"ᐱᔾᔪᑎᒋᔭᕗᑦ ᓇᓗᓇᐃᖅᐸᕗᑦ ᐃᓚᕗᑦ ᑭᒃᑰᖕᒪᖔᑦ ᓲᖃᐃᒻᒪ ᕿᓂᕈᒪᒐᑦᑕ ᐊᒃᑐᐊᓂᕆᔭᐅᔪᓂᒃ. ᐃᓚᒋᕕᑎᒍᑦ? ᖃᓄᖅ ᐃᓚᒋᕕᑕ? ᐃᓚᖓᑦᑕᐅᖅ ᑭᓇᐅᓂᕐᓂᒃ ᖃᐅᔨᑎᑦᑎᓐᓇᐅᔭᕐᓂᖅ ᓇᑭᙶᕐᒪᖔᓪᓗ ᑕᐃᒪᓐᓇ ᐅᖃᐅᓯᒃᑯᑦ ᐱᖅᑯᓯᕗᑦ ᐆᒪᑏᓐᓇᓲᕆᕙᕗᑦ," ᓇᐃᐆᒥ ᓂᑯᓪᓴᓐ ᓇᓗᓇᐃᖅᓯᓪᓗᓂ. ᓇᖕᒥᓂᖅ−ᐅᖃᐅᓯᓕᒃ ᐅᑮᓐ (ᐅᑯᕋᐃᓐ ᐊᒻᒪ ᓄᓇᖃᖅᑳᖅᓯᒪᔪᑦ) ᐊᕐᓇᖅ, ᐃᓅᓚᐅᖅᓯᒪᔪᖅ ᐊᓲᓴᑦ ᓄᓇᖃᖅᑳᖅᓯᒪᔪᓄᑦ, ᑲᑎᑎᑕᐅᓯᒪᓪᓗᓂ ᑎᓴᕼᐊᑦ ᓄᓇᖃᖅᑳᖅᓯᒪᔪᓄᑦ. ᑲᓕᐸᓚᓱᒃᑎᐅᔪᖅ ᐊᒃᓱᕉᑎᖃᖃᑦᑕᖅᓯᒪᓪᓗᓂ ᐊᒻᒪ ᓇᖕᒥᓂᖃᕐᓂᕐᒥᒃ ᖁᕕᐊᒋᔭᒥᓂᒃ ᓴᓇᓯᒪᓪᓗᓂ. 

"ᐊᒃᓱᕈᕐᓇᖅᑐᑦ ᐃᓅᓯᐅᑉ ᐃᓚᒋᖕᒪᒍ. ᐃᓱᒪᕗᖓᓕ ᓇᒥᑭᐊᖅ, ᐃᓱᒪᕗᒍᑦ ᑭᓱᓕᒫᑦ ᐱᐅᓂᐊᕐᒪᑕ ᐊᒻᒪᓗ ᐱᕈᖅᓯᒪᓗᑎᑦ ᐊᒻᒪᓗ ᐊᔅᓱᕈᓐᓇᑐᒃᑰᔾᔮᓇᑕ. ᑕᒪᓐᓇ ᐅᑉᐱᕆᔭᖃᕐᓂᖅ ᐅᖃᐅᓯᕆᔪᒪᒐᒃᑯ ᐊᓯᔾᔨᕆᐊᖃᕐᓂᑎᓐᓂᒃ."

"ᐱᕈᖅᓴᐃᓂᖅ ᓴᓂᕐᕙᒃᑕᐅᓯᒪᔪᒥ, ᐃᓕᑦᑎᓚᐅᖅᑐᖓ ᖃᓄᖅ ᓂᐸᐃᑦᑐᓐᓇᕐᓂᕐᒥᒃ. ᐃᓕᓚᐅᖅᑐᖓ ᖃᓄᖅ ᐃᒻᒥᓂᒃ ᓴᖅᑭᔮᖅᑎᑦᑎᓗᐊᕈᒪᓇᖓ ᓂᕈᐊᖅᑕᐅᖃᑦᑕᓚᐅᕋᑦᑕ. ᓵᓚᒋᖃᑦᑕᓚᐅᖅᓯᒪᔭᕋ," ᐃᖅᑲᐅᒪᔪᖅ, ᐅᖃᐅᓯᖃᖅᖢᓂ ᐃᓚᐃᓐᓇᖅᓯᐅᕐᓂᕐᒥᒃ ᓵᑦᑎᐊᕐᒥᐅᑕᕆᖃᑦᑕᓚᐅᖅᑕᖓᓂᒃ ᓄᓇᖃᖅᑳᖅᓯᒪᔫᓪᓗᓂ ᓇᑉᐸᖓᓂᒡᓗ ᖃᐅᓪᓗᖅᑕᒥᒃ. 

"ᐱᓪᓚᕆᐅᖅᑰᔨᔪᖅ ᐊᖏᔫᓪᓗᓂᓗ ᑕᐃᑲᓂ, ᑭᓯᐊᓂ ᐊᓂᒍᕐᓂᐊᖅᑐᖅ."

ᐊᐃᑉᐸᖃᕈᒪᓂᖏᑦ ᐊᓈᓇᖓᑕ ᐊᔪᕐᓇᓚᐅᖅᑐᖅ ᓂᑯᓪᓴᓐᒧᑦ ᐊᓈᓇᖓᓗ ᕿᒪᒃᖢᓂᐅᒃ ᓄᓕᐊᕐᓗᖕᓂᒃᑯᑦ ᐱᕋᔭᒃᓯᒪᔪᖅ ᐊᖏᕐᕋᒥᓗ ᐋᓐᓂᖅᑎᕆᔨᒧᑦ. ᐊᓈᓇᖓᑕ ᐃᒥᐊᓗᓗᐊᖃᑦᑕᕐᓂᖓ ᐊᒃᑐᐃᓂᖃᓚᐅᕐᒥᔪᖅ. "ᐊᑖᑕᒐ ᐱᕈᖅᓴᐃᓚᐅᖅᑐᖅ ᐱᖓᓱᓂᒃ ᐊᒃᓱᕈᕐᓇᖅᑐᒃᑰᖅᑐᓂᒃ ᓄᑕᖅᑲᓂᒃ," ᓂᑯᓪᓴᓐ ᐅᓂᒃᑳᒃᑲᓐᓂᕐᖢᓂ.

ᐊᑭᓕᖅᑕᐅᖁᓪᓗᒍ, ᓂᑯᓪᓴᓐ ᐊᑖᑕᖓ ᓄᑕᖅᑲᓂᒃ ᐱᙳᐊᖅᑎᑦᑎᓚᐅᖅᐳᖅ, ᐃᓕᑦᑎᓪᓗᑎᒃ ᐱᓕᕆᖃᑎᒌᖕᓂᕐᒥᒃ, ᐃᒃᐱᒋᔭᒥᒍᑦ ᓇᖕᒥᓂᖅ ᒪᓕᒐᓕᐅᕐᓂᕐᒥᒃ ᑲᒪᒋᔭᖃᕐᓂᕐᒥᒡᓗ ᐊᐃᑦᑖᕈᓱᖕᓂᕐᒥᒃ.  "ᐱᐅᔪᒥᑦ ᐊᑦᑐᐃᓂᖃᓚᐅᖅᑐᒍᑦ ᐱᙳᐊᕐᓂᕐᒧᑦ. ᐱᒃᑯᒋᑦᑎᐊᕋᔭᖅᑕᕋ ᐊᑲᐅᙱᓕᐅᕈᑎᖃᐃᓐᓇᕐᓗᖓ, ᐃᓕᓐᓂᐊᕐᓗᖓ ᐃᖅᑲᓇᐃᔭᑦᑎᐊᕐᓂᕐᒥᑦ ᐱᔪᒪᓂᖃᑦᑎᐊᕐᓂᕐᒥᒡᓗ ᖃᓄᕐᓗ ᐱᓕᕆᖃᑎᒌᒋᐊᖃᕐᒪᖔᑦ," ᑕᑯᒃᓴᐅᑎᖦᖢᓂᐅᒃ. ᓂᕈᐊᕋᐃᒻᒪᑕ ᐱᙳᐊᕐᓂᕐᒥᒃ ᑲᔪᓯᒋᐊᖃᓚᐅᖅᑐᑦ, ᖁᕕᐊᒋᖏᒃᑲᓗᐊᕈᓂᐅᒃ. 

"ᓯᕿᓐᓂᐃᓐᓇᐅᔭᕐᓂᐊᖅᑐᖅ. ᒪᖁᖃᕆᐊᖃᖅᑐᒍᑦ ᐊᒻᒪᓗ ᓯᕿᓐᓂᕆᐊᖃᕆᓪᓗᑕ."

ᓅᖦᖢᑎᒃ ᓴᓂᕐᕙᒃᑕᐅᒪᔪᒥᒃ ᐊᒻᒪ ᓂᑯᓪᓴᓐ ᓇᑲᑕᐅᖅᑰᔨᓪᓗᓂ ᐊᕼᐊᐅᓴᑦ ᓄᓇᖓᓂ. ᐱᙳᐊᕐᓂᒃᑯᑦ, ᐃᒃᐱᒍᓱᓚᐅᖅᑐᖅ ᐊᒃᑐᐊᓂᖃᕐᓂᕐᒥᒃ ᐱᓕᕆᐊᖃᕐᓂᕐᒥᒃ ᐊᑕᐅᓯᕐᒧᑦ ᑐᕌᒐᒧᑦ. ᐱᓐᖑᐊᕈᓯᖓ ᕼᐋᑭᕐᓂᖅᐸᖑᓚᐅᖅᐳᖅ. ᓯᕗᓪᓕᖅᐸᐅᔪᖅ ᐊᕐᓇᖅ ᕼᐋᑭᖅᑎᐅᔪᖅ ᐳᐊᑦ ᐋᓪᐳᓂᒥ, ᑭᖑᓪᓕᕐᒥ ᓂᕈᐊᖅᑕᐅᓚᐅᖅᑐᖅ ᐱᒃᑲᐅᓛᖑᓪᓗᓂ ᐳᕆᑎᔅ ᑲᓚᒻᐱᐊᒥ, ᖃᐅᔨᓴᖅᑎᖃᓚᐅᖅᑐᖅ ᐅᑭᐅᒃᑯᑦ ᐱᙳᐊᕕᒡᔪᐊᖅᑎᓪᓗᒋᑦ. 

ᐱᙳᐊᕈᓐᓇᑦᑎᐊᖅᑎᓪᓗᒍ, ᐊᒃᓱᕈᖃᑦᑕᓚᐅᖅᐳᖅ ᐃᓕᓐᓂᐊᕐᕕᖕᒥ ᓈᓴᐅᓯᕆᓂᕐᒥᒃ ᐊᒻᒪ ᑕᐃᒪᐃᓐᓂᖓᓄᑦ ᐊᓂᒍᐃᓚᐅᖅᓯᒪᙱᖦᖢᓂ. ᐃᓕᓴᐃᔨᒥᑦ, ᑕᐃᔭᐅᓚᐅᖅᑐᖅ "ᐃᖅᑭᓖᑦ", ᐃᒻᒥᓂᒃ ᐅᒃᐱᕆᓚᐅᖅᑐᖅ ᑲᑎᖦᖢᓂᔾᔪᒃ ᔮᓐ ᒍᕇᓐ, ᐊᔾᔨᐅᙱᑦᑐᖅ ᐃᓕᓴᐃᔨ. ᔮᓐ ᑎᓕᐅᕆᓚᐅᖅᐳᖅ ᐃᓕᓐᓂᐊᕐᕕᖕᒧᑦ ᐅᑎᖁᓪᓗᓂᐅᒃ ᐅᖃᐅᑎᓪᓗᓂᐅᒡᓗ ᓴᙱᔫᓂᖓᓂᒃ, ᐊᕐᓇᑦᑎᐊᕙᐅᓂᖓᓂᒃ.  

"ᑕᒪᕐᒥᑦᑎᐊᖅ ᑖᓐᓇ ᐃᓕᓐᓂᐊᕐᓂᖅ ᐋᖅᑭᒃᓱᐃᕙᓪᓕᐊᕗᖅ ᐊᑐᖅᑕᐅᕙᓪᓕᐊᔪᓂᒃ ᖃᐅᔨᒪᙱᖦᖢᑎᓪᓗ ᖃᖓ ᐱᔭᕆᐊᖃᕐᓂᐊᕐᒪᖔᑦ ᐃᓅᓯᕐᓂ." 

ᓈᓴᐅᓯᕆᔪᓐᓇᖅᓯᑕᐃᓐᓇᓚᐅᖅᑐᖅ ᐃᓕᓐᓂᐊᖏᓐᓇᖅᖢᓂᓗ, ᐱᓪᓗᓂ ᐱᙳᐊᖅᑐᓕᕆᓂᕐᒥᒃ ᐱᙳᐊᖅᑐᓕᕆᓂᕐᒥᒡᓗ ᐊᐅᓚᑦᑎᓂᕐᒥᒃ ᐱᔭᕇᕈᓯᐊᕐᒥᒃ ᐊᒻᒪ ᐱᔭᕇᖅᓯᔾᔪᓯᐊᖅ ᓯᕗᓪᓕᖅ ᐳᓚᕋᖅᑐᓕᕆᓂᕐᒧᑦ ᐊᐅᓚᑦᑎᓂᕐᒧᑦ ᕚᓐᑰᕙᒥ ᓯᓚᑦᑐᖅᓴᕐᕕᒡᔪᐊᕐᒥ. ᓂᑯᓪᓴᓐ ᐊᑐᕐᖢᓂ ᐃᓕᑕᒥᓂᒃ ᐱᒋᐊᕐᖢᓂ ᓇᖕᒥᓂᖅ ᖃᓄᐃᙱᑦᑎᐊᕐᑐᓕᕆᓂᕐᒧᑦ ᐅᐸᒐᖓᓂ ᐊᐅᓚᖦᖢᓂ ᐊᕐᕌᒍᓄᑦ ᖁᓕᓄᑦ. ᐱᑎᑦᑎᕙᒃᐳᖅ ᐊᑕᖐᔪᒥᒃ ᐋᓐᓂᐊᖃᕐᓇᙱᑦᑐᓕᕆᓂᕐᒧᑦ ᐅᖃᐅᔾᔪᐃᓂᕐᒥᒃ, ᐃᓕᓴᐃᕙᒃᖢᓂ ᐱᓕᕆᖃᑎᒌᖕᓂᕐᓂᒃ, ᐱᓕᕆᐊᖃᖅᐸᒃᖢᓂᓗ ᐃᓱᒪᑦᑎᐊᕐᓇᕐᓂᕐᒥᒃ. ᐱᒋᐊᕐᖢᓂ ᐊᖏᒃᓕᒋᐊᕐᖢᓂᓗ ᐃᒡᓕᕐᒥ ᐅᓪᓛᕈᒻᒥᓴᖃᑎᖃᕐᖢᓂᓗ ᐅᐃᒥᓂᒃ.

"ᓴᙱᓂᖃᖅᑐᒍᑦ ᓯᕗᓕᕕᓂᑦᑎᓐᓄᑦ ᐊᒻᒪ ᐊᑦᑕᑦᑎᓐᓄᑦ ᐃᑲᔪᖅᑐᐃᓂᐊᖅᑐᑦ ᐅᕙᑦᑎᓐᓂᒃ ᐅᖃᕐᓗᑎᒃ, 'ᓴᙱᔪᒥᒃ ᓄᓇᖃᖅᑳᖅᓯᒪᒐᕕᑦ'."

ᓇᒻᒥᓂᖅ ᐃᓅᓯᕐᒥᓂᒃ ᑎᒍᓯᑲᓴᓚᐅᖅᑎᓪᓗᒍ, ᐅᕕᓂᖃᑎᒋᙱᑕᒥᓂᒃ ᐊᑭᕋᖅᑐᓕᓚᐅᖅᑐᖅ ᐋᓐᓂᐊᕕᒻᒥ. ᐅᖃᐅᓯᖃᓚᐅᖅᐳᖅ ᖃᓄᖅ ᐊᔪᕐᓇᕐᓂᖅᓵᓘᓂᖓᓂᒃ ᐃᓅᓂᖅ ᓄᓇᖃᖅᑳᖅᓯᒪᔫᓪᓗᓂ ᐃᓅᓪᓗᓂ ᑭᓯᐊᓂᑦᑕᐅᖅ ᓴᐱᓕᖅᓴᕋᐃᙱᓐᓂᕐᒥᒃ ᓴᖅᑭᑉᐸᒃᑭᓪᓗᓂ. ᓯᓚᑦᑐᖅᓴᕐᕕᔾᔪᐊᓕᐊᓚᐅᖅᑐᖅ ᑮᓇᐅᔭᓕᐅᕆᐊᖅᑐᖅᖢᓂ ᕿᒪᐃᔪᒪᓪᓗᓂ ᑐᖁᓐᓇᖅᑐᒥᒃ ᐃᓅᖃᑎᖃᕐᓂᕐᒥᒃ ᐋᖓᔮᕐᓇᖅᑐᓄᑦ ᐅᐃᕆᓯᒪᔪᒥᒃ ᓄᓇᖃᖅᑳᖅᓯᒪᔪᒥ ᐊᖑᑎᒥᒃ. ᓂᑯᓪᓴᓐ ᐱᖃᑎᒋᓪᓗᓂᐅᒃ ᐃᓕᑦᑎᓪᓗᓂ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᔪᓂᒃ ᐃᓕᑦᑎᓪᓗᓂᓗ ᖃᓄᖅ ᐃᓱᒪᒋᔪᓐᓇᐃᕈᓐᓇᕐᒪᖔᑦ ᐊᓈᓇᖓ. ᓅᓚᐅᖅᑎᓪᓗᒍ ᑭᖑᓂᑦᑎᓐᓂᑦ, ᓯᕗᓂᒃᓴᑦᑎᐊᕙᓕᐅᕈᓐᓇᖅᓯᓚᐅᖅᑐᖅ.  

"ᓇᓕᐊᑐᐃᓐᓇᖅ ᐃᓕᓐᓂᐊᕐᓂᖅ ᐱᐅᕗᖅ ᐃᓕᓐᓂᐊᖅᓯᒪᓂᐅᕗᖅ. ᑭᒃᑯᑐᐃᓐᓇᑦᑎᐊᓂᒃ ᐲᖅᓯᔪᖃᕈᓐᓇᙱᓚᖅ. ᓇᒻᒥᓂᕆᖏᓐᓇᐅᔭᖅᑕᐃᑦ. ᑭᓱᑐᐃᓐᓇᕐᒧᑦ ᐱᐅᖏᓐᓇᐅᔭᕐᓂᐊᖅᑐᖅ." 

ᐃᓕᓐᓂᐊᓚᐅᖅᑐᖅ ᐃᓕᓐᓂᐊᕐᕕᔾᔪᐊᒥ ᐊᒻᒪᓗ ᐃᓕᓴᐃᓪᓗᓂ ᔮᒃ ᑲᕕᐅᑦᒥᒃ. ᓂᑯᓪᓴᓐ ᐊᓂᒍᐃᑦᑎᐊᕐᓂᖓᓄᑦ ᐊᒻᒪ ᓂᑲᓪᓗᖓᔪᓐᓃᖅᖢᓂ ᐃᓚᖓᒍᑦ ᒪᓕᒐᒃᑯᑦ ᐱᔪᒥᓵᕆᓂᕐᒧᑦ "ᒫᓐᓇ ᐃᓅᕗᖓ ᓯᓐᓇᑦᑑᒪᒋᔭᓐᓂᒃ. ᐊᖑᑎᖃᖅᑐᖓ ᓇᓪᓕᒋᔭᓐᓂᒃ. ᓱᕐᕌᖏᑦᑐᒻᒪᕆᐊᓗᒃ. ᑐᑭᓯᐅᒪᔪᖅ ᖁᐊᖅᓵᖅᓯᒪᓂᕆᔭᓐᓂᒃ ᐊᒻᒪ ᐃᓕᕋᓇᙱᖦᖢᓂ ᐅᕙᓐᓂᒃ ᐅᕝᕙᓘᓐᓃᑦ ᐅᐃᕆᓯᒪᓂᕐᒥᒃ ᐊᒻᒪ ᐃᒥᐊᓗᖕᒥ. ᓯᓐᓇᑦᑑᒪᒋᔭᕗᑦ ᐊᖏᕐᕋᕆᓚᐅᖅᑕᕗᑦ ᐊᖏᒡᓕᒋᐊᖅᓯᒪᓪᓗᑎᒍᓪᓗ ᓇᖕᒥᓂᕆᔭᕗᑦ," ᓴᓚᐅᓪᓗᓂ. 

ᐃᓕᓐᓂᐊᖅᑎᑦᑎᓂᒃᑯᑦ, ᓂᑯᓪᓴᓐ ᓇᓂᓯᓯᒪᔪᖅ ᓴᙱᓂᕐᒥᒃ ᐅᖃᖅᑕᖏᓐᓂᒃ ᓲᕐᓗ "ᐱᔪᓐᓇᕋᓱᒋᒍᕕᑦ, ᐅᕝᕙᓘᓐᓃᑦ ᐊᔪᕋᓱᒋᒍᕕᑦ − ᓱᓕᔪᑎᑦ" ᐊᒻᒪ ᐃᓱᒪᒋᔭᐅᔪᖅ "ᖃᓄᑐᐃᓐᓇᖅ ᐅᒃᐱᕆᒍᕕᐅᒃ, ᐱᖃᑦᑕᖅᑕᑦ." "ᐃᓛᓐᓂᒃᑯᑦ "ᖃᓄᖅ" ᓴᖅᑭᖃᑦᑕᕐᒪᖔᑦ ᐃᓱᒪᓕᐅᓚᐅᖅᑎᓪᓗᑎᑦ. ᐊᒻᒪᓗ ᐅᖃᒃᑲᓂᕐᓗᖓ, "ᖃᓄᖅ" ᓴᖅᑭᕈᓐᓇᕐᒪᖔᖅ ᐃᓱᒪᓕᐅᓚᐅᖅᑎᓪᓗᑎᑦ. ᐃᓕᓐᓂᐊᕆᐊᕈᒪᓕᕐᓂᕈᕕᑦ ᖃᐅᔨᒪᙱᓪᓗᑎᓪᓗ ᖃᓄᖅ ᐊᑭᓕᕐᓂᐊᕐᒪᖔᖅᐱᐅᒃ, ᖃᓄᐃᑦᑐᖃᕐᓂᐊᖅᑐᖅ," ᐅᖃᖃᑎᖃᓚᐅᖅᑐᖅ. 

ᓯᕗᒻᒧᑦ ᑕᑯᒋᐊᕐᓗᑕ, ᐸᕐᓇᐃᔪᖅ ᒪᓂᒪᑎᑦᑎᔪᒪᓪᓗᓂ ᓄᓇᖃᖅᑳᖅᓯᒪᔪᓂᒃ ᐳᓚᕋᖅᑐᓕᕆᓂᕐᒥᒃ ᐃᒪᕐᒥᐅᑕᓂᒃ ᓂᕆᑎᑕᐅᕙᒡᓗᑎᒃ ᐊᒻᒪ ᓄᓇᖃᖅᑳᖅᓯᒪᔪᑦ ᒥᖑᐊᕐᓗᑎᒃ ᐅᓐᓄᒃᑯᑦ. ᐃᒡᓕᖓ ᐅᓪᓛᕈᒥᑕᖃᑦᑕᕐᓂᕐᓗ ᑕᐃᔭᐅᕗᖅ ᓯᒻᔅ ᑐᔪᕐᒥᕕᒃ ᓲᖃᐃᒻᒪ ᓇᓄᖅᑕᖃᕐᒪᑦ ᐱᓱᕋᔭᒃᑐᓂᑦ ᓇᖕᒥᓂᕆᔭᐅᔪᒥᑦ. ᓂᖀᑦ ᑐᑭᖃᖅᐳᑦ ᓇᓄᖅ ᓅ−ᓵ−9−ᒥ. ᓂᑯᓪᓴᓐ ᓂᕆᐅᒃᑐᖅ ᐃᓕᓴᐃᒃᑲᓐᓂᕆᐊᒃᓴᖅ ᐃᓄᖕᒧᑦ ᐋᓐᓂᐊᕇᒃᑯᓯᖅᑕᐅᓚᐅᖅᑎᓪᓗᒍ ᓲᖃᐃᒻᒪ ᖃᓄᐃᙱᑦᑎᐊᕐᓇᕐᒪᑦ.

ᑖᓐᓇ "Ukrindian" Trailblazer ᑭᒡᒐᖅᑐᐃᔨᑦᑎᐊᕙᐅᕗᖅ ᐃᓕᓐᓂᐊᕐᓂᓕᕆᓂᕐᒧᑦ, ᐳᓚᕋᖅᑐᓕᕆᓂᕐᒧᑦ ᐊᒻᒪ ᖃᓄᐃᙱᑦᑎᐊᕐᓂᕐᒧᑦ ᓇᖕᒥᓂᖃᖅᑎᐅᓪᓗᓂ ᐊᒻᒪ ᑭᓇᑭᐊᖅ ᐅᒃᑯᐃᖓᔪᒥᒃ ᐹᖃᖅᑐᖅ ᑭᓇᑐᐃᓐᓇᕐᒧᑦ ᐃᓕᑦᑎᔪᒪᔪᒧᑦ ᑖᔅᓱᒥᖓ ᐃᑲᔪᖅᓱᖅᑕᐅᓗᓂᓗ ᓇᖕᒥᓂᖅ ᐅᓂᒃᑳᖓᓂ. ᐱᕈᖅᓴᔭᐅᓚᐅᖅᑎᓪᓗᒍ ᓴᓂᕐᕙᒃᑕᐅᒪᔪᒧᑦ, ᓇᓂᓯᓪᓗᓂ ᓄᓇᓕᖕᒥ ᓯᑯᒥ, ᓇᐃᐆᒥ ᓂᑰᓪᓴᓐ ᓴᓇᓪᓗᓂ ᐱᓯᓂᓯᒥᒃ ᓄᓇᒥ ᓇᓂᓯᓪᓗᓂᓗ ᓇᒡᓕᖕᓂᕐᒥᒃ ᐃᑲᔪᖅᑐᒥᒃ ᑲᔪᓯᑎᓪᓗᒍ. 

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.