅᑐᖅ ᐃᐊᑦᒪᓐᑕᓐᒥ ᓅᓚᐅᖅᓯᒪᓪᓗᓂᓗ ᕗᕋᐃᓱ ᕚᓕᒧᑦ, ᐳᕆᑎᔅ ᑲᓚᒻᐱᐊᒧᑦ ᐃᓕᓐᓂᐊᒃᑲᓐᓂᕆᐊᖅᑐᖅᖢᓂ. ᐃᐊᑦᒪᓐᑕᓐᒥᐅᑕᐅᑎᓪᓗᒍ ᐃᒡᓗᒥᐅᑕᓂᒃ ᓅᑎᕆᓚᐅᖅᐳᖅ ᐊᒻᒪ ᓂᕿᑖᕐᕕᖕᒥ ᐃᖅᑲᓇᐃᔭᖅᖢᓂ, ᐊᖅᑯᑎᒃᓴᒥᓂᒃ ᓇᓂᓯᓇᓱᒃᖢᓂ. ᐃᑭᐊᕐᒥᓕᖅᓱᐃᓂᕐᒧᑦ ᐱᕙᒌᔭᖅᓯᒪᓂᕐᒧᑦ ᐃᓕᓐᓂᐊᖃᑕᐅᓚᐅᖅᐳᖅ ᐅᑯᓄᖓ, Women Building Futures−ᑯᓐᓂ ᐃᖅᑲᓇᐃᔭᓚᐅᖅᓯᒪᓪᓗᓂᓗ ᑮᓇᐅᔭᓕᐅᕋᓱᒡᕕᖕᓂ ᐊᒻᒪ ᓴᓇᕝᕕᖕᓂ ᐃᒡᓗᕐᔪᐊᓂ. ᐃᖅᑲᓇᐃᔭᓚᐅᖅᓯᒪᕗᖅ ᕋᑦᕚᑐ ᓴᓗᒻᒪᖅᓴᐃᕝᕕᖕᒥ ᐊᒻᒪ ᖃᐅᔨᔪᓐᓇᖅᓯᓚᐅᖅᐳᖅ ᖃᓄᑎᒋ ᐃᓄᐃᑦ ᐱᐊᓂᒃᓯᔪᓐᓇᕐᒪᖔᑕ ᐱᓕᕆᖃᑎᒌᒃᑳᖓᒥᒃ. ᑭᖑᓂᐊᒍᑦ, ᐃᖅᑲᓇᐃᔭᕈᓐᓃᖅᑎᑕᐅᓚᐅᖅᐳᖅ ᐊᒻᒪ ᓱᐴᖅᑐᒐᓕᐅᕐᕕᖕᒧᐊᕈᒪᓕᖅᖢᓂ.

ᑖᓐᓇ ᑐᕌᒐᕆᔪᒪᔭᖓ ᐱᓇᓱᐊᕈᒪᓪᓗᒍ, Kwantlen Polytechnic ᓯᓚᑦᑐᖅᓴᕐᕕᒡᔪᐊᕐᒧᐊᓚᐅᖅᐳᖅ ᐱᕈᖅᓯᐊᓕᕆᓂᕐᒥᒃ UBC−ᑯᓐᓄᑦ ᐱᕈᖅᓯᐊᓕᕆᔭᖅᑐᕈᓐᓇᓚᐅᙱᓐᓂᕐᒥᓄᑦ. ᐃᖅᑲᓇᐃᔭᓕᓚᐅᖅᓯᒪᔪᖅ ᐱᕈᖅᓰᕕᖕᒥ ᐃᓕᓐᓂᐊᕐᕕᖕᒥ ᐊᑭᑭᓐᓂᖅᐹᒥᒃ ᐊᑭᓕᖅᓱᖅᑕᐅᓪᓗᓂ ᐊᑖᑕᖓᑕ ᐃᑲᔪᖅᖢᓂᐅᒃ ᐃᒡᓗᒧᑦ ᐊᑐᖅᑐᐊᖅᑕᒥᓄᑦ. ᐱᓇᔪᓚᐅᕐᑐᖅ ᐃᓕᓐᓂᐊᕆᐊᒃᑲᓐᓂᕈᑎᒃᓴᓕᒫᓂᒃ KPU−ᑯᓐᓂ ᑭᓯᐊᓂ ᑭᖑᒧᑦ ᑕᑯᓪᓗᓂ ᐱᓇᓱᒍᒪᓚᐅᕐᑐᖅ ᓯᓚᑖᓂ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᒃ ᓲᕐᓗ ᐃᓐᔅᐱᕆᒥ. ᑲᔪᓯᔪᒪᓕᓚᐅᖅᐳᖅ ᐱᔭᕇᕈᓯᐊᖅᑖᕈᒪᓪᓗᓂᓗ, ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐱᕈᖅᓯᐊᓂᒃ ᖃᐅᔨᓴᖅᑐᓕᕆᓂᕐᒥᒃ ᐱᓪᓗᐊᑕᖃᖅᖢᓂ ᐱᕈᖅᑐᓂᒃ ᖃᓄᐃᙱᑦᑎᐊᕈᓐᓇᕐᓂᕐᒥᒃ.

