"ᓯᕗᓪᓕᖅᐹᖅ ᐱᕙᓪᓕᐊᔪᓕᕆᔨᓂᒃ ᐅᓂᒃᑳᑲᑕᖕᓂᐅᕗᖅ," ᐹᓪ ᐋᓐᓄᓘ ᐅᓂᒃᑳᖅᐳᖅ. ᐹᓪ ᓲᑕᑏᓐ (ᖃᖅᑲᒥ ᐊᓪᓚ) ᑐᓚᐃᑕᒥᑦ, ᔭᓗᓇᐃᒥ ᓄᓇᖃᖅᑐᖅ ᐅᓂᒃᑳᖃᑦᑕᖅᓯᒪᓪᓗᓂᓗ. ᐃᓅᓂᑰᓪᓗᓂ ᓄᓇᒥ, 14-ᓂᒃ ᐊᕐᕌᒍᓂᒃ ᐃᓅᓚᐅᖅᓯᒪᔪᖅ ᕙᓯᒥ ᐊᒻᒪᓗ 7-ᓂᒃ ᐊᕐᕌᒍᓂᒃ ᐃᓕᓐᓂᐊᕆᐊᖅᑎᑕᐅᕙᓚᐅᖅᓯᒪᓪᓗᓂ. ᐊᖏᔪᖅᑳᕈᓚᐅᖅᑐᖅ ᐊᒻᒪᓗ ᑭᖑᓂᐊᒍᑦ ᓰᕖᓰᒃᑯᓐᓄᑦ ᐃᓚᒋᔭᐅᓕᓚᐅᖅᑐᖅ ᐃᖅᑲᓇᐃᔭᖅᑐᓂ ᓈᓚᐅᑎᒃᑯᑦ ᐊᒻᒪᓗ ᑕᓚᕖᓴᒃᑯᑦ ᐊᕐᕌᒍᓄᑦ 30-ᓄᑦ ᓄᖅᑲᕋᓱᐊᕐᓂᖓᓂ. ᐃᓛᓐᓂᓚᐅᓱᖓᖅ, ᑳᓐᑐᕌᒃᑯᑦ ᐃᖅᑲᓇᐃᔭᖃᑦᑕᖅᑐᖅ ᓄᖅᑲᕕᑦᑐᓂ.

ᓯᕗᓪᓕᖅᐹᒥ ᐱᖃᑕᐅᓕᓚᐅᖅᑐᖅ ᓈᓚᐅᑎᒃᑯᑦ ᐃᑲᔪᖅᑐᓂ ᖃᓪᓗᓇᐅᔭᕈᓐᓇᖏᑦᑐᓂᑦ ᐊᓪᓚᓂᑦ ᑕᐅᕙᓂ ᖃᓪᓗᓈᑎᑐᑦ ᐅᖃᕈᓐᓇᖏᑦᑐᓂᑦ ᑭᓯᐊᓂ ᑐᓴᖅᑎᑕᐅᒋᐊᖃᓚᐅᖅᑐᑦ ᓴᖅᑭᐸᓪᓕᐊᔪᓂᑦ ᑕᐃᔅᓱᒪᓂ. ᓄᓇᑖᕋᓱᐊᕐᓂᕐᒧᑦ, ᓱᓪᓗᓕᓐᓂᒃ ᐱᕙᓪᓕᐊᑎᑦᑎᓂᖅ, ᓄᓇᒥᒃ ᐊᑐᕐᓂᕐᒧᑦ ᐱᔪᓐᓇᐅᑎᐅᔪᑦ, ᐱᕙᓪᓕᐊᔪᓕᕆᓂᕐᒧᑦ ᑲᔪᓯᑎᓪᓗᒍ, ᐃᓄᑐᖃᕐᓂᒃ ᑐᓴᐅᒪᑎᑦᑎᔪᒪᓚᐅᕐᒪᑦ ᐊᒻᒪᓗ ᓄᓇᓕᓐᓂ ᓈᓚᐅᑎᒃᑯᑦ ᐱᓕᕆᑎᓪᓗᒍ ᓰᕖᓰᒃᑯᓐᓄᑦ ᐃᓚᐅᓕᓚᐅᕋᓂ, ᐃᑲᔪᕈᓐᓇᓚᐅᖅᑐᖅ ᐊᒻᒪᓗ ᑐᓂᓯᒍᓐᓇᖅᑐᓂ ᓄᓇᓕᓐᓄᑦ ᑐᓴᐅᒪᑎᑦᑎᓪᓗᓂ ᐃᓄᓐᓂᒃ ᐃᖅᑲᓇᐃᔮᒥᓂᒃ ᐱᕙᓪᓕᐊᑎᓪᓗᒍ.

ᐃᓱᒪᒋᓪᓗᒍ ᖃᓄᖅ ᐱᕙᓪᓕᐊᔪᓕᕆᔨᙳᓚᐅᕐᒪᖔᑦ, ᐋᓐᓄᓘ ᐊᒃᑐᐊᓂᖃᖅᐳᖅ ᐃᓕᓐᓂᐊᖅᓯᒪᔭᖏᓐᓂᒃ ᐅᖃᖅᖢᓂᓗ, "ᐱᒻᒪᕆᐅᕗᖅ ᐃᖅᑲᐅᒪᓗᒍ ᐊᓪᓚᐃᑦ ᐅᓂᒃᑳᑦᑎᐊᒃᑲᒻᒪᕆᐊᓘᓂᖏᓐᓂᒃ. ᐃᓕᓐᓂᐊᖅᓯᒪᔭᕆᐊᖃᙱᑦᑐᑎᑦ ᐅᓂᒃᑳᕈᓐᓇᖁᓪᓗᑎᑦ. ᐅᓂᒃᑳᖅᑎᖃᑦᑎᐊᖃᑦᑕᖅᓯᒪᕗᒍᑦ ᑕᐅᕗᖓᓕᒫᖅ. ᑖᒃᑯᐊ ᐃᓄᐃᑦ ᐅᕙᑦᑎᓐᓂᒃ ᐃᓕᓐᓂᐊᑎᑦᓯᓚᐅᖅᑐᑦ ᖃᐅᔨᒪᔭᑦᑎᓐᓂᒃ. ᐃᓕᓐᓂᐊᕐᓂᖃᓚᐅᙱᑦᑐᑦ ᑭᓯᐊᓂ ᖃᐅᔨᒪᓚᐅᖅᑐᑦ ᖃᓄᖅ ᐅᓂᒃᑳᕆᐊᒃᓴᖅ."

ᐱᔭᕆᐊᑐᔪᓂᒃ ᐱᑕᖃᕋᓗᐊᖅᑎᓪᓗᒍ ᐃᓕᒍᓐᓇᖅᑐᓂᒃ ᐃᖅᑲᓇᐃᔭᖅᑎᓪᓗᒋᑦ, ᐋᓐᓄᓘ ᑎᓕᐅᕆᔪᖅ ᐃᓄᓐᓂᒃ ᐃᖅᑲᐅᒪᖁᓪᓗᒋᑦ ᓘᑦᑖᑦ ᐊᒻᒪᓗ ᒪᓕᒐᓕᕆᔨᐅᔪᑦ ᐃᓕᒋᐊᖃᒻᒪᑕ ᖃᓄᖅ ᐱᓕᕆᒍᓐᓇᕐᓂᕐᒥᒃ ᐃᖅᑲᓇᐃᔮᒥᓂᒃ. "ᐃᓚᖓ ᐃᓕᓪᓚᕆᓚᐅᖅᑕᕋ ᐊᑐᕐᓂᐊᕐᓗᒋᑦ ᐊᔪᙱᓐᓂᑎᑦ. ᐅᓂᒃᑳᖅᑎᐅᒍᕕᑦ, ᐅᖃᓪᓚᒍᓐᓇᖅᑐᑎᑦ, ᑭᓇᑐᐃᓐᓇᑦᑎᐊᒧᑦ ᐅᖃᕈᓐᓇᖅᑐᑎᑦ ᓈᓚᖁᓪᓗᑎᑦ, ᑕᒪᓐᓇ ᐱᒋᐊᕈᑎᑦᑎᐊᕙᐅᔪᖅ ᐱᕙᓪᓕᐊᔪᓕᕆᔨᓄᑦ," ᑲᔪᓯᓪᓗᓂ.

