"ᖃᕆᑕᐅᔭᓕᕆᔨᓃᖃᑕᐅᓯᒪᕗᖓ ᐃᖅᑲᐅᒪᓂᓕᒫᓐᓂ," ᑐᕋᕗ ᕼᐅᕐᔅᑦ ᐅᓂᒃᑳᖅᑐᖅ, ᓴᖅᑭᔮᖅᑎᑦᑎᓪᓗᓂ ᐃᖅᑲᓇᐃᔮᒥᑦ ᐱᕕᖃᕈᑎᒋᓪᓗᓂᐅᒃ ᐅᒃᑯᐃᕐᓯᓂᖕᒥᑦ ᐹᓂᑦ ᐃᒐᓛᓂᒡᓗ ᐊᓯᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐱᔪᒪᓚᐅᖅᑐᓄᑦ ᑐᓴᐅᒪᔾᔪᑎᒃᓴᓂᑦ. ᐱᕈᖅᓴᔭᐅᓪᓗᓂ ᐅᐃᕖᑎᑐᑦ ᐅᖃᓪᓚᒃᖢᓂ ᒥᑎᔅ−ᑯᕇ ᐊᓈᓇᒋᔭᐅᔪᖅ ᐅᐃᓂᐹᒡᒥ ᐊᒻᒪ ᑳᓪᒍᕆᒥ, ᒫᓐᓇ ᕕᒃᑑᕆᐊᒥ ᓄᓇᖃᓕᖅᑐᖅ, ᐳᕆᑎᔅ ᑲᓚᒻᐱᐊᒥ, ᐃᖅᑲᓇᐃᔭᖅᖢᓂ ᐳᕆᑎᔅ ᑲᓚᒻᐱᐊᒥ ᐊᕕᒃᑐᖅᓯᒪᔪᓂ ᒐᕙᒪᒋᔭᐅᔪᒥ ᖃᕆᑕᐅᔭᓕᕆᔨᒻᒪᕆᐅᓪᓗᓂ ᐃᓄᓕᕆᓂᕐᒧᑦ. ᑖᓐᓇ ᑐᓐᖓᕕᒋᓯᒪᒻᒪᒍ, ᐅᐃᓂᐸᐃᒡ ᐱᖓᓐᓇᖓᓂ, ᑭᓯᐊᓂ ᕕᒃᑑᕆᐊᒧᑦ ᓅᓚᐅᖅᓯᒪᔪᖅ ᐃᖅᑲᓇᐃᔭᕆᐊᖅᑐᖅᑐᓂ. ᖃᐅᔨᓇᓱᒍᒪᓚᐅᖅᑐᖅ ᐱᐅᓯᑐᖃᕐᒥᓂᒃ ᐸᓂᒥᓂᒡᓗ ᐱᕈᖅᓴᔪᒪᓪᓗᓂ ᓄᓇᖃᖅᑳᖅᓯᒪᔪᑦ ᑐᙵᓇᖅᑐᒥᒃ ᓄᓇᓕᖕᓂ (ᓯᓚᓗ ᐊᓕᐊᓇᐃᒋᑦᑎᐊᖅᖢᓂᐅᒃ!)

ᐱᓕᕆᔨᒻᒪᕆᐅᓂᕐᒧᑦ ᐃᖅᑲᓇᐃᔮᖓ ᐃᓚᐅᑎᑦᑎᔪᖅ ᐊᐅᓚᓪᓗᒋᑦ ᑕᒪᕐᒥᒃ ᖃᕆᑕᐅᔭᑦ ᐊᑐᖃᑦᑕᖅᑐᓂ ᓄᓇᓕᖕᓂ ᐊᕕᒃᑐᖅᓯᒪᓂᐅᔪᓂ ᐃᓄᓕᕆᔨᒃᑯᑦ ᐊᑐᖃᑦᑕᖅᑕᖓᓂ, ᓲᕐᓗ ᐃᖅᑲᓇᐃᔭᕐᓂᖅ ᐊᒻᒪ ᑎᒥᒥᒍᑦ ᐊᔪᕈᑎᓕᖕᓄᑦ ᐃᑲᔪᖅᑕᐅᓂᖅ, ᓄᑕᖅᑲᑦ ᒪᒃᑯᒃᑐᓪᓗ ᐸᖅᑭᔭᐅᔪᑦ, ᓄᑕᖅᑲᑦ ᐊᔾᔨᐅᙱᑦᑐᒃᑯᑦ ᐃᑲᔪᖅᑕᐅᔭᕆᐊᓕᑦ, ᐊᓯᖏᓪᓗ ᐊᒃᑐᐊᓂᓖᑦ ᐊᑐᖃᑦᑕᖅᑐᓂ. ᐃᖅᑲᓇᐃᔭᖅᑎᖏᑦ 100−ᓂᒃ ᐃᖅᑲᓇᐃᔭᖅᑎᓂᒃ ᐊᒻᒪ ᑳᑦᑐᓛᒃᑎᓂᒃ ᖃᐅᔨᒪᑦᑎᐊᕋᓱᖃᑦᑕᖅᐳᑦ ᖃᕋᓴᐅᔭᒃᑯᑦ ᕿᓪᓚᔾᔪᒐᐃᑦ ᐃᓄᐃᑦ ᐱᓇᔪᒃᐸᒃᑲᓗᐊᕐᒪᖔᑕ ᐃᓄᓕᕆᔨᒃᑯᓐᓄᑦ ᐋᖅᑭᒃᓯᒪᑦᑎᐊᕋᓗᐊᕐᒪᖔᑕ ᐊᑐᐃᓐᓇᐅᓗᑎᒡᓗ ᐱᔭᕆᐊᖃᕌᖓᑕ.

14-ᓂᒃ ᐅᑭᐅᖃᓕᖅᖢᓂ, ᐱᙳᐊᕈᑎᓂᒃ ᐱᙳᐊᕈᑎᓂᒃ ᐱᙳᐊᖅᑐᖃᓚᐅᖅᑐᖅ ᐱᖃᓐᓇᕆᔭᖓᑕ ᐃᒡᓗᖓᓂ. ᐊᓈᓇᖓ ᓂᐅᕕᕐᖢᓂᐅᒃ ᓯᕗᓪᓕᖅᐹᒥ ᖃᕆᑕᐅᔭᖓᓂ, ᑕᓐᑎ 1000, ᑭᖑᓂᐊᒍᑦ ᓄᑖᖑᕆᐊᕐᖢᓂ ᒫᓐᓇᓕᓴᕐᒧᑦ ᖃᕆᑕᐅᔭᕐᒧᑦ. ᐱᔪᒪᓂᕆᔭᖓ ᐲᓚᐅᖅᑐᖅ ᑕᐃᑲᙵᑦ. ᓴᓇᓚᐅᖅᑐᖅ ᖃᕆᑕᐅᔭᓂᑦ ᐃᓚᒌᓄᑦ, ᐱᖃᓐᓇᕆᔭᖏᓐᓄᑦ ᑭᖑᓂᐊᒍᓪᓗ, ᓛᓐᑕᓐ ᐋᖓᔮᖕᓇᖅᑐᓂᑦ, ᓅᓚᐅᕋᓂᑦ ᑎᒥᐅᔪᒧᑦ ᓄᓇᕐᔪᐊᒥᑦ ᐃᓚᒋᔭᐅᓪᓗᓂ ᑳᓪᒍᕆᐅᑉ ᐅᖅᓱᐊᓗᓕᕆᔨᖏᓐᓄᑦ ᐳᓪᓚᒃᓴᖅᓯᐅᖅᑎᓄᓪᓗ.

ᖃᕆᑕᐅᔭᓕᕆᔨᒃᑯᓐᓄᑦ ᐊᐅᓚᑦᑎᔨᙳᕋᓱᓚᐅᖅᑐᖅ ᓄᓇᒥᓂ ᐊᒻᒪ ᐃᒃᐱᒍᓱᒃᖢᓂ ᐃᓕᖅᑯᓯᖓᓂ ᐊᖏᕐᕋᖓᓂ, ᑕᐃᒪᓕ ᕕᒃᑑᕆᐊᒧᑦ ᓅᓚᐅᖅᓯᒪᕗᖅ 2009-ᖑᑎᓪᓗᒍ. ᐊᕐᕌᒍᑦ 13 ᐅᖓᑖᓂ, ᐃᖅᑲᓇᐃᔭᓚᐅᖅᓯᒪᔪᖅ ᐊᖓᔪᖅᑲᐅᑎᐅᖃᑕᐅᓪᓗᓂ ᑲᓇᑕᐅᑉ ᐊᕕᑦᑐᖅᓯᒪᓂᖏᑕ ᒐᕙᒪᖏᓐᓂᒃ. ᐊᖅᑯᑎᒋᔾᔮᖏᑕᖓ, ᐃᓱᒪᐃᓐᓇᖃᑦᑕᓚᐅᕐᒪᑦ ᐃᓅᓕᓴᐅᑎᓂᒃ ᐊᒻᒪᓗ ᓘᑦᑖᕈᕈᒪᓪᓗᓂ. ᐅᒡᒍᐊᓇᖅᑑᒐᓗᐊᖅ, ᐋᓐᓂᐊᕕᒻᒨᕐᓂᖏᒻᒪᑦ ᖃᕋᓴᐅᔭᓕᕆᓪᓗᓂ. ᖁᕕᐊᓇᑦᑎᐊᓚᐅᖅᑐᖅ ᐃᖅᑲᓇᐃᔮᖓᓗ ᑯᒃᑭᖐᔭᖅᖢᓂ.

ᑎᒍᒥᐊᖏᓐᓇᓲᖅ ᖁᕕᐊᒋᔭᖃᕐᓂᕐᒥᑦ ᐃᓅᓕᓴᐅᑎᓂᑦ, ᑕᑯᑦᓴᐅᑎᑦᓯᑦᓱᓂᓗ ᐊᑐᖅᓯᒪᔭᖏᓐᓂᑦ ᐋᓐᓂᐊᖅᑐᓕᕆᓂᕐᒧᑦ ᐃᓕᓐᓂᐊᕐᕕᒻᒥᑦ ᑐᑦᓯᕋᖅᓯᒪᓂᕐᒥᑦ ᓇᒻᒥᓂᖅ ᓇᓗᓇᐃᖅᓯᓯᒪᖏᑦᑐᓂᑦ ᓄᓇᖃᖅᑳᖅᓯᒪᔪᑎᑐᑦ, ᖃᐅᔨᒪᖏᑦᑐᖅ ᐱᐅᓯᑐᖃᖓᓂᑦ. ᑭᖑᓂᐊᒍᑦ ᐃᓕᓐᓂᐊᓕᑕᐃᓐᓇᓚᐅᖅᑐᖅ, ᐃᓚᒌᑦ ᑲᑎᑎᑕᐅᑎᓪᓗᒋᑦ, ᖃᑕᙳᑎᖏᑦ ᓇᑭᙶᕐᒪᖔᑕ. ᓂᖏᐅᖓ ᐅᐸᓚᐅᖅᐳᖅ ᐃᒃᓯᕋᕐᔪᐊᒃᑯᓐᓄᑦ, ᑲᓇᑕᒥ ᐊᒥᓲᓪᓗᑎᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ, ᑕᐃᒪᐃᒻᒪᑦ ᐃᓱᒪᓕᐅᓚᐅᖅᐳᖅ ᕿᑐᕐᖓᖏᑦ ᐱᕈᖅᑎᒍᒪᓪᓗᓂᒋᑦ ᐃᓕᖅᑯᓯᑐᖃᖃᕋᑎᒃ ᐱᓪᓗᒍ ᐃᓚᐃᓐᓈᕐᓂᖅ ᐊᒻᒪ ᐊᑭᕋᖅᑐᕐᓂᖅ. ᐊᓈᓇᖓ ᑭᖑᓂᐊᒍᑦ ᐃᓕᓐᓂᐊᓕᓚᐅᕐᒥᔪᖅ. ᓇᓂᓯᕝᕕᒋᓕᓚᐅᖅᑕᖓ 30−ᓄᑦ ᐊᕐᕌᒍᓄᑦ ᓇᒧᙵᐅᕙᓪᓕᐊᓂᖃᖅᖢᓂ ᐃᓕᑦᑎᕙᓪᓕᐊᓂᕐᒥᒃ.

ᐃᖅᑲᓇᐃᔭᖅᑎᓪᓗᒍ, ᕼᐅᕐᔅᑦ ᑲᔪᖏᖅᓴᐃᓯᒪᔪᖅ ᐊᒥᓱᒐᓚᖕᓂᑦ ᓄᓇᖃᖅᑳᖅᓯᒪᔪᓂᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᓂᑦ, ᐊᑐᖅᓯᒪᔭᒥᓂᒃ ᑐᓴᖅᑎᑦᑎᓪᓗᓂ ᐃᓕᑦᑎᕙᓪᓕᐊᓪᓗᓂᓗ ᐃᓕᖅᑯᓯᖕᒥᓂᒃ. ᐃᓅᓯᕐᒥᓂ ᐊᒃᑐᐃᓂᖃᕈᒪᖕᒪᑦ ᐃᑲᔪᕈᓐᓇᕐᓂᐊᕐᒪᑦ ᐃᓄᖕᓄᑦ ᑲᑎᑉᐸᒃᑕᒥᓄᑦ ᐃᑲᔪᕐᓗᒋᓪᓗ ᐱᕈᖅᑎᑦᑎᐊᖅᐸᒡᓗᒋᑦ ᓂᑲᒍᓱᙱᖔᕐᓗᓂ ᐊᒻᒪ ᐊᒃᓱᕈᕐᓇᖅᑐᒃᑰᙱᖔᕐᓗᓂ.  ᓄᓇᓕᑖᓵᖓᓂ ᐊᒻᒪ ᐃᖅᑲᓇᐃᔭᖅᑎᓪᓗᒍ, ᐃᖅᑲᓇᐃᔭᖅᑏᑦ ᑎᓕᐅᖅᑕᐅᕗᑦ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓄᑦ ᑐᕌᒐᖃᖁᔭᐅᓪᓗᑎᒃ ᐊᒻᒪ ᐅᖃᐅᓯᖃᕐᓗᑎᒃ ᓄᓇᕘᒥ ᐃᓕᓴᕆᔭᐅᓂᖏᓐᓂᒃ ᑲᑎᒪᓕᕌᖓᑕ. ᐊᑕᐅᓯᖅ ᐆᒃᑑᑎᐅᔪᖅ Hurst−ᖑᓂᕋᖅᑕᐅᔪᖅ ᐱᒃᑯᒋᔭᖃᓪᓚᕆᒃᐳᖅ ᐱᓕᕆᐊᕆᔭᖓ ᓴᖅᑭᑎᑦᑎᓪᓗᓂ ᓯᕗᓪᓕᖅᐹᑦᑎᐊᒥᒃ ᓄᓇᖃᖅᑳᖅᑐᓄᑦ−ᑐᕌᖓᔪᑐᐊᓄᑦ ᐊᑐᖅᑕᐅᔪᓐᓇᖅᑐᓄᑦ ᑲᒻᐸᓂᒋᔭᐅᔪᒧᑦ B.C.−ᒧᑦ ᑕᒪᒃᑯᐊ ᓄᓇᖃᖅᑳᖅᑐᑦ ᖃᕆᑕᐅᔭᒃᑯᑦ ᐱᓕᕆᔾᔪᑕᐅᕙᒃᑐᓄᑦ ᖃᐅᔨᓴᖅᓯᓂᕐᒧᑦ ᐃᖅᑲᓇᐃᔭᖅᓯᓐᓈᑦ ᐃᓕᓐᓂᐊᖅᑐᑦ ᐊᔪᕈᓐᓃᖅᓴᖅᑎᑕᐅᓪᓗᑎᒃ ᐱᓕᕆᐊᖃᕈᓐᓇᕐᓂᕐᒥᒃ ᖃᕆᑕᐅᔭᒥ ᐊᑐᖅᑕᐅᕙᒃᑐᓂᒃ ᖃᐅᔨᓴᖅᓯᔨᐅᓂᐊᕐᓗᑎᒃ. ᑲᑐᔾᔨᖃᑎᒌᖕᓂᖅ ᐱᓕᕆᖃᑎᖃᖅᐳᖅ ᐊᓪᓚᖓᔪᐃᑦ ᐳᕆᑎᔅ ᑲᓚᒻᐱᐊᒥ, ᐊᒻᒪ ᐃᙱᐅᓰᑦ ᐊᒻᒪ Esquimalt ᓄᓇᖃᖅᑳᖅᓯᒪᔪᑦ ᕕᒃᑑᕆᐊᒥ.

ᑎᓕᐅᕈᒪᓪᓗᒋᑦ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐃᒪᓐᓇ ᐅᖃᖅᐳᖅ, "ᓄᓇᕐᔪᐊᒥ ᐃᓕᓐᓂᐊᕐᓂᖅ, ᐱᓗᐊᖅᑐᒥ ᐅᓪᓗᒥ ᓄᓇᕐᔪᐊᕐᒥᐅᓄᑦ ᐊᒻᒪ ᖃᓄᖅ ᐃᖏᕐᕋᓲᖑᖕᒪᖔᑦ, ᐊᐅᓪᓚᕈᓐᓇᕐᓗᓂ, ᓄᓇᔅᓯ ᓯᓚᑖᓃᑐᐃᓐᓇᕋᓗᐊᖅᐸᑦ, ᐊᑑᑎᖃᑦᑎᐊᖅᑐᖅ. ᐱᔪᓐᓇᕐᓂᖃᕈᕕᑦ, ᐃᔩᒃᑭᒃ ᒪᑐᐃᕈᓐᓇᑦᑎᐊᕋᕕᒋᑦ ᐊᒻᒪ ᖃᓄᖅ ᐃᓅᔪᓐᓇᕐᒪᖔᖅᐱᑦ, ᑐᑭᓯᐅᒪᓗᑎᑦ ᖃᓄᖅ ᓄᓇᕐᔪᐊᖅ ᐊᐅᓚᓂᖃᕐᒪᖔᖅ. ᑭᓯᐊᓂᑦᑕᐅᖅ, ᐅᖃᕋᔭᕐᒥᔪᖓ, ᐅᖓᓯᓗᐊᖅᑎᑦᑕᐃᓕᒍᒃ ᐊᖏᕐᕋᒥᒃ, ᐅᐱᓐᓇᕋᓂ ᑐᓐᖓᕕᖃᕋᕕᑦ... ᐃᖅᑲᐅᒪᒋᑦ ᓇᑭᙶᕐᒪᖔᑕ. ᖃᐅᔨᒪᐃᓐᓇᕐᓗᑎᑦ ᓇᓂ ᐊᖏᕐᕋᕐᒪᖔᖅᐱᑦ ᐃᓕᓴᐃᖃᑦᑕᕐᓗᑎᓪᓗ ᐊᒻᒪ ᐃᓕᓐᓂᐊᖅᑕᐅᔪᓂᑦ ᐊᒻᒪ ᓯᕗᓕᕕᓂᕕᑦ ᐅᖃᐅᓯᖅᑕᖏᓐᓂᒃ ᐃᓂᒃᓴᖅᓯᐅᕈᓐᓇᑦᑎᐊᖁᓪᓗᑎᑦ ᓄᓇᕐᔪᐊᕐᒥ."

ᓄᓇᕐᔪᐊᕐᒧᑦ, ᕼᐅᕐᔅᑦ ᐱᔭᒃᓴᖃᐃᓐᓇᐅᔭᖅᑐᖅ ᐊᕐᓇᓂ ᐱᖃᑎᖃᖅᖢᓂ. ᓄᓕᐊᒥᓂᒃ ᐱᖃᑎᖃᖅᑐᖅ ᓯᒡᔭᖅᐸᓯᒃᑐᒥ, ᖁᕕᐊᓱᒃᖢᓂᓗ. "ᐃᒪᕐᒥᒃ ᑕᑯᔪᓐᓇᕈᒪ, ᑕᖃᓯᒪᒐᓗᐊᕈᒪ ᓯᕘᕋᒐᓗᐊᕈᒪᓘᓐᓃᑦ, ᓴᐃᓕᓐᓇᖅᑐᒥᒃ ᐊᒃᑐᐃᓂᖃᕐᒪᑦ ᐅᕙᓐᓄᑦ, ᐃᒪᕐᒦᑉᐸᒃᐳᒍᑦ ᐊᔪᕐᓇᙱᓐᓂᓕᒫᖓᓂ," ᖁᖓᑉᐸᒃᖢᓂ.  ᐃᖅᑲᓇᐃᔮᖃᖅᑐᖅ ᓯᓚᑦᑐᖅᓴᕐᕕᔾᔪᐊᕐᒥᑦ ᐃᓕᓐᓂᐊᑎᑦᓯᔨᐅᓂᕐᒥᑦ ᕈᐃᐅᓪ ᐊᖅᑯᑎᓄᑦ ᓯᓚᑦᑐᓴᕐᕕᒡᔪᐊᖓᓂᑦ ᓇᓗᓇᐃᒃᑯᑕᖃᖅᓱᓂᓗ ᕿᕐᓂᖅᑕᓂᑦ ᓴᓇᐅᒐᕐᓂᑦ, ᐃᓕᓐᓂᐊᑎᑦᓯᓂᕐᒥᑦ ᓇᒻᒥᓂᖅ-ᓴᐳᔾᔨᓂᕐᒥᑦ ᓄᓇᓕᖓᓂᑦ ᓴᓇᙳᐊᕐᕕᒻᒥᑦ. ᓄᓇᓯᐅᑎᒃᑯᕕᖓᓂᑦᑕᐅᖅ ᐃᖅᑲᓇᐃᔭᕆᐊᒃᓴᖅ ᖁᕕᐊᒋᖃᑦᑕᕐᒥᔭᖓ, ᓄᑕᐅᙱᑦᑐᓂᒃ ᓴᓇᔭᕆᐊᒃᓴᖅ, ᐊᒻᒪ ᓴᓇᙳᐊᕐᓂᕐᒥᒃ ᐊᑐᖅᖢᓂ ᒫᓐᓇᓕᓴᕐᓂᒃ ᖃᕋᓴᐅᔭᓕᕆᔾᔪᑎᓂᒃ.

ᐃᓱᒪᒋᓪᓗᒋᑦ ᐊᕐᕌᒎᓵᖅᑐᓂ ᒪᕐᕉᖕᓂ, ᓄᕙᒡᔪᐊᕐᓇᖅ, ᓄᓇᒥ ᐃᑭᕐᔪᐊᖅᑐᑦ ᐊᒻᒪ ᓄᓇᕐᔪᐊᕐᒥ ᓈᒻᒪᙱᓪᓕᐅᕈᑎᑦ, ᑎᓕᐅᕆᔾᔪᑕᐅᕗᖅ ᐃᓄᖕᓄᑦ ᐃᓚᐅᖃᑦᑕᖁᓪᓗᒋᑦ ᐊᓯᒥᑕ ᒪᒥᓴᖅᐸᓪᓕᐊᑎᓪᓗᒋᑦ. "ᐃᓱᒪᒋᔭᕋ ᑭᒃᑯᓕᒫᑦ 2-ᐳᓴᓐᑎᒥᑦ ᐱᔪᐃᓐᓇᐅᑉᐸᑕ, ᑕᐃᒪᐃᑉᐸᑕᓗ ᑕᒫᓂ, ᐱᐅᓂᖅᓴᐅᒐᔭᖅᐸᓪᓚᐃᔪᒍᑦ. ᐱᒋᐊᖅᑎᑦᑎᔪᒪᑐᐃᓐᓇᕋᑖᖅᐳᖓ ᑭᓇᑐᐃᓐᓇᕐᒥᑦ ᐃᓱᒪᓚᐅᖅᑐᒧᑦ ᐊᐱᖅᓱᖅᑕᐅᔪᒪᓂᕐᒥᑦ ᑕᐃᒫᒃ ᓴᖅᑮᔪᓐᓇᖁᓪᓗᑕ ᖃᐅᔨᒪᒋᐊᕐᓂᕐᒥᑦ, ᑕᐃᑲᙶᖅᑐᓂᓗ," ᐅᖃᐅᓯᖃᖅᐳᖅ.

ᖃᕆᑕᐅᔭᓕᕆᔨᒃᑯᓐᓂᙶᖅᖢᓂ ᐃᖅᑲᐅᒪᔪᓐᓇᕐᓂᓕᒫᖓᓂ ᐊᒻᒪ ᐊᖅᑯᑎᒋᓂᐊᖅᑕᖓᓂ ᑲᑎᙵᒃᑲᓐᓂᕈᓐᓇᖅᓯᓗᓂ ᐱᐅᓯᑐᖃᕐᒥᓂ, ᑐᕆᕗ ᕼᐅᕐᔅ ᐅᒃᑯᐃᖅᐸᓪᓕᐊᕗᖅ ᐹᓂᒃ ᐊᒻᒪ ᐃᒐᓛᓂᒃ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐱᓕᕆᐊᒃᓴᖏᓐᓄᑦ ᕿᒥᕐᕈᔪᒪᔭᒥᓄᑦ. ᑲᑎᑎᑦᓯᓂᖅ ᖃᐅᔨᒪᓂᕐᒥᑦ ᓅᑎᑦᓯᓂᕐᒥᓪᓗ ᖃᐅᔨᒪᓂᕐᒥᑦ, ᐃᓕᓐᓂᐊᑎᑦᓯᓯᒻᒫᑦ ᓄᑖᙳᖅᐸᓪᓕᐊᔪᓂᑦ ᑎᑎᕋᖅᓯᒪᔪᓂᓪᓗ ᖃᐅᔨᓴᖅᑕᐅᓂᑯᓂᑦ, ᓴᖅᑭᑎᑦᓯᕙᓪᓕᐊᔪᖅ ᐱᕕᖃᑦᓯᐊᖏᓐᓂᕐᒥᑦ ᐱᓕᕆᖃᑎᒌᓐᓂᕐᒥᑦ ᐊᑐᖅᓱᑎᒃ ᐅᓪᓗᒥᓯᐅᑎᓂᑦ ᐱᓕᕆᔾᔪᑎᓂᑦ, ᑕᐃᒪᐃᖃᑦᑕᕐᒪᑦ ᓴᓇᙳᐊᒐᖏᓐᓂᑦ. ᓄᓇᓕᑦᑎᐊᕙᒻᒥᑦ, ᓇᓂᓯᓚᐅᖅᑐᖅ ᖁᕕᐊᓱᓐᓂᕐᒥᓂᒃ, ᐊᒻᒪᓗ ᐃᑲᔪᖃᑦᑕᖅᑐᓂ ᐊᓯᒥᓂᒃ ᕿᓂᖅᑎᓪᓗᒋᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.

ᕕᕗᐊᕆ 2023−ᒥ ᓄᑖᙳᕆᐊᖅᓯᒪᔪᖅ: ᑐᕋᕗ ᓅᓯᒪᓕᖅᑐᖅ CIO−ᖑᓕᖅᖢᓂ ᓄᓇᓕᖕᓂ ᒐᕙᒪᒃᑯᓐᓄᑦ ᓵᓂᔅ−ᒧᑦ.