"ᓴᙱᓂᖃᕐᔪᐊᖅᐳᖓ ᐃᓗᓐᓂ ᐊᒃᓱᕈᕐᓇᕐᓂᕆᓚᐅᖅᑕᓐᓄᑦ," ᐅᖃᓚᐅᖅᐳᖅ ᓕᓐᓯ ᑭᖕ. ᐃᓅᓚᐅᖅᓯᒪᔪᖅ ᐅᐃᓂᐸᐃᒡ, ᒫᓂᑑᐸᒥ. ᐊᑖᑕᖓ Little Grand Rapids, ᒫᓂᑑᐸᒥᐅᑕᖅ ᐊᒻᒪ ᐊᓈᓇᖓ ᒥᓯᓵᒐᔅᒥᐅᑕᐅᓪᓗᓂ ᑯᐃᓐ ᓄᓇᖃᖅᑳᖅᓯᒪᔪᓄᑦ ᐋᓐᑎᐅᕆᐅ ᓂᒋᐊᓂ. ᐊᖓᔪᖅᑳᖏᒃ ᐊᕕᓚᐅᖅᑎᓪᓗᒋᑦ, ᐊᓈᓇᒥᓂ ᐃᒡᓗᒥᐅᖃᑎᖃᓕᓚᐅᖅᐳᖅ ᐋᓐᓂᐊᓯᐅᖅᑎᐅᓪᓗᓂ. ᐊᓈᓇᖓ ᐊᒫᒪᒃᑎᑦᑎᖃᑦᑕᓚᐅᖅᑐᖅ ᓚᕆᑐ, ᑎᐊᒃᓴᔅᒥ ᐊᒻᒪ ᐅᕗᐃᕼᐃ, ᓂᕚᑕᒥ ᐅᑎᖅᑎᓚᐅᙱᓐᓂᕐᒥᓂ ᐊᖏᕐᕋᖓᓄᑦ ᐋᓐᑎᐅᕆᐅᒧᑦ. 

ᑭᖕ 19-ᓂᒃ ᐅᑭᐅᖃᖅᑎᓪᓗᒍ ᑕᓐᑐ ᐸᐃᒥᐅᑕᐅᓪᓗᓂᓗ, ᐸᓂᖅᑖᓚᐅᖅᓯᒪᔪᖅ. ᓯᖓᐃᓪᓗᓂ ᐱᔪᒃᓯᓕᓚᐅᖅᐳᖅ ᖁᑦᑎᖕᓂᖅᓴᒥ ᐃᓕᓐᓂᐊᖅᑕᒥᓂᒃ ᐃᓱᓕᑦᑎᔪᒪᓪᓗᓂ. ᐃᓗᐊᖅᓴᐃᔨᙳᕈᒪᓚᐅᖅᐳᖅ ᐊᓈᓇᒥᑎᑐᑦ, ᑭᓯᐊᓂ ᓈᓴᐅᓯᕆᔪᓐᓇᑦᑎᐊᓚᐅᙱᑦᑐᖅ ᖃᐅᔨᓴᖅᑐᓕᕆᓂᕐᒥᓪᓘᓐᓃᑦ. ᐊᓈᓇᙳᕋᒥ, ᐃᓄᓕᕆᔨᐅᔪᒪᓚᐅᖅᐳᖅ ᓲᖃᐃᒻᒪ ᐊᒥᓱᓄᑦ ᐃᓄᖕᓄᑦ ᐅᒃᐱᕆᔭᐅᕙᓚᐅᕐᓂᖓᓄᑦ ᐃᒃᐱᒍᓱᑦᑎᐊᖅᐸᒃᖢᓂᓗ, ᐃᑲᔪᕈᒪᕙᓚᐅᖅᐳᖅ ᐃᓄᖕᓂᒃ ᐋᓐᓂᐊᖅᑐᓂᒃ. ᐊᕐᕌᒍᓂ ᐱᖓᓱᓂ ᐃᓕᓐᓂᐊᓚᐅᖅᓯᒪᕗᖅ Confederation College Thunder Bay-ᒥ, ᐊᒻᒪ ᓱᕈᓯᓕᕆᔨᐅᓚᐅᖅᓯᒪᓪᓗᓂ 20-ᓂᒃ 30-ᓂᒡᓗ ᐅᑭᐅᖃᖅᖢᓂ ᓄᓇᖃᖅᑳᖅᑐᓂᒃ ᓄᑕᖅᑲᓂᒃ ᐊᒻᒪ ᐃᓚᒌᓂᒃ. 

ᒫᓐᓇᓕ, ᑭᖕ ᐊᔾᔨᒋᙱᑦᑎᐊᖅᑕᖓᓂᒃ ᐱᓕᕆᓕᖅᐳᖅ. ᖃᓪᓗᓈᖅᑕᓂᒃ ᐱᔪᒪᓂᖃᐃᓐᓇᐅᔭᖅᐳᖅ ᐊᓈᓇᖓᓗ, ᐊᓈᓇᐅᓪᓗᓂ ᐃᓄᑑᓪᓗᓂ, ᐊᑐᕐᓂᑯᓂᒃ ᓂᐅᕕᕐᕕᓕᐊᕈᔾᔨᕙᒃᖢᓂ ᐊᓐᓄᕌᖏᓐᓂᒃ ᓂᕈᐊᕆᐊᖅᑐᖅᖢᓂ. ᐊᒃᓱᕈᕐᓇᖅᑐᒃᑰᖅᖢᓂ ᓄᑕᕋᐅᑎᓪᓗᒍᓗ ᐊᒃᓱᕈᕐᓇᖅᑐᒃᑰᖅᖢᓂ, ᐊᓐᓄᕌᖅᓯᒪᓪᓗᓂ ᓄᔭᓕᕆᕙᒃᖢᓂᓗ ᐱᐅᓴᖅᐸᒃᖢᓂᓗ ᐃᑲᔪᓚᐅᖅᐳᖅ ᐃᒻᒥᓂᒃ ᐱᐅᒋᑦᑎᐊᕐᓂᕐᒥᒃ. 

ᑭᖕ ᐃᓄᓕᕆᔨᐅᑎᓪᓗᒍ, ᐃᓱᒪᐃᓐᓇᖃᑦᑕᓚᐅᖅᑐᖅ ᐊᓐᓄᕌᓂᒃ ᓂᐅᕕᐊᒃᓴᖃᖃᑦᑕᕈᒪᓪᓗᓂ ᓂᐅᕕᕐᕕᖕᒥ. ᓅᑦᑐᓐᓇᖅᓯᓚᐅᖅᐳᖅ ᐊᓈᓇᖓᑕ ᓄᓇᖃᕐᕕᖓᓄᑦ ᐃᓕᓐᓂᐊᕆᐊᖅᖢᓂ ᐊᓐᓄᕌᓕᐅᕐᓂᕐᒥᒃ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ ᑐᕌᓐᑐᒥ. ᒥᖅᓱᓚᐅᖅᓯᒪᙱᖦᖢᓂ ᐃᓅᓯᕐᒥᓂ, ᖃᐅᔨᓕᓚᐅᖅᐳᖅ ᑕᐃᒪᐃᑐᐃᓐᓇᓕᖅᖢᓂ.

"ᐅᒃᐱᕈᓱᑦᑎᐊᖅᐳᖓ ᐃᓅᓯᒪᔪᐃᓐᓇᐅᓂᑦᑎᓐᓂ ᑐᓂᕐᕈᓯᐊᖃᖅᖢᑕ, ᐊᒻᒪ ᐱᒻᒪᕆᐅᕗᖅ ᐅᔾᔨᕆᑦᑎᐊᕐᓗᒋᑦ ᑕᒪᒃᑯᐊ ᓴᙱᔪᑦ ᐃᒃᐱᖕᓂᐊᓂᐅᔪᑦ ᐃᓅᓯᓕᒫᕐᓂ ᐊᒻᒪ ᓱᓕᒃᑲᓐᓂᖅ, ᐊᒃᓱᕈᕐᓇᖅᑐᒃᑰᕋᓗᐊᕈᕕᑦ ᒪᒥᓴᕋᓗᐊᕈᕕᓪᓘᓐᓃᑦ ᐊᒃᓱᕈᕐᓇᖅᑐᓂᒃ ᐊᑐᖅᓯᒪᔭᕐᓂᒃ, ᑕᒪᒃᑯᐊ ᑐᓐᓂᖅᑯᓯᐊᑦ ᐅᕙᑦᑎᓐᓃᖏᓐᓇᐅᔭᖅᐳᑦ, ᐊᒃᓱᕈᕐᓇᖅᑐᒃᑰᕋᓗᐊᕈᕕᑦ. ᑕᒪᒃᑯᐊ ᑐᓂᕐᕈᓯᐊᑦ ᐱᑕᖃᐃᓐᓇᐅᔭᕐᓂᐊᖅᑐᑦ ᐃᓗᖕᓂ, ᐊᒻᒪᓗ ᐅᒃᐱᕆᓗᒋᑦ ᑐᓂᕐᕈᓯᐊᑦ ᐊᒻᒪᓗ ᑎᑭᐅᑎᓗᑎᑦ ᐃᓕᓐᓂᐊᕈᓐᓇᕐᓂᕐᒧᑦ ᐅᕝᕙᓘᓐᓃᑦ ᐱᓕᒻᒪᒃᓴᕐᓂᕐᒧᑦ ᐅᐱᒋᔪᓐᓇᕐᓂᐊᕋᕕᒋᑦ ᐊᒻᒪᓗ ᐊᔪᕈᓐᓃᖅᓴᕐᓗᒋᑦ ᑕᒪᒃᑯᐊ ᑐᓂᕐᕈᓯᐊᑦ," ᐅᖃᖅᑐᖅ. 

ᐃᓕᓐᓂᐊᖅᖢᓂ ᐊᓐᓄᕌᓕᐅᕐᓂᕐᒥᒃ, ᑕᕐᓂᖓ ᐆᒪᓕᓚᐅᖅᐳᖅ. ᐃᓕᓴᐃᔨᒃᓴᖅᓯᐅᓚᐅᖅᐳᖅ ᐊᒻᒪ ᐃᑕᓕᒧᑦ ᐃᓕᓐᓂᐊᕆᐊᖅᖢᓂ ᕿᓯᐅᔭᕐᓂᒃ ᐴᒃᓴᓕᐅᕐᓂᕐᒥᒃ. ᐃᓄᓕᕆᔨᐅᒃᑲᓐᓂᓕᓚᐅᖅᐳᖅ ᖃᔅᓯᐊᕐᔪᖕᓄᑦ ᐊᕐᕌᒍᓄᑦ ᓲᖃᐃᒻᒪ ᑮᓇᐅᔭᖃᙱᓗᐊᒧᑦ ᐱᒋᐊᖅᑎᑦᑕᕆᐊᒃᓴᖅ ᓇᖕᒥᓂᕆᔭᒥᓂᒃ ᑭᓯᐊᓂ ᐃᓕᑦᑎᕙᓪᓕᐊᖏᓐᓇᓚᐅᖅᐳᖅ. ᑭᖑᓂᐊᒍᑦ, ᑭᖕ ᐱᓚᐅᖅᐳᖅ ᐊᓪᓚᐃᑦ ᐅᓪᓗᖏᓐᓂ ᐃᓕᓐᓂᐊᕐᕕᖕᒥ ᐊᑭᓕᖅᑕᐅᓂᕐᒧᑦ ᑮᓇᐅᔭᓂ ᐊᒻᒪ $150,000 ᐱᔪᓐᓇᖅᑎᑦᑎᓪᓗᓂ ᓄᖅᑲᕐᓂᕐᒧᑦ ᐃᖅᑲᓇᐃᔮᒥᓂᒃ ᐊᒻᒪ ᐱᒋᐊᖅᑎᑦᑎᓪᓗᓂ ᖃᕋᓴᐅᔭᒃᑯᑦ ᓂᐅᕕᕐᕕᖓᓂ ᓂᐅᕕᐊᒃᓴᖃᖅᐸᒃᑐᓂ ᔭᐃᑲᖕᓂ ᐊᒻᒪ ᓯᓚᒥᓯᐅᑎᓂᒃ. ᐱᓕᕆᔨᖃᖅᐳᖅ ᒥᖅᓱᖅᑎᓂᒃ ᑲᑎᖅᓱᖅᓯᒪᔭᒥᓄᑦ ᐃᓅᓯᖓᓗ ᐊᓯᔾᔨᑦᑎᐊᖅᓯᒪᓕᖅᖢᓂ. 

ᐱᔪᒃᓯᑎᑦᑎᓂᖓᓄᓪᓕ, ᑭᖕ ᐅᖃᓚᐅᖅᐳᖅ, "ᐱᔪᒃᓯᔾᔪᑎᒋᓚᐅᖅᑕᕋ ᓯᓐᓇᒃᑑᒪᒋᔭᕋ ᐃᓗᓐᓂ, ᐊᒻᒪᓗ... ᐅᒃᐱᕈᓱᒍᒪᕗᖓ ᑕᒪᑦᑕᑦᑎᐊᖅ... ᐊᒃᓱᕉᑎᒋᒻᒪᕆᒃᑕᕗᑦ. ᓱᖁᑕᐅᙱᑦᑐᖅ ᓄᓇᒦᙶᕋᓗᐊᕈᕕᑦ ᐱᕈᖅᓴᓂᑰᒍᕕᓪᓘᓐᓃᑦ, ᐅᖓᓯᒃᑐᒦᒃᑲᓗᐊᕈᕕᓪᓘᓐᓃᑦ, ᐃᓅᓂᑰᔪᐃᓐᓇᐅᒐᑦᑕ ᑐᓂᕐᕈᓯᐊᖃᖅᖢᑕ, ᐊᒻᒪᓗ ᑕᒪᒃᑯᐊ ᑐᓂᕐᕈᓯᐊᑦ ᐊᒥᖅᑳᕈᑎᒋᔭᕆᐊᖃᕋᑦᑎᒍᑦ ᓄᓇᕐᔪᐊᕐᒥᐅᓄᑦ. ᐃᓛᓐᓂᒃᑯᑦ ᕿᒪᐃᔭᕆᐊᖃᓲᖑᕗᑎᑦ ᓴᓂᕐᕙᒃᑕᐅᓯᒪᔪᒥᒃ ᐊᒻᒪ ᐃᓕᓐᓂᐊᕆᐊᕐᓗᑎᒃ ᐊᔪᕈᓐᓃᖅᓴᕐᓂᐊᕐᓗᒋᑦ ᑕᒪᒃᑯᐊ ᑐᓂᕐᕈᓯᐊᑦ ᐊᒻᒪ ᐃᓕᑦᑎᒃᑲᓐᓂᕐᓗᑎᒃ ᑐᓂᕐᕈᓯᐊᕆᔭᕐᓂᒃ ᐃᓗᖕᓂ ᐃᓂᖃᕈᓐᓇᕐᓂᐊᕋᕕᑦ ᐊᒥᖅᑳᕈᑎᒋᓗᒋᑦ ᑐᓂᕐᕈᓯᐊᑦ ᓄᓇᕐᔪᐊᕐᒥᐅᓄᑦ."

ᐊᔪᕐᓇᖅᑐᖅᓯᐅᕈᑎᑎᒍᑦ, ᑭᖕ ᓇᔭᖓ ᐃᓅᔪᓐᓃᓚᐅᖅᐳᖅ ᑳᓐᓱᒧᑦ 26-ᓂᒃ ᐅᑭᐅᖃᖅᖢᓂ ᐊᒻᒪ ᑭᖕ ᐊᕕᓚᐅᕆᓪᓗᓂ ᐊᒻᒪ ᑮᓇᐅᔭᑎᒍᑦ ᐊᒃᓱᕈᕈᑎᖃᖅᖢᓂ. ᐱᕈᖅᓴᓪᓗᓂ ᓄᓇᖃᕐᕕᐅᔪᒥ, ᐊᒃᓱᕈᕐᓇᖅᑐᓂᒃ ᓱᕈᓯᐅᑎᓪᓗᒍ ᐊᑐᓚᐅᖅᓯᒪᔭᖓ ᒫᓐᓇ ᓴᙱᓂᖅᑖᕈᑎᒋᓕᖅᑕᖓ ᐊᓈᓇᐅᓪᓗᓂ, ᐊᓈᓇᑦᑎᐊᖑᓪᓗᓂ ᐊᒻᒪ ᓇᖕᒥᓂᖃᖅᑎᐅᓕᖅᖢᓂ. ᖃᐅᔨᓯᒪᔭᖓ ᐃᓛᓐᓂᒃᑯᑦ ᐊᒃᓱᕈᕐᓇᖅᑐᖅ ᐊᒃᓱᕈᕐᓇᓗᐊᖅᐸᖕᓂᖓᓂᒃ ᐃᑲᔪᖅᑕᐅᔪᒪᔭᕆᐊᖃᓕᖅᐸᒃᖢᓂᓗ. ᑭᖕ ᐊᒃᓱᕉᑎᖃᖅᓯᒪᕗᖅ ᓯᕘᕋᕐᔪᐊᕐᓂᕐᒥᒃ ᐊᒻᒪ ᐅᐃᒪᔮᓕᖅᐸᒃᖢᓂ ᓇᖕᒥᓂᖅ ᖁᐊᖅᓵᖅᓯᒪᓂᕐᒧᑦ ᐃᓕᑦᑎᔭᕆᐊᖃᓚᐅᖅᖢᓂᓗ ᒪᒥᑉᐸᓪᓕᐊᓂᕐᒥᒃ.

"ᐅᓂᒃᑳᕋ ᐊᔾᔨᒋᙱᐊᕐᔪᒃᑕᖓ ᐃᕝᕕᑦ, ᑭᓯᐊᓂ ᐅᓪᓘᑉ ᓄᙳᐊᓂ, ᐃᓄᑐᐃᓐᓇᐅᒐᑦᑕ, ᐊᒻᒪ ᐊᑐᖅᓯᒪᔪᐃᓐᓇᐅᕗᒍᑦ ᖃᓄᐃᑦᑐᒥᒃᑭᐊᖅ ᐱᕐᕈᓗᐊᕿᓂᕐᒥᒃ ᐅᕝᕙᓘᓐᓃᑦ ᐊᒃᓱᕈᕐᓇᖅᑐᒥᒃ ᐅᕝᕙᓘᓐᓃᑦ ᕿᒃᓵᖕᓂᕐᒥᒃ, ᐃᓚᙵᕐᓂᕐᒥᒃ ᐅᕝᕙᓘᓐᓃᑦ ᓯᕘᕋᓂᕐᒥᒃ." 

ᑭᖕ ᑐᓴᖅᑎᑦᑎᔪᓐᓇᕈᓂ ᒪᒃᑯᖕᓂᖅᓴᒥᓄᑦ ᐃᒻᒥᓄᑦ ᐱᑦᑎᐊᕋᔭᖅᐳᖅ. "ᐃᓱᒪᔪᖓᓕ ᑭᓱᑐᐃᓐᓇᖅ ᐃᓕᑉᐸᙱᑕᕗᑦ ᒪᒃᑯᒃᑑᓪᓗᓂ ᓲᕐᓗ ᖃᓄᖅ ᐃᓕᖕᓂᒃ ᓇᒡᓕᒍᓱᓪᓚᕆᒍᓐᓇᕐᓂᕐᒥᒃ ᐊᒻᒪ ᐅᕙᑦᑎᓐᓂ ᐊᒃᓱᕈᕈᑎᖃᖅᐸᒃᖢᑕ," ᐅᖃᓚᐅᖅᐳᖅ, ᐃᓱᒪᓪᓗᓂ ᖃᓄᖅ ᑭᖑᓂᑦᑎᓐᓂ ᑕᒻᒪᕐᓂᕆᓚᐅᖅᑕᒥᓂᒃ ᐅᖃᐅᓯᖃᒃᑲᓐᓂᖅᐸᒃᖢᓂ. "ᐱᒻᒪᕆᐅᕗᖅ ᐃᓕᖕᓂᒃ ᐱᑦᑎᐊᑐᐃᓐᓇᕆᐊᒃᓴᖅ, ᓲᖃᐃᒻᒪ ᖃᖓᑐᐃᓐᓇᒃᑯᑦ ᐃᓅᓯᑦᑎᓐᓂ, ᐱᐅᓛᒃᑯᑦ ᐱᓕᕆᓲᖑᒐᑦᑕ ᖃᐅᔨᒪᔭᑦᑎᓐᓂᒃ ᐊᑐᖅᖢᑕ...ᖃᐅᔨᒪᓂᖅᓴᐅᑎᓪᓗᑕ ᐱᐅᓂᖅᓴᒥᒃ ᐱᓕᕆᔪᓐᓇᕐᓂᑦᑎᓐᓂᒃ," ᐅᖃᕆᓪᓗᓂ. 

"ᑕᒫᓃᒃᑲᔭᙱᑦᑐᖓ ᑭᓇᐅᖕᒪᖔᕐᒪᓘᓐᓃᑦ ᐅᓪᓗᒥ ᐊᑐᓚᐅᙱᒃᑯᒪ ᐊᒃᓱᕈᕐᓇᖅᑐᓂᒃ ᑕᒻᒪᕐᓂᕐᓂᒡᓘᓐᓃᑦ ᐅᕝᕙᓘᓐᓃᑦ ᐊᒃᓱᕈᕐᓇᖅᑐᓂᒃ ᐃᓕᑦᑎᔾᔪᑎᓂᒃ, ᑕᐃᒪᐃᓐᓂᖓᓄᑦ ᐅᕙᓐᓂᒃ ᐱᑦᑎᐊᕐᓂᖅᓴᐅᓕᖅᐳᖓ ᐊᒻᒪ ᐅᕙᓐᓂᒃ ᓇᒡᓕᒋᓂᖅᓴᐅᓕᖅᖢᖓ, ᓱᓕ ᐱᓕᕆᐊᖑᕙᓪᓕᐊᕗᖅ, ᓲᖃᐃᒻᒪ ᐃᓛᓐᓂᒃᑯᑦ ᓱᓕ ᐃᒻᒥᓂᒃ ᑲᑕᒃᐸᒃᖢᖓ, ᑭᓯᐊᓂᑦᑕᐅᖅ, ᑕᒪᓐᓇ ᐃᓅᓪᓗᑕ ᐊᑐᖅᓯᒪᔭᑦᑕ ᐃᓚᒋᖕᒪᒍ," ᑭᖕ ᐅᖃᖅᑐᖅ.

ᐃᓐᓇᕈᖅᐸᓪᓕᐊᓪᓗᖓ, ᐅᔾᔨᕈᓱᓕᖅᐳᖓ, ᐃᓄᑑᙱᓐᓇᒪ, ᑕᕐᓂᒧᑦ ᐃᑲᔪᖅᑎᖃᕋᒪ, ᐊᒻᒪ ᐆᒻᒪᕆᖕᓂᐅᕗᖅ."

ᐃᓱᒪᒥᒍᑦ ᖃᓄᐃᙱᑦᑎᐊᕈᒪᓪᓗᓂ, ᑭᖕ ᑐᒃᓯᐊᖅᐸᒃᐳᖅ ᓯᕗᓕᕆᓚᐅᖅᑕᒥᓄᓪᓗ ᐃᑲᔪᖅᑎᒋᕙᒃᑕᒥᓄᑦ ᓵᑉᐸᒃᖢᓂᓗ. ᖃᐅᔨᒋᕗᖅ ᐊᐅᓚᓂᖅ ᐊᒻᒪ ᔫᒐ ᐱᒻᒪᕆᐅᓂᖓᓂᒃ ᐊᒻᒪᓗᑦᑕᐅᖅ ᐅᖃᓪᓚᖕᓂᒃᑯᑦ ᒪᒥᓴᕐᓂᖅ, ᐱᓕᒻᒪᒃᓴᐃᔨᒧᑦ ᐅᕝᕙᓘᓐᓃᑦ ᐱᖃᓐᓇᕆᔭᕐᓄᑦ ᖃᑕᙳᑎᖏᓐᓄᓪᓘᓐᓃᑦ. ᐅᔾᔨᕈᓱᓕᖅᐳᖅ ᐃᓱᒪᒃᑯᑦ ᐱᔾᔪᑎᖃᕐᓂᖓᓂᒃᑕᐅᖅ, ᐊᒻᒪᓗ ᐃᒃᐱᒋᔭᒥᓂᒃ ᐊᔪᖅᓯᓯᒪᙱᓪᓗᓂ ᐱᒻᒪᕆᐅᕗᖅ. ᐊᓯᐊᑦᑕᐅᖅ ᐃᓕᑦᑎᓯᒪᖕᒥᔪᖅ ᐃᓚᖏᑦ ᐃᓅᓯᐅᑉ ᐃᓚᖏᓐᓂ ᐊᒃᓱᕈᕐᓇᕐᓂᖏᓐᓂ ᑭᓯᐊᓂ ᐅᒃᐱᕈᓱᒋᐊᖃᖅᐳᖅ ᑕᒪᕐᒥᓕᒫᖅ ᑕᐃᒪᐃᙱᓐᓂᖏᓐᓂ. 

ᐅᒃᐱᕆᓗᒍ ᖁᑦᑎᖕᓂᖅᓴᖅ ᐱᔪᓐᓇᕐᓂᖓ ᐅᒃᐱᕈᓱᒃᖢᓂᓗ ᑭᓱᑐᐃᓐᓇᐃᑦ ᐊᓯᔾᔨᕐᓂᐊᕐᓂᖏᓐᓂᒃ ᐱᒻᒪᕆᐅᓪᓗᓂ ᐃᓚᒋᔭᐅᕗᖅ ᑕᐅᑐᒃᑕᒥᓂᒃ ᐱᓯᒪᐃᓐᓇᕈᓐᓇᕐᓂᕐᒥᒃ ᐊᔪᖅᓯᓯᒪᙱᓪᓗᓂᓗ. ᑭᖕ ᐃᓕᑦᑎᓚᐅᖅᐳᖅ ᓯᓚ ᐱᐅᓛᖑᓂᖓᓂ ᐃᓅᓕᓴᐅᑎᐅᓂᖓᓂ ᐃᒻᒥᓄᑦ, ᐱᓱᔪᖕᓂᕐᒥ ᐊᒻᒪ ᓄᓇᒥ ᒪᒥᓴᕐᓂᐅᔪᒥ ᑕᕐᓂᖓᓂ. ᔫᒐ ᐊᒻᒪ ᑎᒥᖓ ᐊᐅᓚᑲᑕᒃᖢᓂ ᐃᑲᔪᖅᓯᒪᒋᕗᖅ, ᐊᒻᒪᓗᑦᑕᐅᖅ ᐃᓅᖃᑎᖃᑦᑎᐊᖅᖢᓂ ᖃᓄᐃᙱᑦᑎᐊᖅᑐᓂᒃ ᐊᒻᒪ ᐱᖃᓐᓇᕆᔭᖃᑦᑎᐊᖅᖢᓂ.

ᐊᓐᓄᕌᑦ ᐊᒻᒪ ᖃᓪᓗᓈᖅᑕᑦ ᐱᒃᑯᒥᒍᓱᐃᓐᓇᐅᔭᓚᐅᖅᐳᑦ ᑭᓯᐊᓂ ᐊᑯᓂᐅᓚᐅᖅᐳᖅ ᓕᓐᓯ ᑭᖕ ᑕᒪᒃᑯᓂᖓ ᑕᐅᑐᙳᐊᖅᑕᒥᓂᒃ ᐱᔪᓐᓇᖅᓯᓚᐅᙱᓐᓂᖓᓂ ᐊᒻᒪ ᓴᓇᔪᓐᓇᖅᓯᓪᓗᓂ ᓇᓗᓇᐃᒃᑯᑕᕐᒥᓂᒃ. ᓇᔭᖃᕈᓐᓃᓚᐅᖅᑎᓪᓗᒍ, ᑲᑎᑎᑕᐅᓯᒪᓂᖓᓗ, ᑮᓇᐅᔭᑎᒍᑦ ᐊᒃᓱᕈᕐᓇᖅᑐᒃᑰᖅᖢᓂ ᐊᒥᓱᓂᒡᓗ ᐊᔪᕐᓇᖅᑐᖅᓯᐅᖅᐸᒃᖢᓂ ᓄᑕᕋᐅᓂᕐᒥᓂ ᐊᑐᖅᓯᒪᔭᒥᓂᒃ, ᐊᒃᓱᕈᕈᑎᖃᓚᐅᖅᐳᖅ ᐊᓂᒍᐃᓇᓱᒃᖢᓂ ᓯᕘᕋᓂᕐᒥᒃ ᐅᐃᒪᔮᕐᓂᕐᒥᒡᓗ, ᐊᓯᒥᓂᒃ ᐃᑲᔪᕋᓱᒃᖢᓂ ᐊᒃᓱᕈᕐᓇᖅᑐᒃᑰᖅᑎᓪᓗᒋᑦ. ᐃᓄᓕᕆᔨᐅᓪᓗᓂ ᐃᓱᒪᐃᓐᓇᖅᖢᓂ ᖃᓄᐃᓕᐅᕈᒪᓪᓚᕆᖕᒪᖔᕐᒥᓂᒃ, ᓕᓐᓯ ᑭᖕ ᐊᓯᔾᔩᓯᒪᕗᖅ ᓄᓇᖃᖅᑳᖅᑐᓄᑦ ᐃᓚᒌᓄᑦ ᑕᓐᑐ ᐸᐃᒥ ᐃᒃᐱᒍᓱᑦᑎᐊᕐᓂᕐᒥᓄᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.