"ᐃᓱᒪᒋᔭᕋᓕ ᐱᓕᕆᐊᕆᖃᑦᑕᖅᓯᒪᔭᕋ, ᐱᓗᐊᖅᑐᒥᒃ ᑮᓇᐅᔾᔭᒐᓱᐊᖅᑎᐅᙱᑦᑐᑦ ᐅᕝᕙᓘᓐᓃᑦ ᐃᓄᓕᕆᔨᒃᑯᑦ ᐱᓕᕆᐊᖏᑦ, ᓄᓇᖃᖅᑳᖅᓯᒪᔪᑦ ᓯᕗᓕᖅᑎᐅᔭᕆᐊᖃᓪᓚᕆᖕᒪᑕ ᓄᓇᓕᖕᓄᑦ, ᑕᑯᔪᒪᓪᓗᒋᓪᓗ ᒪᒃᑯᒃᑐᖁᑎᕗᑦ ᐃᖅᑲᓇᐃᔮᖅᑖᖅᐸᓪᓕᐊᑎᓪᓗᒋᑦ," ᒪᒡᓈᓕᐊ ᐴᕋᓐ ᓯᓐᓇᑦᑑᒪᔪᖅ ᓂᐱᖃᕐᓗᓂ. ᑕᐃᓐᑎᓇᒐ ᒧᕼᐊᒃ-ᒥᐅᑕᖅ, ᐃᓚᒋᔭᐅᔪᖅ ᒧᕼᐋᒃᔅ-ᒧᑦ ᑯᐃᓐᑦ ᓄᓇᖃᖅᑳᖅᓯᒪᔪᓂᑦ ᓄᓇᖃᖅᑐᖅ ᐊᒻᒪᓗ ᐱᓕᕆᓪᓗᓂ ᐃᓕᖅᑯᓯᑐᖃᖅᑎᒍᑦ ᐋᓪᒑᓐᑯᐃᓐᒥᑦ ᐋᑐᕚᒥᑦ, ᐋᓐᑎᐅᕆᐅᒥᑦ, ᐃᑲᕐᕌᓐᓂᒃ ᒪᕐᕉᓐᓂᒃ ᐃᓚᒥᓂᒃ. 

ᖃᑕᙳᑎᖏᑦ ᓅᓚᐅᖅᑐᑦ ᑕᐃᑎᓇᒐᒧᑦ ᑐᕌᓐᑐᒥᑦ ᐊᓈᓇᖓ ᕿᑐᕐᖓᒃᓴᖃᖅᑎᓪᓗᒍ ᓲᖃᐃᒻᒪ ᕿᑐᕐᖓᖏᑦ ᐱᕈᖁᓪᓗᓂᔾᔪᒃ ᓄᓇᓕᖏᓐᓂ ᐃᓕᖅᑯᓯᖏᑎᒍᑦ. ᐊᑖᑕᖓᑕ ᖃᑕᙳᑎᖏᑦ, ᐱᕈᖅᓴᓚᐅᖅᑐᖅ ᓴᓂᑦᑎᐊᖓᓂ, ᒧᕼᐊᒃ ᐊᒻᒪ ᐅᐃᕖᑎᑐᑦ ᑲᓇᑕᒥ ᐊᓈᓇᖓᑕᓗ ᖃᑕᙳᑎᖏᑦ ᔪᕉᔅ−ᖑᓚᐅᖅᐳᖅ. ᐴᕋᓐ ᐊᓈᓇᑦᑎᐊᖓ ᑲᔪᖏᖅᓴᐃᓂᖅᐹᖑᕗᖅ ᐊᒻᒪ ᐃᔾᔪᐊᒐᒃᓴᑦᑎᐊᕙᐅᓪᓗᓂ.

ᖃᐅᔨᓚᐅᖅᑐᖅ ᐊᓈᓇᑦᑎᐊᖓᑕ ᓄᓇᖓᓂ ᐃᓚᐅᑎᓪᓗᒍ ᐊᒻᒪ ᓄᓇᒥ ᑲᒪᑎᓪᓗᒍ, ᒍᕋᔾᔨᐅᖅᖢᓂ ᐊᒻᒪ ᓯᒡᔭᒥ ᓴᓗᒻᒪᖅᓴᐃᓪᓗᓂ.  ᒍᕋᐃᑦ 9-ᒥ ᐃᓕᓐᓂᐊᖅᑐᓂ, ᓅᓚᐅᖅᑐᖅ ᑐᕌᓐᑐᒧᑦ, ᐃᖅᑲᓇᐃᔭᓚᐅᖅᑐᖅ ᐱᑦᔪᑕᐅᔪᓂᒃ ᐊᒻᒪᓗ ᐊᔾᔨᐅᖏᑦᑐᓂᒃ ᐃᖅᑲᓇᐃᔮᖃᑦᑐᓂ ᑭᓯᐊᓂ ᒪᑐᐃᖅᓯᓪᓗᓂ ᓇᒻᒥᓂᖅ ᓄᔭᓕᕆᓂᕐᒥᒃ ᐊᒻᒪᓗ ᔭᓐᑖᕐᕕᒻᒥᒃ. ᐊᑖᑕᑦᓯᐊᖓ ᒪᑐᐃᖅᓯᓚᐅᕐᒪᑦ ᓇᒻᒥᓂᖁᑎᒥᓂᒃ ᐊᒃᑲᖓᓗ ᐊᐅᓚᓕᖅᑐᓂᐅᒃ. ᖃᑕᙳᑎᖏᑕ ᐊᓂᒍᖅᑎᓯᒪᔭᖏᑦ ᓇᖕᒥᓂᖃᕐᓂᕐᒥᒃ ᑐᕌᕈᑎᒋᓪᓗᓂᒋᑦ ᐱᓕᕆᖃᑎᖃᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᓇᖕᒥᓂᕆᔭᖏᓐᓂ ᐱᓯᓂᓯᖏᓐᓂᒃᓗ ᑲᓇᑕᓕᒫᒥ. 

ᐃᓕᓐᓂᐊᕐᓂᖓ ᐱᒋᐊᓚᐅᖅᑐᖅ ᐃᓕᓐᓂᐊᕐᕕᖕᒥ ᓴᓂᕐᕙᒃᓯᒪᔭᖓᓂ, ᐃᓚᐅᖃᑕᐅᓪᓗᓂ 6-ᒧᑦ ᖁᑦᑎᖕᓂᓕᖕᒧᑦ. ᐃᓚᓕᐅᔾᔨᓚᐅᖅᐳᖅ ᐃᓕᖅᑯᓯᑐᖃᕐᒥᓂᒃ ᐱᓪᓗᐊᑕᕐᓄᑦ ᐊᕕᒃᓯᒪᓂᕐᓂ ᐃᓕᓐᓂᐊᕈᑕᐅᕙᒃᑐᓄᑦ, ᐃᓕᓐᓂᐊᕐᓂᓕᕆᓂᕐᒧᑦ ᐱᓕᕆᖃᑦᑕᖅᓯᒪᓂᑰᓪᓗᓂ ᐱᒃᑯᒋᔭᒥᓄᑦ. ᐊᖓᔪᖅᑳᖏᒃ ᐊᕕᒻᒪᑕ, ᓅᓚᐅᖅᑐᖅ ᐊᓈᓇᒥᓄᑦ ᐊᓯᐊᓄᑦ ᐃᓕᓐᓂᐊᕐᕕᒻᒨᖅᑐᓂ. ᐱᔭᕇᕋᒥ, ᓯᓚᑦᑐᓴᕐᕕᕐᔪᐊᕐᒨᓚᐅᖅᑐᖅ ᐋᑐᕚᒧᑦ ᐊᒻᒪᓗ ᐱᔭᕇᖅᑐᓂ ᐃᓕᓐᓂᐊᕕᔾᔪᐊᒥ ᐸᐃᑉᐹᑖᖅᑐᓂ ᐃᓱᒪᓕᕆᓂᕐᒥᑦ. ᑲᓇᑕᒥ ᓄᓇᓕᐸᐅᔭᕐᒥ, ᑲᑎᖃᑎᖃᕈᓐᓇᓚᐅᖅᑐᖅ ᓄᓇᖃᖅᑳᖅᓯᒪᔪᒃᑯᕕᖕᒥ ᐊᒻᒪ ᓄᓇᓕᖕᓂ ᓇᓂᓯᔪᓐᓇᖅᓯᓪᓗᓂ. ᑕᒪᓐᓇ ᐱᔭᕆᐊᖃᒻᒪᕆᓚᐅᖅᑕᖓ. 

"ᐃᓚᖓ ᐊᒃᓱᕈᕈᑎᒋᖃᑦᑕᓚᐅᖅᑕᕋ ᒪᒃᑯᖕᓂᖅᓴᐅᑎᓪᓗᖓ, ᐃᓱᒪᔪᖓᓗ ᑖᓐᓇ ᐊᑐᒐᔪᒃᑕᕋ ᐊᒥᓱᓄᑦ ᓄᓇᖃᖅᑳᖅᓯᒪᔪᓄᑦ ᒪᒃᑯᒃᑐᓄᑦ, ᑕᐃᒪᓐᓇ ᐃᒃᐱᒍᓱᖕᓂᖃᖅᐸ ᐃᓚᒋᔭᐅᓂᕐᒥᒃ, ᐃᓱᒪᓪᓗᖓᓗ ᐅᕙᓐᓄᑦ ᒪᕐᕉᖕᓂᒃ ᐊᔾᔨᒌᖏᑦᑐᓂᒃ ᐃᓕᖅᑯᓯᕐᒦᙶᕐᓗᓂ ᖃᐅᔨᓇᓱᐃᓐᓇᐅᔭᕐᓗᖓᓗ ᑭᓇᒥᒃ ᓈᒻᒪᒋᖕᒪᖔᒃᑯ? ᓇᓂ ᓄᓇᖃᖅᐳᖓ? ᑭᐊ ᐊᖏᖅᐸᖓ ᑭᓇᐅᓂᓐᓄᑦ?" ᐃᖅᑲᐅᒪᔪᖅ.

ᐊᑭᓕᖅᓱᖅᑕᐅᙱᖦᖢᓂ ᐱᓕᕆᓚᐅᖅᑐᖅ ᐃᓱᒪᓕᕆᔨᓄᑦ ᓄᓇᓕᖕᒥ ᑲᑎᕝᕕᖕᒥ ᐅᐸᒍᑎᓪᓗᓂ ᑭᖑᓪᓕᖅᐹᒥ ᐅᓂᒃᑳᖓᓂ ᓱᓕᔪᒥᒃ ᐃᓱᒪᒋᔪᓐᓇᐃᖃᑎᒌᖕᓂᕐᒧᓪᓗ ᑭᒡᓕᓯᓂᐊᖅᑏᑦ ᓴᖅᑭᑕᐅᑎᓪᓗᒍ. ᐃᓚᒋᔭᐅᓪᓗᓂ ᐅᖃᐅᓯᐅᔪᓄᑦ ᑲᑎᙵᔪᓂ, ᖃᐅᔨᓪᓗᓂ ᐃᓕᑦᑎᓗᐊᖅᓯᒪᙱᓐᓂᖓᓂᒃ ᐱᔪᒪᓇᔭᓚᐅᖅᑕᖓᓂᒃ ᓄᓇᖃᖅᑳᖅᓯᒪᔪᑦ ᐊᑐᕐᓂᑯᖏᓐᓂ ᐱᕈᖅᐸᓪᓕᐊᑎᓪᓗᒍ. ᐴᕋᓐ ᐱᔪᒃᓯᑎᑕᐅᓚᐅᖅᑐᖅ ᐃᓕᓐᓂᐊᒃᑲᓐᓂᖃᑦᑕᒃᑲᓐᓂᖅᖢᓂ ᑕᐃᒪᐃᓕᐅᕈᓐᓇᖅᓯᓪᓗᓂᓗ ᑳᕈᑕᓐ ᓯᓚᑦᑐᖅᓴᕐᕕᒡᔪᐊᕐᒥ ᐃᓕᓐᓂᐊᓚᐅᖅᓯᒪᓪᓗᓂ ᓄᓇᖃᖅᑳᖅᓯᒪᔪᑦ ᐊᑐᐊᒐᖏᓐᓂᒃ ᐊᒻᒪ ᐊᒡᓚᕝᕕᓕᕆᓂᕐᒥᒃ. ᖁᕕᐊᒋᔭᖃᓚᐅᖅᑐᖅ ᐃᓕᓐᓂᐊᖅᖢᓂ ᓄᓇᖃᖅᑳᖅᓯᒪᔪᑦ ᐃᓕᓐᓂᐊᕐᕕᖕᒥᙶᖅᑐᓂᒃ ᐊᒻᒪ ᐱᕕᒃᓴᕆᑎᑕᐅᔪᓂᒃ ᑲᑎᙵᖃᑎᖃᕆᐊᖃᓚᐅᖅᑕᒥᓂᒃ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᒃ. 

ᑖᒃᑯᐊ ᐅᓪᓗᒥ ᐱᓕᕆᖃᑎᖃᖅᐸᒃᐳᖅ ᑲᓇᑕᓕᒫᒥ ᓄᓇᖃᖅᑳᖅᑐᓄᑦ ᐊᑭᑐᔪᓄᑦ ᑯᐊᐳᕇᓴᒋᔭᐅᔪᓂᒃ, ᐃᒪᓐᓇ ᖃᐅᔨᒪᔭᐅᓪᓗᓂ, ᓄᓇᕗᒻᒥ ᓯᓚᑦᑐᖅᓴᕐᕕᒃCA−ᖑᓂᕋᖅᑕᐅᒋᓪᓗᓂ, ᑖᓐᓇᓗ ᓄᓇᖃᖅᑳᖅᑐᓄᑦ ᑮᓇᐅᔭᓕᕆᓂᕐᒧᑦ ᐃᓂᒋᔭᐅᔪᓂᒃ ᐱᓕᕆᖃᑎᖃᖅᐸᒃᑐᓂᒃ ᓄᓇᖃᖅᑳᖅᑐᓄᑦ ᓇᖕᒥᓂᕆᔭᐅᔪᓄᑦ ᓇᖕᒥᓂᖃᖅᑎᐅᔪᓄᓪᓗ ᑲᓇᑕᓕᒫᒥ. ᐃᑲᔪᖅᐸᑉᐳᑦ ᓇᒻᒥᓂᖁᑎᖃᖅᑐᓂᒃ ᐱᒋᐊᖅᑎᑦᑎᓪᓗᑎᒃ ᐊᒻᒪ ᐱᕈᖅᐸᓪᓕᐊᑎᑦᑎᓪᓗᑎᒃ ᓇᒻᒥᓂᖁᑎᓂᒃ ᐊᑭᑐᔪᓄᑦ ᐊᒻᒪ ᑮᓇᐅᔭᓕᕆᓂᒃᑯᑦ. ᐴᕋᓐ ᐱᓕᕆᐊᖃᖅᐳᖅ ᐱᓕᕆᐊᒃᓴᓂᒃ ᐊᕐᓇᓄᑦ ᒪᒃᑯᒃᑐᓄᓪᓗ ᐃᑲᔪᕈᒪᓪᓗᒋᑦ ᐊᖏᒡᓕᒋᐊᖅᑎᑦᑎᔪᒪᓪᓗᑎᒃ ᐊᑐᕈᓐᓇᕐᓂᕐᒥᒃ ᑮᓇᐅᔭᓕᕆᓂᕐᒧᑦ ᐃᓚᐅᔪᓐᓇᕐᓂᐊᕐᒪᑕ ᓇᖕᒥᓂᖃᕐᓂᕐᒥᒃ ᓇᖕᒥᓂᕆᔭᐅᔪᓂᒡᓗ ᐱᕙᓪᓕᐊᑎᑦᑎᓂᕐᒧᑦ. 

ᑕᐃᑲᓂ ᐃᓕᓐᓂᐊᓯᒋᐊᓚᐅᖅᓯᒪᔪᖅ ᑳᕈᑕᓐ ᓯᓚᑦᑐᖅᓴᕐᕕᒡᔪᐊᖓᓂ. ᓯᕗᓪᓕᖅᐸᐅᓪᓗᓂ ᓴᖅᑭᔮᕐᕕᐅᓚᐅᖅᐳᖅ ᓄᓇᖃᖅᑳᖅᑐᓄᑦ ᓇᖕᒥᓂᕆᔭᐅᔪᒧᑦ ᓄᓇᒥ. "ᐊᑐᖅᓯᒪᔭᕋ ᐊᐅᔭᒃᑯᑦ ᓄᓇᕗᒻᒥ ᓯᓚᑦᑐᖅᓴᕐᕕᖕᒥ ᓇᖕᒥᓂᖃᕈᒪᑦᑎᐊᓚᐅᖅᑐᖓ, ᐃᓱᒪᓪᓗᖓᓗ ᓇᖕᒥᓂᖃᕐᓂᕐᒥᒃ ᓇᖕᒥᓂᖃᕐᓂᕐᒥᒃᓗ ᓄᓇᖃᖅᑳᖅᓯᒪᔪᑦ ᐃᓄᐃᑦ ᓇᖕᒥᓂᖅ ᐱᓇᔪᒃᐸᓪᓕᐊᓪᓗᑎᒃ ᐅᕙᑦᑎᓐᓄᑦ ᐃᓄᑑᓪᓗᑕ, ᑭᓯᐊᓂᑦᑕᐅᖅ ᐊᑕᐅᑦᑎᒃᑯᑦ ᓄᓇᓕᐅᓪᓗᑕ ᐊᒻᒪ ᓄᓇᓕᒡᔪᐊᖑᓪᓗᑕ," ᐃᖅᑲᐅᒪᔪᖅ. 

ᑕᐃᑲᙵᑦ, ᑲᔪᓯᓚᐅᖅᑐᖅ Master's−ᒧᑦ ᓄᓇᖃᖅᑳᖅᑐᓄᑦ ᐊᐅᓚᑦᑎᕝᕕᖃᕐᓂᕐᒧᑦ ᐱᓕᕆᐊᖑᕙᒃᑐᒧᑦ ᐅᕙᓂ, ᓯᓚᑦᑐᖅᓴᕐᕕᒡᔪᐊᒥ ᕕᒃᑐᐊᕆᐊᒥ, ᑕᐅᑐᒐᖃᓪᓗᐊᑕᖅᖢᓂ ᓇᖕᒥᓂᖃᕈᓐᓇᕐᓂᕐᒥᒃ ᑮᓇᐅᔭᓕᐅᕋᓱᖕᓂᕐᒧᓪᓗ ᐱᕙᓪᓕᐊᓂᕆᔭᐅᔪᒥᒃ ᑲᓇᑕᒥ ᐱᕈᖅᓴᐃᓂᕐᒧᑦ. ᐱᔭᕇᕋᒥ, NACA−ᑯᑦ ᐃᖅᑲᓇᐃᔭᖅᑎᑖᓚᐅᖅᑐᑦ ᐅᑎᖁᔨᓪᓗᓂ, ᐊᒻᒪᓗ ᖁᕕᐊᒋᓪᓗᓂᐅᒃ.  ᐊᖏᕐᕋᒥᓂᒃ ᐃᖅᑲᓇᐃᔭᓪᓗᐊᑕᖃᑦᑕᖅᑐᖅ, ᐴᕋᓐ ᐱᓕᕆᐊᖃᖅᑐᒻᒪᕆᐅᕙᑉᐳᖅ ᐱᓕᕆᐊᓂᒃ ᐊᐅᓚᑦᑎᓪᓗᓂ ᐊᒻᒪ ᐱᓕᕆᐊᓂᒃ ᐱᕙᓪᓕᐊᑎᑦᑎᓪᓗᓂ. 

ᐃᖅᑲᓇᐃᔮᖓᓂ, ᐅᓪᓗᖏᓐᓂ ᑲᑎᖃᑎᖃᖃᑦᑕᖅᑐᖅ ᑲᒪᒋᔭᐅᔪᓂᑦ ᐱᖃᖅᑎᐅᖃᑕᐅᔪᓂᓪᓗ ᐃᕐᖐᓐᓇᒃᑰᕈᑎᒃᑯᑦ ᑲᑎᒪᓂᒃᑯᓪᓗ, ᑭᓯᐊᓂ ᖁᕕᐊᒋᓂᖅᐹᖓ ᓴᓇᑐᓂᕐᒥᑦ ᐱᓕᕆᐊᓂᑦ ᐱᕙᓪᓕᐊᑎᑦᓯᓂᕐᒥᑦ. ᐃᑲᔪᖃᑦᑕᖅᑐᖅ ᐃᓚᒋᔭᐅᔪᓂᑦ ᑲᔪᓯᑎᑦᓯᓂᕐᒧᑦ ᐱᓕᕆᐊᑦᓴᓂᑦ ᑲᔪᓯᓂᖃᑦᓯᐊᖅᑐᒥᑦ, ᐊᐅᓚᑦᓯᓂᕐᒥᑦ ᐱᓕᕆᐊᓂᑦ ᐱᓕᕆᐊᓂᓪᓗ ᐊᓂᒍᖅᑕᐅᔪᓂᑦ ᐅᓂᒃᑳᖃᑦᑕᕐᓂᕐᒥᓪᓗ ᑮᓇᐅᔭᖃᖅᑎᑦᓯᔨᓄᑦ ᐱᕙᓪᓕᐊᓂᖏᓐᓂᑦ. 

ᐅᖃᐅᔾᔪᐃᓂᖓ ᒪᒃᑯᒃᑐᒧᑦ ᐱᔪᒪᔪᒧᑦ ᐱᓕᕆᐊᒃᓴᒧᑦ ᐊᐅᓚᑦᑎᓂᕐᒥᒃ ᐃᔨᖏᑦ ᒪᑐᐃᖓᐃᓐᓇᖁᓪᓗᒋᑦ ᐱᕕᒃᓴᓄᑦ. "ᐊᑑᑎᖃᑐᐃᓐᓇᕐᓗᑎᑦ ᖃᓄᑐᐃᓐᓇᖅ ᐱᕕᒃᓴᐅᔪᓂᑦ ᓴᖅᑭᑕᐅᔪᓂᑦ ᐃᓕᖕᓄᑦ ᐅᒃᑯᐃᒃᑲᓐᓂᕐᓂᐊᖅᐸᑦ," ᐅᖃᐅᔾᔨᔪᖅ. ᐴᕋᓐ ᐊᓂᒍᐃᑦᑎᐊᓚᐅᖅᐳᖅ ᕿᓂᖃᑦᑕᓚᐅᕐᓂᖓᓄᑦ ᐃᓕᓐᓂᐊᕈᑎᒃᓴᓂᒃ, ᐊᐃᑦᑑᑎᓂᒃ ᐊᒻᒪ ᖃᐅᔨᓴᖅᑎᓄᑦ ᐃᑲᔪᖅᑎᓂᒃ ᐃᖅᑲᓇᐃᔮᒃᓴᖏᓐᓂᒃ ᐃᖅᑲᓇᐃᔮᒧᑦ ᐱᔪᒥᓴᐅᑎᒥᓂᒃ ᖁᕝᕙᕆᐊᖅᑎᑦᑎᒃᑲᓐᓂᕈᒪᓪᓗᓂ. 

ᕕᒃᑑᕆᐊᒧᑦ ᓅᓚᐅᙱᑎᓪᓗᒍ, ᑐᓴᐅᒪᑎᑦᑎᑦᑎᐊᓚᐅᖅᐳᖅ ᓄᓇᖃᖅᑳᖅᓯᒪᔪᑦ ᓄᓇᖓᓂ ᐱᕕᒃᓴᖅᓯᐅᖅᖢᓂ ᑲᑐᔾᔨᖃᑎᒌᒡᓗᑎᒃ ᐃᓚᒋᔭᐅᓗᓂ ᐃᓕᓐᓂᐊᖅᑕᒥᓂᒃ ᐊᓂᒍᐃᓛᖅᑐᓄᑦ. ᑖᒃᑯᐊ ᑐᓴᖅᑎᑦᑎᔾᔪᑎᑦ ᐃᓂᖃᖅᑎᖦᖢᓂᒋᑦ ᐃᓚᐅᖃᑕᐅᓕᕐᖢᓂ ᐃᓚᖏᓐᓄᑦ ᑲᒪᓇᖅᑐᓄᑦ ᐱᓕᕆᐊᒃᓴᓄᑦ. ᑭᒃᑯᑐᐃᓐᓇᑦᑎᐊᑦ ᖃᐅᔨᒋᐊᖃᑦᑕᓚᐅᙱᑦᑐᑦ ᐱᕕᖃᕐᓂᕐᒥᒃ, ᑭᓯᐊᓂ ᐅᓄᖅᑐᑦ ᐊᓯᒥᓄᑦ ᑕᑯᔭᐅᖁᙱᖦᖢᓂᒋᑦ. "ᐃᓄᐃᑦ ᐃᑲᔪᕈᒪᔪᑦ ᐃᑲᔪᖅᑐᐃᔪᒪᓪᓗᑎᒡᓗ ᐃᓕᖕᓂᒃ ᑕᑯᓗᑎᓪᓗ ᑲᔪᓯᓂᖃᑦᑎᐊᕐᓂᕐᒥᒃ ᖃᓄᐃᓕᐅᕐᓂᕆᕙᒃᑕᕐᓂᒃ," ᖁᖓᑉᐸᒃᖢᓂ. 

ᓯᕗᓂᒃᓴᒥ, ᑲᔪᓯᓂᖃᑦᑎᐊᕈᒪᕗᖅ ᓅᓪᓗᓂ ᐊᐅᓚᑦᑎᓂᕐᒧᑦ ᐱᔭᒃᓴᕆᔭᒥᓄᑦ ᑲᑐᔾᔨᖃᑎᒌᓂ. ᓂᕆᐅᒋᔭᖓ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᓇᓂᓯᓗᑎᒃ ᖃᔅᓯᐅᓂᖏᓐᓂᒃ. "ᓂᕆᐅᒃᐳᖓ ᐱᕕᒃᓴᖃᑦᑎᐊᕋᓱᒋᓪᓗᒋᑦ, ᐊᒻᒪ ᐱᔪᓐᓇᕐᓗᑎᒃ ᑲᔪᓯᑦᑎᐊᕈᓐᓇᕐᓗᑎᒡᓗ," ᐅᖃᙳᐊᕐᓗᓂ. ᐃᑲᔪᕐᓂᐊᕐᓗᓂ ᑕᒪᓐᓇ ᑲᔪᓯᑎᓪᓗᒍ, ᒪᑐᐃᙶᖅᐳᖅ ᐅᖃᖃᑎᖃᕐᓂᐊᕐᓗᓂ ᒪᒃᑯᒃᑐᓂᒃ ᐃᖅᑲᓇᐃᔭᕈᒪᔪᓂᒃ ᓄᓇᖃᖅᑳᖅᑐᑦ ᓇᖕᒥᓂᖅ ᐃᖅᑲᓇᐃᔭᕐᕕᒋᔭᒥᓂ ᖃᐅᔨᒪᖁᓪᓗᒋᓪᓗ ᐹᖓ ᒪᑐᐃᙶᕐᓂᖓᓂᒃ. 

ᒪᒡᓈᓕᐊ ᐴᕋᓐ ᑕᑯᔪᒪᔪᖅ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᑦ ᐱᕈᖅᐸᓪᓕᐊᑎᓪᓗᒋᑦ ᓯᕗᓕᖅᓯᓗᑎᒃ ᑮᓇᐅᔭᓕᐅᕋᓱᐊᖅᑎᐅᙱᑦᑐᓄᑦ ᐃᓄᓕᕆᓂᕐᓄᓪᓗ ᐱᓕᕆᕝᕕᖕᓄᑦ, ᐊᒃᓱᕈᕐᖢᓂᓗ ᐱᓕᕆᔪᖅ ᐃᑲᔪᕐᖢᓂ ᓄᓇᓕᖕᓂ ᓴᖅᑭᑎᑦᑎᓗᓂ ᐊᖏᓂᖓᓂᒃ ᐱᓯᓂᓯᓕᕆᓂᒃᑯᑦ ᓇᖕᒥᓂᖃᕐᓂᕐᒥᒃᓗ. ᐃᓚᒥᓄᑦ ᑲᔪᓯᑦᑎᐊᖅᓯᒪᔪᓪᓗ, ᐃᑲᔪᖅᑐᖅ ᐊᖅᑯᑎᑦᑎᐊᕙᖕᒥᑦ ᓄᓇᖃᖅᑳᖅᓯᒪᔪᓂᑦ ᑲᔪᓯᑦᑎᐊᖁᓪᓗᒋᑦ ᓯᕗᓕᖅᑎᐅᓗᑎᒡᓗ ᐱᓕᕆᐊᖏᓐᓂᑦ ᖃᐅᑕᒫᑦ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.