ᖃᐅᔨᓕᓚᐅᖅᐳᖅ ᓱᐴᖅᑐᒐᕐᒥ ᐃᖅᑲᓇᐃᔭᕈᒪᔪᓐᓃᕐᓂᕐᒥᓂᒃ, ᓴᓗᒪᙱᑦᑐᒥ ᐊᕙᑎᒥ, ᐅᖅᑰᓂᖓᓂ ᐱᕈᖅᓰᕕᖕᒥ ᐊᒻᒪ ᐊᑕᐅᓯᕐᒥ ᐱᕈᖅᓯᐊᖃᕐᓂᕐᒥᒃ. ᐊᒥᓱᓂᒃ ᐱᕈᖅᓯᐊᓂᒃ ᐱᕈᖅᓯᐊᖃᕈᒪᓚᐅᖅᐳᖅ. ᑭᖑᓪᓕᖅᐹᒥᒃ ᐃᓕᓐᓂᐊᖅᑕᒥᓂᒃ, ᖃᐅᔨᓴᕆᐊᖃᓚᐅᖅᐳᖅ ᐊᒻᒪ ᐊᑕᐅᓯᖅ ᓇᓖᕌᒐᒃᓴᖅ ᖃᐅᔨᓴᕐᓗᓂ ᓄᓇᖃᖅᑳᖅᑐᓂᒃ ᐱᕈᖅᑐᓂᒃ ᓄᓇᓕᖓᓂ. ᐃᓱᒪᒋᓪᓗᒍ ᑲᑎᙵᓂᖃᓕᕋᒥ ᓄᓇᓕᖓᓄᑦ ᖃᓂᒋᔭᖓᓂ ᓕᓘᑦ, ᐳᕆᑎᔅ ᑲᓚᒻᐱᐊ, ᑕᐃᒪᓐᓇ ᓂᕈᐊᓚᐅᖅᐳᖅ. ᐃᓕᓐᓂᐊᕇᕋᒥ, ᐃᖅᑲᓇᐃᔮᖅᑖᓚᐅᖅᐳᖅ ᓄᓇᖃᖅᑳᖅᑐᑦ ᐱᕈᖅᓯᐊᖃᕐᕕᖓᓂ, ᓯᒡᔭᖅᐸᓯᖕᒥ ᓴᓕᔅ ᐱᕈᖅᓯᐊᖃᕐᕕᖓᓂ. ᑕᐃᑲᓂ ᐃᖅᑲᓇᐃᔭᓚᐅᖅᓯᒪᕗᖅ ᐊᕐᕌᒍᓕᒫᒥ ᒫᓐᓇᓗ ᐅᖃᖃᑎᖃᖅᐸᒃᖢᓂ ᐃᓕᓐᓂᐊᖅᑎᑦᑎᕙᒃᖢᓂᓗ ᓄᓇᖃᖅᑳᖅᑐᑦ ᐱᕈᖅᓯᐊᖏᓐᓂᒃ.

