"ᓇᖕᒥᓂᖃᕐᓂᕋᓚᐅᖅᑐᖓ. ᐅᖃᕈᒪᖅᑲᐅᒐᒪ ᐊᖏᔪᒥᒃ ᓈᓴᐅᑎᓕᐅᖁᔨᓪᓗᖓ. ᓇᒡᓕᒋᔭᕋ. ᓇᓪᓕᒋᔭᕋ ᓇᓂᒐᒃᑯ. ᐊᓕᐊᓇᐃᒋᑦᑎᐊᖅᑕᕋ," ᐹᐱ ᕋᓵᑦ, ᐱᒋᐊᖅᑎᑦᑎᔨ ᐊᒻᒪ ᐊᐅᓚᑦᑎᔨᒻᒪᕆᒃ ᕘᕐ ᒍᕉᔅ-ᒧᑦ. ᔭᔾᔭᐃᓇᒥᐅᑕᒃᓴᔭ, ᓴᔅᑳᑦᓱᐊᓐᒥᐅᑕᒃᓴᔭᖅ, ᑳᓪᒍᕆᒥᐅᑕᐅᓕᖅᑐᖅ, ᐋᓪᐴᑕᒥᐅᑕᐅᓕᖅᑐᖅ.

ᐃᐅᓪᐴᑕᒧᑦ ᓅᓚᐅᖅᓯᒪᔪᖅ ᒪᓐᑐᕆᐊᒥᑦ ᐃᖅᑲᓇᐃᔭᕆᐊᖅᑐᖅᖢᓂ ᐅᖅᓱᐊᓗᒃᓴᖅᓯᐅᕐᓂᕐᒧᑦ ᐳᓪᓚᒃᓴᖅᓯᐅᕐᓂᕐᒧᓪᓗ, ᐃᓱᒪᑕᙳᖅᖢᓂ ᑮᓇᐅᔭᓕᐅᕐᔪᐊᖅᖢᓂᓗ 2016-ᒥ. ᑖᓐᓇ ᐃᖅᑲᓇᐃᔭᖅᑎᖏᓪᓗ ᓄᖅᑲᖅᑎᑕᐅᑎᓪᓗᒋᑦ, ᐊᒃᓱᕈᓚᐅᖅᑐᖅ ᓇᓂᓯᓇᓱᒃᖢᓂ ᓄᓇᖃᖅᑳᖅᓯᒪᔪᓂᑦ ᐊᕐᓇᒥᑦ ᑲᑭᖅᖢᖕᓂᑦ. Racette−ᑯᑦ ᓴᖅᑭᑎᑦᑎᓚᐅᖅᐳᑦ Virtual Gurus−ᒥᒃ ᓴᖅᑭᑎᑦᑎᔪᒪᓪᓗᑎᒃ ᐃᖅᑲᓇᐃᔮᒃᓴᒥᒃ ᓇᖕᒥᓂᖅ, ᓇᖕᒥᓂᖅ ᐃᖅᑲᓇᐃᔭᖅᑎᑦᑎᓕᕐᓂᕐᒥᒃ ᖃᕆᑕᐅᔭᒃᑯᑦ ᐃᑲᔪᖅᑎᒋᔭᐅᓂᐊᓕᖅᑐᒥᒃ ᐊᖏᕐᕋᕆᔭᒥᓂ.

2017-2018−ᒥ, ᓯᕗᓪᓕᖅᐹᒥ ᐃᑲᔪᖅᑎᑖᓚᐅᖅᑐᖅ ᐊᒻᒪ 2020−ᒥ ᓯᕗᓪᓕᖅᐹᒥ ᑮᓇᐅᔭᓂᒃ ᒪᑐᓯᓪᓗᓂ. ᓯᕗᓂᐊᒍᓪᓕ, Racette boot-ᑯᑦ ᐊᔪᓕᖅᑎᑦᑎᓚᐅᖅᐳᑦ ᖃᕋᓴᐅᔭᒃᑯᑦ ᐱᓕᕆᔨᐅᔪᓂᒃ ᐊᒻᒪᓗ 1.8-ᒥᓕᐊᓂᒃ ᑮᓇᐅᔭᓂᒃ ᐃᓯᖅᑎᑦᑎᓪᓗᑎᒃ ᑲᒻᐸᓂᒃᑯᑦ ᐱᔨᑦᑎᕋᐅᑎᖏᓐᓂᒃ ᐃᓄᑑᓪᓗᑎᒃ. ᑮᓇᐅᔭᓂᒃ ᐱᕈᖅᓴᐃᓚᐅᖅᑐᖅ ᐱᓕᕆᔾᔪᑎᓂᒃ ᐱᕈᖅᓴᐃᓂᕐᒧᑦ ᐱᕈᖅᐸᓪᓕᐊᖁᓪᓗᒋᑦ.

"ᒫᓐᓇ ᕘᑐ ᒍᕉᔅ ᒪᕐᕉᓕᖅᑲᖓᕗᖅ ᐊᔪᙱᓐᓂᖃᖅᖢᓂ ᓂᐅᕐᕈᑎᖃᕐᕕᐅᓪᓗᓂ, ᐱᓕᕆᕙᒃᖢᑕᓗ ᐱᔨᑦᑎᕋᖅᑕᐅᑦᑎᐊᙱᑦᑐᓂᒃ ᓄᓇᓕᖕᓂ ᐃᓄᖕᓂᓪᓗ, ᑕᐃᒪᐃᒻᒪᑦ ᕿᕐᓂᖅᑐᖅ, ᓄᓇᖃᖅᑳᖅᓯᒪᔪᑦ, ᐃᓄᐃᑦ ᑲᓚᓖᑦ, ᐃᓄᐃᑦ ᑎᒥᒥᒍᑦ ᐊᔪᕈᑎᓖᑦ, ᑭᖑᕚᕇᑦ ᐊᒻᒪ ᐃᓄᑐᐊᑦ ᐊᓈᓇᐃᑦ, ᑐᙵᕕᖓᒍᑦ, ᐊᒻᒪ ᐱᔪᓐᓇᕐᓂᖃᖅᖢᑕ ᖃᐅᔨᒪᑦᑎᐊᖅᑐᓂᒃ ᓇᓕᒧᒌᒃᑎᓐᓇᓱᒃᖢᒋᑦ ᓇᖕᒥᓂᖃᕐᕕᐅᔪᓄᑦ ᐱᔨᑦᑎᕋᓲᓄᑦ," ᐱᙳᐊᖃᑎᒋᓲᖏᑦ. 

Racette ᒫᓐᓇ 50-ᓂᒃ ᐅᓪᓗᓕᒫᖅ ᐃᖅᑲᓇᐃᔭᖅᑎᖃᓕᖅᑐᖅ ᐊᒻᒪ 900-ᓂᒃ ᐃᓄᖕᓂᒃ ᐃᖅᑲᓇᐃᔭᖅᑐᓂᒃ, 2000-ᑲᓐᓂᕐᓂᒃ ᐃᖅᑲᓇᐃᔭᖅᑎᑖᒃᑲᓐᓂᓛᕈᒪᓪᓗᑎᒃ. "ᐊᖏᓛᖑᒐᑦᑕ ᑲᓇᑕᒥ, ᑎᓴᒪᒋᔭᐅᓪᓗᓂ ᐊᖏᓂᖅᐹᖑᓪᓗᓂ ᒥᐊᓕᒐᐃᑦ ᓄᓇᖓᓐᓂ ᐊᒻᒪ ᒥᐊᓕᒐᐃᑦ ᓄᓇᖓᓐᓃᖦᖢᑕ ᐱᖅᓯᖅᑎᓪᓗᒍ. ᒥᐊᓕᒐᐃᑦ ᓄᓇᖓᓐᓅᓚᐅᖅᓯᒪᕗᒍᑦ ᐊᕐᕌᒍ ᐊᕝᕙᖓᓂᓪᓗ ᐊᒻᒪ ᒫᓐᓇ 60%-ᐸᓗᖏᑦ ᑮᓇᐅᔭᖅᑖᕆᕙᑦᑕᕗᑦ ᒥᐊᓕᒐᐃᑦ ᓄᓇᖓᓐᓃᙶᖅᐳᑦ. ᑕᒫᓂ 70-80 ᒥᓕᐊᓐ ᒥᑦᓵᓃᐸᓗᑦᑐᒍᑦ ᒫᓐᓇ," ᑲᔪᓯᓪᓗᓂ. 

ᐊᑐᓚᐅᖅᑕᖓ ᓯᕗᒻᒧᐊᒃᑎᑉᐸᓪᓕᐊᖏᓐᓇᖅᖢᓂᐅᒃ. "ᐃᖅᑲᓇᐃᔮᖅᑖᖅᑎᓚᐅᖅᐸᕋ ᐅᕙᓐᓄᑦ ᓲᖃᐃᒻᒪ ᐃᖅᑲᓇᐃᔭᖅᑎᑦᑎᔪᖃᕋᔭᙱᒻᒪᑦ ᐅᕙᓐᓄᑦ ᑕᐃᒪᓕ ᒫᓐᓇ ᐃᖅᑲᓇᐃᔮᒃᓴᖃᖅᑎᑦᑎᔭᕆᐊᖃᓕᖅᐳᖓ ᐃᖅᑲᓇᐃᔭᕐᓂᐊᖅᑐᓂᒃ ᑕᐃᒃᑯᓄᖓ ᐃᖅᑲᓇᐃᔮᖅᑖᕋᔭᙱᑦᑐᓄᑦ...ᑕᐃᒪᓐᓇ ᖃᐅᑕᒫᑦ ᑐᐹᕈᑎᒋᖃᑦᑕᖅᑕᕋ ᐊᒃᓱᕈᖅᖢᖓ ᐱᓕᕆᑎᓪᓗᖓ ᑲᒻᐸᓂᒧᑦ ᓲᖃᐃᒻᒪ ᐱᕕᖃᖅᑎᑦᑐᒪᒐᒃᑭᑦ ᐱᕕᖃᙱᑐᐃᓐᓇᕆᐊᓖᑦ, ᐅᕙᖓᑎᑐᑦ."

ᐃᓱᒪᓚᐅᙱᑦᑐᖅ ᑐᑭᒧᐊᒍᑎᖃᕋᓱᒋᙱᖦᖢᓂ ᓇᖕᒥᓂᖃᕐᓗᓂ ᑭᓯᐊᓂ ᐃᖕᒥᓂᒃ ᑕᒻᒪᕐᖢᓂ ᐃᖅᑲᖅᑐᐃᓪᓗᓂ ᐃᑭᑦᑐᒥᒃ. ᐃᓕᑦᑎᓪᓗᓂ ᕿᒡᒋᕆᐊᖃᕐᓂᕐᒥᓂᒃ, ᑲᑉᐱᐊᓱᙱᖦᖢᓂ ᐃᖕᒥᓂᒃᓗ ᐅᒃᐱᕆᔪᓐᓇᕐᖢᓂ. "ᖃᑉᓰᖅᑕᖅᖢᖓ ᓴᐃᒻᒪᑎᒥᒃ ᐃᒋᑦᑎᔪᒪᖃᑦᑕᓚᐅᖅᑐᖓ ᐅᖃᑐᐃᓐᓇᕐᓗᖓᓗ 'ᐅᕙᖓ ᐱᔭᕇᖅᑐᖓ. ᑕᐃᒪᐃᓕᐅᕈᓐᓇᙱᑦᑐᖓ.' ᑭᓯᐊᓂ ᐱᓇᔪᐃᓐᓇᕐᓂᖅ ᐊᒻᒪ ᐊᔭᐅᖅᑐᐃᑐᐃᓐᓇᕐᓂᖅ ᐅᖃᑐᐃᓐᓇᕐᓂᕐᓗ, 'ᖃᐅᔨᒪᕕᑦ ᑭᓱᒥ? ᑭᓱᒨᓕᕋᒪ. ᑕᐃᒪᐃᓕᐅᕆᐊᖃᕋᒪ. ᐅᕙᓐᓂ ᐱᐅᓂᖅᓴᖅᑕᖃᙱᓚᖅ.' ᐊᒃᓱᕈᕆᐊᖃᒻᒪᕆᓚᐅᖅᑐᖓ," ᓈᓴᐃᒃᑲᓐᓂᖅᖢᓂ.  

ᐃᓄᐃᑦ ᐱᒻᒪᕆᐅᑎᑦᑎᓚᐅᖏᑦᑐᑦ ᓯᕗᓪᓕᕐᒥ, ᑭᓯᐊᓂ ᑕᒻᒪᕐᓂᕋᓚᐅᖅᑐᖅᑕᐅᖅ.  "ᑕᐃᒪᓕ ᑕᒪᓐᓇ ᐊᖏᔪᒻᒪᕆᐅᑎᓪᓗᒍ ᐊᒻᒪᓗ ᐃᓄᐃᑦ ᑕᑯᕙᓪᓕᐊᕗᑦ ᖃᓄᐃᓕᐅᕐᒪᖔᑦᑕ ᐊᒻᒪᓗ ᒫᓐᓇ ᐃᓄᐃᑦ ᐅᕙᓐᓂᒃ ᐱᒻᒪᕆᐅᑎᑦᑎᓪᓗᑎᒃ, ᑭᓯᐊᓂ ᐊᑯᓂᐊᓘᓚᐅᖅᑐᖅ ᑎᑭᐅᑎᓇᓱᐊᖅᑐᑕ ᐊᒻᒪᓗ ᑕᐃᒪᐃᓕᐅᕆᐊᖃᕈᓐᓃᖅᑐᑕ," ᐅᖃᐅᓯᖃᖅᑐᖅ. 

ᐊᔪᕐᓇᓚᐅᖅᑐᖅ, ᑭᓯᐊᓂ ᖃᐅᔨᓚᐅᖅᑐᖅ ᑐᑭᖃᕐᓂᖓᓂᒃ ᐊᒃᓱᕈᖅᖢᓂ, ᒪᓂᒪᑎᑦᑎᓪᓗᓂ, "ᑕᒪᒃᑯᐊ ᐅᕙᓐᓄᑦ ᐃᒋᑦᑐᒪᓇᔭᓚᐅᖅᑖᒃᑲ ᐊᓪᓚᕈᑎᒧᑦ, ᑭᓯᐊᓂ... ᑖᒃᑯᐊ ᑕᕝᕙ ᐅᓪᓗᒥ ᐊᑐᖅᑕᖏᑦ." ᒫᓐᓇ, ᕿᒥᕐᕈᔪᖅ ᓄᓇᓕᐸᐅᔭᕐᓂᑦ ᑲᒻᐸᓂᒧᑦ ᐊᖏᒡᓕᒋᐊᕐᓗᒍ ᖁᔭᓕᓗᒍ ᐱᔨᑦᑎᕋᖅᑕᓕᒫᓄᑦ ᑐᒃᓯᕋᖅᑕᑦ.  

ᐊᓕᐊᓇᐃᒋᔭᖃᓕᕌᖓᑦ ᑲᑕᒃᓯᒪᓂᕐᒥᓂ ᓇᖕᒥᓂᕐᓗ ᑲᒪᒋᑦᑎᐊᕐᓂᕐᒥᒃ, Racette−ᑯᑦ ᐊᐅᓪᓚᕈᒪᓲᑦ, ᒑᓪᕝ, ᐱᖃᑎᖃᕐᓗᓂ ᐱᖃᑎᒥᓂᒃ ᕿᒻᒥᓂᒃᓗ ᐊᒻᒪ ᓴᙲᒃᓗᓂ ᐆᓇᖅᑐᒧᑦ ᐅᕕᓂᖕᓂᐊᕐᕕᖕᒧᑦ. ᐊᐅᓪᓛᖅᓯᒪᓂᕐᒥᒃ ᐊᓕᐊᓇᐃᒋᔭᓕᒃ, ᓂᕆᖃᑎᒌᓂᒃ ᐊᒻᒪ ᐃᓚᐅᓕᖅᖢᓂ ᐊᔪᙱᑕᒥᓂᒃ. ᖁᕕᐊᒋᔭᖃᖅᑐᖅ ᑲᔪᖏᖅᓴᐃᓂᕐᒥᑦ ᒪᒃᑯᑦᑐᓂᑦ ᐊᕐᓇᓂᑦ ᓇᒻᒥᓂᖃᕐᓂᕐᒥᑦ ᐱᔪᓐᓇᓂᕐᒥᑦ ᓇᒻᒥᓂᖃᖅᑎᐅᓪᓗᓂᓗ ᐊᓯᖏᓐᓄᑦ ᑲᒻᐸᓂᐅᔪᓄᑦ. ᑕᒪᓐᓇᓕᒫᖅ ᐱᓕᕆᐊᖑᔪᖅ ᐃᒪᓐᓇ ᑐᑭᖃᖅᑎᓪᓗᒍ, ᓇᖕᒥᓂᖅ ᓵᑦᑐᑯᓘᓂᖓᓂᒃ, ᐅᖃᖃᑎᖃᕐᓂᕐᒥᒃ ᖁᕕᐊᒋᔭᖃᖅᐳᖅ ᐃᑲᔪᕈᒪᓪᓗᓂᓗ ᐊᓯᖏᓐᓂᒃ ᐊᕐᓇᓂᒃ ᐊᖏᒡᓕᕙᓪᓕᐊᑎᑦᑎᓂᕐᒥᒃ ᑲᒻᐸᓂᒋᔭᒥᓂᒃ. 

ᐅᖃᐅᓯᖃᖅᑐᖅ ᓂᑲᒍᓱᒃᖢᓂ ᓂᕆᐅᒋᔭᒥᓂᒃ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ. "ᑕᐃᒪᓕ ᑲᑉᐱᐊᓱᒃᑲᔭᙱᑦᑐᑦ ᐃᓱᒪᒋᔭᒥᓂᒃ ᐱᔭᕆᐊᒃᓴᖅ ᓴᖅᑭᓪᓗᑎᒡᓗ ᑕᐃᒪᐃᓕᐅᑐᐃᓐᓇᕐᓗᑎᒡᓗ. ᐊᑕᐅᓯᕐᒥᒃ ᓄᓇᖃᖅᑳᖅᓯᒪᔪᓂᒃ ᐱᔾᔪᑎᖃᖅᐸᑕ, ᑭᓱᑐᐃᓐᓇᓂᒃ, ᑭᓱᑐᐃᓐᓇᓂᒃ ᐊᐱᕆᔪᒪᒐᔪᙱᑦᑐᒍᑦ. ᐃᓄᐃᑦ ᐅᒃᐱᕆᔭᖏᓐᓂᒃ ᒪᓕᙱᖦᖢᑎᒃ, ᑕᐃᒪᐃᖃᑦᑕᙱᑦᑐᒍᑦ. ᑕᒪᒃᑯᐊ ᐅᒃᐱᕆᔭᐅᑦᑎᐊᖅᑐᑦ ᐃᓄᐃᑦ ᐅᕙᖓᑎᑐᑦ, ᐅᕝᕙᓘᓐᓃᑦ ᔭᕝ ᐅᐊᑦ, ᐅᕝᕙᓘᓐᓃᑦ ᔨᐊᓐ ᕼᐋᐸ ᑦᓯᒃᐴᓂᒥᐅᑕᖅ ᐊᒻᒪᓗ ᑕᒪᒃᑯᐊ ᓄᓇᖃᖅᑳᖅᓯᒪᔪᑦ ᑲᓇᑕᒥ, ᐊᑎᕐᔪᐊᓕᐅᕐᒪᑕ, ᐊᒻᒪᓗ ᑭᖑᕚᒃᓴᑦᑎᓐᓄᑦ ᑎᑭᑉᐸᓪᓕᐊᓕᖅᖢᑕ," ᓯᓐᓇᑦᑑᒪᔪᖅ ᓂᐱᖃᖅᖢᓂ. 

ᐊᐅᓪᓚᖅᑎᓪᓗᒍ, ᕋᔅᑦ ᑲᑎᖃᑎᖃᖅᓯᒪᔪᖅ ᓄᓇᖃᖅᑳᖅᓯᒪᔪᓂᑦ ᒪᒃᑯᑦᑐᓂᑦ ᐃᓱᒪᒋᔭᖃᕐᔪᐊᖅᑐᓂᑦ ᐊᒻᒪ ᐃᑲᔫᑎᑦᓴᖃᖁᔨᔪᖅ ᐱᔭᕆᐊᓕᖏᓐᓂᑦ ᑲᔪᓯᓂᖃᑦᓯᐊᕐᓂᕐᒧᑦ. ᐱᒋᐊᕐᖢᓂ ᓇᖕᒥᓂᖓᓂᒃ, ᐃᑲᔪᖅᓱᐃᙱᖦᖢᓂ ᑭᓯᐊᓂ ᓯᕗᓪᓕᐅᓪᓗᓂ ᓄᓇᖃᖅᑳᖅᓯᒪᔪᖅ ᐊᕐᓇᖅ ᑲᓇᑕᒥ ᒪᑐᖁᓪᓗᒍ ᖃᔅᓯᒐᓚᑦ ᑮᓇᐅᔭᖃᖅᑎᑕᐅᔾᔪᑎᑦ. "ᖁᕕᐊᒋᑦᑎᐊᕋᒃᑯ ᐊᑎᖓ, ᑕᑯᑎᑦᑎᑐᐃᓐᓇᖅᐳᖅ ᐱᓕᕆᐊᒃᓴᖃᒃᑲᓐᓂᕐᓂᑦᑎᓐᓂᒃ. ᓂᕆᐅᒃᑐᖓ ᐱᔪᒃᓯᑎᑐᐃᓐᓇᕐᓗᒋᑦ ᓴᖅᑭᑎᓪᓗᒋᑦ ᐱᒋᐊᕐᓗᑎᒃᓗ ᐃᓱᒪᒋᔭᖏᓐᓂ, ᐱᙱᓪᓗᒍᓗ 'ᐋᒃᑲ' ᑭᒡᒍᑎᒧᑦ ᑕᐃᒪᐃᓚᐅᕋᒪ, ᓯᕗᒻᒧᐊᒃᐸᓪᓕᐊᖏᓐᓇᕐᓗᓂᓗ," ᐊᔾᔨᖃᖅᑐᖅ. 

ᐱᔭᕇᕈᑎᒋᓗᒍ, ᐅᖃᕈᒪᔪᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ, "ᐱᑦᑕᐃᓕᒋᑦ, ᑲᑉᐱᐊᓱᙱᒋᑦ. ᑭᓯᐊᓂ ᐱᒻᒪᕆᐅᓂᖅᐹᖅ, ᐃᕝᕕᑦ. ᓇᓃᒃᑲᓗᐊᕈᕕᑦ, ᑭᓱᒥᒃ ᖃᐅᔨᒪᒐᓗᐊᕈᕕᑦ, ᑭᓱᑐᐃᓐᓇᒥᒃ, ᑭᓲᒐᓗᐊᕈᕕᑦ, ᑭᓲᒐᓗᐊᕈᕕᑦ, ᑭᓲᒐᓗᐊᕈᕕᑦ, ᑭᓇᐅᒐᓗᐊᕈᕕᑦ ᐊᒻᒪ ᓱᓕᐃᓐᓇᕐᓗᑎᑦ ᐊᒻᒪ ᐃᓚᖏᑦ ᒪᓕᓕᕐᓂᐊᖅᐳᑦ ᑕᐃᒪᐃᑦᑕᕆᐊᖃᕋᓗᐊᕈᕕᑦ." ᐃᓕᑦᑎᓪᓗᓂ ᐊᒃᓱᕈᕐᖢᓂ ᖃᓄᓗᒃᑖᖅ ᐱᓂᐊᕐᓂᕐᒥᓂᒃ, ᐃᒪᓐᓇᐅᓇᓱᙱᖦᖢᓂ, ᐱᕈᖅᑎᖦᖢᒍ ᐆᒃᑐᕋᕐᓗᒍᓗ ᐃᖅᑲᓇᐃᔭᕐᕕᖓ.  

"ᑕᐃᒪᙵᓂᑦ ᐅᕙᖓ.. ᓄᖅᑲᓚᐅᖅᑐᖓ ᑭᓇᒥ ᐃᓱᒪᓚᐅᕐᒪᖔᕐᒪ ᐃᓄᐃᑦ ᑕᐃᒪᐃᖁᔨᓚᐅᖅᑐᑦ, ᑲᒻᐸᓂᐅᔪᖅ ᐆᒃᑐᕋᕈᓐᓇᓚᐅᖅᑐᖅ ᐊᒻᒪᓗ ᑯᒃᑭᖐᔭᕈᓐᓇᖅᖢᓂ."

ᓵᓚᒃᓴᖅᑐᓕᒫᓄᑦ, ᕋᔅᑎ ᖃᐅᔨᒪᔪᖅ ᖃᓄᖅ ᐱᐅᖕᒪᖔᑦ ᐃᓛᓐᓂᒃᑯᑦᑕᐅᖅ. "ᖃᓄᐃᙱᑦᑐᖅ ᑲᔪᓯᙱᑦᑕᕆᐊᒃᓴᖅ. ᐃᓄᑐᐃᓐᓇᐅᒐᑦᑕ ᑭᓱᑐᐃᓐᓇᐃᓪᓗ ᐅᕙᑦᑎᓅᖏᓐᓇᔾᔮᓇᑕ... ᐊᔪᓕᕐᓂᖅ ᐃᓚᒋᔭᐅᑐᐃᓐᓇᖅᐳᖅ ᓴᓇᓂᐊᖅᑕᕐᓄᑦ ᓴᙱᓂᖅᓴᐅᓕᕐᓗᑎᓪᓗ. ᒪᑭᒃᑲᓐᓂᕐᓗᑎᑦ ᐊᒻᒪᓗ ᐃᓕᖕᓂᒃ ᐊᓪᓚᖅᑎᑐᐃᓐᓇᕐᓗᑎᑦ ᐊᒻᒪᓗ ᑲᔪᓯᑐᐃᓐᓇᕐᓗᑎᑦ. ᐊᒥᓱᐊᖅᑎᖅᑐᑎᒃ, ᐃᓄᐃᑦ ᐃᒻᒥᓂᒃ ᓵᓚᒋᓗᐊᖃᑦᑕᕐᒪᑕ ᑭᓱᑐᐃᓐᓇᖅ ᓈᒻᒪᓈᖅᑎᓐᓇᒍ. ᐃᑭᑎᒃᑲᓐᓂᓚᐅᕐᓚᕗᑦ ᓴᙱᓂᖅᓴᐅᓕᕐᓗᓂ," ᑲᔪᓯᓗᓂ. 

ᐅᖃᖃᑦᑕᓚᐅᕐᒪᑦ ᓇᒻᒥᓂᖃᖅᑎᐅᓪᓗᓂ, ᐊᖏᔪᒻᒪᕆᒻᒥᒃ ᓴᓇᓗᓂ ᐊᒻᒪᓗ ᖁᕕᐊᒋᓪᓗᓂᐅᒃ. ᖁᕕᐊᒋᑦᑎᐊᖅᑕᖓ ᓇᓂᒐᒥᐅᒃ ᖁᕕᐊᒋᓪᓗᓂᐅᒡᓗ ᑕᐃᒪᐃᓚᐅᕐᓂᕐᒥᓂᒃ. ᒫᓐᓇᓕ ᕘᑐ ᒍᕉᔅ, ᐹᐱ ᕋᔅᑦ ᐃᑲᔪᖅᑐᖅ ᐊᓯᒥᓐᓂᒃ. ᐹᖏᑦ ᒪᑐᓯᒪᓲᑦ ᐱᕕᖃᕈᓐᓃᕌᖓᑦ ᑭᓇᐅᓂᕐᒥᓂᒃ ᐱᔾᔪᑎᖃᖅᖢᓂ ᐊᒻᒪ ᖃᓄᖅ ᑕᐅᑦᑐᖃᕐᒪᖔᑦ, ᒫᓐᓇ ᒪᑐᐃᖅᓯᔪᓐᓇᖅᓯᕗᖅ ᑕᐃᒃᑯᓄᖓ ᖃᐅᔨᖃᑦᑕᖅᓯᒪᔭᒥᓄᑦ, ᑐᙵᓱᒃᑎᖦᖢᒋᑦ ᖃᐃᔪᓐᓇᓚᐅᕐᒪᑕ ᐊᒻᒪ ᖃᐅᔨᖃᑦᑕᖅᓯᒪᓂᖏᓐᓄᑦ ᐱᓕᕆᑦᑎᐊᕈᓐᓇᕐᓂᖏᓐᓂᒃ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.