Beauty and business: ᕕᓕ ᔩᓐ ᑳᓕᐅᑉ ᐃᓕᓐᓂᐊᒐᒃᓴᑦᑎᐊᕙᖏᑦ ᐊᖏᕐᕋᒥᓂᒃ
ᐱᒋᐊᓚᐅᖅᓯᒪᔪᖅ ᑲᔾᔮᓇᖅᑐᒥᒃ ᐊᒻᒪᓗ ᓇᓂᓯᓕᓚᐅᖅᑐᖅ ᐱᐅᔪᒻᒪᕆᒻᒥᒃ ᓇᒻᒥᓂᖃᕐᓂᕐᒧᑦ ᐃᓕᓐᓂᐊᕐᓂᕐᒥᒃ. ᕕᓕ ᔩᓐ ᑳᓕ ᐃᓅᓚᐅᖅᓯᒪᔪᖅ ᐱᕈᖅᓴᓪᓗᓂᓗ ᐃᓅᕕᖕᒥ, ᓄᓇᑦᓯᐊᒥ ᑭᓯᐊᓂ ᒫᓐᓇ ᐃᐊᑦᒪᓐᑕᓐᒥ ᓄᓇᖃᓕᖅᑐᖅ, ᐋᓪᐴᑕᒥ ᓅᓚᐅᖅᓯᒪᔪᖅ 2021−ᒥ ᓄᔭᓕᕆᔨᙳᕈᒪᓪᓗᓂ. ᐊᕐᕌᒍ ᐊᓂᒍᖅᑎᓪᓗᒍ, ᓇᓗᓇᐃᒃᑯᑕᖃᓕᓚᐅᖅᑐᖅ ᓄᔭᓕᕆᔨᐅᓂᕐᒧᑦ ᐊᒻᒪᓗ ᐱᓕᒻᒪᒃᓴᒃᑲᓐᓂᖅᖢᓂ ᓛᔅ ᐊᒻᒪᓗ ᑯᑭᓕᕆᔨᐅᓂᕐᒧᑦ, ᐱᐅᔪᐊᓘᓕᖅᖢᓂ ᐱᖓᓱᐃᖅᖢᓂ ᑲᑉᐱᐊᓵᕆᓂᕐᒧᑦ. ᒫᓐᓇ, ᐃᓕᓐᓂᐊᕆᐊᒃᑲᓐᓂᓕᖅᑐᖅ ᖁᖅᓱᖅᑕᒥ ᑐᕆᐴᓪ ᓯᓚᑦᑐᖅᓴᕐᕕᖕᒥ ᓯᕗᓪᓕᖅᐹᒥ ᐊᕐᕌᒍᒥ ᐊᕐᕌᒍᓄᑦ ᐱᖓᓱᓄᑦ ᓄᓇᖃᖅᑳᖅᓯᒪᔪᑦ ᐃᓕᑕᕆᔭᐅᔾᔪᑎᑖᖅᖢᓂ ᐊᒡᓚᕝᕕᓕᕆᓂᕐᒧᑦ ᐊᒻᒪ ᐊᐅᓚᑦᑎᔨᐅᓂᕐᒧᑦ ᓄᔭᓕᕆᓯᒋᐊᖅᑎᓪᓗᒍ ᐃᓕᓐᓂᐊᖅᐸᓪᓕᐊᓪᓗᓂ ᐃᖅᑲᓇᐃᔮᖅᑖᕐᓂᕐᒧᑦ.
ᓯᕗᓪᓕᕐᒥ, ᑳᓕ ᐸᕐᓇᓚᐅᖅᑐᖅ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᕆᐊᕈᒪᓪᓗᓂ ᓄᐊᔅᕙᔅᑦᒥ ᐱᖃᓐᓇᕆᔭᖓ ᖃᐅᔨᑎᓪᓗᒍ ᐱᓕᕆᐊᒃᓴᒧᑦ ᐊᖏᖅᑕᐅᓯᒪᓂᕐᒥᓂᒃ. ᕿᒥᕐᕈᒐᒥᐅᒃ, ᖃᐅᔨᓚᐅᖅᑐᖅ ᐱᐅᒍᓐᓃᕐᓂᖓᓂᒃ ᐊᒻᒪᓗ ᐱᓇᓱᐊᕈᒪᓕᖅᓱᓂ. ᑭᖑᓂᐊᒍᑦ, ᖃᐅᔨᓕᕐᖢᓂ ᐊᔾᔨᖓᓂᒃ ᐱᓕᕆᐊᒃᓴᒧᐊᕐᖢᓂ ᐱᖃᓐᓇᕆᔭᖓᑎᑐᑦ ᓂᕈᐊᕆᐊᖃᕐᖢᓂᓗ ᐊᑯᓐᓂᖏᓐᓂ ᒪᕐᕉᒃ ᐱᓕᕆᐊᒃᓴᒃ. ᓂᕈᐊᓕᓚᐅᖅᑐᖅ ᖁᖅᓱᖅᑕᒥᒃ, ᖁᕕᐊᒋᑦᑎᐊᖅᑕᖓ.
"ᑕᕝᕙᓂᑦᑕᐃᓐᓇᖅ, ᑭᓯᐊᓂ ᑕᒻᒪᙱᖦᖢᖓ ᐱᓕᕆᐊᒃᓴᒦᑉᐸᓪᓚᐃᔪᖓ ᐱᔭᕆᐊᖃᖅᑕᓐᓂᒃ," ᒥᑕᖅᑐᖅ.
ᒫᓐᓇ ᐱᓕᕆᐊᕆᔭᖓᓂ, ᑳᓕ ᐃᓕᑦᑎᕙᓪᓕᐊᕗᖅ ᓇᖕᒥᓂᖃᕐᓂᕐᒥᒃ, ᑕᒪᓐᓇᓗ ᐃᒃᐱᒋᔭᖓ ᐃᑲᔪᕐᓂᐊᖅᖢᓂᐅᒃ ᐅᑎᕈᓂ ᐊᖏᕐᕋᕆᔭᒥᓄᑦ ᒪᓂᒪᑎᑦᑎᓕᕐᓗᓂᓗ ᓄᔭᓕᕆᓂᕐᒥᒃ ᐱᐅᒃᓴᕐᓂᕐᒧᓪᓗ ᐱᔨᑦᑎᕋᕐᓂᕆᔭᐅᕙᒃᑐᓂᒃ ᐱᓕᕆᕝᕕᒋᔭᐅᕙᒃᑐᓄᑦ ᓄᓇᓕᖕᒥᓂ. ᐅᒃᐱᕈᓱᑦᑎᐊᖅᑐᖅ ᓇᖕᒥᓂᖃᕈᓐᓇᑦᑎᐊᕐᓂᐊᕐᓂᖓᓂᒃ ᓇᖕᒥᓂᖃᕈᓐᓇᖅᓯᑦᑎᐊᕐᓗᓂ ᐊᒻᒪ ᖃᐅᔨᒪᓕᕐᓗᓂ.
ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐃᓱᒪᒋᔭᖃᖅᑐᓄᑦ ᕿᒪᐃᔪᒪᓪᓗᑎᒃ ᓄᓇᒥᓂᒃ ᐱᓇᔪᒍᒪᓗᑎᒃ ᐃᓕᓐᓂᐊᖅᑕᒥᓂᒃ, "Just do it. ᓲᖃᐃᒻᒪᓕ ᐊᑕᐅᓯᐊᕐᓗᖓ ᐃᓅᓯᕐᓂ... ᐊᖏᕐᕋᐃᑦ ᕿᒪᒋᐊᖃᖅᑕᐃᑦ... ᐊᐅᓚᓗᓂ, ᐊᐅᓪᓚᕐᓗᓂ. ᒪᑐᐃᖅᓯᕗᖅ ᐊᔾᔨᒌᙱᑦᑐᓂᒃ ᐃᓱᒪᒋᔭᐅᔪᓂᒃ ᐊᔾᔨᒌᙱᑦᑐᓂᒡᓗ ᐃᓱᒪᒥᐅᑕᖃᕈᓐᓇᕐᓂᕐᒥᒃ. ᐊᖏᕐᕋᖅ ᑕᐃᑲᓃᖏᓐᓇᕐᓂᐊᖅᑐᖅ. ᐅᑎᖏᓐᓇᕈᓐᓇᖅᑐᑎᑦ, ᖃᓄᑐᐃᓐᓇᖅ. ᓄᓇᓕᐸᐅᔭᖅ ᐊᓕᐊᓇᐃᒋᑦᑎᐊᖅᑕᕋ, ᐱᐅᑦᑎᐊᖅᖢᓂᓗ, ᑭᓯᐊᓂ ᑕᑯᕗᖓ ᐅᑎᒧᑦ ᐃᖏᕐᕋᓪᓗᖓ ᐅᓪᓗᕐᒥ ᐊᑕᐅᓯᕐᒥ." ᓇᓗᓇᐃᖅᓯᓚᐅᕐᒥᔪᖅ ᐱᕕᔅᓴᓕᒫᓂᑦ ᐊᑐᐃᓐᓇᐅᔪᓂᑦ ᓄᓇᓕᐸᐅᔭᒥᑦ.
ᐊᐳᖅᑕᕈᑕᐅᓕᕌᖓᑦ, ᑳᓕ ᐊᒃᓱᕉᑎᖃᖃᑦᑕᖅᓯᒪᖕᒪᑦ ᐊᓈᓇᐅᓪᓗᓂ ᐃᓕᓐᓂᐊᖅᑎᐅᓪᓗᓂᓗ. ᑖᓐᓇ ᕿᑐᕐᖓᖏᓪᓗ ᐊᒃᓱᕈᖃᑦᑕᖅᓯᒪᕗᑦ ᐊᖓᔪᖅᑳᒥᓂᒃ, ᐱᖃᓐᓇᕆᔭᒥᓂᒃ ᐃᓚᒥᓂᒡᓗ ᕿᒪᐃᓯᒪᓪᓗᑎᒃ. ᐊᓪᓛᑦ ᐃᑦᒪᓐᑕᓐᑎᑐᑦ, ᐃᓄᑑᓪᓗᓂ ᖃᐅᔨᓚᐅᖅᑐᖅ ᐊᒻᒪᓗ ᐃᑲᔪᖅᑐᖅᑕᐅᑦᑎᐊᖃᑦᑕᖏᒻᒪᑦ ᐊᒥᓱᒃᑲᓐᓂᐅᑎᓪᓗᒋᑦ ᐃᓄᐃᑦ. ᓄᖅᑲᖓᑲᐃᓐᓇᕐᓂᖅ ᐊᖏᕐᕋᒧᑦ ᐊᒻᒪᓗ ᐳᓛᕆᐊᕐᓂᖅ ᐃᑲᔫᑎᖃᖅᑐᖅ, ᖃᐅᔨᔪᖅ.
ᓇᓕᒧᒌᒃᑎᓐᓇᓱᒃᓗᒍ ᐃᓱᒪᖓ, ᑳᓕ ᐃᖃᐃᓕᓴᕐᕕᖕᒦᖃᑦᑕᖅᑐᖅ, ᐃᑲᔪᕐᖢᓂ ᐱᕙᓪᓕᐊᑦᑎᐊᕐᓂᕐᒥ ᐱᐅᓂᖅᓴᒥᒃᓗ ᐃᓅᓪᓗᓂ. ᑕᖃᖓᖅᑰᔨᒃᐸᑦ ᓯᕘᕋᒍᓂᓘᓐᓃᑦ, ᐱᓕᕆᓗᓂ ᐊᓯᔾᔩᕐᔪᐊᕈᓐᓇᖅᑐᖅ. ᓯᕗᓪᓕᕐᒥ, ᐆᒻᒪᕆᑐᐃᓐᓇᓚᐅᖅᑐᖅ ᑭᓯᐊᓂ ᖃᐅᔨᓕᓚᐅᖅᑐᖅ ᐱᐅᓯᕚᓪᓕᖅᐸᓪᓕᐊᓂᖓᓂᒃ ᐃᓱᒪᖓ ᑕᐃᒪᐃᒻᒪᓪᓗ ᑎᓕᐅᕆᓪᓗᓂ ᐊᓯᖏᓐᓂᒃ ᐃᓄᖕᓂᒃ ᐆᒃᑐᓗᐊᖁᔨᓪᓗᓂ ᐱᔪᓐᓇᖅᑕᓕᒫᖓᒍᑦ.
ᑐᓱᓐᓇᕐᓂᖓᓄᑦ, ᑳᓕ ᐊᕐᓇᐅᖃᑎᒥᓄᑦ ᑕᐅᑐᒃᐳᖅ ᐃᓚᒥᓂᒡᓗ, ᐊᓈᓇᖓᑎᑐᑦ. ᑳᓕᐅᑉ ᐊᓈᓇᖓ ᐱᔭᕇᖅᓯᓪᓗᓂ ᖁᑦᑎᖕᓂᖅᓴᒥ ᐃᓕᓐᓂᐊᕐᕕᖕᒥ ᓯᓚᑦᑐᖅᓴᕐᕕᖕᒥᓗ ᐊᐃᑉᐸᖃᙱᖦᖢᓂ ᐊᓈᓇᐅᓪᓗᓂ ᐃᑲᔪᕐᖢᓂᒋᓪᓗ ᐊᒃᓱᕈᕐᖢᑎᒃ ᐃᖅᑲᓇᐃᔭᕐᖢᑎᒃ. ᐊᓈᓇᖓ ᒫᓐᓇ ᐊᓈᓇᑦᑎᐊᖑᓕᖅᑐᖅ 8-ᓂᒃ ᐃᕐᖑᑕᖃᖅᖢᓂ 13 ᑐᖔᓂ ᐅᑭᐅᓖᑦ. ᐅᐱᒍᓱᒃᑐᖅ ᖃᓄᖅ ᐊᒃᓱᕈᖅᖢᓂ ᐱᓕᕆᓚᐅᕐᓂᕐᒥᓂᒃ ᑭᓱᓕᒫᓄᑦ ᐱᔪᒪᔭᖏᓐᓄᑦ. "ᐃᓅᓱᒃᑑᑎᓪᓗᖓ, ᐊᒃᓱᕈᐃᓐᓇᓲᖑᔪᖓ. ᐱᔭᕇᖅᓯᔪᒪᐃᓐᓇᐅᔭᖅᑐᖓ, ᐊᑐᕐᔪᐊᖅᓯᒪᓪᓗᖓ, ᐊᐅᓪᓚᑲᑕᒃᐸᒃᖢᖓ, ᑭᓱᓕᒫᓂᒃ," ᓇᓗᓇᐃᖅᓯᓪᓗᓂ.
ᐱᒋᐊᕐᖢᓂ ᐱᐅᒻᒪᕆᒃᑐᒥᒃ ᐃᓕᓐᓂᐊᒐᒃᓴᒥᒃ ᐊᒻᒪᓗ ᐱᒋᐊᕐᖢᓂ ᐱᐅᔪᒻᒪᕆᖕᒥ ᐱᓯᓂᓯᒧᑦ ᐃᓕᓐᓂᐊᕐᓂᕐᒥᒃ ᐱᕕᒃᓴᐅᔪᒥᑦ, ᕕᓕ ᔩᓐ ᑳᓕ ᑐᙵᕕᓕᐅᖅᑐᖅ ᐃᖅᑲᓇᐃᔮᕆᔪᒪᔭᒥᓄᑦ ᐱᕈᖅᑎᒍᓐᓇᖅᑕᖓᓂᑦ. ᐊᓈᓇᐅᓪᓗᓂ ᐃᓕᓐᓂᐊᖅᑎᐅᓪᓗᓂᓗ ᐊᖏᕐᕋᒥᓂᒃ ᐅᖓᓯᒃᑐᒦᖦᖢᓂ, ᐊᔾᔨᐅᙱᑦᑐᓂᒃ ᐊᒃᓱᕈᕐᓇᖅᑐᖅᓯᐅᕈᑎᖃᖃᑦᑕᖅᐳᖅ, ᑭᓯᐊᓂ ᐊᔾᔨᐅᙱᑦᑐᒥᒃ ᐃᓕᑦᑎᔪᓐᓇᕆᕗᖅ ᐱᕈᖅᐸᓪᓕᐊᓗᓂᓗ ᐱᔨᑦᑎᕋᑦᑎᐊᕐᓂᐊᖅᖢᓂ ᐊᖏᕐᕋᕈᓂ. ᓇᒡᓕᒍᓱᒃᖢᓂ ᓄᓇᓕᐸᐅᔭᕐᒥ ᐊᒻᒪ ᖁᔭᓕᓪᓗᓂ ᓇᑭᙶᖅᓯᒪᓂᕐᒥᓂᒃ, ᐃᓚᒥᓂᒃ ᐱᔪᒃᓯᑎᑦᑎᑦᑎᐊᓲᖅ ᐊᒻᒪ ᐃᓗᒥᒍᑦ ᓴᙱᓂᖃᓕᖅᐸᒃᖢᓂ ᐃᖃᐃᓕᓴᖅᖢᓂ ᐊᔭᐅᖅᑐᖅᖢᓂᐅᒃ ᐱᓕᕆᐊᒃᑯᑦ ᑲᔪᓯᑦᑎᐊᕈᑎᒋᓂᐊᕐᒪᒍ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕋᕕᑦ ᑖᔅᓱᒥᖓ ᑎᑎᕋᖅᓯᒪᔪᒥᑦ!