ᖃᐅᑕᒫᑦ, ᓴᓕᕘᒃᔅ ᑲᑎᖃᑎᖃᖃᑦᑕᖅᐳᖅ ᓄᓇᒥᒃ ᑎᑎᕋᐅᔭᖅᑎᓂᒃ ᐱᓕᕆᔾᔪᔾᔭᐅᕙᒃᑐᓂᒃ, ᑲᑎᖅᓱᐃᕙᒃᖢᓂ ᑎᑎᕋᖅᓯᒪᔪᓂᒃ ᐱᕈᖅᓯᐊᓂᒃ ᖃᓄᐃᓕᐅᖁᔭᐅᔪᓂᒃ, ᑭᒃᑯᑐᐃᓐᓇᓄᑦ ᑐᓴᐅᒪᑎᑦᑎᕙᒃᖢᓂ ᐅᖃᐅᓯᕐᒥᓂᒡᓗ ᐃᓕᓐᓂᐊᖃᑕᐅᕙᒃᖢᓂ. ᐱᓕᕆᐊᖃᕐᒥᔪᖅᑕᐅᖅ ᐱᔅᓂᓯᒧᑦ ᐸᕐᓇᐅᑎᖓᓂᒃ ᕿᒥᕐᕈᔪᓐᓇᕐᓂᐊᕐᒪᑦ ᓄᓇᒥᒃ ᐊᑐᖅᑐᐊᒐᒃᓴᒥᒃ ᐅᕘᓇ ᒪᒃᑯᒃᑐᑦ ᐱᕈᖅᓰᔩᑦ ᓄᓇᒥᒃ ᐊᔾᔨᒌᒃᑎᑦᑎᓂᕐᒧᑦ ᐱᓕᕆᐊᒃᑯᑦ.

ᓴᓕᕘᒃᔅ ᐊᑯᓂᐊᓗᒃ ᓇᖕᒥᓂᖅᓱᕈᒪᓯᒪᕗᖅ ᖁᕕᐊᒋᔭᖃᙱᖦᖢᓂᓗ ᐊᓯᖏᓐᓂᒃ ᑲᒻᐸᓂᒋᔭᐅᔪᓂᒃ ᐃᖅᑲᓇᐃᔭᕆᐊᒃᓴᖅ. ᐊᑖᑕᒥᓄᑦ ᐃᖅᑲᓇᐃᔭᓚᐅᖅᓯᒪᕗᖅ ᑳᓐᑐᓛᖃᖅᑎᐅᓪᓗᓂ ᐊᒃᑲᖓᓗ ᓇᖕᒥᓂᖅ ᓇᖕᒥᓂᖃᖅᖢᓂ ᓄᒃᑎᖅᑎᕆᔨᓂᒃ ᐊᐅᓪᓚᖅᑎᑦᑎᕙᒃᖢᓂ ᓴᓂᑦᑎᐊᖓᓃᖦᖢᓂᓗ. ᐃᖅᑲᓇᐃᔭᖅᓯᒪᓪᓗᓂ ᐱᖓᓱᓂ ᐸᐃᕆᕝᕕᖕᓂ ᖃᐅᔨᒪᓪᓗᓂᓗ ᐊᐅᓚᓂᕆᔭᖏᓐᓂᒃ ᐃᓕᓐᓂᐊᖅᓯᒪᓪᓗᓂᓗ, ᖃᐅᔨᓕᓚᐅᖅᐳᖅ ᐊᔪᙱᓐᓂᕐᒥᓂᒃ, ᖃᐅᔨᔭᕆᐊᖃᑐᐃᓐᓇᓚᐅᖅᐳᖅ ᖃᓄᖅ ᑕᐃᑯᙵᕈᓐᓇᕆᐊᒃᓴᖅ. ᐃᓚᐅᓚᐅᕐᒥᔪᖅ ᓄᓇᖃᖅᑳᖅᑐᓄᑦ ᐊᐅᓚᑦᑎᔨᐅᓂᕐᒧᑦ ᐃᓕᓐᓂᐊᒐᒃᓴᒥ ᐅᑯᑎᒎᓇᖅ, Chinook ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᓂᓕᕆᔨᒃᑯᖏᓐᓂ ᐱᓕᕆᖃᑎᖃᖅᖢᓂ ᓴᐅᑐ ᐃᓕᓐᓂᐊᕐᕕᖓᓂ ᓇᖕᒥᓂᖃᕐᓂᕐᒧᑦ UBC−ᒥ. ᐃᓕᑦᑎᕙᓪᓕᐊᕗᖅ ᑭᒃᑯᑐᐃᓐᓇᓄᑦ ᐅᖃᓪᓚᒍᓐᓇᕐᓂᕐᒥᒃ ᐊᒻᒪ ᑮᓇᐅᔭᓕᕆᓂᕐᒥᒃ ᑭᓯᐊᓂ ᐱᕕᒃᓴᖃᓚᐅᖅᐳᖅ ᓇᖕᒥᓂᕆᔭᒥᓂᒃ ᑐᓂᓯᔪᓐᓇᖅᖢᓂ ᔩᓇ ᔮᒃᓴᓐᒧᑦ Bear's Lair-ᒥᐅᑕᕐᒧᑦ.

