"ᐊᒃᓱᕈᕐᓇᖅᑐᒃᑰᖅᓯᒪᔪᒍᑦ ᑭᖑᓂᑦᑎᓐᓂ ᑭᓯᐊᓂ ᓴᐱᓕᖅᓴᕋᐃᙱᖦᖢᑕ. ᐊᒃᓱᐊᓗᒃ ᖁᕕᐊᓇᖅᑐᖅ. ᐊᒥᓱᓂᒃ ᖁᕕᐊᓇᖅᑐᓂᒃ ᑐᓐᓂᖅᑯᓯᐊᒃᓴᖃᖅᑐᒍᑦ ᐊᒥᖅᑳᕈᑎᒃᓴᓂᒃ, ᐃᓕᓴᐃᓂᕐᒥᒃ ᑲᔪᓯᑎᓪᓗᒍᓗ," ᐅᖃᖅᑐᖅ ᓄᓇᖃᖅᑳᖅᓯᒪᔪᑦ ᐳᓚᕋᖅᑐᓕᕆᓂᕐᒧᑦ ᖃᐅᔨᒪᔨᑕᒻᒪᕆᒃ ᐅᐃᓕ ᓘᐃᔅ. ᑕᑯᓯᒪᔪᖅ ᖃᓄᖅ ᓄᓇᕐᔪᐊᖅ ᐅᔾᔨᕈᓱᑉᐸᓪᓕᐊᓕᕐᒪᖔᖅ ᓈᓚᑉᐸᓪᓕᐊᓂᕐᒥᓪᓗ ᓯᓚᑐᓂᖏᓐᓂᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᑕᒫᓃᓯᒪᓕᖅᑐᑦ ᐊᕐᕌᒍᒐᓵᓗᓐᓄᑦ. "ᖁᕕᐊᓱᒃᑐᖅ ᑕᑯᔭᕆᐊᒃᓴᖅ ᑲᒪᓇᖅᖢᓂᓗ ᒥᑭᑦᑐᑯᓘᓪᓗᓂ," ᑲᔪᓰᓐᓇᖅᐳᖅ. 

ᐅᐃᓕ ᓘᐃᔅ ᐅᐱᒍᓱᒃᑐᖅ ᓄᓇᖃᖅᑳᖅᓯᒪᔪᑦ ᐱᐅᓯᑐᖃᖏᓐᓂᒃ, ᐊᒻᒪᓗ ᐋᕝᕆᑲᒥ ᐊᒥᐊᓕᑲᒥᐅᓂᑦ. ᓄᓇᖃᖅᑐᖅ ᖂᓚᓄᒥ ᐃᓂᖃᖅᑐᖅ Squamish Nation-ᒥ ᓄᓇᕗᒻᒥ ᐃᓅᓚᐅᖅᓯᒪᓪᓗᓂᓗ ᓕᐋᓐ ᒐᐃᑦ ᐋᓐᓂᐊᕐᕕᖓᓂ ᐅᐊᖕᓇᖓᓂ ᕚᓐᑰᕙᒥ. ᓅᓚᐅᖅᓯᒪᔪᖅ ᓵᑐᓪᒧᑦ ᐱᖓᓲᑎᓪᓗᒍ, ᐊᑖᑕᖓ ᐅᓇᑕᖅᑐᒃᓴᐅᖃᑕᐅᓚᐅᖅᑐᖅ ᐃᓕᓐᓂᐊᖅᑎᓪᓗᒍ. 

19−ᓂᒃ ᐅᑭᐅᖃᖅᑎᓪᓗᒍ, ᓘᐃᔅ ᐃᖅᑲᓇᐃᔭᓯᒋᐊᓚᐅᖅᓯᒪᕗᖅ ᑐᔪᕐᒥᕕᖕᓂ ᑕᒫᙵᑦ ᐃᒪᕕᖕᒥ. ᖁᕕᐊᒋᑦᑎᐊᓚᐅᖅᑕᖓ ᐱᓕᕆᐊᖅ ᓲᖃᐃᒻᒪ ᓄᑖᓂᒃ ᐃᓄᖕᓂᒃ ᑲᑎᖃᑎᖃᕐᓂᖅ ᐅᖃᖃᑎᒋᕙᒃᖢᒋᑦᓗ ᐃᓚᐅᖃᑕᐅᑎᑦᑏᓐᓇᕐᖢᓂ. ᐃᖅᑲᓇᐃᔭᓚᐅᖅᑐᖅ ᓂᐅᕐᕈᑎᖃᕋᓱᐊᕐᓂᕐᒥᑦ ᐊᒻᒪ ᓂᐅᕐᕈᑎᖃᕋᓱᐊᕐᓂᕐᒥᑦ, ᐃᓕᓐᓂᐊᖅᑐᓂ ᑐᖕᖓᓱᑦᑎᑦᑎᓂᕐᒥᑦ ᐱᒋᐊᖅᑎᑦᑎᑎᓪᓗᒍ ᑯᐊᐳᕇᓴᒧᑦ. 

ᐃᖅᑲᓇᐃᔭᖅᖢᓂ ᐃᓕᑦᑎᔪᒻᒪᕆᐅᑎᓪᓗᒍ ᓈᓚᒃᖢᓂ ᐃᓄᖕᓂᒃ, ᐅᑎᓚᐅᖅᓯᒪᔪᖅ ᑲᓇᑕᒧᑦ ᐃᓕᓐᓂᐊᒃᑲᓐᓂᕈᒪᓪᓗᓂ. ᐊᓂᒍᐃᓚᐅᖅᑐᖅ ᓄᓇᖃᖅᑳᖅᓯᒪᔪᑦ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᐱᓕᕆᐊᒥᑦ ᕖᓚᓄ ᓯᓚᑦᑐᖅᓴᕐᕕᒡᔪᐊᕐᒥᑦ. ᐃᓚᖓᑦ ᑲᔪᖏᖅᓴᐃᔨᒋᓚᐅᖅᑕᖓ ᓴᓇᕝᕕᖕᒧᑦ ᐱᓚᐅᖅᑐᖅ ᐃᓕᓐᓂᐊᒃᑲᓐᓂᕈᒪᓪᓗᓂ ᓇᓖᕌᕐᕕᒃᓴᖃᕐᓂᖅᓴᐅᖁᓪᓗᒍ ᐊᖅᑯᑎᒋᓂᐊᖅᑕᖓᓂ ᓯᕗᒻᒧᑦ. ᐅᖃᐅᔾᔭᐅᓚᐅᖅᑐᖅ, "ᐱᓕᕆᔪᒪᒍᕕᑦ, ᑕᐃᒪᐃᒍᓐᓇᖅᑐᑎᑦ ᐊᒻᒪᓗ ᐊᓯᖏᓐᓄᑦ ᐳᓚᕋᑦᑐᓕᕆᓂᕐᒨᕈᓐᓇᖅᑐᑎᑦ. ᑭᓯᐊᓂ ᐱᓕᕆᖅᑳᕈᒪᒍᕕᑦ ᐅᕝᕙᓘᓐᓃᑦ ᐱᓕᕆᕝᕕᖕᒥ ᐱᔨᑦᑎᕈᑎᓂᒃ, ᐳᓚᕋᖅᑐᓕᕆᓂᕐᒧᑦ ᐃᓕᓐᓂᐊᖅᑎᑕᐅᔭᕆᐊᖃᕐᓂᐊᖅᑐᒃᓴᐅᕗᑎᑦ." 

ᓘᐃᔅ ᓇᓂᓯᓚᐅᙱᑦᑐᖅ ᐱᓕᕆᐊᒥᑦ ᐊᔪᕐᓇᖅᑐᒥᑦ ᑭᓯᐊᓂ ᐱᓕᕆᓪᓚᕆᒍᒪᓂᖃᓚᐅᖅᑐᖅ, ᐱᓗᐊᖅᑐᒥᑦ ᐳᓚᕋᖅᑐᓕᕆᓂᖅ 24/7-ᖑᖕᒪᑦ. ᓴᓂᕐᕙᒃᓯᓂᖅ ᐱᕕᒃᓴᒥᒃ ᐱᓕᕆᐊᖃᕐᓂᐊᕐᓗᓂ ᑕᐅᑐᒐᖃᓪᓗᐊᑕᕐᓗᓂᓗ ᑐᕌᕆᔭᒥᓄᑦ ᑭᓱᓂᒡᓗ ᓂᕆᐅᒋᔭᖃᕐᒪᖔᑦ ᐊᓂᒍᖅᑎᑦᑐᒪᔭᒥᓂᒃ ᐱᓪᓗᐊᑕᐅᓚᐅᖅᐳᖅ. "ᑕᒪᐃᓐᓂᒃ ᐃᓯᒐᖃᕐᓗᑎᑦ, ᐊᒻᒪ ᒪᓂᕋᕐᒧᑦ ᐅᓪᓚᒍᓐᓇᖅᓯᓗᑎᑦ, ᐅᖃᖅᐸᑕ," ᐅᖃᖅᐳᖅ.  

ᐅᑎᓚᐅᑲᓚᐅᖅᑐᖅ ᑕᕆᐅᑉ ᐊᑭᐊᓄᑦ ᑭᓯᐊᓂ ᐊᖏᕐᕋᒧᑦ ᐅᑎᖁᔭᐅᓕᓚᐅᖅᑐᖅ ᓄᓇᒥᓄᑦ ᔅᑯᐊᒥᔅᒥᑦ. "ᐃᒃᐱᒍᓱᖕᓂᖅᓴᐅᙱᑦᑐᖅ ᑲᑎᙵᖃᑎᖃᕐᓂᕐᒥᒃ ᖃᑕᙳᑎᖏᓐᓂᒃᓗ ᐊᒃᑐᐊᓂᖃᑦᑎᐊᕐᓂᕐᒥᒡᓗ ᓄᓇᓕᖕᓄᑦ," ᐅᖃᖅᑐᖅ. ᐱᓕᕆᖃᑎᖃᖃᑦᑕᖅᑐᖅ ᓄᓇᖃᖅᑳᖅᓯᒪᔪᑦ ᐳᓚᕋᖅᑐᓕᕆᓂᕐᒥᑦ ᐳᕆᑎᔅ ᑲᓚᒻᐱᐊᒥᑦ ᐊᒻᒪ ᑐᕌᕆᓇᓱᐊᖅᑕᒥᑦ ᐳᕆᑎᔅ ᑲᓚᒻᐱᐊᒥᑦ ᓄᓇᖃᖅᑳᖅᓯᒪᔪᓄᑦ ᐳᓚᕋᖅᑐᓕᕆᓂᕐᒧᑦ ᐱᓕᕆᔨᒻᒪᕆᐅᓪᓗᓂ ᕚᓐᑰᕗᒥᑦ ᓯᔾᔭᖅᐸᓯᖓᓂᑦ. ᑭᖑᓂᑦᑎᓐᓂ, ᐱᓕᕆᖃᑎᖃᖃᑦᑕᖅᓯᒪᕗᖅ Squamish Lil'wat Cultural Centre−ᒥᒃ, ᐃᑲᔪᖅᖢᒋᑦ ᒪᑐᐃᙶᖅᑎᖦᖢᒋᑦ, ᐱᓕᕆᐊᖃᖅᑳᖅᐸᒃᖢᑎᒃ ᐊᐅᓚᑦᑎᓪᓗᑎᒃ ᐊᒻᒪᐃᓛᒃ ᐱᓕᕆᐊᖃᓕᖅᐸᒃᖢᑎᒃ ᓂᐅᕐᕈᑎᖃᕐᓂᕐᒥᒃ ᓂᐅᕐᕈᑎᖃᖅᐸᖕᓂᕐᒥᒡᓗ. 

ᐅᓪᓗᒥᐅᓕᖅᑐᖅ, ᓘᐃᔅ ᑎᑎᕋᕐᕕᖕᒧᐊᖃᑦᑕᖅᑐᖅ ᖃᐅᔨᒋᐊᕆᐊᖅᑐᖅᖢᓂ ᑭᐅᔭᖅᑐᖅᖢᓂᓗ ᐃᕐᖐᓐᓈᖅᑕᐅᑎᒃᑯᑦ. ᑕᐃᒪᓕ ᐅᐸᒐᓱᒃᑕᒥᓄᑦ ᐊᐅᓚᑦᑎᔨᐅᓂᖓᓄᑦ, ᐃᑲᕐᕋᖃᖃᑦᑕᖅᑐᖅ ᖃᐅᑕᒫᑦ ᐅᐸᑐᐃᓐᓇᖏᓪᓗᓂ ᑭᓯᐊᓂ ᐅᐸᓗᖓᐃᔭᖅᑐᓂ. ᐊᐅᓪᓚᖃᑦᑕᖅᑐᖅ ᐃᖅᑭᓕᓄᑦ ᓄᓇᓕᓐᓄᑦ ᓄᓇᓕᖃᕐᕕᒋᔭᖓᓂ ᓲᕐᓗ ᓯᕿᓂᖅ, ᕼᐆᑉ ᐊᒻᒪ ᐹᔅᑕᓐ ᐹ. ᑲᓲᒪᖃᑎᖃᓲᖅ ᓄᓇᓕᓐᓂᒃ ᐊᒻᒪᓗ ᐃᑲᔪᖅᐸᑦᓱᓂᒋᑦ ᓇᓂᓯᒐᓱᐊᖅᑎᓪᓗᒋᑦ ᓴᓇᕐᕈᑎᓂᒃ ᐅᕝᕙᓗ ᐃᑲᔫᑎᑦᓴᓂᒃ ᑭᓐᖒᒪᒋᔭᖏᓐᓂᒃ ᑎᑭᐅᑎᒍᒪᑎᓪᓗᒋᑦ ᐳᓚᕋᑦᑐᓕᕆᓂᕐᒧᑦ ᑐᕌᒐᖏᓐᓄᑦ. ᐊᒥᓱᓂᒃ ᐸᓕᐊᖃᕋᓗᐊᖅᑎᓪᓗᒍ, ᐅᓪᓗᐃᓐᓇᖅ ᐊᔾᔨᒋᕙᙱᒻᒪᒍ ᑭᖑᓪᓕᖅᐸᐅᒋᐊᖓᓂᒃ. ᐊᔾᔨᒌᙱᑦᑐᓂᒃ ᐱᓕᕆᐊᒃᓴᓂᒃ ᐱᓕᕆᕙᒃᖢᓂ ᖃᐅᑕᒫᑦ ᐃᖅᑲᓇᐃᔮᖓ ᓄᑖᖑᑏᓐᓇᐅᔭᖅᐳᖅ ᐊᒻᒪ ᓄᑖᖑᓐᓇᖅᖢᓂ.

ᐃᖅᑲᓇᐃᔮᑎᒍᓪᓕ, ᓘᐃᔅ ᐅᖃᖅᐳᖅ ᖁᕕᐊᓇᖅᑑᓪᓗᓂ ᐃᖅᑲᓇᐃᔮᖅ. "ᖁᕕᐊᓇᑦᑎᐊᖅᑐᖅ. ᓄᓇᓕᓕᒫᓅᖃᑦᑕᖅᑐᖓ, ᐃᓚᖏᑦ ᑕᑯᓚᐅᖅᓯᒪᙱᑕᒃᑲ, ᖃᐅᔨᒪᓚᐅᖏᑕᒃᑲ. ᑕᖅᑲᐅᖓᖃᑦᑕᖅᑐᓯ ᐊᒻᒪᓗ ᑕᑯᓪᓗᓯ ᑲᔾᔮᓇᕐᓂᖓᓂᒃ ᑭᒃᑯᓕᒫᑦ ᓄᓇᕗᒻᒥ. ᐃᓱᒪᒋᔭᐅᓗᐊᙱᑦᑐᖅ ᐱᓕᕆᐊᒃᓴᖅ ᑕᐃᒪᐃᓕᐅᓕᖅᑎᓪᓗᑎᑦ," ᐃᒡᓚᖅᑐᖅ. 

ᐱᔪᒃᓯᑎᑦᑎᕙᖕᓂᖓ ᖃᐅᑕᒫᑦ ᐱᕕᒃᓴᐅᕗᖅ ᐊᒥᖅᑳᖃᑎᖃᕐᓂᕐᒥᒃ ᖃᐅᔨᒪᓂᕆᔭᐅᔪᓂᒃ ᐃᑲᔪᖅᐸᒃᖢᓂᓗ ᑮᓇᐅᔭᓕᐅᕋᓱᖕᓂᕐᒧᑦ ᐱᕙᓪᓕᐊᓂᕆᔭᐅᔪᒧᑦ ᓄᓇᖃᖅᑳᖅᑐᑦ ᓄᓇᓕᖏᓐᓂ. "ᑕᖅᑲᐅᙵᕈᓐᓇᑦᑎᐊᕐᓂᖅ ᑐᓴᖅᑎᓪᓗᒋᑦ ᓄᓇᓖᑦ ᖃᐅᔨᒪᓗᐊᙱᑦᑐᑦ ᐳᓚᕋᖅᑐᓕᕆᓂᕐᒥᑦ, ᐅᕝᕙᓘᓐᓃᑦ 100-ᐳᓴᓐᒥᑦ ᖃᐅᔨᒪᙱᑦᑐᑦ ᐃᓚᐅᖃᑕᐅᔪᒪᓂᖏᓐᓂᑦ ᐳᓚᕋᖅᑐᓕᕆᓂᕐᒥᑦ, ᐊᒻᒪᓗ ᐃᔨᖏᑦ ᒪᑐᐃᕐᓗᒋᑦ ᑕᑯᑎᖦᖢᒋᓪᓗ ᐅᐸᒃᑕᐅᖅᑳᖅᐸᙱᓐᓂᖓᓂᑦ. ᐊᒥᓱᓂᒃ ᐊᔾᔨᒌᙱᑦᑐᓂᒃ ᐊᖅᑯᑎᑕᖃᖅᐳᖅ ᐊᒻᒪ ᐃᖅᑲᓇᐃᔮᒃᓴᖃᕈᓐᓇᖅᖢᑎᑦ ᐳᓚᕋᖅᑐᓕᕆᓂᕐᒥ. ᐱᔪᒃᓯᑎᑦᑎᕗᖅ ᐅᕙᓐᓂᒃ ᖃᐅᔨᒪᓪᓗᓂ ᐃᓚᖓ ᐃᖅᑲᓇᐃᔮᒪ ᐃᑲᔪᕐᓂᖓᓂᒃ ᓄᓇᖃᖅᑳᖅᓯᒪᔪᓂᒃ ᓇᓂᓯᓂᕐᒥᒃ ᑮᓇᐅᔭᓂᒃ," ᓇᓗᓇᐃᖅᓯᓪᓗᓂ. ᓘᐃᔅ ᖁᕕᐊᒋᔭᖃᖅᑐᖅ ᓄᓇᓖᑦ ᐅᔾᔨᕈᓱᓕᕋᐃᒐᒥᒃ ᐃᑲᔪᕈᒪᓂᕐᒥᓂᒃ. 

ᓯᕿᕐᖑᔭᖅ ᐊᓂᓯᒪᑎᓪᓗᒍ, ᓘᐃᔅ ᐱᙳᐊᖃᑎᖃᕈᒪᓲᖅ ᐱᖃᓐᓇᕆᔭᒥᓂᒃ ᖃᕋᓴᐅᔭᒃᑯᑦ, ᑕᐅᑐᒡᓗᒍ ᐊᖅᓴᖅ ᐱᙳᐊᕐᓗᓂᓗ ᑕᐅᑐᕋᓐᓈᕐᓗᓂ. ᒪᕐᕉᓐᓂᒃ ᐃᕐᓂᓕᒃ 10 ᑐᖔᓂ ᐅᑭᐅᖃᖅᑐᓂᒃ ᐊᓃᕆᐊᕈᒪᒍᓂ ᓲᕐᓗ ᐃᒪᕐᒥᐅᑕᒃᑯᕕᒻᒧᑦ, ᓯᔾᔭᒧᑦ ᐅᕝᕙᓘᓐᓃᑦ ᑕᕆᐅᑉ ᐊᑭᐊᓄᑦ. ᒫᓐᓇ ᐃᓚᒌᖑᓕᕋᓗᐊᖅᑎᓪᓗᒍ, ᓱᓕ ᐃᓅᓱᒃᑑᓪᓗᓂ ᐆᒻᒪᑎᒥᒍᑦ ᐊᒻᒪᓗ ᓄᓇᖃᕆᐊᒃᓴᖅ ᖁᕕᐊᒋᓪᓗᓂᐅᒃ. 

ᐃᕐᓂᖓ ᐃᓕᓐᓂᐊᖅᑐᖅ ᐅᖃᐅᓯᕐᒥᑦ, ᐃᓕᓐᓂᐊᖅᖢᓂ ᓄᓇᓕᖕᓂᑦ, ᕿᓚᐅᔾᔭᕆᐅᖅᓴᓪᓗᓂᓗ. "ᑖᓐᓇ ᐃᕐᖑᓯᐅᔭᙳᐊᖅ ᐃᒻᒥᖅᓯᔪᖅ ᐃᓚᒋᔭᐅᑐᐃᓐᓇᕐᖢᓂᓗ ᓄᓇᓕᖕᒥ ᖃᐅᔨᒪᓂᐊᕐᒪᑕ ᐱᑕᖃᑦᑎᐊᖅᑐᓂᒃ ᐃᑦᑕᕐᓂᓴᕐᓂᒃ ᐱᓯᒪᔭᖏᓐᓂᒃ," ᐅᖃᖅᑐᖅ. ᓘᐃᔅ ᕿᑐᕐᖓᒥᓂᒃ ᐱᕈᖅᓴᐃᖁᕙᖏᑦ ᐱᕈᖅᓯᒪᙱᑕᒥᓂᒃ. ᐊᖓᔪᖅᑳᖏᒃ ᐊᒃᓱᕈᖅᖢᑎᒃ ᐱᓕᕆᓚᐅᖅᐳᑦ ᐊᒻᒪ ᐱᓕᕆᑦᑎᐊᖅᖢᑎᒃ ᑭᓯᐊᓂ ᕿᑐᕐᖓᒥᓄᑦ ᐱᓕᕆᒃᑲᓐᓂᕈᒪᔪᖅ, ᖁᕕᐊᓱᖁᓪᓗᒋᑦ, ᐃᒃᐱᒍᓱᑦᑎᐊᕐᓗᑎᒃ, ᐊᖅᑯᑎᖃᑦᑎᐊᕐᓗᑎᒃ ᐊᒻᒪ ᑭᓱᑐᐃᓐᓇᑦᑎᐊᓂᒃ ᐱᔭᕆᐊᖃᖅᑕᒥᓂᒃ ᐱᓯᒪᓗᑎᒃ. 

"ᓄᓇᖃᖅᑳᖅᓯᒪᔪᓕᒫᓄᑦ ᒪᒃᑯᒃᑐᓄᑦ, ᖃᐅᔨᒪᖁᕙᒃᑲ ᐱᐅᔪᓂᒃ ᐊᔾᔪᒥᓇᖅᑐᓂᒃ ᐱᑕᖃᕐᓂᖓᓂᒃ ᑕᖅᑳᓂ. ᑕᑯᑐᐃᓐᓇᕆᐊᖃᖅᑕᑎᑦ ᐃᓚᖏᑦ ᐱᐅᙱᑦᑐᑦ, ᑭᓯᐊᓂ ᐱᐅᔪᓂᒃ ᐊᔾᔪᒥᓇᖅᑐᓂᒃ ᐱᑕᖃᖅᑐᖅ ᐃᓗᐊᓂ ᓯᓚᑖᓂᓗ ᓄᓇᓕᔅᓯᓐᓂ," ᐅᖃᙳᐊᖅᑐᖅ. ᑕᑯᖃᑦᑕᖅᑐᖅ ᐊᔾᔪᒥᓇᖅᑐᓂᒃ ᐃᓄᐃᑦ ᐃᑲᔪᕈᒪᐃᓐᓇᐅᔭᖅᑐᑦ, ᒪᑭᒋᐊᕐᓗᑎᒃ, ᑭᐅᓗᑎᒃᓗ ᐊᐱᖅᑯᑎᓂᒃ. "ᑕᕝᕙᓃᑉᐳᒍᑦ ᑕᑯᒃᑲᓐᓂᕈᒪᓪᓗᑎᒍᓪᓗ ᒪᒃᑯᒃᑐᖁᑎᕗᑦ ᐱᓕᕆᑦᑎᐊᕐᓂᖅᓴᐅᖁᓪᓗᒋᑦ, ᑭᖑᕚᖑᒐᕕᑦ. ᑲᔪᓯᓂᐊᖅᑐᑦ ᐱᓕᕆᑦᑎᐊᕐᓂᕐᒥᑦ ᐱᒋᐊᖅᑕᕐᓂᑦ," ᐅᖃᖅᑐᖅ.  

ᐅᐃᓕ ᓘᐃᔅ ᖃᐅᔨᒪᔪᖅ ᐃᓄᖁᑎᒥᓂᒃ ᐊᒃᓱᕈᖃᑦᑕᖅᓯᒪᓂᖏᓐᓂᒃ ᑭᓯᐊᓂ ᖃᐅᔨᒪᖕᒥᔪᖅ ᐃᓄᖁᑎᖏᑦ ᓴᐱᓕᖅᓴᕋᐃᙱᓐᓂᖏᓐᓂᒃ ᐊᒻᒪ ᐱᐅᔪᐊᓘᓂᖏᓐᓂᒃ, ᐅᓄᖅᑐᓂᒃ ᑐᓐᓂᖅᑯᓯᐊᓂᒃ ᐊᒥᖅᑳᕈᑎᖃᖅᖢᑎᒃ, ᐃᓕᓴᐃᓪᓗᑎᒃ ᐊᒻᒪ ᐊᓂᒍᐃᔪᓐᓇᖅᖢᑎᒃ. ᐳᓚᕋᖅᑐᓕᕆᓂᕐᒥ ᐱᓕᕆᓪᓗᓂ, ᖃᐅᔨᑎᑦᑎᓪᓗᓂ ᐊᐅᓪᓚᖅᐸᒃᑐᓂᒃ ᓄᓇᖃᖅᑳᖅᓯᒪᔪᓄᑦ ᐊᕕᒃᑐᖅᓯᒪᓂᐅᔪᓄᑦ ᐊᒻᒪ ᓄᓇᖃᖅᑳᖅᓯᒪᔪᑦ ᐃᓕᖅᑯᓯᖏᓐᓄᑦ ᐊᑐᕐᓂᑯᖏᓐᓂ, ᐃᓚᒋᔭᐅᔪᖅ ᐊᓯᔾᔨᖅᑐᓄᑦ. ᐅᐱᒍᓱᒃᑐᖅ ᐃᓚᒋᔭᐅᔭᕆᐊᒃᓴᖅ ᐱᕙᓪᓕᐊᓂᖕᒧᑦ ᐱᕕᒃᓴᓂᒡᓗ ᓄᓇᕐᔪᐊᖅ ᐅᔾᔨᕈᓱᖕᓂᕐᓴᐅᖕᒪᑦ ᓯᓚᑐᓂᖏᓐᓂᑦ ᓄᓇᖃᖅᑳᖅᓯᒪᔪᑦ.  ᐳᓚᕋᖅᑐᓕᕆᓂᒃᑯᑦ, ᐹᖓ ᒪᑐᐃᖓᐃᓐᓇᖅᐳᖅ ᓄᓇᕐᔪᐊᕐᒧᑦ ᐊᐅᓪᓚᕈᓐᓇᖅᖢᓂ, ᑭᓯᐊᓂ ᐆᒻᒪᑎᒥᓂᒃ ᓇᓂᓯᓚᐅᖅᑐᖅ ᓄᓇᒥᓂ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᐅᐃᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᑦ