"ᖃᓄᑐᐃᓐᓇᖅ ᓇᑭᙶᕋᓗᐊᕈᕕᑦ, ᐊᓯᔾᔩᔪᓐᓇᖅᐳᑎᑦ, ᓄᓇᔅᓯᓐᓂᑐᐊᖑᙱᑦᑐᖅ, ᑭᓯᐊᓂ ᓇᓂᑐᐃᓐᓇᖅ ᑲᓇᑕᒥ. ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᖃᓄᐃᓕᐅᕈᓐᓇᙱᑦᑐᑦ," ᐅᖃᖅᐳᖅ ᔭᔅᑎᓐ ᓛᒐᓐ. ᔅᐅᐊᓐ ᕆᕗᒥᐅᑕᖅ, ᒫᓂᑑᕙᒥᐅᑕᐅᓕᖅᑐᖅ ᐊᒻᒪᓗ ᒫᓐᓇ ᐅᐃᓂᐸᒡᒥ ᓄᓇᖃᓕᖅᑐᖅ ᑎᓴᒪᒋᓕᖅᑕᖓᓂᒃ ᐊᕐᕌᒍᒦᓕᖅᑐᖅ ᓯᓚᑦᑐᓴᕐᕕᔾᔪᐊᖓᓂ ᒫᓂᑑᕙᐅᑉ. ᒐᕙᒪᓕᕆᓂᕐᒥᒃ ᐃᓕᓐᓂᐊᖅᑐᓂ ᐊᒻᒪᓗ ᒥᑭᔫᒐᓗᐊᓂᒃ, ᒪᓕᒐᓕᕆᓂᕐᒧᑦ ᐃᓕᓐᓂᐊᕈᒪᔪᖅ ᐱᔭᕇᕈᓂ. 

ᐃᓕᓐᓂᐊᓕᓵᖅᑎᓪᓗᒍ, ᐊᔾᔨᒌᙱᑦᑐᓂᒃ ᐃᓕᓐᓂᐊᒐᒃᓴᓂᒃ ᐆᒃᑐᓚᐅᖅᐳᖅ ᐊᒻᒪ ᐃᓱᒪᒃᓴᖅᓯᐅᕈᑎᖃᖅᖢᓂ ᓯᕗᓂᒃᓴᖓᓂ ᐊᒻᒪ ᖃᓄᐃᑦᑐᓂᒃ ᐃᓕᓐᓂᐊᖅᑕᐅᔪᓂᒃ ᐃᑲᔫᑎᖃᓛᖑᓇᔭᕐᒪᖔᑦ ᐃᓅᓗᓂ ᐊᒻᒪ ᓯᕗᓕᖅᑎᐅᓗᓂ ᓇᖕᒥᓂᖅ ᑲᑎᒪᔨᐅᕝᕕᒋᔭᒥᓄᑦ. ᒐᕙᒪᓕᕆᓂᒃᑯᑦ ᖃᐅᔨᓴᕐᓂᐅᔪᑦ ᐃᓱᒪᓚᐅᕐᒪᑕ ᐱᐅᓂᖅᐹᖑᒋᐊᖓᓂᒃ ᓯᕗᓂᒃᓴᑦᑎᐊᕙᒻᒧᑦ ᑕᐃᒪᓐᓇ ᐱᓕᕆᓇᓱᐊᖅᐳᖅ. 

ᐱᕈᖅᐸᓪᓕᐊᓪᓗᓂ, ᐊᓈᓇᖓ ᑎᓕᐅᕆᖏᓐᓇᕐᖢᓂ ᒪᓕᒐᓕᕆᔨᐅᖁᓪᓗᓂᐅᒃ ᑭᓯᐊᓂ ᒪᓕᒍᒪᙱᖦᖢᓂ ᐊᖅᑯᑎᒥᒃ. ᑕᐃᒪᓕ ᐃᓱᒪᓕᐅᓕᕋᒥ ᐃᓱᒪᑦᑎᐊᕐᓇᕋᖅᑐᓂᐅᒃ, ᐅᖃᖅᑐᓂ, "ᐊᓈᓇᐃᑦ ᖃᐅᔨᒪᓂᕋᐃᒻᒪᑦ ᐃᓕᓐᓂᒃ, ᐄᖃᐃ." ᑭᓱ ᐊᓯᔾᔨᓚᐅᖅᐸ ᐃᓱᒪᖓ ᓯᕗᓂᒃᓴᒥ ᑕᐅᑐᖅᑰᖅᑕᖓ ᐊᒻᒪ ᖃᓄᖅ ᒪᓕᒐᓕᕆᓂᕐᒧᑦ ᐃᓕᓐᓂᐊᕐᕕᒃ ᐊᖅᑯᑎᑦᑎᐊᕙᐅᓛᖑᖅᑰᔨᓪᓗᓂ ᐊᓂᒍᖅᑎᓐᓇᓱᒋᐊᒃᓴᖅ. 

"ᐅᕙᖓᓕ ᐱᐅᒋᔭᕋ ᐊᓯᔾᔩᓂᖅ ᐊᒻᒪᓗ ᐊᒃᑐᐃᓂᖅ ᐊᓯᔾᔨᕐᓂᕐᒥᒃ ᓄᓇᓕᖕᓂ, ᐊᒻᒪᓗ ᒪᓕᒐᑎᒍᑦ ᐊᔪᙱᓐᓂᖃᕐᓂᖅ, ᐊᒻᒪᓗ ᒐᕙᒪᓕᕆᓕᕐᓗᓯ, ᖃᐅᔨᒪᔭᕆᐊᖃᕋᕕᑦ ᑕᒪᒃᑯᓂᖓ, ᐱᐅᓂᖅᓴᒥᒃ ᐊᓯᔾᔩᔪᒪᒍᕕᑦ ᐊᖏᓂᖅᓴᒃᑯᑦ. ᑕᐃᒪᓐᓇ ᐃᓱᒪᓕᐅᕈᑎᒋᓚᐅᖅᑕᕋ ᐊᕐᕌᓂ ᒪᓕᒐᓕᕆᓂᕐᒧᑦ ᐃᓕᓐᓂᐊᕆᐊᕈᒪᓕᖅᖢᖓ," ᐃᖅᑲᐅᒪᔪᖅ. 

ᓯᕗᓪᓕᖅᐹᒥ ᓯᓚᑦᑐᓴᕐᕕᕐᔪᐊᕐᒨᕆᐅᓚᐅᖅᑐᖅ ᐅᐃᓂᐸᒡᒥ, ᑲᔪᓯᑦᑎᐊᕈᓐᓃᓚᐅᖅᑐᖅ ᐊᒻᒪᓗ ᐅᑎᖅᑐᓂ ᓄᓇᒥᓄᑦ ᕿᒫᔭᕆᐊᖃᒻᒪᕆᓚᐅᕐᒪᑦ. ᐊᒥᓱᑎᑐᑦ ᓄᓇᖃᖅᑳᖅᓯᒪᔪᑎᑐᑦ ᐃᓕᓐᓂᐊᖅᑎᑎᑐᑦ ᖃᐅᔨᒪᔭᖓᑎᑐᑦ, ᐃᓱᒪᑐᔫᓚᐅᖅᑐᖅ ᓇᑭᙶᕐᒪᖔᑦ ᑭᓯᐊᓂ ᐅᑎᖅᖢᓂ ᐃᓕᑦᑎᒃᑲᓐᓂᖅᖢᓂ ᐃᓕᖅᑯᓯᖓᑕ ᒥᒃᓵᓄᑦ ᐃᓐᓇᕈᖅᓯᒪᓂᖓᓂᒡᓗ, ᑕᑯᕙᓪᓕᐊᓕᓚᐅᖅᑐᖅ ᐊᖏᕐᕋᖓᑕ ᐊᔾᔨᒋᙱᑕᖓᓂᒃ, ᓇᖕᒥᓂᖅ ᐊᒻᒪᓗ ᑐᙵᕕᒋᓪᓗᓂᐅᒃ ᖃᓄᐃᓕᐅᕐᕕᒋᖃᑦᑕᖅᑕᖓ. 

ᑭᖑᓪᓕᕐᒥ ᐃᓕᓐᓂᐊᕋᓱᓕᕋᒥ, ᐊᓰᓂᐳᐊ ᓄᓇᓕᖕᓂ ᓯᓚᑦᑐᖅᓴᕐᕕᖕᒧᐊᓚᐅᖅᑐᖅ ᐃᓕᓐᓂᐊᖅᖢᓂ ᐱᕙᓪᓕᐊᔪᓕᕆᓂᕐᒥᒃ ᐊᒻᒪ ᐊᔾᔨᒋᙱᑕᖓᓂᒃ ᐃᓱᒪᒋᔭᖃᖅᖢᓂ ᖃᓄᐃᓐᓇᔭᕐᒪᖔᑦ ᑭᓱᑐᐃᓐᓇᑦ ᐊᔪᖅᐸᑕ ᒫᓐᓇ. "ᑲᙳᓇᙱᑦᑎᐊᖅᑐᖅ ᐅᑎᕆᐊᒃᓴᖅ ᑕᕝᕗᖓ ᓄᓇᓕᖕᓄᑦ, ᐃᓕᑦᑎᓯᒪᔭᓐᓂᓪᓗ ᐊᑐᖅᖢᖓ ᓯᓚᑦᑐᖅᓴᕐᕕᒡᔪᐊᒥᑦ, ᐊᕐᕌᒍᒧᑦ ᑎᓴᒪᓄᓪᓘᓐᓃᑦ, ᑖᓐᓇᓗ ᓄᓇᓕᒃ ᐱᐅᓯᑎᒃᑲᓐᓂᕐᓗᒍ ᐊᔪᙱᒃᑯᒪ," ᓴᖅᑭᔮᖅᑎᑦᑎᔪᖅ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᖅᑎᓄᑦ ᐃᒪᓐᓇᐅᔪᖅ, "ᐱᒻᒪᕆᐅᓇᓱᒋᔭᕋ ᐃᖅᑲᐅᒪᓗᒍ ᓇᖕᒥᓂᖅ ᑭᓇᐅᓃᑦ ᓇᑭᙶᖕᒪᖔᓪᓗ. ᖃᐅᔨᑐᐊᕈᕕᑦ ᓇᑭᙶᕐᒪᖔᖅᐱᑦ, ᖃᐅᔨᒪᕗᑎᑦ ᓇᒧᙵᐅᓂᐊᕐᒪᖔᖅᐱᑦ... ᐃᓕᓴᕐᓇᐅᑎᑦ ᐊᑐᕐᓗᒍ, ᐊᑐᕐᓗᑎᓪᓗ ᑭᓇᐅᖕᒪᖔᖅᐱᑦ ᖃᓄᐃᓕᐅᕈᒪᔭᕐᓂᒃ, ᖃᓄᐃᓕᐅᕈᓐᓇᖅᑐᑎᑦ, ᓱᓕᓗᑎᑦ... ᐱᒃᑯᒋᕙᒋᑦ ᑭᓇᐅᓃᑦ, ᐱᐅᓂᖏᑦ, ᐱᐅᙱᑦᑐᑦ, ᐱᐅᙱᑦᑐᓪᓗ. ᑕᒪᓐᓇ ᓯᓚᑦᑐᖅᓴᕐᕕᔾᔪᐊᕐᒨᕐᓗᒍ, ᓲᖃᐃᒻᒪ [ᐃᓕᓐᓂᐊᕐᕖᑦ] ᐱᔪᒪᖕᒪᑕ ᑭᓇᒥᑭᐊᖅ ᐊᔾᔨᐅᙱᑦᑐᒥᒃ, ᑐᑭᓯᐊᔪᒥᒃ ᐃᖕᒥᖕᓂᒃ, ᑐᑭᓯᐊᔪᒥᒃ ᐃᓕᖅᑯᓯᕐᒥᓂᒃ, ᐃᑲᔪᕈᓐᓇᖅᖢᑎᒡᓗ ᓄᓇᓖᑦ ᐱᐅᓯᑎᒃᑲᓐᓂᕐᓗᒋᑦ."

ᐃᓚᖓᑦ ᐊᖏᓛᖑᓪᓗᓂ ᑐᓗᖅᑕᕈᑎᒋᕙᒃᑕᖓ ᓇᖕᒥᓂᖅ−ᐱᔪᓐᓇᙱᖦᖢᓂ. "ᐃᓱᒪᒋᔭᕋᓕ ᑕᒪᓐᓇ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ ᓇᓗᓈᕿᔾᔪᑕᐅᓇᓱᒋᓪᓗᒍ, ᖁᓱᒋᔭᐅᒐᓗᐊᕈᕕᑦ ᐃᓅᖃᑎᖕᓄᑦ, ᓇᓗᓈᕿᒐᓗᐊᕈᕕᑦ, ᑭᓇᐅᖕᒪᖔᖅᐱᑦ ᖃᓄᐃᓕᐅᕈᓐᓇᕐᒪᖔᓪᓗ," ᐊᒃᑐᐊᓂᖃᖅᐳᖅ.  ᐃᒻᒥᓂᒃ−ᐱᔪᓐᓇᙱᖦᖢᓂ ᐃᖕᒥᓂᒃ ᐃᓄᙳᙱᖦᖢᓂᓗ ᐊᒃᓱᕈᖅᑎᑕᐅᓇᓱᒋᓪᓗᓂ.

 "ᓇᓕᐊᑐᐃᓐᓇᖅ ᓄᓇᖃᖅᑳᖅᓯᒪᔪᓄᑦ ᐊᑐᖅᑕᐅᔪᓐᓇᙱᑦᑐᖅ... ᖃᓄᑐᐃᓐᓇᖅ ᐱᔪᒪᔭᕐᓂᒃ ᐱᓕᕆᔪᓐᓇᖅᑐᑎᑦ. ᑭᒡᓕᖃᖅᑎᑕᐅᔪᖃᙱᑦᑐᖅ ᑕᒪᑐᒧᖓ," ᑎᓕᐅᕆᔪᖅ.  ᐊᒃᓱᕈᖅᖢᓂ ᐱᓕᕆᓪᓗᓂ ᐃᓕᓐᓂᐊᕐᕕᖕᒥ ᐊᒻᒪ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᖃᑦᑕᕐᓂᖓᓄᑦ, ᓛᒐᓐ ᖁᕝᕙᖅᐸᓪᓕᐊᕗᖅ ᓇᓗᓈᕿᓪᓗᓂ ᑖᒃᑯᓇᓂ. "ᐱᒻᒪᕆᐅᓇᓱᒋᔭᕋ ᑐᑭᓯᓗᒍ ᓇᖕᒥᓂᖅ ᖁᓱᙱᓐᓂᖅ ᑭᒃᑯᓕᒫᓄᑦ ᑲᙳᓲᑎᒋᙱᖦᖢᒍᓗ. ᐊᓂᒍᖅᑎᑦᑐᓐᓇᖅᑕᑦ ᐊᑕᐅᓯᐊᕐᓗᒍ," ᑲᔪᓯᓗᓂ. 

ᑐᓴᖅᑎᑦᑎᒍᓐᓇᕈᓂ ᓄᑲᖅᑎᐅᓂᖅᓴᒧᑦ ᓇᒻᒥᓂᖅ ᐱᒡᒐᓇᙱᓂᖅᓴᐅᒐᔭᖅᐳᖅ ᐱᓪᓗᒍ ᐃᓅᓯᖅ ᐱᒻᒪᕆᐅᙱᒻᒪᑦ. ᐱᕈᖅᓴᓪᓗᓂ, ᐃᓱᒫᓗᒐᔪᓚᐅᖅᑐᖅ ᓯᕗᓂᒃᓴᑦᑎᓐᓂᑦ, ᖃᓄᖅ ᐱᐅᓯᒋᐊᕈᓐᓇᕐᒪᖔᒍ ᓇᐅᒃᑯᓪᓗ ᐃᓅᓯᖓᓂ ᓈᒻᒪᖕᒪᖔᑦ. ᐊᖏᕐᓂᖅᓴᐅᖁᓪᓗᓂᐅᒃ ᑕᒻᒪᕐᓂᐅᔪᑦ ᐃᓚᒋᔭᐅᒻᒪᑕ ᐃᖏᕐᕋᓂᕐᒧᑦ ᐊᒻᒪᓗ ᑭᓱᓕᒫᑦ ᑕᐃᒪᐃᒋᐊᖃᕋᑎᒃ ᒫᓐᓇᐅᔪᖅ. "ᐅᓪᓗᒥ ᓄᓇᕐᔪᐊᖅ ᐊᓯᔾᔨᕆᐊᖃᙱᑕᐃᑦ. ᒥᑭᑦᑑᒐᓗᐊᒥᒃ ᐊᓪᓗᕆᐊᕆᐊᖃᕐᓇᕐᒪᑦ... ᖁᕕᐊᓇᖅᑑᕗᖅ ᐊᑐᖅᖢᓂ, ᐊᓕᐊᓇᐃᒍᓱᑐᐃᓐᓇᖅᖢᓂᓗ ᐃᓕᖕᓂᒃ. ᖁᕕᐊᓱᒋᑦᑎ ᓄᓇᓕᓯ. ᓄᓇᔅᓯᓐᓄᙵᐅᓗᑎᑦ, ᐱᖃᓐᓇᕆᔭᑎᑦ ᐃᓚᑎᓪᓗ ᖁᔭᒋᓗᒋᑦ ᐊᒻᒪ ᐃᓗᐊᓂ ᐊᖕᒪᓗᖅᓯᓯᒪᔪᑦ. ᐃᓅᓯᖅ ᑕᑭᔫᕗᖅ, ᑭᓯᐊᓂ ᓇᐃᖦᖢᓂ ᐊᓂᕐᓂᑭᓪᓗᓂ ᐊᓂᖅᓵᑦᑎᐊᕐᓇᖅᖢᓂᓗ," ᐃᓱᓕᑉᐳᖅ. 

ᓇᓕᒧᒌᒃᑎᓐᓇᓱᒃᓗᒍ ᐃᓱᒪᒃᑯᑦ ᖃᓄᐃᙱᑦᑎᐊᕐᓂᖓ ᐱᓕᕆᐊᒃᓴᖃᖅᑎᓪᓗᒍ ᐃᓕᓐᓂᐊᕐᕕᖕᒥ ᐊᑭᓕᖅᓱᖅᑕᐅᙱᖦᖢᓂᓗ ᐱᓕᕆᓂᕐᒥ, ᓛᒐᓐ ᐱᔪᒪᔪᖅ ᓴᐃᓕᓂᕐᒥᒃ ᖃᕋᓴᐅᔭᖓᓂ, ᐋᖅᑭᒃᓱᐃᑦᑎᐊᕐᓂᕐᒥ ᐊᔾᔨᙳᐊᓂᒃ, ᓴᓇᐅᒐᓕᕆᓂᕐᓂ, ᐱᓱᔪᒋᐊᕐᓗᓂ, ᐱᙳᐊᖃᑎᖃᕐᓗᓂ ᐸᑦᑕᑯᓗᖕᓂ ᐊᑐᕐᓂᑯᖏᓐᓂᒃᓗ ᐃᓅᓯᖓᓂ. ᓯᓚᑖᒎᕋᓱᐊᖅᐸᒻᒪᑦ ᐱᓕᕆᐊᕆᔭᕆᐊᓕᖏᑕ ᐊᒻᒪᓗ ᓯᓚᒦᓪᓗᓂ. ᐱᕕᖃᕐᓂᖅ ᐅᑎᕐᓂᕐᒧᑦ ᑕᐅᑐᒃᑕᒃᑯᑦ ᑐᑭᓯᓗᒋᓪᓗ ᓄᓇᕐᔪᐊᓕᒫᒥᑦ ᖃᓄᐃᓕᐅᖅᑐᖃᕐᓂᖓᓂᒃ ᓯᓚᑖᓂ ᐃᑲᔪᕐᒥᔪᖅ. 

ᐱᔪᒃᓯᑎᑦᑎᔪᒪᓕᕌᖓᑦ, ᓛᒐᓐ ᐃᓚᒥᓄᑦ ᑕᐅᑦᑐᖃᖅᑐᖅ, ᐱᖃᓐᓈᒥᓂᒃ, ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓂᒃ, ᐅᓂᒃᑳᖅᑐᐊᑦ ᓄᓇᓕᖕᓂ ᐊᑭᓕᖅᓱᖅᑕᐅᙱᖦᖢᑎᒃ ᐱᓕᕆᖃᑦᑕᖅᑕᖏᑦ ᑭᒡᒐᖅᑐᐃᔨᒋᖃᑦᑕᖅᑕᖏᑦ, ᑭᓱᑐᐃᓐᓇᑦᑎᐊᓪᓗ ᐊᕙᓗᔭᐅᓯᒪᓪᓗᑎᒃ. ᐱᔪᒪᓂᖃᑦᑎᐊᖅᑐᖅ ᐱᐅᔪᒃᑯᑦ ᐊᓯᔾᔨᕐᓂᕐᒥᒃ, ᐱᕕᖃᕐᓂᕐᒥᒃ ᑕᖃᐃᖅᓯᕐᓂᕐᒥᒃ ᐊᒻᒪ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᓂᕐᒥᒃ ᖁᕕᐊᒋᔭᒥᓂᒃ, ᐱᕕᖃᕐᓂᕐᒥᒃ ᐃᖕᒥᓂᒃ ᐃᓅᓯᖓᓂᒃᓗ ᐃᓅᓂᕐᒥᒃ. 

ᖃᐅᔨᒪᓪᓗᒍ ᓇᑭᙶᕋᓗᐊᕈᕕᑦ, ᐊᓯᔾᔩᔪᓐᓇᕋᕕᑦ, ᓄᓇᔅᓯᓐᓂᑐᐊᖑᙱᑦᑐᖅ, ᑭᓯᐊᓂ ᓇᓂᑐᐃᓐᓇᑦᑎᐊᖅ ᑲᓇᑕᒥ, ᔭᔅᑎᓐ ᓛᒐᓐ ᐃᓕᓐᓂᐊᒃᑲᓐᓂᖅᐳᖅ ᐊᒻᒪ ᐊᑭᓕᖅᓱᖅᑕᐅᙱᖦᖢᓂ ᐱᓕᕆᕙᒃᖢᓂ. ᐅᒃᐱᕈᓱᒃᖢᓂ ᐆᒻᒪᑎᖓᓂ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᑦ ᖃᓄᐃᓕᐅᕈᓐᓇᙱᓐᓂᖏᓐᓂᒃ, ᖃᓄᓕᒫᑦᑎᐊᖅ ᐱᓕᕆᔪᖅ ᐊᓯᔾᔩᓇᓱᒃᖢᓂ ᐊᒻᒪ ᐊᓂᒍᐃᔾᔪᑎᑖᖅᖢᓂ ᓇᖕᒥᓂᖅ ᐱᕙᒌᔭᖁᓪᓗᒍ ᓯᕗᓂᒃᓴᒧᑦ ᐊᒻᒪ ᐊᓂᒍᐃᔪᒪᔭᓕᒫᒥᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.