ᓇᖕᒥᓂᖅ ᐊᖅᑯᑎᒃᓴᒥᓂᒃ ᓇᓂᓯᓯᒪᓕᖅᖢᓂ, ᓇᖕᒥᓂᖅ ᐃᓂᒃᓴᓕᐅᕈᓐᓇᖅᖢᓂ, ᓇᖕᒥᓂᖅᑖᖅᐸᓪᓕᐊᓪᓗᓂ ᒪᓕᒃᖢᓂ ᐱᒻᒪᕆᐅᒋᔭᖏᓐᓂᒃ ᐊᒻᒪ ᐊᒃᑐᐃᓯᒪᑦᑎᐊᖅᑐᓂᒃ ᑲᔪᖏᖅᓴᐃᕗᖅ ᓴᓕᕘᒃᔅ. ᑲᑎᖃᑎᖃᖅᖢᓂ ᐃᓄᖕᓂ ᓄᓇᓕᖕᓂ, ᐊᓯᖏᓐᓂ ᐱᕈᖅᓯᐊᓕᕆᔨᓂ ᐊᒻᒪ ᐃᓕᑦᑎᕝᕕᒋᓪᓗᓂᒋᑦ ᖁᕕᐊᓱᒍᑎᒋᕙᐅᒃ. ᐃᓕᓐᓂᐊᕐᓂᕐᒥᒃ ᖁᕕᐊᒋᔭᖃᕋᓗᐊᖅᖢᓂ, ᐃᓕᑦᑎᓯᒪᕗᖅ ᐊᓯᖏᓐᓂᑦᑕᐅᖅ ᐃᓕᑦᑎᔪᓐᓇᕐᓂᕐᒥᓂᒃ.

ᐅᖃᐅᔾᔨᒋᐊᕈᑎᒋᔭᖓ ᐊᓯᒥᓄᑦ ᓅᑉᐸᓪᓕᐊᔪᓄᑦ ᐳᕆᑎᔅ ᑲᓚᒻᐱᐊᒧᑦ ᐃᓕᓐᓂᐊᕆᐊᕐᓗᑎᒃ ᑮᓇᐅᔭᓂᒃ ᐊᑐᙱᓐᓂᖅᓴᐅᖁᓪᓗᒋᑦ ᐊᒻᒪ ᐅᔾᔨᖅᓱᑦᑎᐊᕐᓗᑎᒃ ᐃᓕᓐᓂᐊᕆᐊᒃᑲᓐᓂᕈᑎᒃᓴᓂᒃ. ᐃᓱᒪᔪᖅ ᓄᒃᑎᕐᓂᖅ ᐱᐅᓛᖑᓇᓱᒋᓪᓗᓂᐅᒃ ᐃᓱᒪᓕᐅᕈᑎᒋᓚᐅᖅᓯᒪᔭᖓ. "ᐅᓗᕆᐊᓇᕐᔪᐊᓚᐅᖅᐳᖓ ᑕᒪᐅᙵᕆᐊᒃᓴᖅ, ᑭᓯᐊᓂ ᐊᑭᓕᖅᑕᐅᓂᕆᓚᐅᖅᑕᖓ ᑲᒪᓇᒻᒪᕆᓚᐅᖅᐳᖅ," ᐅᖃᓚᐅᖅᐳᖅ. "ᐊᐅᓚᓚᐅᑲᒃᑲᓗᐊᕈᕕᑦ ᐱᐅᒋᙱᓪᓗᒍᓗ, ᐅᑎᕈᓐᓇᖅᐳᑎᑦ, ᑭᓯᐊᓂ ᐊᒃᓱᓪᓘᓐᓃᑦ ᐱᓇᔪᓚᐅᖅᐳᑎᑦ ᐃᓕᑦᑎᓪᓗᓯᓗ, ᑕᒪᓐᓇ ᐊᖅᑯᑎᒋᒐᓗᐊᕈᕕᐅᒃ ᐋᒃᑲᓘᓐᓃᑦ," ᐅᖃᕆᓪᓗᓂ. ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ, ᐃᒪᓐᓇᐅᓇᔭᖅᐳᖅ, "ᐆᒻᒪᑏᑦ ᒪᓕᒃᓗᒍ. ᖃᓄᐃᙱᑦᑐᖅ ᑲᑉᐱᐊᓱᒡᓗᓂ. “

