"ᑎᑎᕋᐅᔭᖃᑦᑕᖅᓯᒪᕗᖓ ᐃᓅᓯᓕᒫᓐᓂ, ᓱᕈᓯᐅᓚᐅᖅᓯᒪᒐᒪᓂᑦ, ᑎᑎᕋᐅᑎᒥᒃ ᑎᒍᒥᐊᕈᓐᓇᓚᐅᕋᒪ," ᐃᖅᑲᐅᒪᔪᖅ ᔭᓂᕗ ᕕᐅᕆᐊ. ᐳᕌᒍᓯᒥᐅᑕᖅ, Holland-ᒥᐅᑕᖅ ᐊᒻᒪ ᓄᓇᖃᖅᑳᖅᓯᒪᔪᖅ, ᐃᓚᒋᔭᐅᓪᓗᓂ Chippewas of Rama ᓄᓇᖃᖅᑳᖅᓯᒪᔪᓄᑦ ᐃᓅᓂᑯ ᐱᕈᖅᓴᓪᓗᓂᓗ ᑐᕌᓐᑐᒥ. ᕿᓚᒥᑯᓗᒃ ᒥᓯᓵᒐᒥ ᓄᓇᖃᓚᐅᑲᓚᐅᖅᐳᖅ, ᐊᒻᒪ ᐅᑭᐅᓂᒃ 9-ᓂᒃ ᐴᓕᖕᑕᓐᒥᐅᑕᐅᓕᖅᖢᓂ. ᐃᖅᑲᓇᐃᔮᒥᒍᑦ, ᓴᓇᙳᐊᖅᑎᑦᑎᐊᕙᐅᕗᖅ, ᐊᔾᔨᙳᐊᓂᒃ ᐊᒥᐊᕆᔨᐅᓪᓗᓂ, ᐊᔾᔨᙳᐊᓂᒃ ᐅᖃᓕᒫᒐᕐᓂᒃ ᑎᑎᕋᐅᔭᖅᑎᐅᓪᓗᓂ, ᑎᑎᕋᖅᑎᐅᓪᓗᓂ ᐊᒻᒪ ᑎᑎᕋᙳᐊᖅᑎᐅᓪᓗᓂ. 

ᕚᕆᐊ ᓇᓂᓯᓚᐅᖅᐳᖅ ᑖᔅᓱᒧᖓ ᐃᖅᑲᓇᐃᔮᕆᔪᒪᔭᒥᓄᑦ ᖃᐅᔨᓴᖅᑕᐅᕌᓪᓚᓚᐅᖅᖢᓂ ᐊᔪᙱᓐᓂᖓᓄᑦ ᖁᑦᑎᖕᓂᓕᖕᒥ 1-ᒥ ᐅᖃᖅᓯᒪᓪᓗᓂ ᓴᓇᙳᐊᖅᑎᐅᔭᕆᐊᖃᕐᓂᖓᓂᒃ, ᑎᑎᕋᐅᔭᖅᑎᐅᔭᕆᐊᖃᕐᓂᖓᓂᒃ ᐅᕝᕙᓘᓐᓃᑦ ᑎᑎᕋᐅᔭᖅᑎᐅᓗᓂ. ᐱᖓᓱᐃᓐᓇᐅᓕᓚᐅᖅᐳᖅ. ᐃᓕᖅᑯᓯᖅᓱᙱᔾᔪᑎᖃᖅᖢᓂ, ᑎᑎᕋᐅᔭᕐᓂᖅ ᑎᑎᕋᐅᔭᕐᓂᕐᓗ ᐱᐅᒋᑦᑎᐊᓚᐅᖅᑕᖓ ᓲᖃᐃᒻᒪ ᐱᓕᕆᐊᒃᓴᓄᑦ−ᑐᙵᕕᖃᕐᓂᖓᓄᑦ. ᓇᖕᒥᓂᖅᓱᕈᓐᓇᑦᑎᐊᕆᕗᖅ ᖁᕕᐊᒋᔭᖃᖅᖢᓂᓗ ᐃᓱᒪᖅᓱᕈᓐᓇᕐᓂᕐᒥᒃ ᑎᑎᕋᐅᔭᕈᓐᓇᕐᓂᕐᒥᒃ ᐊᒥᐊᕆᔪᓐᓇᕐᓂᕐᒥᒡᓘᓐᓃᑦ ᓇᓂᑐᐃᓐᓇᑦᑎᐊᖅ. ᖁᕕᐊᒋᔭᖃᓕᖅᐸᒃᐳᖅ ᑎᑎᕋᐅᔭᕆᐊᒃᓴᖅ ᐃᒻᒥᓄᑦ ᐱᓇᔪᒍᒪᔭᒥᓂᒃ. 

ᐱᕙᒌᔭᕋᓱᒃᖢᓂ ᑖᔅᓱᒧᖓ ᐃᖅᑲᓇᐃᔮᒧᑦ, ᕙᕆᐊ ᐊᔪᕈᓐᓃᖅᓴᕐᔪᐊᓚᐅᖅᐳᖅ. ᐱᕈᖅᓴᓪᓗᓂ ᑎᑎᕋᐅᔭᖅᐸᓚᐅᖅᑐᖅ ᐳᓯᒥᒃ, ᐹᐱᓂᒃ, ᐱᙳᐊᓂᒃ, ᐊᓯᖏᓐᓂᒡᓗ ᐃᒡᓗᒥᐅᑕᓂᒃ ᐱᖁᑎᓂᒃ. ᐃᓄᖕᓂ ᑎᑎᕋᐅᔭᖅᐸᓚᐅᕆᕗᖅ, ᐱᐅᒋᓛᕆᓪᓗᓂᐅᒃ ᑎᑎᕋᐅᔭᕆᐊᒃᓴᖅ ᐊᒥᐊᕆᓂᕐᒥᒡᓗ. 50,000-ᐸᓗᖕᓂ ᐃᑲᕐᕋᓂᒃ ᐊᔪᕈᓐᓃᖅᓴᖅᓯᒪᕗᖅ. ᑕᒪᕐᒥᑦᑎᐊᖅ ᐱᓕᕆᓂᕆᕙᒃᑕᖏᑦ ᐆᒃᑑᑎᒋᔪᓐᓇᓚᐅᖅᐸᖏᑦ ᐱᓕᕆᐊᕆᓯᒪᔭᖏᓐᓂᒃ ᐱᓕᕆᐊᒃᓴᑦᑎᐊᕙᖕᓄᑦ ᐃᓕᓐᓂᐊᖃᑕᐅᔪᒪᓪᓗᓂ Central Tech−ᒥ ᒪᒃᑯᒃᑑᑎᓪᓗᒍ. ᑭᖑᓂᐊᒍᑦ, ᐃᓕᓐᓂᐊᓕᓚᐅᖅᓯᒪᕗᖅ ᑎᑎᖅᑐᒐᖅᑎᓂᒃ ᐊᒻᒪ ᒪᓂᓴᐅᑎᓂᒃ ᔪᐊᔾ ᐳᕋᐅᓐᒥ. ᐊᓕᐊᓇᐃᒋᓗᐊᓚᐅᙱᑕᖓ ᑭᓯᐊᓂ ᐃᑲᔫᑎᖃᓚᐅᖅᑐᖅ ᐃᓕᑦᑎᓪᓗᓂ ᖃᕋᓴᐅᔭᒃᑯᑦ ᑐᑭᓯᒋᐊᖅᑕᕐᕕᓕᐅᕐᓂᕐᒥᒃ, ᓇᖕᒥᓂᕆᔭᕐᓄᑦ ᓇᓗᓇᐃᒃᑯᑕᓂᒃ ᐊᒻᒪ ᐅᖃᓕᒫᒐᕋᓛᓂᒃ. 

ᖃᖓᑐᐃᓐᓇᒃᑯᑦ, ᑕᑯᔭᐅᓪᓗᓂ ᓴᓇᙳᐊᖅᑕᖓ ᐊᐱᕆᓪᓗᓂᓗ ᕕᐊᕆᐊ ᑎᑎᕋᐅᔭᕈᒪᖕᒪᖔᑦ ᐊᔾᔨᙳᐊᓂᒃ ᐅᖃᓕᒫᒐᕐᓂᒃ ᐅᑎᖅᑕᕋᐅᔭᑲᑕᒃᖢᓂᓗ ᑳᓐᑐᓛᖃᓕᖅᖢᓂ. ᓇᖕᒥᓂᖁᑎᖃᓚᐅᕆᕗᖅ ᓄᑕᕋᓛᓂᒃ ᖃᑕᙳᑎᖏᓐᓂᒡᓗ ᐊᔾᔨᓕᐅᕆᕙᒃᖢᓂ ᓯᕗᓪᓕᖅ ᐃᕐᓂᖓ ᐃᓅᓚᐅᖅᑎᓪᓗᒍ. "ᑎᑎᕋᐅᔭᑐᐃᓐᓇᓕᖅᐳᖓ ᐊᒻᒪ ᐊᒥᐊᕆᑐᐃᓐᓇᖅᖢᖓ ᑕᐃᒪᙵᑦ ᐃᖅᑲᐅᒪᔭᓐᓂᒃ," ᐅᖃᕆᓪᓗᓂ. ᐃᓱᒪᒥᒍᑦ ᐊᔪᕈᑎᖃᖅᖢᓂ, ᐱᔪᒥᓇᖅᑐᓂᒃ ᐱᓕᕆᔭᕆᐊᖃᖅᐳᖅ ᐅᕝᕙᓘᓐᓃᑦ ᖃᐅᔨᓕᖅᐸᒃᖢᓂ ᓴᖅᑭᑎᑦᑎᔪᓐᓇᙱᑐᐃᓐᓇᓕᕐᓂᕐᒥᓂᒃ ᖁᕕᐊᒋᔭᖃᖅᖢᓂᓗ ᓴᓇᙳᐊᖅᑎᐅᓂᕐᒥᓂᒃ ᐃᓱᒪᖅᓱᕈᓐᓇᑦᑎᐊᕐᓂᕐᒥᓂᒃ ᐃᓚᐅᔪᓐᓇᕐᓂᕐᒥᒃ ᐊᓈᓇᒋᔭᐅᔪᓄᑦ ᓄᑕᕋᓛᓄᓪᓗ ᔫᒐᕐᓂᕐᒧᑦ ᐊᓯᖏᓐᓄᓪᓗ ᐱᓕᕆᐊᖑᕙᒃᑐᓄᑦ ᐃᕐᓂᕐᒥᓄᑦ. 

ᑐᓗᖅᑕᕈᑕᐅᕙᒃᑐᓄᑦ, ᐱᕈᖅᓴᓪᓗᓂ ᕙᕆᐊ ᐃᑲᔪᖅᑎᖃᓚᐅᙱᓚᖅ ᐊᓈᓇᖓ ᐃᓅᔪᓐᓃᖅᑎᓪᓗᒍ ᒪᒃᑯᒃᑑᓪᓗᓂ. ᐃᓄᐃᑦ ᑐᑭᓯᓚᐅᙱᑦᑐᑦ ᖃᓄᖅ ᐱᓕᕆᖃᑦᑕᕐᒪᖔᑦ ᐋᖓᔮᕐᓇᖅᑐᓄᑦ ᐊᔪᕈᑎᓕᖕᓄᑦ ᐊᒻᒪ ᑲᑕᒃᓴᖅᑕᐅᓪᓗᓂ, ᐅᖃᐅᑎᓪᓗᓂᐅᒃ ᐃᖅᑲᓇᐃᔮᖅᑖᖁᓪᓗᓂᐅᒃ. ᐃᑲᕐᕋᓂᒃ 16-ᓂᒃ ᖃᐅᑕᒫᑦ ᐊᒥᐊᕆᖃᑦᑕᓚᐅᖅᑐᖅ, ᐊᔪᕈᓐᓃᖅᐸᓪᓕᐊᓪᓗᓂ ᐊᑯᓂᐅᔪᒃᑯᑦ ᐱᙳᐊᕈᓐᓇᕐᓂᕐᒥᒃ ᑲᔪᖏᖅᓴᖅᑕᐅᓪᓗᓂ ᓂᐅᕕᕐᕕᖕᒥ ᐃᖅᑲᓇᐃᔮᖅᑖᖁᔭᐅᓪᓗᓂ ᖃᐅᔨᒪᓚᐅᖅᑕᒥᓂᒃ ᓄᖅᑲᕐᓂᐊᕐᓂᖓᓂᒃ. ᓇᓗᙱᑦᑎᐊᓚᐅᖅᐳᖅ ᑕᒻᒪᙱᖦᖢᓂ ᐊᖅᑯᑎᖃᕐᓂᕐᒥᓂᒃ ᖁᔭᓕᓪᓗᓂᓗ ᓈᓚᓚᐅᙱᓐᓂᕐᒥᓂᒃ ᐅᖃᐅᔾᔪᖅᑕᐅᓂᖏᓐᓂᒃ. ᐃᓕᑦᑎᓚᐅᖅᐳᖅ ᐃᒻᒥᓂᒃ ᐱᓇᔪᒍᓐᓇᕐᓂᕐᒥᒃ ᐱᓕᕆᐊᕆᔭᕆᐊᖃᖅᑕᒥᓂᒃ ᐊᓂᒍᖅᑎᖦᖢᒍᓗ ᓵᙵᔭᖃᙱᓐᓂᕐᒥᓂᒃ, ᐊᑐᖅᐸᒃᖢᓂ ᐱᔾᔪᓯᐊᓂᒃ ᑭᓱᑐᐃᓐᓇᓂᒡᓗ ᖁᕕᐊᓇᖅᓯᑎᑦᑎᕙᒃᖢᓂ. ᐊᒃᓱᕉᑎᖃᓚᐅᕆᕗᖅ ᐊᓈᓇᖓ ᐸᓯᔭᒃᓴᐅᙱᓐᓂᖓᓂ ᐊᒻᒪ ᓴᓇᙳᐊᖃᑦᑕᕈᓐᓃᓚᐅᑲᒃᖢᓂ. ᑭᖑᓂᐊᒍᑦ, ᕿᑐᙵᖏᑦ ᐅᖃᐅᑎᓚᐅᖅᐸᖏᑦ ᓴᓇᙳᐊᖅᑎᐅᓂᕐᒥᓂᒃ ᐱᐅᒃᓴᕐᓂᕋᖅᖢᓂᒋᑦ ᐃᒻᒥᓂᒡᓗ ᐊᖏᖅᖢᓂ ᖁᕕᐊᒋᔭᒥᓂᒃ ᑲᔪᓯᑎᑦᑎᔪᒪᓪᓗᓂ. 

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᐃᑦᑑᓇᔭᖅᐳᖅ, "ᐋᒃᑳᕈᓐᓇᖅᐳᑎᑦ. ᑭᒃᑯᓕᒫᓄᑦ ᐱᖁᔭᐅᓯᒪᔪᓕᒫᓂᒃ ᐱᓕᕆᔭᕆᐊᖃᙱᑦᑐᑎᑦ."

ᐃᓱᒪᒥᒍᑦ ᖃᓄᐃᖏᑦᑎᐊᕐᓂᕐᒧᑦ, ᕙᕆᐊ ᐱᔪᓐᓇᖅᓯᓵᓕᓚᐅᖅᐳᖅ ᐊᒃᓱᕈᕐᓇᖅᑐᒃᑰᕈᓐᓇᕐᓂᖓᓂ ᓱᕈᓯᐅᓂᖓᓂ ᐅᖃᓕᒫᕐᓂᒃᑯᑦ ᓇᖕᒥᓂᖅ ᐱᕙᓪᓕᐊᓂᕐᒧᑦ ᐅᖃᓕᒫᒐᕐᓂ. ᐅᖃᓕᒫᒐᖃᕐᕕᓕᐊᖅᐸᓚᐅᖅᐳᖅ ᒪᒃᑯᒃᑑᓪᓗᓂ ᐅᖃᓕᒫᖅᐸᒃᖢᓂᓗ ᐅᖃᓕᒫᒐᕐᓂᒃ ᓯᑏᕙᓐ ᑰᕕᒧᑦ, ᑕᐃᔪᓪ ᑳᓂᒋᒧᑦ ᐊᓯᖏᓐᓄᓪᓗ ᐅᖃᓕᒫᒐᓕᐅᖅᑎᓄᑦ ᐱᔪᒃᓯᑎᑦᑎᓚᐅᖅᑐᓄᑦ. ᐅᒃᐱᖅᑑᓪᓗᓂ, ᐅᖃᓕᒫᓲᖑᖕᒥᔪᖅ ᐸᐃᑉᐹᖁᑎᓂᒃ. ᐊᓕᐊᓇᐃᒋᓂᖅᐹᖓ ᐅᐸᒋᐊᒃᓴᖅ ᐱᔭᒃᓴᖃᓗᐊᓕᕌᖓᒥ ᓂᐅᕕᕐᕕᒃ, ᖁᕕᐊᒋᔭᖃᖅᖢᓂ ᑎᐱᖏᓐᓂᒃ, ᑕᑯᒃᓴᐅᔪᓂᒃ ᐊᒻᒪ ᓂᐱᖏᓐᓂᒃ. ᐊᓯᐊᑦᑕᐅᖅ ᐊᑐᖅᐸᒃᑕᖓ ᐊᑲᐅᓯᕚᓪᓕᕈᒪᓪᓗᓂ ᐅᕕᓂᖕᓂᐊᖅᖢᓂ ᐃᒃᓯᕚᖅᐸᒃᖢᓂᓗ ᑐᖅᓲᖓᓂ ᑳᐱᑐᖅᖢᓂ. ᐴᓕᖕᑕᓐᒨᕐᓂᖅ ᐊᓕᐊᓇᐃᒋᑦᑎᐊᕐᒥᔭᖓ, ᐊᒻᒪᓗᑦᑕᐅᖅ ᐃᖃᐃᓕᓴᕐᕕᓕᐊᕐᓂᖅ ᐅᕝᕙᓘᓐᓃᑦ ᑕᕐᕆᔭᕐᓂᖅ 80−ᖏᓐᓂ ᓂᔾᔭᐅᓯᔭᖅᑐᓂᒃ ᑕᕐᕆᔭᒐᒃᓴᓂᒃ. 

ᑎᑎᕋᐅᔭᖃᑦᑕᖅᓯᒪᕗᖅ ᑕᐃᒪᙵᓂ ᐃᖅᑲᐅᒪᓕᕋᒥ ᐊᒻᒪ ᔭᓂᕗ ᕚᕆᐊᒧᑦ, ᐃᖅᑲᓇᐃᔮᕆᓕᖅᖢᓂᐅᒃ ᐃᓅᓯᕆᓕᖅᖢᓂᐅᒡᓗ. ᓯᕗᓪᓕᕐᐹᒥ ᖁᑦᑎᖕᓂᓕᖕᒥ ᐊᔪᙱᓐᓂᖃᕐᓂᕐᒧᑦ ᖃᐅᔨᓴᕈᑎ ᐅᖃᐅᔾᔭᐅᓚᐅᖅᐳᖅ ᓴᓇᙳᐊᖅᑎᐅᔭᕆᐊᖃᕐᓂᖓᓂᒃ, ᑎᑎᖅᑐᒐᖅᑎᙳᕐᓗᓂ ᐅᕝᕙᓘᓐᓃᑦ ᑎᑎᕋᐅᔭᖅᑎᙳᕐᓗᓂ ᑕᐃᒪᐃᓕᓚᐅᖅᐳᖅ. ᐊᒥᓱᐊᓗᖕᓂ ᐊᔭᖅᑭᑦᑕᕈᑎᓂᒃ ᐊᓂᒍᖅᑎᑦᑎᔭᕆᐊᖃᖅᖢᓂ ᐊᒻᒪ ᓵᙵᔭᖃᓗᐊᙱᖦᖢᓂ ᓵᙵᔭᕆᐊᖃᖅᖢᓂ, ᓇᓂᓯᓚᐅᖅᐳᖅ ᖃᓄᖅ ᐱᕚᓪᓕᕈᓐᓇᕐᓂᕐᒥᓂᒃ ᐊᒻᒪ ᐱᓕᕆᓪᓗᓂ ᖁᕕᐊᓇᑦᑎᐊᖅᑐᒥᒃ ᐃᒻᒥᓄᑦ ᓴᖅᑭᑎᑦᑎᓯᓐᓈᑦ ᐃᓅᓯᕐᒥᒃ ᐱᐅᔪᒻᒪᕆᐊᓗᖕᒥᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.