ᓄᖅᑲᓚᐅᖅᑎᓪᓗᒍ 10-ᖓᓂ ᖁᕝᕙᓯᓐᓂᓕᒻᒥ, ᓖᓴ ᓲᑦᓯᐅᓪ ᐱᕕᖃᒃᑲᓐᓂᓚᐅᖅᑐᖅ ᓯᓚᑦᑐᓴᕐᕕᒻᒨᖅᑐᓂᓗ. ᒫᓐᓇ ᐱᓕᕆᖃᑎᖃᖅᐸᓕᖅᐳᖅ ᐱᓕᕆᕝᕕᒋᔭᐅᕙᒃᑐᓂᒃ ᐃᑲᔪᖅᐸᒃᖢᓂᒋᑦ ᓇᓂᓯᓂᕐᒥᒃ ᐊᐃᑉᐸᖓᓂᒃ ᐱᕝᕕᒋᔪᓐᓇᖅᑕᒥᓂᒃ. ᐱᕈᓚᐅᖅᑐᖅ ᑲᖏᖅᑐᒑᐱᒻᒥ ᐊᒻᒪᓗ ᐃᖅᑲᓇᐃᔭᖅᓯᒪᓪᓗᓂ ᐃᑲᔪᖅᑕᐅᕕᓐᓂ ᐊᕐᕌᒍᓄᑦ ᖁᓕᑲᓴᓐᓄᑦ. ᐃᖅᑲᓇᐃᔭᓚᐅᖅᓯᒪᔪᖅ ᕿᑭᖅᑖᓗᖕᒥ ᐃᑲᔪᖅᑕᐅᕕᖕᒥ ᐱᓕᕆᐊᖃᖅᖢᓂ ᑲᒪᒋᔭᐅᔪᓂᒃ ᐊᒻᒪ ᐃᓚᓕᐅᑎᒃᑲᓐᓂᕐᓂᐊᖅᑐᓂᒃ ᐸᕐᓇᐅᑎᓂᒃ ᓇᐅᑦᑎᖅᓱᖅᑕᐅᓗᐊᕆᐊᖃᙱᓐᓂᖅᐹᓂᒃ ᒫᓐᓇᓗ ᐱᓕᕆᕙᒃᖢᓂ ᓄᑖᒥᒃ ᒪᒥᓴᕐᕕᖕᒥᒃ ᐱᓕᕆᐊᒃᓴᓄᑦ ᐊᐅᓚᑦᑎᔨᐅᓪᓗᓂ. ᐃᑲᔪᕐᓗᒋᑦ ᑲᒪᒋᔭᐅᔪᑦ ᖃᐅᔨᑎᓪᓗᒋᑦ ᓇᓕᐊᒃ ᐱᓕᕆᐊᒃᓴᑦ ᐊᑑᑎᖃᓛᖑᓂᐊᕐᒪᖔᑕ ᐃᑲᔪᕐᓗᒋᓪᓗ ᒪᒥᓴᖅᑎᓪᓗᒋᑦ, ᐃᑲᔪᖅᓱᐃᖏᓐᓇᖅᑐᖅ ᐃᓚᐅᖃᑕᐅᓕᒃᑲᓐᓂᕐᓂᕐᒧᑦ ᐱᕙᒌᔭᐃᓂᕐᓂ.

ᐃᓚᖓ ᑭᓱ ᐃᖅᑲᓇᐃᔭᕈᒪᓂᖃᕐᒪᖔᖅ ᐃᑲᔪᖅᑕᐅᕕᓐᓂ ᐃᓪᓗᖃᕐᓂᖅ ᐃᖅᑲᓇᐃᔮᖅᑖᖅᑐᖅ. ᐅᖓᑖᓄᑦ ᐱᕚᓪᓕᕈᑎᐅᑉ, ᖁᕕᐊᒋᔭᓕᒃ ᐃᑲᔪᕐᓂᕐᒥᒃ ᑲᒪᒋᔭᖏᓐᓂ ᐊᒃᓱᕈᕐᓇᖅᑐᒃᑰᖅᑐᓄᑦ ᖃᑕᙳᑎᖏᓐᓄᓪᓗ ᐊᒃᓱᕈᕐᓇᖅᑐᓄᑦ. ᐃᓄᓕᕆᔨᐅᖅᑳᖅᖢᓂ, ᐃᓕᑦᑎᓯᒪᔪᖅ ᓇᓗᓇᐃᕐᓯᓂᖕᒥᑦ ᑭᓱᑦ ᑲᒪᒋᔭᐅᖅᑳᕆᐊᖃᖕᒪᖔᖏᑦ ᐃᓕᓴᕆᓗᒋᓪᓗ ᐊᒃᓱᕈᖕᓇᖅᑐᑦ ᐃᑲᔪᖅᑕᐅᕙᒃᑐᑦ. ᓇᓂᓯᔪᒪᔪᖅ ᐃᑲᔪᕈᑎᒃᓴᓂᑦ ᑕᐃᒃᑯᓄᖓ ᓇᓂᓯᓗᓂᓗ ᐱᓕᒻᒪᒃᓴᒃᑲᓐᓂᕈᑎᒃᑲᓐᓂᕐᓂ ᐃᖕᒥᖕᓄᑦ ᐃᖅᑲᓇᐃᔭᖃᑎᖏᓐᓄᓪᓗ ᐱᐅᓂᖅᓴᒃᑯᑦ ᐱᑎᓪᓗᒋᑦ ᐱᔭᕆᐊᖃᖅᑕᖏᓐᓂ ᐱᕚᓪᓕᕈᑎᖃᕐᓂᐊᕐᒪᑕ ᒪᒥᓴᕐᓂᕐᒥ ᐊᕙᑎᓕᖕᒥ. 

ᐃᖅᑲᓇᐃᔭᕐᕕᖕᒥ, ᐃᓚᐅᖃᑦᑕᖅᐳᖅ ᐃᖅᑲᓇᐃᔭᖅᓯᓐᓇᕐᓗᓂ ᐊᔪᕈᓐᓃᖅᓴᖅᑎᑕᐅᔪᓂᒃ, ᐃᓕᓐᓂᐊᖅᖢᓂ ᖃᓄᖅ ᐱᓕᕆᖃᑎᖃᕈᓐᓇᕐᓂᕐᒥᒃ ᐱᓕᕆᕝᕕᒋᔭᐅᕙᒃᑐᓂᒃ, ᑐᓴᐅᒪᑎᑦᑎᓂᕐᒧᑦ ᐊᔪᕈᓐᓃᖅᑕᐅᕙᒃᑐᓂᒃ, ᖁᐊᖅᓵᕐᓇᖅᑕᐃᓕᒪᓂᕐᒥᒃ ᖁᐊᖅᓵᕐᓇᖅᑕᐃᓕᒪᓂᕐᒥᒡᓗ. "ᐊᖓᔪᒃᖡᑦ ᐃᓕᓐᓂᐊᕐᕕᖕᒥ ᐊᓂᒍᐃᓚᐅᙱᒃᑲᓗᐊᖅᑎᓪᓗᖓ, ᓯᓚᑦᑐᖅᓴᕐᕕᓕᐊᕈᓐᓇᖅᓯᓚᐅᖅᐳᖓ... ᓱᓕ ᐃᓕᑦᑎᕙᓪᓕᐊᔪᖓ, ᐃᖅᑲᓇᐃᔮᕋ ᖁᕕᐊᒋᓪᓗᒍᓗ," ᐱᙳᐊᖅᑐᖅ. ᐃᓚᐅᖃᑕᐅᖃᑦᑕᖅᑐᖅ ᖃᓄᐃᑦᑐᑐᐃᓐᓇᕐᓄᑦ ᐃᓕᓐᓂᐊᑲᓐᓂᕐᓂᕐᒧᑦ ᓄᓇᕗᑦ ᒐᕙᒪᒃᑯᖏᓐᓄᑦ ᐊᒻᒪᓗ ᓂᕆᐅᑦᑎᐊᖅᑐᓂ ᐃᓚᐅᖃᑕᐅᓂᐊᕆᐊᒃᓴᖅ ᓯᕗᓕᖅᑎᐅᓂᕐᒧᑦ ᓯᕗᓂᑦᑎᓐᓂ. ᐃᖅᑲᓇᐃᔭᐃᓐᓇᓕᕋᒥ, ᖁᕕᐊᓱᑦᑐᖅ ᐱᓕᕇᓐᓇᕈᓐᓇᕋᒥ.

ᐅᖃᐅᔾᔪᐃᓂᖓ ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᒪᒃᑯᒃᑐᓄᓪᓗ ᐃᓱᒪᔪᓄᑦ ᐊᖏᕐᕋᒥᓂᒃ ᕿᒪᐃᔪᒪᓂᕐᒥᒃ ᐃᓕᓐᓂᐊᕐᓂᕐᒧᑦ ᐃᒪᓐᓇᐅᔪᖅ, "ᐊᔪᕐᓇᖅᐸᑦ ᓵᑦᑎᐊᕐᒥᐅᑕᖃᕆᐊᒃᓴᖅ ᐊᖏᕐᕋᕆᔭᒥᓂ ᕿᒪᒃᓯᓯᒪᔭᕆᐊᒃᓴᖅ, ᐃᓱᐊᓂ, ᑕᒪᓐᓇ ᐱᐅᒻᒪᕆᖕᓂᐊᖅᐳᖅ... ᐃᓚᑎᑦ ᑕᑯᔪᓐᓇᖅᓯᓛᖅᑕᑎᑦ ᐃᓱᐊᓂ." ᓯᓚᑦᑐᖅᓴᕐᕕᒃᑰᖅᑎᓪᓗᒍ, ᐱᖃᓐᓇᕆᔭᖓᑕ ᐃᓚᖓᑦ ᑎᓕᐅᕆᓪᓚᕆᓚᐅᖅᐳᖅ ᑲᔪᓰᓐᓇᖁᓪᓗᓂᐅᒃ ᐊᒃᓱᕈᖅᑎᓪᓗᒍ. ᐱᖃᓐᓇᕆᔭᖓ ᐊᒃᓱᕈᖅᑎᖦᖢᓂᐅᒃ ᓴᐱᓕᕈᒪᓪᓚᕆᖕᒪᖔᑦ ᐅᕝᕙᓘᓐᓃᑦ ᑲᔪᓯᔪᒪᖕᒪᖔᑦ. ᐱᖃᓐᓇᕆᔭᖓ ᐃᖅᑲᐃᑎᖦᖢᓂᐅᒃ ᑕᐃᑲᓃᑲᓴᖕᓂᕋᕐᖢᓂ ᐊᔪᖅᓯᐅᖅᑲᓪᓗᓂᓗ ᓴᓂᒧᑦ ᐊᒃᓱᕈᕐᓇᖅᑐᒃᑯᑦ. ᑖᓐᓇ ᑰᔾᔪᐊᕌᓗᒃ ᑲᔪᓯᓚᐅᖅᑐᖅ ᐱᔭᕇᖅᑐᓂᓗ. 

"ᐊᒃᓱᕈᕐᓇᖅᐸᑦ ᐊᐃᓯᒪᓗᓂ ᐅᐸᒃᓯᓯᒪᔭᕆᐊᒃᓴᖅ, ᐃᓱᐊᓂ, ᐊᑑᑎᖃᒻᒪᕆᖕᓂᐊᖅᑐᖅ."

ᐊᐳᖅᑕᕈᑎᖃᓕᕋᒥ ᐃᓅᓯᕐᒥᓂ, ᑰᒡᔪᐊᕌᓗᖕᒥ ᐱᖃᓐᓇᕆᔭᒥᓂᒃ, ᐃᓕᓐᓂᐊᖃᑎᒥᓂᒃ ᐃᓕᓴᐃᔨᓂᒡᓗ. ᐃᓚᖓᑦ ᐃᓕᑕᖓ, "ᑲᑉᐱᐊᓱᒋᐊᖃᙱᑦᑎᐊᖅᑐᑎᑦ ᐊᐱᕆᔭᕆᐊᒃᓴᖅ ᓇᓗᔭᕐᓂᑦ... ᐊᐱᕆᓐᖏᒃᑯᕕᑦ, ᐊᔪᖅᓯᐅᖅᑲᑐᐃᓐᓇᕐᓂᐊᖅᑐᑎᑦ ᓱᓕ ᐊᐱᖅᓱᕋᕕᑦ." ᐃᓚᒥᓂᒃ ᕿᒪᐃᓯᒪᓪᓗᓂ ᐊᒃᓱᕈᕐᓇᓚᐅᖅᑐᖅ ᑭᓯᐊᓂ ᑕᑯᔪᓐᓇᖅᓯᓪᓗᓂᒋᑦ ᐃᓄᖕᓄᑦ ᑐᓴᒐᒃᓴᓄᑦ ᐃᑲᔫᑕᐅᓪᓗᓂ.  

ᒪᒃᑯᖕᓂᖅᓴᓂᒃ ᐅᖃᐅᔾᔪᐃᔪᓐᓇᕈᓂ ᐃᒪᐃᑦᑑᓇᔭᖅᐳᖅ, "ᖃᔅᓯᑲᓪᓚᖕᓂᒃ ᐊᔾᔨᒌᙱᑦᑐᓂᒃ ᑐᓗᖅᑕᕈᑎᓂᒃ ᐊᑐᖃᑦᑕᕐᓂᐊᖅᐳᑎᑦ ᐃᓅᓯᕐᒥ, ᑭᓯᐊᓂ ᖁᕕᐊᓱᒡᓗᑎᑦ ᓇᓃᓕᕐᒪᖔᖅᐱᑦ.  ᖁᕕᐊᒋᓗᒋᑦ ᐱᓕᕆᐊᕆᔭᑎᑦ. ᖃᐅᔨᒪᓗᑎᑦ ᖃᖓ ᐋᒃᑳᕆᐊᒃᓴᖅ. ᖃᐅᔨᒪᓗᑎᑦ ᖃᖓ ᐊᖏᕆᐊᒃᓴᖅ. ᓂᐱᖃᕆᑦ." 

ᐃᓱᒪᖓ ᖃᓄᐃᙱᑦᑎᐊᖏᓐᓇᖁᓪᓗᒍ, ᑰᒡᔪᐊᕌᓗᖕᒥ ᒥᖅᓱᖃᑦᑕᖅᐳᖅ. ᐳᐊᓘᓕᐅᓲᖅ ᐊᒻᒪᓗ ᔭᐸᓕᐅᖅᐸᒃᖢᓂ. ᐱᕕᖃᕈᓐᓃᖅᑎᓪᓗᒍ ᐳᐃᔾᔪᕋᕆᐊᕈᒪᖃᑦᑕᕐᒥᔪᖅ ᓄᑕᖅᑲᓂᒡᓗ ᐱᖃᑎᖃᕈᒪᕙᒃᑭᓪᓗᓂ ᐃᓱᒪᒥᓂᒃ ᓄᖅᑲᖓᑎᖦᖢᓂᒋᑦ ᐃᖅᑲᓇᐃᔮᒥᓂᒃ. 

ᑲᔪᖏᖅᓴᖅᑕᐅᑎᓪᓗᒍ, ᑰᒡᔪᐊᕌᓗᖕᒥ ᐃᓱᒪᓲᖑᕗᖅ ᖃᓄᖅ ᐊᓈᓇᖓ ᐊᓂᒍᐃᓯᒪᕐᔪᐊᕐᓂᖓᓂᒃ ᑭᖑᓂᖔᑦᑎᓐᓂ ᖁᐊᖅᓵᖅᓯᒪᕐᔪᐊᖅᑐᓂᒃ ᐊᒻᒪ ᐅᓪᓗᒥ ᐃᓅᓕᖅᖢᓂ. "ᑕᑯᔪᖓ ᓴᙱᓂᕐᒥᒃ, ᓯᕗᓂᐊᒍᑦ," ᐅᖃᙳᐊᖅᑐᖅ, ᑕᐅᑐᒃᓗᓂ ᖃᓄᖅ ᐊᓈᓇᖓ ᖁᕝᕙᕆᐊᖅᓯᒪᖕᒪᖔᑦ ᐊᑐᕐᓂᑯᖏᓐᓂ. "ᐃᑲᔪᖃᑦᑕᖅᑐᖅ ᐃᓄᓐᓂᑦ ᐃᓄᐃᑦ ᐱᖅᑯᓯᖏᓐᓂᑦ, ᖃᐅᔨᒪᓂᖏᓐᓂᑦ ᐱᖅᑯᓯᖏᓐᓂᓪᓗ ᐱᓕᕆᔾᔪᓯᕐᓂᑦ ᖃᐅᔨᒪᑎᑦᓯᓂᕐᒥᓪᓗ ᖃᐅᔨᒪᔭᖏᓐᓂᑦ ᐊᓯᖏᓐᓄᑦ ᐃᓄᓐᓄᑦ. ᑕᐃᒪᐃᓐᓂᖓᓄᑦ ᐊᓈᓇᓐᓄᑦ ᐱᔪᒃᓯᑎᑕᐅᕗᖓ," ᑲᔪᓯᓪᓗᓂ. 

ᓄᖅᑲᖅᓯᒪᒐᓗᐊᖅᑐᓂ 10-ᖓᓂ ᖁᕝᕙᓯᓐᓂᓕᒻᒥ, ᓖᓴ ᓲᑦᓯᐅᓪ ᓇᒻᒥᓂᖅ ᐱᕕᖃᑦᑎᑦᑎᓚᐅᖅᑐᖅ ᐃᓕᓐᓂᐊᑲᓐᓂᖅᑐᓂ ᐊᒻᒪᓗ ᓯᓚᑦᑐᓴᕐᕕᒻᒨᖅᑐᓂ. ᒫᓐᓇ ᐱᓕᕆᖃᑎᖃᖅᐸᓕᖅᐳᖅ ᐱᓕᕆᕝᕕᒋᔭᐅᕙᒃᑐᓂᒃ ᑎᒍᔭᐅᓯᒪᕝᕕᖕᓂ ᐃᑲᔪᖅᐸᒃᖢᓂᒋᑦ ᓇᓂᓯᓂᕐᒥᒃ ᐊᐃᑉᐸᖓᓂᒃ ᐱᕝᕕᒋᔪᓐᓇᖅᑕᒥᓂᒃ. ᐃᖅᑲᓇᐃᔭᖅᖢᓂ ᐃᓕᓐᓂᐊᖅᖢᓂ ᐊᒻᒪ ᖃᓄᖅ ᐃᑲᔪᕈᓐᓇᕐᒪᖔᑦ, ᐃᑲᔪᖃᑦᑕᖅᑐᖅ ᒪᒥᓴᕐᓂᕐᒥᒃ ᐊᒻᒪ ᐱᓱᖃᑕᐅᓪᓗᓂ ᐃᑲᔪᖅᑕᐅᔭᕆᐊᓕᖕᓂᒃ ᐃᓅᓯᖃᑦᑎᐊᒃᑲᓐᓂᕈᒪᓪᓗᓂ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.