ᐋᓐᓄᓘ ᐱᕙᓪᓕᐊᔪᓕᕆᔨᒻᒪᕆᐅᕗᖅ ᐊᒻᒪ ᐅᐱᒍᓱᒃᖢᓂ ᐊᓪᓚᓂᒃ. ᐃᓄᖁᑎᒥᓂᒃ ᐅᖃᓚᐅᖅᓯᒪᔪᖅ ᐊᒻᒪᓗ ᐱᐅᓂᖏᓐᓂᒃ ᐊᖏᖃᑎᒌᒐᓱᐊᕐᓂᐅᔪᑦ 11-ᒧᑦ. "ᐃᓕᓐᓂᐊᕆᐊᖅᑎᑕᐅᕙᓚᐅᖅᑐᑦ ᐊᒻᒪ ᓄᓇᑐᖃᕆᙱᑕᒥᓄᑦ ᓄᓇᑖᖅᑎᑕᐅᓯᒪᔪᑦ ᐅᒃᐱᕈᓱᓕᖅᑎᓐᓇᓱᓪᓚᕆᓚᐅᖅᑕᕗᑦ ᐱᐅᙱᓐᓂᑦᑎᓐᓂᒃ, ᐱᐅᓯᑦᑎᓐᓂᒃ, ᐅᒃᐱᕆᔭᕗᑦ ᐱᐅᙱᓐᓂᖏᓐᓂᒃ. ᑕᒪᓐᓇ ᐅᑉᐱᕆᒍᑦᑎᒍ, ᐊᓯᑦᑕ ᑐᓂᕐᕈᑎᖏᓐᓂᒃ ᑐᓂᓯᓇᓱᐊᕐᓂᐊᖅᑐᒍᑦ. ᑭᓯᐊᓂ ᑐᓂᕐᕈᓯᐊᖃᕇᕋᑦᑕ. ᐅᔾᔨᕈᓱᒋᐊᖃᑐᐃᓐᓇᖅᑐᒍᑦ ᑲᒪᓇᖅᖢᓂᓗ ᖃᓄᑎᒋ ᐅᖓᓯᒃᑎᒋᔪᓐᓇᖕᒪᖔᑦᑎᒍᑦ," ᐅᖃᑦᑎᐊᓲᖅ.

ᑕᑯᓯᒪᔭᖓ ᐃᓅᓯᖓᓂ ᓴᖅᑭᑉᐸᓪᓕᐊᔪᖅ ᐃᒃᐱᒍᓱᑦᑎᐊᕐᓂᕐᒥᒃ ᓄᓇᖃᖅᑳᖅᓯᒪᔪᑦ ᖃᐅᔨᒪᔭᖏᓐᓂᒃ ᖁᓱᙱᓐᓂᖅᓴᐅᓕᕐᓂᕐᓗ ᐃᓄᖁᑎᖏᓐᓂ ᐊᒥᖅᑳᕈᑎᖃᕐᓗᑎᒃ ᓯᓚᑐᓂᕐᒥᓂᒃ. ᐃᖅᑲᓇᐃᔮᖓᒍᑦ ᐱᕙᓪᓕᐊᔪᓕᕆᔨᐅᓂᒃᑯᑦ, ᑐᓴᖅᑎᑦᑎᓇᓱᐊᖅᓯᒪᔪᖅ ᖃᐅᔨᒪᔭᒥᓂᒃ ᐃᓄᖁᑎᖏᓐᓂᓪᓗ.  "ᖃᐅᔨᒪᓂᖃᕐᓂᖅ ᐊᕙᑎᒥᒃ ᑲᒪᓇᖅᑑᕗᖅ, ᓯᓚᓕᕆᓂᖅ ᑲᒪᓇᖅᑑᕗᖅ. ᖃᓄᑐᐃᓐᓇᖅ ᐃᓱᒪᒋᔭᑦ, ᐊᓪᓚᐃᑦ ᖃᐅᔨᒪᓂᖃᕐᔪᐊᖅᑐᑦ ᑕᒪᑐᒥᖓ," ᐅᖃᐅᓯᕆᕙᖏᑦ.

ᓄᓇᖃᖅᑳᖅᓯᒪᔪᓄᑦ ᐃᓕᓐᓂᐊᖅᑎᓄᑦ ᐊᖏᕐᕋᒥᓂᒃ ᐊᐅᓪᓚᖅᑐᓄᑦ, ᐋᓐᓄᓘ ᐅᖃᐅᔾᔪᐃᒋᐊᖅᑐᖅᓯᒪᔪᖅ, "ᐱᕚᓪᓕᕐᓇᑦᑎᐊᖅᑐᖅ, ᑭᖑᓂᖃᓈᕆᐊᖃᙱᑕᑦ. ᓯᓚᔾᔪᐊᕐᒦᖃᑕᐅᒋᑦ!" ᐅᖃᐅᓯᖃᕐᒪᑦ ᖃᓄᖅ ᓱᕈᓰᑦ ᐃᓕᓐᓂᐊᓲᖑᒻᒪᖔᑕ ᐱᕈᖅᑐᓂᒃ ᑭᓯᐊᓂ ᑕᑯᕙᙱᓪᓗᒋᑦ ᐅᑭᐅᖅᑕᖅᑐᒥ ᐊᒻᒪᓗ ᖃᓪᓗᓈᑦ ᓄᓇᖓᓐᓅᖅᐸᑦᑐᑎᒃ ᑰᑯᓯᓂᒃ ᐊᒻᒪᓗ ᐊᕐᓇᕐᓂᒃ ᐊᒻᒪᓗ ᓄᓇᕐᔪᐊᓕᒫᒥᒃ ᒪᑐᐃᖅᑐᖃᕋᐃᒻᒪᑦ. ᐅᖃᐅᓯᖃᖅᖢᓂ ᓄᒃᑕᕐᓂᕐᒥᒃ, ᐃᒪᓐᓇ ᐅᖃᖅᖢᓂ, "ᐱᒃᑯᒋᔭᖃᖅᐳᑎᑦ ᑭᓇᐅᓂᕐᓂᒃ, ᓇᑭᙶᕐᓂᕐᓂᒡᓗ." ᐱᕕᖃᖅᑎᑦᑎᖕᒥᔪᖅ ᑲᑎᒍᑎᓗᒋᑦ ᐃᓄᑦᑎᐊᕙᑦ ᓄᓇᕐᔪᐊᒥ ᐊᒥᖅᑳᖃᑎᒌᒃᓗᑎᒃᓗ ᖃᐅᔨᕚᓪᓕᕐᓗᑎᒃᓗ.

ᐃᓅᓯᖓᓂ, ᐋᓐᓄᓘ ᐊᒥᓱᓂᒃ ᐊᐳᖅᑕᕈᑎᖃᖃᑦᑕᖅᓯᒪᔪᖅ. 1950-ᖏᓐᓂᑦ 1960-ᖏᓐᓂᑦ, ᐃᖅᑲᐅᒪᔪᖅ ᖃᓄᖅ ᐱᐅᓚᐅᙱᒻᒪᑦ ᓄᓇᖃᖅᑳᖅᓯᒪᓗᓂ ᑲᓇᑕᒥ, ᖃᔅᓯᐊᕐᔪᐃᑦ ᐃᓄᐃᑦ ᓈᓚᒐᔭᖕᒪᖔᖏᑦ ᓄᓇᖃᖅᑳᖅᓯᒪᔪᑦ ᐃᓱᒪᒋᔭᖏᓐᓂᑦ ᖃᓄᑎᒋᓗ ᐅᕕᓂᖃᑎᒋᙱᑕᒥᑦ ᐊᑭᕋᖅᑐᖕᓂᖃᓚᐅᖕᒪᖔᑦ. ᐃᑲᔪᓚᐅᖅᑐᖅ ᐊᓂᒍᐃᔪᓐᓇᕐᓂᖓᓄᑦ ᐊᒃᓱᕈᕐᓇᖅᑐᓂᒃ ᓯᓚᑐᓂᖏᓐᓄᑦ ᐃᓐᓇᑐᖃᐃᑦ. "ᐃᓐᓇᑐᖃᐃᑦ ᐅᖃᐃᓐᓇᐅᔭᖅᑐᑦ 'ᖃᓄᐃᓕᐅᕈᓐᓇᖅᑐᑎᑦ. ᖃᓄᐃᑦᑐᓐᓃᖅᐸᓪᓕᐊᔪᓐᓇᖅᑐᑎᑦ ᑭᓱᑐᐃᓐᓇᕐᒥᑦ. ᑭᓱᑐᐃᓐᓇᑦᑎᐊᓂᒃ ᐃᒋᑦᑎᔪᓐᓇᖅᑐᑦ ᓄᓇᕐᔪᐊᕐᒥ, ᐃᓕᖕᓂᒃ ᐋᓐᓂᖅᑎᑦᑎᔪᓐᓇᖅᑐᑦ. ᑲᑕᑦᑎᑦᓯᒍᓐᓇᖅᑐᑦ ᐃᓕᓐᓂᒃ, ᖃᓄᑐᐃᓐᓇᖅ ᐅᖃᕈᓐᓇᖅᑐᑦ ᐊᒻᒪᓗ ᐃᓕᓐᓄᑦ. ᑕᐃᓐᓇᑐᐊᖅ ᐃᓕᖕᓂᒃ ᑲᑕᒃᑎᑦᑎᓂᐊᖅᑐᖅ. ᐃᓕᓐᓂᐊᖅᑎᑉᐸᑦᑎᒋᑦ ᐊᖑᓇᓱᒃᑎᑦᑎᐊᕙᐅᓂᕐᒥᒃ. ᐃᓕᓐᓂᐊᖅᑎᑉᐸᔅᓯ ᐃᓄᑦᑎᐊᕙᐅᓂᕐᒥᒃ. ᐃᓕᓐᓂᐊᖅᑎᑉᐸᔅᓯ ᖃᓄᑐᐃᓐᓇᖅ ᐱᔾᔪᑕᐅᔪᓂᒃ ᐱᓕᕆᖁᓪᓗᑎᑦ," ᐃᖅᑲᐅᒪᔪᖅ.

ᑭᖑᒧᑦ ᑕᑯᓪᓗᓂ, ᐋᓐᓄᓘᐅᑉ ᑐᓴᓚᐅᖅᑕᖓ ᐱᒻᒪᕆᐅᓂᖓᓂ ᐅᐊᓕᓂᕐᒥᑦ ᐃᓕᓐᓂᐊᕐᓂᖅ. ᑕᐃᔅᓱᒪᓂ, ᐃᓄᐃᑦ ᓄᓇᒥ ᓄᓇᖃᓚᐅᖅᓯᒪᔪᑦ ᐊᒻᒪ ᐃᓕᓐᓂᐊᕐᓂᖅ ᐱᔭᐅᔭᕆᐊᖃᙱᖦᖢᓂ. ᑕᑯᓚᐅᖅᑐᖅ ᓴᓐᖏᓂᖏᓐᓂᒃ ᐃᓄᖁᑎᖏᑕ ᓄᓇᖃᑦᑐᑦ ᓄᓇᑐᐃᓐᓇᕐᒥ ᓯᓚᒃᑯᑦ. ᒫᓐᓇ, ᐃᓕᓐᓂᐊᕐᓂᖅ ᐱᒻᒪᕆᐅᓂᖅᓴᐅᓕᖅᑐᖅ ᑮᓇᐅᔭᑎᒍᓪᓗ ᐃᑲᔪᖅᑕᐅᓂᖅᓴᐅᖃᑦᑕᓕᖅᖢᓂ, ᐃᓱᒪᔪᖅ ᑎᑭᐅᑎᔪᓐᓇᕋᓱᒋᓪᓗᓂᐅᒃ ᓄᓇᖃᖅᑳᖅᓯᒪᔪᑦ ᒪᒃᑯᒃᑐᖏᓐᓄᑦ.

"ᐃᓄᖃᐃᓐᓇᐅᔭᖅᑐᒍᑦ ᓯᓚᑐᔪᓂᒃ ᐃᓄᖕᓂᒃ. ᓴᙱᔪᓂᒃ ᐃᓄᖃᐃᓐᓇᐅᔭᖅᑐᒍᑦ. ᐊᒃᓱᕈᖅᑐᓂᒃ ᐃᖅᑲᓇᐃᔭᖅᑎᖃᐃᓐᓇᐅᔭᖅᑐᒍᑦ."

ᖃᓄᐃᙱᑦᑎᐊᕐᓂᐅᑉ ᐱᔾᔪᑎᒋᓪᓗᒍ, ᐋᓐᓄᓘ ᐃᒻᒥᓂᒃ ᑲᒪᒋᓇᓱᖃᑦᑕᖅᐳᖅ ᐃᓱᒪᒃᑯᑦ, ᐃᒃᐱᒋᔭᒃᑯᑦ, ᐅᒃᐱᕐᓂᒃᑯᑦ ᐊᒻᒪ ᑎᒥᒃᑯᑦ. ᐃᓱᒪᒥᓂᒃ ᐊᑭᓴᖅᑐᕋᓱᒃᓗᓂ, ᐃᒃᐱᒋᔭᒥᓂᒃ ᓱᖁᑎᒃᓴᙱᖦᖢᓂ, ᐃᒻᒥᓂᒃ ᐅᒃᐱᕐᓂᖃᕋᔪᒃᖢᓂ ᐊᒻᒪ ᐃᓅᖃᑎᒥᓂᒃ ᐊᕙᓗᓯᒪᑦᑎᐊᖅᖢᓂ. ᐋᓐᓄᓘ ᐅᔾᔨᕈᓱᖃᑦᑕᖅᑐᖅ ᖃᓄᖅ ᓂᕆᖃᑦᑕᕐᒪᖔᖅ, ᐃᖃᐃᓕᓴᖃᑦᑕᕐᒪᖔᖅ, ᐊᒻᒪ ᐃᒡᓚᖃᑦᑕᕐᒪᖔᖅ, ᐅᓂᒃᑳᖅᑐᐊᓂᑦ, ᓂᔾᔭᐅᓯᔭᖃᑦᑕᕐᒪᖔᖅ ᐊᒻᒪ ᐃᑲᔪᕐᓱᐃᕙᒻᒪᖔᖅ ᓄᓇᓕᓐᓂᑦ.

ᐱᔪᒃᓯᑎᑦᑎᔪᒪᓕᕌᖓᑦ, ᐋᓐᓄᓘ ᐊᖓᔪᖅᑳᒥᓂᒃ ᑕᐅᑐᒃᐳᖅ. "ᐃᓄᑦᑎᐊᕙᖕᓂᙶᖅᑐᖓ. ᑕᑯᑎᒍᒪᑐᐃᓐᓇᖅᑕᒃᑲ ᓄᓇᕐᔪᐊᓕᒫᕗᑦ ᑕᒪᓐᓇ ᑲᒪᓇᖅᑐᒻᒪᕆᐅᒻᒪᑦ. ᑕᐃᒫᒃ ᐃᓅᒐᓱᐊᖃᑦᑕᖅᑐᖓ ᐊᒻᒪᓗ ᑕᒪᓐᓇ ᑐᓱᓐᓇᕆᒐᒃᑯ. ᑕᐃᒃᑯᐊ ᐅᕙᓐᓂᒃ ᓇᒃᓴᓚᐅᖅᑐᑦ ᐅᐱᒍᓱᖁᕙᒃᑲ ᐹᓪ ᐋᓐᓄᓘᒥᒃ."

ᐱᔭᕇᕈᑎᒋᓗᒍ, ᐋᓐᓄᓘ ᐅᖃᐅᓯᖃᖅᑐᖅ, "ᐊᒥᓱᓂᑦ ᐃᓅᓯᓕᕆᓂᕐᒧᑦ ᐃᓱᒫᓘᑎᖃᖅᑐᒍᑦ ᐅᑭᐅᖅᑕᖅᑐᒥᑦ. ᐃᓛᓐᓂᒃᑯᑦ ᐃᓄᐃᑦ, ᐱᓗᐊᖅᑐᒥ ᒪᒃᑯᒃᑐᑦ, ᐊᒃᓱᕈᕐᓇᖅᑐᖅᓯᖃᑦᑕᕐᒪᑕ ᐃᓛᓐᓂᒃᑯᓪᓗ ᓂᕆᐅᖕᓂᖃᙱᖦᖢᑎᒃ ᐊᒻᒪ ᐃᓄᑑᓗᐊᖅᖢᑎᒃ." ᒪᒃᑯᒃᑐᓂᒃ ᖃᐅᔨᒪᖁᔨᕗᖅ ᐃᒪᓐᓇ, "ᓂᕆᐅᒋᔭᖃᑦᑎᐊᕐᓇᖅᐳᖅ ᓴᐱᓕᖅᑕᐃᓕᓗᑎᓪᓗ. ᖃᓄᑐᐃᓐᓇᖅ ᐊᑲᐅᙱᓕᐅᕈᑎᑕᖃᕋᓗᐊᖅᐸᑦ, ᐊᓂᒍᖅᑎᑦᑐᓐᓇᖅᑕᑦ."

ᐱᕙᓪᓕᐊᔪᓕᕆᔨ, ᐹᓪ ᐋᓐᓄᓘ ᓇᓂᓯᔭᖅᑐᓚᐅᖅᑐᖅ, ᐅᓂᒃᑳᑲᑕᐃᓐᓇᖅᖢᓂ, ᐃᖅᑲᓇᐃᔮᖃᑦᑎᐊᖅᖢᓂᓗ. ᐃᑲᔪᖅᑐᓂ ᖃᓪᓗᓇᐅᔭᕈᓐᓇᖏᑦᑐᓂᒃ ᐃᓐᓇᑐᖃᕐᓂᒃ ᓄᓇᓕᖓᓐᓂ ᑐᓴᐅᒪᐃᓐᓇᖁᓪᓗᒋᑦ ᑐᓴᕋᑖᖑᓂᖅᐹᓂᒃ, ᑐᓂᓯᓯᒪᑦᑎᐊᖅᑐᖅ ᓯᓚᑐᓂᓕᒫᓂᒃ ᐊᒻᒪᓗ ᐅᓂᒃᑳᓂᒃ ᐅᖃᐅᓯᕆᖃᑦᑕᖅᓯᒪᔭᖏᓐᓂᒃ. ᐅᐱᒋᓪᓗᒍ ᐊᓪᓚᐃ ᐊᖑᑦ, ᑐᓂᓯᓚᐅᖅᑐᖅ ᐅᓂᒃᑳᒥᓂᒃ ᐅᓂᒃᑳᖅᖢᓂ ᓈᓚᒋᐊᖅᑐᖅᓯᒪᔪᓄᑦ ᐊᒻᒪᓗ ᖃᐅᔨᒪᓂᕆᔭᖏᓐᓂᒃ ᐃᓄᖁᑎᖏᑕ ᓈᓚᐅᑎᒃᑰᖅᑎᐅᓂᖓᓂᒃ ᐱᑕᖃᙱᓐᓂᐅᔪᒥᒃ ᐃᓕᖅᑯᓯᖃᑎᒌᙱᑦᑐᓂᒃ.

ᖁᔭᓐᓇᒦᒃ ᐋᓕᓴᓐ ᑎᐊᑦᕗᑦ ᔅᕗᐊᑦ ᑎᑎᕋᓚᐅᕐᒪᑦ ᑖᔅᓱᒥᖓ.