ᓈᒻᒪᒃᓯᑎᑦᑐᒪᓪᓗᒍ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᖓ, ᓴᓕᕘᒃᔅ ᐅᖃᖃᑎᖃᖅᐸᒃᐳᖅ ᓘᒃᑖᒥᓄᑦ ᖃᓄᐃᓐᓂᕆᔭᒥᓂᒃ ᕿᓂᖅᖢᓂᓗ ᐃᓅᓯᓕᕆᔨᒥᒃ ᐃᑲᔪᖅᑕᐅᓂᐊᖅᑐᒥᒃ ᓯᕘᕋᓂᕐᒥᓄᑦ. "ᐃᓱᒪᔪᖓᓕ ᐊᐅᓚᓂᖅ ᐃᓅᓕᓴᐅᑎᐅᖕᒪᑦ, ᐊᒻᒪ ᐊᓃᑲᑕᖕᓂᖅ ᐅᕙᓐᓄᑦ ᐱᐅᔪᒻᒪᕆᐅᓯᒪᕗᖅ," ᐅᖃᖅᑐᖅ. ᓇᐹᖅᑐᓕᖕᒧᑦ ᑕᕆᐅᕐᒧᓪᓗ ᐃᑯᐊᓚᑎᑦᑎᔭᖅᑐᖅᖢᓂ ᐃᓅᓕᓴᐅᑎᓂᒃ ᓇᒃᓴᖅᖢᓂ.

ᐱᔪᒃᓯᓕᕈᒪᓕᕌᖓᒥ, ᓴᓕᕘᒃᔅ ᓵᙵᕗᖅ ᖃᖏᐊᕐᒥᓄᑦ ᐃᓕᓐᓂᐊᖅᑎᑦᑎᕙᒃᑐᒧᑦ ᓴᓇᙳᐊᕈᓯᖏᓐᓂᒃ. ᓄᑲᕐᒥᓄᑦ ᓵᙵᕙᒃᑭᕗᖅ SFU−ᑯᓐᓄᑦ ᐃᓕᑕᕆᔭᐅᔾᔪᑎᑖᕋᓱᒃᖢᓂ ᒥᑭᑦᑐᒥᒃ ᐊᕙᑎᓕᕆᓂᕐᒧᑦ ᒪᓕᒋᐊᓕᖕᓂᒃ ᐊᒻᒪ ᐅᖃᐅᓯᓕᕆᓂᕐᒥᒃ ᐃᓕᓐᓂᐊᖃᑕᐅᓪᓗᓂ. ᓄᓇᒦᑲᑕᒃᖢᓂ ᐱᔪᒃᓯᓕᕈᑎᒋᕙᖕᒥᔭᖓ, ᑕᑯᓪᓗᓂ ᐱᕈᖅᑐᓂᒃ ᓂᕐᔪᑎᓂᒡᓗ ᐆᒻᒪᕆᒃᑐᓂᒃ. ᐃᑲᔪᕈᒪᓕᖅᐸᒃᐳᖅ ᓄᓇᒧᑦ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓂ.

ᐊᑯᓂᑲᓪᓚᒃ ᓇᓂᓯᓇᓱᓚᐅᖅᐳᖅ ᐊᖅᑯᑎᒋᓂᐊᖅᑕᒥᓂᒃ ᑭᓯᐊᓂ ᒫᓐᓇ ᓴᐃᓚ ᓴᓕᕘᒃᔅ ᐱᕈᖅᓯᐊᖃᑦᑎᐊᓕᖅᐳᖅ ᐱᕈᖅᓯᐊᑎᑐᑦ ᐱᕈᖅᓯᐊᕆᕙᒃᑕᒥᑎᑐᑦ. ᓅᑎᕆᕙᓚᐅᖅᖢᓂ ᐃᒡᓗᒥᐅᑕᓂᒃ ᐃᑭᐊᕐᒥᓕᖅᓱᐃᕙᒃᖢᓂ ᐱᕈᖅᓯᐊᖃᖅᐸᒃᖢᓂᓗ ᓯᕗᓂᒃᓴᖓᓗ ᐱᕈᖅᐸᓪᓕᐊᕗᖅ ᖃᐅᔨᒪᓂᕆᔭᒥᓄᑦ ᓄᓇᖃᖅᑳᖅᑐᑦ ᐱᕈᖅᓯᐊᖏᓐᓂᒃ. ᐃᓱᒪᓚᐅᕐᑐᖅ ᐃᖅᑲᓇᐃᔭᕈᒪᓪᓗᓂ ᓱᐴᖅᑐᒐᕐᒥ ᑭᓯᐊᓂ ᓱᓇᐅᕝᕙ ᐊᓯᐊᓂᒃ ᐃᖅᑲᓇᐃᔮᖃᓚᐅᕐᑐᖅ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.