"ᐅᕙᓐᓄᓪᓕ, ᑐᓴᐅᒪᔪᓕᕆᔨᐅᓪᓗᖓ, ᐃᓄᖕᓂ ᐱᓕᕆᖃᑎᖃᕆᐊᒃᓴᖅ ᖁᕕᐊᒋᑦᑎᐊᖅᑕᕋ. ᖁᕕᐊᒋᑦᑎᐊᖅᑕᕋ ᐃᑲᔪᕐᓗᒋᑦ ᐅᓂᒃᑳᖏᓐᓂᒃ," ᐋᓐᔨᓚ ᐳᐊᓐᑐᕐ ᐅᓂᒃᑳᖅᑐᖅ. ᐊᔾᔨᒌᙱᕈᓘᔭᖅᑐᓂᒃ ᓴᓇᙳᐊᖅᑎᐅᕗᖅ ᓇᖕᒥᓂᖃᖅᑎᐅᓪᓗᓂᓗ ᑐᓴᐅᒪᑎᑦᑎᓂᕐᒧᑦ ᐅᖃᐅᔾᔪᐃᔨᐅᓪᓗᓂ, ᐱᓕᕆᐊᖃᖅᖢᓂ ᖃᓄᐃᓕᐅᖅᐸᓪᓕᐊᓂᐊᕐᓂᕐᒧᑦ ᑐᓴᐅᒪᑎᑦᑎᓂᕐᒥᒃ ᓄᓇᖃᖅᑳᖅᑐᑦ ᐃᓚᐅᑎᑕᐅᕙᖕᓂᖏᓐᓄᑦ. ᐃᑲᔪᖅᐸᒃᐳᖅ ᓇᖕᒥᓂᕆᔭᐅᔪᓂᒃ ᐱᑎᑦᑎᕙᒃᖢᓂ ᐃᓱᒪᒋᔭᒥᓂᒃ ᑕᒻᒪᖅᓯᒪᔪᖅᓯᐅᕐᓂᕐᒥᒡᓘᓐᓃᑦ ᓄᓇᖃᖅᑳᖅᑐᑦ ᐱᒋᐊᖅᑎᓯᒪᔭᖏᓐᓂᒃ, ᐃᑲᔪᖅᐸᒃᖢᓂᒋᑦ ᐊᑕᖐᔪᒥᒃ ᐱᓕᕆᖃᑎᖃᕐᓂᕐᒥᒃ ᓄᓇᖃᖅᑳᖅᑐᑦ ᓄᓇᓕᖏᓐᓂᒃ. 

ᑖᔅᓱᒥᖓ ᐃᖅᑲᓇᐃᔮᖃᓚᐅᖅᑳᕋᓂ, ᐊᔾᔨᒋᙱᑦᑎᐊᖅᑕᖓᓂᒃ ᐃᖅᑲᓇᐃᔮᖃᓚᐅᖅᐳᖅ. ᐸᐅᓐᑐᕐ ᓄᔭᓕᕆᔨᐅᓚᐅᖅᓯᒪᕗᖅ ᐊᕐᕌᒍᓄᑦ 6-ᓄᑦ, ᐃᓕᓐᓂᐊᓚᐅᖅᓯᒪᓪᓗᓂ AVEDA Institute-ᒥ. ᐃᓕᓐᓂᐊᓕᓚᐅᖅᓯᒪᕗᖅ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒥᒃ ᑭᓯᐊᓂ ᐃᕿᐊᙳᓕᓚᐅᖅᐳᖅ ᓄᔭᓕᕆᔨᐅᒃᑲᓐᓂᓕᖅᖢᓂᓗ. ᖃᐅᔨᓕᓚᐅᖅᐳᖅ ᒧᒥᐃᓐᓇᐅᔭᕐᓂᕐᒥᓂᒃ ᐃᓱᒪᓪᓗᓂᓗ ᐱᙳᐊᖅᑎᐅᓂᕐᒥᒃ ᐱᙳᐊᖅᑎᐅᓂᕐᒥᒃ ᓄᓇᖃᕋᒥ ᐱᖓᓐᓇᖅᐸᓯᖕᒥ. ᕕᒃᑑᕆᐊ ᐃᓕᓐᓂᐊᕐᕕᐊᓄᑦ ᐱᙳᐊᖅᑕᐅᕙᒃᑐᓄᑦ ᐃᓕᓐᓂᐊᓚᐅᖅᓯᒪᕗᖅ ᖁᑦᑎᖕᓂᖅᓴᒥᒡᓗ ᓇᓗᓇᐃᒃᑯᑕᖅᑖᖅᖢᓂ ᐱᙳᐊᖅᑎᐅᓂᕐᒧᑦ ᑕᕐᕆᔭᐅᓯᐅᕐᓂᕐᒧᑦ ᑕᓚᕖᓴᒃᑯᓪᓗ. ᕚᓐᑰᕙᒧᑦ ᓅᓚᐅᖅᓯᒪᕗᖅ ᐊᒻᒪ ᐋᓐᓂᐊᕕᒡᔪᐊᕐᓇᖅ ᓴᖅᑭᒻᒪᑦ, ᐃᓕᓐᓂᐊᕐᕕᖕᒧᑦ ᐅᑎᓚᐅᖅᐳᖅ ᐃᓕᑕᕆᔭᐅᔾᔪᑎᑖᕋᓱᒃᖢᓂ ᑐᓴᐅᒪᔪᓕᕆᔨᒻᒪᕆᐅᓂᕐᒧᑦ Royal Roads ᓯᓚᑦᑐᖅᓴᕐᕕᒡᔪᐊᕐᒥ. "ᐱᐅᒋᑦᑎᐊᓕᓚᐅᖅᑕᕋ ᑐᓴᐅᒪᔪᓕᕆᔨᒻᒪᕆᒃ," ᖁᕕᐊᓱᒃᑐᖅ. ᓇᒡᓕᒍᓱᑦᑎᐊᓚᐅᕆᕗᖅ ᐃᓕᓐᓂᐊᖅᑎᐅᖃᑎᒥᓂᒃ. ᑕᐃᑲᙵᑦ, ᓴᖅᑭᑦᑎᓚᐅᖅᓯᒪᕗᖅ Sweetgrass ᑭᒃᑯᑐᐃᓐᓇᓂᒃ ᑐᓴᐅᒪᑎᑦᑎᔨᓂᒃ ᐊᒻᒪ ᐃᓕᓐᓂᐊᖅᖢᓂ ᓱᕈᕐᓇᖅᑐᓂᒃ ᓂᐅᕐᕈᑎᖃᕈᓐᓇᕐᓂᕐᒥᒃ.

ᐊᕐᕌᒍᓂ ᐊᓂᒍᖅᑐᓂ ᐃᓕᑦᑎᓯᒪᕗᖅ ᐱᒻᒪᕆᐅᓂᖓᓂᒃ ᓇᖕᒥᓂᖅ−ᑭᒡᒐᖅᑐᐃᔪᓐᓇᕐᓂᕐᒥᒃ, ᐅᖃᐅᓯᖃᕈᓐᓇᕐᓂᕐᒥᒃ ᐱᒻᒪᕆᐅᒋᔭᖏᓐᓂᒃ ᐊᒻᒪ ᑐᓴᐅᒪᖃᑎᖃᕈᓐᓇᕐᓂᕐᒥᒃ ᐊᓯᖏᓐᓂᒃ ᓈᓚᒃᑎᓂᒃ. "ᐃᓱᒪᔪᖓ ᐱᒻᒪᕆᐅᓂᖓᓂᒃ ᐃᓱᒪᒥᐅᑕᖃᐃᓐᓇᐅᔭᕐᓗᓂ ᐊᒻᒪ ᐃᓱᒪᑦᑎᐊᖏᓐᓇᕐᓗᓂ ᐊᒻᒪ ᐃᓱᒪᒋᔭᖃᑦᑎᐊᖅᐸᒡᓗᓂ ᐃᖅᑲᓇᐃᔮᕐᓂ ᐊᒻᒪ ᐃᓕᖅᑯᓯᕆᔭᕐᓂ, ᐊᒻᒪ ᑕᐃᒪᓐᓇ ᓵᑕᒃᓴᐅᔪᓐᓇᕋᕕᑦ ᐊᒻᒪ ᖁᕕᐊᒋᔭᖃᕐᓗᑎᑦ ᐱᓕᕆᖃᑎᖃᕆᐊᒃᓴᖅ ᐊᓯᖕᓂᒃ ᓲᖃᐃᒻᒪ ᓇᖕᒥᓂᖅ ᐱᓕᕆᓲᖑᒐᕕᑦ," ᐅᖃᖅᑐᖅ. 

ᑐᓗᖅᑕᕈᑕᐅᕙᒃᑐᓄᑦ ᓵᙵᔭᖏᓐᓄᑦ, ᐅᖃᖅᑐᖅ, "ᐃᓱᒪᔪᖓ ᓱᓕ ᐊᔾᔨᒌᙱᕈᓘᔭᖅᑐᓂᒃ ᐊᒻᒪ ᐊᔾᔨᒌᒃᑎᑦᑎᓂᕐᒥᒃ ᐱᓕᕆᕝᕕᖕᓂ ᓄᓇᖃᖅᑳᖅᑐᓄᑦ ᐃᓄᖕᓄᑦ. ᐊᒥᓱᑎᒍᑦ ᓄᓇᖃᖅᑳᖅᑐᑐᐊᖑᒐᔪᒃᐳᒍᑦ ᐱᓕᕆᕝᕕᖕᓂ. ᐊᒃᓱᕉᑎᖃᒻᒪᕆᒃᐳᖓ ᓄᓇᖃᖅᑳᖅᑐᑦ ᐊᕐᓇᖏᓐᓂᒃ ᐊᓂᒍᐃᑦᑎᐊᕐᓂᖏᓐᓂᒃ ᐃᓂᒋᔭᕐᓂ. ᐃᓱᒪᒋᔭᖏᑦ ᐱᒻᒪᕆᐅᓇᓱᒋᕙᒃᑲ, ᐱᒻᒪᕆᐅᓇᓱᒋᕙᕋᓗ ᖃᐅᔨᒪᓗᓂ ᐱᔪᒪᓂᖃᑦᑎᐊᕐᓂᖏᓐᓂᒃ ᐊᒻᒪ ᐊᔪᙱᑦᑎᐊᕐᓂᖏᓐᓂᒃ. ᐅᖃᐅᓯᖃᓕᕌᖓᑦᑕ ᐊᔾᔨᒌᙱᑎᑦᑎᓂᕐᒥᒃ, ᐊᔾᔨᒌᒃᑎᑦᑎᓂᕐᒥᒃ, ᐃᓚᓕᐅᔾᔨᓂᕐᒥᒃ, ᑎᑎᖅᓯᑐᐃᓐᓇᖅᐸᙱᓚᖅ... ᐱᒻᒪᕆᐊᓘᕗᖅ ᑕᑯᓗᒋᑦ ᑕᐅᑐᙳᐊᖅᑕᖏᓐᓂ ᓇᖕᒥᓂᕆᔭᕐᓂ ... . ᓲᖃᐃᒻᒪ ᓄᓇᖃᖅᑳᖅᓯᒪᔪᑦ ᐊᔪᙱᑦᑐᒻᒪᕆᐊᓘᖕᒪᑕ. ᓯᓚᑐᔪᐊᓘᕗᑦ.... ᑕᑯᒍᕕᒋᑦ ᐃᓕᓐᓂᐊᕐᕕᒡᔪᐊᑦ ᑕᖅᑳᓂ, ᓇᖕᒥᓂᕆᔭᐅᔪᓕᒫᑦ ᑕᖅᑳᓂ, ᐅᒃᐱᕈᓱᑦᑎᐊᖅᐳᖓ ᓄᓇᖃᖅᑳᖅᓯᒪᔪᑦ ᐊᔪᙱᑦᑎᐊᕐᓂᖏᓐᓂᒃ. ᐱᒻᒪᕆᐅᕗᖅ ᐃᓕᖕᓄ ᑲᒻᐸᓂᐅᓪᓗᑎᑦ ᐊᒻᒪ ᐊᐅᓚᑦᑎᔨᒻᒪᕆᐅᓪᓗᑎᑦ ᐊᒻᒪ ᐃᖅᑲᓇᐃᔭᖅᑐᓕᕆᔨᐅᓪᓗᑎᑦ ᓄᓇᖃᖅᑳᖅᓯᒪᙱᑦᑐᓂ ᑎᒥᐅᔪᓂ, ᑕᒪᓐᓇ ᐃᓱᒪᒃᓴᖅᓯᐅᕈᑎᒋᑦᑎᐊᕐᓗᒍ."

ᑕᒪᒃᑯᐊ ᑐᓗᖅᑕᕈᑕᐅᕙᒃᑐᑦ ᐊᓂᒍᖅᑎᓐᓂᐊᕐᓗᒋᑦ, ᐸᐅᓐᑐᕐ ᐅᖃᓚᐅᖅᐳᖅ, "ᐃᓱᒪᔪᖓᓕ ᐱᒻᒪᕆᐊᓘᓂᖓᓂᒃ ᐱᐅᔪᒻᒪᕆᖕᒥᒃ, ᓴᙱᔪᒥᒃ ᑐᓴᐅᒪᖃᑎᒌᒍᑎᖃᕐᓗᓂ, ᐊᒻᒪᓗ ᐃᓱᒪᕗᖓ ᑕᓪᓕᒪᐃᓐᓇᕐᓂᒃ ᐃᓄᖕᓂ ᐱᔭᕆᐊᖃᕋᔭᖅᖢᓂ." ᓴᙱᔪᒥᒃ ᐊᐃᑉᐸᖃᖅᐳᖅ ᑕᒪᓐᓇᓗ ᐱᒻᒪᕆᐅᓇᓱᒋᓪᓗᓂᐅᒃ, ᐅᓂᒃᑳᖅᖢᓂ, "ᐱᒻᒪᕆᐅᓇᓱᒋᕙᕋ ᐊᖏᕐᕋᕈᕕᑦ ᐃᓄᖕᓄᑦ ᐃᓕᖕᓂᒃ ᐅᒃᐱᕆᔭᖃᖅᑐᓄᑦ, ᐊᒻᒪ ᐊᐃᑉᐸᕇᑦᑎᐊᕐᓗᓯ ᐊᒻᒪ ᐃᑲᔪᖃᑦᑕᐅᑎᑦᑎᐊᖅᖢᓯ ᑕᐅᑐᙳᐊᖅᑕᔅᓯᓐᓂᒃ." ᐅᒃᐱᕆᔭᖃᖅᐳᖅ ᐃᒻᒥᓂ ᐊᕙᓗᔭᐅᓯᒪᔭᕆᐊᖃᕐᓂᖓᓂ ᐊᐅᓚᔾᔭᒋᐊᖅᑎᐅᔪᓄᑦ ᐊᒻᒪ ᐱᒋᐊᖅᑎᑦᑎᔨᓄᑦ, ᐃᓱᒪᒋᓪᓗᒍ ᖃᓄᑎᒋ ᕿᐱᓗᒃᑕᐅᓲᖑᓂᖓᓂ ᐱᙳᐊᕐᓂᕐᒧᑦ. "ᖁᕕᐊᒋᔭᖃᑐᐃᓐᓇᖅᐳᖅ ᓇᒧᙵᐅᕙᓪᓕᐊᓂᕆᔭᐅᔪᒥᒃ ᑐᑭᓯᐅᒪᓂᕐᒥᒡᓗ ᑕᒪᕐᒥᑦᑎᐊᖅ ᐱᓕᕆᐊᒃᓴᐃᑦ ᐃᓚᒋᔭᐅᓂᖏᓐᓂᒃ. ᓵᓚᖃᕐᓂᑐᐃᓐᓇᐅᙱᓚᖅ, ᑭᓯᐊᓂᓕ ᖃᓄᖅ ᐃᓕᖕᓂᒃ ᑲᒪᒋᔪᓐᓇᕐᒪᖔᖅᐱᑦ, ᐃᓱᒪᒥᐅᑕᕆᔭᐃᑦ, ᐊᒻᒪ ᐃᓱᒪᐃᑦ ᐊᒃᑐᖅᑕᐅᓯᒪᓪᓚᕆᒃᐳᖅ ᐃᓄᖕᓄᑦ ᐊᕙᑎᖕᓃᑦᑐᓄᑦ, ᑕᐃᒪᐃᓐᓂᖓᓄᑦ ᐊᕙᓗᓯᒪᑦᑎᐊᕐᓗᑎᑦ ᖃᓄᐃᙱᑦᑎᐊᖅᑐᓂᒃ ᐃᓄᖕᓂ ᓇᖕᒥᓂᖅ ᐱᕙᓪᓕᐊᔪᒪᔪᓂᒃ, ᐃᖅᑲᓇᐃᔮᒥᓂᒃ ᐱᕈᖅᑎᑦᑎᕙᓪᓕᐊᔪᓂᒃ ᐊᒻᒪ ᖃᓄᐃᙱᑦᑎᐊᖅᑐᓂᒃ ᐱᖃᓐᓇᕇᒍᓯᕐᓂᒃ ᐃᓅᓯᖏᓐᓂ," ᐅᓂᒃᑳᕆᓪᓗᓂ.

ᓂᐱᓕᐅᕆᔨᐅᖃᑦᑕᖅᓯᒪᓪᓗᓂ, ᐹᓐᑐᕐ ᐅᖃᐅᓯᖃᖅᐳᖅ ᖃᓄᖅ ᐊᒃᑐᐊᓂᖃᕐᒪᖔᑦ ᐃᒃᐱᖕᓂᐊᔾᔪᑎᐅᑉ ᐊᐅᓚᓂᖓᓄᑦ ᐊᐅᓚᑦᑎᓂᕐᒥᒃ, ᑐᓂᓯᓪᓗᓂ, "ᐊᒃᓱᕉᑎᖃᒻᒪᕆᒃᐳᖓ ᓴᖅᑭᑎᑦᑎᓂᕐᒥᒃ ᐊᔪᙱᓐᓂᕆᔭᐅᔪᒥᒃ ᐃᒃᓯᕚᕈᓐᓇᕐᓂᕐᒥᒃ ᐃᓗᐊᙱᑦᑐᒥ, ᓲᖃᐃᒻᒪ ᐃᒃᐱᒋᒐᒃᑯ ᑭᖑᓪᓕᕐᒥ ᓄᑖᙳᖅᐸᓪᓕᐊᓂᖅ, ᑭᖑᓪᓕᕐᒥ ᐃᓱᒪᒋᔭᐅᔪᖅ, ᑭᖑᓪᓕᕐᒥ ᐱᕈᖅᐸᓪᓕᐊᓂᖅ ᐱᔪᓐᓇᕐᓂᕐᓂ, ᐃᒡᓗᐊᓃᖏᓐᓇᐅᔭᕐᒪᑦ ᐃᓗᐊᙱᓕᐅᕈᑎᒧᑦ." ᐊᒃᓱᕉᑎᖃᖅᐸᒃᖢᓂ ᐃᓱᒪᒃᓴᖅᓯᐅᕐᓂᕐᒥᒃ, ᓂᐱᓕᐅᕆᓂᖅ ᑐᑭᖃᕐᓂᖅᓴᐅᓚᐅᖅᐳᖅ ᑖᔅᓱᒧᖓ. ᐊᔪᕈᓐᓃᖅᓴᕐᓂᖅ ᐊᒃᑐᐊᓂᖃᖅᐳᖅ ᐊᑕᐅᓯᐅᙱᑦᑐᒥᒃ ᐃᓱᒪᖃᕐᓂᕐᒥᒃ ᐊᒻᒪ ᐅᓇᑕᕐᓂᕐᒥᒃ ᕿᒫᓂᕐᒥᒡᓘᓐᓃᑦ. ᐹᓐᑐᕆᒧᑦ, ᐃᒻᒥᓂᒃ ᐱᓕᕆᐃᓐᓇᐅᔭᓚᐅᖅᐳᖅ ᐃᒃᐱᒋᔭᖃᕈᒪᙱᖦᖢᓂ. ᐊᓯᐊᑦᑕᐅᖅ ᐊᔪᕈᓐᓃᖅᓴᖅᑎᑕᐅᓚᐅᕐᒥᔪᖅ ᐹᓐᑐᕆ ᐅᓇᐅᓚᐅᖅᐳᖅ, ᖁᐊᖅᓵᖅᓯᒪᓂᖅ ᑮᓇᐅᔭᓂᒃ, ᐅᖃᐅᓯᖃᖅᖢᓂ ᑕᐃᔅᓱᒪᓂᑐᖃᖅ ᐊᒃᑐᖅᓯᓂᐅᕙᒃᑐᓂᒃ ᑮᓇᐅᔭᒧᑦ ᐊᒻᒪᓗ ᓄᑭᓪᓚᐅᑎᑖᖅᑎᑦᑎᒃᑲᓐᓂᖅᐸᒃᖢᓂ ᐊᑕᓂᕆᔭᖏᓐᓂᒃ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐱᒻᒪᕆᐊᓘᕗᖅ ᑭᓱᑐᐃᓐᓇᓄᑦ ᐅᐸᒍᒪᙱᖦᖢᓂ, ᓲᖃᐃᒻᒪ ᓂᑲᓪᓗᖓᓐᓇᖅ ᒥᑭᑦᑐᑯᓘᑎᑦᑎᔪᓐᓇᕐᒪᑦ ᐃᓕᖕᓂᒡᓗ ᖁᐊᖅᓵᕐᓇᖅᑐᒦᑎᑦᑎᙱᖦᖢᓂ ᐊᑐᓗᐊᖅᑕᐃᓕᒪᑎᑦᑎᓗᓂᓗ ᐆᒻᒪᕆᖕᓂᕐᒥᒃ ᐊᓐᓇᐅᒪᓇᓱᖕᓂᕐᒧᑦ." ᐃᓱᒪᒃᑲᓐᓂᖅᖢᓂ ᐊᖏᕐᕋᒥᓂ ᐊᐅᓪᓚᕈᒪᓪᓗᓂ ᓯᓚᑦᑐᖅᓴᕐᕕᒡᔪᐊᓕᐊᕐᓗᓂ, ᐃᒪᓐᓇᐅᖁᔨᕗᖅ, ᐱᕙᒌᔭᕐᓗᓂ ᑭᓱᑦ ᐊᑐᖅᑕᐅᕙᒃᑐᑦ ᓄᓇᓖᓪᓗ ᒪᓂᒪᖕᒪᖔᑕ ᑲᑎᖃᑎᒋᔪᓐᓇᕐᓗᒋᑦ ᐊᐅᔭᐅᓂᐊᖅᑐᖅ ᑲᑎᖃᑎᒋᔪᓐᓇᕐᓗᓂᒋᓪᓗ, ᓲᕐᓗ ᐱᖃᓐᓇᕇᖕᓂᕐᒧᑦ ᐃᓂᒋᔭᐅᕙᒃᑐᑦ, ᐃᓚᐅᕝᕕᒋᓗᒋᓪᓗ ᐱᓕᕆᐊᒃᓴᕆᔭᖏᓐᓄᑦ. ᑕᐃᒪᐃᓕᐅᖃᑦᑕᖁᔨᕗᖅ ᐱᔭᒃᓴᖃᕐᔪᐊᕐᓇᕋᓗᐊᖅᑎᓪᓗᒍ ᐃᓕᓐᓂᐊᕐᓇᐅᑉ ᐊᕐᕌᒍᖓᓂ. "ᐱᒻᒪᕆᐊᓘᕗᖅ ᐃᓕᖕᓂᒃ ᓂᕆᖃᑦᑕᕐᓗᓂ ᖃᐅᑕᒫᖅᓯᐅᑎᓂᒃ ᓄᓇᓕᖕᓂ," ᐅᖃᖅᑐᖅ. 

ᐱᓕᕆᖃᑎᖃᖅᐸᒃᖢᓂ ᐃᓄᖕᓂᒃ ᐃᑲᔪᖅᐸᒃᖢᓂᒋᓪᓗ ᐅᓂᒃᑳᕐᕕᒋᔭᖏᓐᓂᒃ, ᐋᓐᔨᓚ ᐳᐊᓐᑐᕐ ᐃᓅᓇᓱᐊᖅᐸᒃᐳᖅ ᐃᓅᓯᖃᖅᐸᒃᖢᓂᓗ ᑐᓴᐅᒪᑎᑦᑎᔨᒻᒪᕆᐅᓪᓗᓂ. ᐃᑲᔪᖅᐸᒃᖢᓂ ᓂᐱᒃᑯᑦ ᒪᒥᓴᕐᓂᕐᒥᒃ, ᐃᑲᔪᖅᐸᒃᑭᕗᖅ ᐃᓄᖕᓂ ᓅᑉᐸᓪᓕᐊᓂᕐᒥᒃ ᐅᓇᑕᕐᓂᕐᒥᒃ ᕿᒫᓂᕐᒥᒡᓘᓐᓃᑦ ᐱᐅᓂᖅᓴᒧᑦ ᐃᓂᒧᑦ. ᓄᔭᓕᕆᔨᐅᓂᕐᒥᒃ ᐱᙳᐊᖅᑎᐅᓂᕐᒧᑦ ᑐᓴᐅᒪᖃᑎᒌᖕᓂᕐᒧᑦ, ᓇᓂᓯᓯᒪᓕᖅᐳᖅ ᐊᖅᑯᑎᒃᓴᒥᒃ ᐃᑲᔪᕈᑎᒋᓯᒪᔭᒥᓂᒃ ᐃᑲᔪᕐᓂᕐᒧᑦ ᐃᓄᖕᓂ ᖁᕕᐊᓱᒍᑎᒋᕙᒃᑕᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.