"ᐊᒃᓱᕉᑎᖃᓚᐅᖅᐳᖓ ᐊᖅᑯᑖᓂ. ᑭᓯᐊᓂ ᓴᐱᓕᓚᐅᙱᑦᑐᖓ," ᒪᕆᐊ ᒪᒃᕚᐃᓐ ᐃᖅᑲᐅᒪᔪᖅ. ᕗᐊᑦ ᒪᒃᕘᓴᓐᒥᐅᑕᖅ ᐊᐅᓚᑦᑎᓪᓗᓂ ᑐᐱᕐᒥᒃ ᐊᒻᒪ ᑐᐱᒃᓴᔭᕐᕕᖕᒥᒃ. ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᓚᐅᖅᓯᒪᔪᖅ ᐊᒻᒪ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᐃᓕᑕᕆᔭᐅᔾᔪᑎᑖᖅᖢᓂ ᐃᓅᕕᖕᒥ. ᐊᓈᓇᒋᔭᐅᓪᓗᓂ ᐃᓄᑑᓪᓗᓂ 1998-ᒥ, ᒪᒃᕚᐃᓐ ᐃᓕᓐᓂᐊᕆᐊᒃᑲᓐᓂᕈᒪᓕᓚᐅᖅᐳᖅ ᔭᓗᓇᐃᒥ, ᐊᖏᖅᑕᐅᓪᓗᓂᓗ ᐱᐊᓂᒃᓯᓪᓗᓂᓗ ᐅᑭᐅᖅᑕᖅᑐᒥ ᐃᓗᐊᖅᓴᐃᔨᙳᕆᐅᖅᓴᓂᕐᒧᑦ ᐃᓕᓐᓂᐊᒐᒃᓴᒥᒃ.

ᐋᓐᓂᐊᓯᐅᖅᑎᐅᓂᕐᒧᑦ ᐃᓕᓐᓂᐊᓕᕋᒥ, ᓯᕗᓪᓕᖅᐹᖓ ᑕᖅᑭᖅ ᐊᒃᓱᕈᕐᓇᓗᐊᓚᐅᖅᑐᖅ ᐊᒻᒪᓗ ᐅᐸᓗᖓᐃᖅᓯᒪᒐᓂ. ᔭᓗᓇᐃᕝᒦᖏᓐᓇᓚᐅᖅᑐᖅ ᐊᒻᒪᓗ ᐃᖅᑲᓇᐃᔭᓕᖅᑐᓂ ᐊᓪᓚᓄᑦ ᐊᕙᑎᓕᕆᓂᕐᒧᑦ ᑐᑭᒧᐊᑦᑎᑦᓯᔨᐅᓪᓗᓂ ᐊᒻᒪᓗ ᑭᖑᓂᐊᒍᑦ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᑐᑭᒧᐊᑦᑎᑦᓯᔨᐅᓪᓗᓂ ᐊᒻᒪᓗ ᐊᕕᑦᑐᖅᓯᒪᔪᓂ ᐋᓐᓂᐊᖃᕐᓇᖏᑦᑐᓕᕆᓂᕐᒧᑦ ᖃᐅᔨᓴᕐᓂᕐᒧᑦ ᑐᑭᒧᐊᑦᑎᑦᓯᔨᐅᓪᓗᓂ. ᐃᖅᑲᓇᐃᔭᕈᓐᓇᖅᓯᓚᐅᕐᒥᔪᖅ ᒐᕙᒪᒃᑯᓐᓄᑦ ᐊᒻᒪᓗ ᐃᓕᑉᐹᓪᓕᕈᓐᓇᖅᓱᓂ ᐃᓄᑐᖃᕐᓂᒃ. ᓇᒻᒥᓂᖅ ᐱᓕᕆᕕᖃᕈᒪᓕᓚᐅᖅᓯᒪᔪᖅ, ᐊᒻᒪᓗ ᓇᒻᒥᓂᖃᕐᓂᕐᒧᑦ ᐊᐅᓚᑦᓯᓂᕐᒧᑦ ᐃᓕᓐᓂᐊᓕᖅᓱᓂ ᐊᕈᐊᕋ ᓯᓚᑦᑐᓴᕐᕕᒻᒥ.

ᓇᖕᒥᓂᖃᕐᓂᖅ ᐱᐅᒋᑦᑎᐊᓚᐅᖅᑕᖓ ᓲᖃᐃᒻᒪ ᒪᒃᔅᕚᐃᓐ ᖁᕕᐊᒋᔭᖃᕐᒪᑦ ᐅᖃᓪᓚᖃᑎᖃᕐᓂᕐᒥᒃ ᐊᒻᒪ ᑲᑎᖃᑎᖃᕐᓂᕐᒥᒃ ᓄᑖᓂᒃ ᐃᓄᖕᓂᒃ, ᑕᐃᒪᙵᑦ ᐃᖅᑲᓇᐃᔭᓚᐅᖅᓯᒪᒐᒥ ᑮᓇᐅᔭᓕᕆᔨᐅᓪᓗᓂ ᑯᐊᐸᒃᑯᓐᓂ ᒪᒃᑯᒃᑑᓪᓗᓂ. ᖁᕕᐊᒋᔭᖃᓚᐅᖅᑐᖅ ᐃᑲᔪᕐᓂᕐᒥᒃ ᓂᐅᕕᕆᐊᖅᓯᒪᔪᓂᒃ ᐊᒻᒪᓗ ᓇᓕᒧᒌᒃᑎᑦᑎᓂᕐᒥᒃ ᑮᓇᐅᔭᓂᒃ ᑐᖅᑯᖅᓯᕕᖕᒥᒃ. ᑕᒪᒃᑯᐊ ᐊᔪᙱᑕᖏᑦ ᐊᑐᖅᖢᓂᒋᑦ ᐊᐅᓚᑦᑎᓪᓗᓂ ᑐᐱᕐᒥᒃ ᐊᒻᒪᓗ ᑐᐱᒃᓴᒥᒃ ᓂᐅᕕᕐᕕᖕᒥ ᖁᕕᐊᓇᖅᓯᒪᕗᖅ, ᐊᒻᒪᓗ ᖁᕕᐊᒋᔭᖃᖅᖢᓂ ᑲᑎᖃᑎᖃᕐᓂᕐᒥᒃ ᐳᓚᕋᖅᑎᓂᒃ ᐊᐅᔭᒃᑯᑦ ᐊᒻᒪᓗ ᐊᒥᓱᓂᒃ ᖁᕕᐊᓱᒃᑐᓂᒃ ᓂᐅᕕᕆᐊᖅᓯᒪᔪᓂᒃ.

ᐱᒋᐊᓕᓵᖅᑎᓪᓗᒍ, ᐃᓕᓐᓂᐊᖅᑎᑦᑎᔨᖃᓚᐅᙱᓚᖅ, ᑕᐃᒪᐃᓐᓂᖓᓄᑦ ᐃᓕᑦᑎᔭᕆᐊᖃᓚᐅᖅᐳᖅ ᑲᔪᓯᕙᓪᓕᐊᑎᓪᓗᒍ ᐊᒻᒪ ᐃᓕᑕᖏᑦ ᐊᓯᖏᓐᓄᑦ ᐃᖅᑲᓇᐃᔮᓄᑦ ᐊᑐᖅᖢᓂᒋᑦ. ᐱᐅᒋᑦᑎᐊᖅᑕᖓ ᓂᐅᕕᕐᕕᖕᒥ ᑐᐱᕐᓂᒃ ᓂᐅᕕᐊᒃᓴᖃᑐᐃᓐᓇᖅᐸᙱᒻᒪᑕ, ᓴᓇᕙᒃᑭᕗᑦ ᐊᒻᒪ ᖁᕕᐊᒋᔭᖃᖅᐳᖅ ᓂᐅᕕᐊᒃᓴᖃᖅᐸᒃᖢᓂ ᑎᐱᔅᓂᒃ ᐃᓄᖕᓄᑦ ᓇᒃᓯᐅᔾᔨᕙᒃᑐᓄᑦ ᖁᕕᐊᓇᖅᑐᓂᒃ ᑎᑎᖅᑲᓂᒃ ᐱᔭᕌᖓᒥᒃ. ᒥᖅᓱᖅᑎᖓ ᐊᕐᕌᒍᒐᓴᖕᓄᑦ ᑕᐃᑲᓃᓯᒪᓕᖅᑐᖅ ᐃᓕᓐᓂᐊᖅᑎᑦᑎᕗᖅ ᒪᒃᑯᖕᓂᖅᓴᓂᒃ ᐃᖅᑲᓇᐃᔭᖅᑎᓂᒃ ᐊᒻᒪ ᖃᐅᔨᒪᔭᒥᓂᒃ ᑐᓴᖅᑎᑦᑎᕙᒃᖢᓂ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᐃᒪᓐᓇᐅᓇᔭᖅᐳᖅ, "ᐃᓕᓐᓂᐊᖏᓐᓇᕆᑦ....ᓄᓇᕐᔪᐊᓕᒫᒥ ᑕᑯᔭᒃᓴᖅᑕᖃᖅᐳᖅ.... ᐊᒃᓱᕈᕐᓗᑎᑦ ᐱᓕᕆᑐᐃᓐᓇᕐᓗᑎᑦ.... ᐊᖏᕐᕋᕆᔭᐃᑦ ᕿᒫᔾᔮᙱᓚᖅ, ᑕᐃᑲᓃᖏᓐᓇᐅᔭᕐᓂᐊᖅᐳᖅ.... ᐅᓪᓗᒥ, ᐃᖅᑲᓇᐃᔮᒃᓴᑦᑎᐊᕙᖕᒥᒃ ᐱᔪᓐᓇᙱᓚᑎᑦ ᐊᓂᒍᐃᔾᔪᑎᑖᖅᓯᒪᙱᒃᑯᕕᑦ." ᓅᓐᓂᕆᓚᐅᖅᑕᖓ ᕗᐊᑦ ᒪᒃᕘᓴᓐᒥᑦ ᔭᓗᓇᐃᒧᑦ 1990 ᓄᙳᐊᓂ ᑲᑉᐱᐊᓇᓚᐅᖅᐳᖅ ᒪᒃᔅᕚᐃᓐᒧᑦ, ᑭᓯᐊᓂ ᖃᑕᙳᑎᖏᑦ ᐱᒃᑯᒍᓱᑦᑎᐊᓚᐅᖅᐳᑦ ᑖᔅᓱᒥᖓ. ᓇᖕᒥᓂᖅ ᐸᓂᖓ ᒫᓐᓇ ᐃᓕᓐᓂᐊᖅᐸᓪᓕᐊᕗᖅ ᓄᓇᖃᖅᑳᖅᑐᓄᑦ ᐃᓕᓴᐃᔨᐅᓂᕐᒧᑦ ᐱᓕᕆᐊᖑᕙᒃᑐᒥᒃ UBC−ᒥ.

ᒪᒃᕚᐃᓐ ᑎᓕᐅᕆᒃᑲᓐᓂᕋᔭᖅᐳᖅ ᓄᓇᖃᖅᑳᖅᑐᓂᒃ ᒪᒃᑯᒃᑐᓂᒃ ᐃᓕᓐᓂᐊᖏᓐᓇᖁᓪᓗᒋᑦ ᓇᓂᓯᓗᑎᒡᓗ ᐃᑲᔪᖅᑐᐃᔾᔪᑎᒃᓴᓂᒃ ᒪᓂᒪᑎᑕᐅᔪᓂᒃ. ᐅᖃᐅᓯᖃᕈᒪᑦᑎᐊᖅᐳᖅ ᐱᒻᒪᕆᐅᓂᖓᓂᒃ ᐃᓕᓐᓂᐊᕐᓂᐅᑉ ᐅᖃᖅᖢᓂᓗ ᐊᕐᕌᒍᓕᒫᒧᑦ ᐃᖅᑲᓇᐃᔭᕆᐊᖃᕋᓗᐊᕈᕕᑦ ᓄᐊᑦᑎᓇᓱᒡᓗᓂ ᐃᓕᓐᓂᐊᕐᓂᕐᒧᑦ, ᐱᒻᒪᕆᐅᕗᖅ ᐃᓕᓐᓂᐊᕐᕕᖕᒧᑦ ᐅᑎᕐᓂᐊᕐᓗᓂ. "ᑕᐅᑐᙳᐊᖅᑕᐃᑦ ᒪᓕᒃᐸᒡᓗᒍ ᐱᓕᕆᓗᑎᓪᓗ ᖁᕕᐊᓱᒍᑎᒋᔭᕐᓂᒃ. ᐅᓪᓘᑉ ᐃᓱᐊᓂ, ᖁᕕᐊᓱᒋᐊᖃᖅᐳᑎᑦ ᑭᓇᐅᓂᕐᓂᒃ ᑲᔪᓯᓂᖃᑦᑎᐊᕈᒪᒍᕕᑦ," ᐅᓂᒃᑳᕆᓪᓗᓂ.

ᑐᓗᖅᑕᕈᑎᑕᖃᓕᕌᖓᒥ, ᒪᒃᕚᐃᓐ ᐊᒃᓱᕈᕈᑎᖃᓚᐅᖅᐳᖅ ᓅᓪᓗᓂ ᓄᓇᒥᓂ ᐊᒻᒪ ᐊᓈᓇᐅᓪᓗᓂ ᐃᓄᑑᓪᓗᓂ ᐊᒻᒪ ᐸᓂᓂ ᐸᐃᕆᕝᕕᖕᒧᐊᖅᑎᑦᑕᕆᐊᖃᖅᖢᓂᐅᒃ ᐃᓕᓐᓂᐊᖏᓐᓇᕐᓂᐊᕐᒪᑦ. ᐃᓚᖓᑦ ᐃᓕᑕᖓ "ᓇᓂᓯᔭᕆᐊᖃᖅᐳᑎᑦ ᖁᕕᐊᒋᔭᖃᕐᓂᕐᒥᒃ ᐃᖅᑲᓇᐃᔮᕐᓂ, ᖃᓄᐃᑦᑐᑐᐃᓐᓇᐅᒐᓗᐊᖅᐸᑦ." ᐃᓕᑦᑎᓚᐅᕆᕗᖅ, "ᐃᓐᓇᐅᓗᐊᓚᐅᖅᓯᒪᙱᑦᑐᑎᑦ ᐃᓕᓐᓂᐊᕐᕕᖕᒧᑦ ᐅᑎᕆᐊᒃᓴᖅ, ᖃᔅᓯᓂᒃ ᐅᑭᐅᖃᕋᓗᐊᕈᕕᑦ."

ᐊᒃᓱᕈᖅᖢᓂ ᓇᓕᒧᒌᒃᑎᑦᑎᓇᓱᒃᖢᓂ ᐃᓕᓐᓂᐊᕐᓂᕐᒥᓂᒃ ᐊᖓᔪᖅᑳᖑᓂᕐᒥᒡᓗ, ᒪᒃᕚᐃᓐ ᐃᓕᓐᓂᐊᖅᑕᒥᓂᒃ ᓄᖅᑲᖓᑎᑦᑎᓚᐅᑲᓚᐅᖅᐳᖅ ᐊᒻᒪ ᐃᖅᑲᓇᐃᔮᖅᑖᕈᒪᓕᖅᖢᓂ ᐃᖅᑭᓖᑦ ᓄᓇᖓᓂ. ᐊᒃᓱᕈᕐᓇᓚᐅᕐᑐᖅ ᑭᓯᐊᓂ ᐱᓇᔪᖕᓂᖓ ᐱᕚᓪᓕᖅᑎᑕᐅᓚᐅᖅᐳᖅ ᐃᖅᑲᓇᐃᔮᖅᑖᖅᑎᑕᐅᓪᓗᓂᓗ. ᐅᒡᒍᐊᙱᓚᖅ ᑕᐃᒪᓐᓇ ᐃᓱᒪᓕᐅᕆᓚᐅᕐᓂᕐᒥᓂᒃ, ᐅᒃᐱᕈᓱᒃᖢᓂ ᑭᓱᓕᒫᑦ ᑕᐃᒪᐃᓲᖑᓂᖏᓐᓂᒃ ᐱᔾᔪᑎᖃᖅᖢᑎᒃ ᐊᒻᒪ ᐅᑎᕈᓐᓇᕐᓂᕋᖅᖢᓂ ᐱᐊᓂᒃᓯᓗᓂᓗ ᐃᓗᐊᖅᓴᐃᔨᐅᓂᕐᒧᑦ ᐃᓕᓐᓂᐊᖅᑕᒥᓂᒃ ᐱᔪᒪᒍᓂ.

ᒪᒃᕚᐃᓐ ᐅᖃᐅᔾᔨᔪᓐᓇᖅᐸᑦ ᒪᒃᑯᖕᓂᖅᓴᒧᑦ ᖃᓄᑐᐃᓐᓇᑦᑎᐊᖅ ᐃᒪᓐᓇᐅᓇᔭᖅᐳᖅ, "ᖃᓄᓕᒫᖅ ᐊᒃᓱᕈᕐᓇᖅᑐᒃᑰᕐᓂᕐᓂᒃ, ᖃᓄᓕᒫᖅ ᐊᑐᖅᓯᒪᔭᕐᓂᒃ ᐃᓅᓯᕐᓂ... ᓴᐱᓕᓚᐅᖅᓯᒪᙱᓚᑎᑦ, ᓱᓕ ᑲᔪᓯᕗᑎᑦ. ᓱᓕ ᓴᙱᔪᑎᑦ. ᓱᓕ ᑕᑯᒃᓴᐅᑎᑦᑎᕗᑎᑦ ᖁᕕᐊᒋᔭᖃᕐᓂᕆᔭᕐᓂᒃ ᓇᒡᓕᒋᔭᕐᓂᒃ." ᑭᖑᒧᑦ ᑕᑯᓪᓗᓂ ᒪᒃᕚᐃᓐ ᐊᓯᐊᒍᖔᖅ ᐱᓕᕆᓇᔭᙱᓚᖅ ᖁᔭᓕᑦᑎᐊᖅᖢᓂᓗ ᑕᐅᑐᒐᖃᓪᓗᐊᑕᖅᖢᓂᓗ ᓯᕗᓂᒃᓴᒧᑦ.

ᐊᑕᐅᓯᖅ ᓇᓗᓇᐃᒃᑯᑕᖅ ᐱᓚᐅᖅᓯᒪᔭᖓ ᐊᕐᕌᒍᒐᓴᖕᓄᑦ ᐱᒃᑯᒋᓗᐊᙳᐊᖅᖢᓂᐅᒃ ᓄᓇᓕᖕᓂ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᑭᒡᒐᖅᑐᐃᔨᐅᓂᕐᒧᑦ ᓇᓗᓇᐃᒃᑯᑕᖅ. ᖁᕕᐊᒋᔭᖃᖅᑐᖅ ᐃᑲᔪᕐᓂᕐᒥᒃ ᓄᓇᓕᒋᔭᒥᓂᒃ ᐃᓗᐊᖅᓴᐃᔨᓂᒡᓗ, ᐃᓕᓐᓂᐊᖅᑎᑦᑎᓂᕐᒥᒃ ᒪᒃᑯᒃᑐᓂᒃ ᓄᓇᓕᖕᒥᐅᓕᒫᓂᒡᓗ.

ᓇᓕᒧᒌᒃᑎᑦᑎᓇᓱᒃᖢᓂ ᐃᓱᒪᒥᒍᑦ ᖃᓄᐃᙱᑦᑎᐊᕈᓐᓇᕐᓂᕐᒥᒃ, ᒪᒃᕚᐃᓐ ᐊᐅᓪᓛᖅᓯᒪᕙᒃᐳᖅ ᓄᓇᒥ, ᐱᓱᔪᒃᐸᒃᖢᓂ, ᕿᒻᒥᒥᓂᒃ ᐱᓱᔪᒃᐸᒃᖢᓂ, ᖃᖅᑲᒦᑉᐸᒃᖢᓂ, ᐸᐅᕐᖓᖅᑕᖅᐸᒃᖢᓂ, ᓄᓇᒦᑉᐸᒃᖢᓂ ᒪᒥᑎᖦᖢᓂᐅᒃ. ᖁᕕᐊᒋᔭᖃᖅᐳᖅ ᐃᖃᓗᒐᓱᖕᓂᕐᒥᒃ ᐃᓕᑦᑎᕙᓪᓕᐊᓂᕐᒥᒡᓗ ᐊᓯᖏᓐᓂᒃ ᐃᓕᖅᑯᓯᑐᖃᒃᑯᑦ ᐊᑐᖅᑕᐅᕙᒃᑐᓂᒃ.

ᑲᔪᖏᖅᓴᐃᓕᕌᖓᒥ, ᒪᒃᕚᐃᓐ ᐊᖓᔪᖅᑳᒥᓄᑦ ᓵᙵᕙᒃᐳᖅ, ᐃᑦᑐᒃᑯᒥᓄᑦ ᐊᑖᑕᑦᑎᐊᒃᑯᒥᓄᓪᓗ. ᐅᐱᒍᓱᑦᑎᐊᖅᐳᖅ ᐱᓕᕆᑦᑎᐊᕐᓂᕆᔭᖏᓐᓂᒃ ᓂᕆᐅᒃᐳᕐᓗ ᐅᐱᒋᔭᐅᓂᖓᓂᒃ. ᐱᔪᒃᓯᑎᑕᐅᓪᓗᓂ ᐱᕈᖅᓴᓚᐅᖅᑕᒥᓄᑦ, ᓇᒡᓕᒍᓱᖕᓂᕐᒥᒡᓗ ᐃᒃᐱᒋᕙᒃᑕᒥᓂᒃ ᐃᖅᑲᓇᐃᔭᕆᐊᕌᖓᒥ ᖃᐅᑕᒫᑦ, ᖃᐅᔨᒪᕗᖅ ᓇᓂᓯᓯᒪᓕᕐᓂᕐᒥᓂᒃ ᖁᐊᖅᓵᕐᓇᙱᑦᑐᒥᒃ ᐃᓂᒥᒃ. ᐊᓈᓇᑦᑎᐊᖓ ᐃᖅᑲᓇᐃᔭᓚᐅᖅᐳᖅ ᒫᓐᓇ ᐃᖅᑲᓇᐃᔭᕐᕕᒋᔭᒥᓂ ᑕᒪᓐᓇᓗ ᖁᕕᐊᓱᒍᑎᒋᕙᒃᖢᓂᐅᒃ. ᐃᖅᑲᐅᒪᕗᖅ ᐊᔭᐅᕆᓚᐅᕐᓂᕐᒥᓂᒃ ᐃᓕᓐᓂᐊᒃᑲᓐᓂᖁᓪᓗᓂᐅᒃ ᐊᒃᓱᕈᖁᓪᓗᓂᐅᒃ. ᐅᒃᐱᕈᓱᖕᒥᔪᖅ ᑎᓕᐅᕆᓂᕐᒥᒃ ᐃᓄᖕᓂᒃ, ᐃᓕᓐᓂᐊᕐᓂᐅᑉ ᓯᓚᑖᓂᓘᓐᓃᑦ, ᑎᓕᐅᕆᕙᒃᖢᓂ ᓴᐱᓕᖅᑕᐃᓕᖁᔨᙱᖦᖢᓂ ᓂᕆᐅᖕᓂᖃᑦᑎᐊᕐᓗᓂᓗ, ᐅᒃᐱᕆᔭᖃᕐᓂᕐᒥᒃ ᓇᒡᓕᖕᓂᕐᒥᒡᓗ.

ᐃᓱᓕᑉᐸᓪᓕᐊᓕᖅᑎᓪᓗᒍ, ᒪᒃᕚᐃᓐ ᐅᖃᐅᓯᖃᖅᐳᖅ, "ᖃᐅᑕᒫᑦ ᐱᔪᓐᓇᕐᓂᓕᒫᕐᓂᒃ ᐱᓇᔪᑐᐃᓐᓇᖅᐸᒡᓗᑎᑦ. ᐃᖅᑯᒻᒪᕌᖓᕕᑦ, ᖁᔭᓕᓗᑎᑦ, ᖁᔭᓕᓗᑎᑦ ᐱᙳᐊᖅᑎᑦᑎᔨ ᐅᓪᓗᒃᑲᓐᓂᕐᒥᒃ ᐃᓅᔪᓐᓇᖅᑎᑦᑎᖕᒪᑦ, ᐊᒻᒪ ᐊᓯᔾᔩᒐᓗᐊᕈᕕᑦ ᓇᖕᒥᓂᖅ ᐃᓅᓯᕐᓂ ᐊᓯᕕᓪᓘᓐᓃᑦ ᐃᓅᓯᖓᓂ, ᐱᓕᕆᑦᑎᐊᖏᓐᓇᕐᓗᑎᑦ ᐱᔪᓐᓇᕐᓂᓕᒫᕐᓄᑦ ᐊᑐᕐᓗᑎᑦ... ᐱᓇᔪᒡᓗᑎᑦ ᑲᔪᓯᑦᑎᐊᕐᓂᕐᒧᑦ... ᑲᔪᓯᑐᐃᓐᓇᕐᓗᑎᑦ, ᒪᓕᒡᓗᒋᓪᓗ ᑕᐅᑐᙳᐊᖅᑕᑎᑦ. ᐅᓪᓘᑉ ᓄᙳᐊᓂ, ᐃᓱᒪᖅᓲᑎᒋᕙᐃᑦ ᑭᓱᒥᒃ ᓂᕈᐊᕈᒪᖕᒪᖔᖅᐱᑦ... ᐊᒃᓱᕉᑎᖃᖃᑦᑕᕐᓂᐊᖅᐳᑎᑦ ᐊᖅᑯᑖᓂ, ᑭᓯᐊᓂ ᓴᐱᓕᖅᑕᐃᓕᒋᑦ. ᐃᓕᓐᓂᐊᕐᓂᖅ ᐱᒻᒪᕆᐊᓘᕗᖅ."

ᐃᑲᔪᕐᓂᖅ ᐃᓄᖕᓂ ᖁᕕᐊᒋᑦᑎᐊᖅᑕᖓ ᐊᒻᒪ ᒪᕆᐊ ᒪᒃᕚᐃᓐ ᓇᓂᓯᓚᐅᖅᐳᖅ ᑕᐃᒪᐃᓕᐅᕈᓐᓇᕐᓂᕐᒥᓂᒃ ᐃᓗᐊᖅᓴᐃᔨᐅᓂᖅ ᓈᒻᒪᒋᙱᖦᖢᓂᐅᒃ. ᐊᐅᓚᑦᑎᓪᓗᓂ ᑐᐱᕐᒥᒃ ᑐᐱᒃᓴᒥᒡᓗ ᓂᐅᕕᕐᕕᖕᒥ ᐊᓈᓇᑦᑎᐊᖓᑕ ᐃᖅᑲᓇᐃᔭᕐᕕᒋᓚᐅᖅᑕᖓᓂ, ᖁᕕᐊᒋᔭᖃᖅᐸᒃᐳᖅ ᓂᐅᕕᖅᐸᒃᑐᓂᒃ ᖁᕕᐊᓱᒃᑎᑦᑎᓪᓗᓂ ᑕᑯᕙᒃᖢᓂᓗ ᓄᑖᓂᒃ ᒥᖅᓱᖅᑎᓂᒃ ᐃᓕᑦᑎᕙᓪᓕᐊᔪᓂᒃ ᐃᖅᑲᓇᐃᔭᕐᕕᖕᒥ. ᓯᕗᓪᓕᖅᐸᐅᑦᑎᐅᑎᕙᒃᖢᓂᒋᑦ ᖃᑕᙳᑎᖏᑦ, ᓇᓂᓯᓚᐅᖅᐳᖅ ᐊᑐᖅᑕᐅᔪᓐᓇᖅᑐᒥᒃ ᐊᑐᑦᑎᐊᕈᓐᓇᖅᑐᒥᒃ ᐃᒻᒥᓄᑦ ᐃᓅᓯᖓᓄᓪᓗ ᖁᕕᐊᓱᒍᑎᒋᕙᒃᑕᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.