"ᖃᖓᑲᓪᓚᒃ ᐅᐸᒐᓱᓚᐅᖅᑕᕋ, ᑭᓯᐊᓂ ᐃᖅᑲᓇᐃᔮᕋ ᐊᓕᐊᓇᐃᒋᑦᑎᐊᖅᑕᕋ," ᓛᑎᑎᐊ ᓕᕙᓲᕐ ᐹᒻᔅ. ᐃᓅᓚᐅᖅᓯᒪᔪᖅ ᔨᐊᓗᓇᐃᒥ ᐊᒻᒪᓗ ᐱᕈᖅᓴᓪᓗᓂ ᕗᐊᑦ ᑲᓐᔅᒥ, ᓄᓇᑦᓯᐊᕐᒥ ᑕᐃᑲᓂᓗ ᐃᓅᓯᕆᓚᐅᖅᑕᖓᓂ 7-ᖑᓕᖅᑐᑦ ᐊᕐᕌᒍᐃᑦ ᐊᓂᒍᓕᖅᑐᑦ ᓅᒻᒪᑦ ᐃᐊᑦᒪᑕᓐᒧᑦ. ᐊᓈᓇᖓ ᓄᓇᖃᖅᑳᖅᓯᒪᔪᖅ ᐊᑖᑕᖓᓗ ᐅᐃᕖᑎᑐᑦ ᐅᐃᕖᑎᑑᖓᓪᓗᓂ. ᐃᓅᓯᖓ ᐊᔾᔨᒌᖃᑦᑕᖏᑦᑐᖅ, ᐅᑕᖅᑭᓪᓗᓂ ᓄᖅᑲᖓᑎᑦᑎᓂᕐᒥᑦ ᐊᒻᒪ ᐃᓕᓴᕕᒻᒥᑦ ᓱᕈᓯᖅᑕᐅᑎᓂᑦ ᐊᖁᖃᑦᑕᓂᕐᒥᑦ, ᐃᖅᑲᓇᐃᔮᓕᒫᑦ ᐱᓕᕆᖃᑎᖃᖅᑐᑦ ᐃᓄᓐᓂᑦ. ᐃᖅᑲᓇᐃᔭᓚᐅᖅᓯᒪᖕᒥᔪᖅ ᑮᓇᐅᔭᒃᑯᕕᖕᓂ, ᐱᓕᕆᖃᑎᖃᓚᐅᖅᓯᒪᓪᓗᓂᓗ ᓯᑎᕙᓂᒥ, ᑮᓇᐅᔭᓄᑦ ᐱᓇᔫᑎᓂᒃ ᐱᓕᕆᓪᓗᓂ ᐊᒻᒪ ᒪᓐᑐᕆᐊᓪ ᑮᓇᐅᔭᒃᑯᕕᖓᓂ ᑮᓇᐅᔭᓕᐅᕋᓱᐊᕐᕕᖕᒥ. ᐃᓕᓐᓂᐊᕆᐊᒃᑲᓐᓂᕈᒪᓕᓚᐅᖅᑐᖅ ᐊᐅᓪᐴᑕᐅᑉ ᐅᐊᖕᓇᖓᓂᑦ ᓄᑖᙳᖅᐸᓪᓕᐊᔪᓄᑦ ᐱᔭᕇᕈᓯᐊᖅᑖᕐᓂᕐᒧᑦ ᐱᓕᕆᐊᒧᑦ ᓇᖕᒥᓂᖃᕐᓂᕐᒧᑦ ᐊᐅᓚᑦᑎᓂᕐᒧᑦ ᑮᓇᐅᔭᓕᕆᓂᕐᒧᑦ.

ᐱᔭᕇᕋᒥ, ᒪᓐᑐᕆᐋᓪ ᑮᓇᐅᔭᒃᑯᕕᖓᓂ ᐃᖅᑲᓇᐃᔭᖃᑎᖃᒃᑲᓐᓂᓕᓚᐅᖅᑐᖅ BMO-ᑯᓐᓄᑦ. ᐱᓕᕆᖃᑎᖃᖅᖢᓂ ᑮᓇᐅᔭᓕᐅᕈᑕᒃᑲᓂᕋᓱᒃᑐᓄᑦ ᐃᓅᓯᓕᕆᔨᒥᒃ, ᐱᓕᕆᖃᑎᖃᖅᐸᒃᐳᖅ ᐃᓕᐅᖅᑲᐃᓂᕐᒥᒃ ᓲᕐᓗ RRSP−ᓂᒃ, TFSA−ᒥᒃ ᑎᑎᕋᖅᑕᐅᓯᒪᙱᑦᑐᓂᒡᓗ ᑮᓇᐅᔭᖃᕐᕕᒋᔭᐅᔪᓂᒃ. ᐃᖅᑲᓇᐃᔮᖓ ᑎᑎᕋᖅᑎᐅᓪᓗᓂ ᐊᒻᒪ ᑕᑯᒃᓴᐅᙱᖦᖢᓂ, ᑎᑎᕋᕐᕕᖕᒥ ᐊᐅᓚᑦᑎᔨᐅᓪᓗᓂ, ᐃᓂᒃᓴᓕᐅᖅᐸᒃᖢᓂ, ᑲᑎᒪᑎᑦᑎᓂᐊᖅᑐᓂᒃ ᐱᕙᒌᔭᖅᐸᒃᖢᓂ, ᐅᒃᑯᐃᖅᓯᕙᒡᓗᓂ, ᓂᐅᕕᖅᐸᒃᖢᓂ ᐊᒻᒪ ᓂᐅᕐᕈᑎᖃᖅᐸᒃᖢᓂ. ᓕᕙᐅᓱ ᖁᕕᐊᓱᒃᑐᖅ ᐱᓕᕆᖃᑎᖃᓕᕋᒥ ᐃᓄᓐᓂᒃ ᐊᒻᒪᓗ ᑕᒪᓐᓇ ᐃᖅᑲᓇᐃᔮᖓᑕ ᐃᓚᒋᒻᒪᕆᒻᒪᒍ. ᐅᑭᐅᓂᒃ ᐱᖓᓱᓂᒃ ᐊᕝᕙᖓᓂᓪᓗ ᑕᐃᑲᓃᓕᖅᑐᖅ ᐊᒻᒪᓗ ᖁᕕᐊᓱᑦᑐᒻᒪᕆᐅᓪᓗᓂ.

ᐃᐊᑦᒪᓐᑕᓐᒧᑦ ᓅᖦᖢᓂ ᐊᒃᓱᕈᕐᓇᓚᐅᖅᑐᖅ ᐅᑭᐅᖕᓄᑦ ᒪᕐᕉᖕᓄᑦ ᑭᓯᐊᓂ. ᐊᕐᕌᒍᑦ 8 ᐊᓂᒍᖅᑎᓪᓗᒋᑦ, ᕿᑐᕐᖓᖏᑦ ᓇᓂᓯᓯᒪᓕᖅᑐᑦ ᐱᕕᒃᓴᐅᔪᓐᓇᖅᑐᓂᒃ ᐃᓅᖃᑎᒌᑦᑎᐊᕐᓂᕐᒥᒃ, ᐱᙳᐊᕐᓂᒃᑯᑦ ᐃᓕᓐᓂᐊᕐᓂᒃᑯᓪᓗ ᓇᓂᓯᓪᓗᑎᒃᓗ ᖃᓄᐃᓕᐅᕈᑎᓂᒃ ᖁᕕᐊᒋᔭᖏᓐᓂ ᖃᑕᙳᑎᒌᖑᓗᑎᒃ. ᐃᑲᔪᖅᓱᐃᔪᒥᒃ ᐊᐃᑉᐸᖃᕐᖢᓂ ᐊᔪᕐᓇᙱᓐᓂᖅᓴᐅᑎᑦᑎᓪᓗᓂ ᓅᑉᐸᓪᓕᐊᓂᕐᒥᒃ ᐊᓂᒍᐃᓪᓗᓂᓗ ᐅᐱᒋᔭᐅᓪᓗᓂ. ᓕᕙᓱ ᐊᒻᒪᓗ ᐅᐃᖓ ᐅᑎᕈᒫᓐᓂᐊᖅᑑᒃ ᐅᑭᐅᖅᑕᖅᑐᒧᑦ ᕿᑐᕐᖓᖏᑦ ᐃᓕᓐᓂᐊᕐᕕᔾᔪᐊᒦᑎᓪᓗᒋᑦ, ᑭᓯᐊᓂ ᖁᕕᐊᒋᔭᖃᖅᑐᑦ ᓄᑖᒥᒃ ᓄᓇᓕᒻᒥᓂᒃ.

ᐊᑐᖅᓯᒪᔭᖓ ᑐᑭᖃᕐᓂᖅᓴᐅᓚᐅᖅᑐᖅ ᐊᓈᓇᖓ ᐊᖏᖅᑕᐅᓚᐅᕐᒪᑦ NAIT-ᑯᓐᓄᑦ 20-ᒦᑎᓪᓗᒍ ᑭᓯᐊᓂ ᐃᑲᔪᖅᑐᖅᑕᐅᓂᕐᒧᑦ ᑮᓇᐅᔭᖃᓚᐅᖏᒻᒪᑦ ᐅᐸᒋᐊᖃᖅᑕᒥᓂᒃ, ᑕᐃᒪᓕ ᐅᐸᒍᓐᓇᓚᐅᖏᑦᑐᖅ. ᐃᓕᓐᓂᐊᕋᓱᒃᑎᓪᓗᒍ, ᓕᕙᓱ ᐱᕕᖃᓚᐅᖅᑐᖅ ᐊᓈᓇᖓᑕ ᐱᓚᐅᖅᓯᒪᙱᖦᖢᓂᐅᒃ ᐊᓈᓇᖓᓗ ᐃᑲᔪᖅᓱᐃᓪᓗᓂ ᑕᐅᕗᙵᓕᒫᖅ. ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᖅ ᑐᑭᖃᖅᑎᓪᓗᒍ ᐃᓕᓐᓂᐊᖅᑕᒥᓂᒃ ᐊᓂᒍᐃᓪᓚᑦᑖᓚᐅᙱᖦᖢᓂ, ᐊᑎᖓ ᑎᑎᕋᖅᑕᐅᓚᐅᖅᐳᖅ ᑎᑎᕋᕐᕕᒃᓴᒃᑯᑦ ᐊᒻᒪ ᐅᓄᖅᑐᓕᐅᖅᓯᒪᔪᓂᒃ ᓂᐅᕕᖅᖢᓂ ᐃᓚᒥᓄᑦ ᓇᒃᓯᐅᔾᔭᒃᓴᓂᒃ. ᕿᑐᕐᖓᖏᑦ ᑕᑯᑎᑦᑐᓐᓇᖅᑎᖦᖢᓂᒋᑦ ᓯᓚᑦᑐᖅᓴᕐᕕᖕᒥ ᐃᓕᓐᓂᐊᕐᓂᖅ ᐊᒃᓱᕈᕐᓇᕋᓗᐊᖅᑎᓪᓗᒍ.  "ᐃᖅᑲᐃᑎᖃᑦᑕᖅᑕᒃᑲ ᐃᓕᓐᓂᐊᕐᓂᖅ ᐃᓕᖕᓂᙶᕈᓐᓇᙱᒻᒪᑦ ᐊᑑᑎᖃᖅᑐᐃᓐᓇᐅᕗᖅ ᐃᓱᐊᓂᑦ," ᐅᖃᖅᖢᓂ.

ᐅᖃᐅᔾᔪᐃᓂᖓ ᐃᓕᓐᓂᐊᖅᑎᓄᑦ ᐊᐅᓪᓚᖅᑐᓄᑦ ᓄᓇᒥᓂᑦ ᐃᓕᓐᓂᐊᕆᐊᕈᒪᑦᓱᓂ ᐅᖃᖃᑎᖃᕐᓂᕐᒥᑦ ᐃᓕᓐᓂᐊᖃᑎᖏᓐᓂᑦ ᐊᓯᖏᓐᓂᓪᓗ ᐊᑐᖅᓯᒪᔪᑦ ᐱᓕᕆᔾᔪᓯᕐᒥᑦ ᐃᓱᒪᒋᔭᖃᕐᓂᕐᒥᓪᓗ ᐊᓯᐊᒎᖓᕈᓐᓇᕐᓂᖏᓐᓂᑦ. Levavaseur−ᑯᑦ ᓂᕈᐊᓚᐅᖅᑐᑦ NAIT−ᑯᓐᓄᑦ ᓲᖃᐃᒻᒪ polytechnic Institute-ᖑᓚᐅᕐᒪᑦ, ᐱᓕᕆᓪᓚᑦᑖᖅᖢᑎᒃ ᐊᒻᒪ ᓄᓇᖃᖅᑳᖅᓯᒪᔪᓂᒃ ᐊᐅᓚᑕᐅᓪᓗᑎᒃ. ᓇᓂᓯᓚᐅᖅᑐᖅ ᐋᖅᑭᒃᓯᒪᓂᖓᓂᒃ ᐃᑲᔪᖅᓱᕐᓗᒋᑦ ᐃᓕᓐᓂᐊᖅᑎᑦ ᓄᓇᓕᕋᓛᖑᓂᖅᓴᓂ ᐱᑎᑦᑎᓪᓗᓂᓗ ᑮᓇᐅᔭᖃᖅᑎᑦᑎᓂᕐᒥᒃ ᐃᑲᔪᖅᓱᐃᔪᓂᒃᓗ ᐱᕕᒃᓴᓂᑦ ᐊᑑᑎᖃᖅᑐᓂᒃ ᑖᔅᓱᒧᖓ. ᐃᓕᓐᓂᐊᒐᒃᓴᓂᒃ ᐋᖅᑭᒃᓱᐃᔪᓐᓇᖅᓯᓚᐅᖅᐳᖅ ᖃᑕᙳᑎᖏᑕ ᑲᒪᒋᔭᒃᓴᖏᓐᓂᒃ ᐊᒻᒪ ᐃᑲᔫᑎᖃᓚᐅᖅᖢᓂ ᓄᓇᖃᖅᑳᖅᓯᒪᔪᑦ ᐃᑲᔪᖅᑎᓕᒫᖏᓐᓂᒃ ᐊᖏᕐᕋᖓᑕ ᓄᓇᖓᓂ ᐃᒃᐱᒍᓱᓚᐅᖅᑐᓂᒃ.

ᓕᕙᓲᕐ ᐅᖃᖅᐳᖅ, "ᐊᒃᓱᕈᕐᓇᖅᐳᖅ, ᑭᓯᐊᓂ ᐱᐅᔪᒥᒃ ᐱᓯᒪᔭᕆᐊᖃᖅᑐᑎᑦ, ᓇᓂᓯᔪᓐᓇᕈᕕᓪᓗ ᐱᐅᔪᒥᒃ ᓄᓇᓕᖕᓂᒃ ᐃᑲᔪᖅᑐᐃᓂᕐᒧᓪᓗ ᐊᑐᖅᑕᐅᕙᒃᑐᒥᒃ, ᑕᒪᓐᓇ ᐊᔪᕐᓇᙱᓐᓂᖅᓴᐅᑎᑦᑎᕗᖅ... ᐃᓕᑦᑎᕙᓪᓕᐊᓂᖅ ᐊᓕᐊᓇᐃᑦᑕᕆᐊᓕᒃ, ᑲᔪᓰᓐᓇᕈᓐᓇᕈᕕᓪᓗ, ᐃᓕᖕᓂᒃ ᐅᐱᒋᓇᔭᖅᑐᑎᑦ."

ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒧᑦ ᐃᒪᐃᒃᑲᔭᖅᑐᖅ, "ᐊᑐᐃᓐᓇᕐᓗᒍ. ᐅᕙᓐᓂᒃ ᐅᖃᐅᔾᔨᔪᓐᓇᕐᓂᕈᒪ ᐅᑎᖁᔭᐅᓗᖓ, ᓂᕈᐊᕐᓗᑎᑦ ᑭᓱᒥᑭᐊᖅ, ᐊᔪᓕᖅᓯᒪᓗᑎᓪᓗ ᓂᕈᐊᕆᔭᕐᓂᒃ, ᐊᔾᔨᒌᙱᑦᑐᓂᒃ ᐃᓄᖕᓂᒃ ᐃᑲᔪᖅᑐᐃᔪᓐᓇᖅᑐᓂᒃ ᑕᕝᕙᓂ ᐱᓕᕆᐊᖑᔪᒥ." ᓕᕙᓱ ᐃᖅᑲᐅᒪᔪᖅ ᖃᓄᖅ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐃᓕᓐᓂᐊᕐᓂᓕᕆᓂᕐᒧᑦ ᓄᖅᑲᕐᖢᓂᓗ ᐊᑕᐅᓯᐊᕐᖢᓂ ᐃᓕᓐᓂᐊᕐᓇᒥ ᐃᓱᒪᓪᓗᓂ ᑖᔅᓱᒧᖓᐅᙱᖦᖢᓂ. ᑭᖑᒧᑦ ᑕᑯᓗᒍ, ᐊᐱᖅᓱᒃᑲᓐᓂᕈᒪᔪᖅ.

"ᑭᓇᑐᐃᓐᓇᖅ ᐊᔭᐅᖅᑕᐅᒃᑲᓐᓂᖁᓇᔭᖅᐸᕋ. ᐊᐱᖅᓱᕆᑦ. ᑲᑉᐱᐊᓱᙱᓪᓗᑎᑦ, ᓲᖃᐃᒻᒪ ᐅᓪᓗᖅ ᐊᓂᒍᖅᑎᓪᓗᒍ, ᐊᓯᖏᓐᓂᒃ ᓇᓖᕌᕈᑎᒃᓴᖅᑕᖃᕐᒪᑦ. ᐊᔪᖅᓯᐅᖅᑲᔪᑎᑦ. ᐃᓕᖕᓄᑦ ᑕᐃᒪᐃᖅᑰᔨᙱᒃᑯᕕᑦ, ᐃᓕᓐᓂᐊᖅᑐᓕᕆᔪᓐᓇᐃᓐᓇᖅᑐᑎᑦ ᐊᒻᒪ ᐃᓕᓐᓂᐊᕆᐊᕐᓗᑎᑦ ᐊᔾᔨᒌᙱᑦᑐᓂᒃ ᐱᓕᕆᔭᖅᑐᕐᓗᑎᑦ," ᑲᔪᓯᓗᓂ. ᑭᓱᓕᒫᑦ ᐱᐊᓂᒃᑲᓗᐊᕐᖢᓂᒋᑦ, ᐊᐃᑦᑖᕈᓱᒃᑐᖅ ᐱᓕᕆᓵᓕᙱᖦᖢᓂ ᐅᒃᑯᐃᖓᓗᐊᕋᓂᓗ ᐃᓱᒪᑦᑎᐊᕆᐊᒃᓴᖅ ᓇᓖᕌᕐᕕᒃᓴᖏᓐᓂᑦ.  

ᐱᔪᒃᓯᑎᑦᑎᓂᐊᕐᓗᓂ, ᓕᕙᓱ ᐱᔪᒃᓯᑎᑕᐅᕙᒃᐳᖅ ᐃᓚᒥᓄᑦ ᐊᓈᓇᖓᓄᓪᓗ, ᐃᓅᔪᓐᓇᖅᐸᒃᖢᓂ ᑕᐅᑐᖅᑰᖅᑕᒥᓂᒃ, ᐱᒃᑯᒋᔭᒥᓂᒡᓗ ᐱᒃᑯᒋᑎᖦᖢᒍ. ᕿᑐᕐᖓᖏᑦ ᐃᓕᓐᓂᐊᖏᓐᓇᖁᓪᓗᓂᒋᑦ ᐃᓕᓐᓂᐊᖏᓐᓇᖁᓪᓗᓂᒋᓪᓗ ᐊᒻᒪ ᐃᒻᒥᓂᒃ ᐊᔪᕈᓐᓃᖅᓴᕆᐊᖃᖅᑰᔨᓪᓗᓂ. ᐃᓕᓐᓂᐊᕆᐊᖅᖢᓂ ᐊᒃᓱᕈᕐᓇᓚᐅᖅᑐᖅ ᑭᓯᐊᓂ ᐅᒡᒍᐊᕐᓇᙱᖦᖢᓂ, ᖃᐅᔨᒪᓪᓗᓂ ᐃᓅᓯᑦᑎᐊᕙᐅᓂᖅᓴᐅᓂᖓᓂᒃ ᐅᐃᒥᓄᑦ ᕿᑐᕐᖓᖏᓐᓄᓪᓗ ᐱᓕᕆᐊᕆᓪᓗᓂᒋᓪᓗ. ᐃᑲᔪᖅᓱᖅᑕᐅᑦᑎᐊᕐᖢᓂ, ᒪᑐᐃᖓᐃᓐᓇᕐᓗᓂ ᐃᓱᒪᒥᐅᑕᖃᕐᓂᖅ ᐅᖃᖃᑎᖃᕐᓂᕐᓗ ᐃᓄᖕᓂᒃ ᐃᑲᔪᕐᖢᓂ ᐊᒃᓱᕈᕐᓇᖅᑐᒃᑰᖅᑎᓪᓗᒍ. ᐃᔾᔪᐊᒐᒃᓴᑦᑎᐊᕙᐅᓚᐅᕐᒥᔪᖅ ᐃᓕᓐᓂᐊᕆᐊᖅᑐᓂ ᕿᑐᕐᖓᒥᓄᑦ ᐊᒻᒪᓗ ᐅᔪᕈᖓᓄᑦ ᐊᒃᓱᕈᖅᓯᒪᔪᖅ ᑭᓯᐊᓂ ᐅᑎᕈᒪᓯᒪᔪᖅ ᐃᓕᓐᓂᐊᕆᐊᒃᑲᓂᕐᓂᕐᒧᑦ ᐊᒻᒪᓗ ᓯᓐᓇᑦᑑᒪᒋᔭᒥᓂᑦ.

ᓂᕆᐅᒍᒪᒐᓗᐊᖅᐳᖅ ᐆᑦᑑᑎᒥᒃ ᐋᖅᑮᔪᒪᓪᓗᓂ ᒪᒃᑯᒃᑐᓄᑦ ᐊᖏᕐᕋᒧᑦ ᕗᐊᑦ ᕗᐊᑦ-ᒥ ᐱᔪᒪᔭᒥᓂᒃ ᐱᓇᓱᐊᖅᑎᓪᓗᒍ. "ᓂᕆᐅᒃᐳᖓ ᑕᒪᓐᓇ ᑕᐃᒪᐃᒃᑲᓐᓂᕐᓂᐊᕐᓂᖓᓂᒃ, ᐱᓗᐊᙳᐊᖅᖢᓂ ᑭᖑᕚᕇᓄᑦ ᐊᖏᕐᕋᒧᑦ... ᑕᑯᒍᓐᓇᕐᓂᖅ ᕗᐊᑦ ᕗᐊᑦ-ᒥᒃ ᐃᓱᒋᙱᒻᒪᒍ ᐃᓘᓐᓇᓂᓗ. ᓄᓇᓕᑦᑎᐊᕙᐅᔪᖅ, ᑭᓯᐊᓂ ᖁᕕᐊᓱᙱᒃᑯᕕᑦ ᑕᐃᑲᓂ, ᐅᕝᕙᓘᓐᓃᑦ ᖃᐅᔨᙱᒃᑯᕕᑦ ᖁᕕᐊᒋᔭᕐᓂᒃ ᐅᕝᕙᓘᓐᓃᑦ ᑭᓱᒥᑭᐊᖅ ᖁᕕᐊᓱᒍᑎᒋᔭᕐᓂᒃ, ᐊᓯᖏᓐᓂᒃ ᐱᑕᖃᕐᒥᔪᖅ. ᐊᓯᖏᓐᓂᒃ ᐃᓂᑕᖃᖅᐳᖅ," ᓇᓗᓇᐃᖅᓯᓪᓗᓂ. ᐃᓱᒪᓪᓗᓂ ᐊᑐᖅᓯᒪᔭᖓᓂᒃ ᓅᓐᓂᕐᒧᑦ ᔨᐊᓗᓇᐃᒧᑦ ᐃᖅᑲᓇᐃᔮᒃᓴᓄᑦ, ᐊᖏᔪᒥᒃ ᐊᓯᔾᔩᓂᖃᓚᐅᖅᑐᖅ.

ᓂᕆᐅᒋᔭᖃᖅᐳᖅ ᐃᓄᖕᓂᒃ ᐊᖏᕐᕋᕆᔭᒥᓂ ᑕᑯᖃᑦᑕᕐᓂᐊᕐᓂᖓᓂᒃ ᖃᓄᐃᓕᐅᕈᓐᓇᖅᓯᒪᓂᕐᒥᓂᒃ ᐱᔪᒃᓯᑎᑦᑎᓗᓂᓗ. "ᓄᑕᖅᑲᑦ ᐱᔪᓐᓇᖅᑐᑦ ᑭᓱᓕᒫᓂᒃ ᐃᑭᐊᖅᑭᕕᒃᑯᑦ, ᑭᓯᐊᓂ ᑕᑯᔪᓐᓇᕐᓗᒋᑦ ᐃᓅᖃᑎᑎᑦ, ᐃᓕᓐᓂᐊᖃᑎᑎᑦ, ᑲᔪᓯᑦᑎᐊᕐᓂᖅ ᐱᐅᖏᓐᓇᐅᔭᖅᑐᖅ. ᑕᒪᓐᓇ ᐱᔪᒃᓯᑎᑦᑎᔪᒃᓴᐅᕗᖅ ᖃᐅᔨᒪᓂᕐᒥᒃ ᐃᓄᑑᙱᓐᓂᕐᒥᓂᒃ ᑕᐃᒪᐃᓕᐅᕈᓐᓇᕐᓂᖏᓐᓂᒡᓗ," ᑕᐃᒪᓐᓇ ᐅᖃᖅᖢᓂ.

ᐊᑯᓂᑲᓪᓚᕈᓗᒃ ᓇᒦᓕᕋᒥ, ᑭᓯᐊᓂ ᓛᑎᑎᐊ ᓕᕙᓱ ᖁᕕᐊᒋᔭᖃᖅᑐᖅ ᐃᖅᑲᓇᐃᔮᒥᓂᒃ. ᐱᓇᓱᐊᕐᓂᕐᒥᑦ ᐃᓕᓐᓂᐊᕐᓂᕐᒧᑦ ᐱᕕᖃᕐᓂᐅᔪᒥᑦ ᐊᓈᓇᖓᓂᑦ ᐱᕕᖃᓚᐅᖅᓯᒪᖏᑦᑐᖅ, ᑕᑯᑎᑦᓯᓚᐅᖅᑐᖅ ᓇᒻᒥᓂᖅ ᕿᑐᕐᖓᖏᓐᓂᑦ ᖃᓄᑎᒋ ᐱᒻᒪᕆᐅᒋᐊᖓᓂᑦ ᐃᓕᓐᓂᐊᕐᕕᒃ. ᒪᕐᕉᒃ ᐊᕐᕌᒎᒃ ᐃᐊᑦᒪᓐᑕᓐᒥ ᓄᑖᑦᑎᐊᖑᓪᓗᓂ ᐃᓅᓯᕆᓕᓚᐅᖅᑕᖓ, ᐃᖅᑲᓇᐃᔮᖓ ᐅᐱᒋᔭᒻᒪᕆᒋᕙᐅᒃ ᐊᒻᒪ ᑲᔪᖏᖅᓴᐃᔪᒪᕗᖅ ᑭᖑᕚᒃᓴᑦᑎᓐᓄᑦ ᐊᖏᕐᕋᒧᑦ ᖃᓄᑐᐃᓐᓇᖅ ᐃᓱᒪᒥᓂᒃ ᐱᓕᕆᔪᓐᓇᕐᓂᐊᕐᒪᑕ ᓇᒥᑐᐃᓐᓇᕐᓗ ᐱᓕᕆᔪᓐᓇᕐᓗᑎᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᓂᖓᓄᑦ ᑖᔅᓱᒥᖓ ᑎᑎᕋᖅᓯᒪᔪᒥᒃ!