"ᐃᓅᒍᕕᑦ ᐱᕈᖅᓴᑎᓪᓗᑎᓪᓗ ᓄᓇᖃᖅᑳᖅᓯᒪᔪᓂᑦ, ᕿᒪᐃᓚᐅᖅᓯᒪᙱᑦᑐᖅ ᐃᓕᖕᓂᒃ. ᓇᒧᑐᐃᓐᓈᕋᓗᐊᕈᒪ, ᓇᓂᑐᐃᓐᓈᕋᓗᐊᕈᒪ, ᐃᓅᖏᓐᓇᐅᔭᕐᓂᐊᖅᑐᖓ ᐊᒻᒪᓗ ᐃᓕᖅᑯᓯᕋ ᑐᓄᓐᓃᖏᓐᓇᐅᔭᕐᓂᐊᖅᖢᖓ ᐅᐱᒍᓱᖃᑎᒋᓗᖓᓗ," ᐅᖃᖅᐳᖅ ᔭᓯᑲ ᐹᑐᓴᓐ. ᐃᖃᓗᒻᒥᐅᑕᖅ, ᓄᓇᕗᒻᒥ ᑭᓯᐊᓂ ᐱᕐᓗᐊᕿᓪᓗᓂ ᐃᖏᕐᕋᓯᓚᐅᖅᑐᖅ ᐲᑦᓴ ᓄᓇᓯᐅᑎᒥᒃ ᑯᐃᓐᔅᑕᐅᓐᒥ, ᓂᐅ ᓰᓚᓐ ᑕᐃᔭᐅᔪᖅ ᕗᕌᓐᓯᔅᑲᐅᑉ ᐃᖏᕐᕋᓲᖓ ᐲᑦᓴ.

ᐱᒋᐊᓚᐅᖅᓯᒪᔪᖅ ᐊᕐᕌᒍᓄᑦ ᖁᓕᓄᑦ ᐃᖅᑲᓇᐃᔭᖅᑐᓂ ᑲᓇᐃᑎᐊᓐ ᓄᐊᑦᑯᑦ ᖃᖓᑕᓲᖁᑎᖏᓐᓂ, 30-ᕈᕐᓂᐊᓕᖅᑎᓪᓗᒍ. ᐹᑐᓴᓐ ᖃᐅᔨᓚᐅᖅᑐᖅ ᐅᑭᐅᖅᑕᖅᑐᒥᐅᑕᐅᖏᓐᓇᐅᔭᕐᓂᖓᓂᒃ ᐃᓱᒪᓪᓗᓂᓗ ᖃᓄᐃᓐᓇᔭᕐᒪᖔᑦ ᓅᓪᓗᓂ ᓯᓚᑖᓂ ᐊᑲᐅᒋᔭᖓᑕ... ᐊᒻᒪᓗ ᓯᓚᑖᓂ ᓄᓇᓕᕐᔪᐊᑉ ᐃᓅᓯᓕᒫᖓᓂ ᐃᓱᒪᓚᐅᖅᑎᓪᓗᒍ ᐊᐅᓪᓚᓚᐅᖅᓯᒪᔾᔮᖏᓐᓂᖓᓂᒃ. 

ᑲᑎᖃᑎᖃᕆᐊᖅᑐᓚᐅᖅᑐᖅ ᓄᓇᖃᖅᑳᖅᓯᒪᔪᓂᑦ ᐋᔅᑐᕋᐃᓕᐊᒥᑦ ᐃᓕᓐᓂᐊᓚᐅᖅᑐᖅ ᐃᓕᓐᓂᐊᕐᕕᐊᓗᒻᒥᑦ ᐊᕐᕌᒍᒧᑦ ᐊᑕᐅᓯᕐᒧᑦ ᐃᖅᑲᓇᐃᔭᖅᑐᓂ ᕿᑲᕐᓇᐅᑎᓪᓗᒍ. ᐹᑐᓴᓐ ᐊᖏᕐᕋᖅᓵᓕᓚᐅᖅᐳᖅ ᑕᑯᔭᖅᑐᖅᖢᓂ ᐊᓂᖓᑕ ᓄᑕᕋᓛᖅᑖᓵᖓᓂᒃ ᑲᓇᑕᒥ. ᑭᖑᓪᓕᕐᒥ, ᐃᖅᑲᓇᐃᔭᕐᖢᓂ ᓄᖅᑲᖓᓐᓇᒥ ᕖᓴᑖᕐᖢᓂ ᓂᐅ ᓰᓚᓐᒧᑦ. ᑕᖅᑭᓄᑦ 6−ᓄᑦ 8−ᓄᑦ ᖁᕕᐊᓱᒃᑎᑕᐅᓕᕐᖢᓂ ᐃᓕᖅᑯᓯᒧᑦ, ᓄᓇᓕᖕᒧᑦ ᐊᒻᒪ ᑲᔾᔮᕐᓇᖅᑐᓄᑦ, ᐊᖏᕐᕋᐅᔾᔨᔪᒪᑦᑎᐊᕋᓗᐊᖅᑎᓪᓗᒍ ᓂᐅ ᓰᓚᓐᒥ ᐃᓅᓵᖅᑐᒥᒃ ᐱᖃᑎᖃᕐᓗᓂ ᖃᑕᙳᑎᖏᓐᓂᒃ ᑲᑎᖃᑎᖃᕐᓗᓂ. 

"ᑕᕝᕙᓂ ᑕᑯᓕᒪᓇᙱᑦᑎᐊᖅᑐᖓ, ᑭᓯᐊᓂᑦᑕᐅᖅ ᐅᕙᓐᓂᒃ ᐅᐱᒍᓱᓪᓚᕆᒃᐳᖓ ᐃᓕᖅᑯᓯᓐᓂᒃ, ᐱᐅᓯᑐᖃᓐᓂᒃ, ᐅᖃᐅᓯᓐᓂᒃ, ᐊᒻᒪ ᐅᖃᐅᓯᕆᒐᔪᒃᑕᓐᓂᒃ."

ᐊᖏᕐᕋᕋᓱᖃᑦᑕᓚᐅᖅᑐᖅ ᐊᕐᕌᒍᑕᒫᑦ, ᑭᓯᐊᓂ ᐋᓐᓂᐊᓇᖅᑐᖃᓕᕐᓂᖅ ᐊᒻᒪᓗ ᐃᖏᕐᕋᓂᕐᒧᑦ ᑮᓇᐅᔭᖅᑐᕈᑎᑦ ᑎᑭᑉᐸᒻᒪᑕ.  "ᐃᓱᒪᒋᔭᕋ ᐃᓛᓐᓂᒃᑯᑦ, ᓄᓇᖃᖅᑳᖅᓯᒪᔫᓪᓗᑕ, ᑲᓇᑕᒦᑦᑕᕆᐊᖃᖅᑰᔨᒐᑦᑕ, ᑲᑎᙵᔭᕆᐊᖃᕋᑦᑕ, ᐅᖃᐅᓯᑦᑎᓐᓂ ᐅᖃᓪᓚᒋᐊᖃᓲᖑᒐᑦᑕ, ᑭᓯᐊᓂ ᐅᖃᐅᑎᓂᐊᖅᐸᒋᑦ ᐃᒪᓐᓇ: ᐃᓅᖅᑰᔨᓚᐅᖅᓯᒪᙱᑦᑐᖓ ᐊᐅᓪᓚᑲᑕᓕᖅᑎᓪᓗᖓ, ᓲᖃᐃᒻᒪ ᓄᓇᑦᑎᓐᓃᙶᖅᑐᑑᒐᒪ ᐅᖃᐅᓯᕋ ᐅᖃᓪᓚᓲᖅ ᐃᓕᖅᑯᓯᑦᑎᓐᓂ. ᖃᐅᑕᒫᑦ, ᐃᖅᑲᐃᑎᑕᐅᖃᑦᑕᖅᑐᖓ ᑕᒪᑐᒥᖓ, ᐊᒻᒪᓗ ᐅᐱᒍᓱᓐᓂᖅᓴᐅᓪᓗᖓ. ᐃᓅᓂᖅᓴᐅᕗᖓᓗ, ᑐᑭᓯᓇᖅᐸᑦ," ᐹᑐᓴᓐ ᐊᔾᔨᖃᖅᑐᖅ. 

Boston Pizza-ᑯᑦ ᐱᒋᐊᕐᕕᒋᓚᐅᖅᐸᐅᒃ ᓂᕿᓕᕆᓂᕐᒧᑦ ᐱᔨᑦᑎᕋᕐᓂᕐᒥᒃ, ᑎᑭᓴᐃᓪᓗᓂ ᐅᖄᓚᐅᑎᒃᑯᑦ ᐊᒻᒪᓗ ᑐᙵᓱᒃᑎᑦᑎᔨᒧᑦ. ᖁᕕᐊᒋᔭᖃᕐᓂᖓ ᐱᓕᕆᖃᑎᖃᕐᓂᕐᒥᒃ ᐃᓄᖕᓂᒃ ᐱᓕᕆᐊᖃᓕᓚᐅᖅᑐᖅ ᐃᖅᑲᓇᐃᔮᒥᒃ ᓂᕿᓄᑦ ᐊᐅᓪᓚᕐᓂᕐᒧᓪᓗ, ᖃᖓᑕᓲᓕᕆᔨᒃᑯᓐᓂ ᐅᓄᖅᑐᓄᑦ ᓂᕆᕝᕕᖕᓄᑦ ᐋᔅᑐᕋᐃᓕᐊᒥ ᐊᒻᒪ ᓂᐅ ᓰᓚᓐᒥ. ᓂᐅᕕᕈᓐᓇᖅᓯᒐᒥ ᐲᑦᓴᒥᒃ ᓄᓇᓯᐅᑎᒥᒃ ᖃᐅᔨᒪᔭᐅᑦᓯᐊᖅᑐᒥᒃ, ᕿᒡᒋᓚᐅᖅᑐᖅ ᐊᒻᒪᓗ ᒫᓐᓇ ᐊᕐᓇᐅᓕᖅᑐᖅ ᓇᐹᖅᑐᖃᕋᓂ ᓂᐅᕐᕈᑎᖃᖅᐸᑦᑐᓂᒃ ᕿᔪᓐᓂᒃ ᐲᑦᓴᒥᒃ. 

ᐊᕐᕌᒍᒐᓵᓗᖕᓄᑦ ᐃᖅᑲᓇᐃᔭᖅᓯᒪᓕᖅᖢᓂ ᖁᑦᑎᒃᑐᒦᑦᑐᓂ ᐃᓂᓂ, ᑖᓐᓇ ᐲᑦᓴ ᓄᓇᓯᐅᑎ ᐱᐅᓂᖅᓴᒻᒪᕆᐅᓚᐅᖅᐳᖅ ᓂᕈᐊᕆᓂᐊᕐᓗᒍ ᐊᔪᙱᓐᓂᕆᔭᒥᓂᒃ ᐊᑐᖅᖢᓂ. ᐅᐱᖦᖢᓂ ᓇᖕᒥᓂᖃᖅᑐᖅ, ᐃᓚᓕᐅᔾᔨᕙᒃᐳᖅ ᐃᓕᖅᑯᓯᑐᖃᕐᒥᓂᒃ ᐅᓂᒃᑳᖅᖢᓂᓗ ᓇᖕᒥᓂᕆᔭᒥᓄᑦ ᑕᒪᓐᓇᓗ ᑐᙵᕕᖃᖅᖢᓂ ᐱᑎᑦᑎᔪᒪᓂᕐᒥᒃ ᐱᐅᔪᓂᒃ ᓂᕿᓂᒃ ᐃᓄᑦᑎᐊᕙᖕᓄᑦ ᐱᐅᔪᓂ ᐃᓂᓂ. "ᐱᔭᕆᐊᑭᑦᑐᒻᒪᕆᐊᓗᒃ ᓇᖕᒥᓂᖃᕐᓂᕐᒥᒃ, ᑭᓯᐊᓂ ᐃᖏᕐᕋᑦᑎᐊᖅᑰᔨᔪᖅ," ᐅᓂᒃᑳᖅᖢᓂ. 

ᐅᖓᑖᓄᑦ ᐃᓕᑕᖓᑕ ᐃᖅᑲᓇᐃᔭᕐᓂᕐᒥ, ᐹᑐᓴᓐ ᑐᙵᓱᒃᑎᑦᑎᓂᕐᒧᑦ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒧᑦ ᐃᓕᓐᓂᐊᒐᒃᓴᖅ, ᐱᑎᑕᐅᓪᓗᓂ ᐃᖅᑲᓇᐃᔭᕐᕕᒋᓚᐅᖅᑕᒥᓄᑦ, ᐃᓕᑦᑎᓪᓗᓂ ᐊᐅᓚᑦᑎᓂᕐᒥᒃ ᖃᓄᑐᐃᓐᓇᖅ ᓂᕿᒥᒃ ᓄᓇᓯᐅᑎᒥᒃ ᑎᒥᐅᔫᑉ ᓂᕆᕝᕕᖏᓐᓄᑦ ᐅᓄᖅᑐᓄᑦ ᐃᓂᓄᑦ. ᑕᒪᓐᓇ ᐃᓕᓐᓂᐊᕐᓂᖅ ᐊᑐᐃᓐᓇᖃᕐᒪᑦ ᐱᓕᕆᐊᒥᓂᒃ. 

ᐅᖃᐅᔾᔨᒋᐊᕐᓂᖓ ᑭᓇᑐᐃᓐᓇᕐᒧᑦ ᐃᓱᒪᑐᐃᓐᓇᕆᐊᓕᒻᒧᑦ ᐊᐅᓪᓚᕈᒪᓗᓂ ᓄᓇᒥᓐᓂᒃ ᐃᓕᓐᓂᐊᕆᐊᕐᓗᓂ ᑲᓇᑕᐅᑉ ᓯᓚᑖᓄᑦ ᐅᕝᕙᓘᓐᓃᑦ ᕿᓂᕐᓗᓂ "ᐊᔪᖅᐸᑦ, ᐊᖏᕐᕋᕈᓐᓇᕋᕕᑦ ᐊᖏᕐᕋᒧᓪᓗ, ᑕᒪᓐᓇ ᐊᓯᔾᔨᓚᐅᖅᓯᒪᔾᔮᖏᑦᑐᖅ. ᐅᑭᐅᖅᑕᖅᑐᒥᐅᑕᐅᖏᓐᓇᐅᔭᕐᓂᐊᖅᑐᖓ ᑲᓇᑕᒥᓗ, ᑲᓇᑕᒥᐅᑕᐅᖏᓐᓇᕐᓂᐊᖅᑐᖓ. ᑕᒪᓐᓇ ᐊᓯᔾᔨᓚᐅᖅᓯᒪᔾᔮᖏᑦᑐᖅ. ᑭᓇᑐᐃᓐᓇᑦᑎᐊᖅ ᐅᕙᓐᓄᑦ ᐲᖅᑕᐅᔪᓐᓇᙱᓚᖅ." ᐃᓄᖕᓄᑦ ᑐᓴᐅᒪᔾᔪᑎᑎᒍᑦ, ᑕᕐᕆᔭᐅᑎᒃᑯᑦ, ᐃᑭᐊᖅᑭᕕᒃᑯᑦ ᐊᒻᒪ ᐊᐅᓪᓚᑲᑕᑦᑎᐊᕐᓂᖅᓴᐅᓪᓗᓂ, ᑲᑎᙵᑎᑦᑎᒃᑲᓐᓂᕈᓐᓇᖅᑐᖅ ᐃᓄᖕᓂᒃ ᐊᐃᓯᒪᖃᑎᖃᕆᐊᖃᓕᕌᖓᑦ. ᓇᓂᓯᓚᐅᕐᒥᔪᖅ ᖃᓄᖅ ᑲᓲᒪᖃᑎᖃᕈᓐᓇᕐᒪᖔᑦ ᐃᓄᖕᓂᒃ ᐊᖏᕐᕋᖅᑖᓵᖓᓂ, ᐅᖃᐅᓯᕐᒧᑦ ᑐᓗᕈᑎᖃᕋᓗᐊᕐᓗᓂ.

ᐊᐃᓯᐊ, ᐊᒡᒐᒥᓄᑦ ᓇᓗᓇᐃᒃᑯᑕᓂᒃ ᐊᑐᖃᑦᑕᓚᐅᖅᐳᖅ ᐊᒻᒪ ᓇᓗᓇᐃᖅᓯᓪᓗᓂ ᐊᓂᒍᐃᔪᓐᓇᙱᖦᖢᓂ ᐅᖃᓪᓚᒍᓐᓇᙱᖦᖢᓂ ᐅᖃᐅᓯᕐᒥᒃ. ᓂᐅ ᓰᓚᓐᒥ, ᓇᓂᓯᓚᐅᖅᑐᖅ ᐋᓪᓚᐅᔪᓂᒃ ᖁᕕᐊᓱᒃᖢᑎᒃ ᐃᑲᔪᕆᐊᒃᓴᖅ ᓄᑖᓂᒃ ᐃᓂᓂᒃ ᐊᓯᐅᕙᓪᓕᐊᖅᑰᔨᓕᕌᖓᑦ. "ᑐᙵᓱᒃᑎᑦᑎᓂᖅ ᐱᐅᔪᐊᓘᖕᒪᑦ ᓄᓇᕐᔪᐊᓕᒫᒥ ᖃᐅᔨᒪᙱᖦᖢᑎᓪᓗ ᑭᓯᐊᓂ ᐊᓂᒍᕕᑦ, ᑕᒻᒪᙱᖦᖢᓂ?" ᐊᓕᐊᓇᐅᔭᖅᑐᖅ. 

ᐊᖓᔪᖅᑳᒥᓄᑦ ᐱᕈᖅᓴᔭᐅᓪᓗᓂ ᓂᕆᐅᖕᓂᖃᑦᑎᐊᖏᓐᓇᖁᓪᓗᒍ, ᐃᓱᒪᑦᑎᐊᕐᓇᖅᐳᖅ ᐊᒻᒪ ᐱᓇᓱᐊᑦᑎᐊᖅᐸᒃᖢᓂ ᑭᒃᑯᑐᐃᓐᓇᑦᑎᐊᓂᒃ ᑲᒪᒋᔭᖃᑦᑎᐊᕈᒪᓪᓗᓂ ᐊᒻᒪ ᐃᖅᑲᓇᐃᔮᒥᓄᑦ ᐊᑐᖅᐸᒃᖢᓂ. "ᐋᖅᑭᑦᓯᖏᑐᐃᓐᓇᕆᐊᖃᖅᑐᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐃᓱᒫᓘᑕᐅᔪᓂᑦ, ᐊᒻᒪᓗ ᖃᓪᓗᓈᖑᖃᑎᒌᑦ ᖃᓄᐃᓕᓂᕆᖃᑦᑕᖅᓯᒪᔭᖏᑦ ᐱᐅᓯᕆᓯᒪᔭᑦᑎᓐᓂᑦ ᑭᓯᐊᓂ ᑐᙵᓇᕐᓂᐊᖅᑐᖓ, ᐱᐅᓂᐊᖅᓱᖓᓗ ᑲᒪᒋᔭᖃᕐᓂᐊᖅᓱᖓᓗ ᐃᓘᓐᓇᖏᓐᓂᑦ ᑲᒪᒋᔭᐅᒍᒪᔭᓐᓂᑦ," ᐅᖃᖅᑐᖅ. 

"ᐋᖅᑭᒃᓱᐃᙱᑐᐃᓐᓇᕆᐊᖃᖅᑐᖓ ᓯᓚᐅᑉ ᐊᓯᔾᔨᖅᐸᓪᓕᐊᓂᖓᓄᑦ ᐱᔾᔪᑕᐅᔪᓂᒃ, ᐊᒻᒪ ᖃᓪᓗᓈᖑᖃᑎᒌᙱᑦᑐᑦ ᖃᓄᐃᓕᐅᖅᐸᓚᐅᕈᓯᖏᓐᓂᒃ ᑭᓯᐊᓂ ᑐᙵᓇᕐᓂᐊᖅᐳᖓ, ᐱᐅᓂᐊᖅᖢᖓᓗ ᑲᒪᒋᔭᐃᓐᓇᕆᓂᐊᕋᒃᑭᑦ ᖃᓄᖅ ᑲᒪᒋᔭᐅᔪᒪᖕᒪᖔᕐᒪ."

ᓂᐅ ᓰᓚᓐᒥᐅᑕᐅᓪᓗᓂ, ᓂᕆᐅᒃᑐᖅ ᐃᓚᒥᓂᒃ ᐱᒋᐊᖅᑎᑦᑎᓂᐊᕐᓂᕐᒥᓂᒃ ᐊᒻᒪ ᐊᑐᓕᖅᑎᑦᑎᓗᓂ ᐊᕐᕌᒍᓄᑦ ᑕᓪᓕᒪᓄᑦ ᐸᕐᓇᐅᑎᖓᓂᒃ ᓇᖕᒥᓂᕆᔭᒥᓄᑦ. ᐊᖅᑯᑎᒃᑯᑦ, ᕿᒥᕐᕈᔪᒪᔪᖅ ᓂᐱᓂᒃ ᐱᓕᕆᓂᕆᓚᐅᖅᑕᖓᓂᒃ ᐃᓕᓐᓂᐊᓕᕋᒥ ᕚᓐᑰᕗᒥ, ᐃᑲᔪᖅᑐᖅᑕᐅᓪᓗᓂ ᑮᓇᐅᔭᓕᐅᕐᓂᖓᓄᑦ ᑲᔪᓯᑦᑎᐊᕐᓂᖓᓄᑦ ᓇᖕᒥᓂᕆᔭᖓ ᐱᕈᖅᐸᓪᓕᐊᑎᓪᓗᒍ. ᐃᓱᒪᖓ ᖃᓄᐃᙱᑦᑎᐊᖏᓐᓇᖁᓪᓗᒍ, squash−ᒥ ᐱᙳᐊᓲᖅ, ᓇᐅᒃᑲᖅᑕᐅᓪᓗᓂ, ᑯᒃᑭᑕᐹᖅᖢᓂ ᐃᙱᖅᖢᓂᓗ. ᓴᓇᙳᐊᕐᓂᕐᒥᒃ ᒥᖅᓱᒐᕐᒥᓪᓗ ᖁᕕᐊᒋᔭᖃᑦᑎᐊᖅᑐᖅ ᐊᒻᒪ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᖃᑦᑕᖅᐳᖅ ᓄᓇᓕᖕᓂ. 

ᒪᑐᓕᖅᖢᒍ, ᐅᖃᐅᓯᖃᖅᑐᖅ ᑖᒃᑯᓂᖓ ᐅᖃᐅᓯᖅᑕᓂᒃ ᐱᔪᒃᓯᑎᑦᑎᔪᓂᒃ, "ᐆᓯᒪᒐᓛᒃᑯᕕᑦ ᐃᓗᖕᓂ ᐃᓅᔪᒪᓗᑎᑦ ᓇᓂᑭᐊᖅ ᐅᕝᕙᓘᓐᓃᑦ ᖃᖓᑕᓲᒧᐊᕐᓗᑎᑦ ᓇᒧᙵᐅᓗᑎᓪᓗ, ᐅᖃᖅᐳᖓ 'ᐊᑏ! ᐊᖏᕐᕋᐃᓐᓇᐅᔭᕈᓐᓇᖅᑐᑎᑦ, ᐊᓂᓗᑎᑦ ᕿᒥᕐᕈᓗᑎᓪᓗ! ᐊᓕᐊᓇᐃᑦᑐᒻᒪᕆᐅᕗᖅ. ᑲᓇᑕᐅᑉ ᓯᓚᑖᓂᒥᐅᑕᐅᑐᐃᓐᓇᕆᐊᖃᕋᕕᑦ, ᐅᕝᕙᓘᓐᓃᑦ ᐊᖏᕐᕋᑐᐃᓐᓇᕆᐊᖃᕋᕕᑦ ᐱᐅᔪᐊᓘᓇᔭᖅᖢᓂᓗ."

ᐊᖏᕐᕋᕐᓂᙶᖅᑐᖅ, ᔭᓯᑲ ᐹᑐᓴᓐ ᖃᐅᔨᒪᔪᖅ ᐃᓅᑎᓪᓗᑎᑦ ᐱᕈᖅᓴᑎᓪᓗᒋᓪᓗ ᓄᓇᖃᖅᑳᖅᓯᒪᔪᑦ, ᕿᒪᓚᐅᖅᓯᒪᙱᑕᑦ. ᐃᓕᑦᑎᓯᒪᔪᖅ ᓇᒧᙵᕋᓗᐊᕈᓂ, ᐃᓅᖏᓐᓇᐅᔭᕐᓂᐊᖅᑐᖅ ᐃᓕᖅᑯᓯᖃᐃᓐᓇᐅᔭᕐᓂᐊᕐᖢᓂᓗ ᐅᐱᒍᓱᖕᓂᕐᒥᓂᑦ. ᐱᔨᑦᑎᖅᑐᖅ ᐱᖅᓯᖅᑐᓂᒃ ᐊᒻᒪᓗ ᐊᔾᔨᐅᖏᑦᑐᒥᒃ ᑲᓇᑕᒥᐅᑎᑐᑦ ᑕᐅᑐᑦᑕᒃᑯᑦ, ᕿᒡᒋᖅᓯᒪᔪᖅ ᖃᓂᒋᔭᖓᓂᑦ ᐅᑭᐅᖅᑕᖅᑐᒥᑦ ᖃᓪᓗᓈᑦ ᓄᓇᖓᓐᓄᑦ ᐊᒻᒪᓗ ᑕᓕᖏᓐᓄᑦ ᓇᓪᓕᒋᔭᒥᓄᑦ, ᓇᒥᑭᐊᖅ ᓇᓪᓕᒋᔭᒥᓄᑦ, ᖃᐅᔨᒪᓪᓗᓂ ᐊᖏᕐᕋᐃᓐᓇᕈᓐᓇᕐᖓᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.