"ᖁᕕᐊᒋᒍᕕᐅᒃ ᐱᓕᕆᐊᕆᔭᐃᑦ, ᑕᐃᒪᓕ ᐃᖅᑲᓇᐃᔭᕆᐊᖃᔾᔮᙱᑦᑐᑎᑦ ᐅᓪᓗᕐᒥ ᐊᑕᐅᓯᕐᒥ ᐃᓅᓯᕐᓂ." ᐃᓅᓯᕐᒧᑦ ᐃᓕᑦᑎᓂᐅᕗᖅ ᐳᐊᕆᔅ ᓴᖑᔾ ᐅᖃᐅᔾᔪᖅᓱᐃᔾᔪᑎᐅᓪᓗᓂ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ ᐃᓕᑦᑎᕝᕕᐅᔪᓐᓇᕐᓂᖓᓂ ᐊᒻᒪ ᐃᒻᒥᓂ ᒪᓕᒃᐸᒃᖢᓂ. ᐃᓅᓚᐅᖅᓯᒪᔪᖅ ᔭᓗᓇᐃᒥ ᐊᒻᒪᓗ ᐱᕈᖅᓴᔭᐅᓪᓗᓂ ᐃᑦᑐᒃᑯᒥᓄᑦ ᐊᑖᑕᑦᑎᐊᒃᑯᒥᓄᑦ ᔮᓐ ᒪᕆ ᕆᕗᒥ. ᕗᐊᑦ ᓯᒻᓴᓐᒧᑦ ᓄᒃᑎᓚᐅᖅᓯᒪᕗᖅ ᐃᓕᓐᓂᐊᕐᕕᐊᓗᖕᒧᑦ ᐃᓕᓐᓂᐊᕆᐊᖅᖢᓂ ᐊᒻᒪ ᐃᖅᑲᓇᐃᔮᖓ ᐊᓯᔾᔨᕈᓘᔭᖃᑦᑕᓚᐅᖅᐳᖅ ᑕᐃᑲᙵᑦ.

ᐃᓕᓐᓂᐊᕐᕕᐊᓗᖕᒥ ᐃᓕᓐᓂᐊᕇᕋᒥ, ᓴᖑᔾ ᐃᖅᑲᓇᐃᔭᓕᓚᐅᖅᐳᖅ ᒐᕙᒪᒃᑯᓐᓄᑦ ᓴᓇᔪᓕᕆᔨᒃᑯᓐᓂ. ᐊᕙᓗᓂᒃ ᐊᒥᐊᕆᕙᓚᐅᖅᐳᖅ, ᐃᕕᒃᓱᒐᕐᓂᒃ ᓇᑲᑎᕆᕙᒃᖢᓂ ᐊᓯᖏᓐᓂᒡᓗ ᓱᕋᒃᓯᒪᔪᓕᕆᕙᒃᖢᓂ. ᐊᖏᕐᕋᒧᑦ ᓄᒃᑎᕋᒥ ᐊᑖᑕᒥᓄᑦ ᐃᖅᑲᓇᐃᔭᖅᖢᓂ, ᐃᒥᖅᑕᖃᑦᑕᓚᐅᖅᑐᖅ ᐊᒃᑕᕐᕕᖕᓂᓪᓗ ᐃᒋᑦᑎᕙᒃᖢᓂᓗ. ᐃᖅᑲᓇᐃᔮᖅᑖᓚᐅᖅᐳᖅ ᐆᒻᒪᖅᑯᑎᓕᕆᔨᒃᑯᓐᓂ ᐊᐅᓚᑦᑎᔨᐅᓪᓗᓂ, ᐊᑖᑕᖓᑕ ᐃᖅᑲᓇᐃᔮᕆᓚᐅᖅᓯᒪᔭᖓ ᐊᕐᕌᒍᒐᓴᖕᓄᑦ. ᐃᒥᐊᓗᒃᑖᕐᕕᖕᒥ ᐃᖅᑲᓇᐃᔭᓚᐅᖅᓯᒪᖕᒥᔪᖅ ᑭᓯᐊᓂ ᐅᔭᕋᖕᓂᐊᕐᕕᖕᒥ ᓴᓇᔨᙳᕆᐅᖅᓴᓕᕋᒥ ᐊᒻᒪ ᐃᓕᑕᕆᔭᐅᔾᔪᑎᑖᖅᖢᓂ, ᓲᕐᓗ ᓵᓚᒃᓴᕋᓱᒃᖢᓂ ᓇᓚᐅᑦᑖᕈᑎᒥᒃ. ᐃᖅᑲᓇᐃᔭᓚᐅᖅᓯᒪᔪᖅ ᐅᔭᕋᓐᓂᐊᕐᕕᒻᒥ ᐊᒻᒪᓗ ᓄᓇᓕᕋᓛᓂ ᑭᓯᐊᓂ ᐃᓄᑑᓕᕋᒥ ᐊᒻᒪᓗ ᓅᑦᑐᓂ ᐊᖏᕐᕋᒧᑦ ᐊᐅᓚᑦᑎᔭᖅᑐᖅᑐᓂ ᐊᐅᓚᐅᑎᖃᕐᕕᒻᒥ ᐆᒻᒪᖅᑯᑎᓕᕆᔨᒃᑯᓐᓂ.

ᒫᓐᓇᐅᔪᖅ, ᓴᖑᔾ ᑎᓕᐃᓐᒦᑦᑐᖅ ᐃᓕᐅᖅᑲᐃᓪᓗᓂ ᕿᔪᒃᑐᖅᑐᓂᒃ ᐃᒐᓂᒃ. ᐱᔭᕇᖅᓯᓚᐅᖅᐳᖅ ᓇᓗᓇᐃᒃᑯᑕᖅᑖᕐᓂᕐᒥᒃ ᐃᓕᐅᖅᑲᐃᔪᓐᓇᕐᓂᕐᒥᒃ ᕿᔪᖕᓂᒃ ᐊᒻᒪ ᓯᖃᓪᓕᑎᖅᓯᒪᔪᓂᒃ ᐃᒐᓂᒃ ᐱᒋᐊᖅᑎᑦᑎᓪᓗᓂᓗ ᓇᖕᒥᓂᕆᔭᐅᔪᒥᒃ ᑲᔪᓯᓂᖃᑦᑎᐊᖅᑐᒥᒃ. ᒫᓐᓇ ᐱᓕᕆᐊᕆᔭᖓ ᐃᓚᖃᖅᐳᖅ 11-ᓂᒃ ᐃᒐᓂᒃ ᐃᓕᐅᖅᑲᐃᔭᕆᐊᖃᖅᖢᓂ ᑭᓯᐊᓂ ᓯᕗᓂᒃᓴᒥ ᐱᓕᕆᐊᒃᓴᕆᓛᖅᑕᖓ ᐃᓕᐅᖅᑲᐃᓗᓂ 350-ᓂᒃ. ᐱᓕᕆᖃᑎᖃᖅᐸᒻᒥᔪᖅ ᑲᑉᐸᓂᐅᔪᒥᒃ ᑕᐃᔭᐅᔪᒥᒃ ᐅᑭᐅᖅᑕᖅᑐᒥ ᐆᒻᒪᖅᑯᑎᓕᕆᓂᕐᒧᑦ ᑲᑐᑦᔨᖃᑎᒌᑦ ᐊᒻᒪᓗ ᐃᓕᐅᖅᑲᐃᕙᑦᑐᓂ ᐃᒐᓂᒃ ᓄᓇᓕᓐᓂ ᓇᒥᑐᐃᓐᓇᖅ ᐅᑭᐅᖅᑕᖅᑐᒥ. ᐃᓕᑦᑎᕙᓪᓕᐊᖏᓐᓇᕐᓂᖅ ᐱᒻᒪᕆᐅᒋᔭᐅᕗᖅ ᓴᖑᔾ ᐱᓯᒪᔭᖓ ᐊᒻᒪ ᓱᓕ ᐃᓕᑦᑎᕙᓪᓕᐊᓪᓗᓂ ᐃᖅᑲᓇᐃᔭᖅᓯᓐᓈᑦ.

ᑲᔪᖏᖅᓴᐃᔾᔪᑎᒋᕙᒃᑕᖓ ᑕᒪᑐᒥᖓ ᐱᓕᕆᐊᖃᕐᓂᕐᒧᑦ ᐊᔪᙱᓐᓂᖃᕐᓂᖅ ᐃᑲᔪᕐᓂᕐᒥᒃ ᐃᓄᖕᓂᒃ. ᐊᒥᓱᓂ ᖃᐅᔨᓴᕐᓂᕐᓂ, ᓇᓂᓯᓯᒪᕗᖅ ᐱᐅᙱᑦᑐᓂ ᑲᑉᐳᔾᔭᖅᑐᒨᖅᑐᓂ ᐅᕝᕙᓘᓐᓃᑦ ᐃᒐᐅ ᐊᓂᐊᕝᕕᖏᓐᓂ ᐊᒻᒪ ᐊᑦᑕᕐᓇᕈᓐᓇᖅᑐᓂ ᐃᒐᐅ ᐊᓂᐊᕝᕕᖓᓂ ᐃᑭᑐᐃᓐᓇᕆᐊᖃᕐᓂᖏᓐᓂ. ᖁᕕᐊᓱᒃᑐᖅ ᐃᑲᔪᖅᑐᐃᔭᕆᐊᒃᓴᖅ ᐃᒡᓗᓂᒃ ᐃᑭᑎᑦᑎᑦᑕᐃᓕᒪᓂᕐᒥᒃ ᐱᓕᕆᐊᕆᕙᒃᑕᒥᓄᑦ. ᐃᓄᖕᓂᒃ ᖁᐊᖅᓵᕐᓇᖅᑐᒦᑎᑦᑎᑦᑕᐃᓕᒪᓂᖅ ᐱᒃᑯᒋᑦᑎᐊᖅᐸᐅᒃ.

ᐅᖃᐅᔾᔨᒋᐊᕈᑎᒋᔭᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᓕᖏᓐᓂ ᐃᓕᓐᓂᐊᕆᐊᕐᓗᑎᒃ ᐱᕙᒌᔭᖅᓯᒪᓗᑎᒃ ᐊᖏᕐᕋᕆᔭᒥᓄᑦ, ᐃᓚᒥᓄᑦ ᐱᖃᓐᓇᕆᔭᒥᓄᓪᓗ. ᓴᖑᔾ ᐅᖃᓚᐅᖅᐳᖅ ᐃᓛᓐᓂᒃᑯᑦ ᓄᖅᑲᕈᒪᖃᑦᑕᕐᓂᐊᕐᓂᖏᓐᓂᒃ ᑎᓕᐅᕆᕙᒃᖢᓂᓗ ᒪᒃᑯᒃᑐᓂᒃ ᓂᕈᐊᖁᓪᓗᒋᑦ ᐃᖅᑲᓇᐃᔮᕆᔪᒪᔭᒥᓂᒃ ᖁᕕᐊᒋᔭᒥᓂᒃ.

ᑐᓗᖅᑕᕈᑎᑕᖃᓕᕌᖓᒥ, ᓴᖑᔾ ᐊᓂᒍᐃᓚᐅᖅᐳᖅ ᓇᖕᒥᓂᖅ ᐊᒃᓱᕈᕐᓇᖅᑐᓂᒃ ᐃᑲᔪᖅᑕᐅᓪᓗᓂ ᐱᖃᓐᓇᕆᔭᒥᓄᑦ ᐊᒻᒪ ᐃᓚᒥᓄᑦ, ᑭᓯᐊᓂ ᑲᑎᙵᖃᑎᖏᑦ ᐅᓄᙱᑦᑑᑎᖦᖢᒋᑦ. "ᑭᓇᑭᐊᖅ ᐃᓕᖕᓂᒃ ᐃᑲᔪᖅᓯᒑᖓᒥ, ᖃᓄᑐᐃᓐᓇᑦᑎᐊᖅ ᐱᓕᕆᔪᓐᓇᖅᑰᔨᓕᕐᓇᖅᐳᖅ," ᐅᖃᓚᐅᖅᐳᖅ. ᖃᐅᔨᒪᓪᓗᓂ ᑭᓇᑭᐊᖅ ᑐᙵᕕᖃᕐᓂᖓᓂᒃ ᐊᔪᕐᓇᙱᓐᓂᖅᓴᐅᑎᑦᑎᓚᐅᖅᐳᖅ ᐊᓂᒍᐃᔪᓐᓇᕐᓂᕐᒥᒃ ᐊᒃᓱᕈᕐᓇᖅᑐᓂᒃ.

ᐃᓱᒪᒥᒍᑦ ᖃᓄᐃᖏᑦᑎᐊᕈᒪᓪᓗᓂ, ᓴᖑᔾ ᑯᒃᑭᑕᐹᓲᖑᕗᖅ ᐊᒃᓱᕈᓗᐊᕈᓐᓃᖅᑎᑦᑎᓇᓱᒃᖢᓂ. ᐃᖃᐃᓕᓴᖅᐸᒃᐳᖅ, ᓇᖕᒥᓂᖅ ᓄᓇᓯᐅᑎᒥᓂᒃ ᐱᓕᕆᕙᒃᖢᓂ ᐊᒡᒐᒥᓂᒃ ᐱᓕᕆᑎᑦᑎᓇᓱᒃᐸᒃᖢᓂ ᐱᓕᕆᐃᓐᓇᕋᓱᒃᐸᒃᖢᓂᓗ. ᑎᓴᒪᓕᖏᑦ, ᓯᑭᑑᖏᑦ, ᐊᒻᒪ ᒨᑐᓴᐃᑯᖏᑦ ᐋᖅᑭᒃᓱᖅᐸᒃᖢᓂᒋᑦ ᐊᒃᓱᕈᓗᐊᕈᓐᓃᖅᐸᒃᖢᓂ.

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒪᓐᓇᐅᓇᔭᖅᐳᖅ, "ᐃᓕᑦᑎᒃᑲᓐᓂᕆᑦ. ᐅᖃᓕᒫᒃᑲᓐᓂᕆᑦ." ᐱᒻᒪᕆᐅᓂᖓ ᐃᓕᓐᓂᐊᕐᓂᐅᑉ ᐃᓕᓯᒪᓚᐅᖅᓯᒪᔭᖓ ᒪᒃᑯᒃᑑᑎᓪᓗᒍ ᐃᑦᑐᒃᑯᒥᓄᑦ. ᓴᖑᔾ ᓄᓇᑐᐃᓐᓇᒦᒐᔪᒃᑎᓪᓗᒍ ᐃᓕᓐᓂᐊᕐᓇᖅ ᐱᒋᐊᓕᓵᖅᑎᓪᓗᒍ, ᐊᑖᑕᑦᑎᐊᖓ ᐃᓕᓐᓂᐊᖅᑕᒥᓂᒃ ᐊᐃᒃᖠᖅᐸᓚᐅᖅᐳᖅ ᐃᓕᓴᐃᔨᒥᓄᑦ. ᐃᓕᑦᑎᓚᐅᖅᐳᖅ ᐊᒻᒪ ᐃᖅᑲᓇᐃᔭᖅᖢᓂ ᓄᓇᑐᐃᓐᓇᕐᒥ ᐊᒻᒪ ᐱᔪᒪᓂᖃᑦᑎᐊᖅᖢᓂ ᐃᓕᑦᑎᔪᒪᓪᓗᓂ ᐃᑦᑐᕐᒥᓂᒃ.

ᐱᔪᒃᓯᑎᑦᑎᓂᒃᑯᓪᓕ, ᓴᖑᔾ ᑕᐅᑐᒃᐳᖅ ᐊᑖᑕᒥᓂᒃ ᐊᑖᑕᑦᑎᐊᒥᓂᒡᓗ, ᑕᒪᕐᒥᒃ ᐊᓯᐅᔨᓯᒪᖕᒪᑎᒃ. ᐱᒃᑯᒋᔭᖃᖅᐳᖅ ᐱᓕᕆᑦᑎᐊᕐᓂᕆᔭᖏᓐᓂᒃ ᐅᐱᒋᔭᐅᖁᓪᓗᓂᒋᓪᓗ. ᖁᔭᓕᕙᒃᑭᕗᖅ ᖃᐅᑕᒫᑦ ᖁᔭᓕᕙᒃᖢᓂᓗ ᐱᓕᕆᐊᒥᓄᑦ.

ᖁᕕᐊᒋᔭᖃᖅᖢᓂ ᐱᓕᕆᐊᒥᓂᒃ, ᐳᐊᕆᔅ ᓴᖑᔾ ᐃᖅᑲᓇᐃᔭᕆᐊᖃᖅᐸᙱᓚᖅ ᐅᓪᓗᓕᒫᖅ ᐃᓅᓯᕐᒥᓂ. ᐃᓕᐅᖅᑲᐃᓪᓗᓂ ᕿᔪᒃᑐᖅᑐᓂᒃ ᐃᒐᓂᒃ ᐅᑭᐅᖅᑕᖅᑐᒥᐅᓄᑦ ᐅᖅᑰᑎᑦᑎᓂᕐᒧᑦ, ᖃᐅᔨᒪᒋᐊᖅᐸᒃᑭᕗᖅ ᐃᒐᐅ ᐊᓂᐊᕝᕕᖏᑦ ᐊᖏᕐᕋᖏᓪᓗ ᐊᑦᑕᕐᓇᙱᒃᑲᓗᐊᕐᒪᖔᑕ. ᐱᔪᒃᓯᑎᑕᐅᓪᓗᓂ ᐊᒃᓱᕈᖅᖢᑎᒃ ᐱᓕᕆᕙᒃᑐᓄᑦ ᐊᖑᑎᓄᑦ ᖃᑕᙳᑎᖏᓐᓄᑦ ᐱᒻᒪᕆᐅᓂᖓᓄᓪᓗ ᐃᓕᑦᑎᕙᓪᓕᐊᖏᓐᓇᕐᓂᕐᒧᑦ, ᐆᒻᒪᑎᒥᒍᑦ ᐆᒻᒪᑎᒃᑯᑦ ᐱᕚᓪᓕᖅᑎᑦᑎᕙᒃᐳᖅ ᓇᖕᒥᓂᖅ ᐱᕙᓪᓕᐊᓂᕐᒥᒃ ᓴᐱᓕᖅᑕᐃᓕᓂᕐᒥᒡᓗ ᐆᒻᒪᑎᒥᒍᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.