"ᐄᔭᒐᖃᑦᑕᕋᒪ ᖃᐅᑕᒫᑦ, ᐊᒻᒪ ᑭᒡᒐᖅᑐᐃᓇᓱᑐᐃᓐᓇᖅᐳᖓ ᖃᓄᐃᙱᓐᓂᖓᓂᒃ ᐃᓱᒪᒃᑯᑦ ᐋᓐᓂᐊᕈᑎᖃᕆᐊᒃᓴᖅ. ᐃᓱᒫᓘᑎᐅᙱᒻᒪᕆᒃᑐᖅ. ᑕᒪᓐᓇ ᐊᔾᔨᐅᙱᑐᐃᓐᓇᖅᑐᖅ ᐱᓯᒪᔭᐃᑦ," ᐅᖃᖅᑐᖅ ᔫᓯᐱ ᒍᕋᐃᑦᔅᑭ. Brokenhead Ojibwe Nation-ᒥᐅᑕᖅ ᒫᓂᑑᐸᒥ. ᐃᖅᑲᓇᐃᔭᙱᖦᖢᓂ, ᐅᖃᓕᒫᕈᒪᑦᑎᐊᖅᐳᖅ, ᐃᖃᓪᓕᐊᖅᖢᓂ, ᓄᓇᒧᑦ ᑲᑎᙵᖃᑎᖃᕈᒪᑦᑎᐊᖅᖢᓂ ᐊᔪᙱᑐᐊᕌᖓᒥ. ᐊᑖᑕᑖᓵᖑᓪᓗᓂ ᐊᑕᐅᓯᕐᒥᒃ ᐅᑭᐅᓕᖕᒥᒃ, ᐊᖓᔪᖅᑳᖑᓂᕐᒥᒃ ᖁᕕᐊᒋᔭᖃᖅᐳᖅ.

ᐃᖅᑲᓇᐃᔮᖓᓄᓪᓕ, ᐱᓕᕆᐊᖃᖅᐳᖅ ᐱᓕᕆᐊᖑᔪᒥᒃ ᑕᐃᔭᐅᔪᒥᒃ WhiteFeather AI−ᒥᒃ, AI ᐱᖃᑎᒋᔭᐅᔪᖅ ᐱᓕᕆᐊᖃᓪᓚᕆᒍᒪᓪᓗᓂ ᐃᓱᒪᒃᑯᑦ ᖃᓄᐃᙱᑦᑐᓐᓇᕐᓂᕐᒧᑦ ᐱᔨᑦᑎᕋᕐᓂᕆᔭᐅᕙᒃᑐᒥᒃ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ. ᐱᓕᕆᐊᖑᔪᖅ ᐱᒻᒪᕆᐅᕗᖅ ᑖᔅᓱᒧᖓ, ᖃᐅᔨᔭᐅᒐᒥ ᐃᓱᒪᒃᑯᑦ ᐋᓐᓂᐊᖃᕐᓂᖓᓂᒃ ᐊᒃᓱᕈᕈᑎᖃᓚᐅᖅᖢᓂᓗ ᐃᓱᒪᒃᑯᑦ ᐋᓐᓂᐊᖃᕐᓂᕐᒧᑦ ᐊᒃᓱᕉᑎᒋᔭᐅᔪᓂᒃ ᑕᐃᒪᙵᑦ 2020−ᒥ. ᑕᐅᑐᙳᐊᖅᑕᖓ ᐱᓕᕆᐊᒧᑦ ᐃᓂᖃᖅᑎᑦᑎᓗᓂ ᐊᑐᖅᑎᓂᒃ ᐅᖃᐅᓯᖃᕈᓐᓇᕐᓗᑎᒃ ᐊᑲᐅᙱᓕᐅᕈᑎᒋᔭᖏᓐᓂᒃ, ᐃᖢᕐᕆᙱᑐᐃᓐᓇᕆᐊᖃᖅᑐᑦ ᐅᖃᖃᑎᖃᕐᓂᕐᒥᒃ ᐱᓕᒻᒪᒃᓴᐃᔨᒧᑦ, ᑭᓯᐊᓂ ᐅᖃᖃᑎᖃᕈᓐᓇᕐᓗᑎᒃ AI ᐱᓕᕆᔾᔪᑎᒥᒃ ᐃᓕᑦᑎᔪᓐᓇᖅᑐᓂᒃ. "ᖁᕕᐊᓇᖅᑐᒻᒪᕆᐊᓗᒃ, ᑕᑯᔪᒪᓪᓚᕆᒃᖢᒍᓗ ᑖᓐᓇ ᐱᓕᕆᐊᖑᔪᖅ ᓴᖅᑭᑉᐸᓪᓕᐊᓕᖅᑎᓪᓗᒍ, ᐊᒻᒪ ᑭᒃᑯᓕᒫᑦ, ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ, ᖃᕆᑕᐅᔭᒃᑰᕈᓐᓇᐅᑎᖏᓐᓂᒃ ᐱᓯᒪᓗᑎᒃ," ᐅᖃᕆᓪᓗᓂ.

ᒍᕋᐃᑦᔅᑭ ᓯᓚᑦᑐᖅᓴᕐᕕᒡᔪᐊᕐᒧᐊᓚᐅᖅᐳᖅ ᐊᒥᐊᓕᑲᒥ. ᐃᓕᓐᓂᐊᕆᐊᒃᑲᓐᓂᕈᑎᑖᓚᐅᖅᐳᖅ ᓄᓇᖃᖅᑳᖅᑐᑦ ᐱᓕᕆᐊᖓᒍᑦ ᐃᓚᐅᔪᓐᓇᖅᖢᓂ ᑕᐃᑲᓂᓗ ᕼᐋᑭᖃᑕᐅᔪᓐᓇᖅᖢᓂ. ᑎᓕᐅᕆᕗᖅ ᐃᓕᓐᓂᐊᖅᑎᓂᒃ ᐊᖏᒡᓕᒋᐊᖅᑎᑦᑎᖁᔨᓪᓗᓂ ᓇᒧᙵᐅᔪᒪᓇᔭᕐᓂᖏᓐᓂ ᐃᓚᐅᑎᓪᓗᒋᑦ ᐊᒥᐊᓕᑲᒥᐅᑦ ᓲᖃᐃᒻᒪ ᐊᔾᔨᐅᙱᑦᑐᒥ ᐱᕕᒃᓴᖃᕐᓂᐅᔪᒥ ᓄᓇᖃᖅᑳᖅᑐᑦ ᐃᓕᓐᓂᐊᕆᐊᕈᓐᓇᕐᓂᖏᓐᓂ ᐊᒥᐊᓕᑲᐃᑦ ᓄᓇᖓᓐᓂ. ᐃᓕᓐᓂᐊᕇᕋᒥ, ᑮᓇᐅᔭᒃᑯᕕᓕᕆᔨᙳᓚᐅᖅᐳᖅ, ᑭᖑᓂᐊᒍᓪᓗ ᓇᖕᒥᓂᖃᓕᖅᖢᓂ, ᐱᖓᓱᓂᒃ ᓇᖕᒥᓂᖅᑖᖅᖢᓂ ᑲᑎᒪᔨᐅᖃᑕᐅᓪᓗᓂ. ᒫᓐᓇ ᑕᐅᑐᒐᖃᓪᓗᐊᑕᖅᑐᖅ WhiteFeather AI−ᒥᒃ.

ᐅᓇ ᐱᔪᒃᓯᓕᕈᑎᒋᕙᐅᒃ ᑕᐅᑐᒃᑕᖓ ᓱᓕᓪᓗᓂ ᐊᑖᑕᑦᑎᐊᖓᑕ ᓄᓇᖓ 23 ᐅᖓᑖᓂ ᐃᒻᒥᓃᕋᓱᒃᓯᒪᔪᖃᓚᐅᕐᓂᖓᓂᒃ ᒪᒃᑯᒃᑐᓂ 2023-ᒥ. ᒍᕋᐃᑦᔅᑭ ᐃᓱᒪᓚᐅᖅᐳᖅ ᖃᓄᐃᓕᐅᕆᐊᖃᕋᓱᒋᓪᓗᓂᐅᒃ ᐊᒻᒪ ᑕᐃᒪᐃᒍᓐᓇᙱᖦᖢᓂ ᓄᓇᖓᓂ. ᐅᖃᖃᑎᖃᖅᖢᓂ ᐃᓐᓇᕐᓂᒃ, ᖃᐅᔨᓚᐅᖅᐳᖅ ᐱᓕᒻᒪᒃᓴᐃᔨᑕᖃᙱᓐᓂᖓᓂᒃ ᐃᓅᓯᓕᕆᔨᓂᒡᓘᓐᓃᑦ ᐊᒻᒪ ᐃᑭᐊᖅᑭᕕᒃᑰᕈᓐᓇᐅᑎᖃᙱᖦᖢᑎᒃ ᖃᕆᑕᐅᔭᒃᑰᕈᓐᓇᐅᑎᖃᙱᖦᖢᑎᒡᓗ ᖃᕆᓴᐅᔭᒃᑯᑦ ᐱᔨᑦᑎᕋᐅᑎᓂᒃ. "ᐊᒥᓱᐊᓗᖕᓂ ᐊᕝᕕᐊᕈᑎᑕᖃᖅᐳᖅ ᐊᓂᒍᖅᑕᐅᔭᕆᐊᓕᖕᓂᒃ. ᑭᓯᐊᓂ ᐅᒃᐱᕈᓱᒃᐳᖓ ᑲᑎᙵᓂᑦᑎᓐᓂ ᓴᙱᓂᖅᓴᐅᓂᑦᑎᓐᓂ, ᐊᒻᒪ ᐅᒃᐱᕈᓱᒃᐳᖓ ᑲᑎᙵᓂᐅᔪᒥ ᐊᒻᒪ ᐱᓕᕆᕙᓪᓕᐊᓂᕐᒥ ᑖᒃᑯᓂᖓ ᐱᓕᕆᐊᒃᓴᓂ ᐃᑲᔪᕈᒪᓪᓗᒋᑦ ᒪᒃᑯᒃᑐᖁᑎᕗᑦ ᐅᓪᓘᑉ ᓄᙳᐊᓂ ᑐᑭᖃᑦᑎᐊᖅᐳᖅ," ᐅᓂᒃᑳᖅᐳᖅ.

ᐃᑲᔪᖅᑕᐅᓪᓗᓂ ᑐᕌᓐᑐᒥ−ᑐᙵᕕᓕᖕᒥ ᐃᓱᒪᓕᕆᓂᕐᒧᑦ ᖃᕋᓴᐅᔭᒃᑰᕈᓐᓇᐅᑎᓂᒃ ᐋᖅᑭᒃᓱᐃᔨᒥᑦ, ᐅᑯᓇᙵᑦ TakingItGlobal−ᑯᓐᓂ ᐊᒻᒪ ᑲᔪᖏᖅᓴᖅᑕᐅᓪᓗᓂ ᐱᔪᒪᓂᖃᑦᑎᐊᖅᖢᓂ LinkedIn−ᑯᑦ, ᒍᕋᐃᑦᔅᑭ ᐃᒃᐱᒍᓱᒃᐳᖅ ᐱᔪᓐᓇᕐᓂᖅᑖᖅᑎᑕᐅᓯᒪᓂᕐᒥᓂᒃ ᑲᔪᓯᑎᑦᑎᔪᓐᓇᕐᓂᕐᒥᒃ ᑐᕌᒐᕆᔭᒥᓂᒃ. ᐃᑭᐊᖅᑭᕕᖕᒥ ᓴᖅᑭᑦᑎᕌᓂᒃᓯᒪᓕᖅᐳᖅ ᐊᒻᒪ ᑎᑭᑉᐸᓪᓕᐊᓕᖅᖢᓂ. "ᐅᓪᓘᑉ ᐃᓱᐊᓂ, WhiteFeather AI ᑐᑭᖃᖅᐳᖅ ᐃᓕᖕᓂᒃ ᓇᓂᓯᓪᓚᕆᖕᓂᕐᒥᒃ ᐊᒻᒪ ᐱᓕᕆᑦᑎᐊᕐᓂᕐᒥᒃ," ᐅᖃᖅᑐᖅ. ᓂᕆᐅᒃᐳᖅ ᓴᖅᑭᑎᑦᑎᓛᕈᒪᓪᓗᓂ 2026 ᐱᒋᐊᓕᓵᕐᓂᖓᓂ ᑮᓇᐅᔭᓕᒫᓂ ᑲᑎᖅᓱᕈᓐᓇᓚᐅᖅᑕᖏᓐᓂ.  

ᒫᓐᓇᒃᑯᑦ ᐊᖏᓛᖑᔪᖅ ᑐᓗᖅᑕᕈᑕᐅᕙᒃᑐᖅ ᑲᙳᓇᖅᑑᑎᒋᔭᖏᓐᓄᑦ ᐊᒻᒪ ᐊᑦᑕᕐᓇᖅᑐᒦᑎᑦᑕᐃᓕᓂᕐᒧᑦ ᐅᖃᓪᓚᖃᑎᖃᖅᐸᖕᓂᕐᒥᒃ ᐊᑐᖅᑎᒧᑦ ᐊᒻᒪ AI ᐱᓕᕆᔾᔪᑎᒧᑦ. ᒍᕋᐃᑦᔅᑭ ᖃᐅᔨᒪᔪᒪᖕᒥᔪᖅ AI ᐅᖃᐅᔾᔨᑦᑎᐊᖃᑦᑕᕐᓂᖓᓂᒃ ᐊᒻᒪ ᑕᕐᕆᔭᒐᒃᓴᓂᒃ ᐅᖃᐅᔾᔪᖅᓱᐃᕙᙱᖦᖢᓂ ᖃᓄᑐᐃᓐᓇᕐᓘᓐᓃᑦ. ᓯᕗᓪᓕᕐᒥ, ᐃᓱᒪᓚᐅᕐᑐᖅ ᖃᖓᑦᑕᖅᑎᑕᐅᓂᐊᕋᓱᒋᓪᓗᓂᒋᑦ ᒫᔾᔨᐅᓚᐅᕐᑐᒥ ᑭᓯᐊᓂ ᐊᒃᓱᕈᕐᓇᕈᑎᒋᓯᒪᔭᖏᑦ ᒫᓐᓇᒧᑦ ᑎᑭᖦᖢᒍ ᑭᖑᕙᕆᐊᖅᑕᐅᔭᕆᐊᖃᓕᓚᐅᕐᐳᖅ ᑭᓱᑐᐃᓐᓇᐃᑦ ᐋᖅᑭᒐᓱᖕᓂᖏᓐᓂ. ᑎᑎᕋᖅᓯᒪᔪᑦ ᐊᒃᑐᐊᓂᖃᕐᓂᖏᓐᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ, ᓴᐳᔾᔭᐅᓯᒪᔭᕆᐊᖃᖅᐳᑦ. ᐊᒃᓱᕈᕐᓇᕋᓗᐊᖅᑎᓪᓗᒍ, ᒍᕋᐃᑦᔅᑭ ᓯᕗᒻᒧᐊᒃᐸᓪᓕᐊᖏᓐᓇᖅᐳᖅ ᐱᓕᕆᐊᒧᑦ.

ᐃᓱᒪᒥᒍᑦ ᖃᓄᐃᖏᑦᑎᐊᖁᓪᓗᒍ, ᒍᕋᐃᑦᔅᑭ ᖃᐅᑕᒫᑦ ᐄᔭᒐᖃᑦᑕᖅᐳᖅ. "ᓲᕐᓗ ᖁᕕᐊᓲᑕᐅᑲᓴᒃᑐᖅ ᐄᔭᒐᕆᐊᒃᓴᖅ ᐅᓪᓛᒃᑯᑦ." ᐃᑯᐊᓚᑎᑦᑎᕙᒃᑭᕗᖅ ᓴᐅᓂᙳᐊᓂᒃ ᐊᒻᒪ ᓱᐴᖅᑐᒐᕐᓂᒃ ᐊᒻᒪ ᐊᑎᑐᖃᕐᒥᓂᒃ ᐅᖃᖅᐸᒃᖢᓂ, ᓴᓗᒻᒪᖅᓴᖅᐸᒃᖢᓂᐅᒃ ᐃᓂᒋᔭᖓ. ᒍᕋᐃᑦᔅᑭ ᐃᓱᒪᒃᓴᖅᓯᐅᖅᐸᒃᐳᖅ ᐃᒻᒥᓂᒃ ᓈᓚᒃᐸᒃᖢᓂᓗ ᒪᕐᕉᖕᓂᒃ ᓂᐱᓕᐅᖅᓯᒪᔪᓂᒃ. ᐊᓂᖅᓵᖅᑐᕐᓂᒃᑯᑦ ᐃᖃᐃᓕᓴᖅᐸᒃᐳᖅ ᓯᓚᒦᑉᐸᒃᖢᓂᓗ. ᐃᓚᐅᕙᒃᐳᖅ ᖁᕕᐊᓱᒍᑕᐅᔪᓂ ᓲᕐᓗ ᐅᕕᓂᙳᐊᖅᑐᑎᑐᑦ.

"ᓄᓇᖃᖅᑳᖅᓯᒪᓪᓗᑕ ᐃᓅᓪᓗᑕ, ᓴᙱᔪᒻᒪᕆᐊᓘᒐᑦᑕ. ᐃᓄᑦᑎᐊᕙᐅᕗᒍᑦ, ᓴᙱᔫᕗᒍᑦ."

ᑲᔪᖏᖅᓴᐃᓂᕐᒧᑦ, ᒍᕋᐃᑦᔅᑭ ᓯᕗᓪᓕᖅᐸᐅᔪᒪᐃᓐᓇᐅᔭᓚᐅᖅᐳᖅ ᑭᓱᒥᒃᑭᐊᖅ, ᑕᒪᓐᓇᓗ ᐊᓂᒍᖅᑎᓯᒪᔭᖓ ᓯᕗᓪᓕᖅᐹᖑᓪᓗᓂ ᓄᓇᖃᖅᑳᖅᑐᓄᑦ ᐃᓕᓐᓂᐊᕆᐊᖅᓯᒪᓪᓗᓂ ᓯᓚᑦᑐᖅᓴᕐᕕᒡᔪᐊᒥ. ᓯᕗᒃᑲᖅᑕᐃᔪᒪᖕᒥᔪᖅ ᐃᔾᔪᐊᒐᒃᓴᐅᓗᓂ. ᑕᑯᑎᑦᑎᔪᒪᕗᖅ ᒪᒃᑯᒃᑐᓂᒃ ᐊᓯᖏᓐᓂᒡᓗ ᐊᔪᕐᓇᙱᓐᓂᖓᓂᒃ ᑕᐅᑐᙳᐊᕈᓐᓇᕐᓂᕐᒥᒃ ᐊᖏᔪᒥᒃ, ᓴᖅᑭᑎᑦᑎᓗᓂ ᑭᓱᒥᒃᑭᐊᖅ ᐱᓪᓚᕆᙳᖅᑎᑦᑐᒪᓇᔭᖅᑕᕐᓂᒃ. ᒍᕋᐃᑦᔅᑭ ᐱᐅᓛᖑᔪᒪᕗᖅ ᖃᐅᔨᒪᓪᓗᓂ ᓱᕈᓯᖅᑕᖃᕐᓂᖓᓂᒃ ᑖᔅᓱᑐᓇᖅ ᐅᑕᖅᑭᔪᒥᒃ ᐊᔪᕆᖅᓱᖅᑕᐅᔪᒪᓂᕐᒥᓂᒃ. ᓂᕆᐅᒃᑐᖅ ᑐᓵᓂᐊᕐᓂᖏᓐᓂᒃ ᐅᓂᒃᑳᖏᓐᓂᒃ ᐊᒻᒪᓗ ᒪᓕᒡᓗᑎᒃ ᐆᒻᒪᑎᖏᓐᓂᒃ. "ᑕᒪᓐᓇ ᐅᕙᓐᓂᒃ ᐱᔪᒃᓯᑎᑦᑎᓪᓚᕆᒃᐸᒃᐳᖅ, ᐱᔪᒃᓯᑎᑦᑎᔪᒪᓂᐅᕗᖅ ᑭᖑᕚᒃᓴᑦᑎᓐᓂ ᓴᙱᔪᓂᒃ ᓄᓇᖃᖅᑳᖅᑐᓂᒃ ᒪᒃᑯᒃᑐᓂᒃ," ᐅᖃᓚᐅᖅᐳᖅ.

ᐅᖃᐅᔾᔨᒋᐊᕈᑎᒋᔭᖓ ᓇᖕᒥᓂᖅᑖᕈᒪᔪᓄᑦ ᓇᖕᒥᓂᖅ ᐱᓕᕆᓇᓱᖃᑦᑕᕐᓗᑎᒃ ᐅᕝᕙᓘᓐᓃᑦ ᐊᖅᑯᑎᒋᓗᒋᑦ ᓄᓇᓕᖕᓂ ᐃᖅᑲᓇᐃᔭᖅᑐᓕᕆᔨᑦ ᐱᓕᕆᔨᑖᙱᖔᕐᓗᑎᒃ ᖃᐅᔨᒪᔨᑕᕐᓂᒃ ᐊᒻᒪ ᒪᓕᒐᓕᕆᔨᓂᒃ. ᒍᕋᐃᑦᔅᑭ ᑎᓕᐅᕆᒋᕗᖅ, "ᐃᓕᖕᓂᒃ ᐅᒃᐱᕆᑦᑎᐊᕆᑦ, ᓯᕗᓪᓕᖅ,... ᐊᒻᒪᓗ ᑲᔪᖏᖅᓴᐃᓪᓚᕆᓕᕐᓗᑎᒃ ᑭᒡᓕᒋᑎᑕᐅᔪᓂᒃ ᖃᓄᐃᓕᐅᖅᑕᐅᕙᓪᓕᐊᔪᓂᒃ,... ᐅᕝᕙᓘᓐᓃᑦ ᐃᓱᒪᒃᓴᖅᓯᐅᕈᓐᓇᑦᑎᐊᕐᓗᑎᒃ." ᐃᒪᓐᓇᐅᖁᔨᕗᖅ, ᓇᖕᒥᓂᖅ ᐱᓕᕆᖃᑦᑕᕐᓗᑎᑦ ᑭᓯᐊᓂ ᐱᓕᕆᖃᑎᒋᔭᑎᑦ ᐅᓄᖅᓯᕚᓪᓕᖅᑎᑦᑐᓐᓇᕈᕕᒋᑦ ᐊᒻᒪ ᐱᓕᕆᐊᒃᓴᖅᑖᖅᑎᑦᑎᓗᑎᑦ ᓇᖕᒥᓂᖅ ᐱᓕᕆᐊᕆᔪᓐᓇᖅᑕᕐᓂᒃ.

27-ᓂᒃ ᐅᑭᐅᖃᖅᖢᓂ ᐱᒋᐊᖅᑎᑦᑎᔨᐅᓪᓗᓂ, ᒍᕋᐃᑦᔅᑭ ᓱᓕ ᐃᓕᑦᑎᕙᓪᓕᐊᕗᖅ. ᐅᖃᓪᓚᖃᑎᖃᖅᖢᓂ ᐱᒋᐊᖅᑎᑦᑎᔨᓂᒃ, ᑲᔪᖏᖅᓴᐃᓯᒪᕗᑦ ᐃᓕᓐᓂᐊᖏᓐᓇᖁᔨᓪᓗᑎᒃ. "ᓲᕐᓗ ᖃᐳᑎᑑᕆᐊᖃᖅᐳᑎᑦ. ᑭᓱᓕᒫᓂᒃ ᑎᒍᓯᔭᕆᐊᖃᖅᐳᑎᑦ. ᑲᔪᓯᙱᒃᑯᕕᑦ, ᖃᓄᐃᙱᑦᑐᖅ. ᖃᓄᐃᙱᓚᖅ ᑲᔪᓯᙱᓪᓗᓂ, ᐃᓕᑦᑎᕙᓪᓕᐊᓂᐅᓪᓗᓂᓗ. ᐊᑖᑕᒐ ᐆᒥᖓ ᐱᖃᕐᒪᑦ, ᓵᓚᖃᕈᕕᑦ ᐅᕝᕙᓘᓐᓃᑦ ᐃᓕᑦᑎᓗᑎᑦ. ᓵᓚᖃᖅᐸᙱᓚᑎᑦ ᓵᓚᐅᙱᓚᑎᓪᓘᓐᓃᑦ, ᓵᓚᖃᖅᐳᑎᑦ ᐃᓕᑦᑎᕙᓪᓕᐊᓪᓗᑎᓪᓗ, ᐃᓕᑦᑎᕙᒃᖢᑎᓪᓗ ᑕᒻᒪᖅᑕᕐᓂᒃ, ᓴᙱᒃᑎᑉᐹᓪᓕᖅᐸᒃᖢᑎᓪᓗ. ᓴᙱᓂᖅᓴᐅᓕᕐᓗᑎᑦ ᓇᖕᒥᓂᖃᖅᑎᐅᓗᑎᑦ ᐊᒻᒪ ᐊᐅᓚᑦᑎᓂᖅᓴᐅᓂᐊᖅᐳᑎᑦ," ᐅᖃᖅᑐᖅ.

ᑭᖑᓪᓕᖅᐹᒥᒃ ᐅᖃᐅᔾᔪᖅᓱᐃᔾᔪᑎᒋᓚᐅᖅᑕᖓ ᐅᑯᐊᖑᕗᑦ, "ᐃᓕᖕᓂᒃ ᐅᒃᐱᕆᓗᑎᑦ ᐅᒃᐱᕆᓗᒍᓗ ᐃᒃᐱᒋᔭᐃᑦ. ᑕᐃᒪᓐᓇ ᐃᒃᐱᒋᔭᖃᖅᐳᑎᑦ, ᑕᒻᒪᙱᒃᑯᓂᓗ ᑕᒻᒪᙱᒃᑯᓂᓘᓐᓃᑦ, ᐅᒃᐱᕆᑦᑎᐊᖅᐸᐃᑦ ᐃᒃᐱᒋᔭᐃᑦ. ᐃᓕᑦᑎᓗᑎᑦ ᑕᒻᒪᖅᑕᕐᓂᒃ. ᓴᙱᓗᑎᑦ ᐱᒃᑯᒋᓗᒍᓗ ᑭᓇᐅᖕᒪᖔᖅᐱᑦ. ᓄᓇᓕᔅᓯᓐᓄᑦ ᐅᑎᖅᑎᑦᑎᖃᑦᑕᐃᓐᓇᐅᔭᕐᓗᓯ ᐊᒻᒪ ᒪᒃᑯᒃᑐᖁᑎᔅᓯᓐᓄᑦ ᐅᑎᖅᑎᑦᑎᖃᑦᑕᐃᓐᓇᐅᔭᕐᓗᓯ ᐊᒻᒪ ᑐᖁᓐᓇᖅᓯᖃᑦᑕᕐᓗᓯ."

ᐊᓯᔾᔩᔪᒪᓪᓗᓂ ᐊᒻᒪ ᑲᙳᓱᒃᑎᑦᑎᔪᒪᙱᖦᖢᓂ ᐃᓱᒪᒃᑯᑦ ᐋᓐᓂᐊᕈᑎᓕᖕᓂᒃ, ᔫᓯᐱ ᒍᕋᐃᑦᔅᑭ ᐋᖅᑭᒃᓱᐃᕙᓪᓕᐊᕗᖅ WhiteFeather AI−ᒥᒃ. ᐅᖃᐅᓯᖃᖅᖢᓂ ᖃᓄᐃᙱᓐᓂᖓᓂᒃ ᐃᓅᓕᓴᐅᑎᑐᖃᑦᑕᕆᐊᒃᓴᖅ, ᑕᑯᒃᓴᐅᑎᑦᑎᒋᕗᖅ ᐊᒥᓱᐊᓗᖕᓂᒃ ᓱᓕᔪᓂᒃ ᓄᓇᖃᖅᑳᖅᑐᑦ ᖃᕋᓴᐅᔭᓕᕆᔪᓐᓇᕐᓂᖏᓐᓂ. ᑕᑯᓚᐅᖅᖢᓂ ᐃᖕᒥᓃᕐᓂᕐᒧᑦ ᐊᒃᓱᕉᓴᒃᑐᓂᒃ ᐊᖏᕐᕋᕆᔭᒥᓂ, ᐱᔪᒪᓂᖃᑦᑎᐊᖅᐳᖅ ᓴᖅᑭᑎᑦᑎᔪᒪᓪᓗᓂ ᐊᓯᔾᔨᕐᓂᕆᔭᐅᔪᓂᒃ ᐊᒻᒪ AI ᐃᓅᓯᕆᔭᐅᔪᓂᒃ ᐱᐅᓯᕚᓪᓕᖅᑎᑦᑎᔪᓐᓇᖅᑐᓂᒃ ᓄᓇᖃᖅᑳᖅᑐᓄᑦ ᒪᒃᑯᒃᑐᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.