ᐱᔪᓐᓇᕐᓂᖅᑖᖅᑎᑦᑎᓂᖅ ᐅᑭᐅᖅᑕᖅᑐᒥ ᓄᓇᖃᖅᑳᖅᓯᒪᔪᓂᒃ: ᒫᒡᒍᓚ ᑭᐊᓐᑯᐊᓇᔅ ᑲᓲᑎᑎᑦᑎᕗᖅ ᓄᓇᓕᖕᓂ ᑕᑎᒋᔭᒃᓴᐅᔪᒥᒃ ᐆᒻᒪᖅᑯᑎᒥᒃ
"ᐅᖃᐃᓐᓇᓲᖑᔪᖓ, ᓱᓕ ᖃᐅᔨᒪᙱᓐᓇᒪ ᖃᓄᐃᓕᐅᕐᓂᐊᕐᒪᖔᕐᒪ ᐱᕈᖅᓴᓕᕈᒪ, "ᐅᖃᖅᑐᖅ ᒫᒡᒍᓚ ᑭᐊᓐᑯᐊᓇᔅ. ᓄᐊᑦ ᑐᑦᑐᓕᒃ ᓚᐃᒃᒥ ᓄᓇᖃᖅᑳᖅᑐᒥᓂᐅᓪᓗᓂ ᑕᓐᑐ ᐸᐃᒥ ᐱᓕᕆᓂᖓᓄᑦ Watay Power Project-ᒥ. ᐃᖅᑲᓇᐃᔭᙱᒃᑳᖓᒥ, ᐱᖃᓐᓇᕆᔭᒥᓂᒃ ᐃᓚᒥᓂᒡᓗ ᐱᖃᑎᖃᓲᖅ, ᐱᓗᐊᖅᑐᒥᒃ ᐃᕐᖑᑕᒥᓂᒃ. ᑭᖑᓂᑦᑎᓐᓂ ᐃᖅᑲᓇᐃᔭᓚᐅᖅᓯᒪᔪᖅ ᓯᕗᓕᖅᑎᓄᑦ ᑐᑭᒧᐊᖅᑎᑦᑎᔨᒋᔭᐅᓪᓗᓂ ᐅᑯᓇᓂ, Shibogama First Nations Council ᐊᒻᒪᓗ ᐆᒻᒪᕆᖕᓂᖅ ᐊᖏᔪᒻᒪᕆᖕᒥᒃ ᐃᓱᒪᒋᔭᒃᓴᐅᓚᐅᖅᐳᖅ ᐱᓕᕆᑎᓪᓗᒍ. ᑲᑎᑎᑦᓯᓂᖅ ᓄᓇᓕᕐᔪᐊᓂᒃ ᐅᐊᔭᑯᑖᓄᑦ, ᐆᒻᒪᖅᑯᑎᖃᑦᓯᐊᕐᓂᖅ ᐅᑭᐅᖅᑕᖅᑐᒧᑦ ᐃᓚᒋᔭᐅᓚᐅᖅᑐᖅ ᐱᓕᕆᐊᑦᓴᖏᓐᓄᑦ ᐊᒻᒪᓗ ᑕᒪᓐᓇ ᐱᓕᕆᐊᕆᓯᒪᓕᖅᑕᖓ ᐊᕐᕌᒍᑲᓴᓐᓄᑦ 20-ᑲᓴᓐᓄᑦ.
ᑕᒪᓐᓇ ᐱᓕᕆᐊᖑᑎᓪᓗᒍ, 1800 ᑭᓚᒦᑕᓂᒃ ᑕᑭᓂᓕᖕᓂᒃ ᓴᓇᔭᐅᓯᒪᔪᖃᖅᓯᒪᕗᖅ ᓄᓇᕐᔪᐊᓄᑦ 13-ᓄᓪᓗ ᓄᓇᕐᔪᐊᓄᑦ ᐆᒻᒪᕆᒃᓯᑎᑕᐅᓯᒪᓕᖅᖢᑎᒃ. ᐱᓕᕆᐊᖅ ᐱᐊᓂᒃᑕᐅᓛᕈᒪᔪᖅ ᐊᐃᕆᓕ 2025−ᒥ ᐱᔭᕆᑐᓂᖅᓴᐅᓚᐅᖅᖢᓂᓗ ᓯᕗᓪᓕᕐᒥ ᐃᓱᒪᒋᔭᐅᓚᐅᖅᓯᒪᔪᒥᒃ. ᓯᕗᓪᓕᕐᒥ ᐃᓱᒪᓚᐅᕋᓗᐊᕐᒪᑕ ᐊᑦᑕᑕᖅᑎᑦᑎᑐᐃᓐᓇᕐᓂᐊᕋᓱᒋᓪᓗᑎᒃ ᒫᓐᓇ ᐆᒻᒪᖅᑯᑎᖃᐅᑎᒧᑦ ᑭᓯᐊᓂ ᐆᒻᒪᖅᑯᑎᑕᖃᑦᑎᐊᓚᐅᙱᒻᒪᑦ ᑭᒃᑯᓕᒫᑦ ᐊᑦᑕᑕᖅᑎᑦᑐᓐᓇᕐᓗᒋᑦ. ᐊᑲᐅᙱᓕᐅᕈᑎᖃᒃᑲᓐᓂᖅᑎᓪᓗᒋᑦ ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᒥᒃ ᐊᒻᒪ ᓇᐹᖅᑐᓂᒃ ᐃᑭᑦᑐᓂᒃ ᐊᒻᒪ ᐊᖏᓂᖅᓵᓗᖕᒥᒃ ᐱᓕᕆᓐᓇᒥ, ᐱᓕᕆᐊᖑᕐᔪᐊᕆᐊᖃᓚᐅᖅᐳᖅ. "ᐅᖃᐃᓐᓇᐅᔭᖅᑐᖓ, ᓄᓇᕐᔪᐊᖅᑕᖃᖅᐸᑦ, ᐊᑐᒐᒃᓴᖅᑕᖃᖅᑐᖅ, ᐱᓕᕇᓐᓇᖅᖢᑕᓗ ᖃᓄᐃᓕᐅᕆᐊᖃᖅᑕᑦᑎᓐᓂᒃ ᓯᕗᒻᒧᐊᒃᓗᑕᓗ. ᐱᓕᕆᖃᑎᒌᒍᒪᑐᐊᕈᑦᑕ, ᑎᑭᐅᑎᒍᓐᓇᖅᑐᒍᑦ ᐊᒥᓱᓂᑦ ᓄᓇᖃᖅᑳᖅᓯᒪᔪᓂᑦ ᐃᓄᓐᓂᑦ ᐊᖏᕐᕋᑎᓐᓂᑦ," ᑭᐊᓐᑯᐊᓇᔅ ᐹᒻᔅ.
ᑖᓐᓇ $1.9−ᐱᓕᐊᓐ ᐱᓕᕆᐊᒃᓴᖅ ᐃᓚᐅᑎᑦᑎᓯᒪᔪᖅ ᐊᒃᓱᕈᕐᖢᑎᒃ ᐱᓕᕆᓂᖏᓐᓂ ᐅᓄᖅᑐᑦ ᓄᓇᖃᖅᑳᖅᓯᒪᔪᑦ ᐃᓄᐃᑦ ᖁᔭᓕᔪᑦ ᓄᓇᖃᖅᑳᖅᓯᒪᔪᑦ ᐃᓚᐅᖃᑕᐅᓂᕐᒧᑦ ᒪᓕᒐᒃᓴᖏᓐᓂ ᑕᐃᑲᓂᓗ ᐸᕐᓇᐅᑎᑕᖃᕐᖢᓂ ᐋᖅᑭᒃᓯᒪᔪᒥᒃ ᐱᖁᓪᓗᒍ ᓄᓇᖃᖅᑳᖅᓯᒪᔪᑦ ᐃᓄᐃᑦ ᐃᓚᐅᖃᑕᐅᓗᑎᒃ. ᐃᓕᓐᓂᐊᕐᓂᕐᒧᑦ ᐸᕐᓇᐅᑎᑕᖃᓚᐅᖅᑐᖅ ᐊᒻᒪᓗ ᐅᐱᑲᐸᐃᓐ ᐱᔨᑦᑎᕈᑎᖏᑦ 55-ᓂᒃ ᐃᓕᓐᓂᐊᑎᑦᑎᓂᖃᓚᐅᖅᑐᑦ 600 ᐅᖓᑖᓂ ᐃᓄᐃᑦ ᐃᓕᓐᓂᐊᖅᑎᑕᐅᓪᓗᑎᒃ, ᐋᖅᑭᒃᓱᐃᒍᓐᓇᖅᑐᑎᒃ ᐊᓐᓄᕋᔾᔨᐅᖅᑎᓂᒃ, ᐱᓕᕆᓪᓗᑎᒃ ᓴᓕᒎᑎᑦᑎᐊᓂᕐᒥᒃ, ᐊᒻᒪᓗ ᐅᐊᔭᓕᖅᓱᐃᓂᕐᒥᒃ. ᑲᑐᔾᔨᖃᑎᒌᑦ ᓄᓇᓕᖕᓂ ᐃᓚᐅᑎᑦᑎᓚᐅᕐᒥᔪᑦ ᐊᒻᒪ ᐱᔪᓐᓇᕐᓂᖅᑖᖅᑎᑦᑎᕙᓪᓕᐊᓪᓗᑎᒃ. 25-ᓂᒃ ᐊᕐᕌᒍᓂᒃ, ᓄᓇᓕᕐᔪᐊᑦ ᑎᒍᓯᓂᐊᖅᑐᑦ ᐆᒻᒪᖅᑯᑎᓕᕆᓂᕐᒧᑦ ᑲᒻᐸᓂᒥᒃ.
ᑭᖑᓂᑦᑎᓐᓂ, ᐆᒻᒪᖅᑯᑎᑦ ᐊᑐᐃᓐᓇᕈᖅᑎᑕᐅᖃᑦᑕᓚᐅᖅᐳᑦ ᑕᑎᒋᔭᒃᓴᐅᙱᑦᑐᒃᑯᑦ ᐃᒐᓯᐅᑎᒨᖅᑐᑦ ᐊᐅᓚᐅᑎᑦ ᐊᓯᔾᔨᖅᑕᐅᒋᐊᖃᓚᐅᖅᑐᑦ. 40-ᓂᒃ ᐊᕐᕌᒍᓂᒃ ᐊᑭᖃᓚᐅᖅᑐᖅ $1.5 ᐱᓕᐊᓐ ᐅᖓᑖᓂ ᐊᒻᒪᓗ ᐆᒻᒪᖅᑯᑎᓄᑦ ᖃᓄᐃᓕᖓᓂᐅᔪᖅ ᓄᓇᓖᑦ ᐊᖏᓪᓕᒋᐊᕈᓐᓇᓚᐅᖏᑦᑐᑦ ᐅᕝᕙᓘᓐᓃᑦ ᐅᖃᐅᓯᖃᕈᓐᓇᓚᐅᖏᑦᑐᑦ ᐃᓪᓗᓕᕆᓂᕐᒥᒃ, ᐊᖏᔫᑎᓂᒃ ᐅᕝᕙᓘᓐᓃᑦ ᓄᓇᓕᓐᓂ ᐱᕙᓪᓕᐊᑎᑦᑎᓂᕐᒧᑦ ᐱᑕᖃᕆᐊᓕᓐᓂᒃ. ᑖᔅᓱᒧᖓ ᓄᑖᒧᑦ ᐱᓕᕆᐊᒧᑦ, 7-ᓂᒃ ᑮᓇᐅᔭᖃᖅᑎᑦᑎᔨᖃᖅᖢᑎᒃ ᑲᑎᖦᖢᒋᑦ ᐊᒥᓲᓚᐅᖅᐳᑦ ᐃᓄᐃᑦ ᑭᐳᒥ ᐊᒻᒪᓗ ᐱᔭᕆᐊᖃᒻᒪᕆᓚᐅᖅᑐᑦ ᑕᒪᓐᓇ ᐱᓕᕆᐊᖑᔪᖅ ᑲᔪᓰᓐᓇᕈᓐᓇᖁᓪᓗᒍ ᑭᖑᕚᒃᓴᑦᑎᓐᓄᑦ ᐊᒃᓱᕈᕐᓇᓗᐊᕐᓂᐊᖏᒻᒪᑦ. ᑖᓐᓇ ᐆᑦᑑᑎᐅᔪᖅ ᐃᓱᒪᒋᔭᐅᔭᕆᐊᖃᓚᐅᕆᕗᖅ ᐃᖅᑭᓖᑦ ᓇᒻᒥᓂᖃᕐᓂᕐᒥᑦ.
ᑐᓗᖅᑕᕈᑕᐅᓕᕋᒥ ᑲᑐᔾᔨᖃᑎᒌᒧᑦ, ᑭᐊᓐᑯᐊᓇᔅ ᓇᓂᓯᓪᓗᓂ ᐊᑐᐊᒐᓂᑦ ᓯᕗᓪᓕᐅᔾᔭᐅᔭᕆᐊᓕᖕᓂᓪᓗ ᒐᕙᒪᒃᑯᓐᓄᑦ ᐊᒃᑐᐊᓂᖃᕐᓂᖏᓐᓄᑦ ᓄᓇᖃᖅᑳᖅᓯᒪᔪᑦ ᓇᖕᒥᓂᖃᕐᓂᖏᓐᓄᑦ ᐱᔭᕆᐊᖃᖅᑐᓂᑦ ᐋᖅᑭᒃᓯᓂᕐᒧᑦ ᑐᙵᕕᖕᒥᑦ ᖁᕝᕙᕆᐊᖅᑎᑦᑎᓂᕐᒥᒡᓗ ᐋᖅᑭᒃᓯᓂᕐᒧᑦ ᐱᓕᕆᖃᑎᒌᖕᓂᕐᓂ ᐱᔭᕆᐊᓕᖕᓂᑦ ᓄᓇᖃᖅᑳᖅᓯᒪᔪᑦ ᐃᓚᐅᖃᑕᐅᓂᖏᓐᓂ ᐱᓕᕆᐊᒃᓴᕐᔪᐊᓄᑦ. ᓄᓇᕐᔪᐊᕐᒥ ᖃᓂᒻᒪᒍᑕᐅᕙᓪᓕᐊᔪᖅ ᐊᒃᓱᕈᕐᓇᒃᑲᓐᓂᓚᐅᖅᐳᖅ ᓄᖅᑲᖅᑎᑦᑎᓇᓱᒃᖢᓂ ᑭᓱᓕᒫᓂᒃ ᐱᔭᕆᐊᖃᖅᖢᑎᒡᓗ ᖃᓄᐃᙱᑦᑎᐊᕐᓂᕐᒧᑦ ᐊᑦᑕᕐᓇᖅᑕᐃᓕᒪᓂᕐᒧᓪᓗ ᐸᕐᓇᐅᑎᒥᒃ ᐃᖏᕐᕋᐃᓐᓇᖁᓪᓗᒍ.
ᐅᖃᐅᔾᔪᐃᓂᖓ ᓈᓚᒃᑏᑦ ᐃᓚᐅᔪᒪᔪᑦ ᐊᖏᔪᒥᒃ ᐱᓕᕆᐊᒃᓴᒥᑦ ᓲᕐᓗ ᐃᓕᓐᓂᐊᓕᕐᓗᑎᒃ ᖃᐅᔨᓇᓱᒡᓗᑎᒡᓗ ᐃᖅᑲᓇᐃᔮᖕᓂᑦ, ᐃᓅᓯᓕᒫᒧᑦ ᐊᑐᕐᓯᒪᔭᑦ. "ᖃᓄᑐᐃᓐᓇᖅ ᐅᑭᐅᖃᕋᓗᐊᕈᕕᑦ, ᐃᓕᓐᓂᐊᕐᓂᐊᖅᑐᑎᑦ ᐊᓯᖕᓂᑦ ᐃᓄᖕᓂᑦ. ᐃᓕᓐᓂᐊᕆᐊᖃᕋᕕᑦ," ᐅᖃᐅᔾᔨᔪᖅ, ᐊᑐᓕᖁᔨᓂᕐᒥᑦ ᐃᓕᓐᓂᐊᕐᓂᕐᒥᑦ ᖃᓪᓗᓈᖑᖃᑎᒌᓂᑦ ᐃᓕᓐᓂᐊᕐᓂᕐᒧᑦ ᐊᑐᖅᑕᐅᖃᑦᑕᖅᑐᓂᑦ ᐃᑲᔫᑎᖃᕐᓂᕐᒧᑦ ᓄᓇᖃᖅᑳᖅᓯᒪᔪᑦ ᓄᓇᓕᖏᓐᓂᑦ. ᐊᑕᐅᑦᑎᒃᑯᓪᓗ, ᐅᖃᖅᖢᓂ ᓄᓇᖃᖅᑳᖅᓯᒪᔪᑎᒍᑦ ᑐᑭᓯᐅᒪᓂᖅᐳᑦ ᑭᒃᑰᓂᑦᑎᓐᓂᒃ ᓄᓇᖃᖅᑳᖅᓯᒪᓂᑦᑎᓐᓂ, ᐅᖃᐅᓯᑦᑎᓐᓂ, ᐃᓕᖅᑯᓯᑦᑎᓐᓂ, ᐃᓅᓯᑦᑎᓐᓂ, ᓲᖃᐃᒻᒪ ᑕᒪᓐᓇ ᑐᙵᕕᒋᒐᑦᑎᒍᑦ ᑭᓇᐅᓂᑦᑎᓐᓂ. ᑕᒪᓐᓇ ᐊᓯᔾᔨᔾᔮᖏᑕᕗᑦ. ᑖᒃᑯᐊᒃ ᒪᕐᕉᒃ ᑲᑎᑉᐸᒃᑭᒃ, ᐊᔭᐅᖅᑐᐃᓕᖅᐳᑎᑦ, ᑕᐃᒪᓐᓇᓗ ᐊᓯᔾᔩᔭᕆᐊᖃᖅᖢᑎᑦ."
"ᐃᓕᑦᑎᔪᓐᓇᖅᑐᑎᑦ ᐃᓐᓇᕐᓂᑦ, ᐃᓕᑦᑎᔪᓐᓇᖅᑐᑎᑦ ᐊᖓᔪᖅᑳᕐᓂᑦ, ᐃᓕᑦᑎᔪᓐᓇᖅᑐᑎᑦ ᓯᕗᓕᖅᑎᓂᑦ. ᐊᕙᓗᓯᒪᓗᑎᑦ ᐃᓄᖕᓂᑦ ᐃᓕᕝᕕᒋᔪᓐᓇᖅᑕᕐᓂᑦ ᐊᒻᒪᓗ ᐃᓕᖕᓂᒃ ᐃᓕᓐᓂᐊᕐᓗᑎᑦ, ᐊᒻᒪᓗ ᐃᓅᖃᑎᓪᓗᐊᑕᕐᓄᐊᕐᓗᑎᑦ ᐱᓕᕆᔨᒻᒪᕆᙳᕐᓂᕐᒧᑦ, ᓲᖃᐃᒻᒪ ᐊᒥᓱᓂᒃ ᐱᓕᕆᔨᒻᒪᕆᖃᕆᐊᖃᕋᑦᑕ ᐅᓪᓗᒥ, ᐊᒥᒐᖅᓯᑎᓪᓗᑕ ᐱᓕᕆᔨᒻᒪᕆᖕᓂᒃ ᓄᓇᑦᑎᓐᓂ, ᐊᒻᒪᓗ ᑕᒪᓐᓇ ᐱᕈᖅᑎᒃᑲᓐᓂᕆᐊᖃᖅᑕᕗᑦ, ᐱᓗᐊᖅᑐᒥᒃ ᐊᖏᔪᒥᒃ ᐱᖁᑎᕐᔪᐊᓂᒃ ᐋᖅᑭᒃᓯᔪᒪᒍᑦᑕ, ᐆᒻᒪᖅᑯᑎᓕᕆᔨᒃᑯᑦ, ᐅᕝᕙᓘᓐᓃᑦ ᐊᓯᖏᑦ ᐊᖏᔪᑦ ᐱᓕᕆᐊᑦ ᑕᐃᒪᐃᑦᑐᑦ, ᐃᑲᔪᖅᑕᐅᔭᕆᐊᖃᖅᐳᒍᑦ," ᑲᔪᓰᓐᓇᖅᐳᖅ.
ᐃᓱᒪᒋᓪᓗᒍ ᓇᖕᒥᓂᖅ ᐃᓕᓐᓂᐊᖅᑕᖓ, ᑭᐊᓐᑯᐊᓇᔅ ᐊᕐᓇᓕᒫᓄᑦ ᐊᖓᔪᒃᖡᑦ ᐃᓕᓐᓂᐊᕐᕕᖓᓄᐊᓚᐅᖅᐳᖅ, ᐃᓚᒥᓂᒃ ᐱᕈᖅᓴᐃᓪᓗᓂ ᐊᒻᒪ ᐱᓕᕆᓪᓗᓂ ᐊᕐᕌᒍᓄᑦ 20-ᓄᑦ ᐊᔪᖅᓯᐅᖅᑲᓕᓚᐅᙱᓐᓂᕐᒥᓂᒃ. ᖃᐅᔨᓚᐅᖅᑐᖅ ᐃᓕᓐᓂᐊᕆᐊᖃᕐᓂᕐᒥᓂᒃ ᑲᔪᓯᓂᐊᕐᓗᓂ ᐃᓕᓐᓂᐊᕆᐊᒃᑲᓐᓂᕐᓂᐊᕐᒪᑦ ᐃᓕᓐᓂᐊᕐᓗᓂ, ᖁᕕᐊᒋᓪᓚᕆᓚᐅᖅᑕᖓ. ᐅᑎᒃᑲᓐᓂᕈᒪᔪᖅ ᑭᖑᓂᐊᒍᑦ ᐃᓅᓯᖓᓂ ᐅᒃᐱᕈᓱᒃᖢᓂᓗ ᑭᖑᕙᓗᐊᔾᔮᕋᓱᒋᙱᖦᖢᒍ ᑭᓯᐊᓂ ᑎᓕᐅᕆᔪᖅ ᐃᓄᖕᓂᒃ ᐃᓕᓐᓂᐊᕆᐊᖃᑦᑕᖁᔨᓪᓗᑎᒃ ᒪᒃᑯᒃᑎᓪᓗᒋᑦ ᐊᔪᙱᑉᐸᑕ.
ᐆᒻᒪᖅᑯᑎᓕᕆᓂᕐᒧᑦ ᐱᓕᕆᐊᖅ ᑲᑕᓚᐅᕐᒪᑦ, ᐱᒻᒪᕆᐅᒐᓗᐊᖅᑎᓪᓗᒍ ᐊᒻᒪᓗ ᓯᕗᓪᓕᐅᔾᔭᐅᓯᒪᒻᒪᕆᑦᑐᓂ. ᐱᓕᕆᐊᖅ ᐱᐊᓂᒃᑕᐅᒃᐸᑦ, ᑭᐊᓐᑯᐊᓇᔅ ᓂᕆᐅᒃᐳᖅ ᐱᓕᕇᓐᓇᕐᓂᐊᕐᓂᖓᓂᒃ, ᐃᒡᓗᖓ ᓴᓗᒪᑎᓪᓗᒍ ᐊᒻᒪ ᐃᕐᖑᑕᖏᑦ ᖁᕕᐊᒋᓗᒋᑦ, ᒪᓕᒡᓗᒍ ᖃᓄᖅ ᓯᕗᓕᖅᑎᐅᔪᒪᖕᒪᖔᑦ.
ᓄᖅᑲᐅᓯᕐᓗᖓ, ᑭᐊᓐᑯᐊᓇᔅ ᐅᖃᖅᑐᖅ, "ᐅᖃᐅᔾᔨᒍᒪᔪᖓ ᒪᒃᑯᑦᑐᖁᑎᑦᑎᓐᓂᒃ ᑕᐅᑐᒐᖃᓕᕆᐊᖃᕐᓂᖏᓐᓂᒃ. ᑕᑯᔭᕆᐊᖃᕐᓂᐊᖅᑐᒍᑦ 20, 40, 50-ᓂᒃ ᐊᕐᕌᒍᓂᒃ ᓯᕗᓂᑦᑎᓐᓂ. ᐃᓛᓐᓂᒃᑯᑦ ᐊᕙᑎᑦᑎᓐᓃᑦᑐᑦ, ᐊᓂᔪᓐᓇᖅᑑᔮᖅᐸᙱᒻᒪᑕ ᑕᑯᓐᓇᑐᐃᓐᓇᕈᕕᑦ ᐊᕙᑎᑦᑎᓐᓃᑦᑐᓂᒃ, ᑭᓯᐊᓂ ᐃᓱᒪᑦᑎᐊᓕᕈᕕᑦ, ᐊᒻᒪ ᐃᓱᒪᕙᓪᓕᐊᓕᕐᓗᓯ, ᐊᒻᒪ ᐄ, ᐃᓚᖏᑦ ᓱᓕ ᕿᑐᕐᖓᖃᙱᑐᐃᓐᓇᕆᐊᖃᖅᑐᓯ, ᐊᒻᒪ ᐃᓚᖏᑦ ᐊᓈᓇᑦᑎᐊᒃᑯᙳᓛᖅᑐᑎᒃ ᓯᕗᓂᔅᓴᖅᑎᓐᓂᑦ, ᐊᓈᓇᑦᑎᐊᒃᑯᒋᔭᐅᓗᓯ. ᑕᐃᒪᓐᓇ ᑕᕝᕙ ᑕᐅᑐᖅᑰᖅᑕᕗᑦ ᐱᒋᐊᕆᐊᖃᖅᑕᕗᑦ, ᐃᑲᔪᕐᓗᑎᓪᓗ ᓇᓗᓇᐃᖅᓯᓂᕐᒥᒃ ᑭᓱᒥᒃ ᕿᒪᒃᓯᔪᒪᖕᒪᖔᖅᐱᑦ ᕿᑐᕐᖓᕐᓄᑦ ᐃᓄᖕᓄᓪᓗ, ᐱᒃᑯᒋᓗᒋᓪᓗ ᑭᓇᐅᖕᒪᖔᖅᐱᑦ. ᐅᖃᐅᓯᕐᓂᒃ ᐅᐱᒋᓗᒍ. ᐱᒃᑯᒋᓗᒋᑦ ᓄᓇᖃᖅᑳᖅᓯᒪᔪᑦ ᖃᓄᐃᓕᐅᖃᑦᑕᖅᓯᒪᓂᖏᑦ, ᐱᒃᑯᒋᓗᒋᑦ ᐃᓕᖅᑯᓯᑐᖃᕐᓄᑦ ᐊᑐᖅᐸᒃᑕᑎᑦ. ᖃᐅᔨᒋᐊᕆᑦ ᓱᓇᐅᒻᒪᖔᖅ ᐃᓕᓪᓗᒍᓗ. ᑕᒪᓐᓇ ᓴᙱᓂᕆᔭᐅᔪᖅ ᓄᓇᖃᖅᑳᖅᓯᒪᓂᕐᓄᑦ ᐃᓅᓪᓗᑎᑦ, ᓄᓇᖃᖅᑳᖅᓯᒪᙱᒃᑯᕕᓪᓗ, ᐃᓕᑦᑎᓗᑎᑦ ᐃᓄᖁᑎᑦᑎᓐᓂᒃ. ᐃᓕᑉᐸᒡᓗᒋᑦ ᐃᓄᖁᑎᕗᑦ ᒥᒃᓵᓄᑦ. ᐃᓄᑦᑎᐊᕙᐅᒐᑦᑕ. ᐃᓄᖕᓂᒃ ᖁᕕᐊᓱᒃᑎᑦᑎᔪᒍᑦ."
ᖃᐅᔨᒪᙱᑐᐃᓐᓇᕆᐊᓕᒃ ᖃᓄᐃᓕᐅᕈᒪᖕᒪᖔᑦ "ᐱᕈᖅᐸᓪᓕᐊᑎᓪᓗᒍ", ᑭᓯᐊᓂ ᒫᒡᒍᓚ ᑭᐊᓐᑯᐊᓇᔅ ᐊᓯᔾᔩᓯᒪᕐᔪᐊᖅᐳᖅ ᐅᑭᐅᖅᑕᖅᑐᒥ ᐋᓐᑎᐅᕆᐅᑉ ᐅᐊᖕᓇᖓᓂ ᓄᓇᓕᖕᓂ ᐊᒻᒪ ᐊᑦᑕᑕᖅᑎᖦᖢᒋᑦ ᑕᑎᒋᔭᒃᓴᐅᔪᓄᑦ ᐆᒻᒪᖅᑯᑎᓄᑦ. ᐊᕐᕌᒍᓄᑦ ᐊᒥᓱᓄᑦ ᐱᓕᕆᐊᖃᖅᓯᒪᓕᖅᑐᖅ ᐆᒻᒪᖅᑯᑎᓂᑦ ᓄᓇᖃᖅᑳᖅᓯᒪᔪᓄᑦ ᓄᓇᓕᓐᓂᑦ ᐊᒻᒪ ᓯᕗᓕᖅᑎᐅᓪᓗᓂ ᑲᔪᓯᓂᖃᑦᑎᐊᖅᑐᒥᑦ ᐱᓕᕆᐊᒥᑦ ᑕᒪᓐᓇ ᑲᔪᓯᖁᓪᓗᒍ. ᓄᓇᓖᑦ ᐱᔪᓐᓇᕐᓂᖅᑖᖅᑎᓪᓗᒋᑦ ᐃᒻᒥᓂᒃ ᐊᔪᖅᓯᐅᖅᑲᓕᕋᓗᐊᖅᑎᓪᓗᒋᑦ, ᐱᕈᖅᐸᓪᓕᐊᑐᐃᓐᓇᖅᐳᖅ ᓴᖅᑭᑦᑎᓪᓗᓂᓗ ᓄᑖᓂᒃ ᐱᕕᒃᓴᓂᒃ ᐊᒥᓱᓄᑦ ᓄᓇᖃᖅᑳᖅᓯᒪᔪᓄᑦ ᐃᓄᖕᓄᑦ.
